|
هنئوني على الألف الأول من البوستات والمداخلات
|
سيداتي آنساتي سادتي السلام عليكم ورحمة الله وبركاته إنضممت لحوش بكري في 4 يناير 2003 أي بالأيام تساوي الفين وسبعمائة وإثنين وسبعين يوماً. حتى تاريخ اليوم كتبت 1000 مداخلة أي بمعدل تلت (0.36) مداخلة في اليوم. وهنالك عدة أسباب لم تمكنِّي من زيادة عدد مداخلاتي. أولها: ليست كل المواضيع المطروحة جاذبة للتعليق والمداخلة. وبعض المواضيع لا نفهم فيه ولذا لا نحب أن نفتي في أمور فهمنا فيها بسيط. ثانيها: وجودي في بعض الأحيان في مناطق لا توجد بها شبكة إنترنت في فيافي جمهورية السودان. ثالثها: حتى عندما نكون في خرطوم أحمد تكون النت بطيئة جداً تسل الروح، ولهذا نترك الأمر. ومن ملاحظاتي:- أحد الأعضاء له عضوية مدتها 2,472 يوماً وقد كتب 26,569 مداخلة. أي بمعدل عشر مداخلات يومياً. لكن وجدت كثيراً من المداخلات عبارة عن كلمة واحدة (فوق). أو نقاط ... وأعتقد القصد رفع البوست لأعلى. 1- وجدت ثلاثة أعضاء يكتبون كلاماً دسماً يستفاد منه. 2- وجدت 3 أعضاء ضد الحكومة في أي شئ. 3- وجدت 3 أعضاء مع الحكومة بالعديل و3 مع الحكومة بتحت تحت. 4- وجدت مجموعة من اعضاء المنبر يردون على بوستات الستات أكتر من ردودهم على بوستات الرجال. 5- وجدت بعض المتداخلين يتداخلون لأن كاتب البوست ربما صاحبه أو صديقه. وغير مهم الموضوع المطروح مهم أم أي كلام. 6- وجدت مجموعة تهتم بالكورة فقط ولا تهتم بالسياسة البته. 7- وجدت مجموعة من المعارضين يحولون أي بوست لمناسبة للهجوم على الحكومة. 8- وجدت كثيرين يدخلون بوستات التعزية للترحم على الذي لاقى ربه. 9- وجدت مجموعة من الأعضاء تشاتر وبس. 10- وجدت عضوة معقولة في مداخلاتها وتكتب بشجاعة ولا تترعب من مهاجمة بعضهم لها. 11- وجدت عضوة عندما تكتب بوستاً يمتلئ تعليقات قبل أن يرتد إليها طرفها. (جايز شكلها حلو). 12- كانت قبلها عضوة قديمة تتمتع بنفس ال status ولكن تلك العضوة إختفت هذه المرة ولم أجد لها مداخلات أبداً. هذه هي ملاحظاتي بمناسبة البوست الألف. عليه هنوني بهذا الإنجاز العظيم. واحتفلت بالألف بوست لأن بيلية احتفل بالهدف الألف في مرمى فاسكو دي جاما منذ سنين خلت يا طارق الكوتش. سأكون معكم حتى 8 أكتوبر القادم أي شهرين و5 أيام. وبعدها نشتت من عاصمة الضباب لعاصمة التراب. خرطوم أحمد. وربما لا نجد الوقت لنتداخل معكم ولكن سنكون معكم بمشاعرنا وأحاسيسنا ونحاول لقاء بورداب الخرطوم لو زهير عثمان حمد عزمني.
(العوج راي والعديل راي)
|
|
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
Quote: سأكون معكم حتى 8 أكتوبر القادم أي شهرين و5 أيام. وبعدها نشتت من عاصمة الضباب لعاصمة التراب. خرطوم أحمد. وربما لا نجد الوقت لنتداخل معكم ولكن سنكون معكم بمشاعرنا وأحاسيسنا ونحاول لقاء بورداب الخرطوم لو زهير عثمان حمد عزمني.
|
حبيبنا كباشى الف مبروك وتصحبك السلامة فى حلك وترحالك غاية ما اتمنى ان تكتب فى ديمفافية منطقتكم والمالات والعواقب فى حالة الانفصال لاننى لدى قتاعة خاصة ان مسالة الوحدة والانفصال تتاثر به قبائل التماس من الجهتين وهم الذين يجب استفتاؤهم باعتبارهم القابضين على الجمر! جنى
| |
|
|
|
|
|
|
Re: هنئوني على الألف الأول من البوستات والمداخلات (Re: Marouf Sanad)
|
معروف سند
Quote: إتّ كانتونا معناتا شنو؟
وهل ات كانتونا الكان بتكلم معانا في البال توك حوالي سنة 2001 أم زول تاني؟ |
يا باشا كانتونا هو اسم لاعب كرة فرنساوي كان يلعب في مانشستر يونايتد الإنجليزي وهو فريقي منذ العام 1966 واسمه بالكامل إريك كانتونا. كان لاعب حريف وممتاز. قاد يونايتد للفوز بكأس الدوري الإنجليزي عدة مرات.
ياني أنا ذاتي مع ناس عسولة والحاجات الحلوة الكتيرة ديك... ولاقينا ناس كتار.. بس ما عرفنا حلتكم وين كان زرناك هناك. ما هو اسمك في البالتوك؟
مع شكري على التهنئة والسلام.
(العوج راي والعديل راي)
| |
|
|
|
|
|
|
Re: هنئوني على الألف الأول من البوستات والمداخلات (Re: jini)
|
جني لا فض فوك...إن شاء الله تكون بلغت الصحة والعافية 100%. ربنا يديم عليكم نعمته.
كثيرون أخي الحبيب لا يعرفون معنى كلامك. ولا يتأثرون بما سنصاب به في قبائل التماس. حاولنا جهدنا أن نشرح أن اليوم المعاملة مش ولابد فكيف عندما تقوم دولة اخرى. لكن كلام القصير ما بنسمع.
المناطق التي أتحدث عنها مساحتها تعادل مساحة الجنوب وربما أكبر منه. وعدد سكانها أكثر من سكان الجنوب. والسودان المستفيد الأول من تلك المنطقة التي نعني ولكن ربما لن يستبينوا نصحنا إلا ضحى الغد عندما تكون النصيحة Too little too late . المنطقة التي نتحدث عنها تشمل جنوب دار فور - جنوب كردفان - جنوب النيل الأبيض - جنوب النيل الأزرق - جنوب سنار وجنوب القضارف.
لكن لنا رب يحمينا. فلو وجدنا الماء في مناطقنا لما ذهبنا للبحر من اصله، لكن فكِّر كيف تسقي 1,000 رأس من الماشية أو الإبل؟
الله كريم.
(العوج راي والعديل راي)
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
Quote: ياني أنا ذاتي مع ناس عسولة والحاجات الحلوة الكتيرة ديك... ولاقينا ناس كتار.. بس ما عرفنا حلتكم وين كان زرناك هناك. ما هو اسمك في البالتوك؟ |
بس ياهو مع ناس عسولة وسيد مرارة وانور كينج والناس العجيبين ديك,
لكن لي ذي قرن كدا ما خشيت من 2002 واظني نسيت اسمي الكنت بكتب بيهو.
على ما أظن ذي الانت عندك علاقة بي كوستي, صاح؟
| |
|
|
|
|
|
|
Re: هنئوني على الألف الأول من البوستات والمداخلات (Re: Marouf Sanad)
|
معروف سند... اسم حلو إنت معروف أنك سند.. الله يسندك دنيا وآخرة.
أنور كينج بحضر دكتوراة في سول كوريا.
Quote: على ما أظن ذي الانت عندك علاقة بي كوستي, صاح؟ |
أنا من ناس أبو جبيهة .. لكن اليومين ديل شايف أولاد النوبة في استراليا عاوزين يطردونا من بلدنا عشان نحن عرب رحل وهم قالوا التراب حقهم لازم نخليهو ليهم. شفت العوجة كيف؟
(العوج راي والعديل راي)
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
Quote: هشام أمين
لك من الشكر أطنان وأطنان وأدام الله عليك نعمة الصحة والعافية. عارف لو كانت دي هنايا ديك كانت التهاني والتبريكات نزلت هبطرش... تقول شنو؟
(العوج راي والعديل راي) |
والله لقيتك زكى لامن بهناك
.......................................
يا ود سند
انتا عارف انا اسم كنتونا دى برضو رانى ليا فى اضانى وما قادر اركز وماقادر اسال
يا ربى دة هو زاتو كانتونا بتاع البال توك الزمان داك هو وعسولة وسوما25 وسارة695
والنافذة وكدة
المهم شكرا يا سند على السؤال ويا كانتونا على الاجابة
| |
|
|
|
|
|
|
Re: هنئوني على الألف الأول من البوستات والمداخلات (Re: Gaafar Ismail)
|
صديقي العجوز كانتونا ..
أولا أحيك ب(نوحية) البوستات وعقبال ( نوحية) السنوات ..
أما بشأن طرد أولاد حميد من أبوجبيهة محافظة رشاد فرجائي اللجوء للمحكمة الدولية و المطالبة بترسيم الحدود أسوة لما حدث في أبيي ..
وكما ذكر الأخ معروف سند ملامح من أيام البالتوك وأعادنا لأيام جميلة كانت زاخرة بالود و تبادل المعرفة والطرافة والفن والسياسة .. ولقد إحتل الشباب مقاعد البالتوك لنخرج نحن العجائز من عالم التشاد الحي بالصورة والصوت إلى عالم الكتابة الأسفيرية .. وما أدراك ماالكتابة الإسفيرية وبالذات عبر هذا الموقع الصعب .. والله مشتاقين ياباشمهندس ولدي بوست سأفتححه بخصوص فصل الجنوب وسأخصك شخصيا ببعض الملاحظات.
أرقد عافية .. أخوك/ ملامح
| |
|
|
|
|
|
|
Re: هنئوني على الألف الأول من البوستات والمداخلات (Re: Afraa Sanad)
|
Quote: سلام كانتونا ومبروك بما أنك من أبو جيبيهه بتكون بتعرف قادم عبدالرحمن النو فهو زوج أختي و أكثر من أخي، عندما عرفت أنك من أبو جبيهة قلت أكيد أخو اخوان و ضكران ذي قادم لكن يا أخوي مرات بتفجر مرارتي لمن تشكر الكيزان. |
هاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاه
.........................................................................
عارفة يا عفراء السياسة دى غير انها ترفع كثافة الزول ما بتعمل شى
وبعدين نحنا السودانيين ديل علاقتنا بالسياسة دى زى علاقة جمال الوالى بالطب
يعنى بالعربى كدة ما ناقشين شى لاننا كلنا بنبز ونشتم الفريق الاخر الذى لا يحمل افكرنا
انا غايتو ضغطى نزل ودمى والله راق وبقيت مبسوط بعد ما فارقت درب السياسة
ودعوتى لنشاء الله ود ابو جبيهة دى يفارقا علشان ما يفق مرارتك ومرارتنا معاهو
كل التحايا
| |
|
|
|
|
|
|
Re: هنئوني على الألف الأول من البوستات والمداخلات (Re: Hisham Amin)
|
Quote: يعنى بالعربى كدة ما ناقشين شى لاننا كلنا بنبز ونشتم الفريق الاخر الذى لا يحمل افكرنا |
سلام يا هشام و الله أنا في ناس كتيرين ما بحملوا أفكاري لكن بحترمهم جدا بس مشكلتي مع الكيزان أكبر من اختلاف أفكار دة اختلاف أخلاق و لا أظنك تتفق مع من لا أخلاق أو عهد له
العوج راي و العديل راي على قول كانتونا
| |
|
|
|
|
|
|
Re: هنئوني على الألف الأول من البوستات والمداخلات (Re: ALazhary2)
|
اخ كباشى
يا زول انت كنت غاطس وين,,,والله انا فاكرك عضو جديد نحن دفعة فى البورد وكنا اصحاب تذكر لما كنا بنتبادل التدقيل برودا مردا
والله زمن وانت لسع فى البوست ال1000 يازول اخوك بقى زى الكاردينال عمائر ومجمعات واشياء كتيرة من المشاركات,,وعضو فى 15 موقع اخر ومشرف على موقعين,,,, وبعدين الدرعك فى الصهاينة ديل شنو,,يازول انت مش من هلال كادقلى ياخى انت يازول فاضى عشان تتابع ناس بجيوبو الهم لوووووووووووووووووووووووول
مليون مبروك للبوست الالف لانها مشاركات زمان تعادل 1000 ضرب 1000
| |
|
|
|
|
|
|
Re: هنئوني على الألف الأول من البوستات والمداخلات (Re: ALazhary2)
|
Quote: بالله زمان الواحد في الشغل يشتاق يرجع البيت عشان يدخل البالتالك ويسمع ملامح وكانتونا وجيلاني وسيد مرارة ودلايلا وماجيك وادعثمان وسناري وساري الليل وناس كتار الزول اتشرف بي معرفتهم .
كل شئ تغير نحو الأسوأ .
تحياتي وتقديري
|
هاهاهااهاها انتا برضو من الشلة يا الازهرى ؟؟
والله حقو الواحد يفتح
بوست لناس البالتوك ديل
| |
|
|
|
|
|
|
Re: هنئوني على الألف الأول من البوستات والمداخلات (Re: Afraa Sanad)
|
Quote: سلام يا هشام و الله أنا في ناس كتيرين ما بحملوا أفكاري لكن بحترمهم جدا بس مشكلتي مع الكيزان أكبر من اختلاف أفكار دة اختلاف أخلاق و لا أظنك تتفق مع من لا أخلاق أو عهد له
العوج راي و العديل راي على قول كانتونا |
يازولة ما تجرجرينى للسياسة تانى
قالو المريض بعد ما يشم العافية
بيابا الدكتور
على العموم الماعندو اخلاق بعيد مننا ولا حوالينا
| |
|
|
|
|
|
|
Re: هنئوني على الألف الأول من البوستات والمداخلات (Re: عبدالفتاح أبوشيمة)
|
الأخ كانتونا سلام
بالرغم من إنني وإياك على طرفي نقيض فيما يخص الإنقاذ, وبالرغم من البرود
الإنجليزي الذي يلف شخصيتك,ويصاحب ردودك,
إلا إنني أعترف أن مداخلاتك وبوستاتك تستحق أن تنقر لها أكباد الأسافير
فهي تحمل في ثناياها قدر غير قليل من الإمتاع , يتسرب إلي الأحساس
بأنك تكتبها على إيقاع هز سعن ترياااان توشك( فرصته) على الإنفلات . وكما إن إريك كانتوما قد ختم مسيرته الكروية الفنانة برفسته الشهيرة
لمشجع الخصم , فأنت لم تنفك ترفسنا ( وتفرسنا) بدفاعك عن عصابة الإنقاذ.
| |
|
|
|
|
|
|
Re: هنئوني على الألف الأول من البوستات والمداخلات (Re: معاوية الأرباب)
|
بس ما توصلت اليه نتفق ونختلف مع اضافة ققرة لم تذكرها وهى هتالك بعض العضوية تخرج عن اطار مغذى المنبر العام وبدلا ان تكون المداخلة مفيدة للجميع وهادفة قد يستفيد منها كاتب البوست تلجا تلكم المجموعة الى تطويل اللسان واستخدام اساليب جارحة بل يتعدى الامر الى اكثر من ذلك . تحياتى
| |
|
|
|
|
|
|
Re: هنئوني على الألف الأول من البوستات والمداخلات (Re: بلدى يا حبوب)
|
ول أبا .. كانتونا السـلام عليكـم أخبارك وأخبار الأسرتين الصغـيرة والكبيرة والأهـل مـبروك البوست الألف وعقبال الألف مليون دولار .. عارفك successful businessman سعدت بك هنا وبرواد البالتوك الأعزاء الإخوة : ملامح, أزهـري, دينق , معروف سند , هشام , الأخ الفاتح والأخت سوما تابعت كثيرا من مشاركاتك الأخـيرة وفوجئت بمـيلك نحـو الكيزان ومدحك لحاج ماجـد سوار وبصراحة .. والله ما رضـيتا ليك يا كباشي .. لا أدري سـر ذاك التحـول .. ليس من طبعي ولا من حقي التدخل في خصوصيات الآخرين ولكن محـزن أن نري أخ لنا عرفناه حقانيا وشجاعا مجاهـرا برأيه يسير حثيثا في ركب الكيزان .. إقرأ معي ما كتبته لك الأخـت عفـراء هنا :
Quote: في ناس كتيرين ما بحملوا أفكاري لكن بحترمهم جدا بس مشكلتي مع الكيزان أكبر من اختلاف أفكار دة اختلاف أخلاق و لا أظنك تتفق مع من لا أخلاق أو عهد له |
لا عـدمناك يا عفـراء .. هـذا مـن أصـدق وأقـوي ما قرأت فيما يخص التمايز لن أزيد يا كباشي .. وأرجـو أن نكـون قـد أخلصناك النصـح ! تحياتي للجمـيع هنا وخاصـة زمـلاء وزمـيلات البالتوك.
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
أبو الزهور خرق الدستور تلك أيام جميلة وربنا يعودها علينا مرة تانية. الناس كانت محترمة ونحن طلعنا بصداقات كتيرة منها أنت أولهم يا إبني. كيف حالك والحجاج؟ ذكرتني اسماء كتيرة نسيتها بطول الزمن. لو في طريقة راسلني على الماسنجر لونقدر ندخل البالتوك مرة تانية. أما الذي أساءك فلا تلومه فقد قالت العرب: وكل إناء بما فيه ينضح.
(العوج راي والعديل راي)
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
أبو قوتة: لك من الشكر أجزله. أعاد الله تلك الأيام علينا جميعاً. كيف أحوالك؟ رودا كرهناها المحل ... وشايف لي ناس هنا مصيرهم نشردهم كمان. الكورة ما من إهتمامتي لكن ما بحب حكاية المعلومات الغلط. في ناس عاوزين يتفسحوا ببلاش وهم الواحد ما عارف الألف من كوز الذرة في الكورة.
(العوج راي والعديل راي)
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
عبد الفتاح أبو شيمة لك جزيل الشكر والتقدير. اليومين دي في لندن. سوف أرجع السودان بعد منتصف أكتوبر ونشوف التيار تاني إن شاء الله. نحن نحاول ان نقنع الديك أن الحرية لنا ولسوانا وكذلك الديمقراطية. لكن في جماعة بطبقوا النظرية التي تقول: (غرّة يا تشربي يا أكسر قرنك) دا مثل من البيئة.
(العوج راي والعديل راي)
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
Quote: ونحاول لقاء بورداب الخرطوم لو زهير عثمان حمد عزمني. |
فتشــت ليك امبارح قلت اعزمك (لقيت التلفون عييييييييييك )
يا اخوى انت معزوم بمجرد وصولك ( بنى كربو حاره بيه ملاح كجيـك )
مليون مبروووووووووووووك على الالفيــة دى ...
التصنيفات عجيبــة وفيهــا ( قرايــة دقاقــه .. ولقيــت نفســى فيهــا )
عــلا ( نسيــت الناس البيمثــل الديــن وقيمــه مكون اساســى لافكارهــم وهم غير منتمين )
ترمـــة :
عدم الرأى رأى والرأى رأى ولا شنو
| |
|
|
|
|
|
|
Re: هنئوني على الألف الأول من البوستات والمداخلات (Re: بدر الدين اسحاق احمد)
|
يا بدر الدين اسحق بدل تقول لي كبدة وكفتة وكباب تعزمني بني كربو بكجيك... دي اكلت فيها شحنة لوري فتريتة. شوف لي حاجات حلوة. لكن يا زول عيب الزاد ولا عيب سيدو. صدقني ألذ وأطعم أكله أكلتها في حياتي وما زال طعمها في فمي .. كسرة بموية سخنة وزيت وبصل وملح بعد يوم عمل مرهق في المشروع في العام 1977.
| |
|
|
|
|
|
|
Re: هنئوني على الألف الأول من البوستات والمداخلات (Re: حسن محمود)
|
Quote: أنا من ناس أبو جبيهة .. لكن اليومين ديل شايف أولاد النوبة في استراليا عاوزين يطردونا من بلدنا عشان نحن عرب رحل وهم قالوا التراب حقهم لازم نخليهو ليهم. شفت العوجة كيف؟
|
* اخي كنتونا اهنيك اولا علي الف بوست واقبال المليون اخي كنتونا ان شعب نوبة شعب مسالم اظن ياخي لم يحتاج الي شهادة غير لاثبات ذالك . شعب نوبة ياخي اخر من يفكر في طرد الاثنيات الوافدة الي جبال النوبة نحن نؤمن ان التنوع الاثني هو القوة اخي كنتونا هل هناك من ينكر ان الارض حقهم اخي كنتونا اني اراك رجل الحق هل سمعت يوما ان النوبة اعتدوا علي الاثنيات في جبال النوبة اخي كنتونا من هو المعتدي ومن هو المدافع اخي ان منطقتنا مرت بمرارات متعددة لابد ان نتفهم كلنا هموم منطقتنا جميعا افيدك ياخي كنتونا ان اسلوب الجلابة اصبح امرا مكشوفا لدي الهامش المغلوب كما قال الريئس انا لاافاوض الا من يحمل السلاح اخي ان النوبة شعوب اصيلة لة الحق بمطالبة حق تقرير المصير اما الاثنيات في جبال النوبة لهم حق اعيش في جبال النوبة حتي نبني منطقتنا سويا وايضا لة الحق ان يعيش مايريدة في الشمال او في الجنوب اخي هل ننتظر المركز المتغطرس ان تبني لنا منطقتنا بتعالي وتكابر ويصفني بغرابي الغبي والنوباوي الكافر و الجنوبي........... اخي الجنوب دافع ان حقة بشراسة واخذ حقة وغدا النوبة ودارفور وانقسنا خلفة وفي الاخير ان صاحب الحق هو المنتصر اخي كنتونا نحن نحترم كل ارثنيات في جبال النوبة نحن نعتبركم نوبة مادمتم في جبال النوبة ولكن في داخلكم ابناء حميد وابناء ......... كما نحن النوبة في داخلنا الميري وكيكا والكاركو والكجيرية........... ولكن هذة المنطقة منطقة جبال النوبة منطقتنا جميعا نوبة عرب فلاتة وكل من عدم ذكر اسمة
| |
|
|
|
|
|
|
Re: هنئوني على الألف الأول من البوستات والمداخلات (Re: حمزة سيف الشريف)
|
Quote: بس ياهو مع ناس عسولة وسيد مرارة وانور كينج والناس العجيبين ديك, معروف سند
|
عزيزنا معروف سند، الله يطراك بالخير، وأشكرك بكتابة اسمي بجوار حسناء البالتوك عسولة، وبالمناسبة يا معروف إنت من كتابي الفضلين وبقرأ ليك من زمان، بي هنا وبسودان فور أوول، ويا حليل البالتوك الناس كانت زي الأهل
Quote: بالله زمان الواحد في الشغل يشتاق يرجع البيت عشان يدخل البالتالك ويسمع ملامح وكانتونا وجيلاني وسيد مرارة ودلايلا وماجيك وادعثمان وسناري وساري الليل وناس كتار الزول اتشرف بي معرفتهم الأزهري 2
|
الله يطراك بالخير يا أبو الزهور ويطرا دلالة بالخير، ياخي دي زولة فاهمة وملكة، وياليت أيام البالتوك تعود.
ويا عم كانتونا أنا ما ح أبارك ليك، ياخي أسلم عليك في نكتة الفكي وتتجاهلني كدا؟ هسا لو كان اسمي رنوية ولأ سيزو كنتا ما شخطتا لي بالطريقة دي
والله يا جماعة حقو واحد يفتح بوست للتواصل بين رواد البالتوك وسودانيز أون لاين، ودي قائمة على السريع كدا:
1) ملامح - عادل نجيلة 2) كانتونا 3) معروف سند 4) الأزهري 2 5) أيام زمان - هشام أمين 6) جاز 16 - دينق 7) نصار 8) رضا 9) الخواض 10) زولة 123 11) الكلاكلة صنقعت 12) بت القبائل 13) سوما 25 - أسماء الجنيد 14) مك نمر - ياسر طيفور 15) أوسلي 2 16) سيزو - سوميتا 17) سلمى الشيخ سلامة 18) سيف الجامعة 19) سيد مرارة - النذير حجازي 20) ورروووك 21) دبيب 22) منعم 4 - عبد المنعم سيد أحمد 23) عادل 7 - عادل عبد العاطي 24) بكري أبو بكر 25) منصوري 26) تماضر 27) أنور كنغ 28) أبو السعود - سعد الدين عبد الرحمن 29) نسمة
والقائمة تطول
| |
|
|
|
|
|
|
Re: هنئوني على الألف الأول من البوستات والمداخلات (Re: cantona_1)
|
Quote: ناصر الأحيمر نحن نعتبركم نوبة مادمتم في جبال النوبة ولكن في داخلكم ابناء حميد وابناء ......... كما نحن النوبة في داخلنا الميري وكيكا والكاركو والكجيرية........... ولكن هذة المنطقة منطقة جبال النوبة منطقتنا جميعا نوبة عرب فلاتة وكل من عدم ذكر اسمة |
كدا كلامك بقى حلو زي عسل الجبال. النوبة والعرب وجهان لعملة واحدة. كذب من قال أن أحد الوجهين سيصلح بدون الوجة الآخر.
| |
|
|
|
|
|
|
Re: هنئوني على الألف الأول من البوستات والمداخلات (Re: ماجدة عوض خوجلى)
|
الأخت الكريمة ماجدة... سلامات كيفك والشباب جميعهم... الخرطوم أحلى من لندن كتير... سخانة تخفف الوزن... كتاحة تحمى الجلد من السخانة. ناس إجتماعيين وضاربين الهم بالفاقة رغم ظروفهم المش ولا بد. بيوت بكيات - بعيد عنك - تكسّبك أجر. حفلات في الصالات المكيفة تنسيك حر النهار... وما تنسي العشاء الما خمج. وحاجات تانية كثيرة وحلوة وحامياني. إرتباطنا بها إرتباط عضوي. ما عندنا مشاكل.. عشان ما قاعدين نجي بشارع الجماعة بتاعين المشاكل.. هم من سكة ونحن من التانية. أعمالنا لا ترتبط بمن فضلك وساعدني ونص الستة... جاريين في بلد الله الواسعة لا بنغلط على زول ولا في زول بسألنا. العربية مرخصة ومؤمنة. دافعين حق الموية الما قاعدة تجي.. ودافعين حق النفايات الما قاعدين يشيلوها. ودافعين حق الكهرباء البتجي على كيفها. يوم نتعشى كبدة وكباب ويوم نتعشى فول بالجبنة.. ويوم بموية باردة. الهموم كتيرة والبنسيك الهموم أكتر... قعدة في ضل حيطة في ودنوباوي.. أو حدائق حبيبي مفلس تفرِّق عليك كل الهموم. لو كنتم في نفس المكان قولي عووك.. انا في لندن وسوف نزوركم في العيد بقدرة الله.
| |
|
|
|
|
|
|
Re: هنئوني على الألف الأول من البوستات والمداخلات (Re: ود الباوقة)
|
سلامات يا ود الباوقة. أنا قاعد في لندن حتى 9 أكتوبر القادم بإذن الله. وعندي فراغ كبير ووقت فائض كتير. لو لقيت مواضيع تستحق سوف أتداخل لكن المشكلة في ناس بفهموك غلط وبندرعوا فيك بلا سبب. ديل بنخاف منهم ومن المشاكل. لكن لو آمنوا بأن العوج راي والعديل راي ما أظن حتحصل مشكلة. لك التحايا والود.
| |
|
|
|
|
|
|
Re: هنئوني على الألف الأول من البوستات والمداخلات (Re: بشير جبريل علي)
|
بشير جبريل علي
Quote: بمناسبة ابوجبيهة دي .. بتعرف محمد حسني حران ..(الحا مفتوحة ما زي حقت المصريين) |
الأخ بشير جبريل علي ... شكراً على التهنئة وربنا يديم عليك نعمة الصحة والعافية. الأستاذ محمد حسني حران إبن عمي ومتوزج بنت عمي شقيق والدي. وهو المسؤول عن مكتب إيفاد في أبو جبيهة الآن.
| |
|
|
|
|
|
|
Re: هنئوني على الألف الأول من البوستات والمداخلات (Re: سيف النصر محي الدين محمد أحمد)
|
سيف النصر محي الدين... لك الشكر على المرور.
Quote: مبروك الالفية يا شيخ كانتونا بس عندي سؤال الالف ديل الأعوج فيهن كم و العديل كم؟؟ |
العديل فيهم كتير والعوج كتير وبينهما أمور متشابهات. لكن في ناس ما بعرفوا إلا العوج .. وعشان مبروم على مبروم ما بلفِّش بنديهم عوج شوية عشان يفهموا . وفي واحدين تانيين كلهم مفهومية .. تديهم ريق حلو يدوك ريق أحلى.. وهم حاملي المسك. الأولانيين ديك هم نافحوا الكير. لو قريت أول البوست بتعرف الناس تصنفهم كيف؟ في واحدين يا توافق على رأيه وإلا تكون كما يتصور هو ويقول فيك ما لم يقله مالك في الخمر. وواحدين تسألهم سؤال! ما يفهم السؤال ينط ليك في حلقك. لأن فهم السؤال نصف الإجابة. زي دا بهمله طوالي وما برجع ليهو. وبقول في سري وما عليّ إن لم تفهم البقر. كفاك كدا ولا أزيدك؟؟
| |
|
|
|
|
|
|
|