الســــيدحة ..

السيدحة مصطلح جديد أطلقه علماء الشوارع ..
وعلماء الشوارع دي زاته عايزه ليها شرح ..
والمقصود بالشوارع هنا شوارع الخرطوم عشان مخكم ما يمشي لبعيد ..
والعلماء مقصود بيهم الكسالى والمتسكعين من أهل الجزيرة بائعي ( الملبوسات الداخلية ) في شوارع الخرطوم ..
طبعاً هنا ( قيفناها ) شويه عشان مقص الرقيب وكده ..
يعني كان لقيت ليك زول ماشي في الشارع وقاعد يتسيدح قول حمانا الله ..
والسيدحة زاتا خشم بيوت ..
يلم فيك واحد في الشارع يقوم يتسيدح عليك غايتو يحلك الله منو ..
ما عارف الناس دي بجيبوها من ..
من أين أتى هؤلاء ..
وأعني المتسيدحون ..

يقوم واحد ينط ليك في حلقك يقول ليك ..
ياخي السيدحة معناها ( الروقة ) والترطيبة ..
وقيل إنو البلد سمحححححححة والناس مرتاحين ..
والعلاج مجاني والتعليم مجاني وعطالة مافي كل الشباب الإتخرج وما درس زاتو لاقي شغل ..
طيب الملابس الداخلية دي الببيعة ليكم منو ..
طيب إذا إنتو متسيدحين كده مارقين من البلد مالكم ..
ما كان تقعدوا فيها ولا دا فقه الضرورة بتاع تصدير الكوادر للخارج ..

غايتو كل الطلعنا منو إنو أهل الجزيرة ديل كلهم عبارة عن ملابس داخلية ساي ..
ودي كلها معنى كلمة السيدحة ..

سيدحة بكري ..

عليك الله يا بكري زول يجي في المنبر العام دا و (ينبز) ليهو وطن كامل تقوم تحزف ليهو كلامه ..
ياخي كان تخليه عشان يكون عبرة لغيرة والناس تشوف عمايله ..
والله دي عملية ما كويسه منك يا بكري ..

الكلام ما مر علينا ساي يا بكري ..
قريناهو وردينا عليه ولكن يبقى هنالك حق لابد أن يرجع ..
زول جاء أساء للجزيرة كلها ولأهلها وقال عليهم إنهم

Quote: تركوا اراضي وحواشات ابائهم واجدادهم وامتهنوا حرفة التسكع في شوارع الخرطوم يستبدلون في ملابس خلق الله مقابل الاواني المنزلية او يبيعون ملابس النساء الداخلية واجادوا لغة( ده مقاسك وقدرك وما بتمطي ) بدلاً عن ثقافة الدورة الزراعية التي خلدها اباؤهم لكن مخلفات النار الرماد

دا نخليهو يمشي وين ..
غايتو يحله مننا الحله بله ..

تعرف يا مو...
انا امس قريت كلام الزول ده وكنت في مزاج سيء
والحمد لله الما كتبت في اللحظة ديك...

السيدحة بقت اشكال والوان يا مو...واحد يجي يقول انتو قاعدين راجين حنانكم برة ما تجوا تزرعوا،والتاني يقول انتو بتوع تبديل ملابس بالعدة،والتالت يقول انتو اولاد البوابين وهجرتوا بلدكم ليه،التقول دي مبررات بتديهم الحق يبيعوا ارضنا للمصريين...
تعرف لو كان باعوها رجالة وزندية ما كان في مشكلة،لكن واحد يجي يبرر تبريرات فطيرة وبعد ده يشتم؟؟
المتسيدح ده اظنه ما بعرف حاجة بسيطة انو مشكلة المزراعيين في السودان في السودان تمويل وتسويق خارجي فقط،وبنك الخرطوم الرافض يمول الشعب السوداني بقرض شركة مصرية 4.5 مليون دولار عشان تزرع في اراضينا...تأمل

...
خلاصته يا مو الزي المتسيدح ده لما يسئ لناس الجزيرة في المقام الاول بشتم روحه

السيدحة(مدراس) مثلا عندك السيدحى المجاور؟
وده من نوع السيدحة المستعبدة المكفولة وهو لايعتمد
فى سيدحته على التفاصيل فى ملبسه الخارجى او الداخلى
لان مقره الجديد يعتمد على الفوطةالهندية فى الداخل ؟

وذلك بحكم المجاورة ؟

لى عودة للتفاصيل

عريهم يا معاوية ودالصائم ..
بعدالسلام والعيد يتبارك عليك ..

نحن عايزين نكشف زي ديل يا معاوية أخوي ..
ناس بلا ضمير يدافعون عن الباطل وهم بلا حق ..
ناس نست مخافة الله وهموم أهلها وتابعت سلطان جائر لا يخاف الله ولا تهمه هموم أهله ..
أصبح بيع الأرض أسهل من شرب الموية عند السلطان ..
أها بالله عليك ماذا فضل أو تبقى الآن من السودان ..

في إنتظارك ..

يامعتصم ازيك وكل سنه وانت طيب,,

ياخوي السيدح ما براهو,,
شوف كلام زميله المكاشفي:

Quote: أما المناطق المزروعة فمواطنى القرى المجاورة يلعبوا في الكوتشينة والضمنى واخوانا واخوتنا التاما والبرقو من غرب السودان هم الذين يعملون

وشوف:

Quote: الجماعة الذكرتهم ديل خليهم يمشو يزرعو ليهم فدانين فقط لو ينجحوا احتمال ينجحوا اهي الارض عندهم خرطمية سنة عملوا فيها شنو مالقمح في ناروا والعيش في ناروا وهم فاضيين من لعب الكوتشينة والضمنة وقفت بنفسي عليهم في قرية قرب قرية غرب المناقل

وشوف:

Quote: ولما ذهبت الى المشروع وعينت المشروع لقيت اهمال كبير جدا من هذا المزارع نصحني بعض الاخوة وقال لي انت ما كنت تشارك صحاب ارض انت كنت تشارك التاما والبرقو اولاد الغرب اسي اكت لقيت ليك فايدة خمسة مليون ديل فاضيين من لعب الكوتشينة والاسواق والاغتراب ديل قاللي ما بيشتغلو بيشغلوا اولادد الغرب انت ما شفت نسوان الغرب بيزرعن الفول

طبعا حسب فهم المكاشفي كما يبدو,,,
انه أولاد الغرب ديل ما سودانيين,
وانه مشروع الجزيره مفروض يزرعوهو أبناء الجزيره فقط,,
وبما انهم ما فاضين من لعب الكوتشينه والضمنه,
فالمصريين أولي !!!!!!!

فتأمل !

أماني إزيك ومشتاقوون ..
العيد يتبارك عليك وكل عام وأنت بألف خير ..

للأسف المتسيدحون كثر وهم لا يدرون بأن السيدحة جارية في عروقهم ..
بئس الفهم وبئس القول القبيح ..
هؤلاء لا يعرفون عن الجزيرة ولا أهلها شيئاً ..
الجزيرة مرت بفترة عصيبة خلال حكم الإنقاذ ولكنها لا زالت صامدة ..
تخيلي تدنى المحصول حتى وصل إلى لا شي لأنه موية مافي والترع مقفله والصيانة إنعدمت ..
كافح الناس عشان تبقى أرضهم خضراء ولكن يجي يأطاها الفيل بقوانين الضرائب والزكاة والجبايات ..
الحياة بقت عندهم صعبة والتحضير للزراعة بقى عندهم زي التحضير للزواج الآن وأصعب ..
في السابق كل شئ كان ساهل والتحضير يبدأ باكراً عن طريق السلفيات والصرف الذي يأتي للمزارعين ..
ولكن الآن التمويل بقى عن طريق البنك الزراعي الذي يتحكم في كل شي وتحركه أيدي الحكومة ..
وبدل ما يستفيد المزارع أصبح يسدد في ديونه عن البنك ..
وأما من يلعبون بالكوتشينة حسب كلام المتسيدحون فهو أرحم من من يلعبون بالأموال والبلد ترزح تحت خط الفقر ..

اللهم أجرنا في مصيبتنا ..
ولا تسلط علينا من لا يخافك ..
ببركة هذا الشهر الكريم ..

Quote: خلاصته يا مو الزي المتسيدح ده لما يسئ لناس الجزيرة في المقام الاول بشتم روحه

كلامك صحيح يا قمر بوبا ..
بعد السلام والعيد يتبارك عليك ويعيده عليك بالخير واليمن والبركات ..

يا قمر نحن أهل الجزيرة ومزارعيها نعرف قيمة هذه الأرض وأهلها ..
الجزيرة دي السودان بكل قبائله وأعراقه وسحناته ولهجاته ..
الجزيرة هي الأم التي إحتضنت الجميع وقدمت لهذا الوطن الكثير ..
للأسف يجي واحد زي دا يسئ ليها ويسئ لأهلها لمجرد أنه ينتمي لنظام ظالم لا يفرق بين الحق والباطل ..
مثل هؤلاء الناس بلا ضمير ..
تسوقهم إنتماءاتهم ويحركهم أفقهم الضيق ومصالحهم الذاتية ..
دون النظر لأهلهم وما يصيبهم من إحن ومشاكل لا حصر لها ..
هذه الجزيرة التي تضرر أهلها وأهلكها النظام ليبيعها للمصريين ولبعض المصلحجية به ..
ونقول لهذا المتسيدح ماذا أبقيت لأهلك في الجزيرة يا من تظن أنك منهم وأنت لا تشبه أحدٌ فيهم ..

حسبنا الله ونعم الوكيل ..
وبعد دا كله يا قمر سيد الحوش يجي يقش ###### الزول دا ..
بدل أن يخليه ليكون عبرة لمن يعتبر ..

لك السلام يا صاحب ..

والله يا معتصم أنا أمس شفت اقتراح بحذف الكلام الشين دا
وأتمنيت مثلك إنو بكري ما يحذفوا ويتركوا عبرة
نتيجة الحذف أن السيدحة انداحت وأخذت أشكال أخرى

سلام أخي جعفر ..
والعيد مبارك عليك ..

مشكلة بكري إنو أي زول يقول ليهو عندي بوست أحزفه طوالي يقوم يطقه ليك يجيب خبره ..
وأنا من وجهة نظري أي زول فتح بوست أساء فيه لأحد يتحمل تبعات إساءاته ..
ويا ريت لو البوست إتعلق فووق عشان الناس تعرف ..
أما هذه الطريقة غير مجدية أي زول يجي يقول العايزه وبعدين يطالب بحزف كلامه ..
للأسف السيدحة زادت والمتسيدحون من لا ضمير لهم تحركهم مصالحهم وإنتماءاتهم الضيقة بدون أي وازع ..
الحل في التصدي لهؤلاء المتسيدحين ..

يديك العافية ..

سلامات يا معتصم و لكل الشباب التحيه

قال فيما قال المتسدح انه لا بد ان يستبدل المتعافي قوما غيرهم وقد فعل


مجرد محاولة الرد علي مثل هذا الكلام تصيبك بالدوار ان يوجد سوداني اينا كان حجم ما يحمله في راسه من خلايا سيدحيه ان تؤدي به الي التفكير بالفرح لان جرافات المتعافي والنظام تحاول ان تقتلع جزور الترباله من اراضيهم ليحل مكانها مصريين 0000 قرين السوء عند المتعافي لم يفكر بهذا الشكل فتصدى الجهلاء له جهلاء المكان والزمان والتاريخ للحديث عن المشروع وجعلوا من اهله اسباب ازمته في غباء محكم وتجاهل جاهل لان عمليه الانتاج لها اركان تبني عليها من تمويل وادارة وعمليات تحضير ارض ومياه ري اذا تناسينا معهم الجباية و طريق مدني الخرطوم الذي تحتله الدوله لكن اعمى البصيرة لا يري من الامر شئ غير محاولة التبرير بكل سذاجه سكان الارض فعقلية السديح كواحد من المنتمين للنظام تجعل اسباب ما نحن فيه واضحه وضوح شمس الحقيقه

شكرا لكم علي هذا التصدي ولازمات الجزيرة حديث طويل سنفصله ونكرره ولا نمله لاننا جزء منه

الاخ العزيز معتصم دفع الله
عليك براس المتسيدحين واترك لنا صغارهم

يامعتصم اخبارك..

فعلا ياريت لو بكرى ماحذفو ..عشان يبقى شاهد
على مستوى التفكير والفهم ..وحتى يدفع المترددين
ليناصروا اهلهم على بينة ..عموما حاتم الياس
عندو كلام فى نفس الخط بس بمفردات مختلفةشوية
مابالمباشرة بتاعت السيدح ..بلغة بتاعت زول
مثقف ومتفرد ومتميز على الاخرين ...

محمد عبدالرحمن يا صاحب ..
العيد مبارك عليك ..

بكري طبعاً كعادته طوالي قام لفح البوست ..
لكن أنا حافظه في الحفظ والصون وأي كوت ممكن أجيبه هنا ..
بدل ما نقوم بحملة على المستعمرين الجدد بقينا في زي المتسيدحين ديل ..
أها هسي نحن نستيدح ليكم هنا ولا نقع في رقبتنا دي نكسره ..
تشتيت الكورة دا عارفنه وأخوك لاعب كورة سابق
والله أنا من أمبارح يا محمد المغصة كاتلاني ..
مغصة بيع المشروع للمصريين ومغصة المتسيدحين الجدد ..
بوست حاتم ألياس ما شفته لكن بمشي أشوفه ..

يديك العافية ..

تحياتي أختي نازك ..
والعيد يتبارك عليك ..

عارفه الجزيرة دي ما بنرضى فيها أي حاجة ..
الجزيرة دي وطن جميل نحفظ لها كل جميل عشناه فيها ..
أما أمثال هؤلاء السيدحة لن نتركهم يسئون لأهلنا مهما كان ..
يديك العافية وإن شاء الله نسمع أخبار كويسه عن الجزيرة ..

الحبيب معتصم دفع الله

كل عام وانت والاسره بالف خير


التحيه عبرك لاهلنا بجزيرة الخير والتي تحولت بفعل عصابة الخرطوم لارض جرداء , نعلم تماما بان تمسك المزارع بارضه اكثر من تمسكه باي شئ اخر وكون ان المزراع يترك هذه الارض ويهاجر او يمتهن اي مهنه فهذا دليل على انه افتقد المعينات والتي يجب على الدوله ان توفرها, اعلم في فترة سابقة وفي وقت الحصاد يتم محاصرة كل المزارع بقوات من الجيش واخذ المحصول عنوة وتقييمه بالسعر الذي يرى النظام بانه مجدي وهو اقل من تكلفة الانتاج , ومايصل للمزارع بعد الجبايات وغيره لايكاد ان يسد الرمق فكيف له ان يحرص على الزراعه وهو يواجه مثل هذا الغبن , وياتي السيدح والذي لايسوى ظلف في رجل عنزة جرباء , ياتي ويتشدق بمثل هذا القرف , حقيقة انا لا استغرب منه مثل هذا الكلام وليس ببعيد عنا حديث رئيسهم المأفون عن الغرباويه والذي يسبحون بحمده ليل نهار , فهون عليك ياصديقي , اذا اتتك مذمة من سيدح فهي والشهاده لله بانك كامل والكمال لله من قبل ومن بعد , واعلم بان لو كل سيدح عوى الغمته حجرا يتحتم عليك ان تسكن في منطقة جبليه لتوفر الحجاره لرجم امثال هذا المأفون



كت اوت:


النجيضة على قول ودا الصايم تأجرو ليكم بوكس يكون موديل 78 معاك سبعه وماتنسي صاحبنك العريس لانو عندو خبره كويسه في موضوع التسديح والتسحيب والربط في خلفية البوكس قريب من العادم , وكميه كده من (الكعاعيز) المضببه

ومكه مابعيده تدقو الزول دا وتخلوهو لاحي ولا ميت وتشيلوهو ملابسو الداخليه في يدو يلف بيها على حواري مكه يبدلا بي عده , وبعد داك تعال افتج بوست سميهو غزوة ذات السيدحه النكسيه,, لوول

خضر الطيب يا حبيب ..
وين الحي بيك والعيد يتبارك عليك ..
شنو أخدتك مدينة الضباب دي عننا ..
غايتو الرياض ما بقى فيها إلا عادل بخاري فيه الخير متواصلين مع بعض ..

يشهد الله يا خضر إنه الأرض دي كدت أن أدفع حياتي ثمناً لها ولست بنادمٍ ..
أهلنا يا خضر علمونا حب الأرض دي زرعناها وفلحناها وعرفنا قيمتها ..
لكن زي ما قلت العصابة دي سعت سعياً منذ مجيئها لإحتلالها ثم بيعها وهذا ما يحدث الآن ..
ياخي طيلة العشرين سنة دي وقف حال الحواشات والزراعة والموية وقفت عند أول نقطة في الخزان ..
توقفت مصانع الغزل والنسيج وبقية المصانع من غلال وأعلاف وأصبح أهم طريق فيها (الخرطوم مدني) يصدر الموت ..
لم تطأها عجلة التنمية في ظل الإنقاذ وكل ما تم من مجهودات يدفعه أبنائها بالداخل والخارج خدمة لأهلم حتى مرتبات المعلمين يدفعونها عن الحكومة التي بشرت بالتعليم والصحة والنفرة الخضراء وكان نعم التبشير فقد أخدت أبنائها أي الحكومة من أبناء الوزراء للخارج في أفضل الجامعات ويتعالجون في أفخم المستشفيات ويسكنون أعلى العمارات ..
أما أهل الجزيرة وبقية السودان فعليهم بيع الملابس الداخلية من أنكسة في شوارع الخرطوم والباقي يتشرد خارج البلد ..
تخيل ممكن تمشي أقرب أو أبعد مستشفى وما تلقى علاج ..
هذا هو حال الجزيرة في العشرين سنة الماضية من حكم الإنقاذ ..

أما المتسيدحون ديل ليهم يوم ..
لا هم سيهربون من دعوات الشعب ولا سخطهم ..
ولا من غضب الله ..

يديك العافية وأبقى أظهر ..

كيفك يا شقدي ..
والعيد يتبارك عليك ..

بالضبط زي ماقلت أعمى البصيرة لا يرى أي شي ..
من الأمس بحاول أدورّ الكلام المتسيدح دا كله في رأسي وغصت في أعماق البلد ..
البلد التي ترزح تحت خط الفقر في أخر إحصائية دولية وعاصمتها من أسواء العواصم في العالم وتعيش في حروب دائمة بسبب سياسة حكومتها الظالمة ..
يجي واحد يقول ليك ديل جايين يبيعوا فيها لباسات الحريم وتتمطى وشنو كده ما عارف بهذه اللهجة الفجة وال########ة دون أن يناقش مشاكل أهله ووطنه في داخله ومحاولةالسعي ولو بأضعف الإيمان في تغييرها ..
يا محمد أخوي المتسيدحون ديل تحركهم إنتماءاتهم الضيقة وعقليتهم المتخلفة ..
البلد عشرين سنة تعيش في كذبة كبيرة والحقيقة الوحيدة الفيها إنو المواطن أصبح لا حول ولا قوة له ..
مواطن لا يجد ثمن الدواء أو مقعد لإبنه عشان يتعلم ..
الصور والمشاهد تكفي لتحريك القلوب المتحجرة ولكن هؤلاء المتسيدحين لا قلوب لهم ..
الجزيرة في قلوبنا وأهلها أهلنا وسندافع عنهم بما أوتينا من قوة ..

لك التحية ..
برجع ليك كان الله هون ..

سلام يا معتصم ..
هولاء قوم يبحثون عن خانة في الملعب ..
المتسيحدون كثر وشعارهم انا ومن بعدي الطوفان..
وكل عام والجميع بخير..

تحياتي عثمان جلال الدين والعيد يتبارك عليك ..

إنها لعبة المصالح للأسف ..
الولاء لمن يتبعون ..
والدمار والضياع للشعب المسكين ..

سلام عليكم يا معتصم ولدى وعيدكم مبارك

مشروع الجزيرة قبل زمن ( السيدحة) كان شايل السودان كله واقتصاد السودان كان معتمد على تصدير القطن وكان اقتصاد قوى والجنيه السودانى كان بساوى الجنيه الاسترلينى كتف بكتف،

لكن الزمن داك المالية كان بمسكوها اقتصاديين يكيلوا العين ورجال خايفين الله من مامون بحيرى والشريف زين العابدين الهندى وانت طالع قبل زمن ( السيدحة) وتماسيح الانقاذ المتسيدحة اليبسوا المشروع ويبسوا السودان ،وبعد ما شفطوا البترول عايزين يشفطوا النيل ، ياولدى ديل شكيناهم لى اللا نام ولا أكل الطعام بركة الشهر الفضيل يعدمهم نفاخ النار ويخلص البلد منهم ومن شرورهم ومن اجرامهم.
ياحليل مشروع الجزيرة الكان ماشى زى الساعة ، من تحضير للزراعة وزراعة بالمواعيد ورش بالمواعيد وحش بالمواعيد ولقيط بالمواعيد شوف عينى الكلام دة كله ابوى الله يرحمه كان بسجله فى دفتر ، والمزارعين صرفتهم كل اسبوع أو اسبوعين والكل حامد وشاكر ، والتعليم مجانى والعلاج مجانى سودانى ، وحتى كانت فى منح دراسية مجانية لبعض الطلبة الأجانب فى جامعة الخرطوم ، ودة كله من خير مشروع الجزيرة.
الله لا كسبك خير ياالبشير يارئيس السودان لو وافقت على البيعة المخزية والاتفاقية المخزية دى
تحياتى 

اين سدح السادح المسيدح
ذو الكفيل ناكر جميل البلد
حارق بخور النظام والكفيل
معا؟
هسى السيدوح شغال شنو
عند ذو الكفل بتاعوا ؟؟؟

بعدين اكان شديد ولضييد
ما ترجع تزرع يالعشا بسيدح

قال مجاور بالله ده كلام زول
مجاور وفى رمضان ؟

اها لو ما كنت مجاور اكان
قلت شنو يا سيدوحى

العزيز معتصم تحياتي يا ملك

طبعاً السيد ح دا طلع مووووووووووووبالغة
ياخي زول بشتم أهلو علشان الأغراب؟!
ياخي دا ما فيهو أي نخوة سودانية
والله طبعاً فور دمي، وياريت لو هو براهو
العشرات أمثاله، عليك الله أقرأ المداخلات
عن بيع مشروع الجزيرة للمصريين

تقبل فائق تقديري
وكل عام وأنتم بخير

النذير حجازي يا حبيب ..
العيد يتبارك عليك ..

لما يكون البني آدم أفقه ضيق وولائه للأشخاص ..
بضيع الوطن والوطنية ..
وهذا زمانك يا مهازل فأمرحي ..
هؤلاء المتسيدحون الجدد يقدمون خدمة السلطان على خدمة المواطن والوطن ..
شوف وأسمع كمية الضجيج التي يفتعلونها ..

معاوية ودالصائم ..
ياخي الزراعة دي ليها ناسه ورجاله ..
إنت قايل شيل الطورية دي ساهل

تحياتي مو وعيدك مبارك
يعتقد مثل الجهلول السديح انه قرأ الجامعة بقروش البترول او بقروش المتعافي ولكن لفرط جهله وجهالته غابت عن الحقيقة البديهية الاولي وهي :
ان باعة الانكسة النسائية الذين كان يجلس بقربهم وهو يراقب عمليات البيع ويخمن مقاسات من يرغبن الشراء كانو هم من دفع للحكومة عمره وعمر ابيه كي تفتح الحكومة جامعة بها كلية وداخلية تلم امثال هذا المتبطل العاطل عن موهبة المنزوع الحياء عن وجهه

ومن هنا ومعاك نطالب بكري باعادة بوست السيدح لانو هذا الشخص المريض الجاهل يجب ان ياخد ايقونة خاصة به في اعلى المنبر شتم احد الزملاء هنا بكلمة قائلا له يا فرخ وفتح من قبل بوتا يناشد البشير باراقة دماء المعارضين
مثل هذا لا يجب ان يدفن كلامه في الخور بل يجب ان يعلق اي بوست له اعلى العناوين بل ولا تؤرشف له اي مادة يعني تكون لايف عشان كل ما يجي عضو جديد يلحق ياخد حقو منو

وكلمة اخيرة للسيدح
لا تعتقد ان الموضوع انتهى بسحب البوست ولن ينتهي حتى لو فتحت بوست اعتذار
يمين الله البورد دي يبقى اضيق من خرم الابرة
انا غايتو لو لقيتك تاني فاتح ليك اي بوست ان شاء الله نعي حتاخد الفيها النصيب بعد نترحم على الميت

كيزان مرض بلا يخمكم واحد بتاع سراويل وتكك
والتاني بتاع انكسة حريمي

محمد إبراهيم يا صاحب ..
العيد يتبارك عليك ..

أول مره أعرف إنه بيع الملابس الداخلية أو (الأنكسة) زي ما بيقول عيب ..
طيب الببيعوا في البلد ديل والبسرقوا في قروشها نقول عليهم شنو ..
الفهم قسم يا صاحبي والكبير كبير بي عقله ووقوفه مع الحق ولو يدفع حياته ثمناً لذلك ..

يديك العافية يا حبيب ..

تحياتي دكتورة مهيرة ..
والعيد يتبارك عليكم ..

مشروع الجزيرة يكتسب أهمية كونه هو السودان في بوتقة واحدة ..
جمع كل أهل السودان من شتى أنحائه وكان لهم الملاذ الآمن ..
في عهد عصابة الإنقاذ تدهور المشروع بتصرف حتى يجئ مثل هذا اليوم لبيعه ..
وليست هي المره الأولى التي ترتكب فيها الإنقاذ حماقة في حق شعبها وما أكثر الحماقات التي إرتكبتها ..
أذكر جيداً كيف كان المشروع والإهتمام به من قبل والذي قام على أيدي وطنيين بحق ..
في السابق حين تتجول في المشروع تشعر بسعادة متناهية وأنت ترى الخضرة تكسو جميع الأماكن ولكن الآن لا نرى غير الكآبة والبوس الذي لحق بالمشروع وبأهله ..
لهم الله أهلي في الجزيرة ..
والله لا كسب أهل الإنقاذ دنيا وآخره ..

هلا يا معتصم
عيد سعيد ومبارك عليك
خلي بكري يخم كرور الكـ لـب ده،
ولكن ما دخل في أنفسنا لايمكن كنسه.
ولا عفا الله عما سلف.
للسيدح وكل متغـافي.

الكوز السيدح. يصف المزارعين السودانين ب" الكسالي والمتس...حساب المصرين. مهزلة.

الاخ معتصم.

سلام

أنا كتبت هذا البوست ولكن بعد كم ساعة كده لقيت البوست حط في مكتبتي.

سلوك الكوز السيدح يكشف لنا مدى الضرر الذي ألحقه هولاء المجرمين بالسودان والسودانين.

معتصم كل عام والوطن بخير

موش المصريين عندهم حاجة ... بتقول السح الدح امبو ادي الود لابو
السيدح الدمبو ...الله يزيدنا في الصبر

الاخ معتصم
سلامات ورمضان كريم
السيدح لم يكن اول من يستن هذه السنه من اولئك المنافقين،
فقد سبقه رئيسهم وكبيرهم المجرم الذى اساء لنساء دارفور اساءة تسفك دونها الدماء،
كما اساء رئيسهم الهمام الى الشعب النوبي حينما وصفه بالبوابين والطباخين
ومشي على نهجه مصطفى عثمان اسماعيل (طبيب الاسنان الفاشل) الذى
وصف الشعب السوداني كله بالشحادين. لا ادري، حقيقة من أين اتى هؤلاء؟

معتصم دفع الله
عيدكم وبقية الزوار مبارك هو فعلا زولا (سيدحة) ساكت
لو هو فعلا زولا طلع الضحوة مع أبوه ,اخوانه وتذوق حلاوة العمل الجماعي بين الأهل والأقرباء والأحباب في عمليات الفلاحة من التيراب وحتى قطع العيش ولقيط القطن وجمعه في (التقي) وعبوته وشحنه على عربات (الكارو) وتقاسم مع الأهل والأحباب على ظهر الترعة لقمة الكسرة بالموية التي تضاهي في طعمها وحلاوتها المأكولات الفاخرة تلك الكسرة بموية الترعة التي لم أجد أطعم منها حتى تأريخه ، ولو هو فعلا زولا طلع بالليل ( يعرق) الموية ويطرد دوب الأرض من أرضه وأرض جيرانه ويزيل عوج الآخرين ، لما ( تستدح ) على أبناء وبنات الجزيرة ، لكن فعلا هو الوحيد الذي يعض اليد التي تطعمه وبسوء قصد ... وكمان جاي مسوي الغشيم دقو واعتذر ليهو ؟؟ على مين تمشي أيها المنسدح ؟؟
الشفيع إبراهيم

معتصم ..سلاااام

السيدح والمكاشفى ومجموعة المتسيدحين الجدد ديل رايح ليهم الدرب فى الموية ياقول حبوبة
والله مااظنهم عارفين روحهم بقولو فى شنو؟
شكلهم عايزين يكونو ملكيين اكتر من الملك..

يا معتصم ويا شباب
إتوا الكائن الرخو الإسمو السيدح دا لسع شغالين بيهو ..؟؟
أنسوا الرمة خلاص .

دي أقلام مبيوعة يا معتصــم


الغريب إنه هؤلاء أعضاء في أي مكان كان
\



أحمد الشايقي

مولانا الشايقي يا شقيق ..
العيد يتبارك عليك ..

ما دي مصيبتنا..
أي حاجة في البلد بقت تباع وتشترى وأولها الذمم ..

طلحة يا قريبي ..
العيد يتبارك عليك ..

غايتو الله يدينا الفي مرادنا بس ..

معتصم يا حبيب ،،، رمضان كريم


ما هذا الا صبى هتيفة ،، هؤلاء يحركونهم بالريموت ،،، أمنجية سذج

أنسان ضعيف تشبع دمه بأكل السحت واموال اليتمامى من أبناء شعبنا بالرغم من

أن هذا الشعب كسلان ولا يعمل ،،

لعنهم الله فى هذا الشهر الكريم هو ورئيسة المجرم الهارب من العدالة الدولية

وجميع المجرمين من امثال المتعافن ،، وكل الهتيفة وصبية النظام الفاسدين

كمال مبارك يا شقيق ..
العيد يتبارك عليك ..

للأسف هذا ما يحدث في سودان الإنقاذ ..
الله لا بارك فيهم ..
وينتقم لأهلنا البسطاء في كل السودان ..

أميرة بت الشيخ يا غالية ..
العيد يتبارك عليك ..

المشكلة في الملوكية دي زاتا ..
يعني شنو البدي الواحد الحق يدافع عن زول ظالم أو يشتم بداله ..
ياخي الناس دي ما بتشوف الظلم الواقع على أهلها ولا كيف ..

الله يدينا الفي مرادنا بس ..

الحبيب الشفيع إبراهيم ..
العيد مبارك عليك وكل عام وأنت بألف خير ..

لا يعرف قيمة الأرض إلا من فلحها ..
والله أجمل حاجة وإنت شايل طوريتك وماشي الضحوة ولا ماشي تعرقه ساي ..
الزراعة في الجزيرة ليها طريقة خاصة ومحببة ولا تجد شخص ينفرها ..
الله يديهم العافية أهلنا وينتقم لهم من الذين يسئون لهم ..

لك الود ..

عماد خليفة يا حبيب ..
العيد يتبارك عليك ..

خربانة من كباره يعني ح ننتظر شنو من صغاره ..
المصيبة عميان البصيرة بعملوا أي حاجة حتى ولو على حساب أنفسهم ..
إنعدم الضمير ولا وازع لمن تحركه مصالحه الضيقة ..

ودالجمام يا حبيب ..
العيد يتبارك عليك ..

قدر ما حاولت أبلع الإساءة دي ما قدرت ..
الله يكون في عونكم أهلي في الجزيرة وفي كل السودان ..

لك المودة ..

دينق يا حبيب ..
كل عام وأنت بألف خير والوطن الخير كله ..
للأسف مع الزعلة الشديدة ديك ما تابعت إلا البوست المحزوف ..
الإنقاذ أفسدت كل شي في السودان وأولها الذمم ..
الله لا بارك فيهم ..

يديك العافية يا حبيب ..

يديك العافية يا أبوحميد ..
والعيد يتبارك عليك ..

ما دخل في النفوس لن يخرج بسهولة ..
والإهانة مهما كانت لا تنبلع ولا تفوت ..
الله يهدينا جميعاً ..

واصل يا معتصم فهذه قضية عامة وقضية كذلك خاصة بأهالي الجزيرة أهالي الأرض والمصير

ولا تصغي للذين يسعون بصفة أجاويد وهم في الحقيقة جزء من النظام المؤامرة

لك التحية


أحمد الشايقي

السّد أحّة
تعرف يا معتصم الذين يصرفون شئون البلاد هم من شاكلة السيدح والمكاشفي، جهل ممدود وعقل موصود، لو المجتمع معافى وصحيح أمثالهم يفترض أن يعاملوا معاملة الناس ذوي الإحتياجات الخاصة، ولكن تأمّل، تأمل يا عملات ملاسي، إنسان يحتاج رعاية خاصة لتصريف شئونه الخاصة، من كيف يستحمّ وكيف يتغسّل وكيف يأكل وكيف يلبس وحتى كيف ينام، فأصبّح هذا العاجز وأمثالة في غفلة يفتون في كبائر الأمور، ويسبون الأصحاء، فتأمّل تاني يا معتصم!

متابعين يا معتصم

طريقة تصديك للمتعافى وصحبه

مبتكرة ومطلوب التصدى بكل الوسائل