Post: #1
Title: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 05:29 AM
Parent: #0
صينية رمضان بشكلها التقليدى والقديم المتجدد حبيبة الى نفسى مازلنا فى بيتنا محافظين عليها
رغم محاولة التحديث المستميتة من البنات الصغار والتى باءت بالفشل وظلت الصينية
هى ذاتها بكل محتوياتها القديمة ...
1/صحن العصيدة بـ ( تقلية او روب ابيض او نعيمية او ملاح اخدر)
2/ العصائر .... الابرى .... عصير برتقال و عصير قونقليز ديل ثابتين وممكن نستبدل
القونقليز بكركدى اوعرديب او اى عصير تانى من بنات افكارنا ...
3/ البليلة ...كبكبى فى الغالب او عدسية ...
4/ كورة البلح ثابتة ..
5/ سلطة الروب ....
6/ بطيخ اوشمام او بسبوسة
7/ القهوة والشاى ...
8/ بخور التيمان ..
|
Post: #2
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 05:32 AM
Parent: #1
الفطور على الارض مباشرة وفرشة بلاسيتك كبيرة
تاكل ..تصلى وتتكى وممكن كمان تشاهد التلفزيون من موقعك
_____________________________________
طبعا نحن ارقى من ناس خليل شوية ماحضرنا زمن البرش
|
Post: #3
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 05:33 AM
Parent: #2
بعد صلاة التراويح عندنا صحن شية ثابت
امى مسمياهو تحلية التروايح ...
|
Post: #4
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 05:35 AM
Parent: #3
بعد داك اللعب مفتوح اى زول يشرب الدايرو ياكل الدايرو
لحدى ما نتلمة على صينية العشاء
بقى صينية العشاء دى هى الممكن يحصل فيها كل شئ
|
Post: #9
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خالد العبيد
Date: 08-10-2010, 05:43 AM
Parent: #4
اميرة الشيخ
تحياتي ورمضان كريم
ياناس ما تجهجهونا!
خلونا نفطر على الذكريات
ولا اقول ليك تعالوا يوم افطرو معانا
حلو مر مافي كلو كلو .. الا للمحظوظ !
قبل كم سنة كده زوجتي اشترت ليها حلو مر بالصدفة
الطرقة بي عشرة دولار !
بعد ما عملناه احتفظنا بي الباقي " التفل"
اليوم التاني عصرناهو بالخلاطة ما نفع !
حتى البلح انا صادروه مني في المطار
لكن بيتلقي في محلات العرب " اللبنانيين "
برغم كل شئ السودانيين بعملو المستحيل
عشان الفطور تكون فيه سودانية
يعني العصيدة والقراصة والويكة بتتلقي
رسلو لينا طرقة بس !!
وتفطري على خير
|
Post: #13
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 07:14 AM
Parent: #9
خالد العبيد اخنا الذى باستراليا..
والله ياخالد كان فى شئ مقنعنى من الهجرة للمناطق البعيدة دى
ياهو جنس طرقة الابرى الب10 دولار وفى رواية اخرى مافى كلو كلو
انا غايتو رمضان من غير ابرى وعصيدة مابصومو عديييييييل كدا
تعرف مرة اخواتى الصغار نقو نقة كتيرة شديد ..ليه كل يوم عصيدة وليه وليه
وانتى وامى بس عايزين تمشونا بمزاجكم ..
امى قالت ليهم يابنات داك المطبخ وديك الحاجات انا وبتى ياها عصيدتنا دى
وانتن ابقن نسوان وسون ...
المهم البنات شان يثبتو انهم نسوان شبكونا ليك مكرونة بالفرن وكم نوع سلطات
كدا زى بتاعة التلفزيون ديك وشنو وشنو ...
المهم دا كلو زايدا العصيدة .. زول بياكل حاجة غير العصيدة مافى
حتى البنات مابياكلو الاكل العملوهو وبيتحول كلو للعشاء
امى قالت طيب قبيل شنو قلنا ..
وبهذا انتصرت فكرة امى بانو العصيدة سهلة الهضم وخفيفة على المعدة وبتخليك
تاكل كويس ليتر ....
وبعدين الزول لو عايز يرسل ليكم ابرى يرسلو ليكم كيف ؟
عندكم بوست اوفيس ؟
والله نرسلو ليكم
_________________________________________-
قلت لى حاولتو تعملو ريسيكلينق للابرى دى الا احكيها لامى
|
Post: #48
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: معتصم مكاوي
Date: 08-10-2010, 09:21 AM
Parent: #4
أيوووووه بيحصل فيها شنو ؟؟!!
للفايده يعني ..
|
Post: #64
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 01:22 PM
Parent: #48
Quote:
أيوووووه بيحصل فيها شنو ؟؟!!
للفايده يعني .. |
صينية رمـضان ولا شنـو??
رمضـان كـريم يامعتصمـ مكاوى,,
|
Post: #5
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد أبوالعزائم أبوالريش
Date: 08-10-2010, 05:38 AM
Parent: #3
| Quote: الفطور على الارض مباشرة وفرشة بلاسيتك كبيرة |
لو غيّرتي دي بي (البرش) بتاع السعف داك، تكوني كمّلتي الصورة.
يا بت إنتي المرحوم (الطيب محمد الطيب) ما لمّ فيكي؟
عشان يعمل معاك برنامج (صور شعبية)
رمضان كريم
|
Post: #7
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 05:41 AM
Parent: #5
Quote: لو غيّرتي دي بي (البرش) بتاع السعف داك، تكوني كمّلتي الصورة.
|
ابو الريش صباح الخير وتصوم وتفطر على خير
| Quote: طبعا نحن ارقى من ناس خليل شوية ماحضرنا زمن البرش |
بالله معقولة حصلت لما يلم فينى الطيب محمد الطيب
|
Post: #6
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: osman righeem
Date: 08-10-2010, 05:39 AM
Parent: #3
من صام ولم يفطر يقراصة
فعليه فدية اطعام بوردابي
كل العام وانت بخير بت الشيخ
وربنا يحقق الاماني الفي السفر والغيرها
|
Post: #8
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: haroon diyab
Date: 08-10-2010, 05:43 AM
Parent: #6
Quote: من صام ولم يفطر بقراصة
فعليه فدية اطعام بوردابي |
ويحبس بي سيجارة برنجي من علبة جدييييييييدة .
اميرة وكل ضيوفها
ينعاد عليكم الشهر وانتم بالف خير
|
Post: #12
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: حاتم محمود الجاك
Date: 08-10-2010, 05:53 AM
Parent: #8
صينتك دي لو اديتني ليها مرقت بيها الشارع تكون اللوحة اكتملت
رمضان كريم يا اميرة
|
Post: #15
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 07:22 AM
Parent: #12
Quote: صينتك دي لو اديتني ليها مرقت بيها الشارع تكون اللوحة اكتملت
رمضان كريم يا اميرة |
حاتم يا ود بت الكبير ..كل سنة وانت طيب ورمضان كريم
تعرف اجمل مظهر من مظاهر رمضان هو الافطار برة الشارع ..
مافى لوحة اجمل من كدا ياحاتم واتمنى انها ما تختفى مهما حصل
واديك عشرة صوانى تتطلع بيها الشارع خلى واحدة
|
Post: #14
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 07:19 AM
Parent: #8
هارون طيب كل سنة طيب ..
غايتو سيجارة البرنجى دى تخصص امير اخوى وبعدالافطار مباشرة
حتى قبل الاكل ....
ابوى بحلى بطحنية سوداء
|
Post: #10
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 05:47 AM
Parent: #6
Quote: من صام ولم يفطر يقراصة
فعليه فدية اطعام بوردابي
|
رغيم ياعمك تصوم وتفطر على خير ...
طبعا نحن عرب نيل ابيض ساى القراصة دى اتعلمناها من جيرانا المحس
كل يوم نرفع ليهم صحن عصيدة وهم يرسلو لينا صحن قراصة وهكذا
غايتو يانحن عربناهم ياهم رطنونا ....
من جيت الدوحة كفيلى عمر بوب والسيد حرمه رطانة والقراصة ثابتة
عندهم وعصيدة شان خاطر عيونا بس ..
|
Post: #11
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: سارة علي
Date: 08-10-2010, 05:52 AM
Parent: #10
الطعمية..
وكان لقيت بووووش ما باباهو ....
ـــــــــــــــــــــــــــ
رمضان كريم وكل سنة وانتي طيبة ...
|
Post: #16
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 07:25 AM
Parent: #11
سارة على ..رمضان كريم وتصومى وتفطرى على خير ..
غايتو ياسارة نحن مرات العشاء بكون بووووووش بس
بعد كل كم يوم كدا بناخد لينا استراحة من الدهون والتحمير
بصحن بوش كااارب
والطعمية اهم حاجة تكون حاااااااااااااااارة ومن النار مباشرة
غير كدا دا مابتنفع ....
وتسلمى ..
|
Post: #17
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: وليد عبد اللطيف
Date: 08-10-2010, 07:41 AM
Parent: #16
اختنا اميرة الشيخ
Quote: /صحن العصيدة بـ ( تقلية او روب ابيض او نعيمية او ملاح اخدر)
2/ العصائر .... الابرى .... عصير برتقال و عصير قونقليز ديل ثابتين وممكن نستبدل
القونقليز بكركدى اوعرديب او اى عصير تانى من بنات افكارنا ... |
ياللللللللللللللللللله
ماتعزمونا يوم
ياخي اخوك بحب عصير القنقليز والكركدى جدا
في يوم معزوم فطور مع جماعة طلبت موية قدمو لي كباية
اشرب اتذوق طعم الكركدي والشيء ابيض قلت ياربي الكباية دي كان فيها كركدى قبل كده
سالت بعد ذلك اخبروني بأن هذا كركدى ابيض
ومن ما قمنا بنشوف الكركدى احمر
سبحان الله
ومن يومها عرفت المعلومة ...
---------------------
اميره رمضان كريم ليك وللضيوف
|
Post: #19
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خضر حسين خليل
Date: 08-10-2010, 07:47 AM
Parent: #17
شوفي ليكي بس ناس صايمين بعد ده
السنة دي اي زول تقابلو يقول ليك
والله حسب الجو
|
Post: #24
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:02 AM
Parent: #19
ياخضر .. كل سنة وانت طيب ...
الجو العندكم دا غير الصيام ناقصو شنو ..
بلاش استهبال معاك ....
لا انت لا مورتا ماقاعدين تصومو اصلا ودى معلومة انا متاكدة منها
كدى جربو مرة واحدة تصومو احتمال تتفتح عليكم
|
Post: #23
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:00 AM
Parent: #17
| Quote: ياخي اخوك بحب عصير القنقليز والكركدى جدا |
وليد عبداللطيف ..رمضان كريم وينعاد عليك والاسرة بالصحة والعافية
تعرف العصائر المحلية دى الناس ما مكتشفنهن كويس وفى اسرار تانية بتخلى
مذاقها مختلف ودى اسرار الناس الحرفها ...
مثلا ....
القنقليز بعد ماتصفيهو ممكن تخلطو ومعاهو قطعة شمام او شرائح ليمون او شوية كاستردد
وكذلك الكركدى ...
يعنى ممكن يكون عندك نفس العصير كل يوم بس بنكهات مختلفة وطبيعية ,,
قلت لى مابتعرف الكركدى الابيض؟
شكلك خرطومى وكدا
تحياتى
|
Post: #18
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: منال
Date: 08-10-2010, 07:44 AM
Parent: #16
طبعا يا اميرة فى ناس بقولو فى رمضان ما بياكلو سمك
لكن عندنا كل جمعة لازم صينية السمك تطلع حااااره من الفرن
والصباح تقومى ريقك ناشف
كل سنة وانتى طيبة يا اميرة
ولكل البورداب تصومو وتفطرو على خير ...
|
Post: #21
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: نادر النور آدم
Date: 08-10-2010, 07:52 AM
Parent: #18
أنا عن نفسي صينية الفطور لا تكتمل إلا بوجود صحن فول
إييييييييييوة فول
وفول فقط مكسور جزئياً + زيت سمسم
ولا شي تاني ما معاهم
وكل سنة وكلكم طيبين
|
Post: #26
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:08 AM
Parent: #21
نادر... رمضانك كريم ....
غايتو فول فى الفطور دا اصصصصصلو ماقاعدين نجربو
الا يكون معانا ضيوف مثلا
بس فى العشاء اوكى ممكن نجرب كل شئ
ويديك الصحة والعافية
|
Post: #22
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عبدالله كع
Date: 08-10-2010, 07:55 AM
Parent: #18
رمضان كريم يا بت الشيخ ..
لكن الذه حاجه في رمضان .. (حراااااااق الروح ) القبل الفطور
ودي البتلذذ الحا جا ت الفوق دي !!
و تصومي وتفطري علي (حراااق الروح و الشحتفه ) .... رمضان مممتع !!
ومتابعه احلي لبرامج رمضان .. !
|
Post: #28
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:12 AM
Parent: #22
عبدالله كع ..رمضانك كريم وينعاد عليك بالصحة والعافية
تعرف حراق الروح دا انا بجينى لما اشوق ازيار الموية فى راكبوتنا
منديات والنقاع نضيييف وصاااافى اقرررررب ادخل جواهم ..
برضو لما الصينينة تطلع بدرى شوية ونكون ملتفين حولها وراجين الاذان
ال5 دقائق تبقى زى الساعة دا برضو حراق روح من نوع تانى...
والعفو والعافية .
|
Post: #25
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:05 AM
Parent: #18
منال ..سلاااام وكل سنة وانت طيبة ..
معلومة السمك بعطش دى ما عارفة صحيحة ولا كلام ساى ؟؟
نحن برضو ممكن نتعشى بسمك عادى ولا شغالين بقصة يعطش دى
ماهو كل يوم بنكون عطشانيين يعنى بقت على السمك ؟؟
تسلمى
|
Post: #97
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 05:19 PM
Parent: #2
رمضان كريم تانى ياشباب
وتصومو وتفطرو على خير
|
Post: #20
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد الكامل عبد الحليم
Date: 08-10-2010, 07:52 AM
Parent: #1
يا اميرة الشيخ...... اكتمل القول ...نستاذنك ان ناكل مما نقرأ...
شهر مبارك علي جميع المتداخلين علي هذه الصينية...وامنيات صادقة بايام رمضانية عاطرة بالنفحات والصلوات و الدعوات .
|
Post: #27
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: هواري نمر
Date: 08-10-2010, 08:08 AM
Parent: #20
Quote: تعرف اجمل مظهر من مظاهر رمضان هو الافطار برة الشارع ..
|
اسمو شراب المويات....المويــــــــــات
قال (افطار) قال...
بت الشيخ..
كيفنك؟؟ورمضان كريم.
__
الابري ده,مالو ما بقطع المحيط ولا بخاف يغرق؟؟
|
Post: #29
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: هواري نمر
Date: 08-10-2010, 08:16 AM
Parent: #27
| Quote: انا غايتو رمضان من غير ابرى وعصيدة مابصومو عديييييييل كدا |
عايزة ليــــــــــك سبب بس!!
__
يعني لو جيتي هنا,يعني جالداهو جالداهو!!
لوووووووووووووول
|
Post: #31
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Abdlaziz Eisa
Date: 08-10-2010, 08:18 AM
Parent: #27
Quote:
صحن العصيدة ..جك الابرى ....كورة البليلة والبلح .... تانى شنو ؟ |
عندك أم جنقر؟!!!!!!!!!
|
Post: #33
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:30 AM
Parent: #31
| Quote: عندك أم جنقر؟!!!!!!!!! |
سلام ياعبدالعزيز ...رمضانك كريم ...
والله العظيم ذكرتنى حاجة مهمة شديد ة كنت ناسياها
ام جنقر دى ممكن نعملها مرة او مرتين فى الاسبوع
وحبوبة الله يرحمها عندها اعتقاد جازم بانها (بتقطع)* العطش
وايه رايك بعرف اسويها ؟
والعفو والعافية
____________________________
للحناكيش والشهادات الاجنبية
*بتقلل الاحساس بالعطش
|
Post: #32
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:22 AM
Parent: #27
يا هواااااااااااااااااارى .....
مش بالغت ...؟ياخ مالك ؟؟
لاحس .. لاخبر .؟
دى نيويورك ولا اليابان ؟؟
لو عارفة كنت فتحت البوست دا من زماااااااااااااان ....
بركة بالشوفة ورمضانك كريم وكل سنة وانت طيب ....
|
Post: #36
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:40 AM
Parent: #27
| Quote: الابري ده,مالو ما بقطع المحيط ولا بخاف يغرق؟؟ |
قول كيف الطريقة وحنرسل ليك ..
|
Post: #89
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:36 AM
Parent: #27
Quote: اسمو شراب المويات....المويــــــــــات
قال (افطار) قال... |
ياناس غرب الاطلنطى بالله نقطوتنا بسكاتكم
اها كان افطار ولا شراب مويات انتو فارق معاكم بشنو
عندكم حلو مر؟عندكم عصيدة/قراصة... وتيب
انتو بالله قاعد تصومو بتوقيت وين؟
عندكم مجلس افتاء؟
|
Post: #30
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 08:17 AM
Parent: #20
| Quote: يا اميرة الشيخ...... اكتمل القول ...نستاذنك ان ناكل مما نقرأ... |
محمد الكامل ..رمضانك كريم ..
ياخ البوست مفتوح ليك ولو فى طريقة نرسل ليك صينينة حنرسلها ليك
مافى مانع ...
وامنيات اصدق ليك بدوام الصحة والعافية والتواصل ...............
والعفو والعافية ...
|
Post: #34
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Abdlaziz Eisa
Date: 08-10-2010, 08:36 AM
Parent: #30
Quote:
والله العظيم ذكرتنى حاجة مهمة شديد ة كنت ناسياها
ام جنقر دى ممكن نعملها مرة او مرتين فى الاسبوع
وحبوبة الله يرحمها عندها اعتقاد جازم بانها (بتقطع)* العطش
وايه رايك بعرف اسويها ؟
والعفو والعافية |
بت الشيخ
أول ما جبتي فيها حبوبتك.. ياها أكيد ما عندك فييه نصيب...
انتي اقدري على العصيدة...
رمضان كريم.. تصوموا وتفطروا على خير ان شاء الله...
|
Post: #42
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عبد الناصر الخطيب
Date: 08-10-2010, 08:59 AM
Parent: #34
أميرة الشيخ , رمضان كريم وتصومي وتفطري على خير ,,,
ما عندنا فطور بمعني ((الفطور)) المتعارف عليهوا صينية تتخته واكل لما الناس تشبع
شوية بلح ,وكباية لبن , وسلطانية صغيرة شوربة خضار ,
وكباية عصير والسلام على طه
والحاجات دي بكميات صغيرة ...
****
الفطور الرسمي ممكن بعد التراويح بزمن
طبعا نظام ما بنفع لو عازم ناس وخصوصا ناسنا
قبل كم رمضان كنت ( معارض ) للفكرة .... حاليا ( اتسستمته ) عليها خلاص ..
مع انو الزول جوه حنين لسستموا القديم
يبقي المغربية فطور خفيف , صلاة المغرب , التلفزيون ...تطلع لو عندك مشوار
الاكل بمعناهوا تتحكر وتقعد تاكل لما تشبع ده لاحقا ... بعد 10 م
وبيقي عشاء
السحور برضوا وجبة خفيفة
أها تصومي وتفطري على خير ,,
-------------------
وللكل رمضان كريم
|
Post: #49
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:27 AM
Parent: #42
عبدالناصر الخطيب .. رمضانك كريم
تصوم وتسستم على خير ....
نحن لمة الفطور عندنا طقس واهم من الفطور نفسو
حتى الصينية نفسها محتوياتها ما كتيرة لو لاحظت ..عصيدة... عصير.... بلح ..بليلة
وكلها حاجات خفيفة شان كدا امى مصرة عليها وبشكلها القديم وانا كمان مصرة عليها
وحاسستم بيها باقى خلق الله الحولينى كان ربنا هون لانو بالنسبة لى طقس جميل ومحبب......
وبعد الفطور زى ما قلت بنلعب فرى قيم وكل زول ومزاجو
ونجى نتلمة تانى على صينية العشاء ودا بقى ممكن تتوقع فيهو اى حاجة
السحور
ناس مننا بتتسحر برقاق وناس تانيين عصير وناس موية الله والرسول
وفى زول بصوم من غير سحور هو انا دى
تسلم والعفو والعافية
|
Post: #44
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:13 AM
Parent: #34
والله ياعبدالعزيز حتى العصيدة اتعلمناها من حبوبة
وورثتنا حاجات كتيرة سمحة وبنفتخر بيها
ام جنقر قايلها شنو ..مش ياهو دخن مكنفد وبالعدم ممكن يتخلط على خفيف
ومعاهو شوية عرديب وروب وسكر
الله يسالنى ما صعبة ...
|
Post: #35
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: نعمات حمود
Date: 08-10-2010, 08:37 AM
Parent: #30
يا اميره كل سنه وانت بالف خير
نسيتي البليلة
كنت دايما في صراع مع امي الله يعودوا عليها بالخير
هي بتحب بتاعت (اللوبيا )
وانا بتاعت (الحمص )الكبكبي..وبعدين سلطة الروب يا ميرة
والشوربة
(تذكري سوبر ديب العجيب )دا كان من مستحدثات رمضان
لكن رمضان في الغربة لا طعم ولا ليق
ما يقشروا لينا المغتربين
كان اجمل حاجة عندي في السودان بعد التراويح
بنتمشى انا واخواتي وناخد لينا خشم خشمين جنب البقالة وفي الشوارع مع اولاد الحلة وكدا ..ومواضيع الافطار الجماعي ونظافة الشوارع في مجموعات وكدا ...
ليت وليت وليت ولكن .....
لك كل الامنيات
|
Post: #47
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:18 AM
Parent: #35
نعمات حمود ..رمضانك كريم ..
البليلة مقنطرة فى العنوان يابت امى بس جوة صحى مانزلتها
ياخ انت جيل سوبر ديب وكدا ...؟؟
رمضان فعلا فى الغربة ماعندو طعم ومابتحس بيهو
نص يومك شغل والنص التانى نوم ....
وتقوم تاكل اى حاجة وتشرب اى حاجة ......
عجبتنى الونسة مع اولاد الحلة دى يخيل لى الليلة الحركات دى شغااااااالة
بركة بالشوفة وتصومى وتفطرى على خير
والعفو والعفاية
|
Post: #37
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد عبد الماجد الصايم
Date: 08-10-2010, 08:41 AM
Parent: #30
الجُرسة السنوية لبت الشيخ!!
|
Post: #50
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:29 AM
Parent: #37
| Quote: الجُرسة السنوية لبت الشيخ!! |
يعنى قصدك ابكى ساى كدا من غير بوست ؟؟
ورمضانك كريم والاسرة
تصوم وتفطر على خير
|
Post: #38
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: nazar hussien
Date: 08-10-2010, 08:41 AM
Parent: #30
Quote: حلو مر مافي كلو كلو .. الا للمحظوظ !
|
يا خالد العبيد عنوانك سريع نرسل ليك آبري...
يا راجل دا كلام دا...انت قايل استراليا كبيرة علي الآبري...
ولو عايز معاه كركدي برضو حاضرين...
|
Post: #52
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:31 AM
Parent: #38
نزار كل سنة وانت طيب
اذا خالد العبيد رسل عنوانو اعمل لى سي سي لانى برضى حارسل
ليه ابرى واى حاجة يطلبها ..
العفو والعافية
|
Post: #39
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عبد اللطيف السيدح
Date: 08-10-2010, 08:43 AM
Parent: #30
أميرة بت الشيخ
وجميع رواد البوست
|
Post: #53
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:32 AM
Parent: #39
تسلم السيدح وينعاد علينا بالخير والبركة
العفو والعافية
|
Post: #40
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عفاف الصادق بابكر
Date: 08-10-2010, 08:44 AM
Parent: #30
مر مر يا عسل .. ياخ رمضان كريم عليك وتصوموي وتفطري بالحاجات ديك كوووووووووووووولها علي خير ..
اسمعى مالك مع الشوربة .. والله انا كان ما شربته شوربة بكون خرماااانه شديد خلاس ..
وطبعا الشوربه انواع كتييييرة وتعالى بي هناك فى بوست امانى حق ناس ماما دوما .. سمح ..
اما العصيدة فيوميا ولا نامت أعين الجبناء ... هههههه طبعا هم اولادي العندهم فيها رأي ..
|
Post: #41
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: almulaomar
Date: 08-10-2010, 08:51 AM
Parent: #40
كل عام وأنتم جميعاً إلى الله أقرب
يا عالم في إختراع إسمه الشوربه دي كأس العالم عديل كده ما تنسونا من صالح الدعوات لكين والله تا الله بالله الشمس في الخرطوم في رمضان بتعمل فينا عمايل تقرب تغيب وتاني تترتر لي ورا زي رقيص قبائل القراقي الأثيوبية.
|
Post: #43
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: البشير دفع الله
Date: 08-10-2010, 09:06 AM
Parent: #41
أختنا أميره الشيخ
تحية رمضانية كاربة
نسيتي أهم زول ياخ
الفول
آي الفول بزيت السمسم وحبة شمار
في جده وقبل الافطار الناس بتقيف طوابير عشان تشتريه
------------------------------------------------------------
يتقبل الله منكم ومن الجميع
وكل عام وانتم بخير
|
Post: #67
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 01:39 PM
Parent: #43
Quote: في جده وقبل الافطار الناس بتقيف طوابير عشان تشتريه
|
البشير دفع الله....رمضان كـريم..
ياناس السعوديـة انتـو ماعندكم عصيدة ولا شنو?
كـولكم شابكننا فول فول عذابة ومتـزوجين,,,
غايتو فولكـم البقيفو ليهو صفوف دا الا يكـون فيهو سكـر,,,
تصوم وتفطـر على خـير والعفو والعافية...
|
Post: #45
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: هواري نمر
Date: 08-10-2010, 09:14 AM
Parent: #41
Quote: يا هواااااااااااااااااارى .....
مش بالغت ...؟ياخ مالك ؟؟
لاحس .. لاخبر .؟
دى نيويورك ولا اليابان ؟؟
|
يا أميرة
ياخي ( متأسفوووووووووووون جداً جداً), لكن البرنامج كان مضغوط شديد
تتصوري في اسبوع انا لفيت عدد من المُدن والولايات
مرقتها لقريب حدود كندا.
زيارات واجتماعيات و مقابلات في عدد من الجامعات و شوبنق ومقابلة اصدقاء وعووووووووك
ورجعت كنت شغال في نفس اليوم , يعني من المطار للبيت للشغل بعدها.
بس كانت جولة جميلة جداً.
__
استاذ سيف الدولة كامل,يبلغك سلامو,هو واسرته الجميلة.
|
Post: #93
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 08:14 AM
Parent: #45
Quote: يا أميرة
ياخي ( متأسفوووووووووووون جداً جداً), لكن البرنامج كان مضغوط شديد
تتصوري في اسبوع انا لفيت عدد من المُدن والولايات
مرقتها لقريب حدود كندا.
زيارات واجتماعيات و مقابلات في عدد من الجامعات و شوبنق ومقابلة اصدقاء وعووووووووك
ورجعت كنت شغال في نفس اليوم , يعني من المطار للبيت للشغل بعدها.
بس كانت جولة جميلة جداً.
__
استاذ سيف الدولة كامل,يبلغك سلامو,هو واسرته الجميلة. |
لالالا ياخ ما فى اسف ولا حاجة بس كنا مفتقدنك شديد الفترة الفاتت
كويس انك قضيت اجازة واستمتعت وطايبت الاصحاب
وصل سلام الاستاذ ونحن نبدله التحايا والمحبات
|
Post: #46
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خالد حامد الجزولي
Date: 08-10-2010, 09:16 AM
Parent: #41
اتفضلوووووووو
|
Post: #51
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: منال
Date: 08-10-2010, 09:31 AM
Parent: #46
حسى ياخالد مجوعنا من الليله مالك
لكن هى ماصينيه بالزات صحن الباسطه
|
Post: #55
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Nader Abu Kadouk
Date: 08-10-2010, 09:37 AM
Parent: #51
بت الشيخ رمضان كريم
شوفتي صينيتك الكاربه دي لو ما نهايتها سفه مدنكله من عماري ممتاز إبقى ما في فايده
|
Post: #68
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 01:43 PM
Parent: #55
| Quote: شوفتي صينيتك الكاربه دي لو ما نهايتها سفه مدنكله من عماري ممتاز إبقى ما في فايده |
الليلة ووووب يا ابو كـدوك السفة بالنسبةلمنـو?/
غايتو للضمـان كـدا نحولك للركـن بتاع ابـوى
ورمضان كـريم وتصوم وتفطـر على سفة
|
Post: #71
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خالد حامد الجزولي
Date: 08-10-2010, 03:31 PM
Parent: #51
منال
| Quote: بالزات صحن الباسطه |
الظاهر إنتي تبع مقولة المؤمن حلوي
تحياتي
|
Post: #56
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: هواري نمر
Date: 08-10-2010, 09:38 AM
Parent: #46
Quote: تعرف اجمل مظهر من مظاهر رمضان هو الافطار برة الشارع ..
|
هو مظهر انساني وتكافل فطري قام بين الناس في ايام رمضان,(السباتة,البرش,السجادة) أي كان نوعها,يجتمع الغني والفقير,الكبير والصغير
القريب والبعيد, وحتي المارِ في الشارع.
تجمعهم (صواني) الطعام,يتبادلونها مع بعض ,كل (يحلف )بأن تتناول من طعامه وشرابه شئياً,لا يرضون بأن ترجع أوانيه وبها طعام,يغلظون في(الحلف) لكل عابر سبيل
يترصدون السيارات العابرة,ويعزمونهم بأن لابد من (تحليل) الصيام ,حتي وان كانت بيوتهم غير بعيدة.
بينهم الالفة ,المحنة والمحبة,يفتقدون الغائب و يسالون عن المسافر,ويعودون المريض.
___
بت الشيخ مالك علينا الليلة ياخ؟
|
Post: #59
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد الكامل عبد الحليم
Date: 08-10-2010, 10:48 AM
Parent: #46
تحية صادقة للاستاذ خالد حامد الجزولي...بعد ان وضعت اميرة الشيخ سيناريو الصينية الفاخرة تجئ يا خالد بصينيتك المدنكلة ...لا غرابة في اهل الموردة ..ناس الحيشان والضيفان فكيف ببيت عمنا المرحوم حامد الجزولي....يجتمع الرياضيون والمشجعون والاصحاب...لياتي خالد واخوانه يحملون الصينية الما خمج...
وبعد البسملة يكون حال الفريق حاضرا وكيف الاستعداد للمبارة القادمة...ده كلو كوم
والكوم الاخر هو وما يخرج به الجميع من ود صادق ومعاني يتحدث بذكرها الركبان
اكلنا وشبعنا من اميرة وخالد الجزولي...يديكم العافية
|
Post: #66
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 01:32 PM
Parent: #46
خـالد الجـزولى ,,,رمـضان كـريم
دى صينية فطـور العيد عديـــل مـاتجهجهنـا ياخ
للضمان كدا حاختها صورة بروفايل يوم العيد,,
تصوم وتفطـر علـى خير والعفو والعافية,,
|
Post: #73
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خالد حامد الجزولي
Date: 08-10-2010, 03:40 PM
Parent: #66
أميرة بت الشيخ (ست البوست )
طابت أوقاتك
احتلينا ليك بوستيك معليييييش
Quote: خـالد الجـزولى ,,,رمـضان كـريم
دى صينية فطـور العيد عديـــل مـاتجهجهنـا ياخ
للضمان كدا حاختها صورة بروفايل يوم العيد,,
تصوم وتفطـر علـى خير والعفو والعافية,, |
لله والرسول
تحياتي
|
Post: #65
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 01:28 PM
Parent: #41
رمـضان كـريم يامـلا عمـر....
مـش قبل كـم يوم بوستاتكـم تتطاقش هنا ?الجو مـرتاح ...ا
لغيم كـتلنا الجو بارد شدييد بـس سمعت برمضان بقيت تتشكـى مـن الشمـس?
طالما الدنيا مسخنة وحرها تصلع مـافى داعـى للشوربـة اصلاااا,,
|
Post: #54
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 09:36 AM
Parent: #40
عفاف الصادق ..كل سنة وانت طيبة ..
تعرفى ثقافة الشوربة دى ما قدرت عليها الا بعد جيت الخليج هنا
هناك ببد ا ليك بالبلح ونص كباية موية والصلاة وبعديها العصيدة
وكباية الشاى ويادار مادخلك شر ..
لكن لما ارجع البلد عااادى...لا بتذكر شوربة ولا يحزنون ...
تسلمى ياستى والعفو والعافية
|
Post: #57
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Abdlaziz Eisa
Date: 08-10-2010, 09:54 AM
Parent: #54
Quote: والله ياعبدالعزيز حتى العصيدة اتعلمناها من حبوبة
وورثتنا حاجات كتيرة سمحة وبنفتخر بيها
ام جنقر قايلها شنو ..مش ياهو دخن مكنفد وبالعدم ممكن يتخلط على خفيف
ومعاهو شوية عرديب وروب وسكر
الله يسالنى ما صعبة ... |
يخرب بيتك يا قووقل...!!
يعني مافي طريقة مع جكس الزمن ده طالما المعلومة متوفرة في النت..
آل حبوبة آل...!!!
|
Post: #58
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عبد الناصر الخطيب
Date: 08-10-2010, 10:07 AM
Parent: #54
صاحب لى مسج ببارك رمضان و لى تعليق ساخر في الحته دي
يا عمك ما *لبن حليب
وبرضوا غير رمضان بتكون الكباية دي اساسية
وبتمني الناس تجرب الحاجة دي أنهم يشربوا لبن بعد وجباتهم خصوصا الغدا والعشاء
وحيشوفوا الفرق لانو الحته دي حتبعد عنهم اى مشاكل في الهضم وحيحسوا براحة ما عادية
-------------------------
| Quote: عرفى ثقافة الشوربة دى ما قدرت عليها الا بعد جيت الخليج هنا |
هنا يا اميرة _ المملكة _ علمتنا ثقافة اللبن دي
*معليش جينا نرد المسج هنا ونتكلم عن اللبن شوية
رمضان كريم
|
Post: #60
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: طارق جبريل
Date: 08-10-2010, 10:51 AM
Parent: #58
Quote: 6/ بطيخ اوشمام او بسبوسة
|
دي برجوازية متعفنة
يا بت الشيخ كل سنة وانت طيبة
|
Post: #61
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمود بكر
Date: 08-10-2010, 11:59 AM
Parent: #60
الاميرة بت الشيخ وكل البورداب
رمضان كريم نساله الله ان يتقبل منا ومنكم الصيام والقيام
وان يجعلكم من عتقائه من النار
اجمل ما في الافطار اللمة بره الشارع
او داخل البيت ثم العصيدة والابري الاحمر
(الابيض لا احبه) ثم سلطة الروب وام جنقر
العصيدة في رمضان 31 عصيدة (فطور يوم العيد)
القراصة في العشاء لانه بتقعد في البطن
مع امنيات للمغتربين بكراتين ابري عابرة للقارات
|
Post: #86
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:26 AM
Parent: #61
Quote: اجمل ما في الافطار اللمة بره الشارع
او داخل البيت ثم العصيدة والابري الاحمر
(الابيض لا احبه) ثم سلطة الروب وام جنقر |
محمود بكر ... رمضانكم كريم ....
فعلا لمة الشارع دى تحسسك بطمانينة وانو نحن بخير
ومتواصلين ..... تخيل هنا فى قطر فى منطقة اسمها دخان
السودانيين بفطرو برة الشارع ؟؟ تصدق؟
ورمضان دا مافى اجمل من صحن عصيدة وابرى .....
الابرى الابيض حتى لو لونو ماببقى سمح
اختى كانت مسمياهو ابرى مناديل الورق
شكرا وتصوم وتفطر على خير
|
Post: #62
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: علي الكرار هاشم
Date: 08-10-2010, 12:06 PM
Parent: #60
أتذكر عمي عكاشه
يأتي للبرش
حاملا بيده اليمني صحن بليله
في نصه تمرات
وفي يده اليسري كورة حلومر
تسبح بقايا الحلومر لانو حبوبه الحسنة بتصفي بايدها
بدون مصفي
كل سنه وانتي طيبه يا بت الشيخ
|
Post: #63
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Ashraf el-Halabi
Date: 08-10-2010, 12:45 PM
Parent: #62
| Quote: بعد صلاة التراويح عندنا صحن شية ثابت |
دا يبقى افترا!!
واللاي يا بت الجزار احنا كفقرا محل صحن شيتكم دي عندنا كنافة،
وكنا قايلين نفسنا متجدعين!!
ياخي الكنافة دي أهم زول في رمضان، ولغاية قريب كنت أظن الصيام لا يصح من غيرها
كل سنة إنتي وأسرتك بخير يا بت الشيخ
|
Post: #90
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:45 AM
Parent: #63
Quote: دا يبقى افترا!!
واللاي يا بت الجزار احنا كفقرا محل صحن شيتكم دي عندنا كنافة،
وكنا قايلين نفسنا متجدعين!!
ياخي الكنافة دي أهم زول في رمضان، ولغاية قريب كنت أظن الصيام لا يصح من غيرها
كل سنة إنتي وأسرتك بخير يا بت الشيخ |
اشرف رياحين ...رمضان كريم
والله يااشرف نحن ابوى دا لو ماقاعد معانا فى البيت كنا قلنا شغال جزار
من شدة ما بحب اللحوم وحببنا فيها ...
الوجبات كلها لحمة ومابينها برضو لحمة شفت كيف ...؟
كان وصيتو لطماطم يجيب ليك لحمة .... ويغالطك يقول ليك لا ماقلت طماطم
اى اى اى والله ذكرتنى الكنافة وهى بت عم رمضان لزم
تصوم وتفطر على خير ياخ
|
Post: #88
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:32 AM
Parent: #62
Quote: أتذكر عمي عكاشه
يأتي للبرش
حاملا بيده اليمني صحن بليله
في نصه تمرات
وفي يده اليسري كورة حلومر
تسبح بقايا الحلومر لانو حبوبه الحسنة بتصفي بايدها
بدون مصفي |
على الكرار ... رمضانك كريم ..
والله العظيم دى من اجمل المناظر البشوفها كنت يوميا
دا مارق بصينينة وديل مارقين بجرادل وشفع شايلين الاباريق والبروش
ياسلام على حبوبتك الحسنى شفتها البساطة دى كيف؟
كل سنة وانت طيب والعفو والعافية
|
Post: #69
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-10-2010, 01:46 PM
Parent: #60
طـارق جبريل....
برجـوازية دى شكـلها عاجباكـ ومالاقى حتة تختها فيها
والله الحاجات دى ارخص شئ من جملة التحليات الباقية,,
تصوم وتفطـر على خـير
|
Post: #70
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خالد حامد الجزولي
Date: 08-10-2010, 03:17 PM
Parent: #69
أخي محمد عبد الحليم
Quote: تحية صادقة للاستاذ خالد حامد الجزولي...بعد ان وضعت اميرة الشيخ سيناريو الصينية الفاخرة تجئ يا خالد بصينيتك المدنكلة ...لا غرابة في اهل الموردة ..ناس الحيشان والضيفان فكيف ببيت عمنا المرحوم حامد الجزولي....يجتمع الرياضيون والمشجعون والاصحاب...لياتي خالد واخوانه يحملون الصينية الما خمج...
وبعد البسملة يكون حال الفريق حاضرا وكيف الاستعداد للمبارة القادمة...ده كلو كوم
والكوم الاخر هو وما يخرج به الجميع من ود صادق ومعاني يتحدث بذكرها الركبان
اكلنا وشبعنا من اميرة وخالد الجزولي...يديكم العافية |
أخجلتنا بكلامك الجميل
تحياتي وشكري وتقديري
وسلام أميرة
|
Post: #72
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد المرتضى حامد
Date: 08-10-2010, 03:40 PM
Parent: #70
| Quote: صحن العصيدة ..جك الابرى ....كورة البليلة والبلح .... تانى شنو ؟ |
أم جنقر يا أميره،
أم جنقر،
يا اخوانا نسوي شنو مع جيل الديجيتال .
كل سنه وانت طيبه.
|
Post: #74
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: khaleel
Date: 08-10-2010, 07:26 PM
Parent: #72
يا برنسيسة
اسمو شراب مويات وليس فطور الغالبية العظمي من اهل الطيبين
ما عندهم كهرباء وشغالين في الحر
في الفطور الناس تقع شراب في الموية وتاكل شوية
انا شخصيا لو صينية فطور رمضان فيها المن والسلوي
باكل خمسة ملاعق بالعدد عصيدة وكباية عصير ما بزيدا تاني
واهم شي بعد داك التكية في البرش وسفة عماري
ووا ناري ووا ناري الصعيد سفرو اللواري
|
Post: #75
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: طارق الكوتش
Date: 08-10-2010, 07:48 PM
Parent: #74
كل سنه وانتم طيبين
وربنا يحقق الامانى للجميع
|
Post: #76
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عمر علي حسن
Date: 08-10-2010, 08:41 PM
Parent: #75
ياميرة يابت اخوي العنده السكري يعمل شنو ؟ .. يقعد يغني "بس بعاين .. بعيوووووووووووني" ؟
ثم صينية خالد الجزولي دي يعني الواحد يمشي يركب الاسعاف ويجي يفتش مكانها ؟
تصدقي؟ انا مابرفع !
بلا سكري بلا دوشة!
كل سنه وانتو كلكم طيبين واياكم تسمعوا كلام الدكاترة والا فلن يكون لكم من صيامكم الا الجوع والعطش ..
عمر علي حسن
|
Post: #78
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Raja
Date: 08-10-2010, 08:54 PM
Parent: #76
الحبيبة أميرة..
رمضان كريم.. وكل عام وأنت والمعاك بألف خير,,
--
طبعا عنوانك ده لي زي (كم) سنة كده ما شفتهم مجتمعين مع بعض. (جك الأبري) ما إختفى من رمضاناتي أبدا. العصيدة (أحيانا). أما البليلة دي فبتذكر السنة الفاتت لقيتها في سفرة الجندرية في صنعاء. وكانت غايبة مني من دهر كده.. البلح أصلو أنا من ناسه. ما بعرف أكله (لأن فيهو نواة). ووحياتك ما حنكشة. طالعة للحاجة. أي شئ في بذر ونواة ما قاعدين ناكله.
أما عن الـ (تاني شنو؟) فدي ممكن أفتي فيها. ههههههه
أهم شئ الشوربة. عدس/ خضار /أو فراخ بالدقيق.
الصينية لازم تتدبًج برقاق باللحمة، أو كوسة بالباشميل. أو اي شئ بيدخل الفرن هههههههه.
و.. الحلو.. قطايف (لازمن ودروووري). كنافة بالقشطة (بتاعت كل يوم). أو لو عايزين خفيف لقيمات في العسل(ممممم. ريقي جرى)..
طبعا يا أميرة الفصاحة دي كلها وبكرة حتلاقيني فطرتا بأكل جاهز من برًة. الله يقطع الغربة والوحدة ):
رمضان كريم
|
Post: #100
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 05:46 PM
Parent: #78
Quote: الحبيبة أميرة..
رمضان كريم.. وكل عام وأنت والمعاك بألف خير,,
--
طبعا عنوانك ده لي زي (كم) سنة كده ما شفتهم مجتمعين مع بعض. (جك الأبري) ما إختفى من رمضاناتي أبدا. العصيدة (أحيانا). أما البليلة دي فبتذكر السنة الفاتت لقيتها في سفرة الجندرية في صنعاء. وكانت غايبة مني من دهر كده.. البلح أصلو أنا من ناسه. ما بعرف أكله (لأن فيهو نواة). ووحياتك ما حنكشة. طالعة للحاجة. أي شئ في بذر ونواة ما قاعدين ناكله.
أما عن الـ (تاني شنو؟) فدي ممكن أفتي فيها. ههههههه
أهم شئ الشوربة. عدس/ خضار /أو فراخ بالدقيق.
الصينية لازم تتدبًج برقاق باللحمة، أو كوسة بالباشميل. أو اي شئ بيدخل الفرن هههههههه.
و.. الحلو.. قطايف (لازمن ودروووري). كنافة بالقشطة (بتاعت كل يوم). أو لو عايزين خفيف لقيمات في العسل(ممممم. ريقي جرى)..
طبعا يا أميرة الفصاحة دي كلها وبكرة حتلاقيني فطرتا بأكل جاهز من برًة. الله يقطع الغربة والوحدة ):
|
رجاء يا ابن بطوطة ...رمضانك كريم وكل سنة وانت طيبة
ياخ تعالى مارة بالدوحة مرة واحدة وحتلقى الصينية دى بحذافيرها\
حاجات تانية ما حتخطر على بالك .. بس فكرى فى العرض دا جادة
رقاق وكوسة وبشاميل وفطائر بالنسبة لينا دا كلام حناكيش ومابدخل
بطنا خاصة فى وجبة الافطار (العشاء ممكن )
وتسلمى ياجميلة ونشوفك قريب
|
Post: #99
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 05:40 PM
Parent: #76
عمو عمر على ..رمضان كريم وكل سنة وانت طيب
يديك الصحة والعافية وطولة العمر يارب
السكرى قالو بقى مرض حناكيش يعنى بسيط
وتسلم من كل شر والعفو والعافية
فعلا بلا سكرى بلا دوشة
|
Post: #98
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 05:38 PM
Parent: #75
طارق الكوتش رمضان كريم وكل سنو وانت طيب
وتسلم من كل شر والعفو والعافية ياخ
|
Post: #92
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:51 AM
Parent: #74
ياخليل .. رمضانك كريم ...
فعلا رمضان ما اكل ودنكلة صوانى وصفر
رمضان بسيط وابسط من تعقيدات الاكل البسو فيها الناس دى
والله ياخلى انا زيك بالضبط ..كم لفمة كدا بتاعة عصيدة وشوية بلح وكباية ابرى ساااااقطة
وكباية شاى سادة
بس ياخليل نحن بنفرش فرشات وانتو بتفرشو بروش ودا الفرق
تسلم يا اصيل وتصوم وتفطر على خير
|
Post: #91
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:47 AM
Parent: #72
Quote: أم جنقر يا أميره،
أم جنقر،
يا اخوانا نسوي شنو مع جيل الديجيتال . |
محمد المرتضى ديجيتال انت دا وكمان عبدالعزيز عيسى
ياخ ما قلنا ليكم بنعرف نسويها بس سقطت سهوا
صدقنى بس جهز الدخن وحتشوف
والعفو والعافية
|
Post: #87
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:28 AM
Parent: #70
خالد الجزولى والكامل ....
ياخ شيلو البوست كلو بصوانى افطارو
حقكم ....شنو احتليتو البوست...
البوست اصلا بوست لمة وذكريات ................
تسلمو
|
Post: #94
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: خالد حامد الجزولي
Date: 08-12-2010, 01:04 PM
Parent: #87
بت الشيخ
Quote: خالد الجزولى والكامل ....
ياخ شيلو البوست كلو بصوانى افطارو
حقكم ....شنو احتليتو البوست...
البوست اصلا بوست لمة وذكريات ................
تسلمو |
ست الكرم
|
Post: #77
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: cantona_1
Date: 08-10-2010, 08:50 PM
Parent: #1
Quote: عصير قونقليز ديل ثابتين وممكن نستبدل
القونقليز بكركدى اوعرديب او اى عصير تانى من بنات افكارنا ... |
الأستاذ أميرة الشيخ
تصوموا وتفطروا على خير ... ورمضان كريم .. أعادة الله علينا وعلى أمة محمد بالخير واليمن والبركات. تقبّل الله صيام الجميع وقيامهم. أميييييييييييييييين.
ما شاء الله فطوركوا حلو مطرح ما يسري يمري.. لو ممكن وصفي لي بيتكم بوين عشان أجي أفطر معاكم لو ممكن؟ بس العصيدة لازم تكون قوية مش زي عصيدة الجلابيات؟ لو ما عارفة عصيدة جلابيات يعني شنو أسألي جارتكم المن كردفان ديك حتوريك.
|
Post: #79
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: بابكر التوم
Date: 08-10-2010, 09:21 PM
Parent: #77
أميرة كل سنة وانتى طيبة ...
تصومى وتفطرى على خير ...
Quote: تعرف اجمل مظهر من مظاهر رمضان هو الافطار برة الشارع ..
مافى لوحة اجمل من كدا ياحاتم واتمنى انها ما تختفى مهما حصل |
تتخيلى المظهر دا عندنا فى دخان البعيدة سنويا منذ قدمى لدولة قطر ...
بس السنة دى مع الرطوبة دى باص
ـــــــــــــــــــــــــــــــــ
فى حاجة مهمة واساسية عندنا السحور رقاق بى لبن
|
Post: #80
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: انعام حيمورة
Date: 08-11-2010, 08:08 AM
Parent: #79
حبيبتي أميرة الشيخ
رمضان كريم وكل سنة وانتو طيبين
غايتو كل البرامج الفوق دي نفس برنامجنا في البيت علا قعاد الارض دا زول بقدر عليهو مافي
جاياك تاني
|
Post: #81
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amany Elamin
Date: 08-11-2010, 08:22 AM
Parent: #80
مرمر رمضان كريم,,
ولكل المرور تصومو وتفطرو علي خير :)
|
Post: #82
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: مرتضى احمد عبد القادر
Date: 08-11-2010, 04:20 PM
Parent: #81
أميره الشيخ رمضان كريم وتصومي وتفطري على خير وإنشاء الله قريب فاطره مع ناس بيتكم
Quote: لا انت لا مورتا ماقاعدين تصومو اصلا ودى معلومة انا متاكدة منها
|
خدر بصوم لحدي 12 وبعداك بفقعو لكن مورتا حاشاهو أفووو يا بت الشيخ مورتا رمضان دا عندو أجمل شهر
|
Post: #107
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 06:53 PM
Parent: #82
مورتا .... كل سنة وانت طيب ياودجيرانا
معلومة انك ما بتصوم دى ادانى ليها خضر
ومعلومة خضر مابصوم دى ادانى ليها حسبو
تسلم يازول وعادى مافيها حاجة كان ماصمتو
|
Post: #104
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 06:50 PM
Parent: #80
انعام العروس .. رمضان كريم
اظن المرة دى فارزة عيشتك وصينيتك براك؟
ولا انا غلطانة ..
ياخ قعاد الفرشة دا اجمل من الافطار زاتو..
ياخ تعالى راجعة وفى يدك صحن عصيدة النبى
|
Post: #105
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 06:51 PM
Parent: #104
امانى الامين يامشردة
الليلة ووووب
|
Post: #103
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 06:48 PM
Parent: #79
Quote: تتخيلى المظهر دا عندنا فى دخان البعيدة سنويا منذ قدمى لدولة قطر ...
بس السنة دى مع الرطوبة دى باص |
بابكر التوم .. رمضان كريم .
مغقول ياخ ؟؟ الله يطمنك ...
فى السودان فى ناس تقول ليك لا مافى فطور برة
خلاس بطلنا ....
عليك الله واصلو وماتسيبو العادة السمحة دى
انت وينك يا اصيل ليك زمن مختفى ...
العفو والعافية
|
Post: #101
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 05:57 PM
Parent: #77
كانتونا .. رمضان كريم وكل سنة وانت طيب
مرحب بيك وبيتنا مفتوح وصينيتنا برة الشارع بتلاقيك
عصيدة الجلابيات بعرفها انا ذاتى جلابية رايك شنو؟؟
والعصيدة القوية دى زيادة دقيقة وبس ومافى حاجة صعبة
تسلم والعفو والعافية
|
Post: #113
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد الكامل عبد الحليم
Date: 08-15-2010, 08:08 AM
Parent: #101
يا اميرة الشيخ تحية كاملة الدسم..للمتداخلين ايضا..
يتضح من التداخل ثقافة الطعام والاطعام عند السودانيين ..اهل الكرم والجود.
احلم بصينية كبيرة جامعة ياكل منها الجميع ...ممكن؟....(الله بدي الجنة...)
|
Post: #114
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-15-2010, 03:24 PM
Parent: #113
| Quote: احلم بصينية كبيرة جامعة ياكل منها الجميع ...ممكن؟. |
محمد الكامل عبدالحليم .. سلام ..
كل شئ ممكن
لو قصدك الصينية الصينية بمفهومها القريب دا ليك على
انا على اتم استعداد لتجهيزها وانت عليك عزومة الجميع ...
والصينية دى ممكن تكون فيها عصيدة الفتريتة وعصيدة الدخن والقراصة
والكسرة والرهيفة ..الابرى الاحمر والابيض وام جنقر
غايتو قول عوك ونحن جاهزين
|
Post: #117
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: محمد الكامل عبد الحليم
Date: 08-16-2010, 10:25 AM
Parent: #114
تحية صادقة الي اهل الكرم والجود .
شكرا اختي اميرة... من مطالعاتنا لانوع الطعام وتنوعه حسب البيئة هناك قواسم مشتركة ..زتتسع باتساع التداخل و التواصل وانتقال ثقافة الغذاء من موقع الي اخر...باتساع نطاق التواصل تتسع فرص الفهم المشترك والثقافة الجامعة...ويصبح مفهوم الطعام و الاطعام مركوزا بالكرم السوداني واريحية العطاء عنصرا من عناصر التوحيد...في ظل دعاوي التفريق الماثلة...هذا هو قصدي من الصينية الكبيرة التي ياكل منها كل الناس
وهذا تفسير لتواصلك الجميل عبر الصحن الممدود ..سواء عبر النفاج او الحيطة او عبر الاسفير...يتمدد ظل التواصل وينداح عبر فضاءات انساننا السوداني الجميل..
تاني..تحياتي..
|
Post: #118
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-16-2010, 10:50 AM
Parent: #117
محمد الكامل ..سلاااااام
حارجع لمداخلتك العميقة ومليانة
شان كدا قلت ليك المعنى القريب والبعيد
حاولت انزل اغنية اغنية عقد الجلاد باب السنط الدكة والنفاج والبيت الكبير للساكينن افواج
وهى من كلمات محجوب شريف ....ابت تنزل ..لكن حاستعين بصديق
وبهديها ليك ولكل الذين عبرو من هنا
|
Post: #120
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: بريمة محمد
Date: 08-18-2010, 11:42 PM
Parent: #101
الشية بعد الأفطار ..
بريمة
|
Post: #83
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: المكاشفي الخضر الطاهر
Date: 08-11-2010, 06:58 PM
Parent: #1
اميرة رمضان كريم
دا فائدتو شنو ؟
|
Post: #84
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: عثمان نواي
Date: 08-11-2010, 07:45 PM
Parent: #83
الاخت اميره الشيخ
بطريقتك دي وعرض صينيه رمضان بتفطري ليك زول
نحن بنحلم هنا بصوره من صينيتك دي
غايتو يا اميره
عثمان نواي
|
Post: #85
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-12-2010, 05:21 AM
Parent: #84
ياشباب صباحتكم خير وباقى 29 يوم للعيد
ناسف لتاخير الرد بسبب عطل فنى بسودانيز يوم امس
هو اصبحنا واليوم التانى فى رمضان وربنا يقدرنا
|
Post: #95
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Abdlaziz Eisa
Date: 08-12-2010, 04:40 PM
Parent: #85
Quote:
ياخ ما قلنا ليكم بنعرف نسويها بس سقطت سهوا
صدقنى بس جهز الدخن وحتشوف
|
طوّلي بالك يا بت الشيخ.. الحك حدّه العيد..
أها تــــــــــاني..... اللمّ أم جنقر على البرجزة شنو...!!!
|
Post: #102
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: حبيب نورة
Date: 08-13-2010, 06:35 PM
Parent: #95
أميرات بت الشيخ
كل سنة و إنتي طيبة ياختي
تصومي وتفطري علي خير
أخبار الجماعة كلهم خصوصاً قسم الهند والسند
تحياتي ليهم كلهم
ـــ
دة شنو الجفاء دة
في زول هناك
قولة سلام
تبقالو
روح !
عشان كدة قلت أبدا الصفحة الجديدة دي
|
Post: #106
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: اسماء الجنيد
Date: 08-13-2010, 06:51 PM
Parent: #102
اميرة الشباب رمضان كريم عليك ياخ
تصومي وتفطري علي الف خير يا رب
لكن بي جكك ده امانة ما جهجهتيني يا خية
انتي ماك عارفاني بعدت بالحيل من جنس الحاجات دي
وبقيت زي اخوي خالد العبيد يا حليلو نكابس فى طرقة الحلو مر
منعووووووووول ابوك يا غربة
كل سنة وانتي طيبة يا حبيبة
|
Post: #112
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-14-2010, 05:10 PM
Parent: #106
سوما الجنيد رمضانك كريم والاسرة
شنو اللماك مع خالد العبيد
خالد العبيد دا فى اشتراااااااااااااااااااااليا
وانت ساعتين من السودان
يعنى ممكن تختى صاجك وتعوسى الابرى وترسلى لخالد
ولا ماكدى..
مشتاقين ياخ وربنا يديك الصحة والعافية
|
Post: #111
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-14-2010, 05:07 PM
Parent: #102
حبيبنا رمضانك كريم
والله لا جفا لا حفا ياقول حبوبة
بس مشاغل دنيا ...
ناس الهند والسند طيبين وبسلمو عليك
وكل الصفحات تتشرف بيك ....
العفو والعافية ياود امى
|
Post: #110
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-14-2010, 05:04 PM
Parent: #84
عثمان نواى ..رمضان كريم ..
حلم عديل كدا؟؟
شكلك زى اخوانا خالد العبيد يا فى استراليا او امريكا
وكان قريب فى اوربا ...
والله انا لو كنت هناك مابصوم رمضان عديل
واليحصل يحصل
تصوم وتفطر على خير
|
Post: #108
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-13-2010, 07:04 PM
Parent: #83
Quote: اميرة رمضان كريم
دا فائدتو شنو ؟ |
المكاشفى ..
دا برد الروح ياخ
وبطير الشيطان
|
Post: #109
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Magdi Algorashi
Date: 08-13-2010, 08:00 PM
Parent: #108
بت الشيخ
رمضان كريم
والله يااميرة بوستك دا ذي صينتك الشهيه دي
لم كل الحبايب .
وكل سنة الجميع بخير
ودي
|
Post: #115
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-15-2010, 03:25 PM
Parent: #109
مجدى القرشى ... رمضان كريم
زمن ماشفناك وكويس انو صينيتنا دى جابتك
تصوم وتفطر على خير
|
Post: #116
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: ايمن التاج
Date: 08-15-2010, 06:27 PM
Parent: #115
أميره الشيخ
رمضان كريم عليك وعلى ضيوف صينيتك العامره بي بساطته وحميميته ولمته الطيبه
تصوموا وتفطروا جميعا على خير وهنيئا العصيده والابري والبليله والبلح ورمضانا السوداني الجميل من زمن الكور ام هلالات ..
يديك العافيه
ـــــــــــــــــ
ايمن تابر
|
Post: #119
Title: Re: صحن العصيدة ..جك الابرى ....كورة البليلة والبلح .... تانى شنو ؟
Author: Amira Elsheikh
Date: 08-18-2010, 08:11 AM
Parent: #116
ايمن التاج .. رمضان كريم
انت من زمن الكور ام هلالات؟؟
ياااخ انت قديم خلاس ..
الكور دى زمان كانت بتتعمل فيها العصائر عاااااااااااااادى والكلام دا قبل ظهور جككت البلاستيك
وبعديها بقت حقت عصيدة .. اسى اختفت نهائى واصبح البلاستيك والقزاز واخيرا الفايبر
اسياد الموقف ...
كل سنة وانت طيب
________________________
وصلت وين
|
|