Post: #1
Title: عاوز تموت بشنو ؟
Author: اشرف السر
Date: 08-07-2010, 11:08 PM
Parent: #0
لو عاوز تموت من الحسره؟
- ياتتفرج على اعضاء المجلس الوطني وهم يمارسون (فضيلة الصمت) تجاه مشاكل المواطنين
- يا تتفرج عليهم وهم يمارسون (حق) الكلام عن (زيادة مخصصاتهم)
لو عاوز تموت مفرووووس ؟
- يا تقرأ لـ(عبدالرحمن الزومة) الذى يكتب عمودا يوميا (بين قوسين) يعدد فيه حسنات وإنجازات (النظام)
- يا تبحث عن (مردود) ما يسمى بعائدات النفط .
لو عاوز تموت شهيد ؟
- يا تسافر عن طريق أحد شوارع (الموت) التى لا تصلح حتى كشوارع (داخلية)
- يا تخرج فى مظاهرة (سلمية)
لو عاوز تموت بالسرطان ؟
- يا تتناول الخبز المحسن (بالبرومايد) الذى يباع (عينى عينك) أمام نظر السلطات
- يا تتناول (المواد الغذائية) منتهية الصلاحية المفروشه (عينى عينك برضو) على الأرض فى الأسواق .
لو عاوز تموت من الغيظ ؟
- يا تسمع تبريرات (الحكومة) حول قوات (الهجين)
- يا تسمع تبريرات (الداخلية) حول إطلاق النار على المواطنين فى (كجبار).
لو عاوز تموت من الجوع؟
- ياتنتظر (الدوله) توفر ليك (شغل) تسد به رمقك
- يا تحرى ليك (قريشات) من (بيت مال المسلمين)
لو عاوز تموت من الهبل ؟
- يا تستمع لما تبثه (الإذاعه والتلفزيون) من إعلانات (ساذجه)
- يا تستمع لإحدى مذيعات النيل الازرق في برنامج مشوار المساء
لو عاوز تموت مرعووووب ؟
- يا تقرأ عن عدد ونوع الأسلحة والعتاد الذى تمتلكه (المليشيات) داخل العاصمة
والتى تجاوز عددها 47 حسب شهاده مسئول كبير
- يا تضع عينة من مياه الشرب تحت مكبر (مايكروسكوب) وتنظر لما تحتويه من (كائنات) غريبة الشكل !!
لو عاوز تموت من الضحك؟
- يا تقوم تتذكر إنو نحنا (دوله بتروليه)
- يا تقوم تتذكر أيام قبل ما يتم (إنقاذنا)
لو عاوز تموت مليونير؟
- يا تكون مسئول وأخوك عنده (بيزنس)
- يا يكون عندك (بيزنيس) وأخوك (مسئول)
لو عاوز تموت من الإندهاش ؟
- يا تسأل روحك (مرتبك ده مكفيك إنت والأولاد كيف؟)
- يا تسأل روحك (المسئول ده عمل العمارات دى) من مرتبو كيف؟
لو عاوز تموت من الحزن ؟
- يا تعود إلى البلاد من أى سفرية (خارجية) وتقارن بيننا وبين الناس البره
- يا تقيف أمام إحدى المستشفيات (الحكومية) وتشاهد المواطنين الذين يتسولون قيمة الدواء
لو عاوز تموت على الحديده ؟
- يا تعمل ليك مشروع تجارى و(يجوك ناس الجبايات التركية)
- يا تدخل ليك مرابحة مع (بنك إسلامى)
لو عاوز تموت قبل يومك ؟
- يا تقوم بإجراء عملية جراحية (دقيقه) فى أحدى (المستوصفات الخاصة)
- يا تقوم بإجراء عملية جراحية (غير دقيقه) بأحدى المستشفيات (الحكومية).
لو عاوز تموت من الإستغراب؟
- يا تشوف مواطن عاوز يعمل ليهو عملية تتوقف عليها حياتو (بشهاده الأطباء) وديوان (الزكاه) يديهو (ملاليم)
- يا تشوف عدد حالات (إلى ذوى القلوب الرحيمة) التى تنشرها الصحف فى دولة (المشروع الحضارى)
لو عاوز تموت من الزهج ؟
- يا تنتظر الكهرباء المقطوعه (من الصباح) تجى راجعه
- يا تنتظر دورك الـ 96 فى عيادة الأخصائى الكبير !
لو عاوز تموت مخنوق؟
- يا تقيف فى صف العربات الطويل المتوقفه فى إنتظار العبور للخرطوم من (أم درمان) بكبرى النيل الأبيض (الما معروف يتصلح متين)
- يا تكون واقف فى (صف دفع الجمرة الخبيثه) يوم نهاية (الدعم)
لو عاوز تموت مذهووووووول؟
اسمع قاضي المحكمة العيا بتكلم عن لون قميص لبني في حيثيات قضية البنطلون
لو عاوز تموت مليونير؟
- يا تمارس (تنزيل)
- يا تكون قريب (وزير)
لو عاوز تموت وفى نفسك سؤال ما لاقى ليهو إجابه؟
- يا تسأل عن (خلوها مستورة دى لمتين ح تكون مستوره)
- يا تسأل روحك (طيب ليه ما يخلونا فى الصورة) ؟
لو عاوز تموت مبسوط في الواقع الحالي دا؟
(صدقنى) يا بتحلم
- يا …….. بتحلم
- منقول من ايميلي -
وشر البلية ما يضحك......
|
Post: #2
Title: Re: عاوز تموت بشنو ؟
Author: معاوية عبيد الصائم
Date: 08-07-2010, 11:11 PM
Parent: #1
لو عاوز تموت ادخل هنا !!!!!
بوست لذيذ جدا !!
مودتى يا اشرف السر
|
Post: #3
Title: Re: عاوز تموت بشنو ؟
Author: اشرف السر
Date: 08-07-2010, 11:15 PM
Parent: #2
يسعد مساءك بالنور يا معاوية..
اهو حبة فرفشة ما بتكتل ليها زول
مودتي
|
Post: #4
Title: Re: عاوز تموت بشنو ؟
Author: عبد المنعم سليمان
Date: 08-07-2010, 11:16 PM
Parent: #3
نحن ح نموت كمد
بوست لذيذ زي ما قال معاوية
شكرا
|
Post: #5
Title: Re: عاوز تموت بشنو ؟
Author: اشرف السر
Date: 08-07-2010, 11:50 PM
Parent: #4
عبد المنعم
في خيارات للكمد دا...
وما في بيناتا كمد حمد الريح داك
--
نحمد الله انو لقينا فرقة نبتسم في زمن الموت بالمجان دا..
تشكراتي بدون كمد ولامكمدات 
|
Post: #6
Title: Re: عاوز تموت بشنو ؟
Author: Osman Musa
Date: 08-08-2010, 00:55 AM
Parent: #5
اشرف
عاين يا أخوى . لو عايز تموت جد جد
وفى آخر يوم فى اجازتك . تقوم تمشى مصلحة الأراضى
حقت ولأية الخرطوم .
يازول هناك ميت ميت .
سلامات
|
Post: #7
Title: Re: عاوز تموت بشنو ؟
Author: اشرف السر
Date: 08-08-2010, 03:23 AM
Parent: #6
عثمان
قلت لي مصلحة الأراضي!!
طلعت رأسمالي رسمي
اها رأيك شنو قبر يدفنو فيه الميت.. عاوز شهادة وفاة
والشهادة عاوزة فلوس
والفلوس عند الغنيان
ويستر علينا الله بس
شوف لينا قطعة درجة أولى كدا... وتكون ناصية.. بدفع ليك لما ابقى من "اياهم"...
وحلم الجعان عيش
وفي رواية كسرة ما بطالة
|
Post: #8
Title: Re: عاوز تموت بشنو ؟
Author: Osman Musa
Date: 08-08-2010, 03:00 PM
Parent: #7
اسمع وبعد ما تموت .
لو عاوز تموت تانى .
يكون عندك تلفزيون ملون محجوز فى الجمارك .
|
Post: #9
Title: Re: عاوز تموت بشنو ؟
Author: معاوية عبيد الصائم
Date: 08-08-2010, 03:59 PM
Parent: #8
غايتو ايوب سيد الصبر لو حضر الكيزان ديل !!!!
اكان انتحر !!!
بطلقة ؟
|
Post: #11
Title: Re: عاوز تموت بشنو ؟
Author: اشرف السر
Date: 08-08-2010, 05:10 PM
Parent: #9
Quote: غايتو ايوب سيد الصبر لو حضر الكيزان ديل !!!!
اكان انتحر !!!
بطلقة ؟ |
تعرف يا معاوية
لولا عدم توفر الطلقات دي
اكان كمية كبيرة من الناس عملت الفكرة دي.
|
Post: #10
Title: Re: عاوز تموت بشنو ؟
Author: اشرف السر
Date: 08-08-2010, 05:08 PM
Parent: #8
Quote: لو عاوز تموت تانى .
يكون عندك تلفزيون ملون محجوز فى الجمارك .
|
تلفزيونك دا ملون..
بس مع التوجه الحضاري ولا ما مع التوجه الحضاري
|
|