Post: #1
Title: عادات نسائية سودانية مية المية (النضافة يوم الوقفة)
Author: سامى عبد الوهاب مكى
Date: 09-09-2010, 09:52 PM
كل عيد نقعد ننبه يا ناس يا هو يا بشر حاولو إنتهو لينا بدري عشان نحاول ننوم بدري ونصحى بدري ونضوق طعم العيد والواحد ما يبقى زي الأهبل لا قادر يستقبل ضيفان لا قادر قادر يزور جيران ويكون مخدر ونعسان وفي النهاية يستسلم للنوم في وقت غريب جداً ويبقى في النقة...(جينا نعيد لكن لقيناك-م نايميييييييين!)
الكلام دا من الواحد قبل يعمل ليه بيت وأولاد وبعد ما عملنا..
يا ربي الكلام دا عندنا برانا ولا شي عام عند كل الشعوب!
معقولة يعني النسوان ما يفكرن ينضفن البيت الأصلاً نضيف إلا بعد الساعة 12 تكون خلاص قربت تنوم فجاءة وأنت بين نائم وصاحي تسخن تفتح تلقى النور اتولع والمروحة وقفت والمقشاشة شغالة قرش ونص!!
في شنو يقول ليك عاوزين ننصف هنا!!
ما نضفتو قبيل !!
لا فضل شي بسيط ناسي بكرة العيد؟؟
تضطر تفتح وتبرطم (براحة براحة) وتبدا تشوف ليك موضوع تتشاغل بيه أو تكرج سنونك وتساعد!!
إنتهوا تجي جاري مسكين عاوز تنوم يحيبو ليك البت الصغيرة يقولو ليك أمسكا عشان عاوزا أتحنن!
هسي عليكم الله البحنن منو؟؟
غايتو يا نسوانا ويا حنانا الله يدينا خيركم!
النظام حلو يا ناس!!
|
Post: #2
Title: Re: عادات نسائية سودانية مية المية (النضافة يوم الوقفة)
Author: خالد فهمي
Date: 09-09-2010, 09:53 PM
Parent: #1
ما تنسى الخبيز ..
كل سنة وإنت طيب
|
Post: #3
Title: Re: عادات نسائية سودانية مية المية (النضافة يوم الوقفة)
Author: سامى عبد الوهاب مكى
Date: 09-09-2010, 10:02 PM
Parent: #2
لا لا الخبيز دا انا مزقت فاتورته زمااااااان ووقفت الاستهبال بتاع مليون بيضة وطن دقيق ويومين عمل والمحصلة جردل متواضع يحرموك تشيل منه!
تشتري جاهز بس ..
لكن بقت النضافة يا ربي كل عيد نشتري بيت جديد(منضف جاهز) عشان ننوم بدري
كل عام وانت بخير يا خالد
|
Post: #4
Title: Re: عادات نسائية سودانية مية المية (النضافة يوم الوقفة)
Author: Dr. Ahmed Amin
Date: 09-09-2010, 10:05 PM
Parent: #3
الزقازيقي سامي
كل عام وانت والسرة بالف خير
والله موضوعك ده جاء في وقته تمام
ونحن في يوم الوقفة ..
انت عارف الحكاية ده اصلو ما قادر اهضمه
وبتجيب لي أخلاقي هنا عدييييييل ..ياخي ديل كرهونا
غايتو أقول شنو .. الله يديهم العافية ويخفو علينا شوية
كن بخير ..
|
Post: #5
Title: Re: عادات نسائية سودانية مية المية (النضافة يوم الوقفة)
Author: سامى عبد الوهاب مكى
Date: 09-09-2010, 10:17 PM
Parent: #4
كل سنة وإنت بألف خير يا دكتور
أنا هندي (رفيق) ما زقازيقي إلا تكون قاصد زقاقات أمدرمان!
Quote: الزقازيقي سامي
كل عام وانت والسرة بالف خير
والله موضوعك ده جاء في وقته تمام
ونحن في يوم الوقفة ..
انت عارف الحكاية ده اصلو ما قادر اهضمه
وبتجيب لي أخلاقي هنا عدييييييل ..ياخي ديل كرهونا
غايتو أقول شنو .. الله يديهم العافية ويخفو علينا شوية
كن بخير .. |
الأن انا في مرحلة إسكات البت الصغيرة..
|
|