Post: #1 Title: @ ربحت نصف مليون درهم من اتصالات الامارات .. Author: جمال محمود Date: 09-12-2010, 08:43 PM Parent: #0
تلقيت اتصالاً من الرقم ( 5067237295 ) فى تمام الساعة الواحده ظهراً والرقم من داخل دولة الامارات دار الحوار كالاتى :
قال : معاك ( اسم اسيوى ) من اتصالات هل انت صاحب الرقم ( #050333734 )
قلت له : نعم
قال : لقد فزت معنا بنصف مليون درهم
قلت : اتصالات الامارات ؟
قال : نعم
قلت : وهذا الرقم ؟
قال : نعم وعليه نرجو التأكد من أن الرقم الموجود بشريحة اتصالات هذا الرقم ( 89971122 ) والاتصال حلاً بهذا الرقم .
بالفعل دون ان اغلق الموبايل بالطريقة المعتادة زعت البطارية واخرجت الشريحة وإذ بالرقم الموجود بشريحتى هو نفس الرقم الذى ذكره المتصل .
اتصلت على صاحب الرقم وبالفعل قام بالرد ( يعنى الرقم من داخل الدولة )
قال : الو قلت : نعم لقد وجدت نفس الرقم الذى قلته هو نفس الرقم بالشريحة
قال : مبروك هذا نصيب ما انت .. انت فى مسلم انا فى مسلم .. مبروك .. الحمد لله .. انت الحين يحصل نصف مليون درهم من اتصالات .. انا فى شغال داخل اتصالات وفى نفرات كتير داخل مكتب يشوف رقم مال انت ..وفى نفرات يحصل 100 الف درهم من دبى ون الدوحة ومن السعودية .. لكن انت يحصل نصف مليون درهم .. هذا سحب مال رمضان .. والحين فى موجود تلاته مدير كبير يريد كلام ما انت .. انتظار
وفضلت منتظر اكثر من خمس دقائق وسامع صوت جوطه ونا س بتتكلم بالعربى والانجايزى والاردو
وجال بخاطرى فى فترة الانتظار ( معقولة بس اكون فزت ؟ انا لى عشرة سنوات فى الامارات وياما اشتركت فى مسابقات .. وياما مليت كبونات سحب .. ورغم ذلك لم افز بقلم رصاص معقولة بس اكون فزت بــ 500,000 درهم ؟ طيب مالو ما اهو الناس بتفوز بالملايين وبعدين لو كان الرقم من خارج الدولة ممكن الواحد يقول ديل ناس نصب لكن ده رقم من الداخل واهو رد على .. اكيد الهندى ده شغال فى الاتصالات واتصل على عشان يتأكد ومنها يلقى الحلاوة ..وما يؤكد الكلام صحة الرقم الموجود بالشريحة .. يا زول بقيت من اصحاب الملايين قمت حسبتها كده لقيتها بتعمل تقريبا 300 مليون سودانى .. طيب البقعدنى شنو تانى ؟ من بكرة اقدم استقالتى واشترى لى سيارة وبعص الاثاثات والاجهزة الكهربائية والمعدات لفتح جراج بالسودان وما يهم قيمة الجمارك يعنى حتطلع كم ؟ وباقى الشهر ده زاتو ما حاكمله هنا وباقى الراتب والحقوق حأخليها للزملاء فى العملاء حلاوة الفوز .. وامشى السودان واشترى لى بيت جاهز وافتح لى ورشة حديثة لفحص المركبات بالكمبيوتر والواحد يتهنى باقى عمره ) قطع على الهندى احلام اليقظة ليقول لى سنتصل عليك بعد قليل .
اتصل على مرة ثانية بعد ساعة
قال : نريد نعرف كم رقم مال شريحة مرة ثانية
قلت : نفس الرقم 89971122
قال : الحمد لله نفسو رقم مال كمبيوتر مبروك الحين انت وين موجود
قلت : العين
قال : وين صرافة قريب مال أنت ؟
قالت : الانصارى
قال : زين اكتب هذا رقم مال كمبيوتر ورقم مال حوالة ورقم مال شيك
( ادانى الارقام )
قال : اليوم الساعة عشرة انت لازم يشوف ابوضبى تى فى انا الحين يسوى فاكس مال تلفزيون عشان يعطى اسم مال انت
قلت : اوكى
قال : الحين كمبيوتر مفتوح ورقم مال انت فى موجود لازم الحين بسير سوبرماركت يشترى 10 بطاقة مال اتصالات مال 100 درهم وواحد بطاقة مال 50 درهم عشان يركب داخل كمبيوتر يسوى كونفيرم
زن قلبى اكلنى !!!!
قلت : ليش رصيد يريد خلى كمبيوتر يشيل من نصف مليون ؟
قال : ما يمشى الحين اذا انت بنت تلفون خلاص كمبيوتر يشيل رقم ثانى انت مافى خوف انا فى مسلم انت فى مسلم .. كلام مال انا فى صحى .. انت فى نفر زين .. الله يعطى مال انت .. انت مافى خوف
قلت : مافى دكان قريب اعطينى نصف ساعة
قال : حبيبى هذا فى نصف مليون ؟ شو مشكلة مال بطاقة خلى تلفون مفتوح سير جيب بطاقات جلدى
قلت : اوكى
خليته اون هولد
واتصلت على العمليات ( 999 ) وابلغته بالسالفة قالوا لى احذر التعامل معه لانه اليوم تلقينا عدة بلاغات بنفس الشىء وبلغ جميع اصدقائك بذلك فقلت لهم ولكن الرقم من داخل الدولة وعندما اتصل عليه يرد قالوا لى نعم ولكن هولاء موجودين خارج الدولة
قطعت الاتصال بالشخص
اتصل مرة ثانية فرديت عليه
قال : ليش انت فى بند تلفون
قلت : رصيد مال انا فى خلاص
قال : زين مافى مشكلة انت يجيب رصيد ؟
قلت : لسه
قال : خلى تلفون مفتوح وانا فى انتظار رصيد عشان يسوى كونفيرم .
برضو خليته اون هولد
واتصلت على اتصالات وأكدو لى صحة كلام العمليات بأن هنالك حالات نصب اليوم من نفس الرقم وان رقم الشريحة ثابت فى جميع الشرائح لذلك يحذر التعامل مع هذا الرقم لحين اتخاذ اجراء نحوه
قطعت الاتصال واضفت الرقم للقائمة السوداء التى يرفض استقبال اى مكالمة منها
وبالفعل لقد وجدت ما يقارب الـ 10 اتصالات من نفس الرقم
وضاع الحلم .. والحمد لله لم تكتمل عملية النصب
Post: #2 Title: Re: @ ربحت نصف مليون درهم من اتصالات الامارات .. Author: احمد محمد بشير Date: 09-12-2010, 10:55 PM Parent: #1
إنت قصتك دي رحمة ‘‘ كدي عاين لي بتاع الفيديو
Post: #3 Title: Re: @ ربحت نصف مليون درهم من اتصالات الامارات .. Author: حذيفه ابراهيم الكباشي Date: 09-12-2010, 11:13 PM Parent: #2
الله الغني يا حبوب
الحمدلله والشكر لله
انتا برضو موضوع الورش دا شاغلك؟؟
نفس مرض اخوك
ربنا يزيدنا من فضلو والله ذو الفضل العظيم
..
Post: #7 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:19 AM Parent: #3
Quote: انتا برضو موضوع الورش دا شاغلك؟؟
نفس مرض اخوك
برضو يا حذيفه ابراهيم الكباشي احسن من امراض اخرى
Post: #6 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:14 AM Parent: #2
تعرف يا احمد محمد بشير امس اليوم كله انا ما مصدق ؟
Post: #4 Title: Re: @ ربحت نصف مليون درهم من اتصالات الامارات .. Author: cantona_1 Date: 09-12-2010, 11:39 PM Parent: #1
يا جمال قلت لي معدات الورشة تمنها كم دولار؟
كبـــّـاشي الصـــّافي
Post: #9 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:37 AM Parent: #4
Quote: يا جمال قلت لي معدات الورشة تمنها كم دولار؟
مش تمنها دى لو كان جماركها شنو شنو بدفعها يا عمك دى نص مليون درهم
Post: #5 Title: Re: @ ربحت نصف مليون درهم من اتصالات الامارات .. Author: Elmosley Date: 09-12-2010, 11:52 PM Parent: #1
يا ابو جمال ياخي هسع انا قلت ابقي صاحبك طوالي وبعدين احنسك تمول لي شريط جديد معليش عموما انا لوضربت اللوتري الامريكي بديك حبه عموما اتقدم بصحبه على الريحه كل الود الموصلي
Post: #8 Title: Re: @ ربحت نصف مليون درهم من اتصالات الامارات .. Author: Abdlaziz Eisa Date: 09-13-2010, 04:36 AM Parent: #5
العزيز/ جمال سلامات
آه
ليش ياخي..
جيت داخل عشان أقول مبروك بس لقيت الحلم ما تم..
تحياتي
Post: #11 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:40 AM Parent: #8
Quote: آه
Abdlaziz Eisa بس 01 لا دى 500,000 اه
Post: #13 Title: Re: @ ربحت نصف مليون درهم من اتصالات الامارات .. Author: الوليد عمر Date: 09-13-2010, 05:04 AM Parent: #8
......
حمد الله على السلامة يا جمال ، و بركة الجات على كدا ،
الحرامية ديل مفتحين فى التكنلوجيا و إختراق الشبكات شديد ، خصوصاالشبكات بتاعة
الأمارات ، قبل كدا إتصل بى واحد هندى برضو فى موضوع الفوز برحلة سياحية لمنطقة إسمها
( Gouva ) فى الهند و بالمجان كدا و قال لى فيها خدمات سياحية من ترحيل و إقامة و فندقة
و خلافو ، و من شدة ما مقنع ابنى أدم دا ، طلب منى رقم الفاكس حقى و رسل ليهو فيهو تمانية صفحات عبارة عن دعاية
سياحية للمكان ، فى النهاية إتضح إنو جارى من الرصيد بتاعى ، مرقن منى 48 درهم فى غضب الله
ياخ الهنود المفتحين ديل معذبين ليك إتصالات دى عذاب الله أكبر
فى واحد جنبنا كدا ينزل ليك ال ART و الجزيرة و القنوات السجمانة بتاعة الهوتبيرد
ديك كلها بى تلاتين درهم بس تصور !
الله يكفينا و يكفيك شرهم ، و كل عام و أنتم بخير.
أبو بكرى - دبى
.......
Post: #16 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 08:03 AM Parent: #13
Quote: الحرامية ديل مفتحين فى التكنلوجيا و إختراق الشبكات شديد ، خصوصاالشبكات بتاعة
الأمارات
تعرف يا الوليد عمر حتى بتاعين العمليات عارفين واقول ليهم الرقم من داخل الدولة يقولوا لى لا هم خارج الدولة لكن مستخدمين ارقام داخلية طيب كان ممكن يتم تتبع الرقم الداخلى لانو لحدى هسه شغال
Post: #30 Title: Re: @ ربحت نصف مليون درهم من اتصالات الامارات .. Author: عثمان جلال الدين Date: 09-13-2010, 02:45 PM Parent: #16
حذف لخطأ في الموقع
Post: #10 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:39 AM Parent: #5
Quote: يا ابو جمال ياخي هسع انا قلت ابقي صاحبك طوالي وبعدين احنسك تمول لي شريط جديد
الشريط الواحد ده فنلن معقولة دى ؟
لا لا قول شركة انتاج فنى .. قول انتاج سى دى لخمس سنوات
انت تساهل يا مبدع
Post: #12 Title: Re: @ ربحت نصف مليون درهم من اتصالات الامارات .. Author: Abdlaziz Eisa Date: 09-13-2010, 04:54 AM Parent: #10
Quote: Abdlaziz Eisa بس 01 لا دى 500,000 اه
عزيزي جمال
حيجي اليوم الذي تربح فيه المليون دولار بدل نص مليون درهم!!!.. بس النص لي..
Post: #17 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 08:04 AM Parent: #12
Quote: حيجي اليوم الذي تربح فيه المليون دولار بدل نص مليون درهم!!!.. بس النص لي..
النص ذاته كتيرة على انا الربع وانت التلات ترباع قول امين
Post: #14 Title: Re: @ ربحت نصف مليون درهم من اتصالات الامارات .. Author: Saifelyazal Elmaki Date: 09-13-2010, 05:06 AM Parent: #10
الاخ جمال وضيوفة الكرام كل عام وانتم بخير وربنا يحقق الاماني
تعرف يا جمال عندنا واحد صاحبنا هنا في ابوظبي حصل معاهو نفس السيناريو هو وزوجته اتصل عليهم واحد هندي وقال ليهم كسبتوا 750.000 درهم من اتصالات وما كلموا ليهم زول متبعين (واستعينوا على قضاء حوائجكم بالكتمان) المصيبة اصحابنا كملوا كروت صاحب الدكان التحت البناية حولوا ليهو كروت بـ 3500 درهم كل لو ما البطاقات خلصت من الدكان كان لسه يدخلوا في كروت الاتصال ويحولوها المهم بعد ما صاحب الدكان قال ليهم كروت الاتصال خلصت انتبهوا واتصلوا على واحد صاحبنا قال ليهم اوع تكونوا حولت ليهو حاجة قال ليهو والله لو كروت الدكان انتهت كان لسه احوِّل قال ليهو حقك راااااااااح
Post: #15 Title: Re: @ ربحت نصف مليون درهم من اتصالات الامارات .. Author: مازن فيصل هلال Date: 09-13-2010, 07:28 AM Parent: #14
استاذ جمال كل عام و انتم و الاسرة الكريمة بالف خير
بس عاوز اعرف الغرض - او طريقة النصب كانت ح تنتهي كيف- لاقدر الله و لو ماتصلت بالسلطات - يعني الرصيد 1100 درهم ح تديهم للهندي مال البقالة - هو المتصل ح يستفيديف
طبعا حصل لي نفس الفلم دا - بس المدام طلعت تفتيحة و قطعت علي احلام اليقظة
تحياتي
Post: #19 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 08:08 AM Parent: #15
Quote: بس عاوز اعرف الغرض - او طريقة النصب كانت ح تنتهي كيف- لاقدر الله و لو ماتصلت بالسلطات - يعني الرصيد 1100 درهم ح تديهم للهندي مال البقالة - هو المتصل ح يستفيديف
طبعا الحبيب حيستفيد لما احول ليه الرصيد يقوم يبيعه بنصف القيمة واكون ان شربت المقلب لكن الحمد لله
Post: #18 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 08:06 AM Parent: #14
Quote: حصل معاهو نفس السيناريو هو وزوجته اتصل عليهم واحد هندي وقال ليهم كسبتوا 750.000 درهم من اتصالات وما كلموا ليهم زول متبعين (واستعينوا على قضاء حوائجكم بالكتمان)
Saifelyazal Elmaki
كل سنة وانت طيب تعرف الهندى لما عرف انا ما اماراتى قال لى شنو خلاص حول 200 درهم عشان بسوى كونفيرم
شوف النصب ده كيف
Post: #20 Title: Re: @ ربحت نصف مليون درهم من اتصالات الامارات .. Author: محمد البشرى الخضر Date: 09-13-2010, 08:34 AM Parent: #18
يا هندسة معقول ياخ إنت في الإمارات و في العين كمان خلينا نشوفك بالله
Post: #22 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 09:30 AM
Quote: يا هندسة معقول ياخ إنت في الإمارات و في العين كمان خلينا نشوفك بالله
وانت كمان فى العين ؟
Post: #21 Title: Re: @ ربحت نصف مليون درهم من اتصالات الامارات .. Author: فاروق أبوحوه Date: 09-13-2010, 08:38 AM Parent: #18
الحبيب جمال:
نصيب مال إنت واجد واجد زين الحمد لله نفرات ما يسوي علي بابا
هههههه
- سمعت كثيراً بحالات مماثله لأصدقائي.
ربنا شافك يا معلم
فاروق أبوحوه أبوظبي
Post: #25 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 11:20 AM Parent: #21
Quote: نصيب مال إنت واجد واجد زين الحمد لله نفرات ما يسوي علي بابا
والله الحمد لله كافى مشكل زيادة على بابا واجد متروس
Post: #23 Title: Re: @ ربحت نصف مليون درهم من اتصالات الامارات .. Author: abubakr Date: 09-13-2010, 09:39 AM Parent: #1
يابني .. افضل لو الغيت رقم شريحتك تماما فلقد سلمت هذه العصابة مفتاحا للنصب الم يكن اليوم فغدا .. كما ارجو ممن يصله اتصال من ر قم خارجي لا يعرفه هذا الايام missed call الا يتصل بالرقم مطلقا فان كنا شخصا قريبا ولا تعرف رقمه فسيعاود الاتصال بك وحينها ترد وتعرف واذا كان مثل هذا الشخص النصاب فاقفل الخط ولا تاخذ وتدي معه ....
Post: #24 Title: Re: @ ربحت نصف مليون درهم من اتصالات الامارات .. Author: Sayed Bekab Date: 09-13-2010, 09:49 AM Parent: #23
حلوه و النعم دي ياود البشير ههههه ماذا ضغطت دي احلي منها .... و الله ضغطت واحد ..... احلف ..... لووول
جمال حمد الله علي السلامة
Post: #27 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 11:31 AM Parent: #24
Quote: جمال حمد الله علي السلامة
الله يسلمك Sayed Bekab
Post: #26 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 11:30 AM Parent: #23
Quote: يابني .. افضل لو الغيت رقم شريحتك تماما فلقد سلمت هذه العصابة مفتاحا للنصب الم يكن اليوم فغدا .. كما ارجو ممن يصله اتصال من ر قم خارجي لا يعرفه هذا الايام missed call الا يتصل بالرقم مطلقا فان كنا شخصا قريبا ولا تعرف رقمه فسيعاود الاتصال بك وحينها ترد وتعرف واذا كان مثل هذا الشخص النصاب فاقفل الخط ولا تاخذ وتدي معه ....
تعرف يا باشمهندس abubakr انو رقم الشريحة هو رقم ثابت لجميع شرائح اتصالات
Post: #28 Title: Re: @ ربحت نصف مليون درهم من اتصالات الامارات .. Author: abubakr Date: 09-13-2010, 12:55 PM Parent: #26
Quote: تعرف يا باشمهندس abubakr انو رقم الشريحة هو رقم ثابت لجميع شرائح اتصالات
ياجمال اقصد رقم هاتفك ؟؟؟اعرف من تضخمت فاتورته بعد حادث مشابه ..انهم عصابة تستعمل كل معينات التقنية الحديثة وهؤلاء الذي يتصلون ما هم الا عملاء للعصابة....
Post: #29 Title: Re: @ ربحت نصف مليون درهم من اتصالات الامارات .. Author: خالد العطا Date: 09-13-2010, 02:30 PM Parent: #28
Quote: قلت : ليش رصيد يريد خلى كمبيوتر يشيل من نصف مليون ؟
هههههههههههههههههههههههه حلوة دي يا جيمي
Post: #31 Title: Re: @ ربحت نصف مليون درهم من اتصالات الامارات .. Author: عثمان جلال الدين Date: 09-13-2010, 02:53 PM Parent: #29
Quote: [ بتاعين العمليات عارفين واقول ليهم الرقم من داخل الدولة يقولوا لى لا هم خارج الدولة لكن مستخدمين ارقام داخلية طيب كان ممكن يتم تتبع الرقم الداخلى لانو لحدى هسه شغال
سلام يا هندسة وكل سنة وانت طيب .. وشكراً على مواضيعك الدسمة والمفيدة.. بالنسبة للموضوع: لا أعتقد أن صاحب الرقم الداخلي له ذنب في الموضوع فقبل 4 سنوات كنت أسير بجانب سوق في الدوحة مشهور بالجكس فقلت افتح البلوتوث امكن تجيني حاجة تمام وكده وأخوك تكنلوجيا زيرررو، وقد كان نصيبي أن م سرقة رقمي وعلى حسابي دون علمي إلا بعد أن اتصل بي عدد 4 من الأصدقاء اثنين يشكرونني على الرسائل والفيديو الساخن الذي وصلهم وآخرين ليخبراني بأن الرسالة وصلت فاضية (أجهزتهم قديمة شوية) فانتبهت لجدية الموضوع وراجعت البريد الصادر وتأكدت من كلامهم فقفلت الموبايل وتوجهت لفرمطة الجهاز لدى متخصص.. عشان كده اعتقد سيد الرقم الداخلي لا ذنب له والله أعلم امكن الطب اتطور وكده.. الطريف في موضوع رسائلي العجيبة ديك أن اثنين ممن ووصلتهم الرسائل قضاة جنايات أحدهم ترتعب المجالس لذكره وقد أصدر ايمها قرارات حاسمة مخدرات وانقلابية وغيرها .. والسلام
Post: #32 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:23 PM Parent: #28
Quote: ياجمال اقصد رقم هاتفك ؟؟؟اعرف من تضخمت فاتورته بعد حادث مشابه ..انهم عصابة تستعمل كل معينات التقنية الحديثة وهؤلاء الذي يتصلون ما هم الا عملاء للعصابة....
والله ما عارف كيف عرفوا رقم هاتفى ؟؟ اعتقد بيختاروا ارقام عشوائية
Post: #33 Title: Re: @ ربحت نصف مليون درهم من اتصالات الامارات .. Author: جمال محمود Date: 09-13-2010, 04:24 PM Parent: #28
Quote: ياجمال اقصد رقم هاتفك ؟؟؟اعرف من تضخمت فاتورته بعد حادث مشابه ..انهم عصابة تستعمل كل معينات التقنية الحديثة وهؤلاء الذي يتصلون ما هم الا عملاء للعصابة....
والله ما عارف كيف عرفوا رقم هاتفى ؟؟ اعتقد بيختاروا ارقام عشوائية
Post: #34 Title: Re: @ ربحت نصف مليون درهم من اتصالات الامارات .. Author: abubakr Date: 09-14-2010, 04:31 AM Parent: #33
Quote: والله ما عارف كيف عرفوا رقم هاتفى ؟؟ اعتقد بيختاروا ارقام عشوائية
نعم ..ثم يبقي رقمك في سجل يتواجد عند اطراف كثيرة تاتيك بطرق مختلفة.. انا لي تجربة اخري فقدت فيها مبلغ من المال سحب من حسابي الاليكتروني وما زالت القضية قائمة والسبب هو الحصول علي عنوايين او ارقام هواتف وتسجيلها ثم العودة باساليب مبتكرة للغش...الموضوع كبير وشائك ويزداد تعقيدا فارجو ان تهتم بتغيير رقم هاتفك وعدم تسجيله في الدليل الاصفر
Post: #35 Title: Re: @ ربحت نصف مليون درهم من اتصالات الامارات .. Author: جمال محمود Date: 09-14-2010, 04:41 AM Parent: #34
Quote: نعم ..ثم يبقي رقمك في سجل يتواجد عند اطراف كثيرة تاتيك بطرق مختلفة.. انا لي تجربة اخري فقدت فيها مبلغ من المال سحب من حسابي الاليكتروني وما زالت القضية قائمة والسبب هو الحصول علي عنوايين او ارقام هواتف وتسجيلها ثم العودة باساليب مبتكرة للغش...الموضوع كبير وشائك ويزداد تعقيدا فارجو ان تهتم بتغيير رقم هاتفك وعدم تسجيله في الدليل الاصفر
إن شاء الله عزيزى المهندس abubakr مع انو الرقم عزيز علىّ والحمد لله حتى الان لم اقم بتسجيل الرقم بالدليل الاصفر
تسلم على هذه الافادة
وكل سنة وانت طيب
Post: #36 Title: Re: @ ربحت نصف مليون درهم من اتصالات الامارات .. Author: اسماء الجنيد Date: 09-14-2010, 11:21 AM Parent: #35
العزيز جمال كل سنة وانت طيب يا جميل والله يا جمال ضحكت كما لم اضحك من قبل اكيد مافي المقلب الحصل ليك لكن في طريقة تصورك وتقليدك للبنقالي ولا الهندي الاتصل بيك بالجد عرفت تحكي القصة بطريقة مصورة كومدية جدا جدا لوووووووووووووووولز يا خوي والله انت تستاهل اكتر من المبلغ المذكور وان شاء الله تكسبوا بحق وحقيقة يا رب وبدون دجل الهندي المستهبل والجاتك في رصيدك سامحتك تب يا خوي كل سنة وانت بالف خير
Post: #37 Title: Re: @ ربحت نصف مليون درهم من اتصالات الامارات .. Author: جمال محمود Date: 09-14-2010, 02:05 PM Parent: #36
Quote: العزيز جمال كل سنة وانت طيب يا جميل والله يا جمال ضحكت كما لم اضحك من قبل اكيد مافي المقلب الحصل ليك لكن في طريقة تصورك وتقليدك للبنقالي ولا الهندي الاتصل بيك بالجد عرفت تحكي القصة بطريقة مصورة كومدية جدا جدا لوووووووووووووووولز يا خوي والله انت تستاهل اكتر من المبلغ المذكور وان شاء الله تكسبوا بحق وحقيقة يا رب وبدون دجل الهندي المستهبل والجاتك في رصيدك سامحتك تب يا خوي كل سنة وانت بالف خير
شاعرتنا الرقيقة اسماء الجنيد كل سنة وانتى طيبة تعرفى يا اسماء الواحد بتكمل كلام البنغال والهنود اكتر من السودانى لانو محل ما اقبل لازم من اتعامل معاه هندى او بنغالى فى العمل فى السوق فى الدكان فى التاكسى فى اى مكان حتى العرب ما بيفهونا بى لهجتنا السودانية الا بالطريقة دى
Post: #38 Title: Re: @ ربحت نصف مليون درهم من اتصالات الامارات .. Author: حاتم عمر صالح Date: 09-16-2010, 04:21 AM Parent: #37
المتهمون أوهموا ضحاياهم بالحصول على جائزة نصف مليون درهم القبض على عصابة النصب الهاتفي باسم «اتصالات» حجم الخط |
ألقت إدارة البحث الجنائي بشرطة الشارقة القبض على 10 أشخاص من الجنسية الباكستانية بتهمة تكوين شبكة للنصب على الأهالي من خلال الهاتف وإيهامهم بأنهم فازوا بجوائز مالية كبيرة وأن عليهم تحويل أرصدة بمبالغ معينة حتى يتمكنوا من الحصول على جوائزهم.
وقال مصدر مسؤول بشرطة الشارقة لـ”الاتحاد” إن التحريات التي قامت بها أجهزة البحث الجنائي كشفت أن المتهمين العشرة كانوا يوهمون ضحاياهم بعد الاتصال بهم بأنهم حصلوا على جائزة مالية من “اتصالات” بقيمة نصف مليون درهم ثم يطالبونهم بتحويل أرصدة هاتفية بمبالغ تتراوح بين 1500 إلى 10 آلاف درهم بزعم استكمال الإجراءات الخاصة بتسلم هذه الجوائز الوهمية.
وأضاف أن المتهمين استأجروا شقة في المنطقة التي تقع خلف المبنى الرئيسي لمؤسسة اتصالات بمنطقة المناخ بالشارقة، واستخدموا عدداً كبيرا من الهواتف والبطاقات التي تحتوي عدداً كبيراً من أرقام الهواتف في الاتصال بأفراد الجمهور للنصب عليهم والحصول على أرصدة منهم عن طريق الغش والتدليس.
وقال: تم تكليف فريق شرطي بتفتيش الشقة التي يتخذ منها مقراً لشبكة النصب والتي يقيم بها المتهمون، حيث تم ضبط عدد كبير من الهواتف المتحركة وبطاقات sim التي يتم استخدامها في الاتصال مع الضحايا. وأوضح أن المتهمين بعد ضبطهم متلبسين بالنصب والاحتيال على أفراد الجمهور اعترفوا بجريمة النصب عن طريق الحصول على الأموال من خلال إعادة بيع الأرصدة الهاتفية المحمولة إليهم بمبالغ تقل بنسب معينة عن أسعارها الحقيقية وبناء على اعترافاتهم فقد تم توقيفهم جميعاً تمهيداً لإحالتهم إلى النيابة العامة بالشارقة. وكانت عدة بلاغات قد وردت إلى شرطة الشارقة من قبل بعض الأشخاص الذين تم الاتصال بهم من قبل عناصر الشبكة الإجرامية وقاموا بالفعل بتحويل أرصدة هاتف قبل أن ينقطع الاتصال بينهم وبين أفراد العصابة ويكتشفوا أنهم أضاعوا أموالهم جرياً وراء السراب. وحذرت الإدارة العامة لشرطة الشارقة من عودة ظاهرة النصب الهاتفي التي كانت قد تراجعت خلال الفترة الماضية نتيجة حملات التوعية المكثفة والتي شملت إرسال مليون رسالة نصية للتحذير منها بمختلف اللغات المستخدمة في الدولة لأفراد الجمهور من قبل وزارة الداخلية.
