Post: #1
Title: ذبحة
Author: بابكر عثمان مكي
Date: 08-19-2010, 10:15 AM
بعدما غلبك خلاص صوت العويل
سافرت تكوس رزقك بين ثنيات الكفيل
قالك خلاص حارس بديل
وافقت بي وجعة عليل
وخوف الذليل من وطأة الليل الطويل
عشان ناسك هناك عاوزين دليل
سترة غتاهم
هم الطعام والاسبرين
قلم الرصاص والكراس والبنسلين
وقسوة ظروف وعشم الولوف
اصلو الحكومة انت في قاموسا ميت من زمن
واصلو الحكومة بتفرح لما تختم في جوازك شبه ميت واندفن
واصلو الحكومة مابتعرف انك انت سبت ارضك بايرة صي
رميتها بي ارخص تمن
وقبلت بي حارس بديل .
شلت ليلك تحوم بين المخازن والتخوم
بين المكائن والمكاتب والنجوم
والليل طويل ...
حتي لوجاك الصباح متجافي نوم
ومرت سنين مابين حنينك والحنين
مليون عشم مليوان حوالة ومليون انين
دفعت دم قلبك سهر
واتراكم الهم ياسمح علي قلبك رمح
وفجأة في سكون الليل
في سجدة صلاتك
طعنة من خلف الظهر
جوة القلب مابين لهاتك
وجوة ذاتك ..
وصرخت آه وعرفت في لحظة مماتك
طعم الحياة ..
ذبحة كانت يا اصيل
اتجلط الشريان عديل
واتستف الدم بالحزن
واتراكم المجري الانيق
واتقفل القلب البسيط
باحلام كسيحة ومرهقة
والليل طويل .
وبعد موتك بي قليل
جابو غير حارس بديل .
|
Post: #2
Title: Re: ذبحة
Author: محمد البشرى الخضر
Date: 08-19-2010, 11:13 AM
Parent: #1
Quote: وصرخت آه وعرفت في لحظة مماتك
طعم الحياة .. |
لاحول ولا قوة إلا بالله
|
Post: #3
Title: Re: ذبحة
Author: أحمد ابن عوف
Date: 08-19-2010, 11:24 AM
Parent: #2
سلام يا زيكو
رمضان كريم يا حبيب
|
Post: #4
Title: Re: ذبحة
Author: بابكر عثمان مكي
Date: 08-19-2010, 11:51 AM
Parent: #2
رمضان كريم اخوي محمد البشري
صدقت
|
Post: #5
Title: Re: ذبحة
Author: بابكر عثمان مكي
Date: 08-19-2010, 11:53 AM
Parent: #4
ابنعوف ياحبيب
رمضان كريم
تصوم وتفط علي خير
آسف للقصيدة المؤلمة
لكن عمنا حارس سوداني معانا في الشركة لحقناه في آخر لحظة
وجاءت هذه الكلمات تاسي علي حالنا جميعا
ربنا يديهو الصحة والعافية
|
|