Post: #1
Title: رحـــال مع اللـيل والـشراع ... الي ... الـكل مع تقديري
Author: محمد الفاتح خالد حسون
Date: 07-07-2010, 05:55 PM
ما كنتا قايل بشتهيك
و بكتر علي الشوق واجيك
من غير متاع
سايقات مسار خطوي النجوم
رحال مع الليل والشراع
حيلي ما هداو مشيك
بَـحي صـوتي عليك بنادي
يالعـيونـك هن مـدائني وهن بـلادي
.........
لا قصر عمر المسافة
و لا بعيد لاحت ضفافها
..........
ولو تصدقي رغم
دوران المواسم و الفصول
ما انكسر حلم الوصول
و لا حصل جواي لمحتك
مارقة من باب الدخول
عَودتي قلبي علي الرزاز
يا غيمة حردانة الهطول
ما بلل الطل الحراز
و لا اتبدل احساسي الخجول
ما كنتا فاكر رغم بعدك والجفاف
أشـواقي تتمَدد تَتطول
رغم الفــراق
والافـتراق
يجـرفني لــيل الاشتياق
واحساسي يطفح بالحنـين
وفي خواطري تمر حكاية
ضايعة في زحام السنين
ولو غلب يوم احتياجك
وجيتني شايل الياسمين
حقو تحسب في مشاعرك
ولو باقي في الاعمـاق دَفـين
السبب ممكن يكون دمع اشتياق
بلل خدود انسان حزين
اتلفي بي توب الزراق
ما كتل فيهو الامل زمن الفراق
ولا انطفي اللهب المقلف قلبو
بي لون الحراق
ولا سَكت الشك باليـقين
ما صدفة هي
ما صدفة أرجع و اشتهي
و كل المدن
كل الدروب
متفرقين
القاها عندك تنتهي
وانا يا طشاش نجمي البعيد
أتقل علي من شيل خطاي في سكتك
حرف القصيد
في الرجعة غالبني المشي
تلقاني دائما بيك و فيك
تلقاني شـوفتك مشتـهي
حيلي ما هداو مشيك
أنا حاجة فيك بتشبهك
و جه الشبه
رغم الغرابة
لما جيتك وقلبي للدنيا انتبه
وفتحتا ليك اعماقي شارع
سلمتو ليك قلبي البحسك
نبضو قبالي و بسارع
واحتويتك بارتعاشة
ذي مصدق وما مصدق يا فراشة
في وردة ركت
يا رزاز غيم العطاشة
يا كنار جواي غرد
للحدايق ولي دعاشها
انحنا لما نشوف عيونك
عيونا بتفارق الطشاشة
تاني نسرح
وتاني نمرح
والزمن يغمرنا فرحة
ومن فرحنا تسيل دموعنا
يا دموع الغربة مرحي
والدنيا تصبح لينا تاني
كراس نشخبت فيو ونمحا
الخريف الغيمو شايل
بـين ملايــين السنابل
جــاي قاصـد ليهو قمــحة
وشان اقابلك
ريــدي اولو واخرو لمــحة
وبيني بينك مافي حايل
رغم عنك حــاجة فيك
اصلي قبال ما اشوفك
كنتا بحلم بيك قبايل
وما كنتا قايل بشتــهيك
ويكتر علي الشوق واجيك
من غير متـاع
ســـايقات مسار خطوي النجوم
رحــال مع اللـيل والشــراع
حــيلي ما هداو مــــشيك
......
يوم عرفتـك
وشي للغيمة انطرح
ما عرفتــك شــان اخـاصمك
شان اساومك بالفرح
قبال اجيك وشي ابتسم
قدري ما حـاول يعانك بي حنانك اتصدم
لا اهدي اعماقو البعاد
ولا هرد احساسو السام
أنا من زمان يا ريد رجييتك
يوم تجيني من العدم
وابدا من باتاء الاماني
والدنيا تصبح ليا تاني
دنيا سمحة
كراس نشخبت فيو ونمحا
من فرحنا نشيل ونسقي
بالدموع السايلة قَمحــة
|
Post: #2
Title: Re: رحـــال مع اللـيل والـشراع ... الي ... الـكل مع تقديري
Author: منتصرمحمد زكى
Date: 07-07-2010, 06:06 PM
Parent: #1
جميل رزاز الحروف الذي نثرته هنا
كلنا نهفوا الى دنيا سمحة ولو عبر الخيال ........ شكرا محمد الفاتح
|
Post: #3
Title: Re: رحـــال مع اللـيل والـشراع ... الي ... الـكل مع تقديري
Author: محمد الفاتح خالد حسون
Date: 07-07-2010, 11:39 PM
Parent: #2
تشكر الاخ منتصر محمد زكي
| Quote: كلنا نهفوا الى دنيا سمحة ولو عبر الخيال |
والي كراس نـشخبط فيو ونمحا.. حاجات كتيرة ونهفـــو
شكراَعلي المرور والتوقيـت
محمد الفاتح خالد
|
Post: #4
Title: Re: رحـــال مع اللـيل والـشراع ... الي ... الـكل مع تقديري
Author: محمد الفاتح خالد حسون
Date: 07-08-2010, 03:48 AM
Parent: #3
انـادي عليكي واتأوه ...
وأعبـر بالخطاوي مِســاك
شــراع ريدك بعـيد لَوح ....
واقولــك بي ضمير مرتاح
زمنا الجاي ما رَوح ...
نبض احساسو ما اتكَـــلف
ولا بالجبن اتشوه
زمن ناصع
ابيض من ضمير الطفل
وكَعـك العيد ...
واطعم من دموع الريد
وضحكة محلياكي شديد ...
اقرب لي اندمال الجرح
ولمــسك يا وطـن بالايد ...
اعمق من صـلات الدم
واطول من مسافة الطلقة و التهديد ...
اكبر من الحاصل
اعمق من الفاصل
وقَــدح العشرة حارسو مع الدعاء التنهيد .....
|
|