نقطة نظام يا كيزان

ديمقراطية،
حوار،
قبول الآخر،
الإقصاء،
حقوق الإنسان،
حرية الرأي،
محاكمات عادلة...

الحاجات الفوق دي إنتوا فاهمنها ولا طق حنك ساكت؟

ولو فاهمين معهاها كمان يبقى دي رجالة ساكت،
وفوق عديلكم،
ما السلطة في يدكم، ما نقدر نقول بغم

والنداء موصول للذين يدعون لقبول الكيزان والتحاور معهم

هسى انا ما عارف تصنيفى شنو ....

Quote: والنداء موصول للذين يدعون لقبول الكيزان والتحاور معهم

لاكين انا من الذين يدعون لقبول الحوار ونبذ الإقصائية ... وتطبيق نفس المعايير مع الكيزان وغيرهم ...

قبول الكيزان ومن ثم التحاور معهم دى استراتيجية ملتوية أنصحك بعدم الثقة فى من يطرحها عليك ...

ولكن قبل أن تقبل بالحوار مع الآخر ... عليك أن تعلم ماهو الحوار وأين حدوده ...

وقبل أن تقرر نبذ الإقصائية واستخدام الوسائل الديموقراطية عليك أن تختبر هذه المفاهيم عندك ...

وبعد ذلك لا تدعو الكيزان للحوار ... انخرط فى الحوار الدائر أصلاً ...

وفى النهاية ... قبولك أو رفضك للكيزان ... يعود الى حرية اختيارك للموقف الذى يناسبك ... فقط حاول الوصول لهذا الموقف بالأدوات الديموقراطية (وهى بطبيعتها لا تقصى الإنسان ... كوزاً كان أم "ضوموغراطى")





... المهم ....

يا أخوانا الكوز دايماً بشوف إنو رأيو "لا يأتيه الباطل من بين يديه أو من خلفه" لذلك مسألة الحوار مع الآخر المختلف يعتبرها كفر ولا يلجأ إليها بمبدأ قبول الآخر.
الكوز لا يلجأ (لخدعة الحوار) إلا إذا أحس بعدم سيطرته على الموقف، فهي فرصة وتكتيك مرحلي لا أكثر ولا أقل لتجميع صفوفه للانقضاض بقوة من جديد.
بفهم إنو الدعوة للحوار تعني الضعف، لم تجيهو من الآخر الكوز يعتبرها ضعف ويضري عيشو
إذاً لا حوار مع كوز

سلامات تبارك

Quote: لاكين انا من الذين يدعون لقبول الحوار ونبذ الإقصائية

أقبل الحوار مع من يقبل التساوي معك في شروط الحوار لكن الما حيقبل التساوي دا حا يبقى زي اللاعب معاك كرة قدم بشروطها وقانونها المعروف ويشيل الكورة بيده يدخلها في مرماك ويقول ليك "قون"!!

وإنتا لخصت المسألة هنا:

Quote: قبول الكيزان ومن ثم التحاور معهم دى استراتيجية ملتوية أنصحك بعدم الثقة فى من يطرحها عليك ...

يا قوم: الكوز لا يعترف إلا بقانون واحد
"قانون القوة"
نعم القوة الآن في صالحه لكن الدنيا زي الكورة، مدورة وما بتدي حريف
بكرة حا يدفع تمن فرض رأيه علينا بالقوة
انتبهوا لخدعة الحوار والديمقراطية وقبول الآخر.. إلخ.. و"أعدوا لهم ما استطعتم من قوة ومن رباط الخيل"

Quote: يا أخوانا الكوز دايماً بشوف إنو رأيو "لا يأتيه الباطل من بين يديه أو من خلفه" لذلك مسألة الحوار مع الآخر المختلف يعتبرها كفر ولا يلجأ إليها بمبدأ قبول الآخر. الكوز لا يلجأ (لخدعة الحوار) إلا إذا أحس بعدم سيطرته على الموقف، فهي فرصة وتكتيك مرحلي لا أكثر ولا أقل لتجميع صفوفه للانقضاض بقوة من جديد. بفهم إنو الدعوة للحوار تعني الضعف، لم تجيهو من الآخر الكوز يعتبرها ضعف ويضري عيشو إذاً لا حوار مع كوز

دا رد على كلامى؟

ولاّ انت كنت بتكتب فى نفس الوكت ...

انا غايتو حا أعلق ليك على مفهومك للحوار كما تطرحه أنت هنا ... تصويرك للكوز دا ... حا أخليهو لى أىّ كوز عايز "ينبرى" للجدال الفارغ دا ...

الحوار وسيلة تواصل ... زيّو زى الحرب أو أىّ أداة تواصل أخرى ... والحوار انت بتدخلو بالإستراتيجية البتختارا ... وبتدخلو عشان وجهة نظرك توصل للآخر ... قد تفرض عليك الشروط الموضوعية أن تدخل فى حوار ... ولكن لا أحد يستطيع أن يملى عليك وجهة نظرك أو طريقة طرحك لها .. ..

وأخيراً ... وليس آخراً ... توجّب القول أن الحوار هو خيار القوى ... الذى تسنده الحجة والمنطق والتاريخ ... ومن يجيد استخدام الحوار، يضطر إليه حتى من يرفض الجلوس له ...

وقد يحاول من فى السلطة أن يخدع الآخر بالحوار ... ولكن لا ينخدع ويهرب من الحوار إلاّ من لا حجة ولا منطق له ... فلجوء صاحب السلطة للحوار إنما هو لجوء الضعيف ... والحوار - كما أسلفنا - أداة القوى وخياره وليس ملجأ الضعاف ... فمن ضعف فكرياً وسقط أخلاقياً يهرب من الحوار كهروبه من الأسد ...




... المهم ....

Quote: دا رد على كلامى؟

لا لا، حقك رسلتو بالـ UPS

يا تبارك أنا الكيزان ديل أعتقد عاشرتهم وراقبت سلوكهم كويس، إذا كان أيام الدراسة أو حتى الكيزان الفي أسرتي
تصدق أنا كنت مفكر جاد لو جيت أعمل ماجستير رسالتي تكون عنهم!
لغاية الآن ما لاقاني كوز ممكن يتنازل عن رأيه بأخوي وأخوك

تلخيصي للمسألة كلها إنو الكوز دا أقصى درجات الاقصاء في النفس البشرية بس شاءت الظروف يكونوا مسلمين فاستعملوا أقرب (وأقوى) سلاح يقع في يدهم (الدين) كرادع لخصومهم ورادع ليهم هم ذاتهم عشان ما يتراجعوا عن رأيهم
ياخي الحاكمننا بيهو الكيزان دا أسي دين ولا رأيهم وبقى مقدس وأخد شكل الدين؟
ما ينطبق على كيزاننا ينطبق على اليمين المتطرف اليهودي (نفس التركيبة النفسية) بس ديك كيزان اليهود

Quote: تلخيصي للمسألة كلها إنو الكوز دا أقصى درجات الاقصاء في النفس البشرية بس شاءت الظروف يكونوا مسلمين فاستعملوا أقرب (وأقوى) سلاح يقع في يدهم (الدين) كرادع لخصومهم ورادع ليهم هم ذاتهم عشان ما يتراجعوا عن رأيهم

ولما توفر ليهم سلاح تاني، أقوى وأنجع ونتائجه طازة وما دايرا ليها يوم قيامة، ختوا الدين كنب!

كدي يا أشرف أول شيء عرف لينا الكوز

ولكم في "الحوار وقبول الآخر" عند الكيزان مع:
الحركة الشعبية من لدن مجموعة الناصر وحتى الآن،
الحركات المسلحة في دار فور،
الحركات المسلحة في الشرق،
أحزاب المعارضة،
التجمع الوطني،
لكم في كل أولئك أسوة حسنة يا أولوا الألباب

الكوز يا الشفيع في فهمي الخاص هو أي زول يستخدم الدين أو أي نصوص مقدسة مطية لبلوغ أهداف سياسية أو ذاتية،
أياً كان الدين،إسلام، مسيحية أويهودية أو حتى الديانات الوثنية، عشان كدا قلت اليمين المتطرف اليهودي هم كيزان إسرائيل

دا فهمي العام للمفردة، لكن موضوع البوست عن الكيزان الفي السلطة ومناصريهم البيتهمونا بالاقصائية، عدم الديمقراطية، عدم قبول الآخر..إلخ..
خلااااااس هم بيشروا ديمقراطية و(غوبول آخر)

Quote: الحركة الشعبية من لدن مجموعة الناصر وحتى الآن، الحركات المسلحة في دار فور، الحركات المسلحة في الشرق، أحزاب المعارضة، التجمع الوطني،

أضف للستة دي فرية (الانتخابات الديموغراطية الفاتت) وما صاحبها من (غوبول للآخر) من بداية التسجيل لحد الشروط التعجيزية الأسقطت ترشيح د. عبد الله علي إبراهيم والضغط على الحركة الشعبية لسحب مرشحها لمنصب رئاسة الجمهورية
واللستة لا زالت مفتوحة

Quote: أقبل الحوار مع من يقبل التساوي معك في شروط الحوار لكن الما حيقبل التساوي دا حا يبقى زي اللاعب معاك كرة قدم بشروطها وقانونها المعروف ويشيل الكورة بيده يدخلها في مرماك ويقول ليك "قون"!!

التساوى طبعاً مفهوم نسبى ... لاكين ما شرط مسبق للحوار .. إلاّ يكون عذر تعلل بيهو لتفادى الحوار ...
خلق منابر الحوار وإعمارا ما دايماً بالتساوى (عندك مثلاً "منبر الحوار الديموقراطى" ... منتهى الإقصائية والنخبوية والإنتقائية ... وقالوا عندهم شافع قليل ادب ومابتنهر) فلو الكيزان خلقوا منابر حصرية عليهم وفرصتك فيها ما مساوية لى فرصتم ... حا يضطرّوا يجوك فى منبرك مدفوعين بى ضرورة الحوار ... وبى مصالحم المستصحبة فى ضرورة الحوار نفسها ... المنابر الإنتقائية والإقصائية عادةً بتتحوّل لى نوادى اجتماعية خاصة ما عندها علاقة بالحوار ... بعد داك بيجف معينا وبتتحوّل لى أطلال مهجورة ... فتساوى الفرص هو الذى يعطى القيمة لمنبر الحوار وليس العكس ... عندما بنت "المائدة المستديرة" The Camelot البريطانية أمبراطورية بريطانيا الحديثة هذه ... كان ذلك على أساس واحد وبسيط ... وهو أن أعضاءها الإثنى عشر (بما فيهم الملك والمزارع والجندى والفارس والنبيل) يتساوون فى أصواتهم عندما يجلسون على "المائدة المستديرة" ... All For One, And One For All ... أيّاً كانت ننتيجة الحوار ...

أمّا ما قلته عن صعوبة الكيزان فى تغيير آرائهم ومواقفهم ... فدعنى انبهك ... إذا قررت القيام بدراستهم بغرض الحصول على الماجستير، فلابد أن تقارن هذا الحكم عليهم، بصعوبة أو سهولة تغيير غيرهم لمواقفهم وآرائهم ...

فأنا لم أجد حتى الآن ... من يغيّر رأيه أو موقفه كنتيجة مباشرة لحوارٍ ما .... ويشترك فى هذا كل من قابلت خلال النيف وأربعين سنة من عمرى ... فى الأسافير وفى الأسواق وفى السياسة وفى الرياضة وفى الديانة وفى كل أصقاع الأرض ...

ويمكننى أن آخذك أنت مثالاً ... فأؤكد لك ... أنك سوف لن تغيّر رأيك فيهم نتيجةً لهذا الحوار ... ومداخلاتك القادمة ستثبت ما يجعلنى لا أتزحزح عن رأيى بسهولة ...

هى طبيعة البشر .. يغيّرون آراءهم ومواقفهم بالإقتناع ... فلا تعتقد فى نفسك الإقناع دائماً ...





... المهم ....

التساوي في شروط الحوار حسب فهمي ما نسبي. قناعة الطرفين بأنهم قاعدين أسي يتحاوروا عشان يتلاقوا في نقطة وسط. حق الاختلاف مثلاُ. ديل شرطين من الشروط الأنا قاصدها. بعد نقطة الالتقاء دي، أو قربها، من مركز كل طرف ومسألة الرضا بالمسافة دي هي النسبية. دا حسب فهمي البسيط.
شغل ناس منبر الحوار الديمقراطي في جزئية عدم قبول الكيزان أنا متفق معاهو. يعني تخيل مثلاً سعادة العميد محمد أحمد الريح عضو وجا واحد من العذبوه أخد عضوية هناك، أجي أطلب من سعادة العميد مثلاً يتحاور معاهم؟.
بعدين الكيزان أنا ما عشمان إنهم يغيروا رأيهم، اعتراضي كله على إنهم يقصوك ببيت أشباح برشوة بقتل، وأول ما تلقى فرصة تقصيهم بوسائل أقل وحشية من ديك يكوركوا "واك واك الاقصاء، واك واك حقوق الإنسان، واك..."
يعني بأي حال ما ممكن نسمي الوساخة التمت في الرحلات الماكوكية بين الخرطوم وجوبا بهدف دفع الحركة الشعبية لسحب مرشحها للرئاسة بالحوار!

كأنك يا أشرف تود المقارنة بين (ديقراطية وقبول الآخر) في (دولة بكري) الاسفيرية برئاسة بكري و(دولة السودان) برئاسة البشير

بل أريد المقارنة يا وراق بين موقف الكيزان من المفاهيم دي لما الهوا يكون معاهم وبين موقفهم منها لما الهوا يقلب مع الشايتين على كدا

موقف (X) من المفاهيم دي لما الهوا يكون معاهم وبين موقفهم منها لما الهوا يقلب مع الشايتين على كدا

يا أشرف لو ختيت أي X هنا وبالمؤشرات حقتك دي ح تلقى الكلام بينطبق عليهو لأنو مؤشراتك دي نسبية والعندو القلم ما بكتب لي نفسه شقي
يعني ممكن تخت مثلاً الشيوعيين ، ولِا اقوليك، شوف الترابي ،لامن الهوا قلب قعد يتجرس كيف من نفس القوانين الوضعها

Quote: يا أشرف لو ختيت أي X هنا وبالمؤشرات حقتك دي ح تلقى الكلام بينطبق عليهو لأنو مؤشراتك دي نسبية والعندو القلم ما بكتب لي نفسه شقي

المعادلة دي ما سليمة يا وراق، وحتى لو كانت سليمة، هل دا مبرر إني أقبل الواقع دا من أياً كان؟
بعدين مسألة النسبية دي كيف يعني، يعني مثلاً أنا ماخد حقوقي كإنسان في السودان بنسبة كم في المية؟
وهل المفروض أقبل بالنسبة دي وأقول المسألة نسبية ولا كيف؟
أما فيما يخص شيخ حسن فدا أكبر كوز الله خلقه وأشك يجي زول أكوز منه في الألفية الفوقنا دي

Quote: يعني تخيل مثلاً سعادة العميد محمد أحمد الريح عضو وجا واحد من العذبوه أخد عضوية هناك، أجي أطلب من سعادة العميد مثلاً يتحاور معاهم؟.

حواراً ما ليك فيهو نفقة .... ما تشتغل بيهو ولا تطلب من أى "سعادة" أى "تعاسة"...

لاكين المنبر دا شهد بى ناس اتعرّضوا للتعذيب - بدون ذكر الأسماء - وشاركوا فى حوارات حساسة ومثمرة وبنّاءة (وأذكر أننى شاركت فى العديد من هذه الحوارات) ... بى فكرة إنّو الحوار يسمح بأن تعبُر وجهة نظرك ... لتكون فى اعتبار الآخر ... فأنت لا تستطيع أن تتنازل عن مسلّماتك لأجل الحوار ... ولن تثنى الآخر عمّا هو عليه ... ولكن على الأقل تضع اعتباراً لتحفظات الآخر ... وهذا هو احترام الرأى الآخر ...

التساوى نسبى ... لأن الحقيقة تنفى التساوى المطلق ... فالمتحاورون لا يتساوون فى العمر ولا فى التجربة ولا فى الحصيلة المعرفية ولا فى المسافة بينهم وبين مراكز صنع القرار ولا فى طريقة التفكير والتناول .. لا يتساوون فى الحقيقة ... ولكن يمكن أن يكون هنالك تساوى نسبى فى فرص التعبير عن الرأى ... وفى وزن الرأى والموقف ...

قبل أن تشترط التساوى ... تأكد من المستوى الذى يجرى فيه الحوار ... ومن المنبر الذى يستضيف الحوار ... ومن السياق التاريخى الذى يأتى فيه الحوار ... وأن تحقق هدفاً محدداً من الحوار (طبعاً البروبوقاندا والإستقطاب ممكن يغنيك عنهم إسهام بكرى الصايغ وسيف مساعد وخالد العبيد والإسفاف يغنيك عنه كيكى) فاجعل أولوية أهدافك أن يصل رأيك واضحاً ومتكاملاً وخالياً من الشعارات والهتافية وغياب الأرضيات المشتركة ليكون مفهوماً ومعقولاً للطرف الآخر ...





... المهم ....

Quote: كدي يا أشرف أول شيء عرف لينا الكوز

الشفيع وراق
اشرف عرف ليك الكوز البعرفو وانا بعرّف لك الكوز البعرفو

فهو الشخص الذى يضرب الطلاب بالسيخ عندما يكون فى الدراسة .
والذى يحرق القرى والحرث والنسل عندما يكون فى السلطة .
هو مكابر ومتعالى ولا يتزحزح قيد انملة عن ذلكم .
الكوز ايضا ذاك الذى يدخل حروبا جهادية ولا يكون له اسرى .. لديه نهج خاص فى قتلهم .
هو الذى يقتل المواطنين بالجوع وبالمرض وبالحصار والتشريد والفصل التعسفى .
هو الشخص الذى اذا قلت له لا تفسد فى الارض قال لك انا مصلح .
هو الذى يتحدث لك عن الاسلام ونهج الصحابة والاولين والاخرين وطريقة حكم شرع الله وفى اول منعطف تجده يدافع عن السارق والقاتل والفاسد والمغتصب والمعذب والاقصائى .


هو الشخص الذى اذا قلت له اتق الله اخذته العزة بالاثم.

Quote: ديمقراطية، حوار، قبول الآخر، الإقصاء، حقوق الإنسان، حرية الرأي، محاكمات عادلة... الحاجات الفوق دي إنتوا فاهمنها ولا طق حنك ساكت؟

اشرف رمضان كريم

الاصول الفوق دى اشياء لا تمت الى فكر الكيزان جملة وتفصيلا .
عملوا ضدها منذ اليوم الاول فى 30 يونيو .
فى عرفهم القوة هى المحك الطبيعى والدليل على ذلك لغة الخطاب الممجوج والذى يقول ( نحن شلناها بالقوة والدايرها اليشيلا بالقوة - وما الخج ببعيد ) .. الحكم عضلى وبندق فلا مجال .
الكوراك والجقلبة البسووا فيها دى اشارة للمحاولة دخولهم مشرع الحقوق بالتساوى مع الاخرين وايجاد مدخل لعفا الله عما سلف .. الحوار بيزنطى معهم ولا يجدى . والكلام الجبتو هنا دة دليل مادى ملموس ومشاهد من كل الاحياء والمعاصرين .

Quote: التساوى نسبى ... لأن الحقيقة تنفى التساوى المطلق ... فالمتحاورون لا يتساوون فى العمر ولا فى التجربة ولا فى الحصيلة المعرفية ولا فى المسافة بينهم وبين مراكز صنع القرار ولا فى طريقة التفكير والتناول .. لا يتساوون فى الحقيقة ... ولكن يمكن أن يكون هنالك تساوى نسبى فى فرص التعبير عن الرأى ... وفى وزن الرأى والموقف ...

يا تبارك قراءت لك مواقف في غاية الروعة والوضوح - ولكن يا سيدي اجدك في هذا البوست كدرويش الحضرة الذي يدور حول نفسه تلف وتدور وفي النهاية لمن تتعب تتلولح مع ايقاع المدحة..

تحياتي للجميع..

لا يا اشرف
انا ما بقول ليك تقبل بيها وتخضع
ولكن (تتعايش) مع ما هو متاح ، وتناضل لتحسينها
وكدي النمسك أول حاجة في الديمقراطية
هل الشعب السوداني مؤهل تاهيل كامل لها؟ ولا تنسى تجربة الـ(الخج)
وخليك من ديقراطية الانقاذ الزائفة ، هل تظن أن المواطن الريفي الصوت لحزب الأمة في الديمقراطية السابقة ، هل تظن أنه صوت بكااامل حريته؟
مع الفقر والتخلف ده ، الشعب يحتاج للتنمية أكتر من الديمقراطية
الانقاذ عرفت بمكمن الداء وبدأت في التنمية وتأسيس البنى التحتية ونشر التعليم
فيها فساد
نعم
فساد كتير
نعم
فيها محسوبية
نعم
بس الان الباب مفتوح (نسبياً) لحرية التعبير ويوجد قدر معتبر من المحاسبة
وعلى الناس ان تستغل ما هو موجود للتحسين والتطوير
البلد يقودها الان يا اشرف ناس (مخلصين)
يصيبوا و يخطئوا
دعم المخلصين النزيهين لهم سيغنيهم عن طلب الدعم من المفسدين واصحاب المصالح
هكذا قرأتهم ، ومن هنا جاء دعمي لهم، ودعم الكثيرين
وعلى الطبقة المستنيرة أن تختار بين دعمهم وتصويبهم أو محاولة إقتلاعهم

Quote: التساوى نسبى ... لأن الحقيقة تنفى التساوى المطلق ... فالمتحاورون لا يتساوون فى العمر ولا فى التجربة ولا فى الحصيلة المعرفية ولا فى المسافة بينهم وبين مراكز صنع القرار ولا فى طريقة التفكير والتناول .. لا يتساوون فى الحقيقة ... ولكن يمكن أن يكون هنالك تساوى نسبى فى فرص التعبير عن الرأى ... وفى وزن الرأى والموقف ...

يخيل لي يا تبارك أنا ما قدرت أوصل ليك فكرتي
أنا الحوار القاصدو هو الحوار مع مع من لا يتخذ الحوار أداة للوصول لأهدافه
وبالتحديد هنا قاصد حكومة الإنقاذ ومسانديها
ناس اختطفوا البلد وصادروا كل حاجة، ولما تجي تعترض على مشاركة واحد منهم في منبر زي دا يجوا يقولوا ليك "إنتا ما بتاع حوار"!!
حوار شنو تاني..
إلا كان الحوار الغلب شيخو!
يعني زول يظلمك وياكل حقك ولما تلقى فرصة ترد ليه الصاع يقول ليك "وين الديمقراطية؟"!!

بعدين ما وريتني ضحايا التعذيب ديل حواراتهم المثمرة دي كانت مع منو،
ولو كانت مع أنصار الإنقاذ أها الحصل شنو لثمرة الحوارات دي؟
يعني أثمرت شنو لصالح ضحايا التعذيب السابقين واللاحقين؟

بخصوص البروبوقاندا والاستقطاب تبع سيف مساعد متفق معاك (لو قصدك سيف بتاع "ديوشنا تحاصر الخرطوم")
بكري الصايغ وخالد العبيد: ما متابع بوستاتهم
إسفاف كيكي: لا أتفق معاك نهائي، يا زول من الآخر كدا كيكي دا من كتابي المفضلين، ولو مصر على مسألة إسفافه دي اعتبرني من قراء الاسفاف
لو كيكي بسف أومال الكوز البكورك من الاقصاء تسميهو شنو، بتصقع!!
على فكرة: لقيت الإسفاف في المعجم تعني (شدة وحدة النظر)!
تكون قاصد دي؟

سلامات يا فاتح
أولاً مشكور للإضافة في تعريف الكوز

Quote: الاصول الفوق دى اشياء لا تمت الى فكر الكيزان جملة وتفصيلا . عملوا ضدها منذ اليوم الاول فى 30 يونيو . فى عرفهم القوة هى المحك الطبيعى والدليل على ذلك لغة الخطاب الممجوج والذى يقول ( نحن شلناها بالقوة والدايرها اليشيلا بالقوة - وما الخج ببعيد ) .. الحكم عضلى وبندق فلا مجال . الكوراك والجقلبة البسووا فيها دى اشارة للمحاولة دخولهم مشرع الحقوق بالتساوى مع الاخرين وايجاد مدخل لعفا الله عما سلف .. الحوار بيزنطى معهم ولا يجدى . والكلام الجبتو هنا دة دليل مادى ملموس ومشاهد من كل الاحياء والمعاصرين .

المشكلة يا فاتح الناس ديل طماعين لدرجة إنهم عايزين يستولوا على المفاهيم دي ونقيضها في نفس الوقت، والمستفز في الموضوع إنهم ما عايزننا نقول ليهم تلت التلاتة كم!!

مرحب أستاذ حسين

Quote: لا يا اشرف انا ما بقول ليك تقبل بيها وتخضع ولكن (تتعايش) مع ما هو متاح ، وتناضل لتحسينها وكدي النمسك أول حاجة في الديمقراطية هل الشعب السوداني مؤهل تاهيل كامل لها؟ ولا تنسى تجربة الـ(الخج) وخليك من ديقراطية الانقاذ الزائفة ، هل تظن أن المواطن الريفي الصوت لحزب الأمة في الديمقراطية السابقة ، هل تظن أنه صوت بكااامل حريته؟

سلامات يا وراق
حكاية الشعب السوداني ما مؤهل للديمقراطية دي مقولة قعد تحيرني!!
يعني هو مؤهل للنظم الشمولية!!
يا وراق أنا معاك إنو الريفي الصوت لحزب الأمة في الديمقراطية السابقة ما صوت بكامل حريته، لكن هل يعني ذلك أفرض عليه ديمقراطية زي حقت البشير دي؟
الديمقراطية يا وراق ما حا تشتغل في أي بيئة بنظام copy and paste لكن حا تشتغل وتحرق تش لما نعمل ليها Installation مرحلة مرحلة، التركيب دا البيئة الوحيدة الصالحة ليهو حالياً حسب ظروفنا هي النظام المدني داك بي سجمو ورمادو. لأنو بمساحة الحرية الفيهو ممكن بعد مرة إتنين تلاتة من فشل حزب الأمة الجاء بأصوات الريفيين البسطاء ديلاك تعمل توعية للريفي داك ذاتو في المرة الرابعة ما يصوت لحزب الأمة. لكن طال ما النظام الحاكم شمولي وضد رغبة الناس ليوم يبعثون ما حا تقدر توعي ولا حا تقدر تغييرو بأخوي وأخوك. إذاً الحل، من وجهة نظري، نخلي ديمقراطيتنا الكسيحة دي تحبي لمن تتعلم المشي

حسين نوباتيا ...

Quote: يا تبارك قراءت لك مواقف في غاية الروعة والوضوح - ولكن يا سيدي اجدك في هذا البوست كدرويش الحضرة الذي يدور حول نفسه تلف وتدور وفي النهاية لمن تتعب تتلولح مع ايقاع المدحة..

شكراً على الإطراء ... لاكين ... يا ربى عندك مفهوم مختلف للتساوى؟
________________________________

أشرف ... انا بتداخل معاك من منطلق تصانيفك غير المنصفة لمن يدعون للحوار مع الكيزان ... وهو عدم إنصاف من يدعون لإقصاء الكيزان ...

Quote: على فكرة: لقيت الإسفاف في المعجم تعني (شدة وحدة النظر)! تكون قاصد دي؟

كنت بتكلم عن "إسفاف" التمباك ....

(هو "الإسفاف" سيدو عاجنو وخابزو وقاصدو وعارفو ... انت تعبان تفتش فى المعاجم مالك؟ ما تسفّ مع "المسفّين")


... المهم ...

Quote: أشرف ... انا بتداخل معاك من منطلق تصانيفك غير المنصفة لمن يدعون للحوار مع الكيزان ... وهو عدم إنصاف من يدعون لإقصاء الكيزان ...

يا تبارك السطر دا "كل فردة من بلد" ولا أنا ما فاهم؟
ولا قصدك "وهو عدم إنصاف من يدعون لـ (عدم) إقصاء الكيزان"
لو دا قصدك أنا بعتذر للشباب ديل، والمسألة ما عدم إنصاف للداعين لحوار الكيزان بقدر ما هي فرز كيمان ورسالة للطرفين:
يا ناس الحوار مع الكيزان: أنا ما حا أدفق مويتي على الرهاب معاكم، ومن جبرب المجرب..إلخ.. والمؤمن لا يلدغ.. إلخ..
يا كيزان يا خلابيص: أنا برة الملهاة دي وكلامكم دا تقولوهو لي زول ما عنده حديدة، "كلنا أيه منك نشرب.. إلخ..".

يا اشرف ياخي الكيزان ديل مجتمع مجتمع كبير جدا في السودان ودا هو الواقع واعني بي مجتمع انو فيهم الغني والفقير وفيهم من يؤدي الزكاة وفيهم من يستحق الزكاة زفيهم من يجب عليك وعلي ان نتف في وشو وفيم من يجب علينا ان نرفعه فوق الاعناق وفيهم الخير والشرير والمحسن والمسيء والغبي والذكي والظالم والعادل وودالناس وود ال###### (من منظور سلوكي) وفيهم الصالحين والطالحين والخونة والامناء وفيهم من هم في اعلى هرم السلطة ومن هم في اعلى هرم المعرضة وغيهم جنجويد وفيهم عدل ومساواة فيهم علماء اجلاء وفيهم جهلاء فيهم ناس كرام جدا وفيهم ناس لؤماء جدا والكوز ممكن يكون انتا وممكن يكون ابوك او اخوك او ابن عمك او جارك اووووو

يلا بعد دا انتا شوف نسبتك وتناسبك













..

وانا شايف حوارك مع الكوز ماشى كويس ... والملعب متساوى وأىّ حاجة ...

الأطراف الما كيزان فيهم الوسط وفيهم المعاك وفيهم المايل ليك ميول خفيف وفيهم الما معاك وفيهم المايل للكيزان ميول خفيف ...

أنعم به من حوار ... كدى قول "نقطة نظام" بتاعتك عشان نكون متابعين ...








... المهم ....

اوكية يا حذيفة، التباين الذكرته دا حاصل وسط الجماعة ديل زي أي مجتمع في الدنيا، لكن في أول محاصصة ممكن تأثر على رصيدهم من السلطة والانفراد بالرأي حا تلقاهم "كأسنان المشط" وعلى قلب رجل واحد.
الأنانية هي الرابط القوي بين الناس ديل

Quote: وانا شايف حوارك مع الكوز ماشى كويس ... والملعب متساوى وأىّ حاجة ...

ههههههه
هو بالله وراق كوز؟!
عشان كدا قال لي "أرضى بنصيبك وإتعايش مع الواقع"!!
إذاً يا تبارك دا حوار حدو لستك بكري دا!!
في أول هجمة مرتدة للإنقاذ ضد "فريق الحوار" حا يسل ضنبو المقدس ويشوت مع فريق الشجرة.

Quote: هو بالله وراق كوز؟!

حسب تعريفك للكوز الفوق ده .......لا

ولا تعريف الفاتح يا وراق؟

تعريف الفاتح معتمد لدينا، وشملة الكيزان لسة فيها متسع

طبعاً برضو أكيد .......لا

الفاتح جراها طويلة خاااالص
دي زي المسمي 11 بي 4 أتوه

والله قريت مداخلته ... وما عرفت اقول ليهو شنو

طيب يا وراق، ما كوز لكن مناصر الإنقاذ
بس خلي بالك: مناصرة الإنقاذ هي مرحلة الكرونيك من الكوزنة

كلامك صاح يا أشرف لو كنت تتكلم عن انقاذ 89 والمشروع الحضاري
انقاذ 2010 تختلف كتييير يا أشرف
الانقاذ تنازلت عن نص مشروعها الحضاري في نيفاشا ، والنص التاني تنازلت عنه ، اختياراً ، لتوسعة المواعين
انقاذ اليوم هو مشروع وطني ، ديمقراطي لحدٍ ما ، غير اقصائي ، غير ديني

Quote: اوكية يا حذيفة، التباين الذكرته دا حاصل وسط الجماعة ديل زي أي مجتمع في الدنيا، لكن في أول محاصصة ممكن تأثر على رصيدهم من السلطة والانفراد بالرأي حا تلقاهم "كأسنان المشط" وعلى قلب رجل واحد. الأنانية هي الرابط القوي بين الناس ديل

الزميل اشرف تحياتي

اعتقد ان هذا الخيط يمكن ان يقودنا الي مفاهيم موضوعية بعيدا عن الشطط فلك التحية على ذلك


ــــــ

الشيء الاساسي ان الكيزان او الشيوعين او او او غيرهم هم نتاج طبيعي افرزو المجتمع السوداني والكوز دا جاي مني انا ومنك انتا وجاء في الاثر (كما تكونوا يولى عليكم)

بالنسبة للأنانية هل هي سلوك نفسي شخصي ام هي سلوك ناتج عن ايدلوجيا سياسية؟؟

وهل الكيزان فعلا على قلب رجل واحد؟؟

ولماذا هم كذلك؟؟

هل حبا في الوطن؟؟

ام ان شهوة السلطان وبهرجه هو المحرك الاساسي؟
واذا كان هذا هو الشيء الراجح فل بقية نخبنا السياسية منزهه عن حب السلطة ؟؟














..

سلامات حذيفة

Quote: الشيء الاساسي ان الكيزان او الشيوعين او او او غيرهم هم نتاج طبيعي افرزو المجتمع السوداني والكوز دا جاي مني انا ومنك انتا وجاء في الاثر (كما تكونوا يولى عليكم)

صراحة: أظن بذرة الكوز دي موجودة جوانا كلنا (كسودانيين بالذات) والمسألة أساسها التنشئة الغلط، يعني تربية الطفل على عدم المشاركة في الرأي وتربيته دائماً على التحيز. التحيز للقبيلة، التحيز للنوع..إلى آخر التحيزات، دي في النهاية حا تقوده لما يكبر لتحيزات تانية، لأنها القالب الاجتماعي الوحيد الإتشكل وعيه عليه، وما بفهم غيرو!!. المشكلة إنو القالب دا عند الكيزان (أسياد الاسم) تمت حمايته بمظلة مقدسة، بقى (أو عشان يبقى دائماً) ما في خط رجعة، فقادت للورطات الاحنا فيها دي. ويخيل لي دا بجاوب على سؤالك عن الأنانية: سلوك أشخاص متطابق، بشوية رتوش مقدسة بقى إيدولجية تنظيم.

Quote: ولا تعريف الفاتح يا وراق؟ تعريف الفاتح معتمد لدينا، وشملة الكيزان لسة فيها متسع

استخدام الإستفزاز ... والأحكام المسبقة غير القابلة للنقاش ... من أساليب الحوار التى تستدعى المهارة فى استراتيجية التحاور ... أتمنى أن تكون على دراية بما تفعل هنا ...

الكيزان أيضاً أتوا من تفاعلات اجتماعية يعود تاريخها لدخول العرب السودان 1504م وتبلورت الرؤية السياسية منذ الثورة المهدية ثم تحوّلت لفعل آيديولوجى منظم أثناء الإستعمار البريطانى لتنتشر تنظيمياً فى الفترة بين الإستقلال وثورة اكتوبر وتصل ذروة الإنتشار (خارج السلطة) فى نهايات عهد مايو وبداية فترة الأحزاب ... ساءت صورة منسوبى الحركة الإسلامية فى أول مرحلة من مراحل إرساء المشروع الحضارى الشهيرة بمرحلة التمكين ... لأن الهدف من المرحلة واضح وهو التمكين الذى سبق التغيير والبناء المؤسسى المعتمد على السلام ...

فهم كتنظيم ونشاط سياسى ... يمثّلون ردة فعل طبيعية، لجسم غير غريب على المجتمع السودانى وذو تطوّر تسلسلى طبيعى، ردة فعل تجاه الفعل السياسى الذى يفرض صيرورته على الساحة السياسية السودانية ... من استعمار قديم (عربوسلامى، عثمانى) لاستعمار حديث (صناعى، مركزى أوربى) لاستعمار جديد Neocolonialism (اقتصادى، سياسى) ... مع ردود افعال الشرائح السودانية المختلفة ... أحزاب بين المتواطئة وعديمة الجدوى ... أزمة حكم وتهميش الريف ... فقر دولة وتخلّف واستنزاف موارد ... هلم جرّا من تاريخنا الذى لا يرى البعض فيه سوى "بطولة" المك نمر فى تسبيبه لمذبحة الدفتردار ... ثمّ هروبه الكبير ...

فالكيزان جزء منّا تاريخياً وجغرافياً واجتماعياً وسياسياً أيّاً كان تصويرك لهم ...








... المهم .... هو ابقاء باب الحوار مفتوحاً ....

Quote: استخدام الإستفزاز ... والأحكام المسبقة غير القابلة للنقاش ... من أساليب الحوار التى تستدعى المهارة فى استراتيجية التحاور ... أتمنى أن تكون على دراية بما تفعل هنا ...

يا تبارك إنت ما قاد تفهمني ليه؟
الكيزان ديل أنا ما عندي أي نية حوار معاهم، يا مان أنا رميت طوبتهم من زمان، وأي فكرة حوار (لا قدر الله) ممكن تبدأ بيني وبينهم لازم (من طرفهم) يسبقها تنازلهم (الكامل) عن كل المكتسبات الكانت شراكة بينا كلنا (بما فيها الدين والله ذاتو) وسطو عليها واستأثروا بيها لنفسهم، ولازم يفهموا كمان إننا كلنا ولاد تسعة.
فما تشيل هم علاقتي شكلها معاهم يبقى كيف.

Quote: ساءت صورة منسوبى الحركة الإسلامية فى أول مرحلة من مراحل إرساء المشروع الحضارى الشهيرة بمرحلة التمكين ... لأن الهدف من المرحلة واضح وهو التمكين الذى سبق التغيير والبناء المؤسسى المعتمد على السلام ...

في مرحلة من مراحل!!!
وصورتهم أسي كيف؟
ولا مرحلة التمكين لسة ما خلصت؟

Quote: فالكيزان جزء منّا تاريخياً وجغرافياً واجتماعياً وسياسياً أيّاً كان تصويرك لهم ...

تمام، متفق معاك
وأزيدك كمان: شملة الكوزنة العريضة دي تغتي حتى سيدي الإمام وسيدي أبو هاشم وآخرين، مع اختلاف درجة العنف
أزيدك أكتر؟.. أنا القدامك دا مرات كتيرة بطلع لي ضنب كوزنة، لكن بحاول بقدر الإمكان أكف أذاهو عن الحولي

مسألة استمرار الحوار واصل فيها بطريقتك معاهم، حقك يا مان، أما أنا فزهدت فيها ما لم تنفذ شروطي الفوق ديك

حا تقعد مربّع يدينك وحردان لى متين؟

لغاية ما المارينز يجوا نازلين من السما بى مظلات وشايلين معاهم ميزان العدالة الإمبريالية؟

ولاّ راجى ليك انتفاضة على طريقة أحلام هبانى؟

اتحرك ... حوار ... كوار .... أى حاجة ...









... المهم ...

Quote: انقاذ اليوم هو مشروع وطني ، ديمقراطي لحدٍ ما ، غير اقصائي ، غير ديني

وأنا بقول ليك يا وراق إنقاذ اليوم مشروع لا وطني، لا ديمقراطي واقصائي لأبعد مدى
أما مسألة "غير ديني" دي: الإنقاذ من يومها مشروع غير ديني، الشعارات الدينينة ديك كانت للتمكين فقط وانتهت صلاحيتها الآن. لكن في أقرب زنقة الإنقاذ بتلحقها السوق

يا تبارك أنا الواقف دا متحرك أكتر من البحاوروا الكيزان!!
عدم الحوار مع الكيزان دا حركة
لأنو حركة محاورهم (بدون بندقية) تكون دائماً في الاتجاه النكوصي
ولك في السيدين ونقد (بدون بندقية) وفي الحركة الشعبية وحركات دار فور (ببندقية) أسوة حسنة

الاخ اشرف

نقطة نظامك فى محلك
ظاهرة الكوزنه كما انتشار (السمسره) هى المضيعه السودان، تعرف لا استطيع ان افصل بين السمسمار والكوز.
عندى احساس انو الناس ديل لو قعدوا اكثر من كده حيطلعو ليهم فتاوى قدر ظروفك وظهرت بوادرها تحليل الرشوه، تحليل القيرل فريند (مسيار) وحتسمع بصلاة للايجار، صوم بالايجار...يتغالطوا فى ثمن صلاة الجمعه....والايه القريتها لى طولها كم...وهكذا، طبعا هسع فى الحج المميز...الخ القصه ماشه.

سلامات أستاذ أحمد أمين

Quote: ظاهرة الكوزنه كما انتشار (السمسره) هى المضيعه السودان، تعرف لا استطيع ان افصل بين السمسمار والكوز. عندى احساس انو الناس ديل لو قعدوا اكثر من كده حيطلعو ليهم فتاوى قدر ظروفك وظهرت بوادرها تحليل الرشوه، تحليل القيرل فريند (مسيار) وحتسمع بصلاة للايجار، صوم بالايجار...يتغالطوا فى ثمن صلاة الجمعه....والايه القريتها لى طولها كم...وهكذا، طبعا هسع فى الحج المميز...الخ القصه ماشه.

في ناس ممكن يفتكروا كلامك دا مبالغة وشطط في الخصومة، لكن لو راجعوا مسيرة الناس ديل وشافوا ما آل إليه حال شعاراتهم الدينية (بما فيها أم الشعارات، الشريعة) وقاسوا على ذلك حا يلقوك، على المدى البعيد، كنت حسن الظن بناس "هي لله" ديل.
زمان د. حيدر إبراهيم قارنهم بالحركة الصهيونية والناس قالوا ليه "بالغت!" أسي الصهاينة يتعلموا منهم!!

زي ما بقول بكري صالح "الإسلام السياسي لا تنقضي عجائبه!"

يا اخوى انت داير تتفشى فى الكيزان الإنت داير تصوّرم بى صورة معيّنة ...

ودى نظرة غير سليمة لتحديات السياسة السودانية وموقع الكيزان منها ...

لا استطيع أن أجزم برأى حول ما كتب حيدر ابراهيم ... فكتابه عن الإسلام السياسى فى رأيى أكثر هتافيةً منه عن الموضوعية التى تلزم تناول هذا الأمر المهم بالتحليل والدراسة ... وآراؤه آراء جائرة وصادرة عن مناوئ سياسى ... ولم تنقل السياق التاريخى الذى أنتج ظاهرة الإسلام السياسى نقلاً أميناً ومتمحصاً ... وتعاملت مع الظاهرة بمعزل عن السياق التاريخى وهذا خطأ تحليلى لا يمكن تعديله بالتحذلق اللغوى ... لذا لم اجد الحماس اللازم لإكمال الكتاب ... ولا أستطيع أن أجزم برأى حوله ...

درجات "الكوزنة" المختلفة الموجودة فينا ليست بالصدفة ... والتعامل مع الكيزان ككائنات فضائية من كوكب آخر ضرب من ضروب مضيعة الزمن فى كسب سياسى آنى ورخيص وسريع الزوال .... نحن لدينا مشكلة تاريخية ... وظهور الكيزان فينا كان واحد من ردود الأفعال المختلفة لهذه المشكلة التاريخية ... ولكل رد فعل إشراقاته وإخفاقاته ... فلا أعتقد أن من حق اليسارى الحكم على أداء اليمينى أو العكس؛ إذا لم نتّفق حول أزمتنا التاريخية كمعيار لقياس هذا الأداء ... وبحساب أزمة أن نكون دولة مستعمَرة بدرجات تطوّر مختلفة للصيغة الإستعمارية نفسها؛ فأعتقد أن الكيزان قد أبلوا بلاءاً حسناً ... ولكنهم فقدوا بوصلة التواصل مع المجتمع الذى أفرزهم ... وعليهم إعادة صياغة علاقتهم بهذا المجتمع ...

Quote: درجات "الكوزنة" المختلفة الموجودة فينا ليست بالصدفة ... والتعامل مع الكيزان ككائنات فضائية من كوكب آخر ضرب من ضروب مضيعة الزمن فى كسب سياسى آنى ورخيص وسريع الزوال .... نحن لدينا مشكلة تاريخية ... وظهور الكيزان فينا كان واحد من ردود الأفعال المختلفة لهذه المشكلة التاريخية ... ولكل رد فعل إشراقاته وإخفاقاته ... فلا أعتقد أن من حق اليسارى الحكم على أداء اليمينى أو العكس؛ إذا لم نتّفق حول أزمتنا التاريخية كمعيار لقياس هذا الأداء ... وبحساب أزمة أن نكون دولة مستعمَرة بدرجات تطوّر مختلفة للصيغة الإستعمارية نفسها؛ فأعتقد أن الكيزان قد أبلوا بلاءاً حسناً ... ولكنهم فقدوا بوصلة التواصل مع المجتمع الذى أفرزهم ... وعليهم إعادة صياغة علاقتهم بهذا المجتمع ...

تمام يا تبارك، لو جينا للتحليل المنطقي للمشكلة المسألة بتختلف، وحا نلقى (زي ما قال د. بولا) كلنا مشاركين في سعاية الغول. لكن المشكلة الأكبر الناس ديل ما مقتنعين بالمشكلة التاريخية دي، وما عندهم أي نية يقعدوا يسمعوا رأي غيرهم، أها، أسي عاوزين نقوم العوج دا، والحوار مع الغول زي ما إنت شايف حارتو سد
العمل شنو؟
بعدين في السياسة اليساري يحكم على أداء أخوه اليساري، خلي اليميني، أنا ما عارف إنت ليه سلبته الحق دا!
أما مسألة "أن الكيزان قد أبلوا بلاءاً حسنا" دي قدر ما قلبت تاريخهم ما لقيت ليهم بلاء حسن!
يا تبارك السودان على شفا حفرة من التشظي لدويلات، طبعاً جاهل وما موضوعي البقول السبب في دا الناس ديل،
لكن دا ما بينفي إنهم، في أحسن الأحوال، ليهم شرف الإكسلريشن في الانحدار نحو الهاوية ومونتاج الفيلم الممل دا، وعدم بذل أي مجهود حقيقي لتلافي الكارثة دي.
المجهود دا يا تبارك بنزينه الاقتناع بإنو البلد دي فيها ناس تانيين غيرنا وأكيد ليهم فكرة مغايرة
إذاً أي مجهود ما يخت في باله المسلم (سني وشيعي، وخلافه) والمسيحي واللا ديني والجنوبي والشمالي والعربي والأفريقي..إلخ التباينات، دا في الآخر حا يكون مجهود إقصائي، ومضاد، يعني مجهود لصالح التشظي.

Quote: في الآخر حا يكون مجهود إقصائي، ومضاد، يعني مجهود لصالح التشظي.

انا عشان كدا بقول ليك نقيس بى التحديات السياسية البتواجهنا ... هسى "تشظى" دى شنو؟

أنا لو السودان بقى 100 دويلة مستقلة ومنعتقة من التبعية الإقتصادية وذات سيادة كاملة على أراضيها ... ما عندى مانع ... وأهتف "مرحباً بالتشظى" ...

لاكين دولة واحدة ولا تملك قرارها وتنبطح لغيلان العولمة وإمبرياليات العالم الأول ما لازمانى ... فأمشى شوف "بلاك ووترز" بتعمل فى شنو فى الجنوب قبل ما تختار انك داير معاو وحدة ولاّ "تشظى" ...

واحدة من إشكالياتنا الأساسية انو الحكومات قاعدة تعبّر عن مركزية ثقافية بدلاً من التعددية التى يمثلها الهامش ... ولكن هذه المركزية هى اقتصادية فى الأصل وتحمى مصالح استعمارية وهذه هى المشكلة ... انا مستعد لمعاناة مشكلة داخلية بين المركز والهامش طالما "زيتنا فى بيتنا" ... لاكين يجوك متمردى الهامش بى مشروع إعادة توطين المركز فى الريف ليخدم نفس المصالح الإستعمارية دى كتيرة ... ديل لغاية ما يصحو ويعرفوا إنو مصدر مشاكل الهامش من الأول هو نفس حليفهم بائع الأحلام الوردية ... نكون فى خبر كان ...








... المهم ...

سلامات يا تبارك
طيب هو كل ما اتفرتكت كل ما سهل وقوعك في شبكة صيد ناس بلاك واتر!!.
ياخي أرفع راسك بس وعاين لي دويلات الخليج دي!!!
إذاً سياسي المركز دا، بحكم إنو توفرت ليهو فرص تعليم ومعرفة واتصال بالعالم أكتر من سياسي الهامش، المفروض يكون أكتر وعي وأكتر حرص على تجنب السياسات البتقود للمخاطر دي. لكن بتاعين "هنا أم درمان" ديل يخلوا كل الخيارات العندهم ويمسكوا بس في خيار (أسدر نفسك وأوركني وأجنح الماحي) ويجوا يجرموا الماحي المسكين، أبو سنقل اوبشن داك، بأنو مدعوم من إسرائيل!!
يقال إنو جون قرنق مرة سألوه عن دعم إسرائيل للحركة الشعبية، قال: "عندنا في الجنوب لو نمت من غير ناموسية ما تجي الصباح تقول الناموس عضاني"!
إنت زول المركز الشفت وتفتيحة وناقش أمور مرافعين الإمبريالية دا، وكت مسرح غنمك وتشخر، راجي المرفعين يقريهم السلام ويمشي!!!
بلاي!!

Quote: انا مستعد لمعاناة مشكلة داخلية بين المركز والهامش طالما "زيتنا فى بيتنا" ...

دا إنت ود المركز، محل عيش الفينو وموية كريستال والمكيفات،
لكن لو كنت عايش في واحد من معسكرات الإيواء، محل الموية بالصف والقطرة، كان بتستجير من الرمضاء بالنار ولا على كيفك!