Post: #1
Title: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 10:44 AM
أنا إفتكر إنو الناس الزيتهم طالع ديل ما عندهم أي حل غير يصوموا في الحر ده ويحتسبوا
هكذا قال صاحبي .
التقيته صباحاً في الحافلة ـ ما ان تحركت الحافلة شوية كده حتي فاجأني من الخلف
فائلاً : رمضان كريم ياخ
نظرت للخلف لأري محدثي فضحكت تذكرت أيامنا التي مضت ورمضانات كثر قضيناها سوياً
كان رمضان بالنسبة لنا شهراً غريب الأطوار . يعني ما تعرف زاتو تعمل معاهو شنو ؟
بتاع الحافلة كان مشغل شريط وصوت محمودعبدالعزيز ينطلق منه جاعلاً من صباحنا الخرطومي
صباحية مباركة عديل ـ المهم ما إن تحركت الحافلة حتي صاح أحدهم من الخلف مطالباً يتاع
الحافلة بإغلاق المسجل ثم تبسمل وتحمدل ماشاء له الله ليدخل بعدها مباشرةً في آيات من الذكر
الحكيم بصوت عالي ـ إبتدر قراءاته بسورة الرحمن ثم عرج علي البقرة ثم قرأ بعضاً من يس
والذكر الحكيم ونحن واجمون لا ندري ما نفعل ـ
رن جرس هاتفي وكنت من فترة قد إخترت له موسيقي شبيهة بالمارشات العسكرية لتتحول الحافلة
بركابها مع رنين مارشات هاتفي وقراءات الرجل لإنقلاب عجيب .
حدقني الرجل بنظرة فيها مافيها من توبيخ ! ما صمت الموبايل والرجل ظل مواصلاً
قلت للرجل لو سمحت ياخينا بعفوية :
لو سمحت عندي مكالمة مهمة ياريت توطي صوتك شوية لأنو الزول ده دي المرة التالتة يضرب لي
وماقادر أرد ليهو ـ وفي الحقيقة الزول ده مطالبني قروش وبالطريقة دي حيفتكر اني زايغ منو
وحكيت مسغبتي ولكأن لم يكن للرجل ولجمهور الركاب وما سكت الرجل للحظة .
فتوكلت علي الحي الذي لاينوم ورددت علي المكالمة
أنا : ألو
هو :ألو إزيك ياخضر
أنا :أهلين ياخ صباح الخير
هو :الو الو الو
أنا : أهلين ياخ صباح الخير
هو :ألو
هو : ياخ حركتك دي ما حلوة ما عايز ترد ما ترد الحركة دي ما بتشبهك
انا: ياخ أنا
هو :ألو
هو : يازول قشرة ماتعتر ليك
ثم طرررق قفل الخط ـ للأمانة ماعرفت اسوي شنو ولا أقول شنو
نظرت للمقرئ الذي كان يجلس الي جانبي مباشرةً وقلت له
انت السبب ياخ دي حافلة ما مسجد
حافلة فاهم يعني شنو حافلة بعد تركب عربيتك الخاصة انشاء الله تعمل فيهو مئذنه
مافي زول بسألك ـ غير انه ما اشتغل بي الشغلة كان وقتها يستعد الرجل في الدخول
لسورة جديدة ـ
أنا زاتي من الله خلقني ماشفت لي زول بخش من سورة لي سورة بإستعجال الزول ده
غالب الظن أنه قرر ختم المصحف في مجلسه ذاك
التفت لصاحبي الذي كان يضحك في منظري والرجل ثم قال حسن :
يازول رمضان كريم ياخ
ده المنظر احتسب ساي
غايتو كترت علينا الاحتسابات دي والواحد بعد ده الا يشتغل محاسب عشان ما ينفجر
من الاحتباس .
الله في
|
Post: #2
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 10:45 AM
Parent: #1
وبتوعين المساويكـ زاتهم شايفهم ظهروا
|
Post: #3
Title: Re: بالنسبة لي رمضان ... فهو جانا الليلة ...!
Author: خدر
Date: 08-10-2010, 10:50 AM
Parent: #2
| Quote: وبتوعين المساويكـ زاتهم شايفهم ظهروا |
والله يا خضر ضحكت لمن دمعت
اسعد الله صباحك يا فنان 
|
Post: #4
Title: Re: بالنسبة لي رمضان ... فهو جانا الليلة ...!
Author: محمد عبد الماجد الصايم
Date: 08-10-2010, 10:55 AM
Parent: #3
ياخ اليوم دا يوم مفترج!
من عماد عبد الله لخدر لـ ..
الناس تعاني ونحن نتبسّم!
|
Post: #5
Title: Re: بالنسبة لي رمضان ... فهو جانا الليلة ...!
Author: محمد عبد الماجد الصايم
Date: 08-10-2010, 10:56 AM
Parent: #4
بعدين كان تبقى زول عملي وترسل ليهو إيميل!!!
|
Post: #7
Title: Re: بالنسبة لي رمضان ... فهو جانا الليلة ...!
Author: محمد عبد الماجد الصايم
Date: 08-10-2010, 10:57 AM
Parent: #5
النجيضة: كان تخت سفة وتولع سجارة!!
ما داير أقول ليكـ تكبس ليهو ***!
|
Post: #8
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 11:00 AM
Parent: #7
تعاني الهينة دي ياودالصايم
ياخ قول :
اني اغرق اغرق اغرق عديل
ليكم يوم لكن
ربنا يسلط ليكم ناس الأمر بالمعروف ديلاك
|
Post: #10
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 11:33 AM
Parent: #7
| Quote: ما داير أقول ليكـ تكبس ليهو ***! |
وانت بكرة تجي تكتب
كان المرحوم صديقاً للكل وبتاع موش كده
غايتو يوم شورتك ماتجي ياودالصايم
|
Post: #9
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 11:05 AM
Parent: #5
| Quote: بعدين كان تبقى زول عملي وترسل ليهو إيميل!!! |
ايميل شنو ياودالصايم
أقول ليك ده زول مركب كرونة ( الجيل الثالث عالي السرعة) يعني ما بديك أيتها
فرصه عشان تعمل حاجة انت كل الممكن يقدرك عليهو ربنا إنك تلزم الصبر .
|
Post: #6
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 10:57 AM
Parent: #3
ياخدر
بلد كلها تناقضات ياصاحبي
وزول يسمعك مافي
الآن أسمع صوت شاب (فنانة) يغني :ورا ورا ورا
والله زولي ده لو قابلوا كان سري بيهو للمسجدالحرام طوالي
|
Post: #11
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 12:53 PM
Parent: #6
علي العموم حصل خير ياخينا والله يكون في عون الناس الحيلاقوك من بكرة وانت ماشي
|
Post: #12
Title: Re: بالنسبة لي رمضان ... فهو جانا الليلة ...!
Author: فيصل محمد خليل
Date: 08-10-2010, 07:56 PM
Parent: #11
خضر سلام وكل سنه وانت طيب
|
Post: #13
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 08:36 PM
Parent: #12
والله الفطور ماعندوا لكن يا فيصل
تصوم وتفطر علي خير ياصديقي
|
Post: #14
Title: Re: بالنسبة لي رمضان ... فهو جانا الليلة ...!
Author: cantona_1
Date: 08-10-2010, 08:44 PM
Parent: #13
الأستاذ خضر حسين خليل
تصوموا وتفطروا على خير ... ورمضان كريم .. أعادة الله علينا وعلى أمة محمد بالخير واليمن والبركات. تقبّل الله صيام الجميع وقيامهم. أميييييييييييييييين.
يا أخي إنت الودّاك تستدين من الراجل وتركب الحافلة شنو؟ لمن تستدين مرة تانية خلي المبلغ يكون كبير عشان تشتري منه عربية وبعد داك زوغ زوغة الذي زاغوا.
|
Post: #17
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 09:05 PM
Parent: #14
الأستاذcantona_1
تحياتي الحارة ورمضان كريم
ياخ أنا ما مستدين ولا أيتها حاجة كل الحكاية إنو مديني القروش دي ومفروض أجيب ليهو حاجة
أها الحاجة دي سما واطه ما لميت فيها ـ الزول ده مستعجل والحمدلله مشيت قبيل واديتو قروشو
علي داير المليم ولو الزول الجمبي داك سكت شوية كنت حأشرح ليهو وكان حيتفهم الوضع
لكن نقول شنو بس ؟
لكن وصيتك بتاعت العربية دي حأشوفها بعد العيد كان ربك سهل 
|
Post: #15
Title: Re: بالنسبة لي رمضان ... فهو جانا الليلة ...!
Author: معاوية عبيد الصائم
Date: 08-10-2010, 08:48 PM
Parent: #13
هسه يا خضر خلاس رمضان هنا من امس !
من امس الشعب الشقيق !! عرفتو ؟ جدع اشرطة نانسى وعمرو وباقى الرهط
مسجلات الشعب المعنى دورت قران سااااااااااااى شفت شغل المواسم نفس الحال !!
يازول نرسل ليك تميس شئ ؟خدمات شئ ؟ تامرنئ خدمة شئ ! حياك الله
ههههههههههههههه
مودتى
|
Post: #16
Title: Re: بالنسبة لي رمضان ... فهو جانا الليلة ...!
Author: talha alsayed
Date: 08-10-2010, 08:56 PM
Parent: #15
خضر كان دفغت ليهو حق الحافله كان بقى مؤلفه قلوبهم وخفض ليك الصوت
المسكين شغلو ده كله عشان يجلى الكمسارى
راحت عليك
مودتى
|
Post: #19
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 09:12 PM
Parent: #16
طلحة العزيز
ازيك ياخ
أنا لو علي كان دفعت للحافلة كلها يا طلحة
بالمناسبة أنا لحدي ما نزلت الكمساري ما هوب ناحيتنا
|
Post: #18
Title: Re: بالنسبة لي رمضان ... فهو جانا الليلة ...!
Author: خضر حسين خليل
Date: 08-10-2010, 09:10 PM
Parent: #15
يا معاوية
القابلة معانا ياصاحب
والله هنا برضو الاشرطة دورت دوير السرور
غايتو لو في سكة جردل جردلين بيك حراق
ونحنا حندعمك بالقنقليز والحلو مر واللازي منو
|
Post: #20
Title: Re: بالنسبة لي رمضان ... فهو جانا الليلة ...!
Author: محمد حيدر المشرف
Date: 08-10-2010, 11:30 PM
Parent: #18
والله ده زول غريب خلاص ..
هسع بكري يسمع بيهو يقوم يدى عضويه ..
..
رمضان كريم يا خضر
لكن الزول ده غريب جدا
ومتأكد انو بكرى لو سمع بيهو حيدى عضويه
|
Post: #21
Title: Re: بالنسبة لي رمضان ... فهو جانا الليلة ...!
Author: مرتضى احمد عبد القادر
Date: 08-11-2010, 04:28 PM
Parent: #20
ــــــ
رمضان كريم ياخدوري
|
|