Post: #1 Title: كباية شاي تربــــــــالي Author: عمران حسن صالح Date: 08-22-2010, 08:49 PM Parent: #0
يرحمكـ الله جدي على ود أرباب ، زولاً كلس لامن فاتكـ يا دنيا الغرور مات والضهر انحنى وصل قصاد ( ركبيهو) متعة الدنيا عندو كانت " قدح " الفطير باللبن ساعة لمة العشاء قمح طااااازج ساهم بى منجلو فيهو رغم " الضهر المال " يطمس إيدينو جووووووه القدح تقول يقدو إن بقى في ضيوف ( حينا كان للصيف إجازات ) بيقوموا يزيدو الحاجات في الصينية البيض والفول والشعيرية جنو وجن يختو حاجات زي دي في صينية العشاء بسميها اللغاويس وبتقصر العُمر الأكل يا قراصة بالدمعة أو الويكي يا فطير باللبن كنت أراقب طريقته وهو يأكل وهو يغسل يديه بعد الأكل طبعاً لو حصل نادى وقال تعال يا ولد القيامة اليوم داكـ تقوم مفروض تتحركـ بمجرد أن تحس بيهو شبع حتى ولو كانت اللقمة خانقاكـ القاعد ليها شنو وجدكـ شبع عايز يغسل إيديهو ؟ أها البرنامج ده كلو كوم وكباية الشاي كوم تاني طريقة الطاقية فوق الراس والرجل مخلوفة فوق التانية وتسمع تشووووووط تشوووووووووووط صوت " شفطة جقمة " الشاي من الكباية " عثمان حسين " شاي أسوووود وملآن سُكَر يخت الكباية ودخانه يلوي وهاهاهاهاهاهاها يفكها يا ديكـ الضحكة إنبساطة ساااااااااي سبحان مغير الحال باقي لي لو شرب ليهو كباية شاي في حديقة الزول المرطِب ده كان لى حسي بيكون قاعد يشفط في الشاي ويضحكـ " إلا لون ضحكتو ما بعرفو إلا أشوفه " ____________________ حليلكم جدودي ، لامن فتو للآخرة ما فتو الفطير باللبن وكباية الشاي الحارة شرطاً تكون عثمان حسين إن شاء الله تعوضو في الجنة الزيكم ده مااااااابشوف ليهو نار إن شاء الله ________ بريدكـ ياجدي ياخي وبسال ليكـ رحمة ربي في شهر الرحمة
Post: #2 Title: Re: كباية شاي تربــــــــالي Author: عمران حسن صالح Date: 08-22-2010, 09:10 PM Parent: #1
حكي مقنن يا عمران رحم الله جدك وجعل مثواه الجنة ببركة الشهر الفضيل
الشوايقة والشاي حكاوي جميلة
قبل سنة كدة سافرت الجنوب مع مهندس فاضل من عنديكم يحب الشاي عنده ما فيه هظار..وعلي اساس نرجع مساء نفس اليوم طلعنا دغشا بدري ... صلينا في مسجد في الجبل الصبح واتوكلنا...المهندس لقيته متجرس جدا،وصلنا القطينة قال للسواق اقيف هنا قلت ليه ليه..قال نشرب الشاي ونمش...قلت ليه هندسة الناس دي ما مرقت خلينا نكسب الزمن الواطة لامن تصبح شوية كدة زي تمنية بنكون في كوستي قال لي انت مجنون؟؟نزلني هنا وامش المهم انتظرنا اعتقد قريب ساعة ظهرت اول ست شاي...هندسة ده قام خت الكانون وبدا يهبب هو،وانا مستغرب وانا اضحك المهم تمت الامور بسلام وانا اديتها نص قهوة ومشينا..قال تعرف انا كنت خايف يحصل عارض وتكون ناسية حاجة أتاري اول حاجة عملها عمل جرد سريع في عدة ست الشاي خاف تكون ناسية السكر ولا اللبن ولا الشاي قال
Post: #4 Title: Re: كباية شاي تربــــــــالي Author: عمران حسن صالح Date: 08-22-2010, 09:52 PM Parent: #3
Quote: الشوايقة والشاي حكاوي جميلة
قمر بوبا يا حبيب المزعلني انو ناسنا ديل نكهة الشاي عندهم معروفة ، وبالإسم ، كان اتغيرت أو اتغير نوع الشاي العنكبة والاحتجاج يحصل حسي شوف حديقة الزول البيجقم في الشاي فوق ده ياخي دي طعم الموية الحارة فيهو " بينضاق " شاي سؤالي يا ربي جدي كانت الدعاية بتقنعوا ولا الطعم المتعود عليهو ؟؟؟
Post: #5 Title: Re: كباية شاي تربــــــــالي Author: عمران حسن صالح Date: 08-23-2010, 00:23 AM Parent: #4
زمان أقصى أماني دعايات حاجات البلد تصل الشفع يقوموا يرددوها في الشارع وهم بيلعبو بتذكر دعاية وصلت الناس الكبار حتى طلعت فيها نكتة أذكر انها بتاعة لبان " لبان لو تنفخو طق بيطق ، سندباد ، سندباد " تكلفة الحاجات دي كان قليلة مقارنةً بالمكان والزمان والقوى الشرائية والناس البشتروا وكانت تجارة ناسه معروفين ومحدودين السلطان لامن يكون مرطب وماسكـ تجارة البلد بواسطة الموالين والهتيفة والباقين بيكونوا بس متابعين دعاياتم ومنتجاتم صدقوني تاني إلا الكريم حسي تكلفة دعاية الشاي الفوق دي وشكل البيت المصورين فيهو ده حق ناس تاني بيمشوا بالساهل أحلموا فالأحلام خيال مثير للنفس ( والشفقة )
Post: #7 Title: Re: كباية شاي تربــــــــالي Author: عمران حسن صالح Date: 08-23-2010, 10:24 AM Parent: #6
_______ الصورة ملطوشة من بوست السفسفة حق أميرة الشيخ الهي لاطشاهو من فيس بوكـ الأكلات السودانية
Post: #8 Title: Re: كباية شاي تربــــــــالي Author: osman righeem Date: 08-23-2010, 10:37 AM
يا عمران
سلام و شوق
ما عارف شاي الترابلة ده انت جربتو واللا لا
لكن اهم حاجة فيهو يكون ناره نار كروق و عويش و اشميق
لانه العسكاره بتاعت لهب الخليط ده بتدي الشاي نكهة مبالغة
عجيبة ... و طبعا موية بحر مش موية بير
لكن و الله ان بكتب في المداخلة دي جاني طعمو بالسكر التقيل
في خشمي ( يكون علي كفارة )
تجيب الشاي تختو السمحه جنبي تقولي اكب اقولها اي كبي تقولي طبق اقولها لا تحسبي بريد شاياتقعدي انتي و تكبي وبريد شايا تغسل ايديك كبابي
بالله سلك لي مامان يكملها ليك
Post: #9 Title: Re: كباية شاي تربــــــــالي Author: عمران حسن صالح Date: 08-23-2010, 03:12 PM Parent: #8
Quote: ما عارف شاي الترابلة ده انت جربتو واللا لا لكن اهم حاجة فيهو يكون ناره نار كروق و عويش و اشميق لانه العسكاره بتاعت لهب الخليط ده بتدي الشاي نكهة مبالغة
يا قريبي ما للدرجات دي كمان نحن ارتباطنا ارتباط طين ونخيل بس الإستقرار بعيد هو الما خلانا ناخد النكهات على أصوله . تسلم يا عمكـ
Post: #10 Title: Re: كباية شاي تربــــــــالي Author: عمران حسن صالح Date: 08-23-2010, 03:15 PM Parent: #8
. راجعين
Post: #11 Title: Re: كباية شاي تربــــــــالي Author: عمران حسن صالح Date: 08-23-2010, 10:25 PM Parent: #10
فلسفتنا في طعم الحاجات مستمر ومنها الشاي العجيب ده شاي المناسبات دايماً ليهو محل مختلف في روح الزول البنات البسوهو دايماً أحلى بنات الحلة شاي البيت دايماً عندو أخت مختلفة في سواته ليهو ومهما اجتهدوا التانين فالطعم المميز تظل صاحبته واحدة وسرها في بير لن تعطيه لأخرى الغربة دايماً الطعم فيها رايح رايح حتى على مستوى الشاي الحب
Post: #12 Title: Re: كباية شاي تربــــــــالي Author: عمران حسن صالح Date: 08-24-2010, 02:26 AM Parent: #11
يا عمران سلام تعرف البنجقلي انا والله ما بعرف اكتبا لكن بقدر انطقا البنجقلي علي ما اظن شراب الشاي بالبلح صادفت في اجازة من اجازتي بالقرير انعدام السكر فكان يشرب الشيخ بالبلح ... كان غلطان صلحوني سلام
Post: #17 Title: Re: كباية شاي تربــــــــالي Author: عمران حسن صالح Date: 08-26-2010, 11:21 AM Parent: #16
وبغنوا ليهو يا معتصم كمان : البنجقلي شرابو مُر يا حلات شرابو مع التمر
يا عمران وود الجمام اسمه الجنبقلي ديل شوايقة شنو ديل
تعرف يا قريبي ابوي الله يديه طولة العمر ممكن الاكل يتأخر نص ساعة ما مشكلة لكن الشاي دة لو اتأخر دقيقتين ممكن يطلق زوجاته عدييييييييييل
Post: #22 Title: Re: كباية شاي تربــــــــالي Author: عمران حسن صالح Date: 08-26-2010, 01:30 PM Parent: #18
Quote: ديل شوايقة شنو ديل
يا زول أكان بالريحي ساي كفانا معتصم مشينا ليهو عمكـ قوقل لقيناها بنجقلي اتضح انها " الجن بقلي " ، واضحة يا معتصم
Post: #19 Title: Re: كباية شاي تربــــــــالي Author: ليلي عثمان عبيد Date: 08-26-2010, 11:59 AM Parent: #1
عمران ( ود الزهرة) سلامات والله انا بعد قريت جدي علي ود ارباب حتي وقعت لي من يوم قريت في بوست صديق انك من ابدوم قدر ما نحت راسي ما عرفت ليك جيهة . ياخي نحن بالمناسبة اهل شديد وانا مازلت اتزكر جدك الله يرحمو ونحن شفع لمن نمشي ليهو في الدكان او تجي الاجازة نودي ليهو ورق الكراسات عشان يدينا بدلو طحنية ( قبل تجي اكياس البلاستيك الممحوقه دي) اما حكاية اهلنا الكبار مع الشاي دي حكاية حبوبتي الله يرحمها فطمة بت احمد ود شقاق دي كانت مشهورة بي ريدتها لي الشاي وكتيير انا كنت بشوفها رابطها راسها من وجع الراس وتقول عيونها طششن ( دا لو بس الشاي اتاخر) ما بعرفو كان بقي مافي كانت تسوي شنو. كبابي عثمان حسين وكبابي البنور وراس السكر وشاي التلقيمة كلها اسماء نحتت في ذاكرتنا ونحن صغار غايتو نحن ناس ان بقي سادة سوهن تسعة وان بقي بي لبن اسكت كب تقبل تحياتي
Post: #20 Title: Re: كباية شاي تربــــــــالي Author: محمد عمر الفكي Date: 08-26-2010, 12:51 PM Parent: #19
العزيز عمران، لجدك الرحمة ببركات هذا الشهر الفضيل، اما حديث الشاي هذا فكاني اطرش في زفة، لاني ما عندي اي علاقة معاه، لقيتو بشربوا ما لقيتوا مابسال عنه، واذا جيت انت وتمبس مكة فمن هسي ومنعاً للاحراج الداير فيكم شاي يقوم يسويهو بنفسو والبيسالني فيكم من شاي الا اخسره. غايتو جنسكم دا احسن حاجة فيهو القراصة
Post: #23 Title: Re: كباية شاي تربــــــــالي Author: عمران حسن صالح Date: 08-26-2010, 01:37 PM Parent: #19
Quote: عمران ( ود الزهرة)
وصلتي تب يا نادية ، بس كسلا حتى 1986 شالت التاريخ كلو بس الإجازات عوضت والوالدة الله يديها العافية برفقة ابي ببحري شمبات في الوقت الحالي . والحبوبة ست البنات طه ( شقاق) ، شفتي كيفنها الحكاية ؟ الغريبة وانا بقرأ في مداخلتكـ جاتني مكالمة من نصر الدين عباس ( شقاق ) ، مؤكد كوم الشقاقيق كبير
Post: #24 Title: Re: كباية شاي تربــــــــالي Author: ليلي عثمان عبيد Date: 08-26-2010, 01:42 PM Parent: #23
سلام ود اهلي نصر الدين دا في الحسبة عمي لانو ابوهو خال ابوي وزي ما قلت كوم ال شقاق كبير تحياتي للاهل وعلي فكرة انا احسان درستني وبعرف اميمة وكلهم عاطر الود والتحايا
Post: #25 Title: Re: كباية شاي تربــــــــالي Author: عمران حسن صالح Date: 08-26-2010, 01:47 PM Parent: #23
Quote: غايتو جنسكم دا احسن حاجة فيهو القراصة
انت يا قريبي تضحكـ ليهو كمان ؟؟ شايفكـ العربي ده ( راتي ) ليهو شديد بس عشان اتفق معاكـ في بوست افطار ولاد الرياض !! عموماً العربي ده ما يفكها فيكـ ، كدي شوف خلقتو التحت دي يمكن تغير رايكـ
Post: #26 Title: Re: كباية شاي تربــــــــالي Author: محمد عمر الفكي Date: 08-26-2010, 02:45 PM Parent: #25
اما انك صحيح مطرطش، ما قلت لك ما تطلع صوري قبل ما ازرع الصلعة دي؟ هسي امين محمد سليمان باكر يجي يقول دا حقنا
