Post: #1
Title: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 07-30-2010, 07:18 PM
هل تنبت " الشاعرية " في أرض ما صُدفــــــةً ؟؟
أم أنها الأِشياء والبيئة ونوع الناس ؟!!
شاعرية أتت بالفطــرة ، وتناغمت مع " ما" ومن حولها
فنبتت صادقة
وحنينه
توزعت بين أهلي الغلابة !!
رغم الحزن والضنكـ والظلم
منهم من أوتي منها الحظ العظيم !! فبالغ في القول والوصف
شاعرية بدت بي :
حكاوي ( الحبوبات )
وغنا ( الحكامات )
وحكمة ( العواجيز )
ثم تناسلت
وزُرِعَت في دمَنا ، شلناها محل ما رحنا ،
زاد
" وأتوسدناها "
<>
وشاعرية الغربة لون آخر ..
فجأة تدندن دون وعي بغناء من قاع الذاكرة..
تنتشي وتجتاحكـ " أشياء " مــــــــــــا ، كنت قد نسيتها .
(هضربة ) ما ، فـــــــــــــــــــات أوانها
تتمثل أمامكـ بعض ذكرى قديمه ..!!!
<>
صِدق الكلام ؟؟
ممكن
تطابق اللحن معاهو ؟؟
برضو ممكن
<>
اللحن والموسيقى تنساب من بين الكلمات كأنها تصورها
الحان غريبه !! خيالية في جمالها
تربط الكلمة باللحن وتحس بالنشاز عندما ( يبهدلها ) قادم جديد ..
كأنكـ تحس بانفصال اللحن عن الكلمة ..أو .. الكلمة عن اللحن
ترمومتر المتعة عندكـ عالي الإحساس
<>
كل كلام حزين إنت جزء منو
كل قصة حب مسطَره " بي كلام سيده العاشه "
الصدق الفيها انت جزء منو
يعيشها الملحن ويرتبط بها فيعطيها ( نَفَس ) الشاعر وصدقه
وهكذا يستمر موال أن تعيش تفاصيل قصيده ولحن وكأن بعض أحداثها قد مرَ بكـ
فتدندن :
<>
بعد ايه جيت تصالحني
بعد ما ودرت قلبي الكنت فيه
جيت تشكي
جيت تحكي
جيت تبكي ليا ليه
وأنت لا قصة لكـ ، هي فقط إيحاءات مراهقتكـ وأنت تحاول اكتشاف حواء
البدايات المثيرة لذلكـ الإحساس هي من جعلت النشوى التي تحس بها وكأنها قصة حب كانت لكـ !!
هي فقط التجربة الأولى
تجربة اكتشاف محاسن حواء .
وتجتمع معكـ :
غربتكـ
وقصيده
ولحن تدندن به ذات مساء
فينتابكـ كل هذا .
وتسأل من أين لكم كل هذه الشاعرية بني وطني ( ناس زمان )
<>
وتدندن :
ودموعك مابتعيدك
العملتو كان بإيدك
انا ما لي ذنب فيه
ليه جيت تشكي
ليه جيت تحكي
ليه جيت تبكي ليا ليه
ولا ناقة لكـ في الأمر ولا جمل
ولكنكـ تردد بنشوى وبإحساس اللحن والكلام وكأن الأمر لكـ فيه بعض ذكرى !!
وتجري للـ Download ..
" أمنيات السمع الزمن ده داون لوود " 
<>
شاعرية زارت أهلي والكل "حولنا" همهم الخبز والسيف والسبايا
انا خلدتك بشعري في زمانك
وياما غنيتكـ وكان كلو عشانك
وكان جزاي منك صدودك وهوانك
انا استاهل ..
انا استاهل وضعتك في مكانا ما مكانك
روح ..
القدر بي نفسو ما بقسو عليك
وتحس بكرامة الكلمة وقائلها وتتمثل الدور ، وتردد بحزنه : أنا أستاهل
جيت تايب ياحليلك
والفؤاد ملكوه غيرك
ربي يعدل ليك سبيلك
كل مناي في الكون عديلك
ونهاية الخير نصيبك
ليه ...
ضيعوك
ودروك
انت مابتعرف صليحك من عدوك
استغلو الطيبة في قلبك
وبي اسم العواطف خدعوك
حتى من كلمة حنانم وودادم حرموك
وآآآآآآآآآآه يا حزن
وأه يا وردي يا امبراطور ..
لكـ حب لن تعرف مقداره
وموده بقدر الفرح الذي أدخلته في نفسي وأنا " إتونس بى " غٌناكـ ..
<>
ويا وطن :
الله ياخد ليك حقوقك ويجازي الظلموك
حتى اليـ Youtube أرهقته الأغنية وموسيقاها وكلماتها
أرجو أن لا تملو انتظار التحميل ..
_______________________
التوقيع : زول في الغربة
التاريخ : وسط ليالي الغربة
صورةإلى : بني وطني في المنافي
الجزء الأول
|
Post: #2
Title: Re: شاعريَة الغلابة ** مرفق فيديو أغنيات حفلة عدن **
Author: خالد المحرب
Date: 07-30-2010, 07:30 PM
Parent: #1
ابومحمد الغربه ماالتغرب عن الوطن امكن تلقى وطن احس من مسقط راسك
ودا كتير جدا ولكن الغربه عندما تفارق عزيز لديك ولا شنو
|
Post: #3
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 07-30-2010, 08:48 PM
Parent: #2
الامبراطور وردي - بعد إيه
الجزء الثاني
___________________________
يلزم إيقاف تشغيل الجزء الأول
|
Post: #4
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 07-30-2010, 09:37 PM
Parent: #2
أبو احمد ود المحرب
حبابكـ
|
Post: #5
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 07-30-2010, 10:03 PM
Parent: #4
الحنين يا فــؤادي
|
Post: #6
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 07-31-2010, 08:40 PM
Parent: #5
سنعود
فقط لندع الحزن يأخذ مساحته
وستظل دنيانا كحالها دائماً
تأخذنا من هنا إلى هنا لتعود بنا مرة أخرى
|
Post: #7
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 08-02-2010, 04:13 PM
Parent: #6
عذبني وزيد عذابكـ
|
Post: #8
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 08-03-2010, 09:30 AM
Parent: #7
|
Post: #9
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 08-05-2010, 04:46 PM
Parent: #8
واحد من كم حاجة :
- يا أنا موهوم بي حكاية الغنا السمح ( والقديم خاصةً )
- يا الأغنيات دي الناس سمعته لامن ملتة ( يعني متوفرة باليوتيوب ) وكل الناس البحبو وردي عندهم ( رغم اني فتشت اليو بتاع ده )
- يا كمان السياسة العفنة وخلافات المنتمين ليها أهم
- يا انا كبرت وبقيت بتاع فارغة
- يا
- يا
حيرتوني
واحد بس يقول الفيديوهات دي شغالة
.
.
.
بث
|
Post: #10
Title: Re: شاعريَة الغلابة ** مرفق فيديو أغنيات حفلة عدن **
Author: GamarBoBa
Date: 08-05-2010, 07:24 PM
Parent: #9
يا عمران صالح
تحياتي
يشهد الله انك عدلت احساسي كما يجب
وحكاية انك موهوم بالجمال في الغني السمح.. دي تهمة ثابتة يكشوك فيها ناس النظام العام بجريرة الشاي المنعنع البخش الدماغ من وريد ما بعرف اسمه شنو
مسألة كبرت وشنو ده ما بعرف برضو تنظير منك عشان تبرر للجمال ده
واتمناك طيب ..وبالمناسبة عندي رد ليك في بوست اولي الشهادة السودانية ما قدرت انزله لانو كنت بعيد ولك العتبي حتي ترضي،وانت ما زولا ما يردوا ليك ولا ما يوضحوا ليك الاشياء
_
الفيديو الاول شغال اتومتيك بكود مقرم وباقي الفيدوهات تمام لدرجة ظهور عازف الاورغ ساطور الذي يكت باسم تهراقا في المنبر ده
|
Post: #11
Title: Re: شاعريَة الغلابة ** مرفق فيديو أغنيات حفلة عدن **
Author: tmbis
Date: 08-07-2010, 06:50 AM
Parent: #10
Quote: - يا كمان السياسة العفنة وخلافات المنتمين ليها أهم
- يا انا كبرت وبقيت بتاع فارغة |
والله يا عمران .. عندي صاحبي مرة لقاني بسمع في عثمان حسين .. بي آخر حته بتاعت سمع ممكن ترخي ليها اضانك .. بعد الاغنية انتهت قمت نظرت ليهو تنظير المستمتع حتى بي مشيت عثمان حسين الله يرحمو على الواااطة .. وعن غناء عثمان حسين لما يغنو الناس بيبقى عامل كيف .. وعن غناء عثمان حسين ومتين بسمعوهو وعلشان شنو وكيف ... إلخ .
ياخ الزول دا قعد يضحك وختم ضحكتو بان .. قالي يا تمبس والله إنت دخلت مرحلة الكبر وبعد كدا اعتقد إنك ح تخرف .. نفس الصديق لقاني لابس لي جلابية .. قالي الجلابية دي مع عثمان حسين بتاع المرة الفاتت معناته دخلت معانا المنتخب بتاعنا بس فاضل ليك بعد كدا تجي شايل الجريدة ..
وردي دا يازول القاليك داير ليهو كبر منو ..؟
عثمان حسين دا القاليك عايز ليهو كبر منو ..؟
صلاح بن البادية دا القاليك عايز ليهو كبر منو ..؟
محمود عبد العزيز دا القاليك عايز ليهو كبر واللا صغر منو..؟
ياخ شريط عدن دا في فترة من الفترات كان بيعني لي نهاية السمع .. قبلما املك لي نسخة حقتي منو .. كنت بسمعو عند بنات جيرانا .. جابو ليهم عمهم من الكويت وقتها .. طبعا حفلة عدن دي وحفلة الكويت كانو في توقيت واحد .. بنات جيرانا ديل .. كان عندهم شريط كاسيت .. بيسمعوهو العصرية كدا .. والصوت كان بجيني بالشباك ..
المهم .. الشريط بتقلب بي كل الجمبات لمن روحو تطلع .. يللا بعداك بكورك لي اي واحدة قريبة ..
اسمعي عليك الله رجعي لي بعد إيه .. اسمع بعد إيه .. وبعداك اطلع على الدافوري
والله انا القدامك دا حسسسع دي .. لو لقيت لي بيت جيران يجيني فوقو صوت وردي بالشباك حفلة عدن بعد إيه والعصرية كدا .. احتمال كبير جدا اسجل في برشلونـة الموسم دا ..
إنت بتنزل حفلة عدن سااي كدا من غير ما تكلم الناس .. داير تستفز مشاعرنا يعني .. يوم السبت دا؟
|
Post: #12
Title: Re: شاعريَة الغلابة ** مرفق فيديو أغنيات حفلة عدن **
Author: GamarBoBa
Date: 08-07-2010, 09:01 AM
Parent: #11
| Quote: داير تستفز مشاعرنا يعني .. يوم السبت دا؟ |
بالله عاين ده ..ياخي ده خمسنا بيه نحن
تمبس امرق هنا
|
Post: #13
Title: Re: شاعريَة الغلابة ** مرفق فيديو أغنيات حفلة عدن **
Author: tmbis
Date: 08-07-2010, 09:10 AM
Parent: #12
Quote: بالله عاين ده ..ياخي ده خمسنا بيه نحن
تمبس امرق هنا |
يعني يا بوبا إنت حاتل هنا من يوم الخميس بالليل ..؟
طيب ما قلنا ليكم نحنا يوم الخميس دا بلاطــة .. ويوم السبت بنجي الصباح ..
غايتو الحمد لله الواحد ما سمعو يوم الخميس بالليل .. كان اتصل علي ود الصايم يوم السبت دا يجي يشيلو من البيت شيل .. عشان يجيبو ليكم البورد دا .. الليلة صباح السبت .. 
|
Post: #14
Title: Re: شاعريَة الغلابة ** مرفق فيديو أغنيات حفلة عدن **
Author: عمران حسن صالح
Date: 08-07-2010, 06:46 PM
Parent: #13
قمر يا بوبــــــــــــا
تمبس يا تمبس
أحبكم
__
بث
|
Post: #15
Title: Re: شاعريَة الغلابة ** مرفق فيديو أغنيات حفلة عدن **
Author: ابو جهينة
Date: 08-07-2010, 09:23 PM
Parent: #14
عمران
الله يعمر بيتك قول آمين
لقد وعدت و أوفيت بوعدك
الأغنيتين الأولى و التانية شغالات
الثالثة و الرابعة ما شغالات
( أين لينك الحفظ ؟؟؟؟ )
|
Post: #16
Title: Re: شاعريَة الغلابة ** مرفق فيديو أغنيات حفلة عدن **
Author: طارق جبريل
Date: 08-07-2010, 09:37 PM
Parent: #15
تعرف يا قريبي
مرة سايق عربيتي في الرباط والمطرة صاقعة
قمت شغلت ليك ((مرحبا يا شوق))
يمين يا حبيب بقيت الف في الرباط دي
وبقيت اشوفها بي نظرة تانة
لمن نسيت ذاتو انا ماش وين
|
|