دنجوان من بلد الطيب صالح..

دنجوان من بلد الطيب صالح..
خط الاستواء
عبد الله الشيخ
نحن ـ كشعب سوداني ـ مثل خادم أي (فكي).. مطلوب منا ، بل مجبورون أن نصدق زهد الانقاذ في المناصب، وفي الامتيازات ومطايبها آخذين في الاعتبار تصريحات منسوبي المؤتمر الوطني، هؤلاء الذين يقفون على رأس كل فريسةٍِ ويقولون: ( عباد الله، إن هذه المناصب ماهي إلا تكليف، وليس تشريف)..!
وقد يضيف كبراؤهم، على سبيل التداعى الحر)..! بأن الولاية أمانة، وأنها يوم القيامة خزي وندامة.. وقد يمتد التداعي بالتحرير الفقيه من بطانتهم ليقول لك، و(كأن الأمر لا يعنيه من قريب أو بعيد)..!،، يقول لك نص حديث نبوي (كلكم راع، وكلكم مسئول عن رعيته )..
الحصيف، الذي لم يفقد عقله بعد يرى أنه أمام شخصيتين (جليلتين).. واحدة تعلن تصديها لمهام التكليف دون أن تساءل نفسها (مين كلفك يا حبيب ومين الهداك اليّ)؟؟، والثانية تتعهد بـ (التغليف) لموضوع التكليف..
دعك عن هذا الحصيف،، إن راعي الضأن في المويلح يعرف (كضب الرادي) ، ويعرف أن الأخبار الصحيحة في النشرة هي أخبار الوفيات التي تأتي في نهاية النشرة ..!
بيد أن هناك من هو أرفع درجة من راعي الضأن في فيافي كردفان،، ذاك هو الذي يطور قدراته ليقرأ ما وراء كضب الرادي، ويوقن بعد نشرة أو نشرتين للأخبار، أو بعد أية حملة من حملات تدشين الكباري.. ، أن أهم صفة
من صفات الانقاذي (الجليلة) انه كلما أترع في مباهجها أبدى زهداً،، حتى يظن ـ أو يعتقد ــ قارئ تراث الزهاد وأولي النسك أن أويس القرني ( ذات نفسو) قد أطل علينا من وراء جسر الحلفايا، الذي يربط الحتانة بـ ( الكدرو تحية) ..!
هل بينكم من يتذكر في هذا الوقت العصيب صديقنا (النور الجيلاني)..؟ الذي كان يقول في أيام عنفوان أموال النفط في بلاد الخليج: (قلبى مشغول بصبية)؟؟ سنعود إلى النور الجيلاني بعد قليل، لكن دعونا نتفاكر قليلاً في شئون الانقاذ (على سبيل التبرك) ..!
و.. بعد ما تسمع كلام الزهاد العُباد ترجع، تجي، تلاقي الجماعة في( صمود وتصدي) مستميت،، ومبرر..! يقفون عند كل منشأة، وعلى باب كل مدرسة، وداخل كل بنك، ويحدثونك في كل مكان بأن ما يحدث الآن في السودان، وما قد حدث،، ماهو إلا حماية للأوطان والعباد من غباين دول الاستكبار، ومكائد عملائه في الداخل..!
ويشيرون بيد طرية وندية إلى (الانجازات)،، التي لا ينكرها إلا مكابر..!
ومن يستطيع مكابرة الانقاذ في هذه المرحلة وهي تعلن شرعيتها (بلسان عربي مبين)..!
أين القطط؟؟ ..
أتقصدون المعارضة..؟ المعارضة قد تجتمع وتتدارس الوضع الراهن، وقد تخرج عليكم بـ( حزمة إصلاحية )..! أو بـ (خارطة طريق).. الخ..!
تعرف الحكاية دي كلها،، مكن تلقاها في قصة أخونا النور، الذي يقول ما معناه أن النوم طار من عيونو،، وما إلى ذلك ..! وتلاقي شبيهاً لكل ما قال النور وما ستقوله المعارضة، وما فعلته الانقاذ في قصة دنجوان كرمكول.. وكرمكول طبعاً هي بلد الطيب صالح..
هذا الدنجوان،، سرى عليه لقب ( وجدي) لأنه ما أن يرى بلوزة حايمة إلا وتقفى أثرها .. ،، عاش كما عاش ابن الملوح (قضى عمرو مع الغُنا)، ما قامت حفلة ألا وكان نجمها، ما تحركت سيرة بالباص أو بالبكاسي إلا وكان هو بتاع التنظيم، ومدير المراسم.. تعهد وجدي بمتاتاة أجيال الجميلات جيلاً بعد جيل،.. يعرف مواصفات كل البنات.. ديك شعرا طوال،، وديك تشبه أمها،، وديك اتخرجت من الثانوي، وديك قفلت الفيزياء.. وديك خطبوها، ديك قالت ما بتعرس ود عمها.. الخ ..
كان تخصصه الدقيق هو الإحتفاظ بـ ( سي في ـ سيرة ذاتية ) لكل بنت من بنات حواء في كرمكول، ودبة الفقرا، وحتى حسينارتي..و ... و فجأة أحس وجدي بهدير الزمان..!
ولمكافحة هدير الزمان كان الدنجوان يستهلك مسرة التمر كلها في شراء صبغة الشعر، والجلاليب السكروتة، و،، و ،، ،، يصبغ الشنب، فإذا به يرى بياض صدغيه، يصبغ الصدغين، فيرى اللحية قد تطاولت فيجهذ عليها..! .. الخ .. كانت أجيال الحسان تمضي،، ويقف هو يودعهن، أو يستقبلهن، ويحفظ عن ظهر قلب قصايد من نوع ( قطار الشوق متين ترحل)، و(يا أسيا بابورك في الاراك) .. و(كربكان شالا مع الصباح يا خلايق الله، أنا زولي راح).. و(حبيبنا سافر بقطر حداشر حرام يا ناس..) ! الخ الخ..
إلى ذلك ،، والوليدات يسافروا إلى الخليج، وأمريكا، واستراليا البعيدة، وقرينادا، وزولنا لسه شغال في تخصصه الدقيق: (ديك خطبوها، ديك طلقوها، ديك شعرا طوال..)..! الخ ..
فجأة أحس دنجوان كرمكول بوخز الزمن في خاصرته، وأبدى رغبته في ما يسمى بالبحث عن (بت الحلال)..!
و،، مافي عوجة تب يا وجدي يا دنجوان،، بت الحلال بتلقاها أكان عندك فيها نصيب..
فقط نخشى أن يكون (الاستفتاء) بالنسبة للحكومة والمعارضة ( سوا سوا)..! بمثابة صحن (الفتة) الأخير..!

يا عبدالله ابن امى وابى
شكرا لهذه الكوميديا السوداء

الناس ليه ما بتقرا الحاجات السمحة ؟

شكرا يا سلمى ..
مربط الفرس فى الموضوع هو السؤال هل يتمكن هذا الدنجوان الكرمكولى من الحصول على بت الحلال ( قبل أو بعد الاستفتاء)؟
الله اعلم ..!
كلامك دا بيرفع الروح ( المعدنية) لشخصى الضعيف..انا اوريك الزول اللى بيستحق هذا الكلام ..
كنت دايماً أقول لمحمد لطيف: ( اليوم اللى اكتب فيهو عمود واحد زي عمود مسألة بتاع د. مرتضى الغالى ،،حأمنعك من الدخول علي فى صالة التحرير ما لم أحدد لك موعداً ) ..!
اها ده آخر كلامي .. شنو ليك؟

لكل كاتب نكهته
ولكل كتابة مذاقها
ولكل قارئ ان يحدد من هو الكاتب الذى يعبر الى روحه عبر كلمته
لاشك ان استاذنا وصديقنا معا مرتضى الغالى اكتسب خبرة ان يدهشنا ودائما
لكنك يا صديقى تملك روحا لا يملكها الكثير من ابناء جيلك
تمتلك مقدرة على تطويع الحرف لصالح مشروعك الكتابى
عموما تجدنى من احد المحبين لطريقة كتابتك المدهشة
شنو ليك ؟

وأنا كمان يا سلمى ....
أها شنو ليك؟؟؟؟

وكمان عبد الله ده دفعة.......

عموما تجدنى من احد المحبين لطريقة كتابتك المدهشة

اخى ابن النخيل ..
يا سيدى كلامك دا تاج فوق راسي ..
تقبل تقديرى ومحبتى ..

الاخ قوي ..
شكرا .. انا سعيد بانك تقرأ حروفى المتواضعة ..

لكن ..
25 سنة الواحد مايلقى فرصة يتونس معاك..؟
الزول لو داير يلاقيك يلاقيك يون؟

.

والله يا الله بجيك وبتسألنى كتابة عبدالله دا بطعم الجبنة بى ودلقاى فى ضل الآرتيق

Quote: وما قد حدث،، ماهو إلا حماية للأوطان والعباد من غباين دول الاستكبار، ومكائد عملائه في الداخل..!

يا ود الشيخ اخوي انتو والله ما تستاهلو التأصيل ذاتو
حقو ناس المؤتمر ديل يفكو ليكم الحكاية بلا تأصيل بلا لمة
عشرين سنة ونحاول تأصل الحاجات وبدينا ليكم بالسغير سغير لا من وصلناكم المرحلة دي عايزين تجقلبوأ؟
مش آخر تأصيل كان بتاع علامة النصرV ديك تعملا باصبعين زمان حسع خليناكم تعملوها باصبع واحد دلالة على حرف ال "أ" اي أنتصار
تاني دايرين شنو؟

الكوميديا السوداء ..
يا سلمى .. على اية حال اعتبرينى جاهز لكتابة قصة دنجوان كرمكول كاملة بعد كلامك دا .. بس ورينى انشرها يون..
تشكرات ..

يا ود الشيخ ..
عندنا واحد قريبنا جاء من الخليج .. لموا فيهو جماعة الجيلقة شفطوا قروشو .. جاء يتشكى .. الناس قالوا له آآآزول قروشك دي كم فالقنا بيها ؟ ورينا عددا كم هسه بندفعا ليك ونرتاح من حكاية شالوا قروشى شالوا قروشي ...
قال : لكن الناس دي صبرو لي عشان اعدها واعرف حسابا كم؟..
هسه يا اخوي .. نحن لا خيرونا فى تأصيل ولا فى نفرة .. ولا فى استفتاء ..
نحن عارفين نفسنا كنب فى هذه البلد ..
الزول بالطريقة دي بيسموهو ناسنا ( امبقاية) .. يعنى متفرج ساي ..
والله نحن يا ود الشيخ متفرجين .. كنب .. حاجة زي كده ..
ــــــــــــــــــــ

الاخ ابن النخيل

انت دخلت فى الغريق طالما انك قلت ضل الارتيق..
وكمان بتعرف البنجقلي..
والله عفيت منك ..

يا ود الشيخ ..
عندنا واحد قريبنا جاء من الخليج .. لموا فيهو جماعة الجيلقة شفطوا قروشو .. جاء يتشكى .. الناس قالوا له آآآزول قروشك دي كم فالقنا بيها ؟ ورينا عددا كم هسه بندفعا ليك ونرتاح من حكاية شالوا قروشى شالوا قروشي ...
قال : لكن الناس دي صبرو لي عشان اعدها واعرف حسابا كم؟..
هسه يا اخوي .. نحن لا خيرونا فى تأصيل ولا فى نفرة .. ولا فى استفتاء ..
نحن عارفين نفسنا كنب فى هذه البلد ..
الزول بالطريقة دي بيسموهو ناسنا ( امبقاية) .. يعنى متفرج ساي ..
والله نحن يا ود الشيخ متفرجين .. كنب .. حاجة زي كده ..
ــــــــــــــــــــ

الاخ ابن النخيل

انت دخلت فى الغريق طالما انك قلت ضل الارتيق..
وكمان بتعرف البنجقلي..
والله عفيت منك ..

Quote: دعك عن هذا الحصيف،، إن راعي الضأن في المويلح يعرف (كضب الرادي) ، ويعرف أن الأخبار الصحيحة في النشرة هي أخبار الوفيات التي تأتي في نهاية النشرة ..! بيد أن هناك من هو أرفع درجة من راعي الضأن في فيافي كردفان،، ذاك هو الذي يطور قدراته ليقرأ ما وراء كضب الرادي، ويوقن بعد نشرة أو نشرتين للأخبار، أو بعد أية حملة من حملات تدشين الكباري.. ، أن أهم صفة من صفات الانقاذي (الجليلة) انه كلما أترع في مباهجها أبدى زهداً،، حتى يظن ـ أو يعتقد ــ قارئ تراث الزهاد وأولي النسك أن أويس القرني ( ذات نفسو) قد أطل علينا من وراء جسر الحلفايا، الذي يربط الحتانة بـ ( الكدرو تحية) ..!

الله يديك العافية يا عبد الله الشيخ
ده نوع راقي وهادف جداً من الكتابة الهزلية الجادة
واصل كتابة يا عبد الله فالحال مايل والكتابة هي ترياقنا الوحيد..
تسلم ويسلم كيبوردك وإن شاء الله ما يغشاك هكر...

وإن شاء الله ما يغشاك هكر...



نصر الدين البشير ..
محبتى ..
تخيل عبارة هكر دي حبوباتنا زمان كانوا بيستعملوها بنفس فهم يوم الليلة .. مما يدعونى الى القول بان هذه الكلمة ( الهكر) سودانية .. لكن وصلت الى العولمة كيف ما عارف ..!
دعوتك مستجابة ان شاء الله
ولك منى مثلها واكثر .. صحة وعافية وراحة بال .. ..

وصدقا لكلامك يا عبد الله فى حكاية الهكر دى
حبوبة كانت بتقول لى الولد الما بسمع الكلام
"ها الهكرة دا "
هسى ناسك ديل تحراهن لى ما هن هكر ؟
لكين ديل
هكر يهكر احتلالا