قرار : من الليلة دي أنا زول غنّاي و مطرب صاعد .. كان عجبكم !

حكاية تقعد ساي دي ما جايبة نتيجة أصلو ..
هسه أهو قمت طرقت حِسي من جديد - هو اصلاً كويس لكن الحُبال فترة كده قامت رخت شوية .. شدينااااها -
في محلات بتاعت شد حبال الصوط هنا كويسة جدا و مضمونة ..
تودي صوطك كرّاب عنقريب مبهول , يدلعوك زي الترتيب و يظبطوك ميه ميه ..
و اي حاجة تانية دايرة شد برضو عملوا ليها محلات ..
صدر على شلاليف على كلاوي , بليلة على فول على عرقي على ناس على ابو جلمبو .. كلو شادّي .
في البلد دي كلو شي لازم يكون واقف تتك ..
المهم .. شدينا البتاع الصوت ده ..
و اصحابي و الله ناس كويسين برضو يعني قاموا قالوا لي كده بقيت في السلك .. و اقرّط على كده , طوالي قرطت .

مشيت حلتنا لقيت فيها تلاتة ناس بقو غنايين رسمي .. إتنين منهم جابوهم في التلفزيون ..
لو كل حلة في البلد مرق منها غناي غنايين .. نودي وشنا وين بعد داك ؟؟
واحد في غنايين ناس حلتنا ديل عندو قدوم .. إنا لله .. سعلب بس .. و نباح نبيحة . كنا زمان " بنقعد " يقوم يجيك ناطي :
بالليل ده ماشي وين .. و بالليل ده ماشي وين .. و بالليل داااااااا ..
و جنقلنق جنقلنق جنقلنق .. عندو عود قاطعو من راسو . تروح القعدة شمار في مرقة ..
و ود الناجي اليوم داك شلاليفو من الزعل إلا نختهم ليهو في بنبر جنبو .
إنسان سنجة برضو فترة كده عمل غناي .. عبدالمنعم إنسان سنجة .
كان بوليس بعدين بقى رباطي في مقابر فاروق .. تاني عمل فيها مقاول جالوص في العشش .. بعدها قلب جلب و قال هو غناي ..
زول كويس في غنوة الكاشف بتاعت ادر الكأس ديك ..
لكن قبل يصل النهاية إنت قوم إتخارج .. بيعضي في الجرة بتاعت : الندامى ااااااا .. الندامى ااااااااا .. الندامى اااااااااا ..
و يكون مكنكش في الزول الجنبو من يدو و عيونو مغمضات و معاها فتيحة نخرين للنهاية .. تاني يوقفو الشديد القوي ..
و يفكك الله ده من جودو و كرمو .
كويس .. ناس حلتنا ديل احسن مني في شنو ؟؟

ميرغني برجوبة بيعزف أورغن كويس ما بطال ..
أصابعينو غليدات شوية هو ..
ما عارفو بقى يقدر يظبط الصباع على مفتاح الاورغن كيف .. زمان كان الصباع بمفتاحين . زول مجتهد و طور نفسو ..
ميرغني ده عندو صاحبو الفاضل النور ..
الفاضل بيخلص الورشة بتاعت الركشات بي جاي و يبقى على الساونسيستم بتاعو .
أداهو ليهو قالوا فنان كبير كده كانت سماعة السيستم ح تقع على راسو في حفلة في ديم القنا , لكن الفاضل سبتو ليك ..
فتحي الضو قال لي : الفاضل مشى للسماعات ديك قال يكورك فيها عشان حبيبتو الفي الحفلة تسمعو ..
قالو ليهو امشي كورك ليها في المكرفون .
قال ليهم اكورك في المكرفون عشان يجي طالع بالسماعات ؟؟ طيب ما اكورك هنا و خلاص يا فارات .
أها مشى يكورك ليها و تكل عليها و هو لطططط .. حصل الحصل .
أدوهو السماعات ديك و ناس الحلة جاهم غضب الله ..
في النهاية ناس طه هارون المحامي قفلوا بيتهم بالزنك الأمريكي من كل ناحية .. بقى بس كشك تلج .
و ديلك ناس يحي الطاهر برضو .. جابو كمية ديك رومي في ركن حوشهم الجنب ناس الفاضل ..
كلما الساونسيستم ينبح الجداد يقول ليهو بصوت واحد : كااااترررربلوووووبب . سده بي سده .

ده ما موضوعنا هسه ..
أنا داير تشجيعكم .. و الموازرة ..
شابكين أي زول ( كامل تضامني ) .. يلاا أدونا هنا ..
و الكلام ده برضو لناس منظمة تنادينا ديل .. أنا محتاج دعم لوجستي في حملتي دي . و طارق اب صلعة برضو .. يدكم معانا يا شباب .

المهم .. شويتين كده و بنزل ليكم يوتيوب بتاعي في قعدة في الحلة الجديدة .. بيت ناس معتصم قرافي .
في اصوات ورا كده ما تشتغلو بيها كتير .. خالد سمعها و نقنق تحت تحت كده : د............. كتال الكلاب زاتو !! ..
أنا أكلت الكلام ده في حناني و واصلت في غنية ( فرع البان إتكا ) بتاعت سونائي النقم .. غنية حلوة و أنا زاتي أديتها حقها جد ..
في القعدة ديك قام صلاح و خالد قالوا يدوني اسم فني و كده ..
سجلوهو برضو في اول التسجيل . أقنعوني بخصوص ناس المصنفات الفنية ديل .. عشان مافي زول يجي ناطي يقول حقتو .
انا قلت ليهم سموني : سامي فراشة . ظابط معاي صاح .
العوير ود الجلال قال لي : إشششششَ عليك !! .. قاموا دخلوهو الاوضه الجوه , إتخمد نام .. دايما يتقّل و يتعاور عوارتو دي .
لكن عمنا حسن قرافي كان في الحوش التاني بيطش براهو ..
جانا و قال بقريحتو الأصلية و هو زول كان مدرب كلاب بوليسية .. قال لينا : أمسكوا في إششش دي قوي ..
ده إسم فني لا يطاق و عندو زي تُقل تُقُل كده .. و شامي فيهو ريحة شهرة قطع شك .
عمك حسن ده زول ما ساهل و بيعرف الحاجات دي كويس .

الله يرضى حاولو معاي تمسحوا مقدمة خالد القالها دي .. ( و الآن مع الفنان بتاع قبيل الأخ المخضرم .. هناي .. وايل الإش إش ) زول بيض دايما هذا الخالد .
حاولت امسح الكلام ده الفاضل قال لي ده نظام تراك تراكت و كده .. صعب يتمسح إلا بالكنترول امبيليفيرم !!
مخضرم و الإش إش دي ما تشتغلوا بيها .. خشوا في الغنوة طوالي .
المهم اسمي الح يطبق الافاق من هنا و لي قدام كمغني فتاك و زول بتاع مستقبل فني و كده .. ح يكون : وائل إششششَ ..
كلمكتكم .


................
الله يكتلكم يا ناس التلفزيون ..
و كافة قنوات فالوب السودانية الفضائية .

يا جميل يا اشششششش .. قلت لى فيها كم شينات؟؟
انت يا المطموس قنوات التصريف دى قاعد تشوفا!!

أقعد إتمسخر علي كده ..
و الله يا بشرى خريف خريفين و تجيني جاري شايل نصوصك طالب أغنيها ليك ..
تلقاها في الغافل بعدين .

أخير قدم السبت يا صاحب .

.......
الفنان / وائل شششششَ
( خمسة شينات )

خمسه شينات .. وشرطه هههههاى
انت عارف ياعماد يااخوى .. آ سف يا وائل ششششش .. انا من هسى قصائدى جاهزة .. اصلو اليومين ديل بتجينى هلاويس هابطه .. هاك دى شوف ليها ملحن ساموطى لغاية ما اتمها ليك:

البلد سخانه .. والمويه وس خانه
فتشنا لى سفه .. قام زولنا جّلانا

نؤيدكم ونشد من ازركم

يعني نعاملك معاملة افراح عصام؟؟
جاي تبقي مطرب صاعد؟؟

انتو عاملين فيها أضانكم نضيفة وزعلانين عشان غيروا ليكم كلمتين وفلتروهم عشان خاطر المشروع الحضاري؟؟
طالعين مظاهرة عاملين فيها سميعين شديد والحال ما عاجبكم؟؟
يا خي بلدكم كلها تاريخها مزور واتكتب بالغلط وحسب هوي آل المهدي وسقف حياء الجبهة الاسلامية؟؟
حقيبة شنو وشفاه شنو وخمر النشوة شنو القاموا شختوا ليكم فيها وزعلانين
هسي دي بلد ينطربوا فيها كان انتو ذاتكم مطرطشين؟؟



_
كدي قالوا خدر في السكة رتبوا ليكم يوم وخلينا نستمتع وخليك من القنوات والبضاعة الفاسدة

الاستاذ عماد كيف حالك ....
صوطك دة الرخاهو شنو ؟ وبعدين اووعا يكون خاتف لونين ..
على كل حال اشش اش قريبة برضو من تش تش وحسب قانون المصفرات الغناوية مقبول بعذر شرعى .



كامل تضامنى اهئ اهئ

ناس التلفزيون ياااا

يا سلام يا الفاتح ياخ ..
زول واعي و مدرك .. و ناقش .

شكرا ياخي على الدعم ده ..
في ميزان حسناتك .

ماعايز شيالين

أقول ليك فنان حسي مطرق و مشدود و بي أورغيني و ساونسيستمي ..
تقول لي شيالين ؟؟

الجيلي .. !! بطّل الحركات دي ..
بعدين بتاباهو .

مدير اعمال جاهز
خبرة طويلة وعلاقات مميزة ؟
عدة عمل مختلفة
وبحب الشباب الطموحين الزيك كده

خدمة 24 ساعة
العشاء مع الفنانيين شرط اساسى ؟

علاقات جيدة مع النظام (العام)
يعنى لحدود الصباح


شكرا

يازول اصعد
اصعد ونحن من خلفك



مطرب مطرب أهو مافيها حاجة نتحملك برضو اهو انت صاحبنا برضو

Quote: لكن قبل يصل النهاية إنت قوم إتخارج .. بيعضي في الجرة بتاعت : الندامى ااااااا .. الندامى ااااااااا .. الندامى اااااااااا .. و يكون مكنكش في الزول الجنبو من يدو و عيونو مغمضات و معاها فتيحة نخرين للنهاية .. تاني يوقفو الشديد القوي .. و يفكك الله ده من جودو و كرمو .

___
زمانك كنا بنقعد نغني يا ود التوم, في واحد كده ما بعرف اسمو والله لحدي اسه لكن متزكر كويس جدا انو كان بكون نايم القعدة كلها نقوم نحن الغبيانيين نقول لي شمت صاحبك الليلة نايم عذب ليناعثمان حسين (كل لحطة بتمر علي انت في خاطري و في عيني ) .. اها شمت يبدأ يغني اول ما يصل اللزمة صاحبنا فنترب يصحي و يكورك بي طول حسو و هو لاصق لي شمت مع العود في سدرو
تتررلا تت تت ترالاااااااااااا لا لا لا لا لا

يا زول عجبنا وسر بالنا

>>>>>>


عاوزين نسمع منك...وبي سرعة قبل العيد

دحين (مطرب صاعد) دي مش معناها بسف الصعوط ولا أنا غلطان

عجيبة ... كلكم بيقتو تغنو ...يعني ...حتي بشري ودخالتي شفوقة بقي يغني وامبارح زي ما قلت في بوستي الجامد تي في كلونزيلا سودان (مكتوب بالرطانة ) لقيت زيت صباح لزوم يسلكو صوت الفضائية بشان تغني ....
عجيبة ..اهو الواحد "يوثق" وبعد كام سنة (لو سمح الوقت الفضل) حيقدم وينتج ويتكلم ويحكي ويغني في برنامج " بتاعي وبتاعي " ....
مبروك عليكم ...

ولو إنو القرار جاء متأخر لكن برضو تمام الواحد
يضمن مستقبلوا ,, كفايه ضيعت زمنك كلو قرايه ورسم
وشعر وغربه .
بالله أول ما تتوهط ياعماد شوف لى طريقه معاكم , أنا
صوتى ما بطال بـس مشكلتى خجول شويه .
وإنشاء الله إنت تلحق السوق ده ونشوفك فى إحدى القنوات
فيما تبقى من أيام رمضان .

سلام ياعمده ورمضان كريم ,,

أستااااااااااذ ياااا...

استاذ وائل اششششش

ممكن لو سمحت تغنى لينا اغنية سجم امى حبيبى عرس بت عمى

ونكون شاكرين ومقدرين.

كيف يا عماد يا أخى ؟
الموازرة ؟
نوازرك تب يا أخوى .
طلع نوع ساوند جديد . تقول أسمو W 21 _ CONTROL .
فى فنان شال منو .
الساوند ده يا عماد عندو سماعات تسمعك حفلة الخرطوم وأنت راقد
فى المسعودية .
يعنى الجرة حقت الندامى ديك فى الساوند ده تطلع شطة .
تحياتى

يا عماد أخوي

أهديتني بسمة وسط هذا الوجع والألم

كتاباتك هذه تداوي بعض الجراح

حسين خوجلي أدمى وجداننا يا عماد

ربنا يديك العافية

وائل شنو؟ .... إشششش؟ ..... إش عليك إنت ....

إنت بي جدّك عايز (تصعد) قبل ما (أكتشفك)؟

حتضيّع زمنك مع فارات السجانة وديم القنا بتاعينك ديل أسمع كلامي ........ هسي شوف ودّوك وين:

Quote: و اي حاجة تانية دايرة شد برضو عملوا ليها محلات ..

... الشدّة بالله ... (خدعوك وجرّحو حبالك)، إنت ياخ مشيت محل (الشد) الغلت.

عاين يا عماد
عليك الله بعد تنتهى من الفطور
وبعد ما تقرطع ليك كورتين حلومر
وبعد سجارة البرنجى وتنعنش القهوة .
حاول جيب الشباب ديل . أسمع ساكت فى الدنيا دى .
يا أخى ناس التلفزيون حقنا محتاجين عكاز سرهيت النوع المكعوج أبو عكن
والخبت أنت عارف مكانو .


"American Idol" judges choose for them and the announcements have been made on the Friday, May 14 hometown visits.

Ellen DeGeneres chose "Maybe I'm Amazed" by Paul McCartney for Crystal Bowersox. Kara DioGuardi and Randy Jackson chose "Daughters" by John Mayer for Casey James. Simon Cowell chose "Hallelujah" by Leonard Cohen for Lee Dewyze.

Interesting. We find this to be kind of weird for several reasons. First, Ellen picking for Crystal is a surprise. Simon has been her champion all season long, so we just assumed he'd get her. Simon also usually chooses the song of the eventual winner, so maybe this tells us something about the voting totals?

Secondly, we are surprised newbie judge Ellen wasn't paired with Randy, letting Kara pick on her own. But maybe Kara picking for Casey James was just feeding too much into the weird cougar storyline going on with them.

Finally, we are very surprised Simon chose "Hallelujah" for Lee Dewyze. Not that it's a bad song. On the contrary, it's a great song and Lee will probably do it very well. But Tim Urban did it just a few short weeks ago and it's strange Simon would pick a repeat.

What do you think? Good song choices?

Thanks to Joe's Place Blog for the tip.

Follow Zap2it and Zap2it Andrea on Twitter and Zap2it on Facebook for the latest movies, TV and celeb news.

اخي عماد

ما اتشرفت بمقابلتك

لكن السمعتو من صلاح عبد الله

لو كل يوم تتمسح فيهو تلاته مرات

لمدة اسبوعين بدون الخمايس

بتكون اكتر من صاعد

يا جماعة ما تستهتروا بكلام عماد ده
الزول ده والله غناي جنس غناء
اسمعوا مرة واحدة بس وبعدين احكموا

ولو حبالك الصوتية رخت شوية أعمل غرغرة ملح
لكن بعد رمضان عشان الصوم وكده , يعني في حالة
إنك صائم وكده والله مع السخانة بتاعتكم دي اظن
ثلاثة ارباع السودنيين فاطرين وكاك وتاني كاك
تخريمة
ود البشرى يا خوي الاداك بالكوريك يدينا بالملعقة بس
تحاياي واشواقي لكل من عبر من خلال هذا المنفذ
تخيل يا عمدة كنت نائم وصحاني صوت غناك
يا جماعة الوشوش الضاحكة ما شغالة معاي
حليلك يا محمد الصائم قالوا السنة دي صائم
عموما يا عمدة ومواصلة لما انقطع من حديث
تعال لينا في السعودية خلينا نعمل ليك كم حفلة كده
في العيد واهو تفيد ونستفيد والخال صديق الموج
يقيف بعيد وليك علي اجيب ليك الشلة كلها وعلى
راسهم ( مزمل ود الصول ) والفة الفصل بتاعكم
زمان ( عادل جبارة ) تصبجوا على خير

والله إنت تغيز،
ياخ مليون مره قت ليك غراراتك شترا،
منو القال ليك الحبال مؤهل أساس للغناء عشان تجري تشدها،
هسه وينو شعرك المجلبط بالجل مع الرجال؟
وين السوميتا المعلقه في الرقبه؟
وين القميص اللياقتو بنفسج وبُطانتو تركواز ؟
أو أضعف الإيمان جلابيه كاميرونيه على نسق أحمدو أهيدجو الله يرحمو ؟
عالم جاهله،
أنا ما عارف بكري بجيب الخِلَق دي من وين،

Quote: ميرغني برجوبة بيعزف أورغن كويس ما بطال ..

أورغن؟
بقيت بتحرِّف الناس برضو؟
برجوبه دا كان بيعمل الحَلَّه، كان إنت نسيت أنا ما نسيت،
مره عمل حلة الجداد وضرب السدُر والكرعين ،
صلاح سفاله مشى يتفقد الموقف لقا الحله كلها جنحين،
قال ليهو يا برجوبه إنت الليله ضبحت لينا Gulfair ?

[B الا خ الفنان المبدع
صاحب الحنجرة الحديديةإششش
لقد تلقيت نبأإقتحامك الساحة الفنية
بفرح عظيم وهذا نبأ مؤكد، اما الانباء
الاخري فيعلم بها الله
هذه بعض الاعمال التي جادت بها
قريحتي اتمني ان تجد حظهامن التلحين

القصيدة الاولي:-

بعزمك كورتين زبادي
واحده ليك واحدة ليَ
امكن ارفع مستواك
واعزمك فتة العشيَه
لونا لون بلاعة راكضة
فيها حبة فول شويَه
زيتا شحده بصلة واحدة
والصحن جرثومة حيًه
لونو زي لون الطحالب
رقعو يا كافي البليَة
لو ابيت انا برضو رافض
والاكل يمسخ علَي
ناوي تعمل فيها راقي
وترفض الاكلة الهنيَة
كان غداك شربة سحالي
والفطور شية حديَة
العضام حتت سنونك
والكلاب رافعات قضيَة
كم سبقتها للقمامة
خصوص كمان عيد الضحيَة
كم جريت مرات وراها
يادني ونفسك دنيَة

وهذه قصيدة اخري تناص
مع التراث وهي تحت الانشاء
اتمني ان تشرع في تلحين هذا
المقطع وسوف نوافيك بباقي
القصيدة في وقت لاحق

بعزمك بيرة وسمك
لو تعبت بقدمك
لو نعست بنومك
ولو زعلت بجضمك

علي العموم..من خلال
خبرتي وقيس عليهاالقصايد دي
سوف تكون قنبلة في الوسط الفني
طبعا بعداندياحها بصوتك الكرواني

ودمتم علما في الساحة الفنية

مبروك يا وائل ..


* يا عمنا خارج الشنب فى الاول ..
الصوت ملحوق يا برعم ..
بعدين كلام المسقفاتيه الكبار كبار ارخيهو شويه ..
قال

Quote: في البلد دي كلو شي لازم يكون واقف تتك ..

قال ؟.
الناس برضو مفروض تقعد وكده ..
المابنزل قلووظ ينزل كبس ..

جارنا
يعني لازم اتضامن معاك



كامل تضامني معاك




ما معروف خليك قريب يمكن نحتاجك ، بس اعمل حساب للتضامن دا

تحية وتقدير للفنان
عماد ابشنب

هسع ده شنب نجوم غد!
ساعدوها بنتضامن ..

الفنان القامة
الراحل المقيم
انا عارفك ما راحل ولا حاجة لكن هم بيقولو كدا

اكيد
انت واحد من الشكلو وجدان الشعب السودانى

بالله ياعماد كتر من غنا الحقيبة طلع زيتنا ذاتو
يعنى حتجى عليك وحتقيف

ارفعوا يدكم عن
الفنان عماد ابشنب
خالص التضامن مع الفنان
عماد ابشنب

Quote: و اي حاجة تانية دايرة شد برضو عملوا ليها محلات

يا سعادتك برضك الرحمه حلوه

ممكن عناوين للاتصال وكده ؟ لووول


مباااااالغه ياعمده


والله ماعافي ليك , انحنا في غربه والغربه كربه, وانت عارف الكرباوي دا مابدوم . لووول

Quote: من الليلة دي أنا زول غنّاي و مطرب صاعد .. كان عجبكم !

حسع يجيك ابشنب التاني ويقول ليك :

يافاره ده مشروع ماعندك ليهو حنجرة

اصلو الراجل ظهر في الجزيرة وكده

يا سلام

انتو ما سمعتو عماد عبد الله بغني مع شريط الكاسيت الجوة عربيتو


يا ساحر الجزيرة


مووووووت احمر

حسب افادة صلاح عبدالله

ازيك يا عمدة

Quote: لكن الحُبال فترة كده قامت رخت شوية .. شدينااااها -

قال الحبال قال ياحليك يافلان شفت المكروه في عزيز لديك
ونام النومة الابدية



تنهدات: (هل يصلح العطار ما افسده الدهر )

Quote: فتحي الضو قال لي : الفاضل مشى للسماعات ديك قال يكورك فيها عشان حبيبتو الفي الحفلة تسمعو

الفنان عماد اب شنب في حال كسير تلج لنجوم الاعلام
لقيتك ختيييير لكن!

كويس ..
اللهم إني صايم شديد الليلة ..
الله يجيب الساعة سبعة دي سريع سريع عشان نشوف المسخرة دي حدها وين !!


........
أرجا الراجيك يا سفيان اب راس

Quote: و كافة قنوات فالوب السودانية الفضائية .

حسبنا الله ونعم الوكيل!
يل زول صيامك ده صيام شنو؟
ما خايف تفطس ليك زول بنضميك الطراوة ده؟

غايتو اللهم متعنا بما جادت به قريحة عماد(مشروع الفنان المقترح)

دحين (مطرب صاعد) دي مش معناها بسف الصعوط ولا أنا غلطان
__________________________________________________________


ياالصادق,
فى الحالة دى بسموهو (مطرب صاعط)


ركز معانا يالصادق

Quote: عبدالمنعم إنسان سنجة

يا سلام ياخ ، منعم (البمبة) برضو غناي والله ، زيّك كده ده..
سمعتو في طهور ناس ( جعفر قوبة) مبدع حقيقي.
بالتوفيق والله يا إششششششششششششششش.












---------
غايتو مع المطرة دي ( والبحر القايم ده ) يوم إششششش ، ويوم واااااااي جررررررر..الله يستر ..

سلام ياعمدة ..ضحكت والله

والله بعد كلامك في سقاة الكأس والله تغني اكان احبال مشدوده ولا راخيه يازول الناس دي حاقدة ساي

غني والله كلامك بس يطرب ..

عل داير اسعلك سعال كده خفيف !! انت اششش دي بتاعة الجداد الكويتي والا واحد تانية ؟؟

غايتو ياصلاح عبدالله زولو ده ما بكون نام ساي !!بكون صاحي لمن طيارة الصباح قامت!!!!

بالله سلموا لي علي وحيد عبدالله كتير ..

تسلم ياجميل

عمدة ،،، تغني طوالي ما تغني ليه الماف شنو؟؟؟؟


بس يعني صاعد دي قاسية شويّه
انا عندي ليك فكرة (أنسب)
قول كنت في احدى دول المهجر
وتعبت من الغربة واكتفيت منها والنقة الكتيرة
وجيت راجع لأرض الوطن وعايز تواصل مسيرتك الفنية
وبالنسبة ل(مسيرتك الفنية) دي ما مشكلة باقي (التاريخ) السوداني دة وااااااسع و بدخل أي شي

يلا كدة ممكن الناس تضامن معاك و بتاع
لكن موضوع صاعد دة كان اصريت عليهو صدقني بتتعب