Post: #1
Title: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: طلعت الطيب
Date: 09-21-2010, 02:31 PM
Parent: #0
تبدأ اليوم ٢١ سبتمبر اخر ايام الصيف الحملة الانتخابية لمدينة كالجرى بمحافظة البرتا الكندية حيث تنتهى الحملة فى الثامن عشر من اكتوبر موعد الانتخابات البلديةCivic election
أعتقد بأهمية هذه الانتخابات واحاول تكريس هذا البوست من اجل الحوار حول الاجندة التى تهمنا كسودانيين ، وما يمكن عمله بهذا الشأن حتى تجد اولوياتنا طريقها الى الحوار مع المرشحين ،
بمعنى اخر هل يمكن تحويل هذه الانتخابات الى مناسبة حتى نكون اقلية مرئية visible بدلا عن اقلية غير مرئية invisible minority ?
هل نستطيع ان ننسق بعض الحوار من اجل تحديد تلك الاجندة والدفع بها الى حيز وعى المرشحين والاعلام ?
|
Post: #2
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: Sabri Elshareef
Date: 09-26-2010, 05:48 PM
Parent: #1
ارفع الموضوع للضرورة خاصة توجد مجموعه كبيره بمدينة كالجري البرتا
شكرا يا طلعت اتمني من الناشطين والناشطات بكندا اقليم البرتا النشاط في هذه العملية الديمقراطية
وعكس متطلبات ما تحتاجه الجالية السودانية
سلام يا دكتور
|
Post: #3
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: النصرى أمين
Date: 09-26-2010, 11:35 PM
Parent: #2
شكرا صبرى ..
اول مرة ارى هذا البوست ....
تعرف يا طلعت انا لسه ما حددت المرشح الذى ساصوت له..
ريك مكلفر ..يعجبنى فيهو قوته وعدم تبعيته للغير..
المذيعة هيقينز ..ارى انها تعطى المجلس الجديد توجه مغاير
ناهد ننشى ..زول متعلم وفاهم و له خبرة كبيرة فى الادارة..
غالبا حاصوت لناهد ....كتبت ليهو فى صفحته فى الفيسبوك عن رايه فى
تخصيص المواصلات العامة وبيعها للقطاع الخاص مثلما يحدث فى فانكوفر
ومنتظر الرد ...
لو وجدت منه تطمينات
حاموت معاهو موت ...
بس فى الاول نضمن قروشنا ...
فى مرشح تانى كنت اتمنى انو ما يسحب ترشيحه
الحملة بتاعته كلها على اصدار قوانين جديدة تسمح للناس تربية الدواجن
فى بيوتهم مستتدلا بحق المواطنين فى امنهم الغذائئ
(تعديل كلمة فيسبوك)
|
Post: #4
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: النصرى أمين
Date: 09-26-2010, 11:59 PM
Parent: #3
عليك الله ياطلعت شوف البرنامج الانتخابى ده
للمرشحة الشيوعية بونى ديفاين
*تخفيض رسوم المواصلات ب 50% لمدة سنة ثم الغاء الرسوم تماما
*بناء مساكن لذوى الدخل المحدود
*كل المبانى الجديد يجب ان تشمل مبانى للسكن المدعوم
*تخصيص ميزانية اكبر للتعليم والغاء كل الرسوم التى تتعلق
بالمدارس
*زيادة عدد المعلمين فى المدارس ..استاذ واحد لكل 35 طالب
نسبة غير مقبولة
*ميزانية اكبر لبنك الطعام
شعار حملتها الانتخابية
الناس قبل الربح
People Before Profit
اها يا طلعت البرنامج الانتخابى ده كيف معاك؟
|
Post: #5
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: النصرى أمين
Date: 09-27-2010, 00:38 AM
Parent: #3
مكرر
|
Post: #6
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: طلعت الطيب
Date: 09-27-2010, 00:56 AM
Parent: #5
الاعزاء صبرى الشريف والنصرى
تحياتى وتقديرى للمرور والتعليق
لدى اقتراح يتلخص فى مقابلة بعض المرشحين (مثلا اربعة منهم)
لطرح الاجندة التى تهمنا كجالية عليهم وذلك حتى تجد الاهتمام الاعلامى المطلوب على اقل تقدير
السؤال الان هو:
ما هى الاجندة التى تهمنا ؟
- توظيف سودانيين مؤهلين فى بعض الوظائف فى البلدية والبوليس (جوالى 30 وظيفة مثلا)
- الاهتمام بالتعليم الخاص (فصول عربى ودين)
ثم ماذا بعد ؟
ملحوظة لا بد من فصل عيشتنا من بقية الجاليات فالمدرسة الاسلامية مثلا تم احتكارها بواسطة اللبنانيون والهنود
اواصل انشاء الله
|
Post: #7
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: النصرى أمين
Date: 09-27-2010, 03:22 AM
Parent: #6
يا طلعت ..كالقرى دى بكون فيها زى 10 الف سودانى ...
مافى اى تنظيم او جسم بجمعهم مع بعض ...
نظر لضيق الوقت وقرب مواعيد الانتخابات احسن كل زول يصوت براهو
حسب اجندته ....
لو انت داير الناس تتفق على عمل مشترك وجماعى احسن تنتظر الانتخابات
الجاية بعد تلاته سنين ......
لو اجتهدت شديد جدا ممكن تلم ليك 10 او خمستاشر نفر
غير كده انسى
|
Post: #8
Title: Re: انتخابات بلدية مدينة كالجرى البرتا ، بوست للحوار حول قضايا الجالية السودانية
Author: طلعت الطيب
Date: 09-27-2010, 07:08 AM
Parent: #7
العزيز النصرى
كلامك صاح طبعا لكن خلينا نبدأ الحوار ده هنا من هسع عشان يستمر
ممكن جدا نجمع عشرة ونمشى نلاقى اكثر اثنين حظوظهم فى الفوز قوية
نتكلم معاهم نصف ساعة حول هموم الجالية وهذا اضعف الايمان
يعنى ما نخلى المناسبة تمر ساكت ، نعمل لينا حاجة صغيرة ونقيمها بعد داك
رايك شنو؟
|
|