اغتصاب طفلة....اغتصاب طفل اذلال امرأة انتو الدنيا دي ماشة علي وين؟؟؟؟

يا جماعة الخير الحاصل شنو
في الدنيا دي
كل سنة في الحكومة دي بقينا نسمع بي مصائب عجيبة
اغتصاب اطفال
اغتصاب طفلة
اغتصاب طفل في مسجد
اغتصاب طفلة في رمضان
جلد فتاة
اذلال فتاة
انتو الشفع ديل ما يمرقوا علي الشارع ولا شنو؟؟
ولا نمرق نحن؟؟؟
ولا المسألة دي حدها وين
حاجة تمحن يا حكومة المحن

كدي بالله اي واحد عندو بوست عن السقوط المعيب ده ينزلوا هنا خلونا نحصر البلاوي دي
ونشوف العوجة
فينا نحن
ولا في الحكومة دي
ولا في شفعنا ديل الما بسمعو الكلام ديل وبمشوا الجوامع والشوارع
وفي بناتنا البمرقن لي برة
ونشوف تفسير اخوانا في الحكومة للموضوع ده شنو
امكن نلقي لينا مخارجة لي اولادنا من الخطر ده
او نلقي مخارجة من الحكومة دي
مودتي
عمر

مرقة الشفع للشارع ما جديدة ولا المشي للجامعة للصلاة جدي دولا بناتنا مرقن الشارع مع الانقاذ دي ...
المصايب دي كلها من الاسلاميين الفي الحكومة ديل وفي مشروعهم اللاحضاري دا والدخل مفاهيم غريبة جدا جدا في مجتمعنا البسيط المتماسك بعرى العادات والتقاليد السمحة البعيدة عن العنف والبغض والكراهية ورفض الاخر .. ديل جاؤا من كهوف العصور الوسطى وها انت تراهم يقبلون على الدنيا ومباهجها بقروش بترولنا ونسوا شعار (ما لدنيا قد عملنا) والعملوا هم ما في حاكم عملو على مر العصور والحكومات ووقعوا بي وشهم في امتلاك الاراضي والعربات والسكن الفاخر والاكل الما خمج والسفر والمتعة وما طاب لهم من النساء و....الخ والبفتح خشمو البطش والتنكيل راجيهو ولاقين علماء السوء ,علماء السلطة, يفصلون لهم الفتاوى زي ترزية الجلاليب ويزينون لهم باطلهم وكلو بي حقو..وقصر الكلام يا عمر يا خوي قولك:-

Quote: او نلقي مخارجة من الحكومة دي

ودي ما بعيدة على شعبنا الصابر دا..
كل سنة وانت بخير وعافية

السجن 7 سنوات والجلد لمغتصب طفلتين!
السجن المؤبد على رجل اغتصب ابنته!
جثة طفلة عارية داخل مصرف مياه تثير مشاعر أهالي شمبات !
اغتصاب فتاة عمرها 12 عام من قبل ثلاثة اشخاص!
السجن عامان ومائة جلده لمغتصب طفل في العاشرة من عمره داخل مسجد!!
إفادة من القاضي الذي حكم في قضية إغتصاب الطفل في الجامع!
الأخ الكريم عمر محمد ابراهيم كل عام وانت بالف خير وربنا احقق امنياتك ..
لك جزيل الشكر على إثارة هذا الموضوع الذي يهم فلذات أكبادنا ويقلق مضاجع الجميع ..
لقد ناقشنا هذه القضية في البوستات أعلاه وهذه القضية محور إهتمامي لما لها من تاثير
سلبي على ابنائنا وبناتنا في المستقبل إذا لم نتدارك العواقب من الأن..
سوف أرجع للمناقشة والحوار معك اليوم عيد عندنا..

المجتمع السوداني اثبت انو في غاية الهشاشة

أول مصيبة كبيرة (حكومة الجبهة الإسلامية) جاتو

بدأ يتفتت

النسيج الاجتماعي تفكك

الأخلاق والقيم التي ظللنا نباهي بها ونتوارثها جيلا وراء جيل

لم تتماسمك "مونتها" لأكثر من سنوات تعد على أصابع اليد الواحدة عقب مجئ الإنقاذ

هذا على الصعيد المعنوي الأخلاقي الاجتماعي

أما على الجانب المادي فها هو انفصال الجنوب يصبح واقعا

وفي الأفق دارفور والشرق وربما الوسط (مشروع الجزيرة بدايةً)

لم يعد السؤال : من أين أتى هؤلاء

بل إلى أين يذهبون بهذه الأمة

ما الذي يجعلهم يحملون كل هذا الحقد على أهلهم بالذات

Quote: لم يعد السؤال : من أين أتى هؤلاء بل إلى أين يذهبون بهذه الأمة

الاخ معاوية كل سنة وانت طيب
ونسأل معاك نفس السؤال الجديد
وده الأهم
الي اين يذهبون بهذه الأمة

Quote: السجن 7 سنوات والجلد لمغتصب طفلتين! السجن المؤبد على رجل اغتصب ابنته! جثة طفلة عارية داخل مصرف مياه تثير مشاعر أهالي شمبات ! اغتصاب فتاة عمرها 12 عام من قبل ثلاثة اشخاص! السجن عامان ومائة جلده لمغتصب طفل في العاشرة من عمره داخل مسجد!! إفادة من القاضي الذي حكم في قضية إغتصاب الطفل في الجامع! الأخ الكريم عمر محمد ابراهيم كل عام وانت بالف خير وربنا احقق امنياتك ..

الاخت اماني
كل سنة وانتي بالف خير
وقبل ده كان
اغتصاب طفلة المسيد ذات الاربع اعوام
اغتصاب مرام
اغتصاب طفلة في ريف الجزيرة
لهذا وجب علينا ان نتوقف في هذه الظاهرة الغريبة الدخيلة علي المجتمع لمناقشة كل مسبباتها واسبابها
ومسؤلية المجتمع والدولة فيها
لابد من وقفة جادة
وقفة جادة
وقد بلغ الخوف اشده
لك التحية منتظرك

Quote: السجن 7 سنوات والجلد لمغتصب طفلتين! السجن المؤبد على رجل اغتصب ابنته! جثة طفلة عارية داخل مصرف مياه تثير مشاعر أهالي شمبات ! اغتصاب فتاة عمرها 12 عام من قبل ثلاثة اشخاص! السجن عامان ومائة جلده لمغتصب طفل في العاشرة من عمره داخل مسجد!! إفادة من القاضي الذي حكم في قضية إغتصاب الطفل في الجامع !

اماني سلامات
ودي اضافة تانية
ارجو تجميع كل البوستات ذات العلاقة لنعلم حجم الكارثة الاخلاقية التي احلت بهذا المجتمع
شيخ يغتصب طفلة
كما ورد قبل قليل في احد البوستات
تحياتي

Quote: مرقة الشفع للشارع ما جديدة ولا المشي للجامعة للصلاة جدي دولا بناتنا مرقن الشارع مع الانقاذ دي ... المصايب دي كلها من الاسلاميين الفي الحكومة ديل وفي مشروعهم اللاحضاري دا والدخل مفاهيم غريبة جدا جدا في مجتمعنا البسيط المتماسك بعرى العادات والتقاليد السمحة البعيدة عن العنف والبغض والكراهية ورفض الاخر .. ديل جاؤا من كهوف العصور الوسطى وها انت تراهم يقبلون على الدنيا ومباهجها بقروش بترولنا ونسوا شعار (ما لدنيا قد عملنا)

الاخ العزيز BAKTASH
كل سنة وانت طيب
يا اخي الجديد زي ما قلت هو مجئ هذا النظام
وممكن جدا تكون الحالة دي كانت موجودة سابقا لكن ان تصل الي مرحلة ان تصبح ظاهرة تهدد المجتمع وتشعر اولياء الامور بهذا الخوف والهلع فلابد ان نتوقف عنده طويلا ويتوقف فيها حتي هولاء الحكام حتي ولو كان من باب المحافظة علي مصالحه او من باب انهم مسلمون كما يدعون
هذا التحلل الاخلاقي في مجتمعنا الذي وصفته بالتماسك هو اخطر كثيرا من بقاء هذا النظام او ازاحته
كل سنة وانت طيب وراجع ليك لأن الموضوع يستحق حقيقة نقاش متكامل ومن كل الألوان والاصوات في المجتمع
لأن المسألة دخلت في اللحم الحي
عمر

كل سنة وانت طيب يا عمر

معليش ما عيّدنا عليك

ياخ الواحد بقى ينسى اسمو ذاتو

------------------

تعرف يا عمر المشكلة الأكبر وين

لما ارجع في إجازة للسودان واقابل أصحابي

وأسألهم عما يجري بكونوا باردين جدا وكأنو الموضوع ما بستاهل

ليس أصحابي فقط بل الكثير ممن يكتبون في هذا المنبر من السودان

يتهمون من في الخارج بالمبالغة في تصوير الانهيار الذي أصاب البلد

طبعا أنا فاهم انهم تجرعوا السم جرعة جرعة .. الخ التحليل

لكن الواحد منهم لو قضى سنة واحدة بره السودان ورجع سيكتشف الحقيقة المذهلة

-------------

عيد سعيد للجميع والسنة الجاية الوطن كامل

Quote: لما ارجع في إجازة للسودان واقابل أصحابي وأسألهم عما يجري بكونوا باردين جدا وكأنو الموضوع ما بستاهل ليس أصحابي فقط بل الكثير ممن يكتبون في هذا المنبر من السودان يتهمون من في الخارج بالمبالغة في تصوير الانهيار الذي أصاب البلد

الأخ معاوية
تحية طيبة
وانت طيب
انت عارف ده لأنهم زي ما قلت يتجرعون السم جرعة جرعة
ومن بالخارج يتجرعه دفعة واحدة وبكمية كبيرة حسب سنين بعده من الوطن
لكن ديل عايشين وسط النار التي بدات من مستصغر الشرر وكل يوم برمو فيها عود عود لهذا قد لايشعرون بها او تقل حساسيتهم تجاهها وهم مشغولين في (اكل العيش البقي احر من النار دي)
لكنهم قطعا سيشعرون بها في وقت قريب جدا عندما يصبح الأمر مهددا لكل الاسر كما هو الآن ذاهب في هذا الأتجاه
لك التحايا ومعا من اجل مزيد من الحوار والكشف
لمعالجة هذه الظاهرة الخطيرة وخطيرة جدا

هل تذكرون قصة أميرة الحكيم والبروباقندا العملتها الراية وألوان عن تلك القصة والتي إتضح أنه فيها إنّة. طيب وين الكُتّاب الزمان ديك؟ ماتوا ولا حيين وماتت فيهم حاجات تانية؟ هذا هو الكيل بمكيالين البرفضوه الناس من أميركا. ربنا يستر على أطفال الجميع.

كبـّـاشي الصـّـافي

(العوج راي والعديل راي)