"غلو المبالغة السودانية "

الغلوّ في اللغة : هو مجاوزة الحدّ والخروج عن القصد
المبالغة زيادة المعنى على التمام وتجاوز حد المعقول والغّلو في الكلام والفعل بغرض إحداث تأثير قويِّ في نفس المُتلقي، وتسمى أيضًا الإفراط والغلو والإيغال .

كاحد الناطقيين بغيرها (اي بغير اللغة العربية) تستوقفني كلمات عربية واحاول ان اربطها بمعايشة يومية وخصوصا اذا لم تكن في لغتي الاصلية ماي مزرتنق مرادف لها .. ومن هذه الكلمات "الغلو" و "المبالغة" .. وكنت اظن ان"الغلو" هو اعلي درجة من "المبالغة" ولكن عندما بحثت وجدت ان الغلو بعض من ادوات المبالغة .....واذكر انني ابتدرت موضوعا عن "المبالغات السودانية" قبل فترة ولكن حيث ان السودانيين لهم لازمة يعرفون من خلالها وهي " يااااخ بتبالغ " لدرجة انني انا ذاتي استعملتها يوما لاثبت لشيخ سعودي باني سوداني فلقد ضرب اخماس في اسداس ويحاول ان يعرف من اين انا وهو كان زائرا لعمل ما فاغتظت غيظا شديدا وتعجبت "كيف يعني ما عرفني انا البربري النوبي السوداني والممكلكة تعج بالاف منهم وليس في شكلي ما ينفي سودانويتي ولولا انه شيخ (بالمقام واللقب وليس بالعمر فلقد كان شابا ) وزائر زبون لكنت قد خرجت من طوري وانا نادر الخروج منه" وقلت باعلي صوت " بتبالاغ يااااخ " فضحك ضحكا شديدا وكان اصلا يعاني من رشح شديد وخفت ان يقع وقال "سوادنة " فانبسطت اساريري واضفت و"نوبي" فاستعدل وقال انكم الذين كان لكم دور في نشر الاسلام ( وقلت ربما يقصد بلال قريبنا ) ... المهم ونرجع للموضوع انا كان مزاجي استعمل "الغلو السوداني" لهذا البوست حتي لا اكرر العنوانالسابق "المبالغة السودانية " ولكن حيت قرءت ووجدت ان المبالغة اعلي درجات وانا اريد ان اشير الي افعال واقوال سودانية عالية جدا رايت ان اطلق علي الموضوع "غلو المبالغةالسودانية " وبهذا اكون قد ساهمت في ازدهار اللغة العربية كسبويه وقد كان من الناطقيين بغيرها مثلي ,,,,,

ومن نماذخ غلو المبالغة السودانية :
* ما سمعته اليوم في برنامج البوني ومني عن قافلة فطور ام العريس ...وحيث انني نوبي بربري و ولا علم لي سابق في ارثنا باية اعمال اضافية لام العريس غير انها ام العريس وبس وان الشعرية باللبن كانت من اعمال ام العروس وبمقدار فلقد اندهشت اندهاشا عظيما وخصوصا عندما ذكرو بان بعض الاغذية من فطور ام العريس تحمل في ثلاجات ....قافلة من السيارات وثلاجات تحمل فطورا من ام عريس سوداني في بلد مفتقر يطعم فيها برنامج الغذاء العالميس ملايين ويوموت الاف الاطفال من الجفاف ويموت الكبار ناشفيينواقفيين كاشجار كانت مخضرة فاصابها التصحر ....
الحمدلله كثيرا انو والدتي اطال الله عمرها لم تسير قوافل ولا نعاج ولا حتي سواسيو في اعراس اخواني وعرسي وانما ارسلت دعوات كثيرة تطلب من المولي عز وجل ان يسترها معانا وما زالت ....
*ومن النماذج العظيمة في غلو المبالغة السودانية اننا كنا اهل اطول حرب اهلية في افريقيا وذلك غلو في تسلط وعنصرية وضد اخواتنا واخواننا في ذات البلد والذين هم من دمنا ....
*ومن النماذج الاعدامات والاغتيالات السياسية كالتي حدثت لشهداء رمضان والذين دفنو احياء وكذلك اسري حرب واعدامات ومحاكمات صورية في الشجرة في العام 1971 وقتل عشوائي بتهمة الارتزاق لبشر سوداني غلبان في 1976 و
*ومن النكاذج في غلو المبالغة السودانية ما سميت ببيوت اشباح فلا اظن ان هنالك فيما قرءت ما يشبه ذلك الاختراع السوداني لتعذيب وقتل البشر فقط لانهم يعارضون اخريين سياسيا
*ومن النماذج كذلك الالقاب فهذا هرم وذلك قامة وغيره عبقري واخر ابوالفن ذاتو وذاك ابو النضال وغيره ابو الاستقلال وهكذا
*ومن النماذج ما يحدث لوجوه شابات في فضائيات سودانية تجعلك تري لاول مرة بني ادم بلونيين الوجه لون وباقي الجسد ما ظهر منه"ايدي ورقبة مثلا ) لون
*ومن النماذج كذلك البهدلة شكلا وحلركات وجوه ووساخة في الشوارع وكلاب ضالة وشر منكوش التثمليات والدراما السودانية هذه الايام
*ومن النماذج برنامج اغاني واغاني
*ومن النكاذج اصرار البعض علي ان مدينة واحدة هي كل السودان
*ومن النماذج النعوت والكلمات القاسية والنابية احيانا في هذا المنبر عند نقد موضوع او شخص اخر او اختلاف في راي
.. ايدي تعبت تمو الباقي ....من فضلكم .....

عجيب امرنا قضايانا الكبيرة والملحة يغيب الحديث عنها وتناولها وتضمر وتنزوي كل البوستات الخاصة بها بينما تكثر الالقاب عن الهرم والقامة والعظيم وهو يكون سئ الاداء وسببا في تردي حرفته او مهنته .....ياعالم !!!

استاذنا ابوبكر

مسكاقمي


السودان كلو قايم على المبالغة ، يعني شوف مساحة بلد تكون مليون ميل مربع ( دي ذاتها مش مبالغة) اهو في النهاية حيتقسم او حسب ما يقولون

فبقدر المليون ميل مربع حنلقا مليون نوع من انواع المبالغة في كل حاجة

في مفرداتنا بضيف كلمات مثل: ما معقول ( ناسنا طبعا بيقولوا مش معقول او ديما اندو )

السلام عليكم
تحياتي يا دفعة
...
ما عارف حكيت ليك الموقف ده في بوستك الفات أو لا وهو عن عدم اكتفائنا كسودانيين بالفاظ اللغة العادية للتعبير عن أنفسنا.
لذا فإننا نلجأ كثيراً لإستعمال ألفاظ غاية في المبالغة والغلو لتوصيل تصورنا عن الشيء الذي نتحدث عنه
وأحيانا هذا الغلو نفسه لا يكفينا
فنلجأ لموسيقى الكلام التصويرية ، مثلاً
عايز أوصل معلومة انو في زول دخل بيت بسرعة مثلاً
فالسوداني سيقولها هكذا :
والله ( لاحظ للحليفة الغير مطلوبة ) الزول ده جانا طاير عديل كده
ولو رأى إن هذا المبالغة لا تكفي ، فسيقول لك
والله الزول ده توووووووووووشك .... جانا طاير
....
تعرف يا دفعة
من قبيل بحاول اتذكر اي جنسية تانية بتستعمل الموسيقى التصويرية في الكلام ...ما لقيتها
....

مايا مسكاقمي

انا بس "اطمع" في شويييييية مبالغة تساعدنا في حل مشاكل بلدنا... شوييية بس من البذخ المبالغي دة ... نحن باقي لينا اقل من مية يوم لنصل الي مرحلة جديدة جدا جدا جدا مش لانو الجنوب حينفصل ( ما اصلو نحن فصلناه من زمان بعنصرية وحروب للهيمنة ) ولكن لتقنيين امر تقسيم البلد دون استعداد فالجنوب استعد اما الباقيات فحتتقسم دون استعداد كما حدث في الصومال...الجنوب قادر علي ان يكون دولة حتي ولو تعرض للمشاكل التي تقابل الدول الحديثة من نزاعات سلطة وحزبية وقبلية ولكن في النهاية ما يجمعهم اكثر مما يفرقهم ... نحن عملنا بجهد عجيب لللذي يفرقنا واجتهدت هذه الحكومة بالذات في تقنيين الجهويات ....

الدفعة الذي تنازل عن الرمز الوطني -:(

Quote: من قبيل بحاول اتذكر اي جنسية تانية بتستعمل الموسيقى التصويرية في الكلام ...ما لقيتها

ما نحنا نامنة غير .... منو البيشبهنا ؟؟؟؟

رجعتلك تاني

....

زمااااااان

ايام الجامعة
كنت متكيف من واحد زميلنا اسمو عبد الخالق في كلية الطب (من عندكم)
لأنو شاطر
فأثناء ما كنت بكلم واحد مصري زميلنا
عبد الخالق ده جا ماري بى جمبنا
فعلقت لزميلنا المصري :
والله الزول ده شاذ ... عديل كدي

.....
بعد فترة حتى عرفت المصري داك كان بيعاين لي كده ليه

....

Quote: بعد فترة حتى عرفت المصري داك كان بيعاين لي كده ليه

الدفعة .. اها ما باااالغت قيبي البربري ما قال ليك حاجة ؟؟؟

.....



حبيبنا أبوبكر


تحياتى الصادقة ولك الإحترام لكل ما تسطر هنا


فى أحد دكاكين التياب السودانية بالشارقة وإسمه (ريجال) لأصحابه من الباكستانيين دهشت جدا و أنا أستمع للبائع
الباكستانى المحنك و هو يردد :" هذا توووب موبااالغااه سديق " فى هجمة عكسية و إستخدام جيد لأدواتنا
الخاصة نحن السودانيين يعنى أصبح يتم ( تحنيكنا) بى ( الحنك ) الذى يخصنا فالباكستانى يعرف أن زبائنه
فى الغالب من السودانيين و السودانيات لذلك يعمد إلى التعرف على ما يجذبهم و يسوق لهم ما يريد من خلاله
حتى أنه يحفظ بعض المقاطع من الغناء السودانى فتجده يردد :" جميل جمال ..، مالوش مثال " شفتا كيف ؟

Quote: ما نحنا نامنة غير .... منو البيشبهنا ؟؟؟؟

أعجبنى جدا إستخدامك للفظة ( نامنة) فقد وجدت فيها ردا على الباكستانى أعلاه
فنحن نستطيع أيضا تعلم ( أحناك ) الأخرين .



الله يديك العافية





......

تحياتي الوليد

Quote: حتى أنه يحفظ بعض المقاطع من الغناء السودانى فتجده يردد :" جميل جمال ..، مالوش مثال " شفتا كيف ؟

أظن أنها ليست مقطع من الغناء السوداني

بل هي أغنية مصرية

وأرجح أنها لفريد الأطرش

شفتا كيف؟؟

.....

......

Quote: شفتا كيف؟؟

حبيبنا عوض عبد الله طه ،
تقبل تحيتى
يا تقوم تراجع أغنيات المرحوم سيد خليفة
يا نقوم كلنا نراجع علاقتو مع شمال الوادى

:) :)



سعيد بالتداخل معك
تسلم




.....

استاذنا ابوبكر

المشكلة في تركيبة المواطن السوداني نفسه الاتغيرت على مدى السنوات الطويلة يعني بالاضافة لعنصر المبالغة بقا في عنصر ( اتفرج وعاين وامشي ) تجاه اضخم الاحداث الكبيرة البقت تحصل عندنا
عشان كدا يا استاذي اظن حتى لو النيل اتقسم لعشرة اقسام حتلقا رد الفعل ( ما معقول ..مباااالغة شفتو النيل بقى كم حتة)

في المبالغة والموسيقى التصويرية المصاحبة لكلامنا
مثلا ( والله في زول وقع رررررررب في الارض) .. يعني كلمة رررب دي محاولة لادخال المستمع في حالة الوقعة الشديدة

وكما قال استاذ محمد عبدالله الريح في كتابه سلامات ، قال تلقا واحد بيحكي عن وفاة او موت اشخاص مثلا تلقاهو بيقول ( والله ماتوا جنس موت ) في اشارة الى انه كانما لا يكفيهم الموت العادي انما ( جنس موت)
اها حسه جنس موت دي اكعب من الموت في شنو ؟

وكما قلت : شعب نمونا غير

العزيز ابوبكر



سلام

لكن بوست مبالغة...


هذه اول كلمة تطلع مني بعد الدخول والطواف لدرجة أني نسيت وطلعت مني كدا ساكت.. لكن حبيت أكتبها..

مبالغاتنا لا تنتهي..


تحياتي

ياعزيز سلام وبختك قاعد في الجزيرة السمحة بلد صاحبي لي غوان يو العظيم والبالغ جد جد ومن جزيرة حت السمك ما كان بيجي جنبها سواها اجمل الجزر واحد اقوي اقتصادات العالم ....

اها الليلة الخميس وفي واحد اسمو امجد في فضائية سودانية عندو مبالللللغة اسمها "افراح وافراح " وتعال شوف المباااااااااالغة ...."انا ام خالة بننت عم بت خالة اخت نسيبة ابو عم ابن عم العريس نحي قناة النيل الاسزرق وبيت مال وعيال " .....وجنس نطيط عيون وناس السيرك الصيني والوان والون في الوشوش ويجيك العيل ناطي ورافع يدينو فوق لحد ما لمبة الخيمة تقع بس عشان بتاع الكاميرا يشوفو وتجي واحدة شايلة كونديشن فوق راسا وقفة الخدار تحت باطة وراكبة امجاد توزع موية لانها صاحبة حبوبة اخت بنت اولاد جارة ام جارة اخت عمة العروس ...موبااااااالغة .......ويوم اصبت بالتعاسة والحزن لانو واحد من جماعة امجد دييل كان معزوم في عرس والعريس باكستاني ويادوبك كلمة كللمتيين زي بتاعة صاحبنا الوليد ومسكو ليك عن العادات السودانية والحفلات السودانية والفنانيين وصاحبنا الباكستاني عرقان يتلفت زي السمبرية ولكن كان اسخف واتفه سؤال هو للعروس وفي معناه "ما لقيتي غير الباكستاني دة ؟ " ونظرت بحزن وقالت ما معناه " اها اليقتو ".... حزنت للبنت ..ما تزوج باكستاني ومالو تزوج العايزاهو .. هو اصلو مالو و مال تزوج شنو ومنو ؟؟ بس غلتانيين ناس العرس او صاحبم المصاحب ناس امجد وناداهم ليصورو ذاك العرس .....
اننا نبالغ ختي في حشر انفسنا في اخص خصوصيات الاخرين وننظر للاخر وكانه من كوكب اخر ......مبااااالغة

Quote: وكما قلت : شعب نمونا غير

ياقريبتي .. كة زمااانك وزولنا رفع عكازوا وكورك " اها حررنا همشكوريب وبكرة دي حنمشي نحرر القدس" .. وانا اصلو مغيوظ من ناس النضال العروبي وشعاراتم اها وتاني يوم قريبك ماشي ويعاين لي جماعة منهم في الشغل شذرا مزرا حيث انو ززلنا حيحل قضيتم ويخليهم من غير شغل بكرة دي ......شاااايفة كيف وادي العيون ذاتا عمشت ولا نعاين شذر مزر ولا حاجة يادوبك الشاشة القدامي دة .. موباااالغة ....

يا عزيزي الوليد

Quote: فنحن نستطيع أيضا تعلم ( أحناك ) الأخرين .

اها في زمنا دااااك كان الهندي او الباكستني بس " هجي انتا بس جالس هنا" ويجر ليك كرسي وتقعد حتي يري الله في امرك مخرجا لكن هسع سمعنا انو كل شارع نايف وسوق الدهب ودكاكين فريق المرر وسكة الخيل وسوق الوصل كوارييك ما تدييك الدرب "هجيا تووب سنتر الخرتوم ".. اها انتشرنا انتشار مباااالغة

الحبيب ابوبكر وضيوفه الكرام

من عبارات المبالغة التي اسمعها من حين لآخر مثلا ( القميص دا حلو لامن غلط)

تحياتي

يا شيخ جعفر ممثلنا في كل الشرق...

كنت قد كتبت قبل فترة موضوعا عن "سكين ضبيحة سمح ".. اتخيل ؟؟؟؟

قريبى ابوبكر هيكر فى

من المبالغات

صفة الموسيقار

اى زول نجر ليهو لحن بخشمو
يسمى الموسيقار

من المبالغات الجديدة جدا

صفة المفكر الاستراتيجى
حسن مكى استراتيجى
مضوى الترابى استراتيجى
منوكدا بيومى بتاع امن برضو استراتيجى


الزول الاسمو امجد
ما بنزليش من زورى

يا قريبي محمد سيداحمد مسكاقمي

منذ يوميين وانا قد رايت كتابة في هذا المنبر وصفا لشخص بانه "هرم " وكوني معماريا بناء حاولت البارحة ان اجمع بين الوصف والشخص والاالبني ادم عموما فوجدت ان وصف بشر باننه هرم حتي باستعمال الافتراضية ليس في صالح الموصوف فلقد..فبالاضافة الي الشكل والذي يتناقض مع قوله تعالي "وخلقناه في احسن تقويم" فان الهرم ليس جميلا كشكل وفيه اهدار كثير للمساحات وبه نقاط حادة لا يمكن الاستفادة وظيفيا منها ثم ان هيمنة الهرم شكلا وانجازا معماريا قد تجاوزته انشاءات عظيمة اخرها برج خليفة .. تخيل لو تغير الوصف امن انت "هرم" الي انت "برج" ؟؟؟؟؟

قريبى ابوبكر
ندخل افية زى ما بيقولواهلنا فى شمال الوداى
من هرم ننتقل لرقم

هسا فى السودان وفى اجهزة اعلامنا البائسة يقولو ليك
الزول دا رقم
ودىمن ثقافة ناس جرايد الكورة
واحداسمو اشرف شهير بالكاردينال يقول على نفسو انا رقم
وصلاح ادريس الشهير بالارباب برضورقم
وترباس رقم

وبرضومن المبالغات التحيات التى تنهمر علينا كل يوم من المذيعين والمذيعات
التحية لفلان والتحية لاسرة الراحل المقيم
والتحية للمريخ العظيم والتحية لحى بيت المال والتحيةللهلال

.....



عزيزنا أبوبكر

لك التحية و منك الفائدة و المتعة

للمبالغة السودانية أشكال كثيرة فى القول و الفعل و من أشدها وطأة هو الإصرار على حشر الذات فيما لا يخصها
و الأدهى و الأمر هو إعتبار ذلك من الهمة و الإقدام وهى لا تعدو كونها ( توَشُّر) بغير علم ،

صديقى الذى جاء فى زيارة لدار الحى يبحث عن عمل وكنت برفقته فى ( مول دبى) و قطع شك هذه مرَّتُه الأولى
فى المكان و إذا بسيدة تسأله عن موقع النافورة المطلة على برج خليفة ، هب صاحبنا و كفكف أكمامه
و طفق يؤلف التواصيف بغير علم ، وشرع يكرر للسيدة : " نحنا ذاتنا ماشين هناك .. دقيقة بس "
و كانت تكفيه جملة الهنود الشهيرة :( ما فى معلووم ).
سألته :" ياخى مالك و مال الوصِّيف و إنت ما تميتلك سبوع فى البلد؟ " فقال لى :" ياخ نحنا
سودانيين ، حرم أبطل شغلتى و أوصل المرة محل ماشة أكان ما بالعرفة بالرجالة ساى كدا " !!!
شفتا كيف ؟
مبااالغة مش كدا ؟




و فى دى :

Quote: سمعنا انو كل شارع نايف وسوق الدهب ودكاكين فريق المرر وسكة الخيل وسوق الوصل كوارييك ما تدييك الدرب "هجيا تووب سنتر الخرتوم ".. اها انتشرنا انتشار مباااالغة

معاك كل الحق






و أأسف لكترة الطلة
و التى أرجو أن لا تمسِّخ خلقة الله

لك التحية مجددا





.....

Quote: و أأسف لكترة الطلة

باااالغت في دي .. احنا لاقيين .. طل يابني طل وهات ما عندك فالعبدلله فاتت عليه حاجات كتيرة وتحركاتو محدودة ...