عيب يا رمضان يا ود أحمد السيد

من كم يوم كنت ماشي بعربيتي في شارع الروضة وفجأة شفت لي واحد بيوقف في الليموزينات . قلت يا جماعة الزول ده انا شكلو ما غريب علي واتذكرت انو ده رمضان احمد السيد الصحفي الهلالي المعروف والذي لم يسبق أن التقيت به . ومن باب النخوة السودانية لا أكثر ولا اقل لفيت على الزول ووقفت سيارتي وهو في اللحظة ديك كان بيخت في الشنط في التاكسي . أول حاجة اول ما شافني وقفت السيارة حسيت انو استغرب واندهش . نزلت من السيارة وسلمت عليه وسلم على وهو لا زال غارق في الاستغراب . وسألته أنت فلان قال نعم . فرحبت به وهنأته بافتتاح قناته الجديدة ( قناة قوووون ) . وعرضت عليه ان اوصله الى اي مكان كمساعدة وخدمة فقط لا أريد منها جزاءاً ولا شكوراً ولكنه أعلمني بتوجس انه ذاهب إلى المطار . ولم يكلف نفسه عناء أن يشكرني أو يتعرف علي وإنما سالني من اسمي فقط وركب في التاكسي وانطلق بالرغم من أنني والحمد لله لست في حاجة لمعرفته 0

وبعد ما مشيت البيت قعدت احلل وأفكر يا جماعة الدنيا الحصل فيها شنو . لكن قلت يا ربي الزول ده يمكن شاف سيارتي حمراء عشان كدي ما قدر يركز ( للمعلومية أنا ما بشجع إلا اسبانيا وبس )

وعيب يا رمضان يا ود احمد السيد ... خذلتني

الأخ/قمرالأنبياء عبدالحي
السلام عليكم ورحمة الله وبركاته

تشكر على تلك الروح التي إبتدرت بها حديثك
ثم أظنك تتفق معي أن السفر له حيثيات ومتاعب تخرج النفس عن حدود الطبع المعتاد
وكما قال المصطفى صلى الله عليه وسلم (السفر قطعة من نار)
فمهما تطورت وسائل السفر فلازال قطعة من نار،
ثم أن الرجل بما يتحمله من مهام جسام في صحيفة قون وحداثة تجربة القناة الفضائية
كل تلك الأعباء تلقي بظلالها على الرجل ، وما أظن أن الأستاذ رمضان - بما نعرفه عنه من طيب معشر وحلو
سجايا - هو من تخونه الفطرة السليمة ويبادل شعورك النبيل بغير مايستحق وقد أثبت له ذلك

Quote: إنما سالني من اسمي فقط وركب في التاكسي وانطلق

ولم يبق إلا أن نجد له العذر فيما تبقى لأن الرجل على سفر، فالسفر له أحكامه المعلومة.

الاخ قمر الانبياء
سلام وتحية

اولاً الشكر والتقدير لموقفك ورغبتك بمساعدة الاخ الاستاذ رمضان وأي سوداني
فهذا من اخلاق أهل السودان


ورمضان أحمد السيد (واحد من قلائل ) في المجتمع الصحفي والمجتمع الرياضي
الذي يعرف الاصول ويقدر كل صنيع أخلاقي ... وهو أخو أخوان حقيقي
وبصراحة فانني طوال معرفتي به (حوالي 12 سنة) لم اسمع أو أشهد له (تصرف غير لائق)

وأعتقد أنه كان في مقدوره أن يطلب أياً من أصدقائه ومعارفه وقراءه لتوفير سيارة تقله الي المطار ولكنه بالتأكيد لا يريد أن يكلف أحداً شيئاً ... وربما آثر المغادرة الي المطار عبر سيارات الاجرة مراعاة لعدم ازعاج أحد ..
ولا أريد أن أبحث له عن المبررات لهذا التصرف الذي (لا يشبهه) بالتأكيد ... ولكن قد يكون عنصر الوقت والوصول الي المطار في الموعد المناسب سبباً في التسرع والانشغال حتي عن (كلمة شكر)



أخي قمر الانبياء
ان كان الاخ الاستاذ رمضان قد (اغضبك) فلا تأخذ في خاطرك منه
وحـــقك علينا نحن أحــــباب رمضان

تصرفه يشبه كتابته بالضبط....ما داير اقول ليك انت شليق لكن تاني ما تعمل كده مع المشاهير السودانيين كلهم بضايقو علي عكس خلق الله في جميع بقاع الدنيا

سلام أخى قمر الأنبياء,,
مررت بهذا البوست دغشا بدرى قرأت وتعجبت,,

Quote: ولم يكلف نفسه عناء أن يشكرني أو يتعرف علي وإنما سالني من اسمي فقط وركب في التاكسي وانطلق بالرغم من أنني والحمد لله لست في حاجة لمعرفته 0

أعلم يقينا أنك لست فى حاجة للشكر ولست فى حاجة لأن تعرفه,,
وأنك لم تود سوى خدمة أخ فى الطريق ,,
فقط إحسانا للظن بك..
ولكن من الخطأ أن نحكم على الناس بهذه السهولة..
ودون معرفة لظروفهم نقرر أنهم متعالون ومتكبرون
ولا يشكرون الله ولا الناس,,,

مكانك لما جعلت منه موضوعا معنونا بالعيب تأكيدا لعدم إنتظارك أو حاجتك لكمة الشكر أو معرفته,,

تحياتى,,

تحياتي ..

وإنت مالقيت غير رمضان ده تخدمو وتمد ليهو يدكـ وكمان تسلم عليهو.؟!!

انصحكـ امشي غسل ايدكـ بكلوروكس..ولو ركب في عربيتكـ كنت حأقوليكـ بيعها أو ارميها البحر..

بلا رمضان بلا خمجان بلى يبلاهو..

يا ربي الفاتح البوست دا كان يعرف أن النوعية دي بتاعت ناس (عطيــه) دا بتجي تكتب كلام زي دا ..؟

Quote: تحياتي .. وإنت مالقيت غير رمضان ده تخدمو وتمد ليهو يدكـ وكمان تسلم عليهو.؟!! انصحكـ امشي غسل ايدكـ بكلوروكس..ولو ركب في عربيتكـ كنت حأقوليكـ بيعها أو ارميها البحر.. بلا رمضان بلا خمجان بلى يبلاهو..

غايتو زي ما قاليك أيمن .. لو في مكانك ما بجي اكتب كلام زي دا في مكان زي دا ..
لكن عجبني السيناريو بتاع إنو سيارتك حمــراء دا ..

انا ما عارف لكن مرات كدا بيجيني إحساس أنو عطية المحسي دا .. والزول أبو حروف كبيرة داك الاتنين تيمان .. ونفس فصيلة الــدم

Quote: يا ربي الفاتح البوست دا كان يعرف أن النوعية دي بتاعت ناس (عطيــه) دا بتجي تكتب كلام زي دا ..؟

علاء الدين ..والله المفروض يعرف حااااجه واااحده بس..

انو اي زول من شاكلة رمضان ده ..مايهبب ليهو ولايعبرو..

ــــــــ

مش ياهو رمضان اللي طلع في قووون بتاعتو دي ..وقال ان المريخ تصدر الدورة الاولى بأقدام الاندية الأخرى ولم يتفوق على الهلال بأقدام لاعبيه..!!؟

الأخ الأحمر / عطية

السلام لله رب العالمين والمودة لك

وربنا يحفظك ويحفظ رمضان ويحفظ بكري وكل أعضاء المنتدى ويحفظنا من البلاء

الأخ / أبو عبيدة

أشكرك على المرور والمداخلة ، وانا والله مقدر لظروف السفر التي اعيشها بصفة دائمة ، وانا لم أكتب هذا الموضوع تشفياً أو تقليلاً من قدر الأخ رمضان ، ولكن طرحته للنقاش بصفة عامة من باب ( ما جزاء الاحسان الا الاحسان )

الأخ / عبود

لك كل الود والمحبة للكلام الزين . وانا والله لم افكر في القيام بذلك الا لانه واجب وفرض بغض النظر عن الشخصية والمكانة ولا حاجة للاعتذار فنحن اخوة ، وخالص التحيا لك وللأخ رمضان

الأخ / نيازي

يبدو انك اخذت الموضوع من جانب ( هلاريخ ) وانا بعيد كل البعد عن ذلك واذا كان في ذلك شلاقه فمرحى 0

الأخ/ أيمن

أشكرك على الرد ، وأنا لم ألمح حتى الى التعالى والكبر وعدم الشكر لله وللناس ، وكل ما في الأمر انني توقعت أن يكون أفضل مما كان

لكم جميعاً كل المحبة والود

الاخ عطية المحسي
سلام وتحية

كل مشكلتك مع الاخ الاستاذ رمضان في النقطة دي ؟؟

Quote: مش ياهو رمضان اللي طلع في قووون بتاعتو دي ..وقال ان المريخ تصدر الدورة الاولى بأقدام الاندية الأخرى ولم يتفوق على الهلال بأقدام لاعبيه..!!؟

ياخ صاحب البوست لم يتحدث عن ميول رمضان الكروية ولا عن هلال مريخ
ونحن لم نتداخل لأنو رمضان هلالابي رغم أننا وهو نتشرف بذلك

البوست يتحدث عن (أسف) صاحبه لما بدر (عفوا) من الاستاذ رمضان
وهو في مداخلات لاحقة تفهم احتمالات المسألة والأسباب المتوقعة لهذا التصرف غير المقصود

وانت تحمل المسألة كلها (لزعلك) من تحليل رياضي لرمضان
رغم اننا نتفق معه وقد قال الحقيقة ... فان المريخ تصدر الدورة الاولي باقدام اندية اخري فازت علي الهلال بينما فشل هو في التفوق علي سيد البلد باقدام لاعبيه بدليل ثنائية مهند الطاهر وكاريكا

عملك ده كويس والله وربنا بيكون اداك فيه حسنات ..
طيب ياخ زول رفض انك توصلوا وسالك من اسمك وسافر ..
اها المشكلة وين ؟؟
يا زول اصنع المعروف وان كان في غير اهله فلا يضيع معروف حيث وضع ..
ولا تبحث عن الشكر الا من الله ...
رمضان علم وما عندنا فيه كلام بس حديثك عنه بصراحة ما عجبني ..

تحياتي يا رجل وطول بالك ..