سكان القصر العالي..قصيدة.. ود بادي

دكتور ودبادي..جامعة الخرطوم..منتصف الثمانينات


ياسكان القصر العالي.. سلام
يا سادات البرج العاجي.. سلام
يا ناسات البلد الغادي.. سلام
تبقي مصيبة ان كانت سنة اتعدمت بين الناس
تبقي مصيبة ان كان القرش الأحمر قسم الخلق أجناس أجناس
يا ما لين الكاس من دم الخلق الشربت عرق الفاس
يا الشرف البدري انداس...والبلد الظالم شالكم فوق الراس
أنواركم طعنت كبد السحب البكايات
وقار الليل سالباه كهارب الهجعة الضوايات
قايمين الليل..الكاس مليان..الجوف مليان..واللحم الطازج راقد بالعينات..
غفيركم نوم نجم القبلة..أبراسا قوي وجنبو كلابو الهوايات..

يا سادات البزخ البازخ..يا بعض كروش مليانة فساد..
يا نجس الأرض المدعية..
يا نسل الأمم المدعيات..
ماعون الويسكي الأحمر..علب البيرة السايدر..حتي قزازة البلدي..
البلدي النازف من شريان المشرق..مصو الخبث الراكض فيهو سما يعشرق..
ونحنا أدونا الفاضي هدية....
يقعد في شمش الله تلاتة أيام بتطهر منو السية..

نسلخ منو الدمغة الوصفت عينتو ، والكمية..

وتمش أم أحمد تغسل بطنو وضهرو ما لازماها وصية..
بعضا ينفع لو نشالا للبير أم تسعة رجال..
تقدل بيو بنية سمحة,,ومعاشا هلال..تسقي بو حلال وزلال..
والفاضي الكان مليان أحزان وأطرافو تسيل..
اتحول لكوب معقود فوق قلة تنقع، وراقدة سبيل..
سبيل مسروف..مكتوف بلحاية تحت سيالة رامية ضليل,,
للماشي والغاشي ..الرايح والغادي..الراحل ونوخ دابو..ودلة الشيل..
الطير الطاير فوق بلداتنا..وناوي رحيل..
الولد السادر فوق مشهاد البرق ..الشايل ودربو طويل..
عموم الناس..الفرع الصايبو يباس..كلاب الحر..بنات الريل بتشيل..بتبل الريق..
ها ناس..الموية نواحي السافل موية نيييل..
.
.

يا سكان القصر العالي سلام..
يا سادات البرج العاجي سلام..
آناسات البلد الغادي سلام..
أدوني سلام..إن جيتكم تاني ملام..
والله كان عارفني تمام..
قدامي وما شايفكم..وساعة أشوفكم ..أشوف قدامي أقزام..
أما سوافل..تبنو عوالي تناطح الغيم الراحل تالا السافل..
دور فوق دور..حدائق سور..وتلاتة مداخل..
باب مقرون في باب..مفتوح في باب..دهليز ومجاهل..
والقرش الأحمر بينكم صايل..تارك وفاعل..
اللقمة الطوسة اتحقت بالإيجار..

الريش يتقصقص تحتك بالإيجار..
وحرير يتماوج فوقك بالإيجار.
لكن الموووت.. الموت إن جاكم طرفة عين..بتأجرو مين..
إن كان الموت بالأجرة يفوت..بتأجرو زول علشانكم يموت..
لكن الموت مرسال..جبار وعنيد..
أعذار الناس..أعمار الناس..عظمة الناس في إيد.. والموت في إيد..
أرقدو عوافي..نومو عوافي..فوق الفوق لا حر.. لا سموم..لا سوافي..
الليد الطايلة تجيب المافي..
خزاين الأرض ونعيم الدنيا الزايل .. كلو معاكم وما كفاكم..
حتي القرش إن فاتكم للبيستاهلو..تزعلو ليش ما جاكم..
يا الملك النازل فجراوي..وشايل أرزاق الخلق الرقدو رقاد..
إنتو تختفو اللقمة الحفت من جنحين الملك الرفت..وسيدها يموت بالفاق..
العين إن زاغت..شن بيملاها غير مولاها..وبيتا رملو دقاق..
يا سكان القصر العالي..وداع
يا سادات البرج العاجي..وداع
آ ناسات البلد الغادي ..وداع

نتلاقي يوم أنداد..
ونصفي حسابنا الصاع بالصاع..