Post: #1 Title: ما المغزى من منع الشيشة في الخرطوم Author: حاتم كاهن Date: 08-18-2010, 02:27 AM
كنا جلوساً في إحدى مقاهي الخرطوم هذا المساء ، فإذا بفرقة يقودها ملازم شرطة وتتكون من حوالي العشرة أفراد شرطة تداهم المكان باحثة عن (شيش) جمع شيشة .. وحيث أنه لم يكن هناك من يتعاطى الشيشة في ذلك المكان (عملاً بالمنشور الصادر مؤخراً من الولاية ) إلا أن الفرقة واصلت البحث حتى في مخزن المقهى وقاموا بجمع كل الشيش مع ملحقاتها وقاموا بإصطحاب صاحب المقهى إلى مقر شرطة النظام العام والذي خرج بضامن فيما بعد على أن يأت غداً صباحاً لإتمام الإجراءات والتي غالباً ما ستكون غرامة ما ..
المداهمة في حد ذاتها حدثت بشكل فيه من الإثارة ما فيه( بعضهم كان يحمل المدافع الرشاشة) ومن الرعونة في معاملة العمال في ذلك المحل بل وحتى صاحب المحل والذي تم إقتياده بشكل فيه من الإهانة ما فيه
هذا ما حدث
والآن إلى بعض التساؤلات ..
Post: #2 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:42 AM Parent: #1
ما المغزى من وراء منع الشيشه في مقاهي الخرطوم ؟ ماذا ستكون البدائل لمن يرغبون في تعاطي الشيشة بدلاً عن الاماكن العامة ؟ هل القرار (حكومي الصنع) أم تم بإيعازمن بعض التيارات المتشدده في السودان كما يقال في المجالس؟ كيف يستقيم أن تمنع الشيشة في نفس الآن الذي يصرح فيه لمصنع وطني لتصنيع المعسلات ؟ هل إذا في الأمر حرمة مثلاً لما لا يمنع تصنيع وإستيراد السجائر أيضاً أو إغلاق محلات التمباك ؟ ما هي المادة القانونية التي تحت طائلها إقتيد صاحب المحل إلى مركز الشرطة ؟ هل تمثل الشيشه أولوية لدى حكومة الولاية مقارنة بأمور أخرى لها من الأهمية ما لها ودونكم مياه الشرب الغير نقية مثلاً ؟ لما لا ينظر إلى القرار على أنه (محرض) لمزيد من الكراهية لدي الأوساط التى ترتاد المقاهي وهي كثر؟ هل يمثل القرار عودة للمربع الأول ؟ أم أن المربع الأول لم تبارحه قدم الحكومة قط ؟
Post: #3 Title: Re: ما المغزى من منع الشيشة في الخرطوم Author: قلقو Date: 08-18-2010, 08:14 AM Parent: #2
الأخ حاتم..
Quote: ما المغزى من وراء منع الشيشه في مقاهي الخرطوم ؟
كلما تم تضييق الخناق عليهم من الخارج (محكمة الجنايات) مثلا , يقومون هم بتضييق الخناق على الشعب , مثلهم مثل الأفندى الذى يقوم رئيسه المباشر بأذلاله واضطهاده يقوم هو بعمل نفس الشيئ على اهل بيته المساكين .
Quote: ماذا ستكون البدائل لمن يرغبون في تعاطي الشيشة بدلاً عن الاماكن العامة ؟
البدائل هى البنقو والهيروين والعرقى (فى اماكن غير عامة).
Quote: هل القرار (حكومي الصنع) أم تم بإيعازمن بعض التيارات المتشدده في السودان كما يقال في المجالس؟
القرار غير حكومى بل هو قرار المتربع على كرسى رئآسة مؤسسة (شئون التقديس) بالسودان المدعو عبدالحى يوسف وذلك عندما افتتح عمر البشير (مسجد الضرار الأستثمارى) الذى (يملكه) الأول .
Quote: كيف يستقيم أن تمنع الشيشة في نفس الآن الذي يصرح فيه لمصنع وطني لتصنيع المعسلات ؟
نعم يستقيم. فالمعسل سلعة صادر استراتيجية .
Quote: هل إذا في الأمر حرمة مثلاً لما لا يمنع تصنيع وإستيراد السجائر أيضاً أو إغلاق محلات التمباك ؟
خلينا فى الشيشة وماليك دعوة (بالتمباك )
Quote: ما هي المادة القانونية التي تحت طائلها إقتيد صاحب المحل إلى مركز الشرطة
؟ قانون يعنى شنو ياحاتم؟ فقد طال بى الزمان الذى سمعت فيه آخر مرة هذه الكلمة التى صارت مثل الغول والعنقاء والخل الوفى .
Quote: هل تمثل الشيشه أولوية لدى حكومة الولاية مقارنة بأمور أخرى لها من الأهمية ما لها ودونكم مياه الشرب الغير نقية مثلاً ؟
نعم تمثل لها اولوية قصوى زائدا امن السلطة . بل اولوية اكثر من مياه الشرب والتعليم والعلاج . وكان عجبكم.
Quote: لما لا ينظر إلى القرار على أنه (محرض) لمزيد من الكراهية لدي الأوساط التى ترتاد المقاهي وهي كثر؟
فليكن محرض . فالسلطة لايهمها رأى احد طالما ان هذا الأحد (لايملك دبابة) والماعاجبو دونه البحر الأحمر فليشرب منه بعد الأغتسال بناءا على توجيهات الريس .
Quote: هل يمثل القرار عودة للمربع الأول ؟ أم أن المربع الأول لم تبارحه قدم الحكومة قط ؟
نعم. فالسلطة لم تغادر المربع الأول قيد أنملة او قيد نملة كما يقول صديقنا( قعر بابور), اصلو ادروب ولوف ياحاتم . مع تحياتى متمنيا لك (خرمة تقول ياليل)
Post: #14 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:14 PM Parent: #3
يا قلقو .. ياخي طيب دي مش أجوبة تخوف وتحزن كمان ؟
Quote: القرار غير حكومى بل هو قرار المتربع على كرسى رئآسة مؤسسة (شئون التقديس) بالسودان المدعو عبدالحى يوسف وذلك عندما افتتح عمر البشير (مسجد الضرار الأستثمارى) الذى (يملكه) الأول .
طيب دي مشكله .. المد العاطفي المتجدد في العلاقة البين الحكومة وناس عبدالحي يوسف دي مش قصه تخلي الواحد يقلق ؟ والقلق ما مبعثوا الشيشه بس ( لانو خرمتنا خلي رمضان ده يخلص بنعرف وين نحلها) والمشكله مافي التمباك (ما تشيل هم) القصه في الصومال الجاي عدييل بالدرب ده وجاي بي سكة ناس عبدالحي ديل زاتهم ..
الله يستر
شكراً يا قلقو على المرور
Post: #4 Title: Re: ما المغزى من منع الشيشة في الخرطوم Author: محمد عمر جبريل Date: 08-18-2010, 08:44 AM Parent: #2
سلامات يا حاتم دائما بتخيل في زول في مكان ما .. هناااك خلف الكواليس .. يظهر حبه لحكومة البشير ويضمر في صدره غير ذلك هذا (الزول) يوعز للرئيس ولصناع القرار بمثل هذه الأفكار التي تزيد من كراهية الحكومة .. وتجعل الغالبية العظمى تكرهها .. أقول ليك حاجة .. خلي الشيشة وما فيها وما عليها من إحتمال الإصابة بمرض أو أي آثار ضارة مترتبة عليها أول أمس القريبة دي .. في شارع النيل .. حيث لا شيشة ولا يحزنون .. شارع النيل البقى المتنفس الوحيد لإستنشاق بعض الهواء النقي لكل الشباب في الخرطوم .. اول امس جات كشة تتكون من تلاتة دفارات وزي 30 عسكري لابسين رسمي و50 لا بسين ملكي أها الجماعة اللابسين ملكي ديل ماشين قدااام .. قايدين الركب .. نظام كشافة وكدة .. عشان النسوان المساكين والأدروبات ديل ما يمشوا يدسوا كراسيهم ورا شدر العشر .. .. والله يا حاتم هؤلاء الهمج إتعاملوا مع النسوان بأبشع صور الفظاظة والجلف والرعونة تكسير للكبابي وآنية تحضير الشاي بكل قسوة وتجرد من الإنسانية وأبسط صور الرحمة .. كان منظر مؤسف بشكل ما تتخيلو .. ونحن طبعا !! أنسى بس بي أضان نسمع في نحيب النسوان المساكين ديل .. وبالتانية نسمع صوت تكسير الكبابي الله عليك يا وطن اجزم بأن شارع النيل اليوم داك كان فيهو أكثر من ألف شاب او يفوقون .. لو كان قمنا على مجموعة الصعاليك دي وأدبناها ما كان ده حالنا .. لكن هي حالة الخنوع .. الشعب السوداني بقى خانع .. قرّررررب يفقد المروة .. بس نقول شنو !! يالله لوتري وللا هجرة ,, وللا أي حاجة
أتوقع بعد الأنفصال أن يتم الآتي : 1. لعب كرة القدم بالناطلين بدل الشورتات 2. توحيد الزي الجامعي للطالبات (عباية وطرحة تغطي الرأس بإحكام) 3. نزع جميع ميادين كرة القدم ذات النجيل الصناعي والتي غزت الخرطوم وتحويلها لخلاوي تحفيظ القرآن 4. 5. 6. 7. 8. إلخ .. إلخ
Post: #5 Title: Re: ما المغزى من منع الشيشة في الخرطوم Author: ناصر احمد الامين Date: 08-18-2010, 09:12 AM Parent: #4
يا شباب خليكم من الشيشة
مره ناس النظام ديل لقوا واحد صاحبي قاعد في حديقة عامة و شايل لاب توب، صادروهو منو ... قالو اشتباه في وجود حاجات خليعة
تلاته يوم ماشي جاي للقسم، حتي رجعوليهو اللاب توب.
يعني زول شايل لابتوبو و قاعد في حديقة عااااامة .. لا جنبو شيشة و لا شايل سجاره و لا حتي كباية شاي
دعوه زول صايم بي ضمير: يا رب بي فضل هذا الشهر الكريم .. اذا كانت تصرفات الجماعة ديل صحيحة .. فأهدنا و وفقنا للتوبه و العمل الصالح و اذا كان دا قمع و ذل لي شعب ما ناقص .. اللهم لا تقبضهم اليك الا بعد ان تريهيم احساس الذل و الهوان في الدنيا قبل الاخره
Post: #6 Title: Re: ما المغزى من منع الشيشة في الخرطوم Author: محمد عبد الماجد الصايم Date: 08-18-2010, 09:31 AM Parent: #5
كلام في الصميم!!
Post: #7 Title: Re: ما المغزى من منع الشيشة في الخرطوم Author: قلقو Date: 08-18-2010, 11:30 AM Parent: #6
Quote: كلام في الصميم!!
قفل محلات الشيشة ياودالصايم ؟
Post: #8 Title: Re: ما المغزى من منع الشيشة في الخرطوم Author: محمد عبد الماجد الصايم Date: 08-18-2010, 11:37 AM Parent: #7
Quote: قفل محلات الشيشة ياودالصايم ؟
لا يا عمكـ .. الكلام القاعد يتقال في البوست دا!!! تحليل كويس وكلام سليم .. أنا ضد القرار دا!
Post: #9 Title: Re: ما المغزى من منع الشيشة في الخرطوم Author: قلقو Date: 08-18-2010, 12:43 PM Parent: #8
Quote: يعني زول شايل لابتوبو
الأخ ناصر.. يمكن اعتبروها من (آلات) الشروع فى الزنا. مع تحياتى .
Post: #10 Title: Re: ما المغزى من منع الشيشة في الخرطوم Author: ناصر احمد الامين Date: 08-18-2010, 01:11 PM Parent: #9
Quote: يمكن اعتبروها من (آلات) الشروع فى الزنا.
لو علي كدا ... مفروض يقبضوا اي راجل حايم في الشارع
لانو اي راجل شايل اداة زنا معاهو !!!!!
الناس ديل يا قلقو الله يدينا خيرهم ....
مره انا في امتداد ناصر في محل شيشة (دكان عادي) .. الراجل شاف الكومر جاي من بعيد
علي الايمان .. و لاااا اتلفت قام طابلنا ليك بي جوه و اتخارج ... جانا بعد ساعة
لكين مش لو طبلونا... لو دقونا عدييييل كدا ما بنخليها
Post: #11 Title: Re: ما المغزى من منع الشيشة في الخرطوم Author: ناصر احمد الامين Date: 08-18-2010, 01:15 PM Parent: #10
فلتحيا الشيشة و يسقط النظام العام .... و اول نفس في صحتك يا وطن
Post: #12 Title: Re: ما المغزى من منع الشيشة في الخرطوم Author: محمد عبد الماجد الصايم Date: 08-18-2010, 01:20 PM Parent: #11
زي ما بقولوا يا ناصر: نقطة ضعفي الوحيدة!!
Post: #13 Title: Re: ما المغزى من منع الشيشة في الخرطوم Author: ناذر محمد الخليفة Date: 08-18-2010, 01:33 PM Parent: #11
الكلام دي في شارع واحد وأربعين يا كاهن مش كدة ؟؟!!
Post: #18 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:41 PM Parent: #13
سلام يا ناذر
Quote: الكلام دي في شارع واحد وأربعين يا كاهن مش كدة ؟؟!!
لا لا مافي واحد واربعين .. بس برضو في نفس المنطقة .. امبارح كان مركزين شديد على الحته ديك .. لكن تعرف بقينا نشتغل بالتلفونات .. يقولو لينا الليله ناس فلان شغالين .. نقوم نمش .. يجو يكشوهو نمش لي غيرهم وهكذا دواليك .. الجهجه دي كلها في شان شيشه .. إتخيل ؟؟
Post: #19 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:46 PM Parent: #10
Quote: لكين مش لو طبلونا... لو دقونا عدييييل كدا ما بنخليها
ما بنخليها والله .. عارف يا ناصر .. انا سؤالي عن البدايل ما ساي والله .. لانو امبارح دي أنا سمعت إنو في ناس بدت فعلاً في إنها تجهز بيوت وشقق للشيش .. إتخيل ؟؟ وهسي في ذمتك يا ناصر .. لو القصة وصلت الشقق حتقيف على الشيشه المسكينه دي .. طبعاً لأ .. طيب كان في ليهو لزوم من الأول ؟
Post: #29 Title: Re: ما المغزى من منع الشيشة في الخرطوم Author: ناصر احمد الامين Date: 08-18-2010, 04:04 PM Parent: #19
Quote: لانو امبارح دي أنا سمعت إنو في ناس بدت فعلاً في إنها تجهز بيوت وشقق للشيش .. إتخيل ؟؟ وهسي في ذمتك يا ناصر .. لو القصة وصلت الشقق حتقيف على الشيشه المسكينه دي ..
الشيش علي اشكالها تقع يا كاهن، الله يسترنا بس. دا كمين عديييل
Post: #17 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:35 PM Parent: #8
ود الصايم يا صاحب
والله بلد تمحن .. عاين ارسل ليك ال CV وتجيبني الرياض ولا كيف ؟
ياخي السعودية فيها شيشة قالو .. !! طيب يعني دايرننا نبقى اشفت من الشفوت ولا شنو ؟
غايتو يا ودالصايم .. احمد الله الراحمك من جنس المغسه النحنا فيها دي .. والله لو حضرت بس كيف الناس دي قاعده تتداهم وانت بس قاعد تتفرج .. كان هضربت زي هضربتنا الهسي دي ..
بلد ساي ياخي
Post: #16 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:29 PM Parent: #5
ناصر سلامات
Quote: مره ناس النظام ديل لقوا واحد صاحبي قاعد في حديقة عامة و شايل لاب توب، صادروهو منو ... قالو اشتباه في وجود حاجات خليعة
عليك الله البحصل في البلد ده طبيعي ما كاميرا خفيه يعني مثلاً ؟؟
Quote: يا رب بي فضل هذا الشهر الكريم .. اذا كانت تصرفات الجماعة ديل صحيحة .. فأهدنا و وفقنا للتوبه و العمل الصالح و اذا كان دا قمع و ذل لي شعب ما ناقص .. اللهم لا تقبضهم اليك الا بعد ان تريهيم احساس الذل و الهوان في الدنيا قبل الاخره
آمين يا ناصر وازيد إنو ربنا يجعلنا شهود على اليوم الحيذيقهم فيهو نفس الذل والهوان البسقونا ليهو ده ..
شكراً يا ناصر على المرور
Post: #15 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 02:23 PM Parent: #4
محمد عمر حمدالله على السلامة ..
سمعت والله بالحصل في شارع النيل والبتقري برضو على خلفية قصة الشيشة مش كده بس وحتى الحصل في بيت الفنون .. ده كلو ما بمعزل عن كلام قالو عمر البشير قريب إظنو برضو يوم افتتاح الجامع داك إنو فيما معناه حيزيد التركيز على عمل النظام العام ..
والبعد الانفصال أسوأ يا عزيزي ..
ولوتري مافي ليك يا حبيب اقعد بس اتغبن معانا هنا ده .. يا غبننا ده جاب نتيجة .. يا متنا شهداء للمغسه
Post: #20 Title: Re: ما المغزى من منع الشيشة في الخرطوم Author: وجدان جمال Date: 08-18-2010, 02:51 PM Parent: #15
كاهن... رمضـان كريم... حجة السلطات أن (بعض) رواد مقاهى الشيشة بيلخبطوا (البنقو) مع المعسل ! عشان كـدا القرار طلع بحظر الشيشة فى الأماكن العامة .
Post: #23 Title: Re: ما المغزى من منع الشيشة في الخرطوم Author: مازن عادل النور Date: 08-18-2010, 03:05 PM Parent: #20
Quote:
لو القصة وصلت الشقق حتقيف على الشيشه المسكينه دي .. طبعاً لأ .. طيب كان في ليهو لزوم من الأول ؟.
حاتم الكاهن سلامات فعلا كان فى لزوم من الاول ....
تحياتى
Post: #26 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 03:33 PM Parent: #23
مازن تحياتي
نبقى ناس شقق ولا كيف ؟
غايتو قصه يا عزيزي ..
Post: #24 Title: Re: ما المغزى من منع الشيشة في الخرطوم Author: عبدالكريم أحمد الامين Date: 08-18-2010, 03:11 PM Parent: #20
** حاتم .. ** مساءك خير ورمضان كريم.. ## لو الواحد متوضئ وعمل للشيشه حجاب وشغل شريط قرآن ,, وكبر وهلل مع كل نفس هل يعتبر آثم أم ذلك فى ميزان حسنات النظام اللاعام ؟؟ (ودام الود بين الجميع وأراحنا من همبتة النظام العام) (ابو محمد فؤاد) - الماكيكى..
Post: #27 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 03:38 PM Parent: #24
ابو محمد فؤاد
Quote: ** مساءك خير ورمضان كريم..
مساءك نور يا حبيب وتصوم وتفطر على خير ...
Quote: وأراحنا من همبتة النظام العام
آمين يا عزيزي .. شكراً على الطله ..
Post: #59 Title: Re: ما المغزى من منع الشيشة في الخرطوم Author: moaz elsir Date: 08-19-2010, 09:48 PM Parent: #24
التحية للجميع فى اعتقادي الخاص ان منع تداول الشيشة خاصة فى نوادي الاحياء ، الهدف منه هو مكافحة المخدرات.
Post: #60 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 00:33 AM Parent: #59
Moaz Elsir رمضان كريم يا حبيب
Quote: فى اعتقادي الخاص ان منع تداول الشيشة خاصة فى نوادي الاحياء ، الهدف منه هو مكافحة المخدرات.
ده الإعتقاد العام يا عزيزي ، لكن الجاب الشيشة للمخدرات شنو ؟ ده قد يقودنا لي (لخبتة الشيشة مع البانقو أو غيرو) ، وهنا مفروض نتفق على إنفاء أساس (اللخبته) من حيثيات قضية المخدرات أو المواصلة في إصطحاب الأساس ده إلى ما هو أكثر زي : السجائر مثلاً وورق البرنسيس وقائمة تطول من أشياء تصلح (للخبته) مع البنقو .. وزي ما قال أستاذنا طارق الأمين إنو ممكن البيبسي برضو يتمنع لأنو ممكن شخص يرى فيهو ماده مناسبة لأن تخلط مع العرقي !!
مش البلد فيها مباحث ؟ طيب ما يرصدو المحلات البتخلط البنقو مع معسلنا ده وتسن عقوبات أشد والقيام بحملات تفتيش مكثفة من حين لآخر ... المانع شنو ؟ حجة إنو القرار فيه درء لإنتشار المخدرات ، كلام ما سليم .. لأنو زي ما كلنا متفقين إنو الناس ما حتبطل الشيشة وحتمشي تكوسها بدل في العلن ، حتبدا تكوسها في العالم التحت .. في الشقق.. في الجمبات .. والجخانين .. والعالم التحت لمن يشتغل يا حبيب .. ما عندو سقف .. يعني (اللخبته) الخايفين منها دي يا داب اللقت مرتع للبرطعه..
والله يستر
شكراً على المرور والمشاركه
كاهن
Post: #25 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 03:28 PM Parent: #20
وجدان .. الله أكرم
Quote: حجة السلطات أن (بعض) رواد مقاهى الشيشة بيلخبطوا (البنقو) مع المعسل !
كده يا دوب الحيظهر في الخفاء البنقو الملخبط بالعسل .. تعال اقبض الناس بالثابته .. بس ما تاخد الكل بي جرم البعض .. وتجعل الكل بعد داك يمشي مع البعض في نفس السكه ..
شكراً وجدان على المرور
Post: #21 Title: Re: ما المغزى من منع الشيشة في الخرطوم Author: ناذر محمد الخليفة Date: 08-18-2010, 02:56 PM Parent: #15
!!!!
Quote: الجهجه دي كلها في شان شيشه .. إتخيل ؟؟
إتخيلت ...!!
لكن ما قادر إتخيل لو الشغلة كانت بتاعات (اللهم إني صائم) كانوا حا يعملوا شنو ؟؟!!!
Post: #22 Title: Re: ما المغزى من منع الشيشة في الخرطوم Author: عبد القادر حسن الحبيب Date: 08-18-2010, 03:03 PM Parent: #21
Post: #28 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 03:44 PM Parent: #22
الحبيب عبدالقادر الحبيب
Quote: ونقول الآن إن الوالي بقراره هذا يقود مدخني الشيشة للتدخين داخل منازلهم فتتعاظم الاخطار التي يخشى منها السيد الوالي من تدخينها خارج منازلهم. ومن هذا المنبر فإننا ( جماعة مدخني الشيشة بالخرطوم) ندعو السيد الوالي للعدول عن قراره، ودراسة الموضوع بشكل أعمق وبدون استعجال وعواطف وتشنجات قد تقود الشباب لانحرافات اكبر مما يتصوره السيد الوالي ويبرر له.
ده الكلام .. بس البسمع منو ؟
شكراً على المرور
Post: #30 Title: Re: ما المغزى من منع الشيشة في الخرطوم Author: ناصر احمد الامين Date: 08-18-2010, 04:54 PM Parent: #28
تدخين الشقق و البيوت ... دا كمين يا اخوانا
عليكم بالشيشة المحمولة
شيشة ربط
شيشة تعليق
Post: #32 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 06:01 PM Parent: #30
ناصر سلامات
Quote: تدخين الشقق و البيوت ... دا كمين يا اخوانا
يا زول كمين كمين .. مافي حل
Post: #31 Title: Re: ما المغزى من منع الشيشة في الخرطوم Author: مرتضى احمد عبد القادر Date: 08-18-2010, 05:10 PM Parent: #28
حاتم رمضان كريم محلات الشيشه والمقاهي دي كانت شغاله عادي وبتدفع رسوم وبتصدق سنويا ومعظم المحلات دي حاليا عندها ترخيص من الحكومه الما قادر أفهمو أنا طالما الحكومة ما عندها إعتراض على الشيشه ومافي قانون بيمنعه بيبقى مافي مبرر يخلي الوالي يطلع منشور ينمع الشيشه والمبررات البتتقال زي إنو في ناس بيعملو في الشيشه ينقو دي مبررات فطيره يعني لو في ناس بقو يختو حبوب مخدره في العصير في المحلات حيمنعو العصاير في المحلات !! الشيشه دي كان حرام أو ممنوعه مفروض يمنعه القانون عديل وكان بيخلطو فيها بنقو دا شغل ناس مباحث يقبضو الزول البيعمل كدا وبدلايلهم ويحاكموهو وتفضل محلات الشيشه شغاله لكن منشور الوالي دا إسمو منشور كوز رمضان إستفزاهو وعاودو الحنين للوهمه القديمه
Post: #33 Title: Re: ما المغزى من منع الشيشة في الخرطوم Author: حاتم كاهن Date: 08-18-2010, 06:07 PM Parent: #31
مرتضى تصوم وتفطر على خير
Quote: الما قادر أفهمو أنا طالما الحكومة ما عندها إعتراض على الشيشه ومافي قانون بيمنعه بيبقى مافي مبرر يخلي الوالي يطلع منشور
عارف يا مورتا أمبارح بعد ما اطلقوا سراح صاحب المحل بي ضمان ، حكى لي قال إنو قبل سنتين مره برضو عملو كشات زي دي وجابوهو للقاضي قال لي سالتو قلت ليهو يا مولانا إنت الشيشة دي حرام أو ضد قوانين الدوله ؟ عشان اذا كده حقو نحنا نبطل القصه دي .. فكان رد القاضي : يا زول شيل ورقك ده واطلع من هنا ....!!!
إتخيل .. يعني رد زاتو ما كان عندو ..
الله يجازي الكان السبب
شكراً مرتضى على المرور
Post: #34 Title: Re: ما المغزى من منع الشيشة في الخرطوم Author: عبدالله الشقليني Date: 08-19-2010, 05:50 AM Parent: #33
أين كان أصحاب " الكلاشن " عند غزوة أم درمان ؟
هذا عمل استخباراتي لشغل الناس من الأزمة السمتحكمة التي صنعها النظام الشمولي وبرنامج الإسلاميين في السلطة ،
هؤلاء ضد الحريات
قل لي دولة دينية تهتم بالحريات ! والتحية لصاحب الملف
Post: #36 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 07:45 AM Parent: #34
Quote: هؤلاء ضد الحريات
صدقت يا عبدالله وضدي وضدك وضدنا ...
شكراً على المرور
Post: #35 Title: Re: ما المغزى من منع الشيشة في الخرطوم Author: عادل سمير Date: 08-19-2010, 07:19 AM Parent: #1
Quote: دعوه زول صايم بي ضمير: يا رب بي فضل هذا الشهر الكريم .. اذا كانت تصرفات الجماعة ديل صحيحة .. فأهدنا و وفقنا للتوبه و العمل الصالح
و اذا كان دا قمع و ذل لي شعب ما ناقص .. اللهم لا تقبضهم اليك الا بعد ان تريهيم احساس الذل و الهوان في الدنيا قبل الاخره
فعلا دا دعاء زول صايم بضمير يا ناصر..!!
Post: #37 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 07:47 AM Parent: #35
عادل .. سلمت من كل أذى
تسلم على المرور
Post: #38 Title: Re: ما المغزى من منع الشيشة في الخرطوم Author: أيمن الطيب Date: 08-19-2010, 08:04 AM Parent: #35
سلام يا حاتم...
ما تحكون عنه مؤلم ,,, وكلمات محمد عمر جبريل تكاد تكون هى الفكرة الغالبة,, والألم بعينه لمن يفكر فيما حدث مؤخرا فى بيت الفنون وغيره..
الخنوع والهروب!!
والمرعب تماما هو إحتمالات العودة للمربع الأول والمدعم بتخريجات الشيخ عبدالحى!! أين وصلت تلك القضية المتهم فيها إبنه بالمناسبة!!! قضية التفجيرات تلك وبعدها قضية إغتيال غرانفيل ما هى سوى مقدمات لما يمكن أن تتجه نحوه الأمور إذا لم يوجد الحل سريعا!!!
Post: #39 Title: Re: ما المغزى من منع الشيشة في الخرطوم Author: أيمن الطيب Date: 08-19-2010, 08:38 AM Parent: #38
بإسم النظام والدين يهاجمون نسوة ورجال يتكسبون من مهن شريفة يمارسونها فى العلن ويدفعون ضريبة أعمالهم من عرق جباههم وأفواه تنتظرهم لتأكل وتشرب تحتاج لكراسات وأقلام !!
كلنا يعلم أن الخرطوم يحدث فيها ما يحدث من فساد وإفساد بكل ألوانه وأشكاله وكلنا يعلم أنهم يزيدون معدلات القبح فينا بوتيرة عالية ولكن ما يحير أن لا أحد يحاول العلاج الصحيح وكل نيران حقدهم موجهة نحو البسطاء وأصحاب الأعمال الصغيرة!!!
وحوش النظام العام الأشاوس يتلذذون بمذلة المواطنين وسرقة أغراضهم وهتك أعراضهم لأنهم فى نظرهم مستباحو العرض والمال لأنهم مجرمين فى نظرهم أيضا !!!!
يذكرونى هؤلاء المعوقين أخلاقيا بلعب الأطفال التى تعبأ ب(الزمبلك) تُملأ وتطلق لتفنجط حتى تفرغ التعبئة!!!
Post: #40 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 08:38 AM Parent: #38
أيمن يا حبيب
- إبن عبدالحي ( قصة التفاوض) - قتلة قرانفيل (الهروب) - زيارة أحد قادة إحدي التيارات السلفية السودان ومقابلته كبار المسؤولين - حديث سوارالدهب (إشارته إلى أن السودان قد يصبح مأوى للإرهاب) - الخلايا النائمة - بيت الفنون (المداهمة) - الشيشة (بعد همس مع الرئيس) - لافتات لحزب التحرير ترى في الإنفصال (جريمة)
وعناوين أخرى أكثر لا تشي إلا بما هو أسود ، فقط علينا أن نختزل في هوامش المتوقع عندنا ما هو قادم فقط درءاً للدهشة .. وتهيئاً للزوال ..
دمت يا حبيب كاهن
Post: #41 Title: Re: ما المغزى من منع الشيشة في الخرطوم Author: أيمن الطيب Date: 08-19-2010, 09:01 AM Parent: #40
كاهن يا عزيز..
ياخ الناس ديل ما يوجهو جهودهم دى نحو البنقو والمخدرات التى تهلك الشباب وأصبحت حديث الشارع !!!أولاد وبنات هايمين فى الفراغ العريض ويخافون مواجهة الناس والضوء كالخفافيش و يعيشون أيامهم فى ملكوت السطلى والسرحان فى إنتظار أن يأتى الحل من السماء,,,
بلد تتمزق أمام أعين العالم وليس من وجيع سوى أهلها المغلوبين على أمرهم,, وصل الفساد فيها لدرجة لا يعلمها إلا الله سبحانه وتعالى وساستها مبلغ همهم كنز الأموال و اللهث وراء العمولات والصفقات المشبوهة,,,
شيشة شنو وشيشة منو يا كاهن!!! أخبار البلد بقت مليانة بروائح الشيشة وأخبارها!! لاحول ولا قوة إلا بالله,,القصة أكبر من كدا,, المهم عندهم إنك بس تتروض وتبقى جاهز وتنتظر مفاجآت يوم باكر,,تست ون يا مان,,,
وخلى ناصر الأمين يحكى ليك لما فجأة لقوا نفسهم محاوطين بالنظام العام والعساكر والأسلحة وعالم تتقافز من الحيطان وجنازير وعكاكيز وأطواق وضرب بتشفى وحقارة لكل من يقف أمامهم وكل القصة لمة أسرية فى عيد ميلاد طفلة في بيت إنسان وقلم يحترمه العالم والديبلوماسة عليه رحمة الله,,,
Post: #43 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 09:15 AM Parent: #41
أيمن يا حبيب
والقادم اسوأ .. فالمقدمات لا تنفصل عن النتائج وما يحدث اليوم سواءً تخبطاً كان أم بوعيٍٍ ممن يقودون هذا الوطن إلى العدم .. إلا أنه ليس لا .. مقدمات .. ما ستأتي به الأيام يا صديقي - طالما هابيل ما أرعوى - لهو أحلك وأمر ..
الحل : الثأر
كاهن
Post: #44 Title: Re: ما المغزى من منع الشيشة في الخرطوم Author: ناصر احمد الامين Date: 08-19-2010, 09:23 AM Parent: #41
Quote: ياخ الناس ديل ما يوجهو جهودهم دى نحو البنقو والمخدرات التى تهلك الشباب وأصبحت حديث الشارع !!!أولاد وبنات هايمين فى الفراغ العريض ويخافون مواجهة الناس والضوء كالخفافيش
دا الكلام المؤلم يا ايمن
Quote: وخلى ناصر الأمين يحكى ليك لما فجأة لقوا نفسهم محاوطين بالنظام العام والعساكر والأسلحة
خليها في سرك يا حبيب ...
بالمناسبة : في معسل جديد بي نكهة الفياغرا في زول جربو ؟؟؟
Post: #46 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 09:42 AM Parent: #44
Quote: بالمناسبة : في معسل جديد بي نكهة الفياغرا في زول جربو ؟؟؟
ناصر ما تبالغ ياخي .. البوست ما كان ماشي كويس داير تجهجه باكاتنا مالك ؟ وتعال هنا النكهة شنو كمان ؟ غايتو يا ناصر يا ود خالة أيمن شكيتك علي الله
Post: #42 Title: Re: ما المغزى من منع الشيشة في الخرطوم Author: ناصر احمد الامين Date: 08-19-2010, 09:07 AM Parent: #40
مره كنا بنشيش في شارع واحد، و كان معانا بنات زميلاتنا، واحده منهم بتشيش، فجأه جا كومر ونزلوا منه عساكر بي عصايات و (انتشروا) زي التقول مداهمين ليهم وكر عصابة ... و الله ما فاضل الا يجيبو معاهم ال###### البوليسي.
البت المعانا ..براااحة ادت الشيشة لي الولد الجنبها
بقي داك ماسك شيشتين ... واحده في الشمال و التانية في اليمين
العساكر ديل دخلوا جوه و مرقوا البنات دفير و لزلزة و شتايم .. و رفعوهم في الكومر
و صاحبي قاعد بين الشيشتين .. ماسكهم و بتلفت. البت طلعت ليها لبانة و لاكتها عشان تغير ريحة الشيشة
واحد عسكري شاف المنظر .. جا لي صاحبنا (ابو شيشتين) قال ليهو الشيشة التانية دي حقت منو؟ طبعا قال ليهو بتاعة صاحبي في الحمام، العسكري (نظر شزرا) و فرتق ...... حمدنا الله.
انا كنت مشغول بي منظر البنات الفي الكومر .. و منظر العار و الخيبة واضح في وشهم، متغطيات و مدمدمات زي التقول قبضوهم في بيت دعاره، كل واحده فيهم بتفكر تقول لي اهلها شنو ... لو طلع العساكر ديل اولاد ناس و فتحوا ليهم بلاغ !!!
لانو لو ما اتفتح بلاغ .. و طلعوهم كدا ساكت (بعد حين) .............. اكيد كانت هنالك بعض المفاوضات و شروط للتنازل و درء الفضيحة
Post: #45 Title: Re: ما المغزى من منع الشيشة في الخرطوم Author: أيمن الطيب Date: 08-19-2010, 09:32 AM Parent: #42
Quote: بالمناسبة : في معسل جديد بي نكهة الفياغرا في زول جربو ؟؟؟
وهى الفياغرا زاتا نكهتا شنو؟؟؟؟
وبالله هى أصلا عندها نكهة!!!!
وبعدين معسل بنكهة الفياغرا بس أم يشابه مفعولها!!!
يا ناصر الحاصل شنو يا إبن خالتى!!!
لعل المانع خير..
Post: #47 Title: Re: ما المغزى من منع الشيشة في الخرطوم Author: عبد القادر حسن الحبيب Date: 08-19-2010, 10:01 AM Parent: #45
كتب ناصر احمد الامين:
Quote: مره كنا بنشيش في شارع واحد، و كان معانا بنات زميلاتنا، واحده منهم بتشيش، فجأه جا كومر ونزلوا منه عساكر بي عصايات و (انتشروا) زي التقول مداهمين ليهم وكر عصابة ... و الله ما فاضل الا يجيبو معاهم ال###### البوليسي.
البت المعانا ..براااحة ادت الشيشة لي الولد الجنبها
بقي داك ماسك شيشتين ... واحده في الشمال و التانية في اليمين
العساكر ديل دخلوا جوه و مرقوا البنات دفير و لزلزة و شتايم .. و رفعوهم في الكومر
و صاحبي قاعد بين الشيشتين .. ماسكهم و بتلفت. البت طلعت ليها لبانة و لاكتها عشان تغير ريحة الشيشة
واحد عسكري شاف المنظر .. جا لي صاحبنا (ابو شيشتين) قال ليهو الشيشة التانية دي حقت منو؟ طبعا قال ليهو بتاعة صاحبي في الحمام، العسكري (نظر شزرا) و فرتق ...... حمدنا الله.
انا كنت مشغول بي منظر البنات الفي الكومر .. و منظر العار و الخيبة واضح في وشهم، متغطيات و مدمدمات زي التقول قبضوهم في بيت دعاره، كل واحده فيهم بتفكر تقول لي اهلها شنو ... لو طلع العساكر ديل اولاد ناس و فتحوا ليهم بلاغ !!!
لانو لو ما اتفتح بلاغ .. و طلعوهم كدا ساكت (بعد حين) .............. اكيد كانت هنالك بعض المفاوضات و شروط للتنازل و درء الفضيحة
يا والي الخرطوم اسع في داعي للكلام ده،يا جماعة ما تخلو الناس في حالة، وربك كفيل بافعاله.
Post: #48 Title: Re: ما المغزى من منع الشيشة في الخرطوم Author: هايل زين Date: 08-19-2010, 02:12 PM Parent: #1
والله يا كاهن ... أول حاجة رمضان كريم...
ياخ انا قريت الكلام الفوق ده كللللو... لحدي هسي ما لقيت لي إجابة كده فشششششتني...
Post: #49 Title: Re: ما المغزى من منع الشيشة في الخرطوم Author: طارق الأمين Date: 08-19-2010, 05:05 PM Parent: #48
Quote: كاهن... رمضـان كريم... حجة السلطات أن (بعض) رواد مقاهى الشيشة بيلخبطوا (البنقو) مع المعسل ! عشان كـدا القرار طلع بحظر الشيشة فى الأماكن العامة .
'طيب انا سمعت انو في ناس بلخبتوالعرقي مع البيبسي
اقترح عليه اغلاق مصانع البيبسي
منعا للرزيله
وكده
Post: #51 Title: Re: ما المغزى من منع الشيشة في الخرطوم Author: Abdulrahman Gorashi Date: 08-19-2010, 05:24 PM Parent: #49
ياشباب انتو منع الشيشه دى بس لزوم رمضان ولا المنع دا الا ان يبعثون؟
Post: #53 Title: Re: ما المغزى من منع الشيشة في الخرطوم Author: ناصر احمد الامين Date: 08-19-2010, 05:59 PM Parent: #51
Quote: منع الشيشه دى بس لزوم رمضان ولا المنع دا الا ان يبعثون؟
يبعثون .. يا قرشي
Post: #61 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 00:47 AM Parent: #51
الحبيب عبدالرحمن قرشي شاكر مرورك
Quote: ياشباب انتو منع الشيشه دى بس لزوم رمضان ولا المنع دا الا ان يبعثون؟
ما عارف والله يا عبدالرحمن ، بس بستبعد إنو يكون لزوم رمضان وإذا كان لفتح ذلك باباً أوسع للتساؤل .. فالراجح لحدي الان (يبعثون) .. والايام دي مقدمات لما هو .. أكبر ...
ربنا يكضب الشينه
كاهن
Post: #52 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 05:27 PM Parent: #49
والله يا طارق غايتو طبعاً كلام اللخبته مع البنقو ده .. كلام بيجنن وعلى قولك ممكن يأسس لي تحريم ومنع أي شي .. أكرر .. أي شي ..
غايتو باباً إتفتح على حاجات يا طارق .. كان ارحم شبهة الخلط مع البنقو
شكراً يا طارق
Post: #50 Title: Re: ما المغزى من منع الشيشة في الخرطوم Author: حاتم كاهن Date: 08-19-2010, 05:22 PM Parent: #48
هايل يا حبيب
وين تتفشى ؟ هنا ؟ أكيد لأ ... وصدقني ما حتلقى أي إجابه من زول كائناً من كان ..
غايتو بس انا زول جخانين ساي .. جمبات وانت نازل ..
شكراً يا هايل على الطله
Post: #54 Title: Re: ما المغزى من منع الشيشة في الخرطوم Author: ASHRAF MUSTAFA Date: 08-19-2010, 06:22 PM Parent: #50
حاتم كاهن والمجموعة تحياتي يا شباب وتصوموا وتفطروا علي خير
طبعآ بقرأ في البوست ده غير مصدق حتي منع الشيشة ده بسمعوا ومرة نقلت ليه موضوع لكن ما قريته لكن والله ربنا يكون في عونكم إمكن ده أكتر بوست في المنبر يديني معلومات موثقة ومؤكدة للوضع في السودان عشان كده أنا حا أعيد حساباتي تاني بالنسبة للرجوع نهائيا للسودان تسلموا يا شباب وما تستاهلوا والله
Post: #55 Title: Re: ما المغزى من منع الشيشة في الخرطوم Author: Salahaldeen Nadir Date: 08-19-2010, 06:41 PM Parent: #54
Quote: اللهم لا تقبضهم اليك الا بعد ان تريهيم احساس الذل و الهوان في الدنيا قبل الاخره
AMEN to that
!
Post: #63 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 01:04 AM Parent: #55
Salahaldeen Nadir
Quote: AMEN to that
آمين تاني كمان
شكراً على المرور
ودي كاهن
Post: #62 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 00:57 AM Parent: #54
أشرف مصطفى كل سنة وانت طيب يا حبيب وتصوم وتفطر على خير
Quote: عشان كده أنا حا أعيد حساباتي تاني بالنسبة للرجوع نهائيا للسودان
لا لا يا أشرف ما تعيد حساباتك ، البلد دي بي الحال الحرن ده محتاجه لي إنو الناس ترجع .. أقلاها ياخي عشان نتشارك الهم ده .. مش كده بس .. السودان .. بعيداً عن قصة الشيشه دي .. قاعد يمر بي منعطف تاريخي وأحداث حتنتج واقع ما مر على تاريخنا قبال كده .. تعالو ياخ .. وخلو الحيبقى علينا نحنا (الشعب السوداني الفضل ) يبقى علينا كلنا ..
كل الود كاهن
Post: #56 Title: Re: ما المغزى من منع الشيشة في الخرطوم Author: عادل سمير Date: 08-19-2010, 07:43 PM Parent: #1
أذكر في حوالي عام 1989 بعد الإنقاذ صدر قانون محلي في الخرطوم إسمه " قانون منع الشيشة في العاصمة
القومية" !! و قد الغي هذا القانون لاحقا..!! يعني المسألة دي من زمـــــااااان..!!
Post: #57 Title: Re: ما المغزى من منع الشيشة في الخرطوم Author: سيف اليزل برعي البدوي Date: 08-19-2010, 08:50 PM Parent: #56
Post: #58 Title: Re: ما المغزى من منع الشيشة في الخرطوم Author: سيف اليزل برعي البدوي Date: 08-19-2010, 08:53 PM Parent: #57
Post: #64 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 01:16 AM Parent: #58
أخوي سيف اليزل رمضان كريم
Quote: معا ضد تقييد الحريات
ولكن التدخين ضار بالصحة
بس قصتنا هي تقييد الحريات دي يا سيف .. والتدخين فعلاً ضار ونسأل الله إنو يهدينا .. وأنا حاتم ده ما ببمانع لو إنو التدخين يتمنع في الاماكن العامه بأمر من الدوله (وده ما حاصل).. أو إنو يكون في إتجاه عام للدولة للمحافظة على صحة المواطنين من التدخين السلبي وكل ما يضر البيئة مثلاً(وده ما حاصل) .. أو تسن عقوبات للمدخنين تحت السن القانونية تطال حتى أصحاب المحلات ومن يقبض متلبساً ببيع (السجائر مثلاً) لقاصر.. كده بكون ده إتجاه عام دون ممارسة وصاية على الناضجين الما محتاجين لي وصاية .. بس أنا الزول الواعي ده ما داير جهة تحجر علي حرياتي الخاصة إذا ما إتعدت على حريات آخرين ..
كامل ودي
كاهن
Post: #74 Title: Re: ما المغزى من منع الشيشة في الخرطوم Author: Gaafar Ismail Date: 08-20-2010, 03:49 AM Parent: #64
الحبيب حاتم كاهن سلامات واتـمنى لك موفور الصحة والعافية
Quote: والتدخين فعلاً ضار ونسأل الله إنو يهدينا ..
هل يستطيع المرء أن يضمن أن لا تصيبه مصيبة من أضرار التدخين قبل أن يهديه الله ؟ أليس عين العقل الإقلاع عن التدخين فورا طالما به ضرر على صحة الإنسان ولو بنسبة 1% ؟ اؤيدك في باقي ما تفضلت ذكره حول ضرورة منع التدخين في الأماكن العامة منعا باتا حفاظ على أرواح الشباب أمثالكم الذين نحسبهم ذخرا للوطن في الارتقاء به نحو التقدم والنماء.
تحياتي ومودتي
جعفر عبدالرحمن
Post: #92 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 01:45 PM Parent: #74
الحبيب جعفر عبدالرحمن أشكرك عزيزي الفاضل على المرور
Quote: هل يستطيع المرء أن يضمن أن لا تصيبه مصيبة من أضرار التدخين قبل أن يهديه الله ؟ أليس عين العقل الإقلاع عن التدخين فورا طالما به ضرر على صحة الإنسان ولو بنسبة 1% ؟
بصالح دعائكم نرجو من الله القبول والاستجابة وان يكتب لنا هداية قبل الأذى ..
ودي واحترامي وتقديري
كاهن
Post: #65 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 01:20 AM Parent: #56
أخي عادل سمير
Quote: أذكر في حوالي عام 1989 بعد الإنقاذ صدر قانون محلي في الخرطوم إسمه " قانون منع الشيشة في العاصمة
القومية" !! و قد الغي هذا القانون لاحقا..!! يعني المسألة دي من زمـــــااااان..!!
فعلاً من زماااان .. بس الكان قديم ده .. الجابو شنو تاني ؟ ما ياهو الهم يا عادل إنو القديم يرجع .. والجرح يتجدد ..
Post: #66 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 01:37 AM Parent: #65
مواصلة لما حدث في ذلك المقهى
كنت قد ذكرت بأن صاحب المحل قد خرج ذاك المساء بضامن على أن يعاود صبيحة اليوم التالي لإتمام الإجراءات والتي غالباً ما ستكون غرامة ما ..
وقد كان
قرر القاضي بأن على صاحب المحل دفع غرامة تعادل ثلاثة ألف جنيه سوداني !!! تذكرون بأني - وكنت شاهداً وقت المداهمة - قد ذكرت بأنه لم يكن هنالك من يدخن الشيشه وان كل شيش المحل كانت بالمخزن أو مخزنة بمكتب صاحب المحل.. لذا حينما أراد صاحب المحل الجدال دافعاً بتلك الحجة - عدم وجود شيش على موائد الزبائن - أتاه الرد الحاسم : أن وجود الشيش بالمحل عموماً يعكس أن هنالك (نية مسبقة) لتقديمها للزبائن ..
ما يستفاد من القصة .. أولوا نياتكم بعض الحرص فلرب نية أودت بصاحبها إلى القضاء
لا أدري لماذا ، ولكن حينما إستحضرت (القاضي) في مخيلتي وهو يجاهد لإنزال عقوبة (الغرامة) بالرغم من إنتفاء الدليل وعدم ثبوت (الجرم)، لا أدري ولكني تذكرت أبياتاً لأحمد مطر يقول فيها :
قرر الوالي شنق الذي إغتال أخي لكنه كان قصيراً فمضى الجلاد يسأل : رأسه لا يصل الحبل فماذا سوف أفعل ؟ بعد تفكيرٍعميق ........... أمر الوالي بشنقي بدلاً منه لأني كنت أطول
كاهن
Post: #67 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-20-2010, 02:19 AM Parent: #66
Quote: هل إذا في الأمر حرمة مثلاً لما لا يمنع تصنيع وإستيراد السجائر أيضاً أو إغلاق محلات التمباك ؟
تدخين الشيشة يا حاتم كاهن ... غير الحرمة التى تخرج صاحبها من المِلّة ... فهى جريمة خطيرة على المجتمع والأمن العام ... لأن تقتل روحاً أو تنهب أو تسرق أو تختلس بنكاً أو شركةً أو وزارة ... أهون عند الله ألف مرّة من أن "تجرّ ليك نفس" ....
وتخزين الشيش غير المستخدمة يعتبر ضرب من ضروب الخيانة العظمى ... ولذا يتوجّب - لو لاحظت - استخدام الرشاشات ... (مع الإعتذار للهلالاب) ...
... المهم ....
Post: #68 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 02:35 AM Parent: #67
تبارك رمضان كريم
Quote: تدخين الشيشة يا حاتم كاهن ... غير الحرمة التى تخرج صاحبها من المِلّة ... فهى جريمة خطيرة على المجتمع والأمن العام ... لأن تقتل روحاً أو تنهب أو تسرق أو تختلس بنكاً أو شركةً أو وزارة ... أهون عند الله ألف مرّة من أن "تجرّ ليك نفس" ....
يعني البركة في الجاتنا لحدي هسي (المنع الساي ده ).. غايتو قدر أخف من قدر ..
Quote: ولذا يتوجّب - لو لاحظت - استخدام الرشاشات ... (مع الإعتذار للهلالاب) ...
نحنا فعلاً رشاشات لكن والله البشايفنو هنا ده ياخي طلعتو ظالمننا ساي .. طلعنا غلابه يا تبارك
تتبارك على المرور يا حبيب
Post: #69 Title: Re: ما المغزى من منع الشيشة في الخرطوم Author: معاوية عبيد الصائم Date: 08-20-2010, 02:38 AM Parent: #68
فردتى فى الغا غا
كاهن
يعنى منعو الشيشة فى الخرطوم ؟؟
تيب مش فى المريخ ؟ تانى شنو
غغغغغغغغ غا غا غا غا
Post: #70 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 03:00 AM Parent: #69
فردة جناحي التاني معاوية
Quote: تيب مش فى المريخ ؟ تانى شنو
أهو قوووووول كده وقامو شطبو طارق مختار ووارقو .. وحالهم إنصلح .. نحنا نعمل شنو تاني ؟ نتلفت ولا كيف ؟ ياخي الليله لو الحكم بس كان طرد ليهم زول تاني كان غلبو عدييل .. وكان بقى علينا المثل : لا شيشة لا مريخ .. اقعد وآكل فسيخ ..
او اي حاجه زي دي
كاهن
Post: #71 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-20-2010, 03:01 AM Parent: #69
وبالمناسبة حا يمنعوا سكاكين المطبخ والسبغة وامواس الحلاقة والأسبرو والتيار الكهربائى ... وكل احتمالات الإنتحار البطئ أو السريع حفاظاً على سلامة المواطنين ... وبالرشاشات ....
... المهم ....
Post: #72 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 03:18 AM Parent: #71
تبارك غايتو هممتني زياده على الهم المالينا .. أبداً ما خففت
Quote: وبالمناسبة حا يمنعوا سكاكين المطبخ والسبغة وامواس الحلاقة والأسبرو والتيار الكهربائى وكل احتمالات الإنتحار البطئ أو السريع
جيت للمهم شفت نحنا ما تشوفنا كده جلدنا ميت وما بنحس وحنعمل رايحين رايحين وحنتساغل جنس سغاله يا تبارك ولا بيهمنا زاتو ..
بس كلو إلا الإنتحار ده ..دي حتكون حركة ما ظريفة منهم .... كان بقينا عليهو الله لا وقفهم في وشنا
خالص الود
كاهن
Post: #73 Title: Re: ما المغزى من منع الشيشة في الخرطوم Author: معاوية عبيد الصائم Date: 08-20-2010, 03:23 AM Parent: #72
كل واحد فينا يعمل كرتلة ؟
والجائزة ؟؟؟ مروحة !!
او هبابة ؟
وين غميرة الحسين !!! غا غا غا غا غا
Post: #75 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-20-2010, 04:03 AM Parent: #73
كرتلّة؟
هسى دى انا اشرحا لى ولدى كيف؟
هو بالتلتلة فهم انو تدخين الشيشة فى الأماكن العامة فى السودان جريمة ... (كذبت عليهو وقلت ليهو الله خلق الكون دا كلّو ... إلاّ الشيشة ... فهى رجسٌ من عمل الشيطان!)
... المهم ....
Post: #76 Title: Re: ما المغزى من منع الشيشة في الخرطوم Author: معاوية عبيد الصائم Date: 08-20-2010, 04:05 AM Parent: #75
المهم
بتعرف الكرتلة يا تبارك ؟
Post: #77 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-20-2010, 04:20 AM Parent: #76
لا بعرف شختك بختك ...
... المهم ....
Post: #78 Title: Re: ما المغزى من منع الشيشة في الخرطوم Author: معاوية عبيد الصائم Date: 08-20-2010, 04:27 AM Parent: #77
المهم يا قديم
ياخ انت اقدم من عبيد ابو معاوية عبيد
سلم لى على هشام وهمرور ؟
هههههههههههههه
Post: #79 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-20-2010, 04:32 AM Parent: #78
Quote: سلم لى على هشام وهمرور ؟
هههههههههههههه
بعد دا إلاّ افتح ليهم بوست تهنئة برمضان الكريم ...
الله يخلّيهم ويخلّى أولادهم وجيرانهم وزملاءهم وأصحابهم والتابعين ومن تبعهم بإحسانِ إلى يوم الدين ...
... آمين ...
Post: #80 Title: Re: ما المغزى من منع الشيشة في الخرطوم Author: معاوية عبيد الصائم Date: 08-20-2010, 04:35 AM Parent: #79
المهم
شكرا
مع تحيات معاوية عبيد
Post: #81 Title: Re: ما المغزى من منع الشيشة في الخرطوم Author: طارق الأمين Date: 08-20-2010, 04:44 AM Parent: #79
بس بلاش شيشه معاكم شيشاب اخر زمن
Post: #82 Title: Re: ما المغزى من منع الشيشة في الخرطوم Author: khalid fahmi Date: 08-20-2010, 04:46 AM Parent: #81
Quote: ما المغزى من وراء منع الشيشه في مقاهي الخرطوم ؟
عقبال السجائر .. و الصعوط ..
..
Post: #83 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-20-2010, 05:23 AM Parent: #82
اللهم احفظ شهوتى البطن والفرج من قوانين الدولة ....
... المهم ....
Post: #84 Title: Re: ما المغزى من منع الشيشة في الخرطوم Author: Tragie Mustafa Date: 08-20-2010, 05:32 AM Parent: #82
حاتم كاهن رمضان كريم وانا طبعا من حزب سيف اليزل هنا وبقول لكم التدخين جدا ضار بالصحه. وعارفاكم عارفين وبدعوا الله ان يمكنكم من تركه.
العالم العاملين متعوربين ديل الا يعرفون ان اسيادهم العرب عشاق للشيشه؟؟!!
يا اخي في الاردن الاب يقعد في المقهى ويطلب لزوجته وبناته جميعهن حجارة شيشه اي فحم! ويدخونوا معا!!
اها ده حال من قالوا بان حكامهم آل البيت!! فا بالنا نحن آل بلال!!
مرحبا بالشيشاب في قبائل المعارضه. وعقبال ناس السجائر و الصعوط كما قالوا.
Post: #85 Title: Re: ما المغزى من منع الشيشة في الخرطوم Author: Dr.Mohammed Ali Elmusharaf Date: 08-20-2010, 12:06 PM Parent: #84
الفاضل حاتم كاهن
كل سنة وانت طيب
يا تراجي رمضان كريم
Quote: العالم العاملين متعوربين ديل الا يعرفون ان اسيادهم العرب عشاق للشيشه؟؟!!
يا اخي في الاردن الاب يقعد في المقهى ويطلب لزوجته وبناته جميعهن حجارة شيشه اي فحم! ويدخونا معا!!
ناس السودان بقعدوا يشيشوا في المقاهي مع زميلتي وصديقتي ....اما اختي وزوجتي وبنتي في المقاهي شيشة وونسة وقهقه لسة حارة عليهم وديل لو عاوزين يشيشوا يمشوا يشوفوا زميل ولا صديق
Post: #86 Title: Re: ما المغزى من منع الشيشة في الخرطوم Author: حبيب نورة Date: 08-20-2010, 12:26 PM Parent: #85
ياخي ديل أولاد ######ة علي قول المصريين وحياة ربنا الواحد ما عارف الناس دي تقبل وين ! هسة كمية الأسر والعوائل و الأفراد من الجنسين البسافروا مصر وسوريا وماليزيا وأثيوبيا بسافروا عشان سبب واحد
عايزين يشموا الهوا عايزين يتنفسوا أكسجين نضيف مافيه ريحة الحكومة بت الحرام دي
انا شخصياً مدخن بشوت لي ستعةسبعة حجارة شيشة يومياً دة في البيت حجرين تلاتة لو ربنا سهلا في الكافيه
لكن كلامي دة بقولوا عشان الناس البتركب الطيارات عشان يقعدوا في مقهي عادي ومافي زول يفتح خشموا معاهم
انا ما شايف حاجة بتردع المدخن لو ما أقتنع بي نفسو ويكفي البسملة بتاعة مصانع السجاير ما عملت حاجة (التدخين ضار بالصحة) إلي باقي الآية
البنات ماخدات راحتهن في مقاهي القاهرة
ودة كلوا بي سبب الحكومة دي ما داير أقول حكومة أولاد حرام عشان الصيام وكدة لكن ليك علي أفطر و أجي كان دُرت
Post: #91 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 01:00 PM Parent: #86
حبيب نورة بتي وحبيبنا
Quote: انا ما شايف حاجة بتردع المدخن لو ما أقتنع بي نفسو
مش كده ؟ ياخي دي عمايل بتخلي الما بشيش يمشي يكوس الشيشة محل ما تكون فالممنوع مرغوب .. والبيضّرا .. عندو طعمو برا
Quote: لكن ليك علي أفطر و أجي كان دُرت
أفطر بالهنا وتعال .. تلقانا لسه .. خرمانين ...
ودي
كاهن
Post: #90 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 12:54 PM Parent: #85
الفاضل د.محمد علي
Quote: كل سنة وانت طيب
وانت طيب يا دكتور وتصوم وتفطر على خير
كاهن
Post: #95 Title: Re: ما المغزى من منع الشيشة في الخرطوم Author: Tragie Mustafa Date: 08-20-2010, 04:59 PM Parent: #85
الفاضل د.المشرف رمضان كريم
Quote: ناس السودان بقعدوا يشيشوا في المقاهي مع زميلتي وصديقتي ....اما اختي وزوجتي وبنتي في المقاهي شيشة وونسة وقهقه لسة حارة عليهم وديل لو عاوزين يشيشوا يمشوا يشوفوا زميل ولا صديق
ان قصدت بذلك انه الشيشه ليست عيب بالمجتمعات العربيه. وهم عاملنهم مثلهم الاعلى عشان كده قلنا لهم اقتدوا بيهم وبطلوا الهباله. رغم موقفي من التدخين.
حبيب نوره حرام عليك نفسك يا اخوي 7 حجاره باليوم؟؟!!انت ما قديت صدرك لكن؟؟!! تابع فيديوهات سيف اليزل دي وادينا رايك بعدها.
حاتم كاهن ده عامل مقاطعني ولا شنو؟؟؟
Post: #97 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 05:27 PM Parent: #95
العزيزة تراجي
سلام تاني .. وشكراً على الحضور ...
Quote: حاتم كاهن ده عامل مقاطعني ولا شنو؟؟؟
ليه يا تراجي قلتي كده ؟؟
كاهن
Post: #89 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 12:51 PM Parent: #84
تراجي رمضان كريم
Quote: وبقول لكم التدخين جدا ضار بالصحه. وعارفاكم عارفين وبدعوا الله ان يمكنكم من تركه.
آمين يا تراجي .. لكن إنت عارفه إنو الاشكال مافي الشيشة .. لانها محلولة .. بس فرض الوصاية البيتم بي فرمانات الوالي دي .. تب ما مقبول .. تعال لي بي نصيحة بي فيديو بي صور بي مقال .. حاصرني بي حملة منظمة وانيقة محل ما اقبل .. لكن ما تجيني بي رشاشك وتقول لي .. أوع .. كده لو ما عندي معاك قضيه براك البتخلقها ... وتبقى في التحلك من تبعات العملتو ...
شكراً على المرور كاهن
Post: #87 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 12:36 PM Parent: #82
خالد رمضان كريم
Quote: عقبال السجائر .. و الصعوط ..
بس ؟
شكراً على المرور
Post: #88 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 12:41 PM Parent: #81
يا طارق .. الشيشاب ضجروا .. الشيشاب خرمو .. الشيشاب ما عارفين يسو شنو خلي الشيشاب يشيشو نضمي مخلوط بمعسل مغسه .. مع رشوشة بنقو .. أو غيرو
Post: #93 Title: Re: ما المغزى من منع الشيشة في الخرطوم Author: naeem ali Date: 08-20-2010, 03:29 PM Parent: #88
كاهن يا حبيب.. رمضانك كريم وتصوم وتفطر علي خير يا صاحب...
Quote: خلي الشيشاب يشيشو نضمي مخلوط بمعسل مغسه .. مع رشوشة بنقو .. أو غيرو
ضحكتني حتي ادمعت عينيا دمع شديد...
Post: #94 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 04:30 PM Parent: #93
الحبيب نعيم أخوي ان شاءالله دايماً ضاحك ...
عاين ... فاطر معاي متين ؟
كاهن
Post: #96 Title: Re: ما المغزى من منع الشيشة في الخرطوم Author: Nasruddin Al Basheer Date: 08-20-2010, 05:25 PM Parent: #94
Quote: ما المغزى من منع الشيشة في الخرطوم
ربما يكون في واحد من الشيوخ الضلاليين ديل عندو شحنة بنقو عاوزة يخارجها.. آكلو أموال الزكاة واليتامي والإغاثة وناهبو أقوات الشعب ومحللو الرشوة ديل لا يعرفون الله ولا يفعلون شيئاً إلا إذا كان لهم فيه عائد مادي..
تحياتي يا حاتم ورمضان كريم وربنا يكفيكم شر ناس النظام العام
التعديل لتصحيح خطأ إملائي
Post: #98 Title: Re: ما المغزى من منع الشيشة في الخرطوم Author: حاتم كاهن Date: 08-20-2010, 06:03 PM Parent: #96
الاخ نصر الدين سلام
Quote: تحياتي يا حاتم ورمضان كريم وربنا يكفيكم شر ناس النظام العام
الله أكرم وتصوم وتفطر على خير .. الشر شر دولة بي حالها ما شر جهة بس .. ربنا يكفينا الهم
شاكر مرورك
Post: #99 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-21-2010, 09:37 PM Parent: #98
الشيشة منعوها عشان البنات ما يشربوها ...
لأنو الواحدة لو شربت الشيشة ... بعد داك ممكن تعمل اى حاجة!
ولو مغالتنى اسأل رئاسة الجمهورية (عندهم قسم متخصص فى "سايكوجية المرأة القاهر") ...
... المهم ...
Post: #100 Title: Re: ما المغزى من منع الشيشة في الخرطوم Author: حاتم كاهن Date: 08-22-2010, 00:36 AM Parent: #99
تبارك يا صديق طبعاً ما حاغالتك في سبب منع الشيشة .. الممكن يكون : - عشان البنات ما يشربو الشيشة زي ما قلت . - عشان المعسل بببقى (أظرف) إذا إتلخبت بي حبة بنقو. - عشان رمضان . - عشان الشيشة حرام . - عشان في ما يسمى بالجمبات بتقدم الشيشة مع حاجات تانية . - عشان في ناس قالت ليهم كده . - عشان سغالة ساي . - كيتاً في أوكامبو. - كيتاً في الفيفا . - أسباب أخرى .
بس دي بغالتك فيها :
Quote: (عندهم قسم متخصص..) ...
بغض النظر القسم كان شنو أو متخصص في شنو .. غير أقسام الشرطة دي يعدمهم كان عندهم قسم تاني ..
كاهن
Post: #101 Title: Re: ما المغزى من منع الشيشة في الخرطوم Author: معاوية عبيد الصائم Date: 08-24-2010, 00:47 AM Parent: #100
كمان ما ممكن شيشة وصفوة ؟؟ عليك الله بطل طمع يا كاهن
ده ترف منك لاحولالالالالالالا من الطمع ؟؟
Post: #102 Title: Re: ما المغزى من منع الشيشة في الخرطوم Author: تبارك شيخ الدين جبريل Date: 08-24-2010, 00:56 AM Parent: #101
Quote: بغض النظر القسم كان شنو أو متخصص في شنو .. غير أقسام الشرطة دي يعدمهم كان عندهم قسم تاني ..
بالله هم شغالين "سايكولوجية المرأة القاهر" و "سايكولوجية الرجل المقهور" بدون قسم متخصص؟ ونسة خيم بكيات سااااى؟
والله لاكين دى حكاية عجيبة ...
... المهم ....
Post: #103 Title: Re: ما المغزى من منع الشيشة في الخرطوم Author: معاوية عبيد الصائم Date: 08-25-2010, 00:23 AM Parent: #102
المشكلة ياحاتم معظم الشياشاب صفوة ؟
Post: #105 Title: Re: ما المغزى من منع الشيشة في الخرطوم Author: حاتم كاهن Date: 08-25-2010, 01:54 AM Parent: #103
لا لا يا معاوية يا أخوي .. الشيشاب ما كلهم مريخاب .. الشيشة دي عامل وحدوي ياخي بيجمع أفئدة الهلالاب والمريخاب على قلب حجر شيشة واحد ..
Post: #104 Title: Re: ما المغزى من منع الشيشة في الخرطوم Author: حاتم كاهن Date: 08-25-2010, 01:51 AM Parent: #102
أها يا تبارك الشيشة دي زاتا ( الما ملخبته) كانت واحدة من أدوات (فش) القهر المالينا ده فلو كان صحي صحي كان عندهم جنس اقسامك دي كان بالعكس بدل منع الشيشة كان امر الوالي بأن تصرف لكل مواطن ومواطنه (برضو) شيشة لزوم الفشه وكده بدل ما نقعد نتفشى فيهم ليلنا ونهارنا كده بي نضمينا الما عندو طعم ده .. كان أي أسرة تقعد قعده شيشة كل يوم وتتفشى ويا دار ما دخلك شر ..
Post: #106 Title: إبادة الشيشة في الخرطوم Author: عادل سمير Date: 08-25-2010, 08:22 AM Parent: #1
Post: #108 Title: Re: إبادة الشيشة في الخرطوم Author: قلقو Date: 08-25-2010, 09:01 AM Parent: #106
الأخ حاتم عطفا على مداخلة مولانا سمير :
Quote: أذكر في حوالي عام 1989 بعد الإنقاذ صدر قانون محلي في الخرطوم إسمه " قانون منع الشيشة في العاصمة
القومية" !! و قد الغي هذا القانون لاحقا..!! يعني المسألة دي من زمـــــااااان..!!
اصل قانون منع الشيشة اصدره المدعو يوسف عبدالفتاح (رامبو او القام بى جهلو) وقد كان وقتها نائبا لمحمد عثمان محمد سعيد كمحافظ للخرطوم لكن رامبو كان طالع فى الكفر ومغطى على شخصية محمد عثمان . اراد رامبو ان يزيد تسعيرة اسعار بيع السجائر للجمهور لزيادة ايرادات المحافظة المالية, ولكن اصحاب ووكلاء شركات السجائر اوضحوا له بأن اى زيادة على اسعار السجائر ستؤدى تلقائيا لأحجام عدد مقدر من المدخنين عن شراء السجائر بل والأتجاه لبدائل اخرى كالشيشة والتمباك مما يهزم تماما الغرض الذى من اجله تم رفع اسعار بيع السجائر . اذن ما الحل قالها ( رامبو او القام بى جهلو) لنفسه ؟ وطوالى وبكل هبل وعباطة الدنيا اصدر القرار الذى اورده مولانا سمير وهو ( زيادة اسعار بيع السجائر وقفل كل محلات تناول الشيشة), ده عشانك وعشان الزيك ياحاتم جوه عيونكم تشتروا السجائر لزيادة ايرادات المحافظة . شفتوا العبقرية الأقتصادية التى يتمتع بها رامبو ؟ مولانا سمير .. شكرا على الصور وهى تصور جنودنا البواسل الأشاوس وهم يدكون معاقل الأعداء . سلمتم ياحماة الأمن . مع تحياتى .
Post: #109 Title: Re: إبادة الشيشة في الخرطوم Author: حاتم كاهن Date: 08-25-2010, 11:44 AM Parent: #108
Quote: ده عشانك وعشان الزيك ياحاتم جوه عيونكم تشتروا السجائر لزيادة ايرادات المحافظة
وما تقول يا قلقو انو السجائر الايام دي فعلاً زايد .. لكل زمن .. رامبو لحاله يا حبيب .. طبعاً زمان كان رامبو هو يوسف عبدالفتاح .. بس هسي كتروا يا حبيب .. ما بنقدر نعد .. في رامبوهات مواطنين (اولاد قلبا ) وفي محترفين برضو .. ولسه ..
مولانا عادل سمير .. شكراً على الصور .. بس أنا لحدي الآن ما قادر أربط ما بين منظر الشيش وكاكي البوليس .. الجاب البوليس لي لم الشيش ومن ثم (إباداتها) شنو ؟ ده مش ياهو بوليس (يد أمينة وعين ساهرة ) ؟؟
الصور كمان يا مولانا فيها حبة دراما لزوم التصوير التلفزيوني وكده .. عاين للصورة للأولى .. واضح فيها إنو في (مسؤول كبير لابس بدلة ) في زيارة تفقدية لإحدى الأقسام ليقف على عملية إبادة الشيشة .. انا ما عارف لكن بي شكل محايد يا مولانا .. إتخيل الليله دي يصدر فرمان بي تعيينك (مسؤول كبير) في البلد دي .. ويقولو ليك خلاص بلاش غربة وضياع سنين وارجع بلدك .. وترجع البلد دي بي رتبة (مسؤول كبير) بس شرطاً تلبس بدلة .. وتبدا تزاول مهامك في جنس .. إبادة الشيشة وإنت نازل .. مش كده زي الجاتك ليلة القدر يا مولانا .. إتخيل .. ده شغلك ... مش بختك ؟؟؟
يا مولانا .. عاينت للصورة الأولى ؟؟ عاين ليها تاني طيب....
وابكي .. ____
بي بركة رمضان والصيام .. سألتك يا ربي يا مالك روحي .. تبقيني مسؤول كبير
Post: #107 Title: إبادة الشيشة في الخرطوم Author: عادل سمير Date: 08-25-2010, 08:44 AM Parent: #1
!! أنسى بس
