ظاهرة شبابية خرطومية ؟؟؟

طبعاً أعنى بالظاهرة قصة البناطلين الناصلة الـقايمين فيها أولاد الخرطوم الايام دى
مسألة بايخة جدا وغريبة على مجتمعنا بكل مكوناته ومع ذلك فهى فى إزدياد مستمر بين شباب الخرطوم لا
سيما طلاب الجامعات الخرطومية ذات الاثمان العالية جدا ...

أنظر دليل التمكين

باب : القول الفاصل في البنطلون الناصل

والله صحي

أنا شدة ما بتحرّق روحي أقول أمسك الواحد أرفعوا ليه

اخي محمد ابشر
ماذا يعني البنطلون الناصل وانزاله بهذه الطريقة ومن اين اتت هذه الظاهرة والتي بدات في بلد المحن امريكا.
المسالة بدات من السجون فعندما يدخل الشخص السجن يتم التحفظ علي ممتلكاته ومن ضمنها الحزام بدعوة عدم استخدامه في الانتحار فبعد خروج السجين اصبحت هذه الظاهرة التي تدل علي ان كل من ينزل بنطلونو متردد سجون كنوع من الشفتنة او لاخذ الحذر من هذا الشخص الخطير.
وللمعلوية هنالك ولايات امريكية اصدرت قانون يمنع هذه الظاهرة ومنها فرجينيا.

Quote: اخي محمد ابشر ماذا يعني البنطلون الناصل وانزاله بهذه الطريقة ومن اين اتت هذه الظاهرة والتي بدات في بلد المحن امريكا. المسالة بدات من السجون فعندما يدخل الشخص السجن يتم التحفظ علي ممتلكاته ومن ضمنها الحزام بدعوة عدم استخدامه في الانتحار فبعد خروج السجين اصبحت هذه الظاهرة التي تدل علي ان كل من ينزل بنطلونو متردد سجون كنوع من الشفتنة او لاخذ الحذر من هذا الشخص الخطير. وللمعلوية هنالك ولايات امريكية اصدرت قانون يمنع هذه الظاهرة ومنها فرجينيا.

الاخ متولى أهلا بيك وشاكر لهذه المداخلة التى أفادتنى جراء تعريفك ببدايات
الظاهرة الناصلة,,, حقيقى كنت بستغرب مع انى أعلم أنها كثيرة الانتشار بين السود فى امريكا
ولكن ما يدعو للدهشة حسب ما أوردت بأنهاظاهرة مترددى سجون وما الى ذلك... انا على يقين تام
ان كثير من يفعلون تلك الحركة البايخة لا علم لهم بخلفياتها ودة حقو يسوقنا الى مدى ضعف المجتمع
فى الثبات وعدم التأثر بالوافد الاجنبى الذى لا يليق مع أدبياتنا الاخلاقية السمحة ..
كل الود والتقدير

Quote: والله صحي أنا شدة ما بتحرّق روحي أقول أمسك الواحد أرفعوا ليه

حبيب الكل كل الود يا رائع وممتن جدا لمداخلتك الغاضبة
ومعا لرفع البنطال ليأخذ وضعة الطبيعى ..
كامل التقدير

Quote: أنظر دليل التمكين باب : القول الفاصل في البنطلون الناصل

الاخ معاوية ألف شكر وتقدير للمداخلة وصلت رسالتك
كامل الاحترام

System

غايتو الواحد قاعد يشوف العجب .. ووراقو كمان!
بعدين ناس الشارع خليهم .. أولادالجامعات ديل كيف
تسمح ليهم إدارة الجامعة إنو يكون ماشي وعفشو بره؟

Quote: وعفشو بره؟

يا عمكـ قول بسم الله ... عفش شنو؟ ياخ ده الـ(إستايل) بتاع البنطلون .. ما تعاين للصورة الفوق دي، ده بس مكتّر المحلبية.

بعدين الأولاد ديل أساساً ما عندهم مؤهّلات تثبّت البنطلون، فبيقوم ينزلق.

على قول الشاعر:

من شوفتك إحنا فصلنا.... من بنطلونّا نصلنا *

______
* تُردّد بلحن المدحة (يا ليلة ليلك جنّ .... معشوقك نوّح وأنّ)

بالنسبة للزول الفوق دا يا أبو الريش يا عمكـ
دا ما كتّر المحلبية .. دا دفّقا عديل كـدا!

Quote: أولادالجامعات ديل كيف تسمح ليهم إدارة الجامعة إنو يكون ماشي وعفشو بره؟

ياودالصايم ...... ابوه وين الولد ؟؟؟؟

يمين ولدي يلبس بنطلون زي ده احلق ليهو صلعة واديهو طابور ذنب لمن يفهم حاجة .......

اسمو نظام

داقي سيستم

داقي شنو

وسيستم شنو

والله ما عارف، لكن ياهو دا قالو اسمو كده

يا جنابو .. الله أعلم يكون مارق من البيت كـدا!
غايتو لو بقت الحكاية مروق من البيت تكون جاطت!!



_
طابور وصلعة الهينة دي!

Quote: بعدين الأولاد ديل أساساً ما عندهم مؤهّلات تثبّت البنطلون، فبيقوم ينزلق.

إنا لله!!

ياعمك

سال سائل لزول بنطلونوا واقع

قال ليهو ده اسمو يامطيحني *
والواقع خالص خالص اسمو سامحني يابابا

عارفك ياود الصائم مانزلت بنطلونك الا للتطعيم

تحياتي

زاتوووو

المشروع الحضاري و اعادة صياغة الانسان السوداني و انزال قيم السماء و الذين ان مكناهم في الارض اقاموا الدين
مش كان في ثيوري زي ده قبل 20 سنة
مشى وين
النتيجة كانت شنو
هل اهل المشروع درسوا جدوي المشروع و العائد من المشروع
ان هم فعلوا و قيموا مشروعهم الحضاري
النتيجة
ليه ما نزلوا النتيجة لوسائل الاعلام

الظواهر لا تاتي من فراغ






......................

بعدين الزول دا ما ناصل دا مخلوع

عديل كدا بتكون القاعة سخنة فالقميص

والبنطلون برة .




................................................................حجر.

تسمى فى الخليج ( طيّّّحنى )

لوقت قريب كان أهل الريف يقولون في من يلبس البنطلون (الما ناصل) ما لم يقله متولي مالك في من يلبس (الناصل)
صراع أجيال وثقافات وكدا
يا صايم بي طريقتك دي خريف خريفين اسمك حا يظهر في كشف
"حضارات سادت في البورد ثم عيييك"

في برنامج علي قناة هارموني

المذيعه قالت إنو عاجبه وشكلو لذيذ!!!!!!!!!!

الشي دا مادام بعجب سجم الرماد ديل
يبقي الناصلين ديل معاهم حق.



-------
حررم نحن نكرب القاش لما النفس يبقي في تلتله




حذف كلام زعل

Quote: وللمعلوية هنالك ولايات امريكية اصدرت قانون يمنع هذه الظاهرة ومنها فرجينيا.

لو منعوه عندنا حتخرج مظاهرات ضد تكميم الأفواه، وحتلقى البورد مليان بوستات من نوع:
التعدي على الحريات.....طيحني نموذجا
نحن من أمة لبست البناطلين فما العيب إن نصلوا (توجد صور)
دعوة للتضامن مع منكوبي طيحني
وقعوا هنا لإدانة حجب حق البنطلون في الإنفصال عن محيطه
منعته الرقابة..مقال جرئ بعنوان (قف ولا تواصل ولا تفكر في البناطلين النواصل)
إنفصال البنطلون مقدمة عملية لإنفصال الجنوب

إنتو سيطان العنج..انعدمت في الخرطوم لي شنو ؟؟

لكن والله ديل مادايرين سيطان.. دايرين شي يبرد ليهم سخانتهم دي..

ياااخ انا لله ..دي حالة شنو المقرفة اللي وصلنا ليها دي ؟!!

يا محسي

Quote: ياااخ انا لله ..دي حالة شنو المقرفة اللي وصلنا ليها دي ؟!!

نحن لسه يا رجل قصتنا ما بدأت وما حاتنتهي إلا عندما يكون السودان بدون رجال

دولة شمال السودان
دولة وسط السودان
دولة شرق السودان
دولة دارفور
دولة جنوب السودن (طبعاً دي اول واحدي حا تكون)

الصادق

Quote: إنتو سيطان العنج..انعدمت في الخرطوم لي شنو ؟؟ لكن والله ديل مادايرين سيطان.. دايرين شي يبرد ليهم سخانتهم دي.. ياااخ انا لله ..دي حالة شنو المقرفة اللي وصلنا ليها دي ؟!!

المحسى سلامات وبالمناسبة والله اللفت انتباهى للموضوع عمنا كبير سائق تاكسى
من الناس السمحين فى كل شئى كنا بنشرب قهوه وبعدين جو ولدين منصلين قام الراجل
دة قالى يا ود أبشر انتو الاولاد البنصلوا البنطال دول ما تدقوهم اى والله قالها بحمقة
وزعل رجل رأى كل الاشياء امامه تتبدل للأسواء ...
..............
بعدين الزول المسخن حرم بنطلونو دة يكربو مع الصرة فوق الا تبقى سخانة تانية؟؟؟؟؟
شكرا للمرور يا محسى

Quote: في برنامج علي قناة هارموني المذيعه قالت إنو عاجبه وشكلو لذيذ!!!!!!!!!! الشي دا مادام بعجب سجم الرماد ديل يبقي الناصلين ديل معاهم حق.

يا فاروق سلام تعرف هو المشكلة فى زى بت هارمونى القلتها دى
يعنى زول مؤخرتة نص جو ونص برة وعاجبة غايتو حاجات تمحن الفيل ؟؟؟

تعرف زمان كان معانا شاب فى الجامعة اها البنيات دول كلهم متكبين فيهو
سألت واحدة الزول دة مجننك فيهو شنو ؟؟؟ قالت لى شنبو أحمر تصدق ؟؟
يعنى بعض الأناث ينظرن بسطحية للأمور والظواهر الجديدة أكثر من التعمق فيها
لنا عودة
كل الشكر للمرور

Quote: المشروع الحضاري و اعادة صياغة الانسان السوداني و انزال قيم السماء و الذين ان مكناهم في الارض اقاموا الدين مش كان في ثيوري زي ده قبل 20 سنة مشى وين النتيجة كانت شنو

علاء الدين مرحب بيك والله وحقيقيى النتيجة واضحة الان بناطلين ناصلة وخمس البلد ماشى ينصل برضو
ارتفاع معدل الجرائم المقدمة امام المحاكم بصورة غير مسبوقة إنحلال إجتماعى رهيب ووووووووو
لكن فى تقديرى الخاص بموضوع البوست يمكن ان نساهم ولو كل زول نصح اخاه او جارة وما الى ذلك ...
ممتن جدا للتداخل بهذا التحليل العميق ..

Quote: يمين ولدي يلبس بنطلون زي ده احلق ليهو صلعة واديهو طابور ذنب لمن يفهم حاجة .......

عمر عثمان ألف سلام عليك والله يكتر لك فى الاولاد يا رب
كلام نجيض لا للتحلحل ( بكسر الحاء )؟؟
كل التقدير للمرور

Quote: أولادالجامعات ديل كيف تسمح ليهم إدارة الجامعة إنو يكون ماشي وعفشو بره؟

ود الصائم ازيك يا زول ..
الظاهرة أصلا حسب الشايفنو منتشرة بين أولاد الجامعات ولجيل بعينة...
قصة عفشو برة دى ياهو البتوجع شعب غريب نحنا تصدق بنت تظهر بعض المحاسن الدنيا تقوم وتقعد
شئى تعليقات وشئى إستهجان وشئى إستعجاب وشئى اندهاش مع انو الوضع أكثر قبول مقابل الفتور الذى أصاب الشباب نحو الزواج جراء صعوبة الوضع الاقتصادى والالتزامات الكثيرة ووووو فهى تظهر على قولك بعض من العفش للفت الانظار تجاها كأنثى أو لشئى فى نفس حواء .... فيحدث هذا الضجيج الانف الذكر ..
والولد على النعمة بنطلونو ناصل وعفشو برة ومافى زول يسأل لا ناس البيت لا الجامعة لا الشارع ...

كل الشكر للمرور لكل الود يا رائع

بركات الشريف:

وحات الله بي طريقتك دي يوم بتكتل ليك زول

Quote: ياودالصايم ...... ابوه وين الولد ؟؟؟؟ يمين ولدي يلبس بنطلون زي ده احلق ليهو صلعة واديهو طابور ذنب لمن يفهم حاجة .......

دا كلام صاح لو كل ولي أمُر عمل كدا ما كان شفنا الظاهرة دي في شوراعنا

زمان كان في واحد مجنون كده حايم في السوق العربي بداوس البنات في لبسهن لابس ليه لبسة عسكرية كده
وعامل فيها دباب يوم ضرب ليه وحده بالسوط وزميلها كان ماشي معاها قام ناشو بنية رماه ومن يومي داك
ما شفت الزول ده حاايم , ياخي كان في امشو جيبيوه وقولوا ليه خلي البنات المسكينات ديل واقع في البطان
السراويلم ناصلي ديل وانا متبرع بي السوط

Quote: زمان كان في واحد مجنون كده حايم في السوق العربي بداوس البنات في لبسهن لابس ليه لبسة عسكرية كده وعامل فيها دباب يوم ضرب ليه وحده بالسوط وزميلها كان ماشي معاها قام ناشو بنية رماه ومن يومي داك ما شفت الزول ده حاايم , ياخي كان في امشو جيبيوه وقولوا ليه خلي البنات المسكينات ديل واقع في البطان السراويلم ناصلي ديل وانا متبرع بي السوط

الحبيب الجميل الكونت الف سلام وشوق
اى يا حبيب الراجل كان يرتدى دائما ملابس بوليس وشايل كسين والله تعرف بى خلفيتو الاسلاموى دى لو لقيناهو بى كسينو دة
يكون كويس للولاد المنصلين ديل ....
كل الشكر يا حبيب على المرور

لا حولا
بالله العادة القبيحة دي وصلت الشوارع
ابدا ما كنت اتوقع إنو الموضة دي تصل بلدنا

هنا الجماعة عاملين لينا وجع وش بالحكاية دي
وبعدين الموضة دي مسمينها ..... بنطلون "السيستيم"
يعني يقول ليك الزول دة "داقي سيستيم "..


ربنا يصلح حال الشباب الطايشيين ديل.

والله ياودابشر مطلعه زيتي الحركه دي
بعدين في واحدييين بزيدوها كوز
يعني تلقي البنطلون ناصل وعامل فاصل
والزقن معموله كيف وبعدين مع حركة في الاسنان زي التقول بيعملو حاجه للخشم

طبعا يجيك ضغط لما يكون عامل فيها ولد محترم وشاكي
الله من الشكه

ديل طبعا احنا عندنا ليهم مصطلح توتي
يعني تقول لي المعاك اولاد توتيين
علي وزن الغالي صديقنا 000000000
والعجب ناس ابوتفه علي القسم الواحد تلقي نافش شعرو
لما تقول بسم الله الرحمن الرحيم
قال سستم قال


مميزات التوتييين
دايما العربيه بيكون فيها سبعه الي تمانيه
مع السائق والشعر منكوش والتي شيرتات مكرفسه
والزجاج بتاع العربيه منزل والعادم تقول مشروط
يعني العربيه حتي لو اتوزتجي ماشه فيك تقول دفار
والمسجل باعلي صوت
ودايما بيمشوا في جماعات

اتخيلو كلو شغل اولاد مغتربين للاسف ...في الخليج شارطين عيونا ..

بس نقول حسبي الله ..

والله فيهم حلاة صجة بتاعة صوت عنج ممسح بالزيت

تحية طيبة لك أخي ود ابشر
وتحية لضيوفك الكرام

كتب اخي متولي مالك :-

Quote: خي محمد ابشر ماذا يعني البنطلون الناصل وانزاله بهذه الطريقة ومن اين اتت هذه الظاهرة والتي بدات في بلد المحن امريكا. المسالة بدات من السجون فعندما يدخل الشخص السجن يتم التحفظ علي ممتلكاته ومن ضمنها الحزام بدعوة عدم استخدامه في الانتحار فبعد خروج السجين اصبحت هذه الظاهرة التي تدل علي ان كل من ينزل بنطلونو متردد سجون كنوع من الشفتنة او لاخذ الحذر من هذا الشخص الخطير. وللمعلوية هنالك ولايات امريكية اصدرت قانون يمنع هذه الظاهرة ومنها فرجينيا.

وبالفعل كما قال الكثيرين هنا يسمي سستم وبعض الاحيان يقال له ففت سينت
واظن اخي متولي ان تاريخ هذه الظاهرة لا يعود للسجون الامريكية مع اتفاقي معك الكامل انها بدأت
بامريكا لكنها ترجع لعصر الرق واتهاضد اصحاب اللون الاسود في امريكا ذاك العصر فقد كان
الانسان الافريقي في ذاك العهد مجرد خادم في المنزل يخدم اسياده (الافريقي امرآة أو رجل)
وكانوا يشقون ويتعبون في حياتهم الذليلة تلك ولا يجدون مايلبسونه من ملابس فيتبرع لهم اسيادهم
البيض ببعض ملابسهم والتي بالضرورة تكون اكبر منهم نسبة لعملهم المرهق والصعب فكانت
لا تستقر جيداً في وسطهم (وتنصُل) وترتخي قليلاً لكن لا مفر من مواصلتهم للعمل خوف الضرب
والعذاب ، وحين تقادمت السنين واصبح الحال يتغير قليلاً قليلاً آتي جيل جديد من الشباب الامريكي
من اصول افريقية وحتي يعيدوا للبيض ذاك التاريخ البغيض ويعلمونهم انهم تحرروا منهم تماماً لكنهم
لن ينسوا تاريخ ابهاتهم واجدادهم عادة هذه الظاهرة مجدداً حتي يتم بها تأكيد معرفتهم ورفضهم لتلك
الممارسات العنصرية وهذه الظاهرة في امريكا لها قادتها ومشاهيرها واظن تو باك احدهم وكثيرين
غيره .

لكم محبة خالصة .

غايتو ذكرتونا زمن" كارب صليبو نار الله حرقت قليبو"


بالمناسبة:.
.
.
.
.
.
دا المبخر!

Quote: إنو يكون ماشي وعفشو بره؟

ياود الصائم يا اخوي العفش علي مسئولية صاحبه

اخي سفيان بشير نابري
لك تحياتي
كلامك صحيح ولكن ذلك ينطبق علي المشي مع البنطلون الناصل وذلك في زمن الرق كان يتم ربط الارجل بالاصفاد مما يعيق المشي وكتذكير بمعاناة اباءهم واجدادهم يمشون هذه المشية الغريبة وتم اضافة البنطلون الناصل كتعبير ان الشخص متردد سجون واليك هذا الرابط
http://www.therightperspective.org/2010/04/01/low-slung...acism-black-senator/
The African-American hip-hop style began as a part of prison culture, where inmates are forbidden to wear belts and often wear oversized pants. Rappers adopted the look in their videos during the 1990′s and it has become a part of Black and mainstream popular culture.

Quote: اتخيلو كلو شغل اولاد مغتربين للاسف ...في الخليج شارطين عيونا .. بس نقول حسبي الله ..

عمنا أحمد عتيق كل الود والترحاب للمرور ...
وتحايا لكل سودانيون الطائف وبصورة خاصة عمنا المغيرة وعلى قنات ..... الخ

الاخوة البورداب : أحمد محمد بشير .... خالد كدودي
كل الشكر والتقدير للمرور والمشاركة

لقد صدق نبينا الكريم عليه أفضل الصلوات وأتم التسليم في حديثه الذي صح سنده ومتنه ..!! لقد صدق رسولنا صلى الله عليه وسلم عندما قال: "لتتبعن سنن من كان قبلكم حذو القذة بالقذة، حتى لو دخلو جحر ضب لدخلتموه" .
قالوا [أي الصحابة]: يا رسول الله، اليهود والنصارى ؟!
قال: "فمن" [أي فمن غيرهم].
وقال صلى الله عليه وسلم:
"لا تقوم الساعة حتى تأخذ أمتي مأخذ القرون، شبراً بشبر، وذراعاً بذراع".
فقيل: يا رسول الله، كفارس والروم؟
قال: ومن الناس إلا أولئك ؟
فأخبر عليه الصلاة والسلام أنه سيكون في أمته تشبه باليهود والنصارى، وهم أهل الكتاب، وتشبه بفارس والروم، وهم الأعاجم، وهذا التشبه سيكون إما في العبادات أو المعاملات أو العادات وحتى السياسات.
وما البنطلون الناصل إلا تشبه. وقد نهانا نبينا ورسولنا الكريم صلى الله عليه وسلم عن التشبه بهؤلاء وهؤلاء.