سقط من ذاكرة الوطن ... ود النمير وفاطنة السمحة ..

حكوة ود النمير وفاطنة السمحة من تراثنا المحكي وغير المسجل .. الحكوة شعرية وغاية في الابداع .. لكن فيها شي من سفاهة الالفاظ .. لكنها تبقى من تراثنا الذي نعتز به ...


انا الان اقنع مجموعة من الجدود والحبوبات بضرورة حفظها .. وتدوينها .. اقنعت بعضهم ومستمير مع الاخرين .. حتى اجمعها كلها بروياتها المختلفة

هذا البوست سيخصص لها وسيكون بوست طويل الامد

اكرر سيكون في هذا البوست شيئا من سفه ولن احجب كلمة واحد او اغير معناها ..

ودى برضو من اسقاطات الجو ؟؟
بدون انفعالات فى الردود حقو
تتحول من الثيوريتيكال الى البراكتيكال !
لووووووووووب
الجو دا ايام معدودات فمن كان منكم على استعداد
للاستمتاع به فليدع كرسيه .. الكرسى ملحوووووق ..
القصص ال بى الخشم دى ملحووووقة
الغريبة الجوز ديل انا ما سمعت بيهم! مع انو
عمو امين بقول على قدييييييمة !!






ـــــــــــــــ
بعدين مافى داع للتحذير
عارفينك .. عاجنينك .. خابزينك !
عادتك ولا ح تشتريها ؟
وليد ولا غيروهو ؟ قول قول بس ..
وللضمان كدا انا ما ح اسمع ..

قصة من التراث يا دينا بتحكي شي من تاريخ البلد ده المسكوت عنه
فيها شعر غاية في الروعة

وفيها سفه

بعدين شنو عاجننك .. انا مؤلفا اي حي الله حكاي بس

انا ممكن اقوم من كرسينا ده واستمتع بالجو
وممكن ابطل الكلام بالخشم

انت حيلتك شنو تسويه

Quote: اكرر سيكون في هذا البوست شيئا من سفه ولن احجب كلمة واحد او اغير معناها

..
المعاير المعايييييير

يا ولي ده تراث تراث

لو ما سجلناه حا يندثر

بعديسن القصة فيها شعر وتسجل لاحداث غاية في الروعة

يا وليد ....

لو ما خانتني الذاكرة، القصة موجودة في كتاب (أحاجي سودانية) لعبدالله الطيب.

أديني فرصة أرجع للكتاب عشان أتأكد.

في انتظارك يا ابو الريش عشان ما اتعب ساك في حاجة موجوده

تسلم يا حبه

المرشح وليد كيف حالك و كيف حال الدائرة معاك انشاء الله حظيت بمقعد مع الجماعة .

و بعدين مالك و مال ناس و د النمير و آنت رجل متقدم فكريا الحكاية دى آ كل عليها الدهر و شرب قوم

لف و شوف لينا الاسد النتر دا و صل كمبالا و لا لا . سلام يا بتاع و د النمير و فاطنة السمحة .

يا صديق ازيك

غايتو انا جيت التاني اخير من حزبكم

ياخ متقدم شنو ياخ انا ود ثورات ياخ .. والله اتقدمنا معاكم هنا في المنبر ده فكريا
الاسد النتر قاعد في انجمينا لسع .. عمل ليكم وجع ضهر بي مشيت انجمينا دي موش ؟

شايف اوكامبو لمن لونو بقى بمبي

العزيز وليد .....

شكراً لصبرك وإنتظارك.

تأكدّت من وجود (حكوة) فاطنة السمحة في كتاب د. عبدالله الطيب (الأحاجي السودانية).

رغم ذلك، أقول أنها (أحجية) تتناقلها (الحبوبات)، ومؤكد أن د. عبدالله الطيب (طيب الله ثراه) جمع هذه الأحاجي مستنداً على ما تم تناقله في منطقة معينة في السودان، وربما كان هناك اختلاف في الحجوة باختلاف المنطقة، أو تحدث إضافة هنا وحذف هناك، حيث أن تناقل الأحاجي يتم شفاهة وبألسن (الحبوبات).

أديني فرصة تانية عشان أرفع بعض صفحات الكتاب، الجزء الفيهو قصة فاطنة السمحة، عشان تقارن بالمعلومات العندك.

تسلم يا ابو الريش
وشكرا على المجهود
وفي انتظارك

ده غلاف الكتاب:

إنشاء الله تكون واضحة

يقول د. الطيب عبدالله رحمه الله: كانت الجدّات (الحبوبات) يقلن في نهاية كل قصة:

وإنحترت .. وإنبترت في جحر الصغيّر فينا.

وأذكر أن عبارة الخاتمة عندنا كانت تقول:
تمّت وختمت .. وكسّر قلمك .. في إيد الصغيّر فينا

بينما كان استهلال الحجاوي يقول:

حجّيتكم ما بجّيتكم
خيراً جانا وجاكم
أكل عشاكم وجرا خلاّكم


قطعت نفسي يا شفت

قطعت نفسنا احنا ديل يا ابو الريش بالكتابة السغار سغار دي

شكرا جزيلا ابو الريش
شكرا يا شفت

شكرا يا ابو الريش

واضحة جدا
العنده ضعف نظر بطريقتو

خليني ارجعها مع العندي

مبدئيا كده في اختلاف

ودي

شن بتعاين؟
تعاين العمى يا بيكم

زولن سمح يا بيكم

مثل القمح يا بيكم

قدم الحمام يا بيكم

ريش النعام يا بيكم
-----------------------------------------------
وليد الشفت فاطمة السمحة الكانت موجودة في حجه الحبوبات وحجيتكم ما بجيتكم خير جنا وجاكم موجوده في الخاطر , ياربي ولادنا ديل حبوباتهم بحجوهم ولا حبوبات الزمن ده ما بحجن ؟؟؟ فتحت في الخاطر زمن غاب وسنين وسنين وعبارة قريته للبروف على المك ( ولما تقدم الليل تحلق الصغار حول الحبوبة تحجيهم ) .....
هسه بتقدم الليل وبتحلق الصغار حول اسبيس أو أى قناة تانية قامت مقام الحبوبة في تشكًيل ثقافتهم ... فاطمة السمحة وود النمير قاعدة يا وليد بس نحنه الما هتمينا ثقافاتنا الشفاهية دي تتوثق وتتواصل من جيل لجيل




وليك اطيب تحية على بوست في نفحّة من زمن جميل بالحيل يذكر الواحد انو كان صغير وبحب يسمع الحجي من حبوباتوا والله يرحمهم ويجعل مثواهم الجنة

Quote: مبدئيا كده في اختلاف

كِده مكسب يا سيناتور

ود البشرى
وعبد الناصر


يديكم العافية يا حلوين

شكراً جزيلاً يا وليد و يا أبو الريش و كل المتداخلين ..

و صراحة أستمتعت كثيراً و أنا طفل بسماع هذه الأحاجي من حبوبتي الله يرحمها ,, كانت حبوبة تحكي لنا و الدنيا ضلام و الحركة ساكنة و هو ما يذهب بنا إلى النوم سريعاً ..
يارا إبنتي حينمت تطلب مني أن أحكي لها ( حدوتة ) تقوم بعد فترة قليلة من بداية الحكي لحدوتي المنجورة تقوم بتنبيهي إلى أنني دقست بل نمت عديييل كدة ..
حينما طلبت من أمي ـ الله يحفظها ـ أن تحكي لبناتي ذات الأحاجي لم لم يستسغنها و لم يتقبلنها و كن يسألن في كل مرة عن معاني الألفاظ و العبارات غير المفهومة بالنسبة لهن إطلاقاً ..
جيل نيكلودن و براعم و سبيس توون و ام بي سي ثري و كراميش جيل مفتح و خياله واسع ... و لن تأسره مثل تلك الأحاجي الساذجة ..

عشأن كدة فلنحفظ تراث أحاجينا عشان نتذكر طفولتنا و نترحم على حبوباتنا وبس ..

تاني ما فايدة ..

هسع شوف جنس كلمة ( العبد ) في قصة فاطنة السمحة دي .. هسة كلمة زي دي غير العداوة أستفدنا منها شنو ؟؟