ســـــواد البـــورد والحــــاله العجيبــــة !!!!

والله العظيم ..

احساس مهما وصفته ومهما قلته وكتبته ... لا يوصف ..

لما اشوف البورد مسود ..

والله بفقد قواي ...

وبنهار وقلبي بتزيد ضرباته ألف ...

لاحولة ولا قوة إلا بالله العلى العظيم ..

الموت حق علينا وكلنا ضيوف فى الدنيا الذائله ..

لكن الموت ما بتؤالف ..

وصعب جدا يجيك خبر عزيز ليك ..

سواد البوست بتصيبنى فيهو حاله عجيبة قبل ما اعرف الميت منو ..

لانه احساسنا ببعض وحبنا لي بعض مهما اختلفنا .. يعلمه الله ..

ربنا جمعنا فى حوش بكري .. بحكمه يعلمها هو لا احد غيره ..

اتلمينا هنا وعلاقاتنا تأصلت .. واتحكرت جوانا ..

ربنا يرحم كل اخوانا الفقدناهم ويبنى لينا حوش فى الجنة ويجعلها ملتقانا ..


وإن شاء الله البوست ما يسود علينا تاني ..




رحم الله اخونا قرفه وجعل الجنة مثواه ..

هكذا الدنيا .. لنا قناعات بان كل شيء بالي .. والباقى هو الله ..


ولكن !!!

Quote: سواد البوست بتصيبنى فيهو حاله عجيبة قبل ما اعرف الميت منو ..

بالضبط يا عفاف اختي .. دا الشعور الحسيت بيه وانا بفتح البورد الصباح

نسأل الله أن يرحم الزميل ويغفر له ويجعله من أصحاب اليمين

والعزاء لنا ولكم ولأسرته الكريمة

Quote: بالضبط يا عفاف اختي .. دا الشعور الحسيت بيه وانا بفتح البورد الصباح

نادر .. صباح الخير ..

كل يوم اول حاجة بعملها لما ادخل المكتب .. بتمم على بيتى التانى ..

ولما اشوف البورد مسود والله بصرخ بطول حسى _ سجمي سجمي سجمي المات منو ..؟

بلقى نفسي فى المكتب وبحاول اتمالك نفسي ..

لانه فقد الاخوان صعب صعب ..


ربنا يطول عمركم ويخلينا لي بعض ..


اللهم ارحم اخونا قرفه وعوضه الجنة يارب ..

Quote: سواد البوست بتصيبنى فيهو حاله عجيبة قبل ما اعرف الميت منو ..

نفس شعور الميت ليهو زول من الأسرة وما عارفو منو
يعني أحساس تكون مافي وتجي تلقي صيوان قدام بيتكم وما عارف الميت منو
سودانيز أون لاين أسرة كبيرة (اذا اشتكي منه عضو تداعى له سائر الجسد بالسهر و الحمى)

رحمة الله على موتانا أجمعين

Quote: نفس شعور الميت ليهو زول من الأسرة وما عارفو منو يعني أحساس تكون مافي وتجي تلقي صيوان قدام بيتكم وما عارف الميت منو سودانيز أون لاين أسرة كبيرة (اذا اشتكي منه عضو تداعى له سائر الجسد بالسهر و الحمى)

بالضبط يا قرضابي ..

احساس تانى اليوم كله ما تكون عارف نفسك بتعمل فى شنو ..

والفقد حاااار .. حتى لو ما قابلنا بعض ..

فصاحب صحبك صحبك .. واخو اخوك اخوك ..


قرضابي ..
إن شاء الله نسمع عنك كل خير يا اخوي ..

Quote: سواد البوست بتصيبنى فيهو حاله عجيبة قبل ما اعرف الميت منو .. لانه احساسنا ببعض وحبنا لي بعض مهما اختلفنا .. يعلمه الله ..

الاخت عفا لك التحية اتمنى ان تكونى قد تماثلتى للشفاء

حقيقة عندما يدخل المرء الى المنبر و يجده متوشح سوادا
يدخل القلب حزن قبل معرفة من هو المتوفى ,
نسال الله الرحمة و المغفرة لاخينا قرفة ..

عفاف...سلام....

البورد دا زى الحلة/الحى/الحارة بالضبط عندك فيهو اهـل واصحاب وجـيران ومـعارف ...
يعنـى بقت فى مـعرفة وإلفة وتواصل حقيقى بين النـاس...تفرح...تحزن ..تهلل ..تبارك...تزغرد...
زى مابحصل فى الواقـع بالضبط.....
السواد بالبورد زى الصيوان فى حلتكم وانت نازل مـن المواصلات وتبدا تسال فى نفسك ياربى المات منو?
احتمال فلان?لااااا لا واحتمال فلان ?برضو لا والمشاعر مختلطة جواك لحدى ماتصل وتعرف الخبر اليقين.....

ياريت لو الناس تراجع نفسها بعد كـل سواد وتتصافى وتتسامح وتبطل الفجور فى الخصومـة والاساءة فى الفارغة والمليانة...
ونطلب السماح مـن بعض...

اللهم ارحم قرفة واحسن اليه وجبر كـسر اهلـه واصدقائه

سلامات ياعفاف
والبركة في الجميع
الفقد واحد
ــــــــ

Quote: كما أرجو أيضاً أن ألفت نظرنا جميعاً اَن نهتم بفقداء المنبر ونقيم لهم زكرى سنوية( يُتفق حولها يحدد لها يوماً جامعاً لفقداء المنبر) نواصل فيها دعواتنا لهم والترحم على فراقهم ، فهم بذلك لهم حق واجب علينا تشتشرطها عضوينا معهم في هذا المكان وحروفهم التي كانت تجري هنا وشاركناهم فيها مسعاها وحتى الكانوا مقلين منهم والمختلفين معهم ، سيظل للمكان دفئه .. فلا نكتفي فقد بتسويد المنبر وبوستات التعازي في حدق الحزن بالمغيب ، وتتلاشى وتتوارى للتختفي بعد ذلك ، فلنجعل زكراهم ترفرف هاهنا كما محياهم وحروفهم .. فلنجعل دفء المكان بالوفاء .. فلنجعل لفقدائنا من اعضاء المنبر زكرى كساير مانقيم من السرادق هنا .. جعلهم الله جميعهم/ن من مستكفي شروط الفوز برضاه الجميل وخلَّف من بعدهم صالح الزرية والأهل وعزائنا متجدد لكل صاحب فقد مع فائق التقدير

منقول من بوست انعام عبد الحفيظ

قبل ايام وانا قاعد في آمان الله

دخل علي ( جدو ) يبكي.....!!!!!

يابابا نحنا كنا مشاين نعلب....0 (من وراء الدموع طبعا...!!!)

بعدين جات عربية مسرعة انا جريت

و ( عبودي ....!!!!) اخوه الاكبر يقصد .

طبعا ماخليته تم كلامه واسودت الدنيا في عيوني.....!!!!!

وحتي اللحظة عندما اتذكر الموقف ارتعب .

نفس الشعور عندما افتح المنبر فاجده مسود.....

فعلا ....حاجة عجيبة...شكرا استاذه عفاف

الحمد لله الولد طلع ماعنده عوجة...

لكن الدخلت فوقي مابتطلع بالساهل .,

اللهم ارحم امواتنا....اللهم آميييييييييييين .

الاكرم هارون ..

Quote: طبعا ماخليته تم كلامه واسودت الدنيا في عيوني.....!!!!! وحتي اللحظة عندما اتذكر الموقف ارتعب . نفس الشعور عندما افتح المنبر فاجده مسود.....

إن شاء الله ما تشوف فيهم شر يا رب ..

وربنا يحفظهم ويغطى عليهم ..

وكم كبير الحزن لفقد عزيز ..

ونحنا اصبحنا اسرة واحد ..

ربنا يجعلها اخر احزانا يارب ..


اللهم ارحم اخونا قرفه وادخله جنة النعيم ..

ادناه مكرر للعمل به :

Quote: كما أرجو أيضاً أن ألفت نظرنا جميعاً اَن نهتم بفقداء المنبر ونقيم لهم زكرى سنوية( يُتفق حولها يحدد لها يوماً جامعاً لفقداء المنبر) نواصل فيها دعواتنا لهم والترحم على فراقهم ، فهم بذلك لهم حق واجب علينا تشتشرطها عضوينا معهم في هذا المكان وحروفهم التي كانت تجري هنا وشاركناهم فيها مسعاها وحتى الكانوا مقلين منهم والمختلفين معهم ، سيظل للمكان دفئه .. فلا نكتفي فقد بتسويد المنبر وبوستات التعازي في حدق الحزن بالمغيب ، وتتلاشى وتتوارى للتختفي بعد ذلك ، فلنجعل زكراهم ترفرف هاهنا كما محياهم وحروفهم .. فلنجعل دفء المكان بالوفاء .. فلنجعل لفقدائنا من اعضاء المنبر زكرى كساير مانقيم من السرادق هنا .. جعلهم الله جميعهم/ن من مستكفي شروط الفوز برضاه الجميل وخلَّف من بعدهم صالح الزرية والأهل وعزائنا متجدد لكل صاحب فقد مع فائق التقدير

محمد الجزولى .. ربنا يجعلها اخر الاحزان يارب ويرحم اخونا قرفه ..

Quote: ياريت لو الناس تراجع نفسها بعد كـل سواد وتتصافى وتتسامح وتبطل الفجور فى الخصومـة والاساءة فى الفارغة والمليانة... ونطلب السماح مـن بعض...

كفيتي .. ووفيتي يا اميرة ..

ده المفروض يحصل بالضبط ..

ربنا يجمعنا على الفرح .. ويبعد عننا الاحزان ..



تسلمي يارب ..

شكرا عفاف

نموت مع موت كل عزيز

Quote: نموت مع موت كل عزيز

خليل .. الموت حق علينا .. لكن منكور ... !!

استغفر الله ..


اللهم ارحم قرفه ..

عفة


ربنا يبيّضا في وشك أينما حللتِ

فعلاً لما الواحد يفتح البورد ويلقاهُ أسود
علي طول قلبوا بدق و يسأل يا تري مين من الصحاب ربنا أفتكروا !


الرحيل قدرنا

ولكن!

Quote: الرحيل قدرنا ولكن!

نعم .


ولكن الرحيل يفجعنا ..


حبيب نورة .. لا اراك الله مكروه ..




اللهم ارحم قرفه

اللهم ارحمه واغفر له
واجعلهُ من أصحاب اليمين
في سدرٍ مخضود
وطلحٍ منضود
وظلٍ ممدود
وماءٍ مسكوب
وفاكِهةٍ كثيرةٍ لا مقطوعة ولا ممنوعة
وفُرشٍ مرفوعة

إنا لله وإنا إليه راجعون



ما تشوفي شر في عزيز يا عفاف إن شاء الله

Quote: ما تشوفي شر في عزيز يا عفاف إن شاء الله

محمد فضل .. إن شاء الله كلنا ما نشوف شر ..

وشر واحد فينا شرنا كلنا ..



اللهم انثر الفرح ..

وراحم الله جميع موتانا يارب ..

Quote: حقيقة عندما يدخل المرء الى المنبر و يجده متوشح سوادا يدخل القلب حزن قبل معرفة من هو المتوفى ,

والله يا الطيب يا اخوي احساس عجيب جدا بالحزن العميق ..

وده من فضل الله علينا رغم كل شيء الفقد ..


اللهم ارحم اخونا قرفه .. واجعل الجنه مثواه ..

شكرا عفاف

نموت مع موت كل عزيز

والله يا عفاف .. حالة عجيبة فعلا
ياهو زي ما قالوا الفوق كأنكـ شايف صيوان
قدام البيت وما عارف المات ليكـ منو!
كل الزملاء في المنبر أخوان وأعزاء وأحباب
يا ريت الناس تعرف قيمة الحاجة دي وتختلف
باحترام ومودة .. البني آدم دا عبارة عن
لسان بس .. ما عارف أقدار الله مكتوب فيها شنو!

تسلمي يا عفاف
وفرصة الواحد يبلغكـ فيها كمية المحبة ليكـ!
أخت عزيزة وحنينة وساعية بين الناس بالمحبة

شكرا ياخ!

ربنا يرحم أمواتنا جميعا
ويغفر لوالدينا ولجميع أموات المسلمين

ود الصايم ..

Quote: كل الزملاء في المنبر أخوان وأعزاء وأحباب يا ريت الناس تعرف قيمة الحاجة دي وتختلف باحترام ومودة .. البني آدم دا عبارة عن لسان بس .. ما عارف أقدار الله مكتوب فيها شنو!

يشهد الله وجعك في لفراق مشعل وجعنا كلنا ربنا يرحمه ويغفر ليه ..

مافي حد معمر فيها يا ود الصايم يا اخوي ..

تبقى الذكرة الطيبة للكلمة الحلوه ..

Quote: تسلمي يا عفاف وفرصة الواحد يبلغكـ فيها كمية المحبة ليكـ! أخت عزيزة وحنينة وساعية بين الناس بالمحبة

تسلم يا محمد يا اخوي .. والدنيا شن طعمها .. غير الخوه الصادقه ..

Quote: ربنا يرحم أمواتنا جميعا ويغفر لوالدينا ولجميع أموات المسلمين

اللهم آمييييييييييين ..

Quote: نموت مع موت كل عزيز

خالد ..

اللهم لا نسألك رد القضاء بل نسألك اللطف فيه ..

اللهم الطف بنا فى قضاوك وقدرك .. لطفا يليق بعطفك وكرمك ..




البركة فيكم اخي خالد .. اللهم ارحم فقيدا واحسن له ..

تصدقي يا عفاف .. الواحد قبل ما ينضم للبورد وبالمتابعة بس ...

كان بيحس بالحزن لما يلقى المنبر مسوَّد ...

والإحساس ده زاد وتعمق بعد الإنضمام للمنبر ...

وأمس أول ما فتحت المنبر ولقيته موشَّح بالسواد ... قلبي إنقبض .. وقلت يا ساتر يا رب !!

الواحد فعلاً بيحس بإنه المرحوم أياً كان ... بيهمه أمره .. وعزيز عليهو ..

وفقده حار كإنه واحد من أفراد أسرته ...

الموت حق ... والدنيا دار ممر ... وهي زائلة .. ولا تستحق عناء المشاحنات .. والتكالب عليها ...

وحقو الناس تفكر في كلام أختنا أميرة الشيخ ده شوية ...

وإن شاء الله ده يكون آخر أحزان المنبر ...

نسأل الله إنه يتقبل كل السبقونا من أخوانا من زملاء المنبر ...

ويجعل مثواهم الجنة ... مع الصديقين والشهداء ..

اللهم إرحم محمد أحمد قرفة ... وإجعل مثواه الجنة يا الله ...

وربنا يديك الصحة والعافية يا عفاف ... ويجعل هذا في ميزان حسناتك ..

Quote: وأمس أول ما فتحت المنبر ولقيته موشَّح بالسواد ... قلبي إنقبض .. وقلت يا ساتر يا رب !!

عبد الله .. كيفنك

تعرف احساس لا حوله ولا قوة .. كانه ضربو ليك جرس الباب الساعة 2 صباحا ..

وانت تتخابط وما تعرف منو الطارق ولي شنو ..؟ والخبر شنو ..؟

غايتو مهما شرحته ما بقدر اوصف الحال ..


ربنا إن شاء الله يجعل البورد دائما ابيض بالفرح ..

ويعطف علينا بعطفه الجميل ..

ويرحم جميع السبقونا ويبدلهم دار احسن من دارنا يارب ..

أختنا الكريمة عفاف
بعد التحية
ساعتان منذ فتحت البورد
وأمامي كأس شاي ، والله لم أذق له طعم.
الرحمة للأخ قرفة ، وجميع الموتى...

Quote: ساعتان منذ فتحت البورد وأمامي كأس شاي ، والله لم أذق له طعم.

احمد الصديق ..

يا الله يا الله يا الله ..

اللهم ابدل احزاننا افراح ..



اللهم ارحم اخونا محمد احمد واسكنه مع الصديقين والشهداء ..

شكرًا أُختنا عفاف على هذا الصّفاء ، وأشكُرُ لهذا الْمكانِ فضْلَه ، والَّذي عرّفنا بأنقياءَ أمثالكم ، يتألّمونَ لتألُّمِ ‏الآخرِ بكُلِّ صدقْ .‏
تحيّتي .‏
أخوك / محمَّد زين .
_________________

استاذ محمد زين .. لك من الود اضعاف ..

Quote: وأشكُرُ لهذا الْمكانِ فضْلَه ، والَّذي عرّفنا بأنقياءَ أمثالكم ، يتألّمونَ لتألُّمِ ‏الآخرِ بكُلِّ صدقْ .‏

شكرا اخي محمد ..

دي نعمة من نعم الله .. يجب ان نحافظ عليها ..

الحياة كذبة صدقناها ... والموت حقيقة تجاهلناها
والحقيقة مُره فى أغلب الاحيان
فاليلهمنا الله القوة والصبرعلى تقبلها
وتسلمى اختى عفاف

Quote: الحياة كذبة صدقناها ... والموت حقيقة تجاهلناها والحقيقة مُره فى أغلب الاحيان فاليلهمنا الله القوة والصبرعلى تقبلها

الفاتح يا اخوي ..

الدنيا دار غرور .. ومغشوش القال خالد فيها ..

نسأل الله الصبر على كل شيء ..

أختنا عفاف ...

نحمد ليك السلامة أوّلاً ....

القلتيهو ورددوهو الأخوة بالضبط بيعبر عن شعور الواحد لما يلقى المنبر أسود. قد يكون الفقيد من المقربين، وقد يكون زميل فقط. تختلف درجة الألم ولكننا نتألم كلما نفقد زميل.

لا أنسى ذات صباح عندما وجدت المنبر أسود، ودخلت في نفس الحالة التي ذكرتي ..... فإذا الفقيد هو الصديق معتصم (رقم صفر).

اللهم ارحم زميلنا قرفة، وارحم جميع فقدانا.

وسلمتي أختاً عزيزة.

الدوام لله
اللهم ارحم اخونا قرفه واجعل الجنة مثواه يارب .
صدقت شعور عجيب ، دموع و قلب منقبض .
تسلمي الحبيبة الأصيلة عفاف وإنشاء الله ماتشوفي شر .
شكراً لحوش بكري الذي عرفني بك وبامثالك .

Quote: الدوام لله اللهم ارحم اخونا قرفه واجعل الجنة مثواه يارب . صدقت شعور عجيب ، دموع و قلب منقبض .

Amani Al Ajab يا حبيبة ..

والله شعور وحسرة وحزن عميق لا يوصف ..

نحمدالله على كل شيء .. والموت حق علينا ..

ربنا يحفظ نعمة المحبة والخوه البينا يارب ..

ربنا يجعلها اخر الاحزان ...


اللهم ارحم قرفه واغفر له ..

Quote: لا أنسى ذات صباح عندما وجدت المنبر أسود، ودخلت في نفس الحالة التي ذكرتي ..... فإذا الفقيد هو الصديق معتصم (رقم صفر).

محمد ود ابو العزائم ابوالريش ..

الله لا عاد الايام الحزينه ..

نعمل شنو الدنيا كده ..


اللهم ارحم معتصم وكل حبايبنا السبقونا يارب ..

Quote: والله العظيم .. احساس مهما وصفته ومهما قلته وكتبته ... لا يوصف .. لما اشوف البورد مسود .. والله بفقد قواي ... وبنهار وقلبي بتزيد ضرباته ألف ... لاحولة ولا قوة إلا بالله العلى العظيم .. الموت حق علينا وكلنا ضيوف فى الدنيا الذائله .. لكن الموت ما بتؤالف .. وصعب جدا يجيك خبر عزيز ليك .. سواد البوست بتصيبنى فيهو حاله عجيبة قبل ما اعرف الميت منو .. لانه احساسنا ببعض وحبنا لي بعض مهما اختلفنا .. يعلمه الله .. ربنا جمعنا فى حوش بكري .. بحكمه يعلمها هو لا احد غيره .. اتلمينا هنا وعلاقاتنا تأصلت .. واتحكرت جوانا .. ربنا يرحم كل اخوانا الفقدناهم ويبنى لينا حوش فى الجنة ويجعلها ملتقانا .. وإن شاء الله البوست ما يسود علينا تاني .. رحم الله اخونا قرفه وجعل الجنة مثواه ..

نفس الاحساس
اللهم ارحمهم جميعا ولاقنا بهم مع الحبيب محمد (ص)

Quote: لما اشوف البورد مسود .. والله بفقد قواي ... وبنهار وقلبي بتزيد ضرباته ألف ...

سلام


هذا هو الشعور والإحساس الذي ينتابنا جميعا...


اللهم أرحم موتانا جميعا
اللهم أرزقهم الفردوس الأعلى وألحقنا بهم..

تحياتي

سلام ياعفاف ............

عفاف قلب البورد النابض ..............

عبرتي عن ما يجيش في صدور الجميع ..............

ربنا يجعله اخر الاحزان ....... والرحمة والمغفرة لجميع موتانا .............

Quote: سلام ياعفاف ............ عفاف قلب البورد النابض ..............

تسلم يا جنابو من كل شر ..

Quote: عبرتي عن ما يجيش في صدور الجميع ..............

والله وجع اي زول فينا بوجعنا كلنا .. وفرح اي زول فينا بفرحنا كلنا ..

ربنا ما يحرمنا من بعض والفقدناهم ربنا يبنى ليهم بيت فى الجنة ويجعله ملتقانا ..



اللهم ارحم جميع موتانا يارب ..


مودتى ..

Abdlaziz Eisa سلام يجدك بخير

Quote: هذا هو الشعور والإحساس الذي ينتابنا جميعا...

والله شعور يقشعر له البدن .. والله لمن اشوف السواد بصرخ من غير ما اشعر ..

وأخونا القرضابي قال:

Quote: سودانيز أون لاين أسرة كبيرة (اذا اشتكي منه عضو تداعى له سائر الجسد بالسهر و الحمى)

فعلا يا قرضابي كلامك ما فيهو شك نهائي ..

Quote: نفس الاحساس

محمد الزيادي ..

اللهم باعد بيننا وبين الاحزان ..

اللهم اجعلها اخر الاحزان ..