Post: #1
Title: يا جماعة صحى انا حالتى متأخرة ويلزمنى شرينك!!!!!!!!!!
Author: jini
Date: 09-08-2010, 05:55 PM
أحد اصدقائى مهاتفا صديق مشترك!
"اوعك تجيب لى جنى اى موضوع او كلمة تمت الى وحدة او انفصال او فرز عيشة او تقرير مصير او استفتاء! عينك ما تشوف الا النور يفتح فيك بوصة ونص ويحلك منو الحلال الا تقفل التلفون وتشيل منو البطارية وفى احتمال تكسر الموبايل وبرضو تلقاهو بتكلم عن الباقان والنافع!
جنى
|
Post: #2
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: smart_ana2001
Date: 09-08-2010, 06:00 PM
Parent: #1
ايوه
هسى عليك الله يا جنى الاولاد قاعد تتونس معاهم فى شنو.
___________________________________________________
ام الاولاد تكون زينا ـ مسكينةـ شبعانا كلام عن الوحدة و الافصال
|
Post: #3
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: jini
Date: 09-08-2010, 06:06 PM
Parent: #2
| Quote: ام الاولاد تكون زينا ـ مسكينةـ شبعانا كلام عن الوحدة و الافصال |
براية ودربكين اصلى وكسير مجاديف!
انت متين نبنى البيت!
البانينين ليها شنو ! البلد حتنفصل وتتقسم وتتشظى !
انتى ما عارفة المخطط بتاع الباقان والنافع!
انتى قاعدة وين!
قالت بنا! البانين ليها شنو!
هو حيكون فى حاجة اسمها السودان!
تمصمص خشمها قائلة " مرضة يا بنات أمى الله يشفيهو"!
جنى
|
Post: #4
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: smart_ana2001
Date: 09-08-2010, 06:18 PM
Parent: #3
| Quote: تمصمص خشمها قائلة " مرضة يا بنات أمى الله يشفيهو"! |
جنى....يديك العافية...ضحكتنى لما جارى سالنى :بتضحكى فى شنو.
ام الاولاد بتكون بتفكر انها و الاولاد ح يعملوا شنو لما السودان بالجد ينفصل و انت "تسحلب" بالجد. غالبا ح يرجعوا السودان و يبنوا البيت و يدعوا ليك.
حاول اخد ليك اجازه من المواضيع دى بمناسبة العيد. اسبوع واحد بس. يمكن تقنع زينا. احنا فى البيت بقينا ما بناقش الاخبار نهائي. نتبادل الاخبار بس. حصل "كده" و " كده". و خلاص بنغير الموضوع.
|
Post: #5
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: Nazik Eltayeb
Date: 09-08-2010, 06:18 PM
Parent: #2
و الله ياسمارت (يالعاجب انى صورة بروفايلك بتاعة دكتور هاوس )
انتي قايلا الناس البتكلموا في البوست دا في السياسة ما عندهم حياة اجتماعية وونسات تانية ورومانسيات
لكن كلو شئ بوقته
كل زول بخش المنبر من اجل هدف ما و قضية ما تشغله نعم او حتى ونسة لكن بالتاكيد لن تكون حياتنا الاسفيرية مطابقة لحياتنا اليومية ولا رايك شنو
جني
نحن اشتركنا في سودانيزاونلاين عشانكم تقوم تعمل شرينك لكن ما بالغتا
كسرة
سمارت عليك الله ما القا عندك صورة دكتور هاوس هو رافع عصايتو وراسو عامل فيها priest ...دايرها للبروفايل بدل صورة الكنداكة حقتي
|
Post: #6
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: jini
Date: 09-08-2010, 06:34 PM
Parent: #5
| Quote: حاول اخد ليك اجازه من المواضيع دى بمناسبة العيد. اسبوع واحد بس. يمكن تقنع زينا. احنا فى البيت بقينا ما بناقش الاخبار نهائي. نتبادل الاخبار بس. حصل "كده" و " كده". و خلاص بنغير الموضوع. |
إسبوع بالكامل!
يكون المتعافى باع المناقل والدالى والمزموم وكنانة!
نقول النيل ماشى من الشمال للجنوب يقولوا جنَ نسكت مدنى تغرق!
نازك!
علىكى الله الما بجنن شنو!
الواحد عينو فىها الموية والمتعافن يدق جرس فوق بلدو!
جنى
|
Post: #7
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: smart_ana2001
Date: 09-08-2010, 06:58 PM
Parent: #5
Quote: انتي قايلا الناس البتكلموا في البوست دا في السياسة ما عندهم حياة اجتماعية وونسات تانية ورومانسيات
لكن كلو شئ بوقته
كل زول بخش المنبر من اجل هدف ما و قضية ما تشغله نعم او حتى ونسة لكن بالتاكيد لن تكون حياتنا الاسفيرية مطابقة لحياتنا اليومية ولا رايك شنو |
سلامات Nazik....طبعا عارفه يا اخى ان الناس ديل عندهم حياة. ذى ما انا زاتى عندى حياة بره البورد. اكيد حياتى ما كلها افلام و مسلسلات و طبيخ. زوجى مثلا سامع بس بالبورد. و ما اظن انه فتحه قبل كده.
انا بس بكاوى فى جنى. جنى عندو اطفال ـما شاء الله و الله اكبرـ حلوين و باين عليهم شاطرين و لطاف. و عشان يطلعوا كده ....اكيد ابو الجنون قاعد يقضى معهم وقت غالى و جميل.
ح احاول افتش ليك صورة هاوس
|
Post: #8
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: يوسف محمد يوسف
Date: 09-08-2010, 11:46 PM
Parent: #7
جنى
تحياتى و كل عام وانت و الاسرة بكل خير
ما عارف اقول ليك شنو .. يظهر لانك خليت القعدة فى " بنى مالك " و بقيت مصاقر المنبر !!
غايتو .. جبت ليك كلام لروحك !
اظهر يأأأأأأأأأأأأخ .. و خليك من ال بى بى سى ... و تعال القهوة خلينا نتناقش فى ما سيبقى من السودان !!
ودى
|
Post: #9
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: آدم صيام
Date: 09-09-2010, 05:38 AM
Parent: #8
جني العيد مبروك عليكم
إنت يا جني بدل الشحتفة دي ما تسد أضانك لحد يناير السنة الجاية لعل وعسى!
عالم شفقانة بشكل !
غايتو لو الانفصال ده وقع تتحملوا وزره تلاتة أنفار: إنت، وباقان والتالت داك منو؟
|
Post: #10
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: jini
Date: 09-09-2010, 09:19 AM
Parent: #9
Quote: ما عارف اقول ليك شنو .. يظهر لانك خليت القعدة فى " بنى مالك " و بقيت مصاقر المنبر !!
|
الظاهر يا سعادة العميد تلزمكم براية ودربكين والله اجيكم أور يكم نجوم الوحدة والانفصال عز الضهر!
جنى
|
Post: #11
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: nazar hussien
Date: 09-09-2010, 01:48 PM
Parent: #10
يا جني...
من ناحية انفصال...فالجنوب ...مش حا ينفصل...
والمصريين...حا يرجعوا لينا مشروع جزيرة السبعيتات
والجنيه السوداني يبقي بي 3 دولار...
يعني لو عندك حساب بالجنيه..
حا تمشي تلقاه بجيب ليك فيلا في جده
والباقي يجيب ليك شقتين في مصر
ترجع تسكن في بيت أهلك...
واجاراتك من مصر وجده
تجيك عند اهلك...دا غير (حق الكرج) في مشروع الجزيره
الكرج دي: حق معلوم لصاحب الارض من ريعها...(وهي كلمة وسط سودانية)
|
Post: #12
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: قرشـــو
Date: 09-09-2010, 01:53 PM
Parent: #11
سلام يا جنى
وكل سنة وانت طيب
المشكلة اننا بنحرق رزنا على الفاضى
لانه مافى زول بيشاورنا ولا فى زول بياخد رأينا والدايرنو بسووه الجماعة ديل
يبقى الكلام فشة خلق ساكت ؟؟؟
دى حالة احسن منها الاعتزال ياخى
|
Post: #13
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: أشرف البنا
Date: 09-09-2010, 02:34 PM
Parent: #12
جني العزيز
كل سنة و انت و الأسرة بخير
جني الجنوب انتهينا من موضوعو
عندك مجال لسة حول انفصال دارفور
و الله يعين المدام و من جاورك من النقة
لكن يا زول أخير ليك تفضفض منعاً للإنفجار ..... بعدين يبقو عليك اتنين انفصال و انفجار
مودتي و أطيب تمنياتي
|
Post: #14
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: jini
Date: 09-23-2010, 01:35 PM
Parent: #13
Quote:
يا جني...
من ناحية انفصال...فالجنوب ...مش حا ينفصل...
والمصريين...حا يرجعوا لينا مشروع جزيرة السبعيتات
والجنيه السوداني يبقي بي 3 دولار...
يعني لو عندك حساب بالجنيه..
حا تمشي تلقاه بجيب ليك فيلا في جده
والباقي يجيب ليك شقتين في مصر
ترجع تسكن في بيت أهلك...
واجاراتك من مصر وجده
تجيك عند اهلك...دا غير (حق الكرج) في مشروع الجزيره
الكرج دي: حق معلوم لصاحب الارض من ريعها...(وهي كلمة وسط سودانية) |
الظاهر عليك كترت المحلبية يا نزار لكن برضو من خشمك لى باب السما
جنى
|
Post: #15
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: jini
Date: 09-25-2010, 03:52 PM
Parent: #14
Quote: جنى
تحياتى و كل عام وانت و الاسرة بكل خير
ما عارف اقول ليك شنو .. يظهر لانك خليت القعدة فى " بنى مالك " و بقيت مصاقر المنبر !!
غايتو .. جبت ليك كلام لروحك !
اظهر يأأأأأأأأأأأأخ .. و خليك من ال بى بى سى ... و تعال القهوة خلينا نتناقش فى ما سيبقى من السودان !!
ودى |
وانت بالف خير يا سعادة العميد
هو فضل حاجة فى السودان عشان يتناقشوا فيها!
لحد السنة الجاية بكون باقى فى السودان كله اوضة وبرندة!
وبرضو حيعرضو ويرقصو فيها!
جنى
|
Post: #16
Title: Re: يا جماعة صحى انا حالتى متأخرة ويلزمنى شرينك!!!!!!!!!!
Author: محمد البشرى الخضر
Date: 09-26-2010, 05:36 AM
Parent: #15
السلام عليكم جني
مساوئ الإنفصال و عرفناها
هل في أي إيجابيّات ؟( من باب نصف الكوب الملآن)
|
|