Post: #1
Title: سمعنالكم خبرفي الهلالية15جواد سَكَّن سبعمائة.. طير وحِدَي. تبشرنا بها قناة هارموني في رمضان
Author: منصوري
Date: 08-07-2010, 10:23 PM
Parent: #0
دي من السهرات العاملاها قناة هارموني لينا كسهرة في رمضان تبشرنا بيها..كل مرة جايبة لينا دعايتها ، عايزة تفطرنا وتصومنا عليها
...............
الناس ديل قايلين المستمعين والمشاهدين ديل دباس والله شنو؟
لماذا تردى الذوق السوداني في الأغاني الجميلة والذوق الجميل.. والحس الصافي والقلب الدافي
والإحساس النبيل بما هو جميل
|
Post: #2
Title: Re: سمعنالكم خبرفي الهلالية15جواد سَكَّن سبعمائة.. طير وحِدَي. تبشرنا بها قناة هارموني في رمضان
Author: منصوري
Date: 08-23-2010, 11:36 AM
الكامل ليس من ولد كاملاً
الكامل هو الذي يتطور من النقص الى الكمال أو من حسن الى احسن منه
التحية لقناة هارموني في رمضان وقد انتقلت من حسن الى أحسن مافيش اخطاء طبعاً كل الشي من حسن الى أحسن..
التحية لقنواتنا كلها البي تدي أهلها المشاهدين اعتبار وتستمع لآرائهم وتطور وتجدد..
اصلو البرامجد دي موش في النهاية للمشاهد؟ بلي
اخ صديق ذكر لى أن ملاحظتي على الدعاية الأولانية لبرنامج ( بنات حوة) قد وصلت للقناة بصورة او بأخرى وهم قاموا بتغيير الشعار الذي ذكرناه للبرنامج بصورة من الصور.
وفعلا تغيير بشعار جميل راقي محبب للنفس. بدل 15 جواد سكن سبعمائة
التحية للمذيعة المتألقة الشابة الجميلة تريزا شاكر على ابداعاتها وكانت قدر هذه المسؤولية الزمنية الكبيرة بين جيل الحاجة حوة والفنانات الآخر وجيل تريزا شاكر نفسها..
الحقيقة المذيعة المتألقة تريزا شاكر نفسها كل يوم ماشة لى قدام من زمنها اللي كانت سارحة في اسوان مع الناس هنالك في برامج راقية الى ارقي
..........
برضو كبرت في نفسي شديد الحاجة حوة وسمعت زمان من أحد اخواننا كان معنا في هندسة هلتون الخرطوم هو جارهم .. ان هذه المرأة كريمة جدا ووطنية جدا وصميمة جدا وذات مبادئ إنسانية عالية للغاية.. موش كما يتبادر عند ذهن الاقلية من تبخيس هذا النوع من الفن
برضو التحية للفنانات الأخر الفي الحلقة.. شايفهم مع رقي فنهم عندهم إحترام وتوقير لأمهم حوه.. وهنيئاً لبنات حوة بحوة
وسمعت إشاعة ما عارفا صحيحة والله غلط!
قالوا ندي القلعة دعوها للبرنامج ده إعتذرت!
كان الكلام ده صحيح تكون صغرت في نفسي بعد ما كنت أحب غناها..
......................
|
Post: #3
Title: Re: سمعنالكم خبرفي الهلالية15جواد سَكَّن سبعمائة.. طير وحِدَي. تبشرنا بها قناة هارموني في رمضان
Author: منصوري
Date: 08-23-2010, 11:58 AM
Parent: #2
برضو هم على قدر الحدث وعلى قدر موائد رمضان وعلى قدر ذوق المشاهدين.ز أتاريهو الحكاية ديك كانت دعاية برانية وبس.. لكن البرنامج من جوه.. حمدو في بطنو.... وشكارتا دلاكتا... برنامج خفيف على النفس ويهضم للزول الآبري والعصيدة والقراصية وكدة
برضو موش غناء دلوكة وبس. لا هنالك مديح هنالك تصوف هنالك إنشاد منهن. بالجد كانن خفيفات الظل على الصايم
استمتعنا بالقصص الظريفة التي ساقتها حوة.. وهي قد حضرت زواج الملك فاروق وغنت فيه. والملك فاروق أداها خمسة جنيهات زمان كأنن كأنهن هسه 5 مليار بالقديم طبعاً.. حتى أعضاء وفد الحكومة من الوزراء لحضور مراسيم زواج الملك ما أعطوهم حاجة وسوف احكي القصة بالتفصيل وهي قصة ممتعه.. واختارت أغنية تناسب الذوق المصري والسماع المصري والصعايده هنالك شالو معاها الغناء حقها
كذلك في عرس آل صباح في الكويت عرفت العرس قامت مشت، ولكنها إختارت وفكرت يا ربي ناس الكويت ديل أنا أغني ليهم شنو؟ ما بيفهمونا
فجأة كدة لقت سر النجاح وسرحت فيهو وهو أغنية
( الشيخ سيرو.. البريد الشيخ انايا ناس بريدو) بس كررت دي ما جابت حكاية النصيح حديدو او تلاتة أرادب غداء؟ الكلام الزي ده ما جابتو تص رفت بتحكم.. عرفت من هذا البرنامج كبر قامة هذه المرأة وذكاءها
بالإضافة الى أني أعرف من زمان أنها خيطت علم السودان ولبستو
............
التحية لهذا البرنامج الرائع مذيعتنا المتألقة تريزا شاكر
وعفواً سيدتي
نحن برضو نصحح زي ما إنتو تصححوا
وأتاريهو
( حمدو في بطنو)
مع تحيات
صديق منصوري
|
Post: #4
Title: Re: سمعنالكم خبرفي الهلالية15جواد سَكَّن سبعمائة.. طير وحِدَي. تبشرنا بها قناة هارموني في رمضان
Author: عبد الحي علي موسى
Date: 08-23-2010, 12:40 PM
Parent: #3
دي الدولة الدينية يابه.
الاقتصاد يبوظ.
الأخلاق تبوظ.
الفن يبوظ.
الدين زاتو.سلام منصوري
|
Post: #5
Title: Re: سمعنالكم خبرفي الهلالية15جواد سَكَّن سبعمائة.. طير وحِدَي. تبشرنا بها قناة هارموني في رمضان
Author: منصوري
Date: 08-23-2010, 10:12 PM
Parent: #3
غايتو ناس القنوات السودانية دي حاسدين جنس حسادة..ليه؟
احسن برنامجين يستحقوا المتابعة.. هذا البرنامج بنات حوه في قناة هارموني
والبرنامج التاني أغاني أغاني في قناة النيل الأزرق..
لكن حسادة حسادة كدة عاملين زمنهم واحد تقلب تلقى ده إنتهي إلا تحضر إعادتو.. يعني حكاية كان ما معانا ضدنا.. زي حكاية هلال مريخ ياهنا ياهنا..
الحقيقة أكبرت في مقدمة البرنامج في بنات حوه( تريزا شاكر تألقها ومعلوماتها الثرة عن الجديد والقديم..
|
|