مواعيـد ســـودانيـة - الجنوب والإستفتاء مثالاً

نتلاقى السـاعـة عشـرة فى المحطـة الوسطى، لو ما جيتك لحد حداشـر... إتناشـر ممكن تمشى.

هـذا هو القاسـم المشترك بين الحكومة والمعارضـة.. نايمين ستـة سنوات، فجأة لما الإستفتاء
فضل ليه 5 شهـور صحوا وعاوزين يعملوا وحدة جاذبة.. موش برامج الوحدة الجاذبة مفروض تتنفذ
قبل الإستفتاء.. خلاص يا جماعـة باللاى إيدكم معانا.. والمعارضـة تقترح دساتير جديدة (تخيل)،
والحكومة تعلن (نفرة الوحدة)!! وواحدين يدعوا لتأجيل الإستفتاء.. وشنو يعنى لو أخروه سنـة
تاني... طايرة هى؟!!

- الو يا رئيس التحرير
- أهلا معاى منو؟... يا جماعـة دقيقة دا وزير البتاع
- عملتو شنو، مالاقى أى إشـارة فى عدد امبارح عن نفرة الوحدة الجاذبـة؟
- لكن ما سعادتك قلت جاى عشـان نجتمع...
- أاى والله لكن ما قدرت (!!!)
خلاص أقول ليك حاجـة.. ياخى مافى داعى أكتبو أى حاجـة نادى حسن أصلو هو كتاب بارع وأكيد
حينمق مقالات جيـدة.. المهم إتصرفوا يا جماعـة ما تخذلونـا
- لكن سعادتك.. توجـه الدولة نحو موضوع الإستفتاء والمشـاريع تفاصيلو ما عندنا..
- ياخى وهو قالوا ليك فى توجـه. ارح ياخ شـوف الأولاد الكتابين يساعدوك، وركزوا على عبارات زى
خيار الدولة الاول هو الوحدة، وسوف نبذل النفيس والغالى (النفيس دى ضرورية جداً) من أجل وحدة
تراب الوطن الذي نفديه.. يللا إتلحلحوا ما ممكن نمليكم كل كلمـة.