لاهزة كانون لا موية ليمون عيب عليكم بورداب الخرطوم !!

جيناكم بكل شوق وفرح وقلنا نقابل الناس ونشوفهم ونتعرف على الناس المابنعرفهم
ونشوف اهداف بمورداب الخرطوم شنو وشنو المطلوب مننا كأعضاء خارج السودان في سودانيز
بس يظهر الناس لمتها في قندهار وحليوة
غايتو كتر خير العوض ووهبة وفادية اليمني وعمر جنابو وميادة كمال رفعوا لي سماعة التلفون
حالتو قلت تجيني العوميد تطاقش في المستشفى لما الواحد يعمل جضوم
الما عملناها في السعودية ..
كنت فاكر سودانيز اهدافها اكبر من كدا ..
دا ماشيل حال بس المابريدكم مابلومكم يعني شنو لما الناس ماتقيف مع بعض في ظروفها
ونمشي قندها وحليوه على الاقل المبالغ التي تدفع في الحفلات وقندهار الناس ممكن
تشتري بيها كراسي متحركة او اي مساعدات اخري واكيد في ناس في المنبر محتاجين ليها
في الذي توفى وممكن تدفع الى ابناءه او في اي عمل خير اخر
جزاكم الله الف خير وربنا يجعلكم من اهل الخير .

والله متلومين ومقصرين ......... لكن مرات بتحصل ظروف او نقول ربنا ما اراد .......

والجايات اكتر من الرايحات ..... ولينا اكتر من لقاء انشاء الله ............

Quote: والله متلومين ومقصرين ......... لكن مرات بتحصل ظروف او نقول ربنا ما اراد ....... والجايات اكتر من الرايحات ..... ولينا اكتر من لقاء انشاء الله ............

العفو ياجنابو
حسب اتصالي معاك كنت جايك وحصلت ظروف زي ماشرحت ليك غيرت اتجاهي
وهذا البوست ماعشان الناس تعتزر وتتلوم ياغالي
حسب تصوري في اشياء كثيرة الناس ممكن تستفيد منها من لمة ناس الخرطوم
بالزات عشان يكون في تواصل والناس تعمل اشياء تكون مفيده للمجتمع عامه
ومثل هذه الاشياء بتنتج من خلال التجمعات الجادة والنقاشات في طرح المشاكل وكيفية حلها ..
واشياء كثيره ممكن الناس تقننها من خلال المنبر .










----------------------------
ماتتحسس ياغالي

أنا إتحسّستا غايتو

اخي وليد الدفعة حبابك وفعلا اللوم دليل محبة ..
انت عارف انك جيت في ظروف مرض الوالدة ربنا يديها العافية
وحاولت الوصول اليك في البيت اكتر من مرة ولكن القدم ليها رافع .
ولا احب كثرة اعتذار ولكن تعلم ان الاخ وهبة تعرض للذبحة في تلك الفترة
ولم نجد حتي فرصة لمغادرة مستشفي الشعب تواجدا معه لكبر ما حدث له ..
شئ تاني كان هناك بوست انت احد الموجودين في قائمة الضيوف المرحب بهم
ويبدو انك لم تشاهد البوست لظروف والدتك المريضه شفاها الله ...

Quote: أنا إتحسّستا غايتو

اوووووووووووو الحبيب علاء الدين
معقوله ياخ ان شاء الوالد بلغ الصحة

الشيخ المسلمي

Quote: انت عارف انك جيت في ظروف مرض الوالدة ربنا يديها العافية وحاولت الوصول اليك في البيت اكتر من مرة ولكن القدم ليها رافع . ولا احب كثرة اعتذار ولكن تعلم ان الاخ وهبة تعرض للذبحة في تلك الفترة ولم نجد حتي فرصة لمغادرة مستشفي الشعب تواجدا معه لكبر ما حدث له ..

ود المسلمي حبابك الف
لكن عايز اسألك سؤال
من فيكم الكان قلبو تعبان انت وللا وهبة
لانك شايفك فاتح بوست وتشكي من قلبك سلامة قلبك الرهيف وشفيف
ياخي حبيبنا وهبه بصراحة انا خفت عليهو لذلك اتصلت عليك وتابعت معاك
من يوم ماوصلت السودان وانت قلت لايمكنني احادثة او ازورة
المهم ربنا كتب له عمر جديد والف حمد الله على سلامته
ومايعجبني عندما حصل للاخ وهبة هذا الحادث اتصل عليك واخبرك
ولم يتصل على شخص غيرك وهذا ان دل انما يدل على اشياء كثيرة وجميله تنتجها علاقات سودانيز .
ودامة الخوة بينكم يارب ...



تحياتي يادفعة

Quote: غايتو كتر خير العوض ووهبة وفادية اليمني وعمر جنابو وميادة كمال رفعوا لي سماعة التلفون

!!!!
اتصلت عليك اكثر من مرة ايام مرض الوالدة .!
ياربى اكون اتصلت غلط وزول انتحل شخصيتك .!!!

ود خيري

Quote: !!!! اتصلت عليك اكثر من مرة ايام مرض الوالدة .! ياربى اكون اتصلت غلط وزول انتحل شخصيتك .!!!

اها كان كدي انا وقعت في اللوم بالله كان في زول نسيت اسمو اعفو لي
كيفك ابو جوان
ياخي جزاك الله الف خير واشكرك كتير وكتير
تعرف ياود خيري كنت حريص اشوفك لكن تقول شنو
جري ماعادي ..

تستاهل عشان شخت لينا

Quote: تستاهل عشان شخت لينا

هههههههههههه
يازول اتصلت عليك مليون مره يظهر انت بقيت مهم خلاص
ورفعة لينا القزاز واسال وليد عباس صاحبك

وليد ود امي الحنين .. كيفنك يابا والبركة الاطمأنيت علي صحة امنا الغالية
لكن امانة ما ضحكتني الليلة بى عنوانك ده
ههههههههههه
هسه النبي وينو الكانون البهزوه الزمن ده.؟ ويا حليل الليمون القصو رقاب شدرو الاخدر
بعدين هسه تعبير لومك ده ما بفهموه ليك الا ناس عمك وهبة و ناس وليد والمسلمي و تبلديهم وبقية الجماعة الشدر الكبار لوول( ما يجيني زول ناطي يقول لي كبرتينا)
يعني هسه ناس دلوشة وفدوية والنعومتين وبقية شباب اليوم بخبروا ليك العتب المن سنة اسكت دة ؟ لوووول
يا حليلك والله
هزة الكانون دة بتذكرني لما كنا زمان في الفاو ولا لما يجونا اهلنا ناس البطانة
يختو الكانون ويهزوه للضيف
لا بوتجاز لا كهارب بندر
زمن عتيييييييييييق ياخ
شكرا يا وليد والتحية لكل بورداب الخرطوم السمحين
وقبل وبعد الف حمد الله علي سلامة الوالدة وسلامة وصولك

الاخت اسماء

Quote: هسه النبي وينو الكانون البهزوه الزمن ده.؟ ويا حليل الليمون القصو رقاب شدرو الاخدر بعدين هسه تعبير لومك ده ما بفهموه ليك الا ناس عمك وهبة و ناس وليد والمسلمي و تبلديهم وبقية الجماعة الشدر الكبار لوول( ما يجيني زول ناطي يقول لي كبرتينا) يعني هسه ناس دلوشة وفدوية والنعومتين وبقية شباب اليوم بخبروا ليك العتب المن سنة اسكت دة ؟ لوووول

ههههههههه
شكرا ياطيبة وما تشوفي شر في عزيز لديك
دا حالتي كلمت البواب لو واحد جاني ومالقاني
بس ضيفوا وخليهو يقعد في البرش دا واستلم منهم العوميد
ولو عجبك شيء كان تقلية كان ملاح قرع اكلو
بس ماتقرب على المحاشيء ..
هههههههههههه
لكن بيني وبينك السودان فيهو حركة ما اعتيادية ومجهودهم كلو ضايع في المجاملات
ياخي تلاقي المستشفى مليان بطريقة مبالغة وناس قاعدين في سرير المريض
والمريض نائم في الارض وبكون منتظر حاجتين
اما روحو تطلع ويقول الحمد لله او الناس تطلع من جنبو

وليد .. كيفنك ..

الف حمدالله على سلامة الوالده ..

وإن شاء الله تانى ما تشوف شر ..

وتجي السودان للسمح يارب ..


طمنا على الوالده ..

الام غاااالية يا وليد ... الله يطول عمرها يارب ...

Quote: طمنا على الوالده .. الام غاااالية يا وليد ... الله يطول عمرها يارب ...

سلامات عفاف وسلامتك الف سلامة
ومشكور جدا على اتصالك بي في السودان ونسيت ماسجلتك مع الناس الاتصلت
اها روحك رياضية وماعملتي لي زي صاحبي مزمل خيري
اسياد واجب والله والوالده الان تمام التمام
وسوف نحاول نعمل ليها زراعة كلى باذن الله

الف الف سلامة للوالده ماتشوف شر انشاءالله

ومرحب بيك ياوليد ...

ولدنا وليد عبد اللطيف

الف سلامة للوالدة واجر عافية

*_*_*_*_*_*_*_*_*_*_*_*_*_*_*

بورداب الخرطوم ديل الفيهم اتعرفت بتاعين ناسات ، نحنا ذاتو مشخطين ليهم.
*_*_*_*_*_*_*_*_*_*_*_*_*_*_*_*

عاوز النجيضة

الناس ديل معزورين ، بالشفته فى الخرطوم الناس كلها مشغولة ، ربنا يعينهم وكتر خيرهم.

** ود عبداللطيف..
** مساءك خير..
## غايتو شوف عينى البياكلم الدود الناس ديل مابيقصروا فى زول رغم يوم الخرطوم اب اربع ساعات مُش اربعه وعشرين ساعه ,, كان فى بوست مفتوح للترحيب بالبورداب القادمين من الخارج ,, وإنت إسمك مكتوب وبالبنط العريض والإحتفال والإحتفاء كان فى بيت الفنون بالمغتربين "بحرى"..
## وبى كدا يكون الجماعه الحلوين ديل :-

** هـــزو ليك الكـانـون , وظبتو لـيـك الـلـيـمـون**

** بعد دا إلا تكون قاصد (كانون ياوندى) .
(ودام الود بيننا)

الحبيب ولــى .. سلام من الله عليك ورحمة ودعوات متصلات للوالدة بدوام الصحة والعافيــة


__________

انــا متلوم وســافــى التراب ..

وغطان غلط ما بيمسـح ابدا ...

والعيب متلفح بيهو تــوب ..

ما عندى ولا عذر ابدا ..

الشغلة مهما كانت كنت بقدر اغطيها هنــا وهناك ...

جينا وما لقيناك برضو ما بتحلنــى ...

المفروض نرابـط معاك ..

وندعو معاك ..

ونستقبل الناس معاك ..

____________


بقينــا ( كعبين يا وليــد ) ..

اعفــى ليــه ..

وجاهزين لاى عقوبــة / غرامــة


________________


العفو العفو العفو يا ود الشعبية ياخخخخخخخخخخ

منال اختنا

Quote: الف الف سلامة للوالده ماتشوف شر انشاءالله ومرحب بيك ياوليد ...

الله يسلمك يابت ام درمان
تخيلي شفتك هنا ضحكت واتذكرة بوست اولاد ام درمان
لكن السمك عندكم كتر خير اولاد ام درمان اكلوني سمك
وسمعوني زيدان ابراهيم
ما قلت ليكم ام درمان عالم جميل

----------
الوالده ربنا يشفيها..

ود السر

Quote: عاوز النجيضة الناس ديل معزورين ، بالشفته فى الخرطوم الناس كلها مشغولة ، ربنا يعينهم وكتر خيرهم.

تسلم انت من كل شر وربنا يحفظ ياخي
ياناس الخرطوم والله ناس طيبين
وسمحين وبندور ليهم السمح
ياخي كل الشعب وليس بورداب الخرطوم
ربنا يسهلها عليهم بالجد حالة صعبة وتحنن الكافر
ربنا يصلح الحال بس .

Quote: ## غايتو شوف عينى البياكلم الدود الناس ديل مابيقصروا فى زول رغم يوم الخرطوم اب اربع ساعات مُش اربعه وعشرين ساعه ,, كان فى بوست مفتوح للترحيب بالبورداب القادمين من الخارج ,, وإنت إسمك مكتوب وبالبنط العريض والإحتفال والإحتفاء كان فى بيت الفنون بالمغتربين "بحرى".. ## وبى كدا يكون الجماعه الحلوين ديل :- ** هـــزو ليك الكـانـون , وظبتو لـيـك الـلـيـمـون** ** بعد دا إلا تكون قاصد (كانون ياوندى) .

ياخي ذكرتني كانون ياوندي فلم ياهندي
وضربات الجزاء المسكها يور حارس الهلال
نجي للمهم ياسعادة المستشار
شايفك طوالي حنيت للمهنة وكونت دفاعاتك
وانا ماساكن جوه بيت الفنون يعني الناس دي
لو صرخو كان وجدوني امامهم
يازول ناس السودان ديل تمشي ليهم تكون انت الوحيد الفاضي
عالم مدورين وزي ماقلت يومهم اربعة ساعات
كمان الناس منتظرين منهم يشيلو كاسات ويحققو انجازات
ياخي زي ماقالت الاستاذة الشاعره اسماء
يا حليل زمن هز الكانون وجردل الليمون

الف سلامة للوالده ماتشوف شر انشاء الله

العزيز الاعز ولى

تحيات طيبات
وسلامات الوالدة ياحبيب

كل المنى

الشاب بدر الدين

Quote: بقينــا ( كعبين يا وليــد ) .. اعفــى ليــه .. وجاهزين لاى عقوبــة / غرامــة

لاحول ولاقوة إلا بالله
يازول الله لاجاب الكعوبية
يازول انا بلوم زول وياخي والله اتصالك بس عجبني وسر بالي
على قول الجماعة واذا في غلط
اكون انا الغلطان لاني وعدت الريس اسامه سليمان
وطلب مني لازم اتصل علية وفي نيتي ارتب ليكم جلسه
في قصر الصداقة او مطاعم سيدي بيه
يعني اجتماع مصغر ونشوف امور الحله الحاصل فيها
شنو والناس انجزت شنو والباقي شنو وما هو المطلوب
ياخي انا بجري بحري كلها بفتش قسطرة غسيل في كل صيدليات بحري لم
اجد بها يوصفو لي جنب الحوادث الخرطوم امشي ما القاها
افتش افتش امشي الم فيها في صيدلية بالقرب من مستشفى ابن سينا.
وغير ذلك المدام اخدت ليها يوم كمان في مستشفى النيل الازرق
يازول ربنا يدي العافية .
والشعب السوداني مناضل في ظل الظروف الصعبة .
غايتو ربنا بدخلهم كلهم الجنه
قول امين

الحبيب وليد حمدا علي سلامة الوالدة وسلامتك يا جميل

،،،،أبوقصي،،،،

الاخت داليا الكباشي

Quote: ---------- الوالده ربنا يشفيها..

ياداليا
يظهر كلامي ماعجبك وكنت اتمنى ان تنظري له بعمق شويه
لان الموضوع اكبر من ما انتي متخيله
وهل يخطر ببالك ان كل من دخل هنا يخاف مني
او انا طالبهم شيء لايا دكتورة . فهمتيني غلط
واذا عندك شيء قوليهو عادي بدل الاستفهمات
عشان لو مافي حاجة واضحه ليك نوضحها
تخيلي تمنيت ان تكوني من ضمن الناس اللذين احببت ان اقابلهم في السودان .
قدر الله وما شاء فعل .
واشكرك جزيل الشكر على الدعوات الصالحات
واشكر كل من اتصل من خارج السودان وديل كلهم كان من حقهم يوفروا حق فاتورة التلفون
لان اولى بها اسرهم .وحت من كتب مشاركا كان من حقة ان يوفر زمنه .
نحن نبحث عن الايجابيات في مثل هذه الاجتماعيات دايما ونحاول ان نعالج سلبياتنا .
والفكره لا في الكانون ولا الليمون .














--------------------------------------------
داليا ما قمتي به تجاه الاخ عبد الوهاب حبيبنا ومعك ود المسلمي اعلمه جيدا و اعتبره من ايجابات تجمع الخرطوم بسودانيز . وتشكركم .

عبد الله الحبيب
ابراهيم عبد الحليم
مجدي فضل
اشكرم جزيل الشكر مع تمنياتي لكم بدوام الصحة والعافية

ولي يا حبيب:

ماتزعل، نتفق ننزل شهر 12، وقندهار ولذيذ كله، علي، بالمناسبة زي ماقال
ود جبرين، لحمتهم تكسر الاسنان، نجيب لينا خروف مدوعل وصغير،والشفت
مهدي ود ابوكروق يقوم بالواجب، وماتنسي وهبة، لانو ظروفه خارجة عن الارادة
بس يقعد يتفرج ونحن بنقدم عرض بالخروف،الدكتورة مش قال ليهو كدي.


تسلم وتتعافي والدتنا السمحة عشة، ويطول عمرها .


امييييييييين

سلام




والله انا جيت ومشيت في وفاة الوالد ربنا يرحمه ما شفته منهم واحد




Mohamed Osman

وليد ياحبيبنا
اولا اف سلامة للوالدة ياخي

سم سانيا والله الابوستيك دا
ماسمعت بي جيتك نهائي


غايتو امسحا لينا في وش ود الصايم دا
(طبعا ود الصايم جاتو في صم خشمو ساااااااااااااكت )



خالص الود

ود الحبيب يسن

Quote: تسلم وتتعافي والدتنا السمحة عشة، ويطول عمرها . امييييييييين

يافضولي ياخي سلامات وزع منها لناس درماس وود ابوامنه حامد والكابتن محمد الصادق

محمد عثمان

Quote: سلام والله انا جيت ومشيت في وفاة الوالد ربنا يرحمه ما شفته منهم واحد Mohamed Osman

انا لله وانا اليه راجعون
الله يرحم الوالد ويسكنه فسيح جناتة
وان يتقبله قبولا حسنا

محمد عثمان
اول في صورة بروفايلك الشايل الجريده الحارس على صالح شيقيق صديق على صالح بتاع المريخ
لذلك عندك دايما ناخد وقفه ياطيبة
نرجع للموضوع
والله ياغالي
وانت اكيد شفت ظروف الناس هناك كيف عشان كدا مابتقدر تلوم زول
الناس ما عارفة تجري وراء لقمة العيش وللا تجري للمجاملات
حتى انت نفسك بتكون قصرت مع بعض الناس
مثلا انا قصرت مع كثير الناس
والسودانيين ياخي طيبين وسمحين












-----------------------
سلام ياغالي وماتاخد في خاطرك

ياسر بيناوي

Quote: وليد ياحبيبنا اولا اف سلامة للوالدة ياخي سم سانيا والله الابوستيك دا ماسمعت بي جيتك نهائي غايتو امسحا لينا في وش ود الصايم دا (طبعا ود الصايم جاتو في صم خشمو ساااااااااااااكت ) خالص الود

الاستاذ بناوي
اخبارك يعلم الله الواحد كان مشتاق شوفتكم بس
وود الصايم والله ما قصر كان من المتابعين عبر الموبايل
ياخي تاني سلام والف سلام
ياخي امي دايره ليها قصيدة رايك شنو
واكيد احساسي زي احساسك
بس انت فنان وانا معلم الله

ولا حتى من الفينو الراقد هبطرش دا

كان تمشى لفرفور يديك قزازة شامبيون



بتصل على تلفونك الـ 0557 مرة يدينى جرس ومرة مغلق
انت هنا ولا هناك

وموفور الصحة والعافية للوالدة .

دكتورة داليا
لا لا لا انتي دايره تغشيني وللا شنو تديها للمصم وهبة في الدقايق الاخيرة ويدخل اسمي
ما كان تتصلي على عشان تشوفيني رايح وللا ضهبان وين
وشكلك لسه فاكره اني اقصد الكانون والليمون بعينه .
ياخي الظروف والبحث على العلاج كان انتي اكتر واحده تفيديني يادكتورة
لكن اتلومتي ورفعت تقرير كبير بذلك من اربعة صفحات لناس الرياض الصديق ( تمبس ) .
وبين الدكاترة اقول اسي دكتورة داليا بتظهر وتقوم بالواجب كما فعلت مع الحبيب وهبة
المهم ياريت الواحد كان يجد فرصة ويقدر يقابل الضيوف وباقي الاخوان .
وكل الناس الطيبن وجزاك الله الف خير تاني لدعواتك للوالده .













----------------------------
يادكتورة الحصل حصل واتلومتي تب معاي

وليد يا سمح يا طيب
حمد لله على سلامة الوالدة
وبورداب الخرطوم وكل السودانيين السمحين ربنا يديهم العافية
ويكفيهم شر جري الدنيا الشاغل الناس

جعفر محي الدين

Quote: وليد يا سمح يا طيب حمد لله على سلامة الوالدة وبورداب الخرطوم وكل السودانيين السمحين ربنا يديهم العافية ويكفيهم شر جري الدنيا الشاغل الناس

تسلم تسلم ياغالي من كل شر
لكن عايز اسألك انت الناس ديل قدمو الساعة وللا نقصو اليوم في السودان
تخيل اليوم مابكفي هناك
غايتو ربنا يديهم العافية بس

عبد الدايم سيد احمد

Quote: ولا حتى من الفينو الراقد هبطرش دا كان تمشى لفرفور يديك قزازة شامبيون بتصل على تلفونك الـ 0557 مرة يدينى جرس ومرة مغلق انت هنا ولا هناك وموفور الصحة والعافية للوالدة .

نحن هنا انتو كيف
الجميل ود سيد احمد
ياخي فرفور قلت ليهو دعايتك عبيطة
قال : ياخي الدعاية عصام ود الفوس قريبك ياعبد الدايم مستلم فيها مليون جنية
التاني مالينا دعوه بيهو ..
والايام دي فرفور عامل فيها بتاع عوميد كهرباء واذعاج في الحله


تحياتي لك وللاسرة ياغالي وتسلم من كل شر

يبدو أن الأخ وليد يعاني إكتئاب مابعد الإجازة هههههههههه

ياكابتن دحين ماعصرت علي الجماعة ديل شوية؟