الغلاط احيانا مربك وشين ودشن . يقول صحبى الطاعم ان منطقة الهلالية فيها مريخاب !! اى والله تصدقوا ؟!! قلت ليهو سيد البلد يحتوى الضل فى اى حتة .. حصل دشمان كبير جدا ايام بناء مسجد المريخ وفرنب جماعة التعصب بان هذى المئذنة مريخابية بحتة ولا يمكن ان يكون الهلال ههنا . وبنفس المقدار قاعدين معانا فى الهلالية المريخاب ديل .. غايتو هلالنا دة سمح خلاس .
معمل استاك فى الخرطوم قرر ان مياه الخرطوم ملوثة بنوعين من البكتريا والحكومة تكشّف لينا وتشرب المياه الصحية وصحتنا باظت بكل انواع السرطانات والبكتريا غايتو الناس غلو الموية ما نفع .. هل من الممكن ان تغلى موية غسيل الهدوم ؟ غلى موية وغلاء اسعار واسهالات بالجملة والقطاعى فى الوطن النحيب ... يا حليل زمان وايام زمان يا يمة لو تتذكرى .
حكمة السنة : اذا اردت ان تشرب موية من الماسورة عليك ان تقفل نخرتك
ماعلاقة لبن الجمال بالاسهال يا حماكم الله ؟ فى احد زيارات البشير للقضارف واحد من رجال المنطقة ابتكر ليهم نظرية الاسهال الجماعى وذلك باعطاء الضيوف لبن جمال من امو لا اضافة فيه ولا تمومة .. شرب الجماعة من البشير لاخر وزير وبعد 10 دقائق انتقل الصيوان لحالة اخرى من الربكة وتحضير الاسعافات الاولية والاخرين بطائرة خاصة للخرتوم لغسيل المعدة . غايتو لبن الجمال دة شربناهو كتير خلاس لكن ما عمل لينا حاجة .. ياربى يكون السبب شنو ؟!!
بلة جابر شايل شنطة تقيلة داخل بيها الطيارة فى مطار اديس ابابا والبعثة متوجهة ل غانا .. نقنق بتاع الخطوط الاثيوبية بان الشنطة كبيرة ولا يمكن ان يدخل بها . فسأله فجاة قال ليه : اكرا ؟ رد : لا بلة جابر .... فى اللحظة ديك افتكرو انو سألو هل اسمك اكرم ..... حكمة
Post: #5 Title: Re: الهلالية فيها مريخاب والخرطوم فيها بكتريا – وشغاليت اخرى Author: الفاتح الصادق حامد Date: 09-02-2010, 01:17 AM Parent: #4
يحكى ان فى دولة المشروع الانقاذى الذى رفع شعار هى لله .. ان هناك سوق للربا فى مدينة الفاشر يسمى سوق المواسير . وبرعاية والى الملاية يوسف كبر ( الكضاب ) تمت مصادرة اموال المساكين والفقراء واعطت للعاملين عليها .فى الدولة ...... هى لله ؟
هى للجاه وجهجهة الشعب الفضل
Post: #6 Title: Re: الهلالية فيها مريخاب والخرطوم فيها بكتريا – وشغاليت اخرى Author: الفاتح الصادق حامد Date: 09-02-2010, 01:21 AM Parent: #5
ايوااا ... عندنا راعى فى الحلة اتى وهو مدنقرا رأسه وخايف خوف الطريفى المشى كدارى عندما فارق جملو ... قال الراعى ( حقنا ) ان هناك همباتة اتوا اليه فى الخلا وهم يحملون دفاتر حكومية وايصالات وكلاشينكوف فقط ينقصهم الكلوركين . .. قالوا له ارفع 7 ابقار زكاة .. قال ليهم يا ناس انا راعى واسياد البقر فى الحلة ارح ليهم هناك خليهم يدوكم .. قالوا ليه ما عندنا زمن .. رفعوا البقر وادوه الوصل ... علما بان البقر ليست لشخص بل لمجموعة ناس .. ( يتراوح للفرد فيهن من بقرة الى 10 ابقار )
Post: #7 Title: Re: الهلالية فيها مريخاب والخرطوم فيها بكتريا – وشغاليت اخرى Author: الفاتح الصادق حامد Date: 09-02-2010, 01:30 AM Parent: #6
ارتبط فنان بحفلتين فى نفس اليوم ونفس الزمن وقبض العداد .. هذا الارتباط جاء نتيجة نسيان فقط لا غتاتة . يوم الخميس جوهو الناس الدفعو ليهو يوم السبت بان حفلتهم الخميس وفى نفس الزمن جوهو الناس الدفعو ليهو يوم السبت لحفلة الخميس واصبح يدخل ويمرق ودخل فى ركنا قصيا .. فجاة واحد من الجماعة قال ليهو يا استاذ فى حاجة ؟ قال ليهم لا لا مافى حاجة بس صداع خفيف . فى هذى الزنقة المؤسسة نطق واحد من الوفدين وقال : يا استاذ نحن جينا نعتذر ليك بتاجيل الحفل لان ابو العريس بقى فى رحمة الله ... وبدون شعور قال الفنان ( جميل جدا ياخ ) .
Post: #8 Title: Re: الهلالية فيها مريخاب والخرطوم فيها بكتريا – وشغاليت اخرى Author: cantona_1 Date: 09-02-2010, 04:48 AM Parent: #7
Quote: وبدون شعور قال الفنان ( جميل جدا ياخ ) .
يا الفاتح الصادق .. الليلة ال....ة بشنو؟ ولا الدنيا رمضان؟ دي موية الآبريه البايتة؟ أضحكتني أضحك لك دنيا وآخرة. تحياتي.
Quote: يا الفاتح الصادق .. الليلة ال....ة بشنو؟ ولا الدنيا رمضان؟ دي موية الآبريه البايتة؟ أضحكتني أضحك لك دنيا وآخرة. تحياتي.
العم كباشى
رمضان كريم وتصوم وتفطر على خير
ال... منو ؟ الابرى فى العرف النيلى زريعة عيش ومواد صاحبة نكهة مميزة وتخمير يحوى حرارة فورة البرمة وابجديات المهارة القصوى لصاحبة العجين وما جاورها من نساء يشمرن عن ساعد الجد لمعركة العواسة يا كتلوه يا جو حازمينو مطبّق على شكل مربعات ريحتو تجيب الصائم من قعر الشدرة . قومّت على الكوفارة فى عز الصوم .
الفنان مرق من الزنقة ... والزنقة عند ناس سيدى الحسن المغربى تعنى الزقاق
قالت سعاد : يا عمى موسى انا جيتك من قبيل فى الطاحونة دى ولسة ما دققت لى عيشى ؟! رد عم موسى : لكن يا بتى الكهرباء قاطعة ادقق ليك كيفن ! قالت سعاد : كيف الكهرباء قاطعة والباظ ( البص ) داك منوّر ؟!
طبعا ضمن كتف بكتف ورجل برجل وتسوية الصفوف ومحاصرة الشيطان وقبقبتو حتى لا يدخل بين المصلين كوسواس خناس والعياذ بالله . هناك من يخت كراعو بمحاذاة اصابع المصلى وهناك من يخت كراعو فوق كراع الزول التانى .. صاحبى كلما يزح رجلو المصلى الجمبو يزاحمو .. اصبحت العملية تطاردية .. ضاقت مساحة كرعين صاحبى وتوسعت مساحة الزول اب كراع ... واخيرا صاحبى خت كرعينو الاتنين فوق بعض فأذا بها يجد تلاتة كرعين فى كراع واحدة ... قام رفع كراعو وصلى بواحدة وقفل باب المساسكة .
Post: #13 Title: Re: الهلالية فيها مريخاب والخرطوم فيها بكتريا – وشغاليت اخرى Author: عبدالكريم أحمد الامين Date: 09-03-2010, 01:44 AM Parent: #12
** الاُستاذ الفاتح الصادق.. ** صباحك خير وجُمعتك مُباركه.. ** الهلاليه دى فيها كل الوان الطيف السودانى وفيها مُعظم القبائل السودانيه وفيها من أتو نازحين من شمال أفريقيا ومغربها العربى الجميل وأصبحوا عنصراً من نسيجها الإجتماعى ,, بلد تحتوى كل هذا الجمال لابد أن يكون بها من يعشق سيد البلد ومن يعشق وصيفه.. (ودام الود بين الجميع) (ابو محمد فؤاد - دبى) (من رعايا دولة الهلاليه)
Quote: ** الاُستاذ الفاتح الصادق.. ** صباحك خير وجُمعتك مُباركه.. ** الهلاليه دى فيها كل الوان الطيف السودانى وفيها مُعظم القبائل السودانيه وفيها من أتو نازحين من شمال أفريقيا ومغربها العربى الجميل وأصبحوا عنصراً من نسيجها الإجتماعى ,, بلد تحتوى كل هذا الجمال لابد أن يكون بها من يعشق سيد البلد ومن يعشق وصيفه.. (ودام الود بين الجميع) (ابو محمد فؤاد - دبى) (من رعايا دولة الهلاليه)
الاستاذ ابو محمد فؤاد الله يبارك فيك ورمضان كريم وتصوم وتفطر على خير
تعرف .. الهلالية دى زرتها وكان اخى الاصغر يدرس بها القرءان الكريم عند الشيخ الطيب بعدما انتقل اليه من الكلاكلة القلعة من خلوة الشيخ عبد القادر ود ام مريوم عليهم السلام الاتنين . فهى بحق منطقة سودان مصغر تحوى جواها الوان طيفنا الجميل وتسامح اهلها وترابطهم ما جعلنى احبها . بعدين كيف ما احبها واسمها الهلالية ههههه اسم حقو تكون مدينة سيد البلد . ما المحيرنى انو الوصيفاب ديل بقولوا هم ما ضلنا وعايشين فى مدينتنا .. لذلك بنقول ليهم .
