لن أثق في روايات السر قدور بعد الأن ..

Post: #1
Title: لن أثق في روايات السر قدور بعد الأن ..
Author: عمر الفاروق
Date: 08-18-2010, 02:52 PM
Parent: #0

الجميع كان يقنع نفسه أن سر تميز برنامج أغاني وأغاني أنه ليس مجرد غناء وإلا لكان مثله مثل اغنيات من البرامج أو فترة المنوعات أو ما يطلبه المشاهدون ..كان (الحنك العاضي) و(البيش) أن ما يميز البرنامج هو التوثيق الذي يقوم به( الموسوعة ) السر قدور والحكاوي التي يحكيها ولا يعلمها الكثير..
هكذا يقول الناس !!!!!
لكن بالأمس فقط تأكد أن السر قدور زول ونسة ساي غير متأكد من معلوماته مما جعلني أشكك في كثييير من الروايات التي حكاها على طيلة سناوت هذا البرنامج ..
السر قدور وبكل بساطة في حلقة الأمس وبأعلى حسه وكوراكه قال:
يلا يا جمال عايزين نغني عن الجزاير..الجزاير يا جمال..إخترت لينا شنو يا جمااال مصطفى ..يا تو جزيرة يا جمااال.. يلللللللللللللا نمشي نسمع اغنية عن جزيييرة تووووتي ..
واذا بفرفور يغني :
حلييييييييييييل ارض الجزاااير والمراكب والطنابير ..الخ
حتى إنت يا السر قدووووووور؟؟
وشبكتنا كلمات صديقي الراحل سليمان عبد الجليل صديق الصحافة وزميل الشعر ورفيق الدرب و و و ..
حمد الريح عرفناهو تراهو بيلفح ساي لا فارز الساقية وطنية لا فارز الجزيرة ما توتي ولو عذرناهو وقلنا شالا تكريما لي توتي ولصق الاغنية عليها بنمشيها ليهو انت مالك ؟؟
ألم يخبرك صديقك الراحل أن الجزائر المقصودة هي كل جزر حلفا القديمة ؟؟
الم يخبرك الراحل أنه تغنى لمنطقته التي منها اصلاب اجداده وابائه حلفا القديمة؟؟
ومنذ متى كانت توتي عبارة عن جزائر؟؟(توتي فررررردددددد جزيرة وحيييدة )
لا يا قدور هي ليست توتي ..
لا يا السر هي ليست توتي ..
تمعن في كلمات الاغنية وستجد انها لا تمت لتوتي بصلة ..
هذا ليس انقاصاً لتوتي فيكفيها عجبوني الليلة جو ويكفييها ما تغنى به الكاشف..
بعد الان لن اثق في اي معلومة يا السر قدور وكله عندي سيدخل في باب الونسة والقهقهة وتكملة زمن البرنامج وال30 حلقة ثم استلام مبلغ الاربعين مليونا (ده غايتو السنة الفاتت السنة دي ما عارفك اتفقت معاهم بي كم؟ )
للراحل المقيم سليمان عبد الجليل المغفرة ولأسرته التحايا الرمضانية حردلو وحسام ومحمد وغسان والخالة العزيزة الفنجرية (ومااا حرااام يا الفنجري لا سلام منك ولا منك تحية ..)

Post: #2
Title: Re: لن أثق في روايات السر قدور بعد الأن ..
Author: على ميرغني
Date: 08-18-2010, 03:01 PM
Parent: #1

مشكلتنا نحن السودانيي بنصنع اصنام ونقعد نطوف حولها .... من السياسة لكرة القدم للفن وكل شئ
قبل يومين ايضاً سمعت السر قدور يتكلم عن كلمة (المنازل) وقال ان المقصود بيها جمع منزل وطوالي زاد الموضوع بانو بعد داك بتبقى ديار وضرب مثل بدارفور ودار مساليت وهكذا.. في حين انو المعني المقصود بالمنازل في غنية الحقيبة المقصودة كانت تعني المنازل (جمع منزلة) وهي خاصة بفصول السنة يعني زي منزلة الطرفة البكاية والجبهة وهكذا...

Post: #4
Title: Re: لن أثق في روايات السر قدور بعد الأن ..
Author: cantona_1
Date: 08-18-2010, 03:14 PM
Parent: #2

يا عمي علي سلامات... إنت ما سمعت بالمثل البقول: (الطشاش في بلد العمي شوف؟) والبلقى الهبوب بضرِّي. السر قدور لقى الهبوب وقاعد يضري. مافي زول بقول ليهو كلامك غلط. جايب معاه العيال الصغار ديل وهاك يا حكي.. هو الحكي عليهو جمارك؟
كتب أحد الكتاب المحترمين (جدّا) عن الزابط الأشهر عبد الرحمن شامبي نواي (حركة حسن حسين). ذكر الرجل حكاوي عن الشهيد شامبي. إدعى معرفته به وصداقته وكان في حلتهم الفلانية بام درمان وهكذا .. كتبت له معلقاً أنه يتحدث عن شامبي آخر. فشامبي المشارك في حركة حسن حسين ليس من سكان أم درمان. هو من أبناء أم برامبيطة. درس معنا المرحلة الوسطى في أبو جبيهة الوسطى. تخرًج في خور طقت الثانوية. حصل على الدرجة الأولى في امتحان الشهادة السودانية. رفض دخول الجامعة وذهب إلى الكلية الحربية. كان يقول أود أن أصبح زابط مظلات لأقلب الحكومة. وبالفعل أصبح زابطاً مميزاً بالمظلات وشارك في حركة حسن حسين. رحمه الله. أوردت هذه القصة لأقول لك أن من لا يجد من يوقفه عند حده يسرح ويمرح على كيفو. تحياتي
كبـّـاشي الصـّـافي

(العوج راي والعديل راي)

Post: #3
Title: Re: لن أثق في روايات السر قدور بعد الأن ..
Author: طارق الأمين
Date: 08-18-2010, 03:06 PM
Parent: #1

سلامات يا اخونا

ورمضان كريم

العديل راي وعمر الفاروغ راي

Post: #5
Title: Re: لن أثق في روايات السر قدور بعد الأن ..
Author: طلحة عبدالله
Date: 08-18-2010, 03:19 PM
Parent: #3

عمر اللايوق
طالما قدور قال الجزاير معناتو كلامو صاح إن شاء الله يكون قاصد قصب السكر الواحد دا..
يعني عايزنا نكذب السر قدرو ونصدقك إتا ..؟
قوم كدا واللا كدا .

Post: #6
Title: Re: لن أثق في روايات السر قدور بعد الأن ..
Author: عمر الفاروق
Date: 08-18-2010, 08:19 PM
Parent: #5

الأخ علي:
نفس الغلطة واقع فيها عمر الجزلي..بيجيب زول يخليهو يحكي العايزو لا رقيب لا حسيب ويجي يقول ليك برنامج توثيقي يحكي تاريخ السودان السياسي والفني و و و و و ..

Post: #7
Title: Re: لن أثق في روايات السر قدور بعد الأن ..
Author: عمر الفاروق
Date: 08-18-2010, 09:40 PM
Parent: #6

الأخ كانتونا شكراً للمداخلة ومبدئيا كده كلامك عشان لي علي فدحين الا يجي يعقب عليك علي :)

Post: #8
Title: Re: لن أثق في روايات السر قدور بعد الأن ..
Author: عمر الفاروق
Date: 08-18-2010, 09:41 PM
Parent: #7

طارق اللمين ..
ينعاد عليك بي الخير والبركة ..
اما أنت فالرأي الأخر ..

Post: #9
Title: Re: لن أثق في روايات السر قدور بعد الأن ..
Author: عمر الفاروق
Date: 08-18-2010, 09:42 PM
Parent: #8

الصديق اللدود طلحة :
ياخ رمضان كبيـــــــــــــر..
وليك وحشة يا رجل ..

Post: #16
Title: Re: لن أثق في روايات السر قدور بعد الأن ..
Author: Yassir Tayfour
Date: 08-18-2010, 10:25 PM
Parent: #9

عمر يا صاحب أخبارك!
رمضان كريم وتصوم وتفطر على خير!
كلامك سليم ودفوعاتك سليمة ومنطقية.
____
رأيّك شنو في البرنامج برمته؟
أغاني وأغاني بقى لامي وجايِّط

Post: #12
Title: Re: لن أثق في روايات السر قدور بعد الأن ..
Author: طارق الأمين
Date: 08-18-2010, 09:53 PM
Parent: #8

شكرا اخي عمر

العديل راي وعمر الفاروغ راي

Post: #11
Title: Re: لن أثق في روايات السر قدور بعد الأن ..
Author: Isa
Date: 08-18-2010, 09:44 PM
Parent: #6

عـزيزي عمـر، تحياتي،
أتفق معك تماما حول عـدم صحة كثير من روايات السر قدور، بعضها بالنسبة لي مفارق للمنطق كوني لا أستطيع دايماالجزم بصحة المعلومة التأريخية أو عدمها،، بعضها ما صحيح لأنو معلومات عامة مثل ما أشار الأخ علي ميرغني لشرح الأستاذ قدور للمنازل والتي في اعتقادي أنا يقصد بها غالبا منازل النجوم أو الأبراج، أما منازل المطر فهي العـين (مفردها عينة) بكسر العين:
والعجيبة كمان قلبي صار ليك منزل... وإنت فوق للقوس والسماك الأعزل..
من جهة تانية كنت أتوقع منك نقد عام للبرنامج في مجمله، لأنو بالنسبة لي فهو ما عندو أي (قيمة مضافة) لفن الغناء والموسيقى. ونلاحظ إنو عبارة عن قعدة ونسة بتاعة شلة وبغنوا بطريقة بتاعت حركات ساكت واحيانا يشوهون الأغاني العظيمة، بالإٌضافة لضعف أصوات الغالببية منهم خاصة البنات بلا فرز.. باستثناء محمود عبدالعـزيز لكن نلاحظ عـدم انسجامه معهم لأنو ليس من الشلة التي ذكرت.. وفي رأي أن إهتمام الناس بالبرنامج ومتابعته ليس لقيمته الفنية كما أسلفت ولا قيمة المعلومات التي يقدمها صاحبه والتي يقدم شخص مثل عوض بابكر أضعافها في برامجه عن الحقيبة؛ ولكن بسبب تفاهة البرامج التي تقدمها التلفزيونات السودانية بشكل عام.. والله يكون في عون المشاهد المغلوب على أمره.. سلامي..

Post: #10
Title: Re: لن أثق في روايات السر قدور بعد الأن ..
Author: جمال محمود
Date: 08-18-2010, 09:44 PM
Parent: #1

Quote: ألم يخبرك صديقك الراحل أن الجزائر المقصودة هي كل جزر حلفا القديمة ؟؟

يا عمر الفاروق
رمضان كريم

ياخى الظلم على جذرنا وقع علينا من كلى شىء ما فضل الا السر قدور

اه ثم اه اه

Post: #13
Title: Re: لن أثق في روايات السر قدور بعد الأن ..
Author: shaheen shaheen
Date: 08-18-2010, 09:59 PM
Parent: #10

كانتون .. عوافى
رمضانك كريم
Quote: زابط مظلات

Quote: زابطاً مميزاً بالمظلات

زابطاً جداً .. خليك ضابط او ظابط الايقاع اللغوى .. معقول انا الحلفاوى انبهك للغلطة دى ! .

Post: #14
Title: Re: لن أثق في روايات السر قدور بعد الأن ..
Author: فيصل نوبي
Date: 08-18-2010, 10:12 PM
Parent: #13

بوست جميل و رايق ...... لوووووووووووول
قبل يومين برضو ظبط ليهو واحده كده لعمكـ ترباس
قال ترباس إشتهر بسبب الشيخ كشكـ في أوساط الشباب
و حكي ليهو قصة قاطعها من كنكوجو ؛ انا نوبي الذي لا يفقه في الغني السوداني طظ من السلام عليكم جيت كتبت عنها
بدل دي
( إمراءة في الستين من عمرها تقول خذني في حنانكـ خذني ) يختي خدكـ ربنا
و ذلكـ التبرباس الا تربس الله رأسه يقول (البعبدها) أتعبد غير الله يا (جاهل)
حكي ليهو قصة
طلع فيها ترباس بطل
لووووووووووووووول

_
طارق اللمين ده بيكتح مالو؟

Post: #15
Title: Re: لن أثق في روايات السر قدور بعد الأن ..
Author: abubakr
Date: 08-18-2010, 10:21 PM
Parent: #1

رمضان كريم

Quote: للراحل المقيم سليمان عبد الجليل المغفرة ولأسرته التحايا الرمضانية حردلو وحسام ومحمد وغسان والخالة العزيزة الفنجرية (ومااا حرااام يا الفنجري لا سلام منك ولا منك تحية ..)

شكرا عمر لوضع النقاط علي الحروف . فقد تابعت جزء من برنامج الامس رغم انني امتنعت عن متابعة البرنامج هذا العام لاسباب ذكرتها في موضوع خاص قبل وبعد رمضان.. اصابتني عشوائية وسبهللية طرح اغاني قريبي الراحل سليمان امس بكثير من ضيق ...فسليمان لم يغني لتوتي وانمالجزر لنا غرقت ...واقحام امر "المحس" امس في موسيقي لا اظن ان لها علاقة كبيرة بالغناء النوبي وانما هو طرح عشوائي اخر ....

مودتي

Post: #17
Title: Re: لن أثق في روايات السر قدور بعد الأن ..
Author: حامد محمد حامد
Date: 08-18-2010, 10:42 PM
Parent: #15

ضبط متلبسا

Post: #18
Title: Re: لن أثق في روايات السر قدور بعد الأن ..
Author: Ali Alhalawi
Date: 08-18-2010, 10:46 PM
Parent: #15

ألفين سلام يا حفيدى و رمضان كريم

يعجبنى أنك دايما Direct to the point

و كما ذكر الأخو ان البرنامج عبارة عن قعدة ونسـة

Post: #19
Title: Re: لن أثق في روايات السر قدور بعد الأن ..
Author: كمال مبارك
Date: 08-19-2010, 10:13 AM
Parent: #18

Quote: ذلكـ التبرباس الا تربس الله رأسه يقول (البعبدها) أتعبد غير الله يا (جاهل)
حكي ليهو قصة
طلع فيها ترباس بطل

فيصل نوبى ،، رمضان كريم

المعلومة دى صحيحة ،، كشك له شريط وانا سمعته بتحدث عن أو علق على كلمة ( البعبدها )

Post: #20
Title: Re: لن أثق في روايات السر قدور بعد الأن ..
Author: أميرة فاروق عبد العال
Date: 08-19-2010, 10:30 AM
Parent: #19

عمر الفاروق..

ياخي كل عام وانت بخير ورمضان كريم..

الباقي هين..

Post: #21
Title: Re: لن أثق في روايات السر قدور بعد الأن ..
Author: فيصل نوبي
Date: 08-19-2010, 10:38 AM
Parent: #20

يا كمال مباركـ
ما تلفح ساي ياخ
القصة دي حكيتها ليكـم هنا لكن السر قدور قال :
الشيخ كشكـ تحدث عن أغنية ترباس ( ( سايق دلالو على ) ) .

Post: #24
Title: Re: لن أثق في روايات السر قدور بعد الأن ..
Author: Hussein Mallasi
Date: 08-19-2010, 10:49 AM
Parent: #21

نسيب تمام .. أدرك حتى تاريخ أغنيات جزائرهم

Post: #23
Title: Re: لن أثق في روايات السر قدور بعد الأن ..
Author: معاذ الهادي
Date: 08-19-2010, 10:47 AM
Parent: #20

Quote: لأنو بالنسبة لي فهو ما عندو أي (قيمة مضافة) لفن الغناء والموسيقى. ونلاحظ إنو عبارة عن قعدة ونسة بتاعة شلة وبغنوا بطريقة بتاعت حركات ساكت واحيانا يشوهون الأغاني العظيمة، ...................والتي يقدم شخص مثل عوض بابكر أضعافها في برامجه عن الحقيبة؛ ..

ملاحظة مهمة من صاحب البوست يشكر عليها

واتفق مع المداخلة اعلاه

Post: #22
Title: Re: لن أثق في روايات السر قدور بعد الأن ..
Author: كمال مبارك
Date: 08-19-2010, 10:44 AM
Parent: #19

Quote: أتفق معك تماما حول عـدم صحة كثير من روايات السر قدور، بعضها بالنسبة لي مفارق للمنطق كوني لا أستطيع دايماالجزم بصحة المعلومة التأريخية أو عدمها،، بعضها ما صحيح لأنو معلومات عامة مثل ما أشار الأخ علي ميرغني لشرح الأستاذ قدور للمنازل والتي في اعتقادي أنا يقصد بها غالبا منازل النجوم أو الأبراج، أما منازل المطر فهي العـين (مفردها عينة) بكسر العين:
والعجيبة كمان قلبي صار ليك منزل... وإنت فوق للقوس والسماك الأعزل..
من جهة تانية كنت أتوقع منك نقد عام للبرنامج في مجمله، لأنو بالنسبة لي فهو ما عندو أي (قيمة مضافة) لفن الغناء والموسيقى. ونلاحظ إنو عبارة عن قعدة ونسة بتاعة شلة وبغنوا بطريقة بتاعت حركات ساكت واحيانا يشوهون الأغاني العظيمة، بالإٌضافة لضعف أصوات الغالببية منهم خاصة البنات بلا فرز.. باستثناء محمود عبدالعـزيز لكن نلاحظ عـدم انسجامه معهم لأنو ليس من الشلة التي ذكرت.. وفي رأي أن إهتمام الناس بالبرنامج ومتابعته ليس لقيمته الفنية كما أسلفت ولا قيمة المعلومات التي يقدمها صاحبه والتي يقدم شخص مثل عوض بابكر أضعافها في برامجه عن الحقيبة؛ ولكن بسبب تفاهة البرامج التي تقدمها التلفزيونات السودانية بشكل عام.. والله يكون في عون المشاهد المغلوب على أمره
.. سلامي..

الاخ / عيسى ،، رمضان كريم

بالرغم من مداخلتك هذه لا تحمل اى نقد علمى أو هادف يمكن ان يستفيد منه الجميع ،،

الا انك صادرت حقوق الجميع وحكمت على البرامج ( بالتفاهه ) ،،، المشاهد أو الجماهير

ليس مغلوب علية بسبب مثل هذه البرامج ،،، المشاهد أو الجماهير مغلوب عليها بسبب الاحكام

التى تطلق على عواهنها دون مراعاة لشعور الاخرين ودون أحترام لمقدمى هذه البرامج حتى وان

أختلفنا معهم حول كيفية تقديم المادة للمشاهد ،،،

تحياتنا للسر قدور والمشاركين معه ،، ولقناة النيل الازرق ،،، ولجميع متابعى برامج أغانى

وأغانى

Post: #25
Title: Re: لن أثق في روايات السر قدور بعد الأن ..
Author: كمال مبارك
Date: 08-19-2010, 10:52 AM
Parent: #22

Quote: الشيخ كشكـ تحدث عن أغنية ترباس ( ( سايق دلالو على ) ) .

لم أسمع ان كشك تحدث عن هذه الاغنية ،، وحتى فى كلماتها لا يوجد ما يمكن أن يتوقف عنده

كشك للحديث عنه من ناحية دينية ،،، هذا والله أعلم

فيصل نوبى ،، معلش أننى ليس بمتابع لكل ما يكتب هنا ،،، ما تزعل ساى طول بالك

Post: #26
Title: Re: لن أثق في روايات السر قدور بعد الأن ..
Author: محمد عبدالرحمن
Date: 08-19-2010, 11:06 AM
Parent: #25

Quote: المغفرة ولأسرته التحايا الرمضانية حردلو وحسام ومحمد وغسان والخالة العزيزة الفنجرية

حييينا ..

جاى متكبكب كدا... خالتى وحسام ومنو ماعارف ...

عالم ج ب ا نا ت...

Post: #27
Title: Re: لن أثق في روايات السر قدور بعد الأن ..
Author: فيصل نوبي
Date: 08-19-2010, 11:23 AM
Parent: #26

Quote: نسيب تمام .. أدرك حتى تاريخ أغنيات جزائرهم

Post: #28
Title: Re: لن أثق في روايات السر قدور بعد الأن ..
Author: Hussein Mallasi
Date: 08-19-2010, 11:23 AM
Parent: #26

Quote:
قال ترباس إشتهر بسبب الشيخ كشكـ في أوساط
الشباب و حكي ليهو قصة قاطعها من كنكوجو

قدور يعلم تمام العلم الأغنية التي تحدث عنها الشيخ كشك؛ و ما ذكره
لأغنية أخرى إلا همبكة و محاولة فاشلة - متكررة - لإستغباء المشاهدين.

Post: #29
Title: Re: لن أثق في روايات السر قدور بعد الأن ..
Author: فيصل نوبي
Date: 08-19-2010, 11:26 AM
Parent: #28

Quote: قدور يعلم تمام العلم الأغنية التي تحدث عنها الشيخ كشك؛ و ما ذكره
لأغنية أخرى إلا همبكة و محاولة فاشلة - متكررة - لإستغباء المشاهدين.
بل هي أقرب لتكون محاولة تطبيل لترباس يا سحس

_
كمال مباركـ
أصحاب الجزائر بالهم طويل للسر قدور فما بالكـ ليكـ إنت !!

Post: #30
Title: Re: لن أثق في روايات السر قدور بعد الأن ..
Author: Hussein Mallasi
Date: 08-19-2010, 11:31 AM
Parent: #29

Quote: بل هي أقرب لتكون محاولة تطبيل لترباس يا سحس

ليس تطبيل .. و لكنه تورط في تطرقه للقصة؛
و لما تنبه أن روايتها غير لائقة حاول التذاكي.

Post: #31
Title: Re: لن أثق في روايات السر قدور بعد الأن ..
Author: khaleel
Date: 08-19-2010, 11:37 AM
Parent: #30

يقول المرحوم الصحفي حسن ساتي

بان السودانيين لا يجمعو علي شخص ابدا مهما كانت مكانته وقال اختار اي شخصية سودانية

قد تجد في هذا الافق او ذاك

من يقول بان دا (..................) مجنون

لا شك ان السر قدور قامة فنية ويكفيه انه كتب

الشوق والريد والحب البان في لمسة ايد

اغنية ارض الجزائر اسمها الحقيقي الرحيل

لم يثبت حتي الان انها كتبت في تهجير اهلنا في حلفا

الا ما ورد في الصحف السودانية ومجلة الاذاعة والتلفزيون في السابق وعليه وارد جدا ان تكون الجزيرة المقصودة هي توتي

يعني استاذ السر ما غلطان وما صاح

Post: #33
Title: Re: لن أثق في روايات السر قدور بعد الأن ..
Author: Hussein Mallasi
Date: 08-19-2010, 11:41 AM
Parent: #31

Quote: اغنية ارض الجزائر اسمها الحقيقي الرحيل
Quote: وارد جدا ان تكون الجزيرة المقصودة هي توتي يعني استاذ السر ما غلطان وما صاح

يكفي أن يكون اسمها الرحيل لتكون روايته خاطئة.

Post: #32
Title: Re: لن أثق في روايات السر قدور بعد الأن ..
Author: حبيب نورة
Date: 08-19-2010, 11:38 AM
Parent: #29

سلامو عليكم

المشكلة إنو تأريخنا و إرثنا أغلبوا شفاهي يا جماعة
حدّاث يحدث حداث علي طريقة رواهُ فلان
هسة السر قدور مافي زول نديدو عشان يجي يغالتو ولا في حاجة موثقة بطريقة علمية
عشان الزول يستند عليها
تحدثت مع صديق حميم مهتم بالغناء والتراث
سأحاول أن أتصل به خلال فترة وجيزة بان حلقات السنة الماضية
شهدت أكثر من سبعة عشر من الاخطاء
فاولات عديل كدة

يعني ممكن أسألوا و يقول لي أمثلة

وهسة يادوبك نحن بنقول يا هادي
بكون في كمية من الغلتات

عشان كدة انا برضو ثقتي أتضعضعت في عمك دة
وبعدين الكُبُر دخل والزهايمر والذي منو
ياخ الكمبيوتر ما كدة

Post: #34
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: khaleel
Date: 08-19-2010, 11:44 AM
Parent: #32

Quote: يكفي أن يكون اسمها الرحيل لتكون روايته خاطئة.

قد يكون رحيل المحبوبة يا ملاسي وليس بالضرورة اهلنا في حلفا

ونعلم ان ترحيل اهالي حلفا كان في اوائل الستينات

كم كان عمر شاعر الاغنية في ذلك الوقت

Post: #35
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: Hussein Mallasi
Date: 08-19-2010, 11:59 AM
Parent: #34

Quote: ونعلم ان ترحيل اهالي حلفا كان في اوائل
الستينات كم كان عمر شاعر الاغنية في ذلك الوقت

ولد الشاعر نحو العام 1939.

Post: #37
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: khaleel
Date: 08-19-2010, 12:06 PM
Parent: #35

Quote: ولد الشاعر نحو العام 1939.

حتي ولو يا ملاسي

هذا لا يعني ان اغنية الرحيل كتبت في اهالي حلفا

والمقطع بتاع يا حليل ناس ليلي ساعة الليل يجن

واذا افترضنا ان الاغنية لناس حلفا

الرحيل شمل الشاعر والمحبوبة ايضا

يعني هو ايضا رحل معها

يعني كلام استاذ قدور ممكن يكون صاح ممكن الجزيرة دي تكون توتي او بدين او جزيرة لبب

يعني صاح وما صاح

Post: #36
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: هاشم نوريت
Date: 08-19-2010, 12:03 PM
Parent: #34

Quote: إمراءة في الستين من عمرها تقول خذني في حنانكـ خذني ) يختي خدكـ ربنا
و ذلكـ التبرباس الا تربس الله رأسه يقول (البعبدها) أتعبد غير الله يا (جاهل)
حكي ليهو قصة
طلع فيها ترباس بطل
لووووووووووووووول

كان زمان انا استمعت لشريط الشيخ كشك يتحدث فيه عن اغنية البعبدا لكمال ترباس وقال فى واحد اسمه "افل" يقصد قفل او ترباس بالسودانى بانه يقول البعبدا وطبعا ماخلى لكمال حاجة الله يرحم الشيخ كشك

Post: #38
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: وليد محمد المبارك
Date: 08-19-2010, 12:09 PM
Parent: #36

Quote: نسيب تمام .. أدرك حتى تاريخ أغنيات جزائرهم

والله ملاسي الاول عديل كده

__________
يا عمر رمضان كريم
المدام سالتني عمر صحبك ما جاي رمضان ده
قلت ليه ليه ؟

قالت لي عشان نغشو تاني ..!!

Post: #44
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: محمد عبدالرحمن
Date: 08-19-2010, 12:22 PM
Parent: #36

ياخليل ..

روايةعمر الفاروق اقرب للصاح ..عموما بافتراض
انها صاح...مااظن دى نهاية الدنيا..عادى ممكن السر
قدور يخطا ...وغيرو يخطا ..المشكلةشنو يعنى ؟
الماعادى انو يفقد المصداقية بمجرد ايراد
معلومة واااحدة خطا ...السر قدور شاهد عيان
على الحراك الفنى لمدة تزيد عن الاربعين عاما..
وصاحب اجمل الاغانى السودانية ..فينبغى فى حقه
كثير من التقدير والاحترام ..ولاينقص من مصداقيته
شيء ان اورد معلومة او اثنين خطا ...

وعمر الفاروق بنقدر انفعالو الاكثر من المعقول دا ...

Post: #39
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:09 PM
Parent: #34

طيفورنا ياسر:
رمضان كريم يا زول يا حلو ..
Quote: رأيّك شنو في البرنامج برمته؟

في برنامج في قناة النيل الأزرق إسمو أغنيات من البرامج بيقدمو ولد جميل إسمو شيبة الحمد في إعتقادي داك برنامج أفيد وأقيم وحتى الاغاني الفيهو بيتم اختيارها بعناية مع العلم إنو داك عبارة عن برنامج لإعادة اغاني تم تقديمها في برامج في النيل الازرق..
قناة النيل الازرق نجحت في نقطة مهمة جداً تحسب ليها اللي هي أنها نجحت في ترسيخ برنامج اغاني واغاني كواحد من سمات رمضان زيييو وزي الفيمتو هنا عند الجماعة السعوديين ديل هنا ..الفيمتو عندهم ارتبط بي رمضان ما اييي شي تاني ..يعني يا ياسر رمضان معناها في فيمتو ولاااازم فيمتو حتى لو ما بتشربو ..
اها ناس النيل الازرقثبتوا الفهم ده للمشاهدين وبقا اي زول في رمضان لازم يشاهد اغاني واغاني بحبو ولا ما بحبو ..
البرنامج أسة عادي جداً بدايتو كانت حلوة ومختلفة لأنو ما كان عادي وما بدا بي الفكر المادي البحت ..
أسة لا يا حبوب بقا عبارة عن قرووووش وطمع وتكوييييش..السنة الفاتت علمت من مصدر موثوق إنو البرنامج بيدخل للقناة فوق ال200 مليون نصيب السر قدور منها 40 مليون وناس فرفور وعصام خمسة مليون لكل واحد اما الشباب الصغار ديل فبيسكتوهم بي المليون على اساس انو احمدو ربكم جبناكم في التلفزيون !!
واضح جداً إنو الاستعداد للبرنامج السنة دي ما كان موجود وكلفتة شديدة فقط الاعتماد على اسماء جماهيرية دون التحضير ودون حتى اختيار الاغاني المناسبة مع كل فنان ..اغنيات كتيرة بتتوقع انو مفروض يدوها لي الفنان الفلاني تتفاجأ بي إنو يلللللا يا عاااصم سمعنا !!!!
اجمل ما في البرنامج ده ويكفيني جداً وجود محمود عبد العزيز حتى ولو كان منزوياً أو مشاتراً او حتى ما حافظ فمحمود نكهة برااااها بالنسبة لي اخوك ..
الجماعة بقوا عبارة عن عرض ازياء لا اكثر ولا أقل ..

Post: #40
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: Hussein Mallasi
Date: 08-19-2010, 12:14 PM
Parent: #39

Quote: علمت من مصدر موثوق إنو البرنامج بيدخل للقناة فوق ال200 مليون
نصيب السر قدور منها 40 مليون وناس فرفور وعصام خمسة مليون لكل واحد اما
الشباب الصغار ديل فبيسكتوهم بي المليون على اساس انو احمدو ربكم جبناكم في التلفزيون !!

يا عمر فتش ليك مصدر تاني.

Post: #41
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:16 PM
Parent: #39

الأخ عيسى :
Quote: وفي رأي أن إهتمام الناس بالبرنامج ومتابعته ليس لقيمته الفنية كما أسلفت ولا قيمة المعلومات التي يقدمها صاحبه والتي يقدم شخص مثل عوض بابكر أضعافها في برامجه عن الحقيبة؛ ولكن بسبب تفاهة البرامج التي تقدمها التلفزيونات السودانية بشكل عام.. والله يكون في عون المشاهد المغلوب على أمره.. سلامي..

لو قريت كلامي فوق بي تمعن ح تلقاني إستخدمت عبارة (حنك بيش وعاضي) وهنا قصدت ليك إنو ده السبب البيغشو بيهو الناس روحهم عشان يتابعو البرنامج لكن وزي ما انت قلت ما هو الا عبارة عن قعدة غنا ليس الا ..
تحياتي

Post: #42
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:19 PM

يا جماعة عن إذنكم خليل خلي ده شوية :
يا صديييقي انت ما شايف ملاسي فوق قال نسابة تمام ؟
وبرضو تقول لي السر قدور وربما ؟؟
نحن جبنا المعلومة من المنبع اوووول شي بعد داك اتشوبرنا .. وفي رواية دي حقايق بيدوك ليها مع الخطوبة وقولة الخير تعرفا اووول شي بعد داك يوافقوا ليك تدخل في زمرة بني حلفا لو كنت سوداني

Post: #43
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:21 PM
Parent: #42

الاخ جمال محمود :
الجاتكم في جزايركم سامحتكم والله يعوض شبابكم صقلية :)

الاخ شاهين شكرا للمرور ..

Post: #45
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:23 PM
Parent: #43

نوبي يا نوبي ويييينو نوبي:
Quote: طارق اللمين ده بيكتح مالو؟

طارق اللمين ده عكس الشياطين زول ملاااك بس عارف لييي؟؟
الشياطين بيربطوها في رمضان هو طلاتو بتككككككتر في رمضان هانت يا حبوب كلها كم يوم وتاني ما تشوفوا الا في الستوت وبعد داك عييييييييييك ..

Post: #48
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:25 PM
Parent: #45

اخونا ابوبكر:
Quote: ...فسليمان لم يغني لتوتي وانمالجزر لنا غرقت ...

وشهد شاااهد من أهله ..
اها يا خليل تاني قول ليجزيرة بدين وجزيرة وسمين ..

Post: #49
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:27 PM
Parent: #48

اووو جدو الحلاوي :
يا سلااااااام ياخ والله ليك وحشة بت ستين ######..
الدنيا واياك يا زول يا طيب..
غايتو نضمي الانجليزي حقك ده كان شكر فكتتتر خيرك وكمان كان شيتن تاااني ف حتلف وتلف وترجع ليك :)

حامد محمد حامد :
Quote: ضبط متلبسا

برئ يااااا بييي

Post: #50
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:29 PM
Parent: #49

الأميرة بنت فاروق الثاني :
Quote: عمر الفاروق..

ياخي كل عام وانت بخير ورمضان كريم..

الباقي هين..

وانتي بالف خير يا زولة ..الدنيا معاك وكل الحاجات في محلها !!!
بالمناسبة الباقي لا هين لا شتين صعععععععععععععب والله :)

Post: #51
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:32 PM
Parent: #50

Quote: نسيب تمام .. أدرك حتى تاريخ أغنيات جزائرهم

بل ذهب لأبعد من ذلك وأصبح يقاتل من أجل الدفاع عنها
اخوك بقا عاااادي يا مان لما يضرب لي بت صديق العجب التلفون بيقول ليها ( يو) ..
قالت لي يا ولدي مالك زهجااااان ؟؟
قلت لها لأ ..
قالت لي طيب مالك في التلفون بتقول يووووووووووو

Post: #47
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: khaleel
Date: 08-19-2010, 12:24 PM
Parent: #43

Quote:
يا جماعة عن إذنكم خليل خلي ده شوية :
يا صديييقي انت ما شايف ملاسي فوق قال نسابة تمام ؟
وبرضو تقول لي السر قدور وربما ؟؟
نحن جبنا المعلومة من المنبع اوووول شي بعد داك اتشوبرنا .. وفي رواية دي حقايق بيدوك ليها مع الخطوبة وقولة الخير تعرفا اووول شي بعد داك يوافقوا ليك تدخل في زمرة بني حلفا لو كنت سوداني

هووووي يا عمر الفاروق

مش ممكن يكون الشاعر له قصة حب فاشلة وعندما زنوقوهو

قال المقصود حلفا

Post: #46
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: وليد محمد المبارك
Date: 08-19-2010, 12:24 PM

Quote: يا عمر فتش ليك مصدر تاني.

حسب ما سمعنا يا عمر ولا حتى الارقام القلتها قريبة من الارقام
يقال انو الفنان بشيل مليون قافل عن الحلقة

حتى انو محمود رفض ياخد نصيبه وقيل انو 10 الف بالجديد 10 مليون بالقديم عشان السر قال انه ما بستاهل اكتر من كده ..غايتو محمود قياسا على الحلقتين الاخيرتين ما بستاهل ربعهم

قيل برضو انو السنة دي ام تي ان كراعي قدمت لوحدها 650 مليون

200 مليون دي بتقدمها الكولا في كورة هلال مريخ واحده
والبرنامج ده نسبة مشاهدته اعلى من الكورة
خاصة من النساء

ذكاء السر قدور في انه قطف من كل بستان زهرة
يعني اي زول بلاقي زوقو في البرنامج وبلقى ليه سبب يخليه يحضرو

لكن كما تفضلت هو كضاب وبقطع من سنامو للمشاهد
الكلام ده اتفتح فيه نقاش السنة الفاتت بنفس التفاصيل هنا في المنبر

Post: #52
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: khaleel
Date: 08-19-2010, 12:33 PM
Parent: #46

Quote: وشهد شاااهد من أهله ..
اها يا خليل تاني قول ليجزيرة بدين وجزيرة وسمين ..

تعرف يا عمر الصباح اتصلت بفيصل نوبي ليوكد لي ان اغنية الرحيل كتبت لاهالي حلفا

وفيصل دلني علي الخال ابوبكر ولكن فشلت بعدم الحصول علي تلفون ابوبكر من اخونا بدر الدين الامير

بعدين نسيبك دا هل كان بغني للجزائر والارض

ام المحبوبة

Post: #53
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: عمر الفاروق
Date: 08-19-2010, 12:39 PM
Parent: #46

الأخوان وليد وسحس:
المعلومة اللي ذكرتها بخصوص البرنامج كانت عن دخل السنة الفاتت وجبتو من جووة القناة ومن زول شغال تبع التسويق..
السنة دي ما عندي عنها فكرة لكن كدي خلوني لمن اجي :)
تخريمة :
الغشة هييينة يا وليد المشكلة المدام تضرب لي تلفون تقول لي أها بكرة ح تجي بي الترحيل تسوق الشفع ؟
بالمناسبة يا ولي المرة دي الا شبط ومعاهو سفنجة شايفكم زدتو واحد ربنا يخليها ليكم

Post: #54
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: قلقو
Date: 08-19-2010, 12:43 PM
Parent: #46

Quote: اجمل ما في البرنامج ده ويكفيني جداً وجود محمود عبد العزيز حتى ولو كان منزوياً أو مشاتراً او حتى ما حافظ فمحمود نكهة برااااها بالنسبة لي اخوك ..
الجماعة بقوا عبارة عن عرض ازياء لا اكثر ولا أقل ..

والله ياأخ عمر لو كنت شاهدت حلقة الأمس الأربعاء 19/08 التى كانت عن الحان العملاق الراحل برعى محمد دفع الله , لما قلت ماقلت فى مدح الأخ محمود عبدالعزيز وذلك بعد ان غنى رائعة ابوداود (من زمن) فقد كان فى حالة يرثى لها وافقد علينا متعة الأغنية .
فليراجع ذلك الشاب اداؤه لأنه فيما يبدو وكما قال على امام المتقين (ماطار طائر وارتفع الا كما طار وقع ) .
مع تحياتى

Post: #58
Title: Re: لن أثق فييكفي أن يكون اسمها الرحيل لتكون روايته خاطئة. روايات السر قدور بعد الأن ..
Author: وليد محمد المبارك
Date: 08-19-2010, 12:48 PM
Parent: #54

Quote: بالمناسبة يا ولي المرة دي الا شبط ومعاهو سفنجة شايفكم زدتو واحد ربنا يخليها ليكم

كل ما تجي سيرتك تقول لي صحبك غتيت
في الونسة قال ما قلتو نوبة
قلت ليه النوبة مالهم .. اتكبكب
بعد كم يوم عاوز اضرب لعمر الفاروق بتاع الترحيل ضربت ليه هو
بعد ما عرفت انو عمر واحد تاني
قال لي : عرفتي النوبة مالهم

وقررررررررررر تقعد تضحك

Post: #55
Title: Re: لن أثق في روايات السر قدور بعد الأن ..
Author: المر
Date: 08-19-2010, 12:46 PM
Parent: #1

Quote: وشبكتنا كلمات صديقي الراحل سليمان عبد الجليل صديق الصحافة وزميل الشعر ورفيق الدرب و و و ..

امكن بداية خرف.....

Post: #56
Title: Re: لن أثق في روايات السر قدور بعد الأن ..
Author: المر
Date: 08-19-2010, 12:46 PM
Parent: #1

Quote: وشبكتنا كلمات صديقي الراحل سليمان عبد الجليل صديق الصحافة وزميل الشعر ورفيق الدرب و و و ..

امكن بداية خرف.....

Post: #57
Title: Re: لن أثق في روايات السر قدور بعد الأن ..
Author: المر
Date: 08-19-2010, 12:46 PM
Parent: #1

Quote: وشبكتنا كلمات صديقي الراحل سليمان عبد الجليل صديق الصحافة وزميل الشعر ورفيق الدرب و و و ..

امكن بداية خرف.....

Post: #59
Title: Re: لن أثق في روايات السر قدور بعد الأن ..
Author: الصادق يحيى عبدالله
Date: 08-19-2010, 01:15 PM
Parent: #57

الاخ/ عمر الفاروق
رمضان كريم
الحكاية اكبر من السر قدور. عندك عبدالله الطيب و جعفر ميرغني
يسردان اشياء سودانية كبيرة و كانهما شاركا فيها و لا يستطيع
احد مراجعتهما اومطالبتهما بدليل عليها. ما اشرتم اليه من عيوب
توثيقية في مجهود السر قدور هي مجرد هوامش بسيطة في كتاب الثقافة
السودانية

Post: #60
Title: Re: لن أثق في روايات السر قدور بعد الأن ..
Author: دينا خالد
Date: 08-19-2010, 07:33 PM
Parent: #59

وووووووووووو ابو النسب !
عارف السر قدور دا وقع فى شر اعماله ..
ودا لى سببين الاول
انو هبش نسابة عمر لسان الدين الجزاير ,,,
التانى انو جاب حمد الريح ..!!!
جننك بقى يطلع بى حمد ويمرق بى ع العزيز !!

اصلو انتو الا يهبشوكم حتى تمرقو الحقيقة؟
الراجل دا من زمان بحكى يقول ليك سنة 39 كنا ما شيين
فى الشارع انا وفلان وفلان وفلان اها وفلان قال لى فلان
وفلان اتلفت ضربو كف اها ناس فلان ديل اقرب واحد فيهم
عشان تسالو بكون مات سنة 25 وبعضهم الاخر مات مرتين !!
اها خليك انت من غلات ياتو جزاير .. الجزاير ذااتها كيف ؟؟
لوووووووووووووب
وليد صاحبى
قول لى المدام انتو جايبينو للغشة مننننن هناك لييه ؟
ما تغشوا قبلو ؟

ـــــــــــــــ
فعللللا قاعد فى السعودية هسه ال 200
بتعمل لى الناس ال فى الاستديو ديل شنو ؟؟
اختار عدد اكبر اضربو فى 3 زيدو قدرو
اطرح منو السر قدور عشان يكفى ..وقسسمو على
ناس البنا وزيد ليه فرفور ... كان عرض
ازياء ما بعرف تانى فى زول بعد رشاد نميرى
يجرؤ !!! كان بت كان ولد! خليهم فى دروشتهم دى
بقترح عليك تفرد بوست لبدلة السر وقميصو
وكرفتتو ومن ثم البنتلون ..

Post: #61
Title: Re: لن أثق في روايات السر قدور بعد الأن ..
Author: عبد المنعم سليمان
Date: 08-19-2010, 07:48 PM
Parent: #60

بل الخطأ هو محاكمة السر قدور ورهطه خارج سياق الونسه السودانية العادية والقطيعه والتي لا تصحح وليس مفروضا
فيها توخي الدقة والمعلومة الصحيحة ..
السر قدور ونُاس كبير وبتاع قعدات وونسات وظرافة غير قابلة للبحث خلفها ..
هذا البرنامج لو تم بثه في غير شهر رمضان لما وجد كل هذه الضجة كما ان قدور يعرف طبيعة السودانيين بعد شراب (المويات) وحيهم
للرواح والتراويح لذا فان هدفه من البرنامج ليس التوثسق بل هو الضحك والاضحاك الممل ..
ثم الا ترون ان ضحكته العبيطة هذه مصطنعة وجزء من عدة الشغل للبرنامج ..

Post: #62
Title: Re: لن أثق في روايات السر قدور بعد الأن ..
Author: حبيب نورة
Date: 08-19-2010, 08:17 PM
Parent: #61

Quote: ليس تطبيل .. و لكنه تورط في تطرقه للقصة؛
و لما تنبه أن روايتها غير لائقة حاول التذاكي.

لا اعتقد إنو تطبيل ياملاسي
الحلقة مسجلة وكان ممكن يتم تدارك الأمر
خصوصاً وحسب علمنا ترباس مدققاتي في الحاجات البتخص برستيجو

Post: #63
Title: Re: لن أثق في روايات السر قدور بعد الأن ..
Author: cantona_1
Date: 08-19-2010, 08:22 PM
Parent: #59

Quote: الحكاية اكبر من السر قدور. عندك عبدالله الطيب و جعفر ميرغني
يسردان اشياء سودانية كبيرة و كانهما شاركا فيها و لا يستطيع احد مراجعتهما اومطالبتهما بدليل عليها

يا أستاذ الصادق يحي سلامات.. يازول مجال المقارنة مفقود.. البلم الدوم على التفاح شنو؟ السر قدور بتونس والجماعة ديك بقدموا علم. مش الفرق واضح؟ تحياتي.
كبـّـاشي الصـّـافي

(العوج راي والعديل راي)

Post: #64
Title: Re: لن أثق في روايات السر قدور بعد الأن ..
Author: Isa
Date: 08-20-2010, 08:38 AM
Parent: #63

Quote: الاخ / عيسى ،، رمضان كريم
بالرغم من مداخلتك هذه لا تحمل اى نقد علمى أو هادف يمكن ان يستفيد منه الجميع ،،
الا انك صادرت حقوق الجميع وحكمت على البرامج ( بالتفاهه ) ،،، المشاهد أو الجماهير
ليس مغلوب علية بسبب مثل هذه البرامج ،،، المشاهد أو الجماهير مغلوب عليها بسبب الاحكام
التى تطلق على عواهنها دون مراعاة لشعور الاخرين ودون أحترام لمقدمى هذه البرامج حتى وان
أختلفنا معهم حول كيفية تقديم المادة للمشاهد ،،،
تحياتنا للسر قدور والمشاركين معه ،، ولقناة النيل الازرق ،،، ولجميع متابعى برامج أغانى
وأغانى

سـلام يا كمال وتقبل الله منا ومنكم الصيام والطاعات.. ياخي في البداية أنا ما طرحت نفسي كناقد علمي وهادف ومفيد للجميع، أنا فقط قلت وجهة نظري كمشاهد عادي ومغلوب على أمره! وبرضو لم أطلب من الفاروق أن ينقد البرنامج بشكل علمي وهادف لكن قلت ليهو عايز أعرف (رايك) شنو.. وبالمناسبة دا رأي منذ أن كان عندنا تلفزيون أم درمان بس، يعني قبل ثورة الإتصالات والتكنولوجيا والدش، وأظنك تذكر كيف كان الناس ينتظرون بفارغ الصبر ويتحلقون حول التلفزيون لمتابعة المسلسل المصري (وأغلبها برضو مسلسلات تـافهة- تاني - ) لدرجة الحرامي ممكن (يرّحل) البيت دون أن يشعر به أحد.. تفتكر ليه مافي برنامج تاني يحظي بأدنى إهتمام مع قليل إستثناء؟ وما بالك الآن مع وجود مئات القنوات الأخرى؟.. وبما إنو أنت المشاهد الغالب على أمره ولو كره ملقوا القول على عواهنه المنفوشة من أمثالي شايف إنو التلفزيونات السودانية فيها برامج سمحة وهادفة وفيها مجهود،، يبقى بخيتة وسعيدة عليك.. والتفاهة عندي تعني قلة القيمة - أيا كانت - يعني علاوة على ضعف المادة المقدمة نفسها اول ما ألاحظه على تلفزيوناتنا خاصة القناة العامة أو ما يعرف بالتلفزيون القومي هو سوء الإضاءة والديكور والصوت والتصوير وكل شي.. كدة أعمل ليك إستطلاع بسيط (يعني ما بالضرورة يكون علمي وهادف) وشوف عدد الناس كم البتابعو برامج أخرى في التلفزيونات السودانية باستثناء برامج الأغاني، والبقول ليك ما بتابع برامج تانية أسالو ليه، عندها ربما توافقني في أن المشاهد (الغالب والمغلوب) لا يرى فايدة كبيرة للبرامج تستحق عناء حضورها..

Post: #65
Title: Re: لن أثق في روايات السر قدور بعد الأن ..
Author: الصادق يحيى عبدالله
Date: 08-20-2010, 01:38 PM
Parent: #64

الاخ/ كباشي الصافي

Quote: بتونس والجماعة ديك بقدموا علم

كلهم بتونسوا طالما الامر لا يخضع للتوثيق.