واتـلـم المتعـوس على خايـب الرجا ....

واتـلـم المتعـوس على خايـب الرجا ....


07-23-2010, 12:02 PM


  » http://sudaneseonline.com/cgi-bin/sdb/2bb.cgi?seq=msg&board=300&msg=1279882921&rn=13


Post: #1
Title: واتـلـم المتعـوس على خايـب الرجا ....
Author: دينا خالد
Date: 07-23-2010, 12:02 PM
Parent: #0

وانتهت المعارضة العجوز بمعارضتها
الى الجلوس فى حضرة المؤتمر اللاوطنى !!!!







ـــــــــــــــ
قال ايه .. لحل القضايا المصيرية للوطن
فتأمل !!

Post: #2
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:09 PM
Parent: #1

أمس اتصلت بالأمل !
قلت له: هل ممكن
أن يخرج العطر لنا من الفسيخ والبصل ؟
قال: أجل.
قلت: وهل يمكن أن تشعَل النار بالبلل ؟
قال: أجل.


قلت: وهل من الحنظل يمكن تقطير العسل ؟
قال: نعم ..

قلت: وهل يمكن وضع الأرض في جيب زحل ؟
قال: نعم ، بلى ، أجل ....

فكل شيء محتمل.
قلت: إذن حكام*(السودان ) سيشعرون يوما بالخجل ؟
قال: ابصق على وجهي
إذا هذا حصل.




ـــــــــــــــ
*استبدلنا كلمة العرب بالسودان فعفوا يا
شاعرنا الرقيق احمد مطر صاحب القصيدة ...

Post: #3
Title: Re: واتـلـم المتعـوس على خايـب الرجا ....
Author: سلمى الشيخ سلامة
Date: 07-23-2010, 12:13 PM
Parent: #2

يا دينا يا جميلة
الكلام دا قلناهو قبل 11 سنة
لمن النميرى رجع السودان وتم استقباله كما يتم استقبال الفاتحين
يومها قررت ان ارحل
مثلما فعل الكثير غيرى
رحلت ولم اعد
وبكيت يومها ولم اعد اذرف دمعة الان حيث انى
وصلت الى نقطة اللاعودة
وباتت جملتى الوحيدة هى
بلد ماعندها وجيع
تحياتى وامسحى اى دمعة
واحتسبى كما يقول اهل السلطة الان
وهى سلطة بفتح السين
وليس بضمها

Post: #4
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:17 PM
Parent: #2

الم تقل المعارضة بالامس انها لن تعطى هذه الحكومةاى شرعية ؟
الم تقل ان نتيجة الانتخابات مزوررة وان اى حكومة تنتج
عن هذه الاوضاع هى حكومة دى فاكتو ..؟؟

ماذا تنتظر المعارضة من مؤسسات عرجاء قالت من قبل
انها ولدت سفاحا !! فى حل مشاكل السودان







ـــــــــــــــــ
ها هى المعارضة قد اقتيدت للذبح فى سوق
الله اكبر ... احسن ،، خلونا نخلص


Post: #5
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:23 PM
Parent: #4

ماما سلمى يا اصيلة
قالت احلام مستغانمى فى مثل كتابتكم

لا تفعل كل شىء من متعتك فى ليلة السبت ..

فقد تمطر صباح الاحد !!!!!







ــــــــــــــــــــ
نقول للمعارضة تريثوا عن اجتماع السبت
فقد تمطر صباح الاحد !!!










Post: #6
Title: Re: واتـلـم المتعـوس على خايـب الرجا ....
Author: سلمى الشيخ سلامة
Date: 07-23-2010, 12:28 PM
Parent: #5

للاسف يادينا الحبيبة
لاتوجد لدينا معارضة
اقول قولى هذا ولست نادمة لحظة
فالمعارضة باتت فى تصورى هى مجموعة الشباب المتمثلة فى "قرفنا "
عدا ذلك
لاتوجد

ليتنا نستطيع الى دعمها الدعم الحقيقى لتقف على قدميها قوية وصلبة
فالبنات والبنين فيها يمثلون جذوة علينا ان ندعمها
ربما خرجت علينا بقائد نتمناه
او قيادة تستطيع الى تغيير هذا البؤس الذى نعيشه
على المستوى السياسى

Post: #7
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:28 PM
Parent: #4

مسرحية السبت سيتم اخراجها حسب
اوامر المخرج ...
هو من سيوزع الادوار
هناك ابطال
ممثلين اساسين
كورس
كومبارس
ومصفقين




ـــــــــــــــ
وكما يقول كمال الزين
الكمبارس له اجر الكومبارس ..
ولا شنو كدا ما عارفة ..

Post: #8
Title: Re: واتـلـم المتعـوس على خايـب الرجا ....
Author: baha eassa
Date: 07-23-2010, 12:38 PM
Parent: #7

Quote: وهل من الحنظل يمكن تقطير العسل ؟

والله مافي عسل في البورد دة غير كتاباتك .. الا واحدة بس دقستي فيها ماعارف نميري ولا قذافي داك ؟
فعلا الاعداد لتمثيلية كبيرة سيشارك فيها المعارضة مرغمين حتي لايذهب بريقهم .. مع انه مافي بريق
اصلا ولايحزنون ولكن المتوقع وكالعادة هو اللعب علي مصلحة الشعب لصالح مكاسب شخصية وفي هذا يستوي
المعارض والحاكم .. .. والضحية هو الشعب .. احيي رؤيتك الثاقبة صديقتي دينا .. .. وبس خلاص

Post: #9
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:40 PM
Parent: #7

على اى ارضية مشتركة سيتم النقاش
حول هذه القضايا حتى لو افترضنا انها مصيرية ؟؟؟








ــــــــــــــــ
اى اجابة بالوطن فهى خاطئة !!

Post: #10
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:43 PM
Parent: #7

الا من باب من دخل دار المؤتمر الوطنى فهو امن !!!















ــــــــــــــــ
الامان امان الله ،، الم تعلمكم كل تلك
السنين المتطاولة فى الاشتغال بالسياسة هذه الحكمة ؟؟

Post: #11
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 12:46 PM
Parent: #7

الم يعد بينكم رشيد غير شيخ الترابى ؟؟؟













ــــــــــــــــ
مجبوريين نشد على يديه ولسنا ابطالا !

Post: #12
Title: Re: واتـلـم المتعـوس على خايـب الرجا ....
Author: Salah Abdulla
Date: 07-23-2010, 12:55 PM
Parent: #11

Quote: والله مافي عسل في البورد دة غير كتاباتك

(( والله ما في عسل في البورد ده غيرك يا دينا ))
كده استقامت الجملة..

حتى في يأسك وزعلك وإحباطك ، وقنعك من المعارضة ، برضو عسل ..








ياخ إنت زولة تفتيحة ، معقولة لغاية الآن يكون عندك أمل في المعارضة ؟؟؟

Post: #15
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 01:04 PM
Parent: #11

بهاء يا بهاء لك كامل البهاء

اهو كدا اطمنا على الراس .. لوووووب
شفت بالله المسخرة دى ؟؟

هكذا وبكل هذه الاخبار والبشريات
طالعنا صحف الصباح ...
ما نشيتات بحضور المعارضة لمؤتمر اعده المؤتمر
الوطنى يوم السبت !!
وتصريحات يا بهاء من قادة المعارضة تطمم البطن
شوف معاى
الميرغنى يقول الجنائية تريد تحويل السودان الى عراق اخر
( العنوان الرئيس للاهرام اليوم )
شفت المرض دا ؟؟ سكت دهرا ونطق كفرا ...
وصف نقد لقاء السبت بالمهم ( جريدة الاحداث) ..
قوى الاجماع تطالب بتاجيل اللقاء التفاكرى الى الخميس
(كمان نفسهم فاتحة بقترحوا ... صدقوا !!)




ــــــــــــــــ
العنوان الرئيس التانى للاهرام اليوم هو ::
القبض على عصابة تبتز الفتيات بعد تصويرهن عاريات !!!
طيب وهن البوديهن يتصورن عاريات شنوووو ؟ قصص ..

Post: #13
Title: Re: واتـلـم المتعـوس على خايـب الرجا ....
Author: بكري الصايغ
Date: 07-23-2010, 12:59 PM
Parent: #1


الأخـت الـحـبيـبـة الـحـبـوبـة،

دينا خالد،
تـحياتي ومودتي،

***- في عام 2005، اي وفي مثل الشهر من قبل خـمسة اعوام قررت هـيئة قيادة المعارضة ( التجمع الوطنـي ) السوداني الرجوع للسودان بعد ان وقعت وثيقة الذل والمهانة المسماة ب(اتفاقية القاهرة) ووافقت علي كل شروط الحكومة وقتها وتنازلت عن الدار الذي كان مملوكآ للتجمع واهدته بكل مذلة وخنوع لفرع المؤتمر الوطني بالقاهرة، وبعدها سافر الميرغني للاسكندرية مقر سكنه هناك،

***واما عن معارضة حزب الأمة و باقي احزاب المعارضة ومنذ توقيع اتفاقية ابوجا وحتي الان فهي معارضة ضعيفة بسبب اختراقات الحزب الحاكم لها.
واستطاع الحزب الحاكم بماله المنهوب واعلامه المسيس وأمنه المنحاز وان يفرض رأيه علي بعض الشخصيات المعارضة...فخربوا احزابهم قبل ان يـخربوا الانقاذ!!

Post: #14
Title: Re: واتـلـم المتعـوس على خايـب الرجا ....
Author: الصادق صديق سلمان
Date: 07-23-2010, 01:03 PM

نعم دينا خالد هذا هو الوصف الذي ينطبق على وطننا السودان

Quote:
وباتت جملتى الوحيدة هى
بلد ماعندها وجيع


نفس الجملة التي اقولها يا سلمى الشيخ

الصادق

Post: #16
Title: Re: واتـلـم المتعـوس على خايـب الرجا ....
Author: عمر سعد
Date: 07-23-2010, 01:16 PM
Parent: #14

الاخت دينا

صرت احتقر المعارضه اكثلر من احتقار للحكومه

واعتقد ان الشعب السودانى عامه وانا منهم اجبن منو مافى فى العالم وما الهاشميه فى الاغانى فقط الا دليل عجز كبير 0فنحن جبناء )

انظرى الى المعارضه فى ايران قيادات تنزل الى الشارع الى الان لم تعترف بنتائج الانتخابات الى الان ينازعون حتى فى مسلمات كانت تحكمهم وهم اهل قبله واحده

صرت احترم معارضه ايران وهى معارضه اسلاميه اى زى الشعبى والوطنى كده ......

ولكن بالله قولى لى من احترم من معارضتنا تلك لااحد الا ما قلته الاستاذه سلمى

Quote: فالمعارضة باتت فى تصورى هى مجموعة الشباب المتمثلة فى "قرفنا "
عدا ذلك
لاتوجد

فلننتظر الى ان تموت كل الاجيال ليخوض هؤلاء الشبابا معركتهم مع تطوير ادواتهم فلم يعد النضال السلمى ينفع

وما قاله عبد الناصر ما اخذ بالقوه لا يسترد الا بالقوه ولستمر الدوامه الى ان يجعل لله مخرج هذه البلاد بجيل يتراضى على ثوابت تؤدى الى استقرار وحريات

بسط الحريه هو الاساسا لاى تطور يمكن ان يحصل يوما ما ...
....

Post: #17
Title: Re: واتـلـم المتعـوس على خايـب الرجا ....
Author: Emad Abdulla
Date: 07-23-2010, 02:17 PM
Parent: #16

المواطنة دينا ..
من شدة متعويستي الوطنية .. قررت ابقى مؤتمر وطني !
عشان أتفسح في هذا الخايب الرجا الجايي يتلم علي ..
أشتم و اكفت و البع .. أتفش يا دينا ياخ .
مش متعوس .. !!
و كمان مؤتمرجي و صاحب سلطة ! .. و تيب ؟؟!!
أديهم ليك في حنان حنانهم يمين يسار .
و بعديها تدي روحك طلقة واحدة بائنة بينونة بت كـلـب ..
و ترتاح من تعوستك الأبدية دي ..

شمطت و قمطت .


.......
بلد ما عندها وجيع .

Post: #18
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 03:13 PM
Parent: #17

العزيز بكرى الصايغ
طيب هم ماكانوا يقفلوا الدكان دا نهائى !
جو فتحوا فى الخرطوم لييه ؟؟؟ لوووب
هسه كان كنكشوا فى اتفاقهم بتاع القاهرة دا بس
مش كان طلعوا بى حاجة ؟؟


صلاح اد الله !!
ياخ انت الاعسل ..
طيب ياخ ما يمشوا يتلخبطوا فى الحكومة دى
ويضبحوا ويشوفوا ليهم اسم جديد ؟ بدل يبقوا
كدا روح واااااحده فى جسدين ..







ــــــــــ
ما تمشى تسال لينا الامل انت المرة دى !!


Post: #19
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 03:19 PM
Parent: #17

عماد اد الله ما تعزل براك
انا هسه قلت المتعوس منو وخايب الرجا منو ؟؟
اها وح تحل معاهم المشكلة القايمة دى
وللا ح تعيد انتاج الازمة ؟؟


الصادق صديق بل هم الوجع ذاتو
والماعندو وجيع يشترى لى وجيع
خليهم يرسلوا لينا بعثة اليونيوجيع للتسكين
مش البلد مليانة بعثات ؟ اشمعنا !!



Post: #20
Title: Re: واتـلـم المتعـوس على خايـب الرجا ....
Author: عبد المنعم سليمان
Date: 07-23-2010, 03:26 PM
Parent: #19

قوى الاجماع الوطنى تقاطع اعمال الملتقى الجامع ماعدا الحزب الشيوعى
تحياتي واحترامي يا دينا

اها يا دينا دا جانا قبل الطبع (ههههه)
غايتو لو الخبر دا طلع صح يكون بكاءك الفوق دا لما هو قادم بعد الاستفتاء
ما بيناتنا بكيات ..

Post: #21
Title: Re: واتـلـم المتعـوس على خايـب الرجا ....
Author: Emad Abdulla
Date: 07-23-2010, 03:34 PM
Parent: #19

Quote: وللا ح تعيد انتاج الازمة ؟؟
هي أزمتكم دي بتتعاد ؟؟
البغل ما بتعاد إنتاجو .. لأنو مسخ هجين إبن ستين كـلـب ..
أديهو الغباء بس و الرفسي و الريحة و البرطعة .


مخير الله علينا .

Post: #23
Title: Re: واتـلـم المتعـوس على خايـب الرجا ....
Author: عوض الصديق
Date: 07-23-2010, 03:55 PM
Parent: #21

دينا ماتقري الجرايد يوم الجمعة



---------------------------------------------
ارفع ليك صورة تزين البوست رايك شنو؟

Post: #22
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 03:50 PM
Parent: #17

عمر سعد
يا زول هوى دا كلامك انت نحن حدنا السلمى دا
لوووووووووووب

غايتو يا عمر فكرتك دى قدمها ليهم من هسه
كان راجيهم يموتوا الا ترجع تتصل بالامل تانى !!
لووووب سلام وشوق يا عمر موت دا ما معاهم
كان دايرين تموتوا انتو موتوا موتكم !!









ـــــــــــــ
منننننننننن ما فتحتا شوفت ليك رئيس حزب مات ؟؟
بموتوا الناس القلبهم حار ياخى ..

Post: #24
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 04:22 PM
Parent: #22

يا منعم خشمك فيهو اللبن
من تمك ولى باب السماء
نحن غير شددان الحيل دا دايرين ليهم شنو ؟؟
غايتو كان قاطعوا ليك البشارة
هسه فى واحده صاحبتى رسلت لى ايميل قالت لى
ما تستعجلوا القوى الجديدة ما ح تخزلكم
لكن نحن بصراحة ما بقينا فارزين القديم من الجديد
جرايد الليلة دى يا منعم (ال انطبعت) فيها كلام محبببط
الميرغنى ماشى ماشى
نقد قال دا اجتماع مهم
(اها نقد دا بالقديم ولا بالجديد يا صاحبه؟)
الصادق قالوا ماشى ورينا يكضب الشينة ..

Post: #25
Title: Re: واتـلـم المتعـوس على خايـب الرجا ....
Author: دينا خالد
Date: 07-23-2010, 04:32 PM
Parent: #24

عوض صديق !!!
اوووووووووعك بس من صورة البحر ...

Post: #27
Title: Re: واتـلـم المتعـوس على خايـب الرجا ....
Author: ابراهيم عدلان
Date: 07-23-2010, 04:38 PM
Parent: #25

سلام دينا


يا عمده قبل ما تقلي مؤتمر وطني لازم تثقف نغسك و تلمع الجماعة


لستة كتب التأصيل تعتبر مدخل قوي


درة المباهج في إصلاح أوضاع المناهج

الأخطار الملموسة لانتشار العنوسة

تأثر البيئة من مستنقعات الخريف الرديئة

سر ارتفاع الوفيات في داخل المستشفيات

القول المبين في تحسين أوضاع المعلمات والمعلمين

المعالجات الفطيرة لأحياء مشروع الجزيرة

القول المأثور في المخارجة من كشات المرور

الحكمة السرية في غلاء السلع الاستهلاكية

لوامع الأفكار لمواجهه قطع التيار

الأدلة القطعية في رفض المؤسسات للمراجعة الداخلية

الرد العجول في تبرير رسوم الوصول

هداية الحيارى في تحريم أصوات السكارى

الرد المختار على المواطن المحتار

تخدير الأنام بمنتخب الكلام

طرق ابن آوى في كيفية استلام الرشاوى

الشرح الكارب لمعنى استراحة المحارب

القول الحصيف في سفر الفنانات إلى الشريف

الدعاء اللطيف لدرء كوارث الخريف

الدرر البهية في كيفية تعلم اللصوصية

سر البكاء عند اللجوء إلى ديوان الزكاة

إخفاء البصمات عند قبض الكومشنات

الأسرار البهية لسرقة أموال المحلية

الجواهر اللماعة في سر تقديم الساعة

الحكم والآيات في مشروعية الرسوم والجبايات

الحكم المأثورة في قولة خلوها مستورة

الأفكار الشيطانية في لهط أموال المحلية

الرد الشافي لمن يقول بأن المرتب غير كافي

الأسباب والدواعي لفشل العرس الجماعي

السيف البتار في محاربة ستات الشاي والخدار

السر الباطن في كيفية تنظيف جيوب المواطن

القول الفاصل في ظاهرة البنطلون الناصل

الخطط التامة في سرقة الأموال العامة

الأدلة المحجوبة لوجود الأدوية المضروبة

الأحاديث الضعيفة في قطع من يسرق رغيفه

أنوار الربيع لجلب الثراء السريع

الكامل في الجبايات

البيان والتبيين في غزو منتجات الصين

المستطرف في كل لغفٍ مستظرف

المنقذ من حملات المحليات

الواقع الأليم في مسائل التربية والتعليم

السلوك في معرفة تجاوزات البنوك

الإيضاح في علوم النهب المباح

النبراس في حماية الوازع الديني للاختلاس

تفصيل الكلام في حال المحالين للصالح العام

تاريخ المعتمدين والولاة

الإطالة في أخبار الخريجين العطالة

الإكليل في معرفة موقف خليل

المختصر في صرف المعاش

عقد الجمان في معرفة مستقبل السودان

النجوم العوالي في أخبار دجاج الوالي

عتاد الفارس في دفع رسوم المدارس

حيرة أولياء الأمور في دفع قروش الفطور..

معجم غسيل الأموال

الحكم والآيات في عدم زيادة المرتبات

بغية الطلاب في معرفة سر الكلاب

القول المبين في شركات الولاة والمسئولين

دليل المسلم الحزين إلى فقه التمكين

الكلام المباح في تجهيز قفة الملاح

الجامع في قطع الكهرباء عن الجوامع

التحريم والتحليل في أسباب التدبيل

الأدلة الشرعية في بيع الساحات الشعبية

رأى الدين في شراء أصوات الناخبين

الدرر السنية في تهميش أفراد الرعية

الطناش في صرف ملاليم المعاش

كشاف القناع عن عائدات البتاع

الروضتين في أخبار الشريكين



___________

كعبة الاندراوة

Post: #26
Title: Re: واتـلـم المتعـوس على خايـب الرجا ....
Author: عبد المنعم سليمان
Date: 07-23-2010, 04:35 PM
Parent: #24

عمرك ما تعتمدي على جرائد الليلة
لانه ضابط الامن الرقيب هدفه الرئيسي من الرقابة هو خلخلة قوى المعارضة والتشويش على القراء
بل ويقوم بوضع مشرطه او قلمه على بعض الاخبار لخلق المزيد من الغموض حولها ..
___
بحكي ليك القصة دي
في مرة كدا كنت انا محرر السهرة في اجراس الحرية وكان المراسل جاب لينا خبر البشير في سنار
فعلمت المانشيت مع محرر الاخبار : البشير : امريكا والعالم تحت جزمتي
جاء بتاع الامن وشال المانشيت وقال غيروه
سالته انت بتغير كلام رئيسك زاااتو عرفنا المعارضة ؟ .. قال لي ايوه بغيروا
قلت ليه : طيب طالما هو بالطريقة دي وانتو بتخجلو من كلامو .. انت ضابط وهو ضابط اعمل عليه انقلاب بدل
ما تعذبنا نحن ديل ..

Post: #29
Title: Re: واتـلـم المتعـوس على خايـب الرجا ....
Author: عوض الصديق
Date: 07-23-2010, 04:45 PM
Parent: #26

Quote: عوض صديق !!!
اوووووووووعك بس من صورة البحر ...


المرة من الغابة

Post: #31
Title: Re: واتـلـم المتعـوس على خايـب الرجا ....
Author: sourketti
Date: 07-23-2010, 04:48 PM
Parent: #24

الوضع الحالى لا يحتمل أى رؤى فرديه وحزبيه بل قوميه وقوميه فقط ...على الجميع أن يجمعوا شتاتهم ويحسموا أمرهم قبل فوات الأوان
لن يغفر هذا ال (محمد أحمد) الصامت المراقب (الذى أخشى ما أخشى أن يُفهم صمته خطأ بالجبن )لأىٍ كان حاكماً أو معارضاً عاجلاً أم آجلاً أى تفريط فى وحدة هذا البلد...
الجنائيه لم تأت من أجل رأس البشير أو غيره ودارفور فى وجوده أو عدمه ..رضيتم أم أبيتم ستبقى محور صراع هذه الفترة حسب جدول أولويات الغرب والاستعمار الجديد ...مثلما كان العراق وسبقه جنوب السودان ومثلما سيأتى الانقسام على الشرق وغيره ...


Post: #28
Title: Re: واتـلـم المتعـوس على خايـب الرجا ....
Author: Elmosley
Date: 07-23-2010, 04:40 PM
Parent: #16

Quote: واعتقد ان الشعب السودانى عامه وانا منهم اجبن منو مافى فى العالم وما الهاشميه فى الاغانى فقط الا دليل عجز كبير 0فنحن جبناء )

لم اتوقع منك هذا الحنق صديقي عمر ولا ترموا بامراض الساسة في سلة الشعب
أو ليس هو الشعب الذي اطاح بعبود
أو ليس هو الشعب الذي اطاح بنميري
الشعب سئم لعبة الدورة الخبيثة
مالكم كيف تحكمون

Post: #30
Title: Re: واتـلـم المتعـوس على خايـب الرجا ....
Author: عوض الصديق
Date: 07-23-2010, 04:48 PM
Parent: #28

selvaa.jpg Hosting at Sudaneseonline.com


قلنا بس عشان يتعرفو المتعايس

Post: #32
Title: Re: واتـلـم المتعـوس على خايـب الرجا ....
Author: عبد المنعم سليمان
Date: 07-23-2010, 04:51 PM
Parent: #28

بقينا عليك يا دينا انا وصحبتك واتنين لو قالو ليك اضانك مافي عارفه تعملي شنو ؟
قولي لي بكري يحذف البوست
ولــ
نبكي بس على ما هو آت لو استمر هذا المجرم الدولي وعصابته في الحكم

Post: #33
Title: Re: واتـلـم المتعـوس على خايـب الرجا ....
Author: jini
Date: 07-23-2010, 05:45 PM
Parent: #32

يا دينا عشان ما يتلخبت علينا الاختساس حددى مين المتعوس ومين خايب الرجا! والله يا دينا انا خايف المتعوس وخايب الرجا يزعلوا ويرفعوا قضية تشهير واشانة سمعة عشان تشبيهم بالجماعة ديل!
جنى

Post: #34
Title: Re: واتـلـم المتعـوس على خايـب الرجا ....
Author: BAKTASH
Date: 07-23-2010, 06:00 PM
Parent: #33

ممكن يحصل احتجاج من جانب المعارضة والحكومة ويختلفوا ويتنازعوا في...









مين المتعوس ومين خايب الرجا ؟؟

Post: #35
Title: Re: واتـلـم المتعـوس على خايـب الرجا ....
Author: ابراهيم عدلان
Date: 07-23-2010, 06:06 PM
Parent: #34

معقول يا جني ياخ

مالك دايرني اقول ليك كورتك فكت


معقول بعد دا كلو ما تكون عرفت خايب الرجا منو ؟

Post: #36
Title: Re: واتـلـم المتعـوس على خايـب الرجا ....
Author: jini
Date: 07-23-2010, 06:12 PM
Parent: #35

Quote: معقول بعد دا كلو ما تكون عرفت خايب الرجا منو ؟

دى ماركة مسجلة اسمها حمدو فى بطنو!
ما تقرقرنيش فى الكلام بأى!
جنى

Post: #37
Title: Re: واتـلـم المتعـوس على خايـب الرجا ....
Author: كمال عباس
Date: 07-23-2010, 08:05 PM
Parent: #36

...............

Post: #38
Title: Re: واتـلـم المتعـوس على خايـب الرجا ....
Author: كمال سالم
Date: 07-23-2010, 11:50 PM
Parent: #37

وفى ساعه متأخره من مساء اليوم إلتقيت (بالأمل ) *
وقال لى أن الحكومه ستصدر بيانا تعلن فيه تأجيل الملتقى
لأجل غير مسمى نسبة للعدد الكبير من الأحزاب التى أكدت
مشاركتها !!
أها يادينا هسه نصدق ( الأمل ) ولا الأحزاب ؟؟
هل الحكومه أجلت أم الأحزاب قاطعت ؟؟






* الأمل المقصود هنا هو أمل عطبره يادينا . 

Post: #39
Title: Re: واتـلـم المتعـوس على خايـب الرجا ....
Author: Sabri Elshareef
Date: 07-24-2010, 00:03 AM
Parent: #38

اه من وطن تتقدمه قيادات امثال نقد الصادق والميرغني


كل يوم تزداد تعاستي بسجل مخزي لهذه القيادات


امر محير ولا اعرف كيف ينتهي ؟؟؟

برضو ممكن يجيك واحد او واحدة للتبريروالتفكير والتدبير

من ان القائد كان قصدو ؟؟؟؟؟؟؟؟؟؟؟؟

Post: #40
Title: Re: واتـلـم المتعـوس على خايـب الرجا ....
Author: Amjed
Date: 07-24-2010, 00:26 AM
Parent: #39

يا عمدة
حلك دا ما بينفع
فكرتا فيهو قبال كدا
و بعد عقدت العزم (دي تبع التوجهات و المنطلقات الجديدة)
تدبرت امري و لقيت اني حامشي ليهم يقومو يقولو لي :

يا زول انتا بالذات ما دايرنك


ضيعتو شبابكم (و شبابنا) ساي يا عماد عبدالله

Post: #41
Title: Re: واتـلـم المتعـوس على خايـب الرجا ....
Author: عمر سعد
Date: 07-24-2010, 01:33 AM
Parent: #28

Quote: لم اتوقع منك هذا الحنق صديقي عمر ولا ترموا بامراض الساسة في سلة الشعب
أو ليس هو الشعب الذي اطاح بعبود
أو ليس هو الشعب الذي اطاح بنميري
الشعب سئم لعبة الدورة الخبيثة
مالكم كيف تحكمون

حبيبنا الموصلى

تحيه واحترام

ثوره عبود سلميه ونميرى سلميه بمعنى انها ثورات لم تواجه مذابح وقتل الان من يعارض يقتل ويسحل ويعذب ويشرد فصار الامر صعبا جدا

الشعوب لا تهمها الحكومات او اسقطاتنا .او ما نريده نحن وما يريده فلان او علان ولكن الشعوب تخرج حين يضيق عليها فى الرزق وارتفاع الاسعار

اليك مصر القريبه التى نتباهى باننا اشجع منهم خلى يزيدو الارز فقط (تعريفه) لن تهدا المظاهرات قبل ارجاع السعر

او زياده للسكر او المواد المهمه للحياه واستمراريتها ..انا لا اطالب الشعب ان يخرج على الكيزان او الاتحادييين او الامه او الشيوعى وما تبع
لانى غير منتمى لحزب اريد ان اجير له الشعب ولكن الشعب الواعى حين يدخل الامر اللحم الحى يثور

فهل ترى وانت كنت قريب فى السودان زياددات فلكيه وخرافيه فى الاسعار فى اى شئ ولا حياه لمن تنادى . وصالح عام وبيع مفاصل ومؤسسات الدوله للمحاسيب.

لا اريد للشعب ان يغير الحكومه فلا توجد معارضه تستحق ان تحكم الان ...

ولكنى اريدهم ان يثورو فقط من اجل الحياه الكريمه من اجل خبز فى متناول اليد وسكر ودواء ولكن اتعتقد ان الشعب سيثور ومتى

اى قرارا بيمشى فوقهم بكره لو قالو الرغيفه بى 20000 جنيه سيتقبلها الشعب فماذا تسمى هذا يا موصلى تقاعس الى حين جبن لا مبالاه استهتار خدر موضعى

شجاعه ..فانا لست بسياسى اى بمعنى منتمى واريد ان اركل او اتهم الشعب فانا منهم ولم افصل بين الشعب وبينى فانا جباان مثلهم وتلك ليست لعبه سياسه

ولك الود والاحترام .....

Post: #42
Title: المصالح المشتركة للبرجوازية في الحكم والمعارضة
Author: Al-Mansour Jaafar
Date: 07-24-2010, 03:09 AM
Parent: #41

الإحترام والسلام يادينا


الإثنين الحكومة والأحزاب متفقين في عنصري ديكتاتورية السوق إلا قليلاً (كإستثناء يوكد القاعدة)

1- حرية تملك بعض الأجانب والأفراد لأكثر موارد ووسائل المعيشة في المجتمع

2- تحويل حقوق الناس في الماء النظيف والكهرباء والسكن والتموين والتعليم والعلاج ورعاية الأمومة والطفولة والعجز
إلى سلع ومتاجرة .



--------------

تعليقاتك جذابة

كالحكمة في الحرير

Post: #43
Title: Re: المصالح المشتركة للبرجوازية في الحكم والمعارضة
Author: كمال عباس
Date: 07-25-2010, 02:34 AM
Parent: #42

المعارضة السودانية تتهم الحزب الحاكم بالتخطيط لتوريطها...ة التاريخ»!!!!!!!!!!

Post: #44
Title: Re: المصالح المشتركة للبرجوازية في الحكم والمعارضة
Author: كمال عباس
Date: 07-25-2010, 02:37 AM
Parent: #43

الميدان 25 يوليو 2010 ...كلمة العدد: القرار الصحيح في الوقت المناسب

Post: #45
Title: Re: المصالح المشتركة للبرجوازية في الحكم والمعارضة
Author: حبيب نورة
Date: 07-25-2010, 02:58 AM
Parent: #44

up


i like it

Post: #46
Title: Re: المصالح المشتركة للبرجوازية في الحكم والمعارضة
Author: Amani Al Ajab
Date: 07-25-2010, 04:04 AM
Parent: #45

[QUOTEرفضت قوى تحالف جوبا (المعارضة السودانية بما فيها الحركة الشعبية الحاكمة في الجنوب) دعوة الرئيس السوداني عمر البشير لعقد اجتماع حول «وحدة البلاد ونزاهة الاستفتاء حول تقرير مصير الجنوب»، مما أدي إلى فشل قيام الاجتماع الذي كان مقررا له أمس. واتهمت المعارضة، الحزب الوطني الحاكم برئاسة البشير بأنه يخطط لتوريطها في انفصال جنوب السودان الذي قالت إنه «واقع لا محالة»، و«لعنة التاريخ»، الذي لن يرحم من تسبب فيه. ووضعت القوى السياسية شروطا للمشاركة في أي اجتماع لاحق مع المؤتمر الوطني، قائلة إن أمام حزب الرئيس البشير خيارين «إما دولة مواطنة كاملة.. أو دولة إقصائية تؤدي إلى انفصال الجنوب».

وعقد الرئيس البشير لقاء مع نائبيه سلفا كير ميارديت وعلي عثمان محمد طه فور عودته من أنجمينا، أفضى إلى تأجيل لقاء البشير مع زعماء القوى السياسية إلى أجل غير مسمى. وأعلنت قوى تحالف جوبا مقاطعة اجتماع البشير في خطوة مفاجئة تعكس التصعيد بين الحكومة والمعارضة. وكشف لـ«الشرق الأوسط» نائب الأمين العام للحركة الشعبية ياسر عرمان أن «الحركة قررت مقاطعة اجتماع كان مقررا له أمس دعا له الرئيس البشير حول الوحدة ونزاهة الاستفتاء». وقال عرمان «إن الاجتماع تم الإعداد له ووضع أجندته، وتحديد نتائجه، كما أن المنظمين وأصحاب الدعوة اختاروا ممثلي الأحزاب من دون مشاورة بما في ذلك ممثلو الحركة الشعبية، فضلا عن قضايا الحريات والتحول الديمقراطي ذات الصلة بموضوع الاستفتاء»، منوها بأن الاجتماع تم التحضير له بواسطة لجنة دعم الوحدة، وهي لجنة كونها الرئيس البشير، وشدد على أن هذه القضية تتطلب مشاورة النائب الأول، وترى الحركة الشعبية أنه من الأجدى مشاركة كل القوى السياسية في التحضير. وأشار عرمان إلى أن الحركة طالبت بالتأجيل لكن المؤتمر الوطني لم يستجب لذلك. وأكد في السياق ذاته استعداد الحركة الشعبية للحوار الأمثل حول القضايا المصيرية.

من جانبه، أكد المسؤول السياسي للمؤتمر الشعبي كمال عمر أن حزبه رفض المشاركة في لقاء مع الرئيس البشير لعدم توافر الشروط المناسبة للحوار، ولعدم الرغبة في التوقيع على مخرجات أعدت سلفا وطلب من الآخرين التوقيع عليها، وقال «الأوضاع خطيرة والقضايا كلها يرتبط بعضها ببعض، مثل قضايا الاستفتاء ودارفور والحريات والتحول الديمقراطي» وكشف عمر عن إعداد قوى تحالف جوبا لعقد مؤتمر في جوبا.

وعلمت «الشرق الأوسط» أن اتجاها في حزب الأمة رفض المشاركة في لقاء البشير، ودخلت قيادات الحزب في اجتماع مطول توقعت مصادر مطلعة أن يخرج برفض المشاركة رغم إعلان رئيس الحزب الصادق المهدي المشاركة في الاجتماع. وكانت قوى جوبا قد عقدت اجتماعا مع رئيس الحركة الشعبية سلفا كير ميارديت اختلفت حوله المواقف، ففيما أبدى المهدي استعدادا للقاء البشير ونقل وجهة نظره، وهو نفس موقف السكرتير العام للحزب الشيوعي محمد إبراهيم نقد، رفض حسن الترابي زعيم المؤتمر الشعبي المشاركة من حيث المبدأ.

وأصدرت 10 أحزاب سياسية وكيانات نقابية بيانا حملت فيه بشدة على المؤتمر الوطني، واعتبرت أن «تفتيت الوطن صار واقعا، ولم يتبق لإعلان ذلك سوى بضعة أشهر، واتهمت الحزب الحاكم بالعمل على تعويق إجراء استفتاء الجنوبيين على حق تقرير مصيرهم أو تزوير نتائجه، وأن يوهم الشعب بأنه حريص على وحدة الوطن ومواطنيه، وأن يورط القوى الأخرى في تحمل نتيجة الانفصال ولعنته التاريخية، وتمزيق المواقف المعارضة الموحدة. وشددت القوى السياسية المعارضة في بيانها على أن مناقشة قضايا وطنية تقتضي الحرية والشفافية والمساواة في الحقوق والندية، وقالت «إن قضية الوحدة كانت وما زالت قضية حقوق ووجود وهوية، ومنذ أن طرح مطلب تحقيق المصير فإن مآلاتها معروفة، وخياراتها بينة، فإما دولة قائمة على حقوق المواطنة كاملة تحقق المساواة الكاملة وتمنع التمييز بين مواطنيها على أي من أسس الدين والعرق أو اللون أو الثقافة أو اللغة أو النوع، وتصون الحريات، وتخضع لحكم القانون، وتنجز التنمية العادلة المستدامة فتكون الوحدة، أو دولة تقوم على الإقصاء والاستعلاء والتمييز والقمع والنهب والفساد فيكون الانفصال». واشترطت القوى السياسية للمشاركة ونجاح أي لقاء لحل أزمة الوطن مشاركة القوى السياسية جميعا في الدعوة للقاء «لا أن تقوم بذلك السلطة، أو حزب واحد يمسك بأزمّتها نيابة عن الآخرين، وأن تشكل لجنة تحضيرية تشارك فيه كل القوى السياسية للإعداد الجيد والمكتمل والمتوازن لمؤتمر تدعو له كل منظمات المجتمع المدني، وأن يتم تأجيل الموعد المحدد لموعد آخر».

االخرطوم: فايز الشيخ
لشرق الاوسط

http://www.sudaneseonline.com/news-action-show-id-3564.htm

Post: #47
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-25-2010, 04:44 AM
Parent: #45

طب مين الي قاب التورته ؟


يا دوب عرفتي ان الله ( حق )

Post: #48
Title: Re: المصالح المشتركة للبرجوازية في الحكم والمعارضة
Author: تبارك شيخ الدين جبريل
Date: 07-25-2010, 05:32 AM
Parent: #47

Quote: اها وح تحل معاهم المشكلة القايمة دى
وللا ح تعيد انتاج الازمة ؟؟


آخر حاجة بتذكّرا ... انو مولانا سافر جوبا عشان ملتقى جوبا والتحضير للإنتخابات ... وبتذكّر قالوا حيجيبوا مرشح واحد ... وقالوا حلّ الأزمة فى هزيمة المؤتمر الوطنى (خلونى افكّر ... يا ربى الأزمة دى شنو الحلّها فى هزيمة المؤتمر الوطنى فى الإنتخابات؟) بعد داك اعلنوا انسحابات جماعية واختجّوا (ما احتجّوا!) اختجّوا على نتيجة الإنتخابات ... بعد داك انا نسيتم .... هسى فى شنو جديد؟

الأزمة تاورتنا تانى؟ ولاّ شنو؟

وجيوش الأمم المتحدة بقيادة المارينز وين؟ عشان يحموا حقوق الإنسان ويدردقوا جثة البشير لمقصلة الجنائية؟ سيدنا "أوكامبو" وين؟

ما عندهم بخّاخ لى الأزمة دى؟ بدل التلتلة!

(الغريبة حا يجوا يقعدوا ويكذبوا على نفسهم ويقولوا "ضغطنا الكيزان دبلماسياً" واضطريناهم للجلوس معنا أو أى جلكسة من هذا القبيل ... ويكونوا عايزننا نصدّقهم ... كأننا ما عايشين التاريخ دا)

ياهنديل يا عمدة الدايرين طلقة باينة بينونة بنت كلـب .... يعاين لى!





... المهم ....

Post: #49
Title: Re: المصالح المشتركة للبرجوازية في الحكم والمعارضة
Author: دينا خالد
Date: 07-26-2010, 09:57 AM
Parent: #48

غبت وجيت لقيت البوست ازدان بعمالقة
ورجال واولاد ذى الورد ....

الحبيب كمال سالم
جعفر المنصور
عماد وعمر سعد
الود وليد .. (حتتتتى انت يا بروتس )
الود امجد .. ما بقيتو اربعة ؟؟
ولقيت العنوان بقا مدهششش يعبر عن جد
بحال معارضتنا
واضيفت للبوست نكهة ورائحة عبقة
بمرور استاذنا الموصلى .. اوووع اكون نسيت زول ؟؟
كمال عباس ؟؟؟ مسحت شنو ؟؟
التعديل عرفنا قام عليك جن المسح ؟؟؟
تبارك شيخ الدين !!
ازيك ومشتاقين شديد !




ــــــــــ
يا جماعة الناس ديل ما رافضين مبدا القعاد مع الوطنى
فى عضمة بل بناوروا عشان يقعدوا معاه بفتكرو تغيير
مسميات الجلوس مع المؤتمر الوطنى .. بتفرق كتير !!


ـــــــــــــ

Post: #50
Title: Re: المصالح المشتركة للبرجوازية في الحكم والمعارضة
Author: دينا خالد
Date: 07-26-2010, 10:09 AM
Parent: #49

صلاح عبد الله وباكتاش
وصبرى الشريف وجنى الكلكى
وابراهيم عدلان

عبد المنعم سليمان وعوض صديق
سوركتى حبيب نورة وامانى العجب

انا متاكده لو كنتو انتو قادة تلك الاحزاب
لوقيتونا كثير من الشرور
وما كان دا حالنا ... بس منو يكون رئيس ياتو
حزب دى خليتها عليكم .. ياللا اعزلوا !!! لوووب






ــــــــــــــ
هسه كلللكم تعزلوا ان تكونوا احد السيدين !!!
لوووووبيين

Post: #51
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-26-2010, 10:55 AM
Parent: #50

Quote: الود وليد .. (حتتتتى انت يا بروتس )


رسلي صورة في الخاص
او ما تساليني

Post: #52
Title: Re: المصالح المشتركة للبرجوازية في الحكم والمعارضة
Author: Amjed
Date: 07-27-2010, 04:46 AM
Parent: #51

ابلة دينا ابلة دينا

انا داير حزب البهجة ينفع تعيدو توزيعي بهناك

ممكن اجيب شهادة مرضية اذا استدعى الامر

Post: #53
Title: Re: المصالح المشتركة للبرجوازية في الحكم والمعارضة
Author: دينا خالد
Date: 07-27-2010, 10:06 AM
Parent: #52

امجد done يا حبيب
بهجة بهجة .. بتكون بعد الفيديو الشتمو
فى ناس البهجة دا غيرت رايك لوووووووب
هسه دا ادبكم ؟ لوووووب

وليد ركبت تاكسى مشيت الخاص جيت راجعة
ما برسل صور ممكن تمشى انت هناك وترسل لى
اى قفة اشيل فيها ؟ بعدين ياخى هى مالها لومها لى ؟

اليوم يا تبارك ولا امس قالوا التئم لقاء السيدين
من زمااااان ما التئمو وسيد على سيد يبقوا سيدين
والماعندو سيد يشترى لى سيد يا ناس المنصور !




ـــــــــــــ
يا سيدى الحسن
او يا النبى نوح للماعندو سيد !!!




Post: #54
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-27-2010, 10:21 AM
Parent: #53

Quote: بعدين ياخى هى مالها لومها لى ؟


خلاس قمتي لحركات الشيوعين دي

Post: #55
Title: Re: المصالح المشتركة للبرجوازية في الحكم والمعارضة
Author: Amjed
Date: 07-27-2010, 10:34 AM
Parent: #54

حسي يا وليد في زمتك
مالك على الشيوعيين ديل دول غلابة ... حسي في زمتك ما غلابة
ثم ناس دينا ديل انقسموا ياخ شيوعيين دي حسي بقت ليهم نبذة ذاتو

Post: #56
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-27-2010, 10:40 AM
Parent: #55

يا امجد الكيزان ما انقسمو
في نص فيهم بقى ما كوز ؟



Post: #57
Title: Re: المصالح المشتركة للبرجوازية في الحكم والمعارضة
Author: Asim Fageary
Date: 07-27-2010, 11:36 AM
Parent: #56

سلام يا دينا

يا دينا يا أختي السياسة دي ما فيها ثوابت (إسمها سياسة بالبلدي بيقولوا ليك سايس فلان ما تقيف معاه ألف أحمر)

لا تستغربي ولا تستنكري الكل يقدم تنازلات والكل يتفق حيناً ويختلف حيناً آخر وكل حسب نواياه


كسرة:

إنتي الصور دي بتجيبيها من وين مش كفاية غشيتيني بصورة الممثلة الهندية!!


مع تحياتي وتقديري

Post: #58
Title: Re: المصالح المشتركة للبرجوازية في الحكم والمعارضة
Author: Amjed
Date: 07-27-2010, 05:41 PM
Parent: #57

اها يا وليد الناس ديل ما انقسموا ( نعتذر لخطأنا السابق)
الناس ديل مرقو بالدرب عديل و قالو لينا ما دايرين معاكم
و ما راعو للعشرة زاتو و قالو لينا انتو زاتكم خردة و ما نافعين

شفتا ليك بجاحة قدر دي بالله


كون انو هم شنو حسع
دي تسأل منها دينا يا خوي
انا مليش دا دعوة

Post: #59
Title: Re: المصالح المشتركة للبرجوازية في الحكم والمعارضة
Author: دينا خالد
Date: 07-27-2010, 10:03 PM
Parent: #58

الود وليد والود امجد
انا صحن صييينى لا انقسمت ولا ممكن اتقسم
بعدين تعالوا هنا ... انتو بتدردقوا فى منو ؟؟
لوووووووووب ،، لا تصدق كل ما تسمع يا وليد

وان كان دى تهمة لا انكرها وشرف لا ادعييه ..
لووووووووب ,, شفتوالحب من طرف واحد دا بعذذذب
كيف .....؟؟






ـــــــــــ
حالتو محذرنى قالوا لى عكى عككى
وما تستفزى .. وما تردى بسسسسس

Post: #60
Title: Re: المصالح المشتركة للبرجوازية في الحكم والمعارضة
Author: Amjed
Date: 07-27-2010, 10:22 PM
Parent: #59

انا رأيي انو دي بينة ظرفية يا وليد
انتا رأيك شنو

ممكن نستشف شنو من كلام دينا خالد الاخير دا


ركز لي على حتة نستشف دي بالله

Post: #61
Title: Re: المصالح المشتركة للبرجوازية في الحكم والمعارضة
Author: Emad Abdulla
Date: 07-27-2010, 10:56 PM
Parent: #60

يا ( دكتور ) ..
كلللللللو bull ####

Post: #62
Title: Re: المصالح المشتركة للبرجوازية في الحكم والمعارضة
Author: لطفي علي لطفي
Date: 07-27-2010, 11:20 PM
Parent: #61

الاخت دينا

انه صراع المصالح للكبار فالغنايم توزع و علي الصغار حجز المقاعد للتفرج

فلقد قال الشاعر الصوفي

كلنا من نخلة واحدة لكن العجوة غير البلح

لطفي

Post: #63
Title: Re: المصالح المشتركة للبرجوازية في الحكم والمعارضة
Author: د.محمد بابكر
Date: 07-27-2010, 11:31 PM
Parent: #62

Quote: وقتها وتنازلت عن الدار الذي كان مملوكآ للتجمع واهدته بكل مذلة وخنوع لفرع المؤتمر الوطني بالقاهرة،


والله حاجه تطمم البطن.

Post: #64
Title: Re: المصالح المشتركة للبرجوازية في الحكم والمعارضة
Author: دينا خالد
Date: 07-28-2010, 06:30 AM
Parent: #63

لطفى ازيك
الامثال المضللة كثيييرة ويقولوا ليك
الدهن فى العتاقى .. ووووو
بس المعارضة من ناحية انها عجوز وقدراتها
اتدهورت اتدهورت يا خوى

د. محمد بابكر شفت الناس ديل مقرفين كيف ؟؟








ــــــــــــــــ
الود امجد الود وليد شكرا لرفع البوست لووووب
وامنعوا الفوضى يا قولها .. اصلا انا متهمة بانى
انا المطلعة الاشاعة دى !! لووووووبين

Post: #65
Title: Re: المصالح المشتركة للبرجوازية في الحكم والمعارضة
Author: أبو ساندرا
Date: 07-28-2010, 07:09 AM
Parent: #64

دندنة :
Quote: يا جماعة الناس ديل ما رافضين مبدا القعاد مع الوطنى
فى عضمة بل بناوروا عشان يقعدوا معاه بفتكرو تغيير
مسميات الجلوس مع المؤتمر الوطنى .. بتفرق كتير !!


آآآي

بتفرق كتير
طعم الفطير
لو يبقى مر

Post: #68
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-28-2010, 09:54 AM
Parent: #60

انا رائي انها ظريفة جدا يا امجد

وحقانية كمان

Post: #67
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-28-2010, 09:53 AM
Parent: #59

Quote: لا تصدق كل ما تسمع يا وليد


ما عندي اي مانع اعتمد الكلام ده

بس اسمع منك انت مباشرة واقلب الصفحة دي ؟؟


بالمناسبة يا دينا .. انا بعزك جدا
ومعتبرك صديقتي
وحريص جدا اني اعرفك واتشرف بي كده


لكن لو فضلتي كائن مجهول .. خصوصيتك ما بنتعداها
لكن لن تمنعينا التكهن


ولا كيف يا فرده

Post: #66
Title: Re: المصالح المشتركة للبرجوازية في الحكم والمعارضة
Author: وليد محمد المبارك
Date: 07-28-2010, 09:47 AM
Parent: #58

Quote: كون انو هم شنو حسع
دي تسأل منها دينا يا خوي
انا مليش دا دعوة


بنسال من السنة الفاتت

ودينا عاملة حميــــل يا امجد
لو عارف حاجة رسلها لي اخوك في الخاص