جعلتني اكفر بالانسانية (لا توجد صور)

اليوم وانا ذاهب للعمل رايتها تحمل طفلها وهو مغطي
كان ذلك في شارع الانقاذ قصاد مصنع الببسي .... حيث المواصلات صعبة

تذكرت يوما لم يكن لدي سيارة وانا وزوجتي نحمل طفلتنا المريضة والفي جيبي لو ركبت تكسي او امجاد ما بفضل حق الدكتور والدواء
كنت حينها اقول (مالو لو واحد من اصحاب العربات دي وقف لينا)

فكرت ان اقيف للمراة وطفلتها واخذهم في طريقي لحيث تريد
كنت براي في العربية
حتى الشيطان ما كان معاي
وحتى لو كان معاي
لا كان في mood ولا ................

وقفت ليها بعد ان اشرت لي بصورة خجولة
وبعد ان ركبت قالت لي ان طفلتها مريضة وانها عايزة تشتري علاج بلدي من محل عطارة في شارع الزعيم الازهري قصاد استاد التحرير
ولاني ماشي الخرطوم بكبرى الملك نمر الموضوع ما فرق معاي خاصة وانو مرض الطفلة كان واضح وبتكح بصورة فظيعة

وصلتها لدكان العطارة وبطيبة كل السودانيين اديتها مبلغ بسيط مساعدة في علاج الطفلة
اصلاً انا بؤمن بان الصدقات بتدفع القدر
لكن غلطتي اني مرقت كل القروش الكانت معاي
وبعداك عينك ما تشوف الا النور .. بدا استغلال بصورة غريبة وقدر ما حاولت اتخارج من الورطة دي ما قدرت الا بعد ما خسرت اكثر من ثلاثين جنيه هي كل الكان معاي

وابرئ نفسي من كل شبهة التفكير فيها كأنثي
وابرئ الشيطان من كل شئ في الموضوع دا لاني اصلا وقفت ليها علشان خاطر الطفل المريض
لكن الحال تغير لاني بقيت محاصر بين ان استجيب لمحاولتها استغلالي بصورة حتى الاهبل يشعر بيها او ان اتعامل معها بكل لآمة والرهيفة التنقد
اخترت انا اخسر قروشي واتخارج من الموضوع
لكن

وعلى قول العتالي
" أنكوليب بس"
وتوبة من بنات حواء السودانيات ومحاولة عمل المعروف فيهن
وبطريقة المرحوم الشريف الهندي
الانسانية لو شالها ###### ما بقول ليهو جر

برضك عامل لي فيها تفتيحة

عوض صديق
والله اقتنعت اني اهل عوض ساااااااااااااااااااااااااااااكت

Quote: والله اقتنعت اني اهل عوض ساااااااااااااااااااااااااااااكت

تتخيل انهم مابدقسوا دقستك دى

كااااااك


ياعلى هذا ليس معيارا ان تاتى مستقبلا
من منطقة سكنك وعربتك ليس فيها راكب ملح

Quote: من منطقة سكنك وعربتك ليس فيها راكب ملح

كانوا كمية يا عوض لكن قاطع الله المنطقة الصناعية ... كلهم نزلوا بعد تقاطع ويتا

Quote: كان ذلك في شارع الانقاذ

سيدي علي تحياتي ...اولاً ( وجدناك ولم نحضر لك ) ؟

ثانياً : انت جيت بالشارع الخطا... شارع بهذا الاسم ماذا تتوقع ان تجد فيه ؟؟

الجاتك في الـ30 جنيه سامحتك .. علي كل حال لا تجعل النظرية (القديمة) (الشر يعم)

هي السائدة فالخير موجود ولابد ان يعم ..


.

Quote: محل عطارة في شارع الزعيم الازهري قصاد استاد التحرير

دي الشوارع البتتشرف وبنتشرف معاها باسمائها ... وكمان إستاد (التحرير)

حررت الناس يااسماعيل والكل بقي سيد يااسماعيل .. انت انت اعرف امشي بالشوراع الصاح

قلت لي الهندي قال شنو؟؟ قبل الاقتباس طبعاً ...

انا بقول ليك الان نفس كلام الشريف .. قياساً على الحاضر

والله لو خطفها (جريو) ما بنقول ليهو اي حاجة ؟؟


.

سلامات يا عمي علي
الجاتك في مالك سامحتك... عشان تأمنوا
تحياتي للشباب كلهم وكلهن.

الأخ على
كيف حالك وأحوالك !
معليش يا عمنا وربنا يخلف عليك
وزى ما قالوا الجاتك فى مالك سامحتك !

الاخوة
جمال الصادق و
كباسي النور
ابودية

انتو ما سمعتو بحاجة اسمها (sudan call) طيب ما تعملوا (Ali call)
عموماً

Quote: لجاتك فى مالك سامحتك

ما بناباها لكين الفيكم اتعرفت

سيدي حمال

Quote: ثانياً : انت جيت بالشارع الخطا... شارع بهذا الاسم ماذا تتوقع ان تجد فيه ؟؟

يا اخوي اليومين ديل في حركة بتاعت رجيع ضباط المعاشات للخدمة علشان خلينا نمشي جنب الحيط يمكن الله يكرمنا ونبقي لواءات
ـــــــــــــــــــــــــــــــــ
بالمناسبة ما تكلم لينا سيدي الميرغني يرجعنا ... على الاقل علشان خاطر الاسم وكدا

يا ابو علوه

تحايا حاره


تاني بالله

proceed as flight plan without unschedule stops and make sure to maintain IFR

يعني ما تعاين زاتو


-------------

مشتاقين ياخ

ابراهومة
الشوق مطر والله احسن حاجة عملتها المرة دي خليتنا نلقاك
ــــــــــــــــــــــــ
وين اراضيك جوة البلد ولا برة

الاخ الاصيل علي

وذلك لن يدفعك لتترك اصحاب الحاجة بعيداً عن ظل عربتك

في الإطار العريض هي الحاجة قاتلها الله وهو الفقر وقالوا

الحاجة ام الاقتراع تخيل لاازال اتعاطف معها بكل صدق واتعاطف

مع الدوافع القضية اكبر من احتيال والسؤال ما الذي دفع بسيدة

تحمل طفلة وفق حديثك تكح ومريضة الى ذلك ؟؟؟ هو ما بعد ذلك وليس

أدنى قناعة لدي بأن الغاية تبرر الوسيلة لكن مثلث الفقر المرض الجهل

اطاح بتلك السيدة في ان تتصيد يد امتدت لها بالخير عوضك على الله وتأكد

أنك الكاسب الاكبر يخدر ضراعك وخيرها في غيرها وعوض الله كبير وكتير .



* الله يجازي اللي كان السبب (((((( الإنقاذ ملعونة صباح مساء )))))))).


تقديري .


..................................................................حجر.

تابعت رواية عن الموضوع وتوسمت فيك الخير فمن كان له فضل ظهر فاليجد به على من لا ظهر له كما قال الحبيب المصطفى صلى الله عليه وسلم فانت قمت بالفضل على اكمل وجه لكن عندما وصلت القصة لموضوع المزايدات حتى فقدت 30 جنية صدمت لما حصل لك فانت نيتك سليمة وكنت تنوى فعل الخير بل وفعلته لكن كل من سمع روايتك أو وصلت اليه من شخص آخر فلن يفكر فى يوم من الايام ان يحمل عابر طريق سواء كان رجل او طفل او شخض كبير فى السن وسيتحجج انه يخاف ان يحصل له كما حصل لك وبالتالى ستختفى المروءة بين الناس ؟؟؟؟؟؟؟؟؟ أستمع لهذه القصة
روئ ان اعرابى كان يسير فى الصحراء فوجد شخص ماشى ارهقه التعب من طول المشوار ومن لهيب الشمس الحارقة وكان الاعرابى يركب جملا ويقود آخر فوقف له واركبه على الجمل الاخر ولم يكن يدرك ان الشخص لصا وبعد فترة غافلة اللص وهرب بالجمل فلما تيقن انه لص صاح فيه قال توقف توقف ....
استمع الى : قد تركت لك الجمل لكن رجاء لا تخبر احد بما فعلت حتى لا تموت المروءة بين الناس .
وفى رواية اخرى

يـُحكى أنه كان هنالك رجل يركب فرسه مجتازًا به الصحراء في جوّ يحرق الأخضر واليابس.

وهو في هذا الطريق الموحش لاحَ له رجلٌ يسير على قدميه،يبدو عليه الإرهاق،فاقترب منه ودعاه للركوب

ونزل كي يساعد هذا الرجل المتعب للصعود على ظهر الفرس،فما أن استوى الرجل الغريب على الفرس،

حتى أسرع بالفرس تاركًا صاحبها وراءه،فلحقه الرجل.ففر الغريبُ هاربًا بعد أن سرق الفرس،

وبعد عناءٍ كبير دعا الرجلُ الكريمُ السارقَ الخائنَ أخيرًا ليقول له:

"إن وصلتَ إلى الناس فلا تعلنْ أمام أحد أنك فعلتَ بي هذا؛

حتى لا تموتَ المروءة..في الصحراء"

كان حرصهم على عدم ضياع الأخلاق بين الناس أحب إليهم من ضياع أموالهم

يالله كم تبدلت كثير من القيم والمبادئ بيننا وبينهم !

لو كان هذا الرجل رجلا من أهل زماننا لتحدث بما حصل له وإن أُعيد له الفَرَس فما الحال لو لم يرجع الفَرَس ؟!

"أولئك أجدادي فجئني بمثلهم"

كم يحز في النفس أن تجتمع كل أسباب المروءة وتغيب هي.
لاتدعوا المروءة تختفى بين الشعب السودانى الطيب المضياف وان كانت الاوضاع الاقتصادية الصعبة والفقر قد عملت فيه ما قد عملت وجزاكم الله كل خير .....

رجاء لا تخبر احد بما فعلت حتى لا تموت المروءة بين الناس