Post: #1
Title: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: Azhari Nurelhuda
Date: 09-04-2010, 06:02 AM
Parent: #0
لم أكن أتصور أن من الممكن أن ينعاد الزمن الجميل بكل ألقه وجماله وعنفوانه وأن أتلبش اللبشة دي تاني وأندهش الإندهاشة القديمة واللذيذة دي بالشكل ده تاني..!! لكن والله وكتاب الله ونحنا في العشر الأواخر من الشهر العظيم... وعندما إحتضن شيخي وأستاذي العظيم عبداللطيف خضر ودالحاوي الأكورديون وأدبه وأدبنا جميعا في (صولو) أغنية المصير عاودني الجن القديم تاني دروشت وإتلبشت وترجمت وإتلغوست وقلت كلام كتر وضربت الروراي وقلت عنوان البوست الفوق ده بحذافيره:
مدد..مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
- الرجل لازال يتربع على عرش الأكورديون ملكا وسيظل بسحره القديم إلى أن يرث الله الأرض ومن عليها وبما فيها نغم عبداللطيف خضر.
- لازال يتفرد بهذا التكنيك المتقدم في جزئية (BLOWER) المنفاخ والذي ينتج الهواء داخل الأكورديون ليمر عبر الريش داخل الآلة منتجا الأصوات، فلقد عزف الصولو كله والمنفاخ ثابت ويتحرك حركة خلفية مخفية داخلية راعشة تؤثر على الصوت الخارج من الأكورديون وتجعله يأتي في جمال مدهش...
- وبأصابع يده اليسرى والتي أيضا تجعل ما يقدمه من نغم وجمال عسرا على الجميع ويسرا له وعليه وحكرا له هو فقط
- أضف إلى ذلك إحساسه الكبير العالي وعزف الروح الجميل الذي قدمه...
ولقد إلتقطت أذني الكثير من الزخرف والنمانم والحليات والنقة والهرجي الكثير والذي أتى معبرا ومزخرفاومرتفعا بالنص الشعري الى مراق عالية....وكيف لا وهو سيد الجلد والراس....
إقتراح:
وكما أنهى الأستاذ حسين خوجلي الحلقة تأدبا بعد المصير أقترح على صديقي العزيز الأستاذ الصادق حسين أيضا وبعد أن عزف الشيخ الكبير المصير بالأكورديون خاصتك أن تلفه في جوخ أخضر وتضعه في مكان عال من حجرتك وتوقد حوله الشموع وتطلق البخور العابق بعطر جميل من التيمان في أم درمان ونحن لامن نجي السودان سنزور وندفع النذور وحق الزيارة...
ومدد... يا ود الحاوي... مدد.........
|
Post: #2
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: Hassan Bakri Nugud
Date: 09-04-2010, 07:37 AM
Parent: #1
فعلا كانت حلقة جميلة وإزدادت جمالا بحضور ذلك الرباطابي الجميل ، ود الحاوي .
ود الحاوي ، ألحان خالدة ، بديهة حاضرة ، وذهن متقّد ..
إذا لم يلحن سوى المصير لأغنته عن غيرها، له ولك التحية.
|
Post: #3
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: أسامة عبد الجليل
Date: 09-04-2010, 07:51 AM
Parent: #2
| Quote: وعندما إحتضن شيخي وأستاذي العظيم عبداللطيف خضر ودالحاوي الأكورديون وأدبه وأدبنا جميعا في (صولو) أغنية المصير عاودني الجن القديم تاني دروشت وإتلبشت وترجمت وإتلغوست وقلت كلام كتر وضربت الروراي |
والله يا أزهري أقول ليك الحق خليك إنت داك زول مقام ، علي اليمين أنا دا المحسوب من المؤلفة قلوبهم مش إتلبشت وبس يا أخي روحي دي محل ما مشت ما عرفتها. إنا لله.
|
Post: #4
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: طارق ميرغني
Date: 09-04-2010, 09:34 AM
Parent: #3
اخي ازهري
وزادها روعة الاداء المتميز لطلال حلفا
والذي علي ما اعتقد لم يجد الفرصة الكافية
ليظهر موهبته الصوتيه وتمكنه الرائع
|
Post: #8
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: Azhari Nurelhuda
Date: 09-04-2010, 08:27 PM
الأخ العزيز طارق ميرغني
مرحبا بطلتك البهية
وأكيد الأخ طلال قد وفق في آداء الأغنية بشكل كبير
وخاصة وهو يؤديها مع الشيخ ذاته
وأعجبت كثيرا بتبشيره للصولو العجيب....
مدد..................
|
Post: #5
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: Azhari Nurelhuda
Date: 09-04-2010, 09:36 AM
Parent: #3
هوي يا أسامة أخوي
أسمعه مني نصيحة
من دربك ده...
تمشي مسيد (أبوي وهبة)* في البوستة فريق الرباطاب
وتقابل أبوك الشيخ وتدخل الطريق وتشيل أورادك
وتتحصن بعدين روحك تجيك...
____________
* وهبة بي مزيكته إتحكرة
كم طرب أفكارنا وأسكره.....
نجدة وفزعة يا أهل الله..........
|
Post: #6
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: Azhari Nurelhuda
Date: 09-04-2010, 09:54 AM
Parent: #2
Quote:
إذا لم يلحن سوى المصير لأغنته عن غيرها،
|
الأخ العزيز حسن بكري نقد
تحية طيبة ورمضان كريم
إنت ماسمعت أبوي الشيخ وكلامه عن (يا غاية الآمال لو دعاكي الشوق) وعلو مقامها عنده هو شخصيا
وإنه جاب المصير أختا ليها عشان ينتكئ عليها الغناء الجميل كله...
سبحان الله....
هي....وحدوه...
لا إله إلا الله
غرق يا زول غرق....
|
Post: #7
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: لؤى
Date: 09-04-2010, 03:00 PM
Parent: #1
Quote:
مدد..مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
- الرجل لازال يتربع على عرش الأكورديون ملكا وسيظل بسحره القديم إلى أن يرث الله الأرض ومن عليها وبما فيها نغم عبداللطيف خضر.
- لازال يتفرد بهذا التكنيك المتقدم في جزئية (BLOWER) المنفاخ والذي ينتج الهواء داخل الأكورديون ليمر عبر الريش داخل الآلة منتجا الأصوات، فلقد عزف الصولو كله والمنفاخ ثابت ويتحرك حركة خلفية مخفية داخلية راعشة تؤثر على الصوت الخارج من الأكورديون وتجعله يأتي في جمال مدهش...
- وبأصابع يده اليسرى والتي أيضا تجعل ما يقدمه من نغم وجمال عسرا على الجميع ويسرا له وعليه وحكرا له هو فقط
- أضف إلى ذلك إحساسه الكبير العالي وعزف الروح الجميل الذي قدمه...
ولقد إلتقطت أذني الكثير من الزخرف والنمانم والحليات والنقة والهرجي الكثير والذي أتى معبرا ومزخرفاومرتفعا بالنص الشعري الى مراق عالية....وكيف لا وهو سيد الجلد والراس.... |
أُبو الزّهور يا عزيزي
سلامات
ياخـي ودّ الحاوي دا زول عجيب والله العظيـم
ملحّن بارع جدّاً جدّاً
وعازف لا يُشقّ له غبار
وبعد دا تواضع وأدب جم
وقاعد في الواطـا
المصير دي مدرسة يا أزهري ياخي
مدرسة كبيرة جدّاً
لـحن خرافـي
وكما قال صديقي طارق ميرغنـي
أدّاها هنا زميل الـمنبر الأخ طلال حلفا بشكل طيّب
لا غبار عليه في الأداء إطلاقاً
أعيب عليه فقط
عدم مراجعته لكلمات الأُغنية المعروفة
مغنّياً :
( نمشي في القفر اليمام )
وبالطّبع الصّحيح أخ طلال ( نمشي في القفر اليباب )
والقفر هو الخلاء من الأرض الذي لا ماء فيه ولا ناس ولا كلأ
ويباب أي مقفر ، جّدب ، خرب لا شيء فيه من ماء وما إليه
وبرافو على الأداء جميعاً
وهذه هي الـمصير إهداء منّـي للجّميع هنا
تحاياي
|
Post: #10
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: أسامة عبد الجليل
Date: 09-06-2010, 08:34 AM
Parent: #9
تعرف يا أزهري لو بديت بغاية الآمال دي بكون بديت من فوق خالص.
|
Post: #11
Title: Re: مدد.. مدد.. يا شيخي بحر السد يا عبداللطيف يا خضر يا ود الحاوي..نظرة ونجدة..
Author: محمد فضل الله المكى
Date: 09-06-2010, 08:54 AM
Parent: #9
يا أبو الزهوووووووور........ الله يكتِّر خيرك
في جلسة أنيقة بمنزل البوردابي الأنيق كمال الخولي
كان حضورها أبو المبدعين بشير عباس وعبداللطيف خضر
ويسين سيد أحمد وهاشم حماد وزاكي الدين أحمد عوض وشخصي...كانت
المصير حاضره (جضَّمها) عزفاً وغِناءً عبداللطيف... ترى القوم سُكارى
وماهم بسكارى!!
قلت لود الحاوي ستظل (المصير) تجدد نفسها وتعيش بين أجيال
وأجيال قادمة.. وسيظل ذلك الخدر اللذيذ الذي تبعثه في الدواخل
كامناً فينا.. فقد تكاملت فيها عناصر الإبداع الثلاثة.. الكلمة
واللحن والأداء.. سيف الدسوقي, ودالحاوي,إبراهيم عوض.
شكراً أزهري
|
|