سودانيزاونلاين مؤخراَ

If all else fails, i can just go online and comment on people blogs and tell them how much they suck

مُبالغة

بوستات تتناسل من بوستات تناسل مُخجل , افكار معظمها قديمة و مسروقة
فقر إبداعي راسو عديل


لذا

من الان فصاعدا , اي بوست فيهو مجهود حقيقي سيُمنح وسام الشجاعة *



صورة من وسام الشجاعة (مُجسم لشخص مستريح و مستمتع بالبوست)

____
* وسام محاربة الفقر الابداعي بسودانيزاونلاين

ياخي امشي طلعت خاين وما بتحفظ العهود
ما قلنا ليك عيد الضحية

قول بسم الله يا فنان
الضحية برضو معاك
بعيد عنك انا مطلوق باقي السنة دي
لا في الليد ولا عندي سيد

غايتو حا اكون صاري ليك كدة لامن اقابلك في الضحية

طارق اب عبيدة
لو قابلت اى مشاكل فى جوزات الاجانب
ادينى خبر ؟
يعنى تمديد اقامة ..تصريح زيارة منطقة
خارج الخرتوم ؟
عموما مرحب بيك فى بلدك التانى

وكااااااك ؟

الضحية انا بكدى

يا طروق
ما تتعب عويناتك ساي
الضحية مع بعض قطع شك في الخرطوم
ود الصايم و معاوية معانا
ترجع معانا من الخرطوم الرياض ؟





معاوية
عليك الله ركز مع جاد الله
انا هين

في شنو يا ابان صلع انتو
ما ياها البلد واقفه،في زول قال ليكم حيشيلها ويجري..الامتداد غرقانة لاضانها في الموية الليلة،وعطبرة قطر يودي ليها ماف.

ما تجوا تتخارجوا سريع الاولاد جاتهم نزلة والبعوضة وما تعرف شنو كلمناكم من هسة
الموية فيها فسفور
الطعمية فيها فلزات
الرقشات بتمش في الزلط وبتفنك بالحجر
البرنجية بقوا يحشوها بنقو
تمشوا البحر في البرده تطق كهربا
تبدلوا عملة اجنبية قدام البرج ممكن يطقوكم ورق مضروب لامن راسكم يلف.
ما تسجلوا في دائرة الاجانب بعملوا ليكم خروج نهائي.
سهر بعد 11 حيعاملوكم معاملة العارض داك.

Quote: تبدلوا عملة اجنبية قدام البرج ممكن يطقوكم ورق مضروب لامن راسكم يلف.

كويس انك كلمتني عشان ما اتورط ساي قبل العيد






مولانا
ما تعمل لي سمعة ياخ
طارق و بقية الاوغاد دي ما محتاجين تحريش
المسنجر ده عيبو لي

Quote: ما قلنا ليك عيد الضحية

والله طارق دا طيب بشكل!!
ياخ لا قريت ( زعم الفرزدق) ولا سمعت ب (وعد عرقوب)؟
أعانك الله يا ابن طنجة ومكناس.

يا ود المرتضى اشتغلنا بي حسن النية
لكن بعد دة عضلات تبش عروق عجور شلاليف دنميت


يا بوبا يا حبيبنا
ياخي الامتداد عاجنبا بي باعوضته دي


يا طروووق في زول نصيح كدة يمشي جدة

مولانا خدر ازيك
...
صدقني ما قاصدك في حاجة
بس الفكرة
انا شخصياً طوالي يجيني شعورك ده
بتاع مافي حاجة جديد في سودانيزأونلاين
ويمكن تكون لاحظت نشاطي ما كتير في البورد
لكن من يومي القريت الحكاية الحا أحكيلك ياها تحت دي
بقيت طوالي افتش عن الأسباب فيني أنا
قبل ما افتش عنها في الناس التانيين
...

انتقل رجل مع زوجته الى منزل جديد

وفي صبيحة اليوم الاول

وبينما يتناولان وجبة الافطار

قالت الزوجة

مشيرة من خلف زجاج النافذة

المطلة على الحديقة المشتركة

بينهما وبين جيرانهما

انظر ياعزيزي

ان غسيل جارتنا ليس نظيفا .. لابد انها تشتري
مسحوقا رخيصا

ودأبت الزوجة على القاء نفس التعليق

في كل مرة ترى جارتها تنشر الغسيل

.....
وبعد شهر اندهشت الزوجة

عندما رأت الغسيل نظيفا على حبال جارتها

وقالت لزوجها

انظر .. لقد تعلمت اخيرا كيف تغسل

فأجاب الزوج

عزيزتي لقد نهضت مبكرا هذا الصباح

ونظفت زجاج النافذة التي تنظرين منها


.....

Quote: غايتو حا اكون صاري ليك كدة لامن اقابلك في الضحية

أيوا يا طلبة .. خليكـ صاري كـدا بالله!
أنا ذاتي بصر وأخم معاكـ!

رشو يا ابو شنب لامن يجي عيد الضحية

لكن ياخدر مبالغه والله ....

لوووووول

Quote: فأجاب الزوج عزيزتي لقد نهضت مبكرا هذا الصباح ونظفت زجاج النافذة التي تنظرين منها

مبالغــة








خدر رمضان كريم ...

الاحظ بعض المندسين هنا

نظام نحن ما المقصودين و كده

يا خدر
البوست التنويري بتاعكـ نفسه إتضرب
وفارَق وسام الشجاعة فراق الطريفي لجمله



حاول تاني !!!

بدر الدين رمضان كريم
عندي حصة اسمها تكنيك بوستات و منطق, من زمان ما عارف اديها لي منو !!
ردك و تكويتك لكلام الزول ختوك تختة نيشان طوالي لي حصتي المزعومة , فأمسك عندك يا بدر الدين

ما تستعجل و تكوت كلام قبل ما يرد عليهو الزول القالوهو ليهو , دي فكرة ما حكيمة و بتعتمد علي كذبة الكثرة الغلبت الشجاعة الشهيرة ديك و تحت تحت سمعت ناس بقولوا انو فيها روح سالبة و غير مبدعة لانو بعض مُنتسبي الجماعة بتحولوا لبصمجية فقط لتأكيد الموقف الاول, اها شفتا إتعطلوا كم نفر كدي ؟ كلهم عداء كاتب المقال و ده زاتو في غضب الله كان حُججو إتفندت. اها يا المبروك تفتكر موقف البقية حايكون بايخ قدر شنو بعد تفنيد موقف الشجاع فيهم؟ عشان كده يا بدرالدين انت كان مفروض انك تنتظر ردي علي الزول و بعدها تجي تدرع لينا كوت القصة العجبتك دي عشان شكلك ما تُتهم بالموالاه او سؤ القصد من قبل القارئ ضد خدر و عشان شكلك برضو ما يكون متهافت.

ما تستعجل النيل من احدا ما او فكرة ما يا بدرالدين مالم تتأكد ان احدهم ده حُجتو ضعيفة تب.

الزول
غايتو كلامك ضحكني , ضحكني فيهو انك قلت لي يا خدر ما تزعل مني انا ما قاصدك انت لكن العيب فيك انت ما في المنبر. وده حاجة فعلا مُضحكة, اسه قول انا صدقتك ونضفت النضارة , او قول إستقلت عدييييييل من المنبر ده , و اديتو القدرو باقيلك المنبر حا يكون مستف إبداع و مدفق ؟
صلي علي حبيبك ياخي , حلك ده طريقة عربية معروفة لتعليم الاطفال موش ناس منابر الحوار عن طريق ترديد الموروث لهم و تحفيزهم لمراجعة مواقفهم و النظر لقضاياهم الحياتية من منظور مختلف عشان يتعلموا فضيلة النقد الذاتي. إستدلالك بي القصة دي هنا خطاء , لانو في الاصل ما بالضرورة انو اراجع نفسي قبل ان اقدم علي نقد سلوك ما, من حقي ياخي كمواطن و غير مبدع حتي اني اطالب بوجود إبداع في حياتنا القفر دي بدون ما يقولوا لي نضف قزاز الشباك .الاصل في النقد يا عوض هو الإعتراض و الإعتراض هو الفيدباك و الفيدباك بساعد كثير جدا انو يحدث إبداع. يعني اسه انا متأكد جدا انك يا عوض تاني لمن تجي تكتب بوست جديد حا يكون في راسك انو مولانا خدر ده حا يكون موقفو شنو من بوستي ده !! بوست مبدع ولا تبع الهيلمانة بتاعت البوستات الفقيرة فكرا و موضوعا !! و بكده انا بوستي ده بكون جاب راسمالو.
غرض البوست يا عوض رفع معدل المواضيع و البوستات الممبدعة موش تعطيل الافكار المبدعة بترديد قصص غير مبدعة.

يا خاين
اها مؤمن الدجال جاينا..........وح يشيل حالك

خدر

ما قلت ليك ما تمشى لى نا ما بجونا الجابك هنا شنو تانى ؟؟؟

يلا ما تتاخر على الطيارة !!!!!!!!!!

قصدك منو يااااخدر بالواضح كده......


لو على انا . انا كنت مافي لي كم سنه ورجعت ...لقيت الدنيا مقلوبه

بتتذكر ناس ابوحراز وشيري وشاينغ استار وتبلدينا


انا غايتو بتذكرك من ذاك الزمن الجميل

الا تكون اتغيرت انت

خالص احترامي

مولانا خدر ...سلامات
تاني رجعت ليك

Quote: اسه انا متأكد جدا انك يا عوض تاني لمن تجي تكتب بوست جديد حا يكون في راسك انو مولانا خدر ده حا يكون موقفو شنو من بوستي ده !! بوست مبدع ولا تبع الهيلمانة بتاعت البوستات الفقيرة فكرا و موضوعا !! و بكده انا بوستي ده بكون جاب راسمالو.

.
...
اتفق معاك تماماً في النقطة دي ... دق الجرس والتنبيه بيساعد على مراجعة الناس لكتاباتا ومحاولة تجويدها وده أكيد بوستك ساعد فيها

االما متفق معاك فيهو وده كان غرضي أساساً من ضرب المثل
تعريف الإبداع وتصنيف البوستات لبوست مبدع والتاني فقير
منو البيملك الحق ده؟
وهل الزاوية البينظر منها هي بالضرورة الزاوية الصحيحة؟
قد نكون أنا وأنت متفقين في كثير من ميولنا ، فنية أو أدبية أو دينية أو سياسية ...الخ
ونقيم البوست ده أو غيرو بأنو مبدع ولكن ده ما بيمنع ناس تانيه تكون مصنفاهو في خانة بوستات الهبالة والفارغة..
أعرف واحداً من زملاء المنبر لا يهتم بشيء مثل الدوبيت والشعر
يفتح المنبر ليرى هل فيهو حاجة من الدوبيت والمسادير
ما لقى ...معناهو ده منبر مسيخ قاطع الطعم
وكذلك الذي يمثل له المنبر نافذة فنية يبحث فيها عن جديد الغناء وأخبار الفنانين
وهكذا...
ياخي من يومي المشيت مع صاحبي الفنان التشكيلي لمعرض
وما فهمت أي شيء ، بل بالعكس شفتها شخابيط وخرابيط ساكت
وصاحبي داك المتعة قربت تنط من عيونو.. ولمدة شهر كده ما عندو موضوع الا ابداع صاحب المعرض
من يومها داك
بطلت أحكم على حاجات الناس وأقيمها من وراء نظاراتي اللابسها دي
....

Quote: ياخي من يومي المشيت مع صاحبي الفنان التشكيلي لمعرض وما فهمت أي شيء ، بل بالعكس شفتها شخابيط وخرابيط ساكت وصاحبي داك المتعة قربت تنط من عيونو.. ولمدة شهر كده ما عندو موضوع الا ابداع صاحب المعرض من يومها داك بطلت أحكم على حاجات الناس وأقيمها من وراء نظاراتي اللابسها دي ....

وليه بطلت ؟ انت تشكيلي ولا انت صاحبك ؟
شوف يا صديقي , دي برضو من ضمن الفخاخ المنصوبة هنا و هناك خاصة بعد إعاذة تأهيل مصطلح (التجريب) و الدفع به في سوق الله اكبر الاسفيري و الحياتي . انا كمواطن (او انت) والغرض من وجودنا الحياتي بختلف من كل واحد فينا لي آخر لكن ما اظن حا يتغالطوا اتنين انو وكت الفراغ ده هو الوكت الوحيد المافيهو مجاملة لتشكيلي او اشكيلك. صاحبك والله علي عينك و راسك لكن شغل التشكيل ده انت لو لقيت ليك بدلو عرض مسرحي او كتاب او اغنية او نمت ريحت بدنك او لعبت كورة او ساكت قعدت تعاين للساعة قتلا و تمحيقا للزمن مع سبق الاصرار ,مافي زول فينا يقدر يقول ليك بغم , زمنك وانت سيدو.
إذن يا فنان حاجات الناس شخابيط ليك و فن لي صاحبك و المودة بينك و صاحبك قائمة لي يوم الدين لانو الإستاندر بتاعها موش المزاج الإستاندر هو الفائدة و الإهتمام و ده انا قلتو في ردي عليك , تعرف بوستات الهبالة ذاتها القلتها !! فيها ثمرة احيانا و فائدة لانو فيها ضحك . لكن الضحك ده ذاتو لمن يُوظف للحط من شأن آخرين طوالي ببقي البوست فقير و ما مبدع اقول ليك الفورمولا بتاعتي :
الحساسية العادية دي يا عوض + تميز في مجالك + إحترام الاخرين = بوستات مبدعة و خلاقة
مثلا بدر الدين اخونا ده عندو بوست شفتو قبيل عن الوضوء و الصلاة ايام الامطار , ده بوست مبدع جدا لانو كُتب في وكتو مع امطار امس - فيهو إجابات علي اسئلة قد تشغل كثيرين + فيهو معلومة متكاملة (مسنودة بروايات غير مشكوك فيها). في ذمتك مبدع ولا ما مبدع ؟

البملك حق تصنيف البوستات لمبدعة او غير مبدعة هو نحن كلنااو قل كل واحد مننا. عندها البوستات الغير مبدعة ستتضائل و سيقل الاقبال او التداخل فيها و بنكون عن قصد او غير قصد قدمنا خدمة كبيرة خالص لنظرنا و عافيتنا , ولا شنو يا فنان ؟

يا مشتاق
والله يا حليل زمنكم انت و ابوحراز وشيري وشاينغ استار حبيبتي و تبلدينا
زمنكم ده كان منقة بس و كنا في نعيم و ما عندنا مشاكل باور
كيفن ابقي قاصدكم عاد ؟

انا والله ما إتغيرت لسه
لكن لو ما لحقت رفعت من معدل غيابي عن المنبر
قطع شك حا إتغير و ابقي باهت بي حالة المنبر الآنت شايفها دي
عموما حمدلله علي السلامة و بركة الجيتنا راجع طيب
والله يمرقك من الباور وتعقيداتها

تيسير
جيت اشارككم الفيديو اعلاه و اساعد بشق تمرة في إقالة عثرة المنبر لكن لقيت الشراك منصوبة
ليك علي البوست ده ادرعو لي صديق صاحبي ده في رقبتو يتابعوا لي و انا في السودان




مورتون
مؤمن خاين ما كلمني
بالمناسبة بكور معيد في السودان ؟
والله يكون منقة بس يا معلم

عزيزنا خدر
سلامات
والله حظك .
العيد هناك ؟ محظوظ ياخدر .
غايتو أنا أشاءالله العيد الكبير . كبشين املحين أقرنين
مشعلقات فى تلك الراكوبة الحدادى .
الراكوبة يا خدر المكندشة كندشة رب العالمين . والله يا خدر مشتاق
لداك الهمبريب الاصلى .غايتو حاسدك عديل .
أسمع فى سفريتك دى حاول لملم شغلات فنانين المنطقة دى .
الجيل ده مو عارف ودالسافل ولا سيد الجعلى ولا أحمد بشير ولا أحمد فحل
ولا الدرديرى جلال .
يا خدر عطبرة فن . عطبرة موية نار . سلم على أى زول يقابلك .
وسلم على قبر شيخنا المجذوب .
وسلم على البنطون حتى لو البنطون ما شغال زاتو . تحياتى

Quote: بدر الدين رمضان كريم

خدر ازيك ...

انت عارف انا الجابنــى البوســت دا ( جملتك دى بــس )

وكنت أسائــل نفســى هل رمضان يجب ما قبلــه ...

واقول هــل ثم هــل ثم هــل يمكن ان تكون زيارتك للبلاد مشروع (( نشوفك فيــهو من جديدبزاوية جديدة ) ؟


دا الموضوع ...

Quote: يا مشتاق والله يا حليل زمنكم انت و ابوحراز وشيري وشاينغ استار حبيبتي و تبلدينا زمنكم ده كان منقة بس و كنا في نعيم و ما عندنا مشاكل باور كيفن ابقي قاصدكم عاد ؟

الفنان خدر

الكلام ده بيزعلنا نحن الجينا مؤخراً ... تصدق شخصياًٍ بجي هنا في اوقات الراحه وقفيل الجامعه

المهم مرات بطلع بفائده ومرات بضحك على حال الكبار من مبدعين وفنانين وأدباء لمن أكتشف إن الصوره الزاهيه البرسمها ليهم ما حقيقيه

من آخر الفوائد أو ممكن تقول المعلومات وده ما كسير تلج معلومه إن أغنيه أطيب من الألم وأرتاح للمرحوم أحمدالطيب وعمري كله مفتكره بتاعت مصطفى سيد أحمد

إتخيل معلومه صغيره زي دي بتفرق معانا نحن البنكون في ثقافتنا

لكن لمن نرجع لماضيكم هنا فأظنه كان مظلم في بغض جوانبه وعندك هسه بقايه معركه من 2003 ( كوستاوي ـ كانتونا1)

وفيها إقتباسات بها كميه شتائم لم أقرأ مثلها قريباً هنا

المهم يا أستاذ يا ريت الناس المفترض إنها كبار ووأعيه وبتفهم تفكر شويه لمن تجي تكتب

وياريت نقدر نشوفك في لمه قبل رجعتك

Quote: المهم يا أستاذ يا ريت الناس المفترض إنها كبار ووأعيه وبتفهم تفكر شويه لمن تجي تكتب

اسه ده ما كلام ناس كبار يا فدياس
يسلم قلمك و عقلك يا راسي

انا ما مع ناس زمان و ضد ناس اسه يا فدياس
انا مع الانضباط , الابداع , الافكار المميزة, الصراع الخالي من الغرض
انتو او نحن واحد لو إنتبهنا للحاجات الفوق دي

الفيديو الفوق ده اسه واقعين تحت بندو قدام و جداد

شكرا تاني علي الكلام الطيب و الوعي

Quote: انا ما مع ناس زمان و ضد ناس اسه يا فدياس انا مع الانضباط , الابداع , الافكار المميزة, الصراع الخالي من الغرض انتو او نحن واحد لو إنتبهنا للحاجات الفوق دي

خدر

الإنضابط هنا شبه معدوم..... الإبداع لا يزال البعض هنا يبحث له عن تعريف

الأفكار المميزه شبه معدومه

الصراع الخالي من الغرض مقوله أشبه بالعنقاء والخلي الوفي

لك أن تتخيل يأستاذي إن بعضهم هنا لمجرد أن يغيظك

يمكنه أن يغير قناعاته ويمكنه أن يقلب الأسود أبيض

أحدهم ولأنني لاحقته في عدد من البوستات ويبدو إنني أزعجته

جائني في بوست لي عن الغناء الهابط

غناء من عينه مهند ونور كتبت أعترض عليه

جاء وبشكل غريب ليقول إن هذا الغناء غير هابط وإنني الهابط

مناصر لذلك الأخ كتب في نفس البوست يصفني بالكوز

لا لشئ إلا لقولي إن لبس الفنان يجب أن يكون محترم وإن السلاسل والغوايش لا تصنع فنان

هذان نموذجان فقط يدلناك على الغرض والأمثله لا حصر لها ولا عدد

ناهيك عن البعض الذي يريد بضربه كيبورد أن يلغي دور فنان بقامه الموصلي لمجرد إن صوته لا يعجبه

يازول الكلام كتير وأحسن أقيف قبل ما أفتل ليك البوست

بالمناسبه متذكر بوست أخونا الأمين البشاري الحاول يعمل فيهو مرصد للشتائم

أها البوست مشي الصفحه الخامسه وحتل

وسيده قنع من خيراً فيهو

Quote: خدر ازيك ... انت عارف انا الجابنــى البوســت دا ( جملتك دى بــس ) وكنت أسائــل نفســى هل رمضان يجب ما قبلــه ...

اهلنا بقولوا يا بدر الدين النواية بتسند الزير
قول يا رب والله يبعد الغرض



تصوم و تفطر علي خير و كل سنة وانت و اهلك طيبين

Quote: أسمع فى سفريتك دى حاول لملم شغلات فنانين المنطقة دى . الجيل ده مو عارف ودالسافل ولا سيد الجعلى ولا أحمد بشير ولا أحمد فحل ولا الدرديرى جلال . يا خدر عطبرة فن . عطبرة موية نار . سلم على أى زول يقابلك . وسلم على قبر شيخنا المجذوب . وسلم على البنطون حتى لو البنطون ما شغال زاتو . تحياتى

قريت افكاري يا صديقي
بس قول ربك يسهل الاجازة الممحوقة دي
تحياتي ليك و للاسرة و كل سنة وانت طيب