Post: #1
Title: فوتي ما بندم عليك.......
Author: رشا بابكر
Date: 09-01-2010, 07:39 PM
فوتي ما بندم عليك
لا طريق بجمعنا تاني
لا بفكر مرة فيك
نحنا ما بنشبه بعض
كيف نكون في يوم حبايب
عالمك مسكون وسالب
وكوكبك للنور محارب
وبحرك الغرقان في صمتو
فارقت رملو المراكب
وجمرك الحارق دواخلك
لي لهيب نيرانو ساكب
ولحنك النشاز بقطع
روعة الحس في المواكب
ودربك اليابس ترابو
وفالك المقفولة بابو
وحرفك القطع كتابو
شق قلمك بين ايديك
وفوتي ما بندم عليك
..............
ما الفرقة كانت اختيار
وكنا لازم نفترق
ما لقينا في بداية الطريق
غير الأماني بتحترق
وعشم الفرح في سكتك
كان كل لحظة بينسرق
لا لقيت صفاك
لا مرة حسيت بي وفاك
وفي نفسي حسيت الفرق
....................
عافت الروح ذكرتك
وما بكت عيني عليك
وفوتي ما بندم عليك
|
Post: #2
Title: Re: فوتي ما بندم عليك.......
Author: cantona_1
Date: 09-01-2010, 07:46 PM
Parent: #1
يا رشا بابكر إنتِ ياكي ست القصيدة المسروقة ولاّ أنا غلطان؟ كان ياكي إنتِ، حلف إنتِ شاعرة مهندمة وعشرة على عشرة... بس ما تنسي تعملي لي قصيدة مدح مش مديح... ربنا يوفقك. تحياتي
كبـّـاشي الصـّـافي
|
Post: #3
Title: Re: فوتي ما بندم عليك.......
Author: رشا بابكر
Date: 09-01-2010, 07:54 PM
Parent: #2
أخي / كباشي
يخجلني اطرائك
وده ان دل على شئ
انما يدل على حسك المرهف
انتو يا وحي القصايد
وانتو يا الفرح البواعد
في الفؤاد ليكم معزة
باقية ديمة والله شاهد
|
Post: #4
Title: Re: فوتي ما بندم عليك.......
Author: cantona_1
Date: 09-01-2010, 07:59 PM
Parent: #3
بسم الله ما شاء الله.. عين الحسود فيها عود .. إنتِ يا بتي الكلام الحلو بتجيبهو من ياتو سوق؟ سوق عكاظ وقفلوه. الله يتممك بعقلك ويديك الصحة والعافية. تحياتي.
كبـّـاشي الصـّـافي
|
Post: #5
Title: Re: فوتي ما بندم عليك.......
Author: khaleel
Date: 09-01-2010, 08:03 PM
Parent: #4
بقي نحن يا رشا من مدرسة نجاة الصغيرة
سامحته وسالت عن اخباره
وبدون ان ادري تركت له يدي لتنام كالعصفور
فوق يديه
|
Post: #6
Title: Re: فوتي ما بندم عليك.......
Author: رشا بابكر
Date: 09-01-2010, 08:09 PM
Parent: #5
يا كباشي
مافي اصدق من سوق الألهام
لك تقديري دوما
شكرا/ خليل
ومرورك يسعدني
|
Post: #7
Title: Re: فوتي ما بندم عليك.......
Author: رشا بابكر
Date: 09-01-2010, 10:24 PM
Parent: #6
الأخ / الكريم /كباشي
فات علي في ردي عليك اعلاه
خاطبتني ب/ يارشا يا( بتي )
في دي ظلمت نفسك
اسم رشا بيوحي ليك وللأخرين
انو صاحبة الأسم بت ضغنونة
للمعلومية أنا زولة كبيرة
يعني ما دفعة ناس رشاورزان
وبما أن النسوان ما بفصحن عن عمرهن الحقيقي
الا أنا ممكن أقول اني من دفعة ناس كباشي
وود الصايموباقي الجماعة.
وبالعقل كدى يا كباشي بت صغيرة ممكن تكتب زي الكلام ده!!!!
|
|