Post: #1
Title: عاوز لى موبايل قنبلة !!
Author: صلاح أبودية
Date: 09-22-2010, 11:13 AM
Parent: #0
قنبله يعنى قنبله يعنى بنفجر عديل كده !
ياخ معقول ؟
يجيك زول فى المكتب .. تسلم عليهو وتجرى ليهو اللازم وتكرمو
وتقريهو الجرايد كلها رياضية وسياسية !
بعد ده كلو ..
تلفونك يضرب يخلى كل شئ ويفتح خشمو ويعاين ليك زى الداير يعطس !
إتكلمت مع البوليس فى موضوع يخص الأولاد ورسوم المدارس ..
طوالى إستلم الموضوع والله الرسوم دى مفروض الرئيس يكون عندو فيها رأى قاطع ...
الرئيس طوالى يا عمك ؟؟ ما نشوف النائب فى الأول !!
ضرب لى واحد يعزينى فى خالتى ..
وبعد إنتهيت من المكالمة طوالى صاحبك بى طول حسو الفاااتحة لمن خلعنى !
أها بعد داك شلت الفاتحه مع طلطاشر نفر كده !
ضربت لى أمى قالت عاوزة تمشى الحاج يوسف لأختها عشه !
إقترحت عليها نمشى يوم الخميس !
صدقوا الزول ده نط لى فى حلقى وقال لى الجمعة أحسن !!!
الشوارع بتكون فااااضية ، عليك الله فى زول فاضى زيك ؟
وبين هذا وذاك كل مرة يسألنى من خبر منشور فى الجريدة !
صحى البتين ديل مرقوا من يوم العيد لغاية هسى ما لقوهن ؟؟
أطنش من سؤالو يشبكنى ليك : آ آ آ آ صحى ما لقوهم آ آ آ ؟؟
وتعليقات مختارة من الجرايد .. ياخ والله وزير الماليه ده ببالغ عديل كده !
برضو أطنش !
معقول يا جماعة..؟ بالله صلاح إدريس ده جنّ ولّ شنو !
أستمر أنا فى الطناش ، ويفاجئنى بالسؤال : عليك الله ما عندك شاحن إبره ؟؟
الإبره التقدد عيونك .. الزول ده البحلنى منو شنو يا جماعة !!
تلفونى يضرب تانى ..
وتانى يعاين لى ويعاين للتلفون وانا المرة دى قررت ما أرد..
حتى لو ضارب لى وارغو زاتو !!
أها صاحبك بقى يعاين لى ويعاين للموبايل والشمار كاتلو..
فى النهاية قال لى ما ترد على الزول ده إمكن فى حاجة مهمة !
قلت ليهو هاك رد إنت ...
و بووووووووم !!!
|
Post: #2
Title: Re: عاوز لى موبايل قنبلة !!
Author: omer osman
Date: 09-22-2010, 11:18 AM
Parent: #1
لم تخترع البشرية جهاز اكثر ازعاج من هذا الموبايل .................
كثيراً ما اغلق تلفوني في احدي المرات استمرت لمدة شهر تقريباً ......
الموبايل يخرجك من جو ومحيط وزمان الموقع الذي توجد فيه ...........
ظني في القريب العاجل ربما الغي وجود هذا الجهاز من حياتي تماماً ..........
|
Post: #4
Title: Re: عاوز لى موبايل قنبلة !!
Author: صلاح أبودية
Date: 09-22-2010, 11:55 AM
Parent: #2
يا جنابو عمر
كل سنه وإنت طيب والأولاد
Quote: لم تخترع البشرية جهاز اكثر ازعاج من هذا الموبايل .................
كثيراً ما اغلق تلفوني في احدي المرات استمرت لمدة شهر تقريباً ......
الموبايل يخرجك من جو ومحيط وزمان الموقع الذي توجد فيه ...........
ظني في القريب العاجل ربما الغي وجود هذا الجهاز من حياتي تماماً |
فى الجيش فى حاجة إسمها فرض الصمت اللاسلكى
ويتم بقفل كل الأجهزة اللاسلكية العاملة
نحن بطريقتنا دى دايرين لينا ثلاثة أربعة يوم فى الإسبوع فرض صمت لاسلكى
نرتاح فيها من الموبايل شوية كده !
|
Post: #5
Title: Re: عاوز لى موبايل قنبلة !!
Author: omer osman
Date: 09-22-2010, 12:20 PM
Parent: #4
Quote: فى الجيش فى حاجة إسمها فرض الصمت اللاسلكى
ويتم بقفل كل الأجهزة اللاسلكية العاملة
نحن بطريقتنا دى دايرين لينا ثلاثة أربعة يوم فى الإسبوع فرض صمت لاسلكى
نرتاح فيها من الموبايل شوية كده ! |
********* الصمت اللاسلكي *********
ياسعادتك ايامي في الدفاع الشعبي .......... خلتنا نقشنا حاجات كتيرة من ناس الجيش
ايامي في معسكر الدفاع الشعبي .....
لك ولهم التحية والتقدير .............
|
Post: #3
Title: Re: عاوز لى موبايل قنبلة !!
Author: الفاضل يسن عثمان
Date: 09-22-2010, 11:26 AM
Parent: #1
ابودية جاري العزيز
الاجدي البحث عن صديق خفيف الظل
بدل موبايل قنبلة ومصطلحات الشرطة٠ فانتم برهافة حسكم
وطبيعة شغلكم٠ تحتاجون لمتنفس ليس موجود بالكتالوج
بل في احياء العاصمة المختلفة٠
ولا اقول لك فتش موبايل اب شريحتين ممكن المساعدة في ذلك
تضامني ومودتي
|
Post: #6
Title: Re: عاوز لى موبايل قنبلة !!
Author: صلاح أبودية
Date: 09-22-2010, 12:58 PM
الأخ الفاضل يس
كل سنة وإنت طيب
| Quote: ولا اقول لك فتش موبايل اب شريحتين ممكن المساعدة في ذلك |
يا الفاضل ياخ نحن بشريحة واحدة ماقادرين نعيش كمان نعملن شريحتين ؟
|
Post: #7
Title: Re: عاوز لى موبايل قنبلة !!
Author: جمال محمود
Date: 09-22-2010, 07:36 PM
Parent: #6
الاخ صلاح أبودية
المشكلة ما فى الموبايل المشكلة فى نوعية الحشار بتاعك ده .. ياخى دى نوعية تخلك مش تكسر الموبايل دى تخليك تقدم استقالتك عددددددددديل كده عشان ما يجى تانى
مودتى
|
Post: #8
Title: Re: عاوز لى موبايل قنبلة !!
Author: SHIBKA
Date: 09-22-2010, 09:05 PM
Parent: #7
شرطة وجيش ؟؟؟؟؟؟؟!!!!!!!!!!!!!
دا بوست قنبلة
مع السلامة انا ماشة منو
|
Post: #11
Title: Re: عاوز لى موبايل قنبلة !!
Author: صلاح أبودية
Date: 09-26-2010, 08:46 AM
Parent: #8
شبكة !
العيد مبارك
| Quote: مع السلامة انا ماشة منو |
ياخ معقوله وإنت متين جيتى عشان تمشى ؟
|
Post: #12
Title: Re: عاوز لى موبايل قنبلة !!
Author: SHIBKA
Date: 09-26-2010, 09:26 AM
Parent: #11
انتظرناك وما جيت
|
Post: #9
Title: Re: عاوز لى موبايل قنبلة !!
Author: صلاح أبودية
Date: 09-23-2010, 09:14 PM
Parent: #7
Quote: المشكلة ما فى الموبايل المشكلة فى نوعية الحشار بتاعك ده ..
ياخى دى نوعية تخلك مش تكسر الموبايل دى تخليك تقدم استقالتك عددددددددديل كده عشان ما يجى تانى
|
جمال محمود
كل سنة وإنت طيب
الله ينور عليك ياخ
|
Post: #10
Title: Re: عاوز لى موبايل قنبلة !!
Author: cantona_1
Date: 09-23-2010, 11:01 PM
Parent: #9
يا صلاح الموضوع بسيط .. لو إنت شغّال في السوق يعني ما موظف وصاحبك بحاول يجيك عشان يلقى شمار.. أول ما تلفونك يضربك.. بدل ترد .. تعلموا صامت.. وتتكلم مع الزول الضارب ليك: كلامك كله يكون بالمليون الجديد.. والجماعة حيدفعوا مقدم كم في المية... وعاوز تغيِّر العربية .. والشقة الفي الرياض عاوز تبيعها عشان لقيت واحدة أحلى منّها وهكذا كلام خارم بارم لحد ما يطق من الحسد. وبعد داك تغلق التلفون وكأن المحادثة إنتهت... مرتين في التالتة ما حيعتِّب مكتبك. تحياتي.
كبـــَّـاشي الصــَّــافي
|
|