تنفرد العامية او الدارجة العربية في السودان بمفردة تعتبر اكثر لازمة شيوعا واستعمالا وهي "ساكت" ...ويستغرب الناطقون بالعربية من غير اهل السودان بهذه المفردة وهي في معناها "جامدة لا تتحرك وصامته " لكنها تستعمل كلازمة ل"متحرك" .. مثل : "كلام ساكت" فكيف هو "حديث " و"صامت" و "زول ساكت" فكيف "بني ادم حي وجامد "..... ولكن من وجهة نظري الشخصية وانا من الناطقيين بغيرها منبتا واصلا ولسانا وبالتالي لا ادعي معرفة اكثر من الناطقيين بها اري ان من "نجر واخترع هذه اللازمة والمفردة كان حكيما بعيد النظر عليما بابعاد الانسان السوداني باختلاف شعوب السودان واثنياتهم فليس كل الذي ينطق به او ينطقه او يقوله هذا الانسان السوداني "متحرك " او فيه "ديناميكية" بحيث له مآلات ونتائج وانما قول لا حراك فيه وهو جلمود صخر و "ساكت" الا تسمعون ملايين الكلمات التي نطق بها الانسان السوداني خلال الشهور الست الماضيات (قبل انتخابات ابريل وبعدها) عن "الوحدة" .. وتليريونات الكلمات عن "التنمية " و "التخطيط الاستراتيجي " و "التطور" و"المشاريع التنموية" و "الصحة للجميع" و "التعايش السلمي " , "الاستثمار" و "المواصلات الحديثة " و "ترتيبات لموسم الامطار" و "الصناعات الحديثة " و "نزاهة الانتخابات" ووووووووووووووووووووووووووووووووووووووووو و "كلام ساكت" من "زول ساكت"
يا أبو بكر أنا قلت لصديقي عزّام وفيسل هليل ما دمتما من (إندنا) يعني من غير الناطقين بها فما تفتوا في اللغة، لآنو مافي زول ممكن يتمكن من اللغة الأجنبية مثل أصحابها يعني الناس ال mother tongue بتاعهم هو نفس اللغة.
كلمة ساكت غير صحيحة. أصلها ساي أي بدون معنى ولا هدف. لكن هجين الخرطوم غيّر الكلمة لساكت. وتلقفها باقي السودانيين بدون معرفة أصل الكلمة.
هنالك كلمات كثيرة عربية واردة في القرآن الكريم كنا نستخدمها - ومازالت تستخدم إلى الآن في الريف- لكن هجين الخرطوم حولها لكلمات لا توجد في القرآن الكريم. ومنها مثالاً لا حصراً: 1- النعال: (إخلع نعليك إنك بالوادي المقدس طوى) حرّفها هجين الخرطوم إلى جزمة. 2- البارحة: أم بارح. 3- المد: ملوة 4- الوجه: الوش. وجهك : وشّك. 5- التمر: البلح 6- توّاً: هسِّع أو هسا كما يقول بعضهم.
وغيرها كثير. لكن كلمة ساكت سادت وغلبت. وكل مفهوم: قاعد ساكت. ماشي ساكت. راقد ساكت وكلهامقبولة. لكن بالله عليك حكاية بتكلم ساكت دي يفسروها كيف؟ يعني بتكلم وساكت. contradiction يا مرسي.
(العوج راي والعديل راي)
07-23-2010, 07:50 AM
abubakr abubakr
تاريخ التسجيل: 04-22-2002
مجموع المشاركات: 16044
يا عزيزي كانتونا اندرسكور واحد...جمعة مباركة ....ناس فيسل وعزام برابرة بندر سااااي ....اللغة العربية مفتيها الاول كان سيبويه العجمي ..واكثر من ينطقها دون تغيين القاف وتقفيف الغين هم الناطقيين بغيرها من اهل السودان .. شفت كيف ؟؟؟ تعطيش الجيم موجود عند غير اهل السودان فوجه عند عرب الخليج ويه والبلح موجود اسما لثار النخل عند غير اهل السودان وهالساعة موجودة عند كثيرن من الناطقيين بها وقصرها اهل السودان وونطقوها "هسي".. اما ساااي وساكت فهم من المنجرة السودانية ويبدو ان ساكت هي الاصل فقلبت الفا كما الجيم ....
اما التعبيرات التي ارتبطت ب"ساكت" فهي من اختراعات مستعربة السودان فكما تعرف ان الاختراعات عند العاربة والمستعربة لغوية وكلام ساكت ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
abubakr
cantona_1
فيس بوك
تويتر
انستقرام
يوتيوب
بنتيريست