معا من أجل أيقونة Like و Unlike في البورد :)

أنا بقيت بحب الفيسبوك أكتر من البورد,,
لأنه مريح وبيعفيك من كلام كتير,,
خاصة لو كنت من ذوي الوقت المحدود أو الممحوق,,
ماعليك الا بالضغط علي أيقونة لايك حتي تشعر بالراحه لمشاركتك فيما تحب أو ما تتفق معه,,
ثم تتخارج من الفيسبوك سريع سريع وليس عليك حرج أو مشقة توضيح,,
وقت ما تجي راجع الفيسبوك يقولو ليك فلان وفلان وفلان لايك معاك برضو, أو لايك يور كوممنت, وكفي الله الفيسبوكيين شر القتال

أما في البورد فأقصر الطرق للتعبير عن اتفاقك مع شخص هو تكويت المداخله ثم اضافة بعض الوجوه اليها أو علامة Thump up المعروفه :

وتلك الطريقه كما تعلمون طويله ومستهلكه للزمن وقد لاتفي بالغرض المطلوب,,
ده لو ما سألوك سؤال نكير,, ليه لايك وليه ما لايك وعشان شنو ... اكسترا اكسترا ..

عليه أقترح اضافة أيقونة لايك وما لايك الخاصه بالفيس بوك هنا في البورد,,
(مالايك دي من عندي, في الفيسبوك ذاتو مافي )
وذلك أعلي أو أسفل كل موضوع أو كل مداخله, عندها ستتمكن من رؤية: فلان وفلان وفلان لايك يور كوممنت, أو ما لايك يور كوممنت,, وخلاص

ويابكري لو عملتها لينا جمب كل Nick name تكون ماقصرت برضو
عندها سنري بمنتهي الوضوح وبدون لف ودوران: فلان وفلان وفلان لايك ذيس نيك نيم, أو: فلان وفلان وفلان ما لايك ذيس نيك نيم أو ذيس Person زاتو..
خاصة أنه موضوع لايك وما لايك ده هنا مرات مرات بيكون بمعايير شخصيه وليست موضوعيه ,,

الموضوع ده في رأيي مريح وعملي ومختصر للزمن,,
أرجو تزكية الاقتراح للفائده العامه ,,
والا فالفيسبوك يكسب

يعني كمثال أنا ما لايك موضوع أختنا تراجي بتاع ال 75%,
لكن لو دخلت هناك أو في أي موضوع ذي صله, وكتبت الكلام ده,
تاني سته شهور ما بقدر أتحل من الموضوع,,
وعليه يا أبقي من الكاظمين الغيظ ورايي ده أموت بيهو,,
أو أكتبه واخد اجازه سنويه وأتفرغ للردود :)

مش أسهل يكون في أيقونة ما لايك وخلاص عشان الناس الملاوزه أو زمنها فارق زيي تقدر تعبّر ؟

انا ما like الإقتراح

_________________

كيفك أماني

معاويه حسين ياصديق ,,
هي دي بالضبط الأيقونه المطلوبه
بتختصر الزمن وبتكفيك شر القتال
وبتوري صاحب الموضوع كمية الناس اللايك أو ال مالايك موضوعك ببساطه ,,
يعني استفتاء سريع وبسيط,,


مش فكره حلوه

ود البشري ياهندسه,,
كيفنك وحتحوت وأخت حتحوت وأمهم :)

ليه بس؟
البورد ده تقول رايك وتوضح وتشرح فيهو تاني أصلك ما بتتحل,,

بالجد في كترت شبك محرّقه لي روحي,,
لكن مع ايثار السلامه بقيت بعاين بعيوني وذلك أضعف الايمان,,

سهلوا لينا أمر المشاركه عشان ما نتفرج من بره بره

..
.
I Unlike your Suggestion


----------------

This is SODB NOT a Facebook
Sudanese on Line
Discussion Board
..
Thx 4 perceptive

!

عالم عايزة أي حاجة جاهزة:

ممكن نتصرّف كدة:
like




Unlike

أخونا محمد أبو العزائم أبو الريش,,

Quote: عالم عايزة أي حاجة جاهزة

عايزين نشارك عشان الباسوورد مايكون زي قلته
فكرتك حلوه ومستعمله في البورد لكن برضو ما أسرع وأسهل من Like و Unlike
أكيد جربتها في الفيسبوك وشفتها مريحه كيف :)

بالجد الفكره حلوه وعمليه وحاليا اغلب المواقع بتستخدم ادوات واكواد الفيس بوك ..زي الـ like و الـ thanks , وبتدي الضيوف حق المشاركه والاعجاب بالمواضيع وتشجيع الكاتب

Quote: بالجد الفكره حلوه وعمليه وحاليا اغلب المواقع بتستخدم ادوات واكواد الفيس بوك ..زي الـ like و الـ thanks , وبتدي الضيوف حق المشاركه والاعجاب بالمواضيع وتشجيع الكاتب

ياسلام يامعاويه,,
يعني الموضوع من ناحيه تقنيه ممكن ومستخدم كمان؟
الموضوع ده Peaceful جدا علي فكره,,
وبيخلي الناس توضح اتفاقها أو اختلافها بهدوء ورقه
يعني بدون العنف الزائد الحاصل في البورد هنا :)

عموما اي لايك يور لايك لاقتراحي :)

تبلديهم حمد الله علي السلامه,,

Quote: This is SODB NOT a Facebook Sudanese on Line Discussion Board

هسي ياتبلدينا زي معركة ذات المقشاشه
وكلل معارك بورداب الخرطوم الأخيره,,
يرضيك لايك أو مالايك ساكت ما أقدر أقولهم؟ ,,
ومش كانت الأيقونه دي بتسهل لينا الاستفتاء في موضوع جمعه وللا سبت بدل ما نقرأ البوست ونطلع منه ما فاهمين الناس اتفقت علي شنو؟

مافي Discussion ولا حاجه هنا,,
المواضيع بتتشخصن واخرها بكون اساءه ,,
أحسن الزول يكون مطررررف, يعمل لايك ويقوم جاري يكسب زمنه,,
وللا شنو؟



تاني حمد الله علي السلامه :)

..
.
سلام يا أمانينا ..
وبرضو حمدالله على السلامة ليكـ
ان شاء الله بس خليتى مامتى بخير وعافية؛
اها باكـ تو زا اشو ..

Quote: هسي ياتبلدينا زي معركة ذات المقشاشه وكلل معارك بورداب الخرطوم الأخيره,, يرضيك لايك أو مالايك ساكت ما أقدر أقولهم؟

نعمل ليك شنو يعنى لو انت خوافه
وبتحبى تمشى تحت الحيطة .. بطلى الجرسة
وارفعى رأسكـ وتحدثنى عن أرائكـ ,, حتى ولو كان تأييد حمل المقشاشة ,,


---------------

غايتو بتفق معاك فى مواضيع الاستفتاء
( جمعة وسبت )
دى لايك وانلايك .. ماعانا تماام

منورة؛

سلام استاذه/اماني ومشاركوها

Quote: ماعليك الا بالضغط علي أيقونة لايك حتي تشعر بالراحه لمشاركتك فيما تحب أو ما تتفق معه,,

المشاركة بتبقى ناقصة في اغلب الاحيان
بإعتبار ان ال like عايزة حيثيات وكذلك ال un like
ولكن قد تفيد بدلا عن الاقتباس لراي شخص تتفقين معه
في بعض الاحيان ليس هنالك اتفاق كامل مع طرح سيد الخيط
هل هنالك ايقونة لشرح مواقف الاتفاق في جزئية والاختلاف حول الاخرى (اي ايقونة بين بين بلغة عربية فصيحة!)

غايتو عرب الخليج كان قرو بوستيك اكيد كانو حيجبو سيرة الكسل السوداني وكمية بتاعة ليميلات و رسائل ال SMS(وش ضاحك)

Quote: غايتو عرب الخليج كان قرو بوستيك اكيد كانو حيجبو سيرة الكسل السوداني وكمية بتاعة ليميلات و رسائل ال SMS(وش ضاحك)

( وش ميت من الضحك )

هووووي ياهبويه,,
كان انتي كان عرب الخليج الاتنين متسببين ومتلقيين حجج

وما لايك الوش الميت من الضحك بتاعك زاتو

السندا ياصديق المونديال,,

Quote: هل هنالك ايقونة لشرح مواقف الاتفاق في جزئية والاختلاف حول الاخرى (اي ايقونة بين بين بلغة عربية فصيحة!)

دي برضو عجبتني جدا,,
فكره تستحق البحث,,
ماعارفه ترجمه دقيقه لعباره زي مثلا (Partially agree) !!
لكن أكيد بتفي غرض,,

Quote: غايتو عرب الخليج كان قرو بوستيك اكيد كانو حيجبو سيرة الكسل السوداني وكمية بتاعة ليميلات و رسائل ال SMS(وش ضاحك)

هي الفكره ما كسل لكن :)
الفكره زمن محدود, مع ايثار سلامه واصرار علي المشاركه ,,
يعني زول بين بين,
مافاضي ومصر يشارك في البورد, أو ملاوز ومصر يوصل رايه

زي ده مافي ليهو حل؟

امــانى ازيك,,,

شكلك عايزة تقفلى البورد اكتر مما هو مقفول,,,
طيب مثلا,,,,قلنا مثـلا ياجماعة مثـلا ساااى كــدا,,
زى بوست المعــايير المشي 500 صفحـة دا وبوست وليـد الـخير (IP)الماشـى فى نفـس الاتجاه زاتو,,,
الواحــد لو عايز يلايك ,,يلايك ويـن و كــيف ومـتين?
لانو فى حــاجات اسي بتكون لايك وبعد شوية بتبقى ما لايـك...حيتحول البورد كــولو فى زرزة انت مـش قلت لايك?
لا بس انا لما لايكت الويـكة كانت شوية بس اسـى داير اغير رايئ فى ملايكـة قبيل ,,,
ونلف فى موضوع الملايكة نجـى نلقى البورد فرد صفحــة..اهـا الكـتابة لزومها شنو تانى..

Quote: زى بوست المعــايير

الاستاذه/بت الشيخ
مساء الخيرات
هي ست الخيط ذاتها عندها بوست المونديال في كم صفحة وكده
يعنى بمقترحها بتاع لايك وال ان لايك
ما كنا استمتعنا بآراءها الكروية ولا عرفنا بتشجيعها لهولندا في الزمن الضائع
ولا بالكلام والتحليل الحلو بتاع معتصم وحجة الدومة وقمر بوبا
وامين والملك وولده ةالبقية المشاركة في البوست

سلام أماني

اقتراح دمه خفيف لكن أعتقد أنك تقصدي dislike

لان unlike تعني ليس مثل


لك ودي

أها أنا جيت داخل تاني عشان موضوع unlike والا dislike .. لقيت أختنا عفرا سند قامت بالواجب.

لكن يعني أسمحي لي واعذريني وسامحيني، في إني عايز أغير رأيي وأقول (آي لايك يور بروبوزال) .. والسبب ... أميرة الشيخ:

Quote: طيب مثلا,,,,قلنا مثـلا ياجماعة مثـلا ساااى كــدا,, زى بوست المعــايير المشي 500 صفحـة دا وبوست وليـد الـخير (IP)الماشـى فى نفـس الاتجاه زاتو,,, الواحــد لو عايز يلايك ,,يلايك ويـن و كــيف ومـتين? لانو فى حــاجات اسي بتكون لايك وبعد شوية بتبقى ما لايـك...حيتحول البورد كــولو فى زرزة انت مـش قلت لايك? لا بس انا لما لايكت الويـكة كانت شوية بس اسـى داير اغير رايئ فى ملايكـة قبيل ,,, ونلف فى موضوع الملايكة نجـى نلقى البورد فرد صفحــة..اهـا الكـتابة لزومها شنو تان

شوفوا اللياقة بتاعة العالم دي .... خلت الحكاية ويكه عديل كده.

إنتي رايحة ليك مفراكة؟

Quote: شوفوا اللياقة بتاعة العالم دي .... خلت الحكاية ويكه عديل كده. إنتي رايحة ليك مفراكة؟

اوعى اكون العالم دا انا ياابوالريش?
لو طلعت العالم برضو مامشكلة,,,

انت قول رايك فى موضوع الملايكة وبعدين شوف الطعم,,

مـن ناحية رايحـة لى مـفراكة مابكضب رايحة ,,

ياعفراء سلامات,,
وشكرا علي التصحيح ,,
أظنّي الصباح كنت مستعجله, أو ما مركزه ,,

بعتذر عن الخطأ,, :)

Quote: الاستاذه/بت الشيخ مساء الخيرات هي ست الخيط ذاتها عندها بوست المونديال في كم صفحة وكده يعنى بمقترحها بتاع لايك وال ان لايك ما كنا استمتعنا بآراءها الكروية ولا عرفنا بتشجيعها لهولندا في الزمن الضائع ولا بالكلام والتحليل الحلو بتاع معتصم وحجة الدومة وقمر بوبا وامين والملك وولده ةالبقية المشاركة في البوست

بالضبط يالسندة,,وامـانى بلايك دى عايزة تقفل البورد بطبلة وجنزير,,
وتحياتـى

امــانى ,,

سؤال جــاد بمنـاسبة مداخلة اخونـا السندا,,,

لايك دى للبوست وللمداخلة ?

السندا ازيك تاني,,

Quote: هي ست الخيط ذاتها عندها بوست المونديال في كم صفحة وكده يعنى بمقترحها بتاع لايك وال ان لايك ما كنا استمتعنا بآراءها الكروية ولا عرفنا بتشجيعها لهولندا في الزمن الضائع ولا بالكلام والتحليل الحلو بتاع معتصم وحجة الدومة وقمر بوبا وامين والملك وولده ةالبقية المشاركة في البوست

معاك حق,,
بس ما القصد اختصار الناس,,
القصد اتاحة الفرصه للناس المستعجلين وماعايزين يصرفوا عربي كتير زي حالاتي,, انهم يقروا ويعلّقوا (لايك أو مالايك) بسرعه,,
اضافة خاصيه يعني للمنبر,,
أمّا محبي اللياقه علي قول أميره وأبو الريش فديل غير معنيين بالأيقونه حقتنا ,,,


---
محبي اللياقه ديل أنا زاتي مرّات بكون منّهم لمّا يتوفر لي الوقت علي فكره

حُذف للتكرار

يامرمر,,

Quote: بالضبط يالسندة,,وامـانى بلايك دى عايزة تقفل البورد بطبلة وجنزير,, وتحياتـى امــانى ,, سؤال جــاد بمنـاسبة مداخلة اخونـا السندا,,, لايك دى للبوست وللمداخلة ?

هووووي يا أميره,,
هسي سيد البورد يسمع طبله وجنزير دي يقوم ما يعجبه اقتراحي ههههههه
أنا بساعد في اتاحة الفرصه لأكبر عدد من المشاركين بس

لايك دي ممكن تكون للمداخله أو للبوست يامرمر,,


أها بعد الشرح ده حتثني اقتراحي وللا لسه عندك راي

يامرمر مشتاقين :)

Quote: لا بس انا لما لايكت الويـكة كانت شوية بس اسـى داير اغير رايئ فى ملايكـة قبيل ,,, ونلف فى موضوع الملايكة نجـى نلقى البورد فرد صفحــة..اهـا الكـتابة لزومها شنو تانى..

شفتي أهمية الحركه بتاعت لايك دي انها بتورّي الناس المتسقين مع مواقفهم,
من الناس المامتسقين مع ارائهم .. علي قول ناس المعايير ,,
أيي زول يعمل لايك وما لايك في نفس الموضوع يقام عليه الحد الاسفيري فورا لعدم الاتساق
مع العلم انه عدم الاتساق ده عااادي في البورد,, ونكرانه عادي برضو ,,

عليه من مزايا أيقونتنا انها بتوضح الناس العندها اتساق في المعايير , من الناس المعاييرها ضاربه

Quote: عليه أقترح اضافة أيقونة لايك وما لايك الخاصه بالفيس بوك هنا في البورد,,

الأخت أماني
قبل إضافة هذه الأيقونات
أقترح أن يكون من شروط العضوية أو الإستمرارية في هذا الموقع
أن يكون العضو "لايك" عقلياً وذهنياًُ حتى يعي ما يكتب وما يدخل الناس في إستقطابات حادة

LIKE


!

سلامات يا الخضرا
Like