Post: #1
Title: لغة سودانيز اونلاين
Author: Nazik Eltayeb
Date: 07-12-2010, 07:48 PM
Parent: #0
كثيرا ما كنت اراقب اطفال العائلة عندما يتجمعون في مناسبة عائلية و احدهم يهتف (هيا بنا) وهو ينادي رفاقه بدلا عن( يلا ياخ )
او ( ارحكاكم ياخ) او( ياخ ما ت يلا )وغيرها من العبارات التي كانت شلتنا الصغيرة سنا الكبيرة عددا من فتيات وفتيان في الزمن الصغير تستخدمها، انظر لوجه الطفل فأجد ان كل مظاهر الجدية قد بانت على ملامحه مشددا علي تفيذ امر (الهيا بنا )فاغير وجهي نحو مستمعيه الصغار فاجدهم قد بدأوا يتحركون كالجنود الي حيث امرهم .
وما لبثت ان وجدت ان لهم لغة غير لغتنا كلها مأخوذة من المحقق كونان وغيره من الشخصيات الكرتونية العجيبة فكلمات مثل سيارة ولون احمر تنطق بحروف مفخمة ، فبدلا عن ان تقول احداهن
( الشريط الاحمر حقي راح) بترقيق سوداني اصيل لكلمة احمر اصبحت تقول( ياماما شريطي الاحمر ضاع) بتفخيم لحروف كلمة احمر ينتفخ له وجهها.
هذا التغير في اللغة وسرعة التأثر بالشاشة البلورية ظنته سمتهم وليس سمتي الي ان جاء يوم وجدت فيه اني مثلهم لكني تأثرت بلغة اخري ومن شاشة الحاسوب الصفراء الخاصة بصفحة سودانيز اونلاين.
فذات يوم وانا في العمل مع زميلتي ونحن منخرطون في مناقشة عمل طويلة اذا بي اهتف بها (عليك الله اديني النجيضة). فتتلفت في انحاء الغرفة فلا تجد ثمة شئ يشوى او يشتوى قبل ان تجد ان النقاش قد قفل .فامتعضت وغاصت الي مكان لم انظره.
وسرعان ما وصل لمكتبي عدد من خطابات تقاريرالعمل التي تطلب امورا تم ادائها من قبل كنت اسميها (خطابات اعادة اختراع العجلة) اذ ان رئيسي المباشر ما ان يأتيه امر من رئيسه الأعلى حتى يطلب منا ما كان قد طلبه قبل اسبوع او شهر بعد ان كنا قد نفذناه كما طلب، وذلك دون ان يكلف نفسه البحث في ملفاته ليجد ردودنا السابقة فيرد على رئيسه . ويظل يستعجلنا بخطاب تلو خطاب وانا اضع كل خطاب من خطابات (اعادة اختراع العجلة في الدرج) وانا اقول بصوت يسمعه من في الغرفة (النشوف اخرتا).
ثم ما يلبث ان يحين اجتماع مع رئيسي المباشر ورئيسه فيمسك رئيسي المباشر بزمام الاجتماع وهو يعلن عدم تعاوني وارفع يدي وانا اقول بحزم (نعم لن نتعاون ،لن نرد على خطابات مكررة سبق ان رددنا عليها ولن نكتب اي تقرير اكثر من مرة).
وبعد نهاية الاجتماع تنفرد بي زميلتي قائلة (لكن ما بالغت يا نازك!!! لماذا ترفضين كتابة التقارير و بهذه الصورة الحادة؟ ) فأرد عليها نعم ارفض و( الرهيفة التنقد) فتتراجع تحت وقع عبارتي .
و سرعان ما اعود للمكتب و يتحلق حولي زملائي ومن هم تحت امرتي وهم يعلنون دعمهم الكامل لي بحماس (اها الحصل شنو في موضوع اعادة كتابة خطابات التقارير؟ اوعى تكوني وافقت؟) فارد عليهم هيييع دا منو دا البوافق .....هييييع.
و سرعان ما نعود لاجتماع اخر فنحن ما ان ننتهي من اجتماع حتى نبدأ الاجتماع الذي يليه كعادة قادتي الذين يحبون الاجتماعات وفي هذه المرة الوذ بالصمت و زميل لي يبدأ في طرح رأيه وافكاره التي احس بانها تتوافق معي ولو كنت نطقت ما قلت اكثر من ما قال وانا امني النفس ان يقتنع المجتمعون بافكاره التي هي افكاري فلا البث ان اهتف( اب ،اب، اب) فيلتفت مقرر الاجتماع الي وقد عجز عن تبيان همهمتي وهو يقول قلتي شنو؟ وانا اقول لا ما قلت حاجة بس قصدي اني متفقة مع الزميل وعايزاه يستمر في الصفحة الاولى .
|
Post: #2
Title: Re: لغة سودانيز اونلاين
Author: اساسي
Date: 07-12-2010, 09:26 PM
Parent: #1
اعتقد ان الصحيح هو تأثرك بلغة مداخلات وبوستات الاخ محمد ود الصايم وليس لغة البورد جميعها
والا فاين عبارة (الوغد) الغائبة في وصف رئيسك في العمل
|
Post: #3
Title: Re: لغة سودانيز اونلاين
Author: Tabaldina
Date: 07-12-2010, 09:36 PM
Parent: #2
..
.
Quote: عتقد ان الصحيح هو تأثرك بلغة مداخلات وبوستات الاخ محمد ود الصايم وليس لغة البورد جميعها
والا فاين عبارة (الوغد) الغائبة في وصف رئيسك في العمل |
اساسي = ملاسي
--------------
انت دخلت ضمن شلة ساخر سبيل *
|
Post: #4
Title: Re: لغة سودانيز اونلاين
Author: اساسي
Date: 07-12-2010, 09:40 PM
Parent: #3
يا تبلدينا انت ما متابع ولا شنو اخر الالقاب المنبرية التي حظي بها اخوك كانت ( مخلب ملاسي في البورد وفي رواية غير نزيهة - مرسال ملاسي)
|
Post: #6
Title: Re: لغة سودانيز اونلاين
Author: Ashraf el-Halabi
Date: 07-12-2010, 10:05 PM
Parent: #4
سلامات نازك
لما أكون برسل في مداخلات وأجي أرد على إيميل وصل أثناء الكتابة أشعر انو إمكانيات الكتابة في الإيميل فقيرة
لا آيكون الاقتباس ولا الوش الأخضر
الواحد يحس انو مكتف مكتف
|
Post: #5
Title: Re: لغة سودانيز اونلاين
Author: اشرف السر
Date: 07-12-2010, 09:46 PM
Parent: #2
نازك
سلام
فعلا هذا التأثر موجود في اللغة خارج الاسافير..
فقد وجدتني يوما،، اتحدث مع مجموعة من الناس لا علاقة لهم بسودانيز أون لاين في موضوع نقاش عام.. وطرحت رأيي الخاص وفي النهاية قلت لهم
" المهم - على قول طبارك".. وهم لا يدرون ما المقصود بتبارك..
....
وتاني رغم أني لا علاقة لي بلهجة الشوايقة،، لقيت بعض مفردات طارق جبريل تتسلل الى حواراتي اليومية
من شاكلة " ضمة،، ضمة" واستخدتم كلمة "على" في التشبيه مثل القول: الحاجة دي لونا على التيبار القديم" واستحدام ألفاظ الحبوبات عموما
|
Post: #7
Title: Re: لغة سودانيز اونلاين
Author: MOHAMMED ELSHEIKH
Date: 07-12-2010, 10:19 PM
Parent: #5
بالمناسبة أختنا هبة همزة زوجة عضو المنبر عبد الرازق الطيب اشتكت انو عبد الرازق اليومين ديل شغال لينا:
ا"لنجيضة"
"وقومو لفو"
|
Post: #8
Title: Re: لغة سودانيز اونلاين
Author: Nazik Eltayeb
Date: 07-13-2010, 08:29 AM
Parent: #7
اساسي شرفني مرورك
Quote: اعتقد ان الصحيح هو تأثرك بلغة مداخلات وبوستات الاخ محمد ود الصايم وليس لغة البورد جميعها
والا فاين عبارة (الوغد) الغائبة في وصف رئيسك في العمل |
اعتقد انني في الطريق لاستخدام كلمة الوغد
|
Post: #9
Title: Re: لغة سودانيز اونلاين
Author: Nazik Eltayeb
Date: 07-13-2010, 08:31 AM
Parent: #8
تبلدينا سعيدة بمرورك
وانشاء الله صافية لبن
|
Post: #10
Title: Re: لغة سودانيز اونلاين
Author: Nazik Eltayeb
Date: 07-13-2010, 08:33 AM
Parent: #9
اشرف العزيز
خايفة بعد شوية الناس البتكتب ليهم ايميلات يخشو كورسات لغة عشان يفهموك او علي الاقل يستخدموا القوقل ترانسليتر لفك شفرة رسائلك
|
Post: #11
Title: Re: لغة سودانيز اونلاين
Author: Nazik Eltayeb
Date: 07-13-2010, 08:36 AM
Parent: #10
اشرف السر
تحياتي
انت تطورت في سلم الارتقاء اللغوي السودانيزاونلايني
بعد دا الا تسوق ليك مترجم بس لازم يكون بوردابي
|
Post: #13
Title: Re: لغة سودانيز اونلاين
Author: Nazik Eltayeb
Date: 07-13-2010, 08:43 AM
Parent: #11
محمد الشيخ
تحياتي
ان تقدم الدليل على ان تأثرنا بلغة سودانيز اونلاين لا نحس به نحن فقط ولكن من هم حولنا
|
Post: #12
Title: Re: لغة سودانيز اونلاين
Author: الطيب رحمه قريمان
Date: 07-13-2010, 08:42 AM
Parent: #9
الاستاذة نازك
لك التحية و التقدير
نعم , نتأثر سلبا أو ايجابا بما حولنا من مفردات و افكار و طربقة التعبير
و ننتقل من مستى الى آخر على حسب درجة وعينا و ادراكنا بالمتغير فينا من سلوك
مل نقرأه او نسمعه يؤثر فى كتابتنا و او كلامنا باعتبار ان الاخيرتين تتأثران
سلبا او ايجابابالمهارتين المذكورتين آنفا...
فى حياتى لم أحاول الكتابة باللهجية الدراجية او السودانية او غيرهما
و لم اطلع او لقرأ نصا كتب بالدراجية الا بعد ان جئت الى هذا المنبر ...
| Quote: (لكن ما بالغت يا نازك!!! لماذا ترفضين كتابة التقارير و بهذه الصورة الحادة؟ ) |
و بالغتى يا نازك مرة اخرى باختيارك هذا الفونت العجبيب
" عيونى وجعتنى"
|
Post: #14
Title: Re: لغة سودانيز اونلاين
Author: Nazik Eltayeb
Date: 07-13-2010, 08:50 AM
Parent: #12
العزيز الطيب رحمة
شكرا علي المرور
واعتقد انك تقدم الدليل القوي على شدة تأثرنا الواضح في تحولك للكتابة باللغة الدارجة مما يعني انها اصبحت ذات قوة تعبيرية لم تجدها في اللغة الفصحى التي كنت تستخدمها
كنت مثلك لا استخدم الا الفصحى فوجدت انني اميل اكثر للتعبير بالدراجة بعد انضمامي لسودانيز اونلاين
وٍاعترف بحقيقة في احيان كثيرة وجدت دارجة سودانيز اونلاين اكثر تعبيرا و اشد اثرا
واعتقد ان هذا ربما يعود لعددية عضوية المنبر وتباين خلفياتهم العلمية والثقافية والسنية
لن تجد مكان اخر تتخاطب فيه مع كل هذا التنوع الا هنا
الممتع في الامر اننا جميعا نفهم بعضنا بلا صعوبة
----------
الخط كدا كيف؟
|
Post: #15
Title: Re: لغة سودانيز اونلاين
Author: محمد عبد الماجد الصايم
Date: 07-13-2010, 08:56 AM
Parent: #14
أيوا كـدا يا عمتكـ
أديهم النجيضة طوالي
وختيها ليهم في حنانم!
|
Post: #19
Title: Re: لغة سودانيز اونلاين
Author: محمد كابيلا
Date: 07-13-2010, 09:07 AM
Parent: #15
صاحبة البوست ..
تحيـــاتى ..
Quote: أديهم النجيضة طوالي
وختيها ليهم في حنانم!
|
لا للتحريض ..
ودالصايم بالطريقة دى حــ نطلع
مظاهرة ضـــدك ..!! هههه
|
Post: #16
Title: Re: لغة سودانيز اونلاين
Author: الطيب رحمه قريمان
Date: 07-13-2010, 09:01 AM
Parent: #14
الاستاذة نازك
لك التحية و التقدير
كده تمام التمام
_________________________________
شايف النجيضة بهنا .... !!!!
|
Post: #17
Title: Re: لغة سودانيز اونلاين
Author: Nazik Eltayeb
Date: 07-13-2010, 09:05 AM
Parent: #16
ود الصايم (سيبويه المنبر) بهنا
تمت الناقصة
والله ما خايفة الا من لغتك المؤثرة تبقى لغتي وانفصل عن الواقع الحقيقي واعيش في الواقع المنبري(على وزن الافتراضى)
الله يديك العافية ويخليك لينا
|
Post: #18
Title: Re: لغة سودانيز اونلاين
Author: محمد عبد الماجد الصايم
Date: 07-13-2010, 09:07 AM
Parent: #17
سيبويه عديل كـدا!
ياخ قولي قدادبيه المنبر!
|
Post: #20
Title: Re: لغة سودانيز اونلاين
Author: Nazik Eltayeb
Date: 07-13-2010, 09:10 AM
Parent: #18
| Quote: ياخ قولي قدادبيه المنبر! |
اها( قدادبيه ) دي كلمة جديدة
ما قلنا ليكم
|
Post: #21
Title: Re: لغة سودانيز اونلاين
Author: منصوري
Date: 07-13-2010, 09:13 AM
Parent: #16
نازك
نعم نتأثر.. كبورداب(من عاشر قوماً اربعين يوما صار مثلهم)
ولذلك دائماً تجديني أحث الناس للقمم وللترفع عن الصغائر.. والكتابة الدثمة.. والنفع قبل الضرر والسمو بمقاصد الكتابة الى الدرج الأعلى...لا بأس من المزاح الهادف أحياناً، حتى لانصير حصة إنشاء..هنا
أخوك
صديق منصوري
|
Post: #22
Title: Re: لغة سودانيز اونلاين
Author: MOHAMMED ELSHEIKH
Date: 07-13-2010, 09:17 AM
Parent: #21
Quote: نعم نتأثر.. كبورداب(من عاشر قوماً اربعين يوما صار مثلهم)
ولذلك دائماً تجديني أحث الناس للقمم وللترفع عن الصغائر.. والكتابة الدثمة.. والنفع قبل الضرر والسمو بمقاصد الكتابة الى الدرج الأعلى...لا بأس من المزاح الهادف أحياناً، حتى لانصير حصة إنشاء..هنا |
هسع يا منصوري دي ما حصة نحو عديييييل كدى
وممكن تسأل قدادبويه الفوق دااااكـ
|
Post: #23
Title: Re: لغة سودانيز اونلاين
Author: Nazik Eltayeb
Date: 07-13-2010, 09:26 AM
Parent: #22
العزيز صديق منصوري
اتفق معك ان الكتابة مسئولية
-------------
محمد الشيخ
شايفاك اعتمدت اللقب الجديد بتاع ود الصايم
|
Post: #24
Title: Re: لغة سودانيز اونلاين
Author: صلاح أبودية
Date: 07-13-2010, 09:30 AM
Parent: #23
نازك
تحياتى ..
بوست لذيذ والله وغير !!
بس أوعى من التمادى فى لغتنا المكوجنة !!
وأحذرى الكااااكات !
|
Post: #25
Title: Re: لغة سودانيز اونلاين
Author: محمد عبد الماجد الصايم
Date: 07-13-2010, 09:33 AM
Parent: #22
ود الشيخ .. والله قدادبويه المنبر ضرستو
ياخ الواحد جاتو حموضة عديل!
منصوري يا عمكـ .. نو هارد فيلنقس!
|
Post: #26
Title: Re: لغة سودانيز اونلاين
Author: Nazik Eltayeb
Date: 07-13-2010, 09:53 AM
Parent: #25
العزيز صلاح ابو دية
تحياتي
| Quote: بس أوعى من التمادى فى لغتنا المكوجنة !! |
الله يستر اصلوا الحكاية دي لا شعورية
|
Post: #27
Title: Re: لغة سودانيز اونلاين
Author: Nazik Eltayeb
Date: 07-13-2010, 10:02 AM
Parent: #26
محمد كابيلا
تحياتي
انت ماسمعت بالمثل البقول (المحرش ما بكاتل)
التعديل لاضافة حرف التاء لكلة انت
شكلو الكيبورد عايز تغيير
|
Post: #28
Title: Re: لغة سودانيز اونلاين
Author: الطيب شيقوق
Date: 07-13-2010, 11:37 AM
Parent: #27
هيييييييع نازك المسنووحة عافي منك دنيا واخرة انهريهم كدا ومحل رهيفة تنقد
|
Post: #29
Title: Re: لغة سودانيز اونلاين
Author: الطيب رحمه قريمان
Date: 07-13-2010, 11:48 AM
Parent: #28
قلنا نتاوق انشوف زعيم المسانيح ده قال شنو... !
| Quote: هيييييييع نازك المسنووحة عافي منك دنيا واخرة انهريهم كدا ومحل رهيفة تنقد |
ازيك يا سمى
|
Post: #30
Title: Re: لغة سودانيز اونلاين
Author: Nazik Eltayeb
Date: 07-13-2010, 11:49 AM
Parent: #28
ود شيقوق المسنوح
كان ماجيت كنت قلت انا الماجيت ولا هو الفنان قال شنو؟
اساسي قال انا اتاثرت بلغة ود الصايم لكنو نسى يقول انا bilingual
(ود الصايم وود شيقوق)
|
Post: #32
Title: Re: لغة سودانيز اونلاين
Author: Nazik Eltayeb
Date: 07-13-2010, 12:01 PM
Parent: #30
يا سلا م يا عمر الحاج
سرد ممتع وانشاء الله نتابع معاك حكاوي منتصف النهار
Quote: كانت شغله الشاغل ليلا ونهار يتقمصها روحا وبورضا يتابع صفحة اخبارها ومقالاتها يحلم بها يتمني اول الصفحة او اعلي البورض يهيم بها في النقاشات الجانبية يرخي نظارته اثناء الحديث مجادلا والله الموضوع ده جابوه في النت (عندنا) يعني صحيح ميه المية، إدخلها في حياته أخرجها الي حييز الوجود في الونسة والحكي العام (والله معانا زول في المنبر من ناس كسلا) وناس الخليج برضو بعرف كم واحد فيهم وناس امريكا و,,وو..
حملها في لياليه ذات الحكي اللماع يبتدر بها الحديث وكانت تتدفق اثناء النشوة موضوعا موضوعا ومداخلة تلو الاخري ...
إنعكست في زوقه العام اضحي يكثر من الاصفر الفاتح والازرق (البولض) ويختار الاقمصة ذات الاكمام الطويلة والايقونات المزركشة ، يصيبه الهكر بالكابة وإنسداد النفس والصدمة ، تفرحه الارشفة عندما تتناقل بموضوعاته ومداخلاته من (ربع الي ربع) ، يتسكع بمكتابتها بحرية تامة. دخلت (هي) غرفة نومه حتي ضلف دولابه (ابو 3 ضلف) كانت علي شاكلة (رد ، ملف ؛ عدل) وذات مرة كتب معلقا علي الشخبته التي بجدار بيتهم مثل (احب نوال، والهلال سيد البلد ، وعلي الحرامي ) الشخبتات و الآراء المنشورة في الحائط بأسماء أصحابها أو بأسماء مستعارة لا تمثل بالضرورة الرأي الرسمي لصاحب المنزل بل تمثل وجهة نظر كاتبها. إمتلك من اجلها كاميرا (واقع في الخلق تصوير) اصبح مرصدا للظواهر والحوداث والاحداث فلم تسلم منه كديسة علي (بتاع الدكان ) ام ضنبا مقطوع ولا ركوبة عبدو المكوجي التي وقعة بفعل الخريف والركشات وسوق الخضارو الحافلات والطريق العام والخاص وكلو موثق وبالصور.
تعجبه (لمة) البورضاب يساسق مع الحبان ما بين (حليوة و قندهار) و( توتي وشارع المطار) ثم الجبل وماادراك ما الاولياء
ونواصل
تفاصيل هذا الرجل السودانيزي قبل ان تحل به اللعنة |
حكاوي منتصف النهار ... لعنة سودانيز اون لاين ..
التعديل لاضافة الرابط
|
Post: #33
Title: Re: لغة سودانيز اونلاين
Author: Nazik Eltayeb
Date: 07-14-2010, 07:56 AM
Parent: #32
خوفاً من الخور
الخور) ايضا كلمة اصبحت اصطلاح سودانيزاونلايني
|
Post: #34
Title: Re: لغة سودانيز اونلاين
Author: اشرف السر
Date: 07-14-2010, 05:27 PM
Parent: #33
عدت الى البوست هذه المرة لأبشر..
ابشر ساي بس
|
Post: #35
Title: Re: لغة سودانيز اونلاين
Author: Nazik Eltayeb
Date: 07-14-2010, 09:41 PM
Parent: #34
عارف يا اشرف مرات بتخيل لي من كثرة مافاض المنبر بالمبشرين بالمسيحية والاسلام والعرس والمبشرين ساي...( زيك كدا) انو المنبر حيبقي اسمو مبشرين اونلاين
|
Post: #36
Title: Re: لغة سودانيز اونلاين
Author: خدر
Date: 07-14-2010, 09:44 PM
Parent: #35
بوست جميل و ذكي اي نازك
و طريقة حكي اجمل
|
Post: #37
Title: Re: لغة سودانيز اونلاين
Author: Nazik Eltayeb
Date: 07-14-2010, 10:03 PM
Parent: #36
طارق يا فنان
شكرا على الاطراء
وما دام الدرب جابك... الاغنية الاخيرة سر حزني بتاعة ثنائي العاصمة عصلجت معاي و ماقدرت اسمعها او اجد الرابط...يدك معانا
سِر حُزني]
|
Post: #38
Title: Re: لغة سودانيز اونلاين
Author: عبدالعزيز الفاضلابى
Date: 07-14-2010, 10:31 PM
Parent: #37
نازك ,,
سلامات
كان واحدة ولا واحدة اصروا على موقف لم يعجبك قولى ليها/ليهو:
الأعوج راى والعديل راى.
مصطلحات ود الصايم دى سمعت تحت تحت حايدخلوها دار الوثائق على رف المصنفات الفنية الشعبية.
|
Post: #39
Title: Re: لغة سودانيز اونلاين
Author: cantona_1
Date: 07-14-2010, 10:52 PM
Parent: #38
يا الفاضلابي بقولوا العوج راي والعديل راي مش الأعوج وأظنك عارف الفرق.
يا نازك يا بتي، المثل بقول: (سيد الزبدة كان قال أشووها ... أشويها)
ما تعاكسي الرئيس ما عليك إلا تطلعى التقرير القديم من الكمبيوتر وتغيري التاريخ وتسلميه لرئيسك المباشر ويا دار ما دخلك شر.
أيقن أنك شابة ولذلك لم تقرئي ما كتبه الهالك موشي ديان وزير دفاع وخارجية إسرائيل في ستينيات وسبعينيات القرن الماضي، عندما سألوه كيف هزمتم العرب في حرب 67 بنفس خطة حرب 56 وهي خطة منشورة في عديد من الكتب. رد الهالك قائلا: (نحن متأكدين أن العرب لا يقرأون) وما فضل ليهو إلا يقول وكان قرأوا ما بفهموا.
طلب أخير عليك الله يا بتي أكتبي بالخط الكبير عشان نحن شوفنا بقى فسِل والعتبى على تقدم السن.
|
Post: #40
Title: Re: لغة سودانيز اونلاين
Author: Nazik Eltayeb
Date: 07-15-2010, 07:12 PM
Parent: #39
الاخ العزيز/ عبدالعزيز الفاضلابى
العوج رأي والعديل راي لكن مرات كثيرة اصحاب الرأي الاول هم الاعلى صوتا ومابدو معاهم زول فرصة.
ود الصائم بعد يومين حتلقاهو ماشي على ناس حقوق الملكية الفكرية مشرعاً في تسجيل المصلحات خاصته وكل ما نستعمل مصطلح حيقولينا
ادفعوا
هسي هو ساكت و بشجع فينا مستنينا نصل مرحلة الادمان و بعدها كل مصطلح بثمنه
|
Post: #41
Title: Re: لغة سودانيز اونلاين
Author: Nazik Eltayeb
Date: 07-15-2010, 07:23 PM
Parent: #40
العزيز
cantona_1
سعيدة بمرورك وكلام موشي دايان قريتو اصلوا اختك في حته القراية عن اليهود دي ما بتقصر كان اشكناز ولا سفرديم
وكان على العرب هم في الغويم عند اليهود اقلهم مع انهم اولاد عم ....العرب لابقروا ولا بخلوا زول يقرا
شوف عدد الكتب المنشورة في اسرائيل و المنشورة في كل بلاد العرب اوطاني
قالوا نحن في السودان فى زمنكم(مع انو الصورة ما بتقول انك من الزمن داك) قالوا القاهرة تكتب و بيروت تطبع و الخرطوم تقرأ
|
Post: #42
Title: Re: لغة سودانيز اونلاين
Author: الطيب شيقوق
Date: 07-15-2010, 08:09 PM
Parent: #41
نازك
اول بالتبادي اطردي قريمان من هنا خااااااااااالص مشى امريكا ولكنتو اتغيرت خاااااااالص
| Quote: كان ماجيت كنت قلت انا الماجيت ولا هو الفنان قال شنو؟ |
دي بيعرفها محمد عثمان او خليل اوناذر خليفة المسنوح
Quote: اساسي قال انا اتاثرت بلغة ود الصايم لكنو نسى يقول انا bilingual
(ود الصايم وود شيقوق) |
هههههههههههههههههههههههههههههها وحاة الله انت مسنوحة نامن غلط
|
Post: #43
Title: Re: لغة سودانيز اونلاين
Author: Nazik Eltayeb
Date: 07-15-2010, 10:18 PM
Parent: #42
الاخ الطيب قريمان
المسنوح ودشيقوق قال يطردوك من هنا.
ملحوظة1:
(ناقل الكفر ليس بكافر)
ملحوظة2:
اي كلام داخل البوست دا على مسئولية قائله
|
Post: #44
Title: Re: لغة سودانيز اونلاين
Author: Nazik Eltayeb
Date: 07-16-2010, 08:24 PM
Parent: #43
رفع البوست خوفا من الخور
|
Post: #45
Title: Re: لغة سودانيز اونلاين
Author: الطيب شيقوق
Date: 07-16-2010, 08:46 PM
Parent: #44
نازك
| Quote: اي كلام داخل البوست دا على مسئولية قائله |
آآآآآآآآآآآآآآي ما تخافي يا بتي
|
Post: #46
Title: Re: لغة سودانيز اونلاين
Author: Nazik Eltayeb
Date: 07-16-2010, 10:00 PM
Parent: #45
| Quote: آآآآآآآآآآآآآآي ما تخافي يا بتي |
هييييييع...... دي منو البتخاف (مع الاحتفاظ بحق الملكبة الفكرية للمسنوح ودشيقوق)
|
Post: #47
Title: Re: لغة سودانيز اونلاين
Author: emad altaib
Date: 07-16-2010, 10:10 PM
Parent: #46
ــــ
سلام يا نازك ,
كلامك سليم إنتقال اللغة من الشاشة البلورية للواقع , وطبعاً بالتأكيد الموضوع ده مرحل بمراحل كثيرة
وكلها معقدة من الحفظ في الذاكرة إلي الإستدعاء منها عند الطلب ,
فقد لحظت لنفسي في كثير من المواقف العادية تخرج كلمة (أدين وأشجب)
وعندما يحمي النقاش في موضوع مع بعض الأصحاب في الواقع تتفلت كلمة يجب علينا أن (كتب بيان) شديد اللهجة.
وهكذا دواليك ...
إحترامي وتقديري لك ...
|
Post: #48
Title: Re: لغة سودانيز اونلاين
Author: محمد عبد الماجد الصايم
Date: 07-17-2010, 07:55 AM
Parent: #47
شايفكـ ظهرتيها عاملة مع عمكـ كونتا دا!
عيونا ياخ .. صغّري الخت شوية باللاي!
|
Post: #49
Title: Re: لغة سودانيز اونلاين
Author: الطيب رحمه قريمان
Date: 07-17-2010, 08:52 AM
Parent: #48
الاستاذة نازك
لك التحية و التقدير
Quote:
الاخ الطيب قريمان
المسنوح ودشيقوق قال يطردوك من هنا. |
تعرفى يا نازك الزول الاسمو الطيب زولا مسنوح بجد...
علا أنا عندى سوعال :
ات يا شيخ المسانيح و كت خواف ما تبقى بعيد ...
"الخواف ربى عياله"
بافى لك يا نازك الطيب ده بجده ... ؟؟؟
|
Post: #50
Title: Re: لغة سودانيز اونلاين
Author: Nazik Eltayeb
Date: 07-17-2010, 03:19 PM
Parent: #49
العزيز عماد الطيب *
هذا التأثر كما قلت حقيقي وعلى حسب علمي ان الانترنت غيرت كثيرا في السلوك بل ان علم النفس نفسه اصبح يهتم بتاثير استخدام الانترنت
التاثر الطفيف باي نمط من التواصل عملية مفهومة لكن قد يصبح الامر خارج عن السيطرة ان تقمصتنا حياة الانترنت وتجمعاتها و ما ظاهرة الفيس بوك منا ببعيد
هل لاحظن كيف تتغير حياتنا ونقبل ما لم نكن راه مقبولا انظر في كل مناسبة عيد الي كمية الرسائل التي ترسلها للاهل و الاصدقاء مستبدلا بها التواصل المباشر
والسؤال يصبح هل يمكن استخدام لغة التواصل الغير مباشر في الاتصال المباشر وهل نحن في مرحلة انتقالية نحو انقراض التواصل التقليدي الذي تعتبر اللغة اداته المباشرة
-------------------------
الحكابة شنو؟؟؟؟ نازك الطيب، الطيب شيقوق، الطيب رحمة، عماد الطيب
انتو في زول قال ليكم انو البوست دا اسمو طيباب اونلاين
---------------
|
Post: #51
Title: Re: لغة سودانيز اونلاين
Author: Nazik Eltayeb
Date: 07-17-2010, 03:23 PM
Parent: #50
Quote: شايفكـ ظهرتيها عاملة مع عمكـ كونتا دا!
عيونا ياخ .. صغّري الخت شوية باللاي! |
ود الصايم ماجننتنا
نكتب صغار تقولوا عجزنا وما شايفين
نكتب كبار تقولوا انتو قايلننا مجانيين
ادونا النجيضة نكبر الخط ولا نصغروا
|
Post: #52
Title: Re: لغة سودانيز اونلاين
Author: Nazik Eltayeb
Date: 07-17-2010, 03:34 PM
Parent: #51
الطيب رحمة انت ما فاهم المسنوح ود شيقوق قاصد شنو بطردك
خليني النوريك
قال ليك انت من بورداب امريكا يعني بزحزح فيك شوية شوية من المنبر وصدقني ما انت المقصود
المقصود بكري ابوبكر عشان سودانيزاونلاين حقتوا وعايش في امريكا
وودشيقوق بفكر في توريق سودانيزاونلاين عندهم في البورصة وماعندو غير طريقة( اياك اعنى فاسمعي ياجارة)
بعد دا تفتكر الخواف يكون منوووووو؟؟؟؟؟؟
|
Post: #53
Title: Re: لغة سودانيز اونلاين
Author: الصادق ضرار
Date: 07-17-2010, 10:25 PM
Parent: #52
الاخت نازك
الامر تجاوز اللغة الى السلوك و العمل المباشر . في كثير من المرات اتعامل ببرود اعصاب كغير العادة و عدم التعجل .. في احيان اخرى استخدم تكتيك الايقاع بالعدو او جره و الانقضاض عليه .. الكلمة و غطايتها كما جرت العادة ان نقولها , اصبحت سمة في مجمل ردودي للدرجة التي اصبحتُ فيها لا ابحث عن ( الكلام ) .. احياناً ابتسم في حضور الجالسين لنكتة او درش في البوست فاستدرك امري .. و الكثير الكثير من المواقف الطريفة و المحرجة . كل ذلك لا اقول بفضل و لكن اقول بسبب سودانيزاونلاين .
|
Post: #54
Title: Re: لغة سودانيز اونلاين
Author: Nazik Eltayeb
Date: 07-18-2010, 09:31 PM
الاخ العزيز الصادق ضرار
| Quote: في كثير من المرات اتعامل ببرود اعصاب كغير العادة و عدم التعجل .. في احيان اخرى استخدم تكتيك الايقاع بالعدو او جره و الانقضاض عليه .. |
ما جمل ان تثبت ان هناك جوانب ايجابية نكتسبها من التواصل الاسفيري
| Quote: احياناً ابتسم في حضور الجالسين لنكتة او درش في البوست فاستدرك امري .. و الكثير الكثير من المواقف الطريفة و المحرجة . |
دي الخايفين منها زاتا........... يا يقولوا مجنون يا اتعقدوا
لك التحايا
|
Post: #55
Title: Re: لغة سودانيز اونلاين
Author: emad altaib
Date: 07-18-2010, 10:04 PM
Parent: #50
ــــ
| Quote: والسؤال يصبح هل يمكن استخدام لغة التواصل الغير مباشر في الاتصال المباشر وهل نحن في مرحلة انتقالية نحو انقراض التواصل التقليدي الذي تعتبر اللغة اداته المباشرة. |
سلام وتحية..
سؤال رائع أستاذة نازك الطيب.
وبعد قرآت السؤال كم مرة سألت نفسي يا ربي (الفواتح) التي حدثت في غيابي هل تلزمني أن أذهب لكل شخص فقد عزيز لديه؟ بالرغم من التواصل في لحظة الحدث عبر الهاتف في الكثير منها, وتولد سؤال أخر هل سوف (يعتمدونها) و(تكفيني) التعزية بالهاتف تلك؟
أعتقد في الحالة دي لسع الناس متمسكة بالمثل السوداني (( البكاء لي حولو بيجيب زولو )) وأنا زاتي سوف أتمسك بالمثل ((بعد ما في الكراع تبقي في الوجه)) وأصل كل الناس في الفرح والحزن, إذن المسألة يتقلب عليها الطابع الشخصي ودرجة الحساسية ومع ذلك المجتمع الذي تعيشه فيه نفسه.
وأعتقد بمرور الزمن والأجيال سوف يتلاشي شيئا شيئاهذا التواصل التقليدي.
ــ
بالنسبة للطيب وكدا ما معروف إمكن تطلعي أختنا ونحن ما عارفين باقي عندنا أهل رايحين من زمان
هههههه
|
|