Post: #1
Title: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: وائل فحل
Date: 09-08-2010, 04:31 PM
Parent: #0
........
انا قريت الخبر الاثار كل الضجة دي عن المصريين ومشروع الجزيرة ، وعايز اوضح وجهة نظري هنا !
اولا : كويس انو اعضاء المنبر اخدتهم الغيرة والحماسة لتراب البلد وفتحوا كمية من المواضيع في الموضوع دا ، بس في بعض الملاحظات :
اولاً : الاخوة الذين يتحدثون عن بيع مشروع الجزيرة للمصريين ... دا كلام ما صحيح ... الخبر كما ورد من جميع الوكالات ليس فيه لفظ بيع ابدا ...
نظام التعاقد حسب ما جاء في الخبر : | Quote: تم توقيع وثيقة الاتفاق المنظم لعملية الزراعة التعاقدية بالسودان |
الاتفاق هو اتفاق عقد إيجاري .. يعني ما (بيع) ..
وفرق كبير طبعاً بين البيع وبين التعاقد ..
نظام الزراعة التعاقدية نمارسه في مشروع الجزيرة بإسم (الدنقدة) يعني مزارع يقوم (يدنقد) حواشتو لي مزارع تاني ، بمعنى ( يأجرها ليهو لمدة موسم واحد عشان يزرعها ) .
........
ثانياً : ليس هناك فلاح ( او مزارع ! ) مصري حيجي سيأتي الى السودان ... ولا ادري من اين ذكر الاخوة هذه المعلومة ، فالاتفاق لا يتحدث عن استجلاب فلاحين مصريين للسودان ..
الاتفاق يتحدث بوضوح عن انو ادارة مشروع الجزيرة هي التى تقوم بكافة العمليات الزراعية حتى مرحلة الحصاد ، شوفو نص الخبر هنا : | Quote: وأشار الوزير نصار إلى التزام ادارة مشروع الجزيرة ، بعمليات الزراعة بالكامل وتوريد المحاصيل للجهات المصرية |
.............
يعني النقطيتن ديل واضحات ، مافي داعي الناس تاخدها العاطفة بدون إنصاف :
1 - ليس هناك (بيع) .. هناك (زراعة تعاقدية)
2 - لن ياتي اي فلاح مصري الى السودان
...................
لاحظوا : انا هنا اتحدث عن الاتفاق الرسمي ، اما ما تبثه القنوات المصرية من برامج ودعوات للعمال للهجرة الى السودان وووو ، دا مجرد كلام ،
.....................
يعني المسألة انو مصر (بتشتري) حصاد المشروع ، وفي النهاية دا الاصلا قاعد يحصل من سنين ، المحصول مطروح في السوق واللي عندو قروش يشتري ..
الفرق انو كدا بقى في (زبون) مضمون للمحصول ، وممكن يضمن للمزارع تسويق محصولو بدون ما يقلق على الفوضى التى تنتظم تسويق المحاصيل كل سنة ..
بالإضافة الى أن المزارع يضمن الحصول على مدخلات الإنتاج ، وهي مكلفة وغالية جدا بالمناسبة ( جوال السماد العادي المستخدم سعره اليوم حوال 57 جنيه )
....
اما الشروط الجزائية على ادارة مشروع الجزيرة ، فدا برضو كويس عشان الادارة تهتم وتشوف شغلها ، وتهتم بعملية الري والمتابعة ، لأنو بتون عارفة انو عليها التزام .
...........
دي وجهة نظري شخصياً ، وأنا أكتبها الآن من داخل حواشتنا في مشروع الجزيرة بالمناسبة.
|
Post: #2
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Ahmed musa
Date: 09-08-2010, 04:42 PM
Parent: #1
تسلم يا وائل
الغريبة انا قريت الإتفاق مالقيت فيه بيع
جيت المنبر لقيت المشروع حصل ليه بيع
خفت وإستغربت بالذات جزئية مجئ المصريين
نعم هم محل ترحاب لكن مليون مصري
بغيروا النسيج حقنا ده الكان مخوفني
شُكراً وسلامي للأهل والحواشة وكل عام وانت بخير
|
Post: #3
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: محمد إبراهيم علي
Date: 09-08-2010, 05:13 PM
Parent: #2
وائل عيدك مبارك وربنا يخلي ليك حواشتك
ادناه ردي في بوست فتحه عصام دهب بخصوص الموضوع
Quote: اسباب اعتراضي
1- مشروع الجزيرة تركيبته المحصولية مختلفة تماما عما ينتوي المصريين زراعته ومزارعيه وخبراءه ليست لديهم معرفة بزراعة بنجر السكر او الذرة الشامية (ياخي نحن بنسميها عيش الريف) وفي ظل شرط جزائي مجحف في حالة عدم الوفاء بالالتزامات التعاقدية لا يمكن المجازفة بتجربة زراعة محاصيل جديدة على الارض والظروف المناخية للمشروع
قديما تقوم هيئة البحوث الزراعية وجامعة الجزيرة بتجربة اي عينة جديدة من محصول القطن او الذرة في المزارع التجريبية لمدة من الزمن قبل الدفع بها الى المزارعين ولاحظ هذه محصولات مجربة (القطن والذرة) ولكن لا يتم المجازفة بدفعها مباشرة للمزارعين
2- ما افهمه الاستثمار يكون في ارض لم تخسر فيها الحكومة شيئا لا في ارض خسرت فيها الحكومة بلايين الدولارات لجعلها جاهزة للزراعة اي ان من يريد الاستثمار عليه ان يدفع تكلفة اقامة البنيات التحتية من وسائل ري وطرق ومعدات
3- كيف يكون هناك شرط جزائي يقوم فيه مشروع الجزيرة (المزارع) بدفع السعر العالمي للمنتج نقدا وقت التسليم زائدا 25% غرامة فكيف تضمن مثل هذه الانتاجية في مثل ظروف السودان هذه من ظروف مناخية وآفات وخلافه مما يؤثر على انتاجية الفدان
4- سيقوم الجانب المصري يتوفير مدخلات الانتاج من بذور ومبيدات واليات وسيخصم ثمنها من عائد بيع المحصول لهم وهذا ايضا شرط مجحف اذ سيربط المزارع بمصدر واحد للشراء منه مما يدفع للتحكم بالسعر وربما ارتفاع التكلفة مما يترتب عليه انتفاء الفائدة من اساسو
5-اغتيال اي امل في قيام صناعة مرتبطة بمدخلات الزراعة حيث ان اكبر سوق لها هو مشروع الجزيرة مما يجعل السودان مرتهنا برضاء الحكومة المصرية عنه حيث انهم يمكن ان يلغو الاتفاق في اي مرحلة مما يترتب عليه فقدان اسوقنا القديمة حيث سيكون استولي عليها موردون اخر |
|
Post: #4
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: على ميرغني
Date: 09-08-2010, 05:27 PM
Parent: #3
| Quote: الغريبة انا قريت الإتفاق مالقيت فيه بيع |
زمن البيع الواضح انتهى يا هداكم الله
وحتى نقول مافي بيع .. العقد نص على ان مصر توفر الاسمدة والمبيدات والعمالة والمعدات
ودا كلو يعني انو السودان يصبح مستهلك وليس مصنع وسوق للاسمدة المصرية وبما انك اسع قاعد في حواشتك شوف واسال عن السماد الاقل فعالية كمان برضو لمبيدات والبذور المحسنة
اما البيع الواضح بيظهر في الشرط الجزائي اذا فشل مشروع الجزيرة في توريد الانتاج الى مصر ..... ألخ
وما وضح مدى مسؤولية فشل مشروع الجزيرة في تسليم الانتاج .. وفي الف ظرف خارج يد مشروع الجزيرة مممكن جدا يمنعها من توريد الانتاج
وعلشان تشوف الفرق بين العقودات الصحيحة ومثل هذا العقد ...
تسعى شركة كنانة حالياً للدخول في انتاج الدواجن بصورة واسعة .. دخلت في شراكة مع جهات برازيلية .... اول شئ تم الاتفاق على زراعة وانتاج الذرة الشامية كعلف للدواجن وتم الاتفاق مع اصحاب الاراضي جنوب كنانة حول النيل الابيض ....المدخلات من الشركة والارشاد الزراعي من الشركة والانتاج تاخدو الشركة بالسعر السائد وقسمة الربح على اثنين بدون شرط جزائي
والسؤال المهم جداً لماذا الشرط الجزائي على مشروع الجزيرة وليس حكومة السودان ....
والاهم من كدا لماذ اراضي مشروع الجزيرة يا اخي السودان كلو فاضي وصالح للزراعة ما يمشو المصريين ديل يستزرعوا ليهم اي ارض فاضية
|
Post: #5
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: وائل فحل
Date: 09-08-2010, 05:41 PM
Parent: #4
كل عام والجميع بخير ..
وعيد سعيد للاخوة الكرام احمد موسى ومحمد ابراهيم وعي ميرغني والجميع ..
...
طبعا الاخوة محمد وعلي اوردوا الحديث عن (تفاصيل ) داخل العقد ..
والواضح انو التفاصيل نفسها غير محددة تماما حتى الان لان العقد نفسه لم يجاز بصورة نهائية بعد ..
..
بالنسبة للشرط الجزائي ، طبعا ادارة مشروع الجزيرة كجهة مختصة هي ادرى بمقدرتها على الايفاء بالعمل المطلوب ، لا يستطيع شخص من مقاعد المتفرجين ان يدلي براي صحيح تماما دون الاطلاع على التفاصيل ..
...
انا اتكلمت في نقاط محددة : انو مافي (بيع) ، وانو ما في عمالة مصرية حتجي ..
والاخ علي ميرغني انت شليفك قلت : | Quote: لعقد نص على ان مصر توفر الاسمدة والمبيدات والعمالةوالمعدات |
ودا بالضبط الانا عايز اقول انو ما صحيح... انت من وين جبت قصة (العمالة) دي ؟ ... انا في تفاصيل الخبر ما لقيتها ...
...
بعدين يا استاذ علي ، منو القال انو السماد المصري هو غير صالح او اقل فاعلية ؟
وحتى في العقد قالوا مصر توفر السماد ، قالوا (السماد) ما قالو (السماد المصري) .. يعني ايه ادرانا انو ادارة المشروع ما اشترطت نوع معين من السماد مثلا؟
....
انا شخصيا ما عايز اناقش التفاصيل الفنية الدقيقة ، انا اتكلمت عن نقطتين واضحات ، اما التفاصيل الفنية فاولا العقد لم يكتمل ، وثانيا هناك متخصصين في هذا المجال داخل ادارة المشروع.
|
Post: #8
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: محمد إبراهيم علي
Date: 09-08-2010, 06:14 PM
Parent: #5
| Quote: فاولا العقد لم يكتمل |
الاتفاق وقع ورفعت الاقلام وجفت الصحف
وائل في اسئلة بتطرح نفسها هنا وانت كمزارع وود مزارعين من اقدر الناس على اجابتها
1- من شروط العقد انو مصر توفر مدخلات الانتاج (يعني سماد وتقاوي ومبيدات واليات) وانتو يا مزارعين عليكم تزرعو وترعو زراعتكم دي
لكن وخت خط تحت لكن لو ما قدرتو انكم تورد لينا الكمية المتفق عليها مشروع الجزيرة واللهو في النهاية انت كمزارع تدفع سعر المحصول ده كاش (بالسعر العالمي في وقت التسليم) + 25% غرامة
نضرب امثلة لتقريب المسالة
وائل فحل مزارع في تفتيش س لديه حواشة 10 فدان يجو الخبراء المصريين يقولو ليك حنديك مدخلات انتاج ونحرت ليك ونجهز ليك الارض دي وانت ترعاها لينا وفي النهاية تسلمنا من الفدان مثلا 1 طن ذرة شامي او بنجر سكر وطبعا انت يا مواطن لا زرعت قبل كدة بنجر سكر ولا ذرة شامي يعني ما عندك خبرة ولا فكرة عن انو الفدان بينتج كم طن من المخروبات دي واللهي لم تجرب زراعتها في المشروع قبل كدة يعني كل التوقعات حتكون مبنية على (والله احنا عندنا الفدان في مصر بيقيب كذا)
هل ستضمن انك ستوفي بالتزامك التقاعدي ده وفي حالة عدم الالتزام هل لديك المقدرة على دفع ما اتفقت عليه كاش + 25% غرامة (منين يا حسرة) اذا ما الذي يضمن للمصريين مثل هذه الاموال التي دفعوها طبعا الضمان موجود وهو حواشتك القاعد تكتب منها اسي دي
بعدين سؤال وانت سيد العارفين ما هي مشاكل مشروع الجزيرة ؟
هل من بين مشاكل المشروع عدم وجود اسواق لمحاصيله ؟ ام ان المشكلة هي ارتفاع تكلفة الزراعة وهي في اساسها مشلكة تختص بالحكومة السودانية وضرائبها وجماركها ومحلياتها وبتاعين الصفافير الشايلين ايصالاتهم ولابدين ليكم في الدورانات بتاعات الترع
دي مشاكل المشروع يعني كلها حلها في يد الحكومة تبعد عساكرها وناس المحليات ديل وتسيب الناس دي تزرع وتودي السوق وكمان برضو تجيب ادارة مؤهلة للمشروع من ابناءه ومن الناس العارفة الوجعة وين وياخدو كل الصلاحيات اللازمة لحل المشاكل دي
اهم نقطة هنا طبعا انت حتسلم المحصول ده (في حال الامور كانت تمام التمام) والحكومة السودانية حتستلم القروش من المصريين تفتكر قروشك دي بعد تدخل بطن الحكومة الغريقة بتطلع باخوي واخوك اسال الناس الباعو محصولهم للمخزون الاستراتيجي والناس النزلوهم صالح عام ولا فائض عمالة ولو سلموك ليها يمين تلقاها ما تغطي شي بعد ما يمرو عليها ناس المالية (دولار الحكومة) وناس الضرايب وناس الزكاة ودعم الولايات ودعم الوحدة ودعم دارفور ودعم الشرق ودعم تشاد ودعم باكستان ودعم غزة ودعم المتعافي حتى بعد داك يجوك ناس ولاية الجزيرة وناس المحليات انا فترت كمل انت باقي الدعومات
اليوم داك بس الا تغني ظلموني
|
Post: #6
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Nazik Eltayeb
Date: 09-08-2010, 05:48 PM
Parent: #3
شكرا اخي محمد ابراهيم
فقد كفيتني الرد على الصديق العزيز وائل فحل الذي اكن له كل احترام
واقول له قصة العمالة المصرية فيها قولان وضبابية حسب نصوص الاتفاق المنشورة
اما البيع فهل هناك بيع اكثر من مايحدث الان
وكل عام وانت بخير يا وائل
|
Post: #7
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: وائل فحل
Date: 09-08-2010, 06:01 PM
Parent: #6
كل سنة وانتي طيبة يا نازك ... وعيدك سعيد
...
اول حاجة طبعا شكرا لمبادرتك بجعل الموضوع نقطة تركيز واهتمام للجميع ... موقف مشرف
بس انا حاولت اوضح بعض النقاط عشان الناس تعرف الحاصل بالتحديد بدون انفعال لأنو في النهاية كلنا ما عايزين بلدنا يصيبها ما يكدر ، اياً كان
...
|
Post: #10
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: محمد إبراهيم علي
Date: 09-08-2010, 06:28 PM
Parent: #7
وائل معليش تقلنا عليك
مر على الرابط ده وشوف خالد فهمي كاتب كلام مهم جدا
إنتبهوا و راقبوا السماد والمبيدات المصرية
|
Post: #11
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: محمد علي شقدي
Date: 09-08-2010, 06:33 PM
Parent: #7
وائل الفحل سلامات و تحيه لطرحك
فالذي يدعو لتوقع الاسوء اخي ان الامر جاء في شكل خبر ومن خلال الجانب المصري واللي مجرد التلميح الاعلامي في الدعوه لهجرة الفلاحيين للسودان تجعل من الربط امر منطقي حيث لا يوجد نص قانوني ينفي او يثبت ذلك وخصوصا ان مصر دوله لديها مشاكل انتاج كبيره فهم لا يملكون من مقوماتها الا العماله الفائضه مما جعل منها دوله مصب للعون والهبات ويقابله كل هذامن الجانب الآخر صمت مطبق ومريب من قبل الحكومة السودانيه ونصطحب هنا معنا الهيكله و اكتمال الخطط التجفيفيه لمشروع الجزيرة والوعد بتعويض ملاك الاراضي
|
Post: #9
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Ahmed musa
Date: 09-08-2010, 06:18 PM
Parent: #6
وائل
انا شخصياً مرتاح للنقاش في بوستيك ده
وإنت شكلك قريب من الأحداث
إنت والأساتذة علي ونازك ومحمد
فسؤالي السألته في بوست آخر وراح وسط غبار الخلاف
السؤال الإتفاقية عن أراضي حكومية ولا أراضي مواطنين
بحسب علمي اغلب إن لم يكن كُل اراضي مشروع الجزيرة مملوكة لمواطنين
فهل الوزير عمل الإتفاق ده على أراضي حكومية خالصة ولا اراضي تحت حيازة مواطنين
وهل تملك الحكومة إجبار المواطنين على شراء السماد من مصر وبقية مدخلات الزراعة ؟؟؟
ومادور المزارع السوداني في ذلك ؟؟؟
وهل نستطيع القول بفشل الثورة الزراعية أو النفرة الخضراء ؟؟؟؟
وبدلاً من ذلك لماذا لا تعمل الدولة على ضخ أموال أكتر في المشروع لإعادة االحياة فيه ؟؟؟
وهل تلعب السياسة دوراً في ذلك؟؟؟
فأغلب مزارعي الجزيرة معارضين كعمال سكة حديد عطبرة
إلخ
|
Post: #12
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: smart_ana2001
Date: 09-08-2010, 06:39 PM
Parent: #9
شكرا جزيلا لصاحب البوست
حقيقى انا عندى سؤ ظن كبير تجاه الحكومة و المصريين.....لكن...ده ما بيمنع انى عاوزه افم نص الاتفاقية بعيدا عن "دمنا" و " شرفنا" و الحجات دى.
شكرا تانى
|
Post: #14
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Ahmed musa
Date: 09-08-2010, 06:45 PM
Parent: #12
| Quote: حقيقى انا عندى سؤ ظن كبير تجاه الحكومة و المصريين.....لكن...ده ما بيمنع انى عاوزه افم نص الاتفاقية بعيدا عن "دمنا" و " شرفنا" و الحجات دى. |
والله ده أنا زاااااااااااااااااااااتي يا smart_ana2001
زي القلت الفي بالي
وانا عندي سوء ظن أكتر في المتعافي
لكن عندي طولة بال
أنتظر
احاول أفهم الإيجابيات (إن وُجدت)
السلبيات (إن وُجدت)
إلخ
فأنا من المؤمنين بعدم وجود خير مطلق أو شر مطلق
|
Post: #13
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Abdulrahman Gorashi
Date: 09-08-2010, 06:45 PM
Parent: #9
ياناس الراجل دا كلامو واضح وصريح وكمان بتكلم من الداخل وفي الداخل من داخل مشروع الجزيرة وزول وجعة كمان، فيااخوة تحرو الامانة في نقل الخبر، وماتكبرو المواضيع، والله انا امبارح بعد ماشفتة بوستاتكم تتضارب قلت والله المصريين ديل دخلو مدني عديل وغير الدبابات والصورايخ ماشالين حاجة تانية، فيااخوه بس خليكم easy علينا. انحنا عندنا ضغط وسكري زيادة.
|
Post: #15
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Ahmed musa
Date: 09-08-2010, 06:51 PM
Parent: #13
| Quote: انا امبارح بعد ماشفتة بوستاتكم تتضارب قلت والله المصريين ديل دخلو مدني عديل وغير الدبابات والصورايخ ماشالين حاجة تانية، فيااخوه بس خليكم easy علينا. انحنا عندنا ضغط وسكري زيادة. |
والله ياعبدالرحمن قرشي
انا امس قريت البورد
ومرقت على النضال حفيان
جنبنا مصري طيبان وقهران شكله من حكومته
كلما يلاقيني يسلم علي
أها قال (إزيك ياباشا) كعادته
لقيت نفسي رادي ليه بنفس حار
باشا في عينك وفي عين اليتشددولك !!!
إستغرب ..خاف وفزع ...
أنا زاتي إستغربت وخفت من نفسي ومن دخول البورد !!!
|
Post: #16
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: abubakr salih
Date: 09-08-2010, 07:21 PM
يا اخ وائل ... قلت مافى بيع و الحكاية عقد اٍيجارى و شنو!! يا اخونا القصص كلها بتداء بالطريقة دى
الكيزان من اليوم الاستلموا الحكومة بمرروا الخطط بالتدريج ... اسأل الطلاب عن قصص السكن و الاعاشة
لمن وصلنا القبول الخاص و القبول السياحى فى جامعة الخرطوم.!
يا أمة السودان افهموا حاجة، ليس لمصر مصلحة ابداً ابداً فى نهوض مشروع الجزيرة، بل بالعكس ان ازعم ان مصر وراء تخرييب مشروع الجزيزة بالذات، لان مشروع الجزيرة هو المستهلك الرئيسى لنصيب السودان من مياه النيل. تفكيك مشروع الجزيرة و عطاله
فى مصر المصريين مباشرة لانو السودانيين ما ح يشربوا نصيبهم من مياه النيل و بالتالى ح يمشى لمصر.
* مصر تنجز مصالحها فى السودان عن طريق العملاء و المرتشين، و البيئة الخصبه للعمالة و التعر ،،صه لصالح مصر هى الانظمة الدكتاتوريه دى. عبود ساعد المصريين على اٍغراق الاراضى السودان مقابل لا شئ؟ شوية حفنه الاموال لا تسمن و لا تغنى عن جوع، كان بالامكان المفاوضه على ثمن جارى و ثابت من مشروع السد العالى، الحصول على كهرباء لاناره مناطق شمال السودان الغارقة فى الظلام، او الحصول على مياه و رى ارضى سودانية، ان تتبادل المنفعه بحق.
* النميرى شلة عيال الحرام، قاموا بالموافقه على حفر قناة جونقلى، رغم المخاطر على البيئة المحليه، بل دفعوا نصف تكلفته حفر القناة من ميزانية السودان. الادهى و البطلّع الدين انه حتى ذلك الوقت لم يكن السودان فى اٍستطاعته الاستفاده و تخزين نصيبه من مياه النيل الجارية. اى القناة ليست من اوليات السودان، اولويات التنمية فى السودان كانت بناء خزان جديد يمكّن السودان من توظيف كل نصيبه من مياه النيل، اذا انجزنا هذه المرحلة كان من الممكن ان نبحث كيفية زيادة اٍيرادات مياه النيل، لكن عيال الحرام كانوا من داخل القصر الجمهورى السودانى يعملون لصالح مصر.
اما المتعافن على الطلاق يبيعكم و يقبض ثمنكم حق السمسرة!!.
|
Post: #17
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Hatim Gubara
Date: 09-08-2010, 08:50 PM
Parent: #16
الأخ العزيز وائل..
شكرا لبوستك ولتفنيدك لمجمل الأخبار المتداوله عن هذا الموضوع..
لدي بعض الأسئله فيما طرحت عن الخبر..
Quote:
الاتفاق هو اتفاق عقد إيجاري .. يعني ما (بيع) ..
وفرق كبير طبعاً بين البيع وبين التعاقد ..
نظام الزراعة التعاقدية نمارسه في مشروع الجزيرة بإسم (الدنقدة) يعني مزارع يقوم (يدنقد) حواشتو لي مزارع تاني ، بمعنى ( يأجرها ليهو لمدة موسم واحد عشان يزرعها ) .
........
ثانياً : ليس هناك فلاح ( او مزارع ! ) مصري حيجي سيأتي الى السودان ... ولا ادري من اين ذكر الاخوة هذه المعلومة ، فالاتفاق لا يتحدث عن استجلاب فلاحين مصريين للسودان ..
الاتفاق يتحدث بوضوح عن انو ادارة مشروع الجزيرة هي التى تقوم بكافة العمليات الزراعية حتى مرحلة الحصاد ، شوفو نص الخبر هنا :
Quote: وأشار الوزير نصار إلى التزام ادارة مشروع الجزيرة ، بعمليات الزراعة بالكامل وتوريد المحاصيل للجهات المصرية
.............
يعني النقطيتن ديل واضحات ، مافي داعي الناس تاخدها العاطفة بدون إنصاف :
1 - ليس هناك (بيع) .. هناك (زراعة تعاقدية)
2 - لن ياتي اي فلاح مصري الى السودان
|
إذا كان الإتفاق عن طريق العقد الإيجاري وليس البيع.. فبين أي من الطرفين سيتم الإيجار?
هل المزارع سيؤجر لأي من الحكومتين أم لمزارع آخر?
إذا كان المزارع المصري لن يأتي.. فمن سيأتي ليؤجر من المزارع بطريقه الدنقده?
ولماذا نحتاج لاتفاق مع أي حكومه حتى نقوم بالدنقده لأي شخص كان?
وهل التزام إداره المشروع بعمليات الزراعه بالكامل تعني أن الإداره ستزرع بنفسها حتى الحصاد? وهل يعني ذلك أنها المؤجر?
وما الفرق بين التعاقد الإيجاري كما ذكرت في أول كلامك.. والزراعه التعاقديه كما جاء تحت رقم 1?
Quote: ...................
لاحظوا : انا هنا اتحدث عن الاتفاق الرسمي ، اما ما تبثه القنوات المصرية من برامج ودعوات للعمال للهجرة الى السودان وووو ، دا مجرد كلام ،
.....................
. |
هل لناأن نقرأ هذا الاتفاق الرسمي? أم لعلك تعني ما جاء بالخبر?
وإذا كانت الأخبار في القنوات المصريه مجرد كلام.. فهل معنى ذلك أن الخبر الذي استدليت عليه ربما هو أيضا مجرد كلام لا نستطيع أن نستدل به?
هل هو مجرد كلام ماجاء عن المزارعين المصريين الموجودين بشمال الجزيره?
هل هم يكذبون في موضوع تمليكهم5 فدان لكل? ما مصلحه الإعلام المصري من بث هذه الأخبار?
Quote: يعني المسألة انو مصر (بتشتري) حصاد المشروع ، وفي النهاية دا الاصلا قاعد يحصل من سنين ، المحصول مطروح في السوق واللي عندو قروش يشتري ..
الفرق انو كدا بقى في (زبون) مضمون للمحصول ، وممكن يضمن للمزارع تسويق محصولو بدون ما يقلق على الفوضى التى تنتظم تسويق المحاصيل كل سنة ..
بالإضافة الى أن المزارع يضمن الحصول على مدخلات الإنتاج ، وهي مكلفة وغالية جدا بالمناسبة ( جوال السماد العادي المستخدم سعره اليوم حوال 57 جنيه )
اما الشروط الجزائية على ادارة مشروع الجزيرة ، فدا برضو كويس عشان الادارة تهتم وتشوف شغلها ، وتهتم بعملية الري والمتابعة ، لأنو بتون عارفة انو عليها التزام .
. |
هل معنى ذلك أن الأتفاق ليس إيجار وإنما تعاقد لبيع المحصول مقابل الإستثمار المصري? إذن ما هي القيمه المتفق عليها لكل محصول? هل هو السعر العالمي وفي أي وقت.. الآن.. عند الحصاد?
ولماذا يستثمر رجل الأعمال المصري أموالا طائله في السماد والآليات وغيرها إذا لم يكن سيشتري المحصول بسعر أرخص ليبيعه في الأسواق المصريه ويربح فيه?
هل يوجد أي إحتمال للخساره من جهه المستثمر المصرى? كيف? وإن كان لايوجد احتمال لخساره المستثمر.. هل يعقل مثل هذا في المجال الزراعي? مارأي الشرع?
وإذا كانت إداره المشروع لاتعمل.. من سيدفع الشرط الجزائي? المزارع.. أم إداره المشروع? وكيف يثق أي مزارع بإداره يلزمها شرط جزائي?
|
Post: #18
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: Nazik Eltayeb
Date: 09-08-2010, 09:33 PM
Parent: #17
الاخ حاتم جبارة
لافض فوك
شكرا على التحليل المنطقي للاتفاق الغامض
ذو البنود المجهولة و التي لم تعلن عن عمد
|
Post: #19
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: بدر الدين الأمير
Date: 09-08-2010, 09:45 PM
Parent: #18
ابناء الجزيرة (نرجو تسجيل حضور)
صاحب الدار لك التقدير
|
Post: #20
Title: Re: مشروع الجزيرة لم يتم بيعه ، والمصريون لن يأتوا ، والإتفاق به جوانب إيجابية للمزاعين !
Author: الشفيع وراق عبد الرحمن
Date: 09-08-2010, 09:59 PM
Parent: #17
تشكر يا وائل للتوضيح ومن ارض الواقع
طمنتنا شوية
مريت على كل البوستات والحملة حقت بيع المشروع للمصريين ووالله بطني طمت
اكتر حاجتين بكرهم المصريين والمصريين، وهم من يمكن القول فيهم "اذا دخلوا قرية أفسدوها"
|
|