Post: #1 Title: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: أشرف محمد الباقر Date: 09-01-2010, 06:20 PM Parent: #0
. نعم سادتى نيويورك على موعد مع الفرح والطرب الأصيل. وكما عودتكم ومواصلةً لنشاطها الثقافى والإجتماعى وبمناسبة عيد الفطر السعيد أعاده الله على الجميع بالخير واليمن والبركات تقدم أجمل عيدية لمنتسبيها وتقدم الفنان المبدع ياسر تمتام فى حفل ساهر ببروكلين نيويورك والدعوة عامة.
.
Post: #2 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: cantona_1 Date: 09-01-2010, 06:32 PM Parent: #1
نبارك ليكم العيد مقدماً وإن شاء حفلتكم تكون عامرة بس ما تخلي الجماعة يدّاوسوا تاني يا أشرف. أصلهم ماكلين ليهو غزال فطيسة ومتسببين ساكت. تحياتي.
كبـّـاشي الصـّـافي
Post: #3 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: Kostawi Date: 09-01-2010, 07:22 PM Parent: #2
بالله كلمونا أول بأول هل دعيتم طاقم سفارة السودان?
عشان نقدر نحدد و كدا
Post: #5 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: أشرف محمد الباقر Date: 09-01-2010, 11:01 PM Parent: #3
. الأخ كوستاوى: رمضان كريم! الدعاية لإحتفال العيد تتم عبر النت والملصقات الحائطية والإتصالات التلفونية بين منتسبى الرابطة. شخصياً لا أرى أى غضاضة فى دعوة أى سودانى للمشاركة فى إحتفالية العيد السعيد فالرابطة وعاء لكل السودانيين مادام هناك إلتزام وإحترام بضوابطها ودستورها.
وشكراً جزيلاً على المرور وعيد مبارك مقدماً.
أشرف الباقر .
Post: #11 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: الصادق الزين Date: 09-03-2010, 01:39 AM Parent: #5
هى دعوه منى اوجهها الى كل الوطنيين الاحرار رفقاء النضال فى نيوجرسى , كناتيكيت , فلادلفيا و الاشراف فى نيويورك ان يحضروا احتفالات عيد الفطر المبارك بنيويورك لمنع تنصيب سعادة سفير المؤتمر الوطنى الجديد سفيرا جاسوسا وسط اهلنا الشرفاء فى نيويورك , لان الدعوه المقدمه اعلاه من اللجنه التنفيذيه لللرابطه والتى تسيطر عليها مؤقتا اتباع المؤتمر الوطنى ظاهرها الاحتفال بعيد الفطر المبارك وباطنها هو الاحتفال بتنصيب السفير الجديد, ودا واضح من التحدى السافر الذى يتزعمه نائب رئيس الرابطه عندما قال "ان المنبر قد اعتلاه من قبل شيوعيين وحزب امه ..الخ فلا مانع لديهم الان فى ان تعتليه السفاره وايضا فى دعوته لاحضار العكاكيز وغيرها لخوض العكه المتوقعه" حسب زعمه تخيل!!! وايضا للحديث الضمنى الواضح لصاحب البوست فى "انهم يرحبوا بحضور اى سودانى لموقع الاحتفال" , وايضا لحديث احدهم فى الافطار عندما منع السفير من الحديث عندما قال مخاطبا الحضور"بانهم الدايرنوا بسوه" كاشاره واضحه بان السفير لازم يعتلى منبر الرابطه ليتكلم!! . فارجو من الجميع الحضور لان الثوره ستنطلق مجددا من هنا نيويورك ارض الحريه و الشرفاء .
نحن لسنا بهواة معارك ولا اصحاب عكاكيز لان ذلك سيمنعه القانون وسيجد متزعميه جزائهم , نحن اصحاب مبادئ منطلقين من دستور عمل المنظمات الخيريه الغير ربحيه فى ولاية نيويورك و دستور الرابطه نفسه , وعليه ارجو ان لا تكدروا صفو الاحتفال فى الدخول فى تحدى ومتاهات لا يحمد عقباه لان مبدانا واضح لن يتزحزح فى رفضنا للسفير من اعتلاء منبرنا . يمكنكم حل المساله ببساطه وهو فقط احزفوا اسم الرابطه السودانيه بنيويورك وابدلوه باى اسم شئتم لا يضمنا كسودانيين فلا شان لنا فى ذلك عندئذ, او ان لا يحضر السفير فستجدونا حينها فقط اوائل من يستمتع بابداعات ياسر تمتام .
الصادق الزين السكرتير الثقافى للرابطه
Post: #14 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: الصادق الزين Date: 09-03-2010, 03:59 AM Parent: #11
Quote: وعليك الله ما تنسى تقدم الدعوة للسفير بواشنطون وبقية أفراد السفارة حركة شعبية ومؤتمر وطنى وأحزاب موالاة عشان بس قراب منك
ناس نيويورك كلهم جايين -
والدعوة من هنا للسفير وكل طاقم السفارة وعموم أهل السودان بنيويورك
ويا كوستاوى ما تنسى تجيب معاك عكازك لزوم الكعة وكده
الكلام اعلاه من نائب رئيس الرابطه وهو يمثل تحدى واضح لنظم وقوانيين الولايه من اعلى هرم فى الرابطه , بل و يزيدعلى ذلك بدعوته لاستخدام العنف فى تنفيذ مخططهم!!! يا عجبى
الصادق
Post: #15 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: الصادق الزين Date: 09-03-2010, 04:10 AM Parent: #14
Quote: وبعدين ورينا تحبى تتكلمى قبل وله بعد كلمة السفير عشان نختك فى البرنامج
أصلو نحن منبرنا ده مفتوح للجميع
واضح اعلاه ان الرابطه ممثله فى نائب رئيس الرابطه قد وضعت برامجها و ضمنت فقره جاهزه لسعادة السفير الجديد لتقديم اوراق اعتماده مما يدعم زعمنا يا اهل قبيلتى قبيلة النضال الوطنى الديمقراطى , ومعا من اجل منع تسلل الانقاذ عبر بوابة نيويورك!!!
الصادق
Post: #4 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: أشرف محمد الباقر Date: 09-01-2010, 10:43 PM Parent: #2
. الأخ كباشى الصافى تحايا عطرة عيد مبارك على الجميع و ربنا يعيدو بالخير والمحبة. شكراً جزيلاً على المرور.
أشرف الباقر.
Post: #6 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: حسن حماد محمد Date: 09-02-2010, 00:54 AM Parent: #1
الأخ الحبيب سلامات
ان شاء الله أيامكم كلها أعياد
والرابطة السودانية الأمريكية بنيويورك عينى بارده والصلاة على الرسول
لا تمر أسابيع على النجاح الأول حتى يتبعها المشروع الثانى
والله الغيرة قتلت الحساد زى ناس دا وزى داك
لكن الحسوا كوعكم
مسيرة العطاء لن تتوقف
وعليك الله يا كوستاوى اليوم داك أركب ال 95 نورث وما تقيف الا فى بروكلن والباقى علينا
وعليك الله ما تنسى تقدم الدعوة للسفير بواشنطون وبقية أفراد السفارة حركة شعبية ومؤتمر وطنى وأحزاب موالاة عشان بس قراب منك
ناس نيويورك كلهم جايين -
والدعوة من هنا للسفير وكل طاقم السفارة وعموم أهل السودان بنيويورك
ويا كوستاوى ما تنسى تجيب معاك عكازك لزوم الكعة وكده
Quote: بالله كلمونا أول بأول هل دعيتم طاقم سفارة السودان?
أبوعلى والكلام ما كمل لكن ظروف الطبيعة صعبة شوية
عشان نقدر نحدد و كدا
Post: #7 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: حسن حماد محمد Date: 09-02-2010, 01:22 AM Parent: #1
الأخت تراجى أم سند وحازم سلامات وعساك والعيال بخير
عشان ما تزعلى الدعوة برضو مرفوعة ليك
ولو حاتجى ورينا عشان نحجز ليك تربيزة قدام مع تربيزة السفير
وبعدين ورينا تحبى تتكلمى قبل وله بعد كلمة السفير عشان نختك فى البرنامج
أصلو نحن منبرنا ده مفتوح للجميع
وقبل كده اتكلموا فيهو شيوعيين ولا دينيين واتحاديين وحزب أمة وجمهوريين
وقتها مافى زول تب عارض وله قال دى سياسة
وعشان هسع السفير عايز يتكلم قامت الدنيا ولم تقعد والرابطة بقت مسيسة وما أدراك ما مسيسة
وجميع أعضاءها بقوا بقدرة قادر مؤتمر وطنى
والله اللى ما بيعرف يقول الناس دى بالجد معارضة وعليها التكل
وخلاص حوش بكرى ده بقى المؤشر لمن هو وطنى وشريف ومن هو عميل ومندس وضد الوطن
حيرتونا معاكم والله ومودننا لى وين ما عارفين
Post: #8 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: إحسان عبدالمتعال أحمد Date: 09-02-2010, 09:02 PM Parent: #7
الاخ العزيز اشرف
استاذنا حسن حماد
سلامات وعيدكم سعيد ومبارك
اولا ليكم الف تحية ودعوات بالتوفيق وما اجملكم وانتم تواصلون العزم والاصرار علي جعل الرابطة السودانية الامريكية
في مقدمة الروابط هنا ببلد العم سام
قف __ ثم تعظيم سلام لاصراركم ايضا الحفاظ علي النجاح تلو الاخر لبرامج الرابطة
اما حفل الفنان القدير الشاب المليان طرب ياسر تمتام فالفضل يعود للاتصالات المبكره للاخ علي محمد الحسن بياسر عند
مقدمه الي امريكاوالاتفاق معة لبرنامج العيد منذ حضوره الي فيلادلفيا
ربنا يحقق الاماني
Post: #9 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: إحسان عبدالمتعال أحمد Date: 09-02-2010, 10:15 PM Parent: #8
ياسر تمتام
فنان من طراز خاص
تجاوز سنوات عمره كثيرا
ولد وترعرع بين احضان اغنيات الحقيبة
منذ بداياتي في العمل الاذاعي تفتقت مسامعي علي صوته وهو يحكي في جلسات فنية خاصة عن اباطرة
شعراء وفناني الحقيبة وقد كان ذلك برفقة الاذاعي القدير استاذي عوض بابكر كنت حينذاك كثيرة الجلوس مع الاخ عوض
بابكر التقط كل كلمة تخرج منه وهواحد مواعين الثقافة السودانية يعرف ويحفظ كل شئ عنها _ قد
لفت نظري وجود شخص في ريعان شبابه مهتم بأغنيات الحقيبة يتحدث عنها كأنه معاصر لتلك الفترة حديث العارف بل تظنه
احد ابناء عمالقة فن الحقيبه - يدهشك ياسر تمتام عندما يحدثك عن المقامات والسلم الخماسي يحفظ اغنيات الحقيبة
بالنص الاولي مثلما كتبت بل يخبرك بالتعديلات التي اجريت علي النص الشعري وحتي اللحن - عندما تستمع له تخاله احد
شعرائها بل ملحنيها
للاخ الفنان ياسر مدرسه ولونية خاصة في الغناء يحتفط بالشكل اللحني مع اضافة نكهته الحاصه للعمل الفني مما يجبر
المتلقي علي الاستماع له والاستمتاع بالاداء والصوت الملائكي
اتذكر الي الان اشادة الاستاذ الاعلامي الكبير عوض بابكر وهو احد مشيدي و مكتشفي امكانيات ياسر تمتام الهائلة في
هذه اللونية من الغناءاذكر ان عوض قال ان اغنيات الحقيبة في ايدي امينه وقد كان للاخ عوض مزاج في استضافة الاخ
ياسر والاخ العزيز الفنان الجميل سعد البنا وقد حظييت بالاستماع له في استديوعات الاذاعة وبرنامج حقيبة الفن وكنت من
المدمنيين لحضور هذه التسجيلات مع الاستاذ عوض والفني الاستاذ الرشيد اب احمد الله يطراهم بالخير
وما زلت اتذكر الاشادة الكبيرة بالاخ ياسر من قبل الراحل المقيم الفريق ابراهيم احمد عبد الكريم عبر برنامجه
التلفزيوني حيث توقف بالحديث عن كل الاصوات الجميلة التي شدت بأغنيات الحقيبة وقد كان لياسر نصيب الاسد من تلك الاشادات
اذن اخوتي الاعزاء انتم موعودون بأمسية نيويوركية خاصة مع ياسر تمتام احد المبدعين والمهتمين بفن الحقيبة يرتكز
علي خلفية صلبة ومعرفة ثرة وثقافة عالية بتلك الحقبة الزمنية من الفن السوداني
شكرا للمكتب الثقافي للرابطة عنهم الاخ علي محمد الحسن
شكرا للفنان الصديق ياسر تمتام وقد اوفيت بوعدك لنا
شكرا لنيويورك مصنع السحر والجمال
Post: #10 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: إحسان عبدالمتعال أحمد Date: 09-02-2010, 10:19 PM Parent: #9
الفنان ياسر تمتام يتجلي في رونق الصبح البديع
Post: #12 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: حسن حماد محمد Date: 09-03-2010, 02:00 AM Parent: #1
Quote: ودا واضح من التحدى السافر الذى يتزعمه نائب رئيس الرابطه عندما قال "ان المنبر قد اعتلاه من قبل شيوعيين وحزب امه ..الخ فلا مانع لديهم الان فى ان تعتليه السفاره وايضا فى دعوته لاحضار العكاكيز وغيرها لخوض العكه المتوقعه" حسب زعمه تخيل!!
حقيقة الفهم قسم -
ياخى الظيطة والظمبليطة دى كلها لزومها شنو؟
ويبدو انو ذاكرتك خربة لدرجة قف تأمل
وهل نسيت أم تناسيت ؟
عندما كنت سكرتير ثقافى قبل اقالتك بواسطة قرار من اللجنة التنفيذية مؤمن عليه من اللجنة الاستشارية
بأنك وبحضورك وادارتك لندوة عيد الاستقلال وبعدها مناسبات ثلاثة قد تحدث السيد المبعوث الدائم للبعثة السودانية
مخاطباً الحضور دون أى اعتراض منك أو من غيرك ؟
ولم يكن ذلك مرة واحدة أو مرتين ، لم تحرك وقتها أى ساكن ولم نسمع لك دعوة للشرفاء من نيوجرسى ولا كونيتكت ولا فيلادلفيا ولا حتى دعوة لأشراف نيويورك
أين كنت وقتها ولماذا صمت على حديث السيد السفير ولم تحتج ولم تثور ثورة التاسع والعشرون من رمضان
يا خى عليك الله انزل شوية وحاول فكر فى البتقول فيهو وأرجع لتاريخك ومسألة السفير واوراق اعتماده الشابى لينا فيها دى
وله اقول ليك حاجة خلينا نرجع للأرشيف شوية ونشوف معارضتك للسيد السفير دى حدها وين
ما زالت الدعوة موجهه للجميع بمن فيهم طاقم السفارة وعلى رأسه السيد المبعوث الدائم لحضور حفل الرابطة فى رمضان
ومرحب بالثوار من كل أصقاع الولايات المتحدة الأمريكية وكندا واستراليا كمان
وعليك الله تعال بى عكاز مضبب
ياخى قوم لف بلا معارضة معاك بلا ثورة بلا كلام فارغ
Post: #13 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: أشرف محمد الباقر Date: 09-03-2010, 02:55 AM Parent: #12
وأكرر حديثى مرة ثانية وأرحب بكل السودانيين على إختلاف ملاتهم السياسية والإجتماعية والسودانين هنا تعنى الكل بدون فرزمادام هناك إلتزام وإحترام للضوابط المسيرة للرابطة .
Post: #16 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: خيرى بخيت خيرى Date: 09-03-2010, 04:38 AM Parent: #12
ياخى قوم لف بلا معارضة معاك بلا ثورة بلا كلام فارغ
ابو على كل سنه وانت طيب يازول طوّّل بالك شويه
واحد فى مكانتك نحن نتوقع منه كلام رصين وموزون وشكرا لدعوتك لى ناس كندا يمكن نجى تحياتى
Post: #17 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: اميرة السيد Date: 09-03-2010, 02:10 PM Parent: #16
حاضرين ومشاركين بإذن الله اذا ناس نيوهافن بكونتيكات ما نظموا لينا حفلة عيد يوم الجمعة
Post: #18 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: أشرف محمد الباقر Date: 09-04-2010, 01:25 AM Parent: #17
. الأستاذة أميرة السيد:
شكراً جزيلاًعلى المرور والكتابة وألف مليون أهلاً وعيد سعيد مقدماً.
أشرف الباقر .
Post: #19 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر Author: إحسان عبدالمتعال أحمد Date: 09-04-2010, 08:44 PM Parent: #18
الاخ اشرف حبيبنا علي محمد الحسن بوصينا نرفع البوست ويرسا التحايا وتهاني العيد لسيد الحوش بكري بالاهتمام وجعل البوست منورا للصفحة الاولي فهلا وجدنا الاستجابة من العزيز بكري ابو بكر مع شكرنا مقدما
Post: #20 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر .. ياسر تمتام Author: أشرف محمد الباقر Date: 09-07-2010, 09:26 AM Parent: #19
.
Post: #21 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر .. ياسر تمتام Author: Abdelrahim Mansour Date: 09-07-2010, 10:44 AM Parent: #20
الأخ الحبيب: أشرف الباقر
سلامات، و كل سنة و انتم طيبين، سالمين، غانمين، تامين، و لامين في الخير.
الأخ الأستاذ: ياسر تمتام أبدع متحرك، و الوعد ليله و لا كل الليالي.
الشكر لكم و انتم تغرسون الجمال و الشكر كل الشكر للمكتب الثقافي و الاجتماعي بالرابطة السودانية الأمريكية لهذه الدعوة الطيبة.
و ان شاء الله حاضرين
عبدالرحيم منصور نيويورك
* **
Post: #22 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر .. ياسر تمتام Author: Abdelrahim Mansour Date: 09-07-2010, 10:47 AM Parent: #21
* **
Post: #23 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر .. ياسر تمتام Author: إحسان عبدالمتعال أحمد Date: 09-07-2010, 09:18 PM Parent: #22
هلا منصورنا الغالي
عدت وعاد الالق للرابطة
الامنيات بان تصل الدعوة لكل الاخوة السودانيين بنيويورك وما جاورها من مدن وولايات
الاخ علي محمد الحسن تذاكر الحفل جاهزة اتمني الحضور لآستلامها اجد صعوبة في الاتصال الهاتفي بعلي
الحمد لله التجهيزات تتم علي قدم وساق من اجل انجاح الملتقي الاسري في العيد - الكل يعمل بجد واخلاص من اجل رابطتن
القوية والمتماسكة باذن الله
لكم ودي
Post: #24 Title: Re: الرابطة السودانية الأمريكية بنيويورك وبرنامج عيد الفطر السعيد--- حفل ساهر .. ياسر تمتام Author: Abdelrahim Mansour Date: 09-09-2010, 11:20 AM Parent: #22
