يا فرح الواطا البتّق -- يا غيمنا البدا يتفرّق

يا فرح الواطا البتق
استنا ونادى معانا
الغيم البدا يتفرق
قول لى الفرحة
مستنين هطولك
قول للمطره
عليكى النيل
عليكى الشدر الشال الحفه
عليكى الشوق الهد الحيل
عليكى الموج الحرد الضفه
عزى خسامة الوجع المدفق
يا فرح الواطا البتق
عليك الوجع المالى الليل
قول لى الرذاذ الأبا يغشانا
كفاك
قول للقمر الشد شراع العتمة
وعدل الدفه
خلى البت الساكنه دمانا
تفج السكه وتمرق
تلفح توب الإلفة
تجينا معاك
مليانه بى رونق جنانا
قول ليها
لا قدرنا نصل سماكى
ولا فى زول قادر يطولك
والغناوى الناشفه
منتظرات وصولك
راجياكاى بى شوقا الطويل
وقول للواطا ابشرى
كحلى عيون النهار
ولونى الليل بالهديل
والصباح وديهو هدية
راجياكى فى ضل المقيل

يا غيمنا البدا يتفرق
الأمانى الخايفه
من غيبة فصولك
ماسكه فى الحلم البخيل
ومعاها ماسكين فى صبرنا
حداها قاعدين نندهك
يا طعم الفرح المافى
معاها قاعدين فوق جمرنا
يا ضو السعد الجافى
كوسنا ليك بلد بلد
دقينا ما خلينا باب
وينا جيتك ووينو وعدك
تانى واقفين نسألك
والحزن ساكن عمرنا
مع اليباب

Quote: يا فرح الواطا البتق استنا ونادى معانا الغيم البدا يتفرق قول لى الفرحة مستنين هطولك قول للمطره عليكى النيل عليكى الشدر الشال الحفه عليكى الشوق الهد الحيل عليكى الموج الحرد الضفه عزى خسامة الوجع المدفق يا فرح الواطا البتق عليك الوجع المالى الليل قول لى الرذاذ الأبا يغشانا كفاك قول للقمر الشد شراع العتمة وعدل الدفه خلى البت الساكنه دمانا تفج السكه وتمرق تلفح توب الإلفة تجينا معاك

يا أباذر .. كم أنت مرهف يا صديقي .. وكم أتامل حرفك الزاهي الندي كرشفة من ضياء أتي من فراديس الجنان .. لك الله أخي أبا ذر وأنت تخطنا بيراعك المعطون بأندى وأرق المشاعر .. وتزرع فينا كل هذا الألق البهاء ...

تدفق أخي .. وامنحنا من هذا الكلم الطيب ما يبل العروق .. وتنتشي به جفاف الحنايا ...

سلمت يداك أخي ...

مع خالص حبي وتقديري ؛؛؛

تحياتى يا إدريس

وإمتنانى الكتير لكلماتك السمحات

الفوق وأكتر مننا بى كتير

زيادة من البنستاهله والله، لكنها سمحة وطيبة عشان جات منك
مشبعه وتريانه بى روحك الطيبة المليانه جمال

شكرا ليك وعليك

وابقى طيب وسعيد دائما