مذكرات ضب سابق ... :)

الجامعة وأيام الجامعة ..

أجمل أيّام :)

كتيرين كتبوا عن ذكرياتهم في الجامعة، لغاية ما بقي في منبر كامل لناس هندسة!

لكن لاحظت إنّو تقريباً مافي ضب كتب مذكراته لغاية الآن

طبعاً أخوكم زمان كان متهم إنّو ضب وكده، قبل الإعتزال D:

عشان كده قلت لازم أشرككم معاي في الذكريات دي

شلّة ثماني السطوح

شلتنا العزيزة ...

وفي مقولة أخري، شلّة الضُبّبة D:

كانت الشلّة تتكون من العبد لله (لاحقاً عرفت إنّو لقبي في الدفعة كان نيوتن)، أشرف (أينشتاين)، حاتم ص، حاتم ن، رامي، شرف، طارق، وأحمد الريّح (ياهو أحمد الريح بتاع سودانيز أونلاين ده ذاتو) p:

قبل نهاية السنة الأولي، أحمد رجع لشلته الأصلية قبل الجامعة؛ وقبل نهاية السنة التانية، فرض إختلاف التخصص علي طارق الإنفصال عن الشلّة

لكن الستّة الباقين إستمرّوا زي ما هم لغاية التخرج :)

أصل الإسم يرجع لسنة أولي جامعة. لمّا عرفنا في محاضرة كيمياء إنّو في تركيب جزيئي إسمو ثماني السطوح! ونحن كنّا ثمانية! D:

مقترح الإسم كان أحمد الريّح علي ما أذكر

علي كل حال ..

سمينا شلتنا ثماني السطوح من باب السخريّة ليس إلا :)

د. خالد عثمان أشهر ضب

و من السكان المعروفين (للمكتبة) في هندسة الخرطوم !!!

لا حول الله

أحكي يا إبني أحكي

خلاص السنين عدت

إعترف

سلام يا حاتم

ياخ حرام عليك! قال من السكان المعروفين للمكتبة قال D:

كلها أوّل سنتين وعقلت بعدها!

أيّام الextension

بعد ما نقلوا المكتبة ولغوا الextension ، خلاص :'(

الأخ خالد:

ياسلااااااااااام,

طبعا في الأول لاوزت ..
خفتها تكون مذكرات ضب جد جد من الأنا بخاف منهم,

لكن بالجد سبقتني علي الفكره,
كنت حأكتب نقه كتيره عن الموضوع ده في بوست قيقراوي بتاع الأحزاب العاطفيه,
لأني برضو خمسه سنين في الجامعه كنت ضب كبير هههههههه ..

دي أهم اعترافات في الربع الجاي,

البوست ده معاك نص بالنص .. اتفقنا؟

سلام يا أماني،

بالله إنتي برضو كنتي ... D:

حلوة حكاية ضب جد جد دي :)

ما عندك أي مشكلة .. فيفتي فيفتي

يلا أحكي :)

بالجد كانت شلّة ما بتتعوّض

عارفين النكتة الشهيرة بتاعة التمساح الكان بيسطل جنب البحر، وكل مرة يطلع ياخد نفس ويسيب السيجارة في القيف ويرجع؟ ياها ذاتها، النكتة الفيها قرد شفط باقي السيجارة، ولمّا التمساح طلع وسألو عنها قال ليهو: سيجارة شنو؟ إنت ضب مجنون ولا شنو؟ D:

بقينا نقول للبيشطح مننا في حاجة إنت ضب مجنون ولا شنو! :)

تركيبة الشلّة كانت فريدة

أشرف مثلاً، كان شهادة عربيّة ومن المتفوّقين في السعودية. لحد هنا ومافي حاجة مميزة. لكن أشرف كان داخل الجامعة وفي بالو إنّو يغيّر نظرة الناس لأصحاب الشهادة العربيّة، وإنهم لمّا يجو السودان ما بيقدروا يحافظوا علي مستواهم

وقد كان

أشرف كان - ما شاء الله - دايماً من أوائل الدفعة، وفي النهاية تخرج ب first class :)

خالد عثمان إعترف اخير ليييييييك

الضبضبة دي جارية في دمك

بعد ما قفلوا الإكستنشن

كنتا بتضبضب وين ؟

ما تخليني أفتوا

أنا عاصرتا فترتك في الجامعة

يمكن إنتا ما بتعرفني

لأني كنتا أنا من رجرجة الناس

ودهمائهم من سكان البنشات

وشجر هندسة قبل ما يقصوهوا الجماعة

لكن إنتا كأول دفعتك

كنتا مشهور بالضبضبة

و لن أزيدك

حاتم ص كان أكتر واحد مسؤول فينا، بحكم إغتراب والده وقتها

برضو كان الوحيد فينا الكانت تحت يده عربيّة بصورة دايمة، فكان بيوصلنا في أغلب الأحيان

الغريبة بداية معرفتي بيهو كانت بتوصيلة وصّلني ليها من الجامعة .. قبل ما يبقي واحد من أعزّ أصدقائي :)

حاتم ياخ إستهدي بالله ما تبوّظ سمعتنا p:

تعرف، واحد من أسباب كتابتي للذكريات الجميلة دي إنّي أمسح الصورة دي

يعني المتهم بالضبضبة ما بالضرورة يكون ساكن في المكتبات. ممكن جدّاً يكون مستمتع بوقته وعايش حياتو في الجامعة زيّو وزي سكان البنشات ;)

إنت بس أصبر عليّ :)

سلامات يا د.خالد...
و سلاماتى للضب الطويل اشرف
و الله ايام....
للاسف ما ح اقدر اكتب فى البوست ده ..مع انى كى بوردينى بياكلنى شديد.....لانى لوكتبت حرف واحد عن الايام ديك ح تعرفنى على طول...

أين ذهب الضب خالد عثمان ؟

loooooooooooooooool

يا حاتم ياخ ما تنسي

الضب السااااااااابق
D:

Quote: للاسف ما ح اقدر اكتب فى البوست ده ..مع انى كى بوردينى بياكلنى شديد.....لانى لوكتبت حرف واحد عن الايام ديك ح تعرفنى على طول...

عرفتك يا

smart_ana2001

ما محتاجة تكتبي زيادة ذاتو

د. خالد سلامات:


في انتظار تكملة حكاويك اللي باين عليها دسمه جدا ..



حكاويي عن الضبضبه ما حأبدأ فيها قبل ما تفرغ من سرد ذكرياتك اللذيذه .. :)


تحياتي,,

قلتي كده يا أماني؟

ماشي :)

بس إبتدي أكتبي ذكرياتك عشان بعدين ما تنسي حاجة
;)

عرفتها يا حاتم؟

المسينجر طووالي D:

حرّقت روحي

p:

سلام يا سمارت إنتي

يعني برضو مصرّة تعيشي دور المرأة الخفيّة D:

عاااااارفو الكي بورد بتاعك بيكون ماكلك كيف :)

give in to it!

بطل شمار و كمل حكاويك أيها (الضب) المنكر لضبوبيتك

طيب

حابتدي أحكي قبل ما أعرّف باقي الشلّة

واحد من الأساتذة الدرّسونا كان د. عبد الله إبراهيم

طبعاً د. عبد الله إبراهيم مشهور بين ناس هندسة مدنيّة بإنّو زول صعب، وكتير جدّاً بيحرج الطلبة في المحاضرات قدّام زملائهم

عشان كده لمّا كان بيسأل سؤال في محاضرة، بتلقي الفصل كلّو لبد

وطبعاً السناير ما بيقصّروا

بيحكوا ليك عنّو ويحذّروك منّو من البداية

حاجات فعلاً حصلت، وحاجات زايدينها توم وشمار

زي البيقول ليك إنّو بيشيّل أغلب الدفعة ملاحق، وإنّو في أوّل محاضراتو بيسأل عن أوائل الدفعة، وبيقول للناس الجابت مرتبة الشرف الأولي في العام الدراسي السابق إنهم ماحيجيبوها السنة دي!!

شخصيّاً فكرتي عن د. عبد الله إبراهيم كانت مختلفة

يعني ختّيت في بالي إنّو هدفو من كل البيعملو إنّنا نكون عارفين وفاهمين - وفعلاً ده المفروض ... إننا نفهم

بعد ما ختّيت الحكاية دي في راسي، ما بقت عندي مشكلة كبيرة في التفاهم مع د. عبد الله. ببساطة هو بيكره الإجابات البيعتبرها غبيّة. لكن في النهاية هدفه إننا نفهم. يمكن أسلوبه مختلف عن باقي الأساتذة الدرّسونا، لكن أكيد الهدف واحد

بعد كده بقيت ما بخاف اجاوب علي اسئلته في المحاضرة. وبقي يعرفني كضب واعد

الطريف إنّو د. عبد الله خلال مروره علينا في إمتحان مادته سألني: لو مدينا ليكم الزمن نص ساعة، بتنجحوا؟

طبعاً قلت ليهو نعم، وفعلاً مدّ لينا الزمن :)

التحيّة ل د. عبد الله إبراهيم، وكل الأساتذة الدرّسونا بقسم الهندسة المدنيّة بجامعة الخرطوم وكان ليهم فضل كبير بعد الله سبحانه وتعالي علينا

أذكر منهم علي سبيل المثال لا الحصر د. عبد الله خوجلي، د. محمّد أحمد خدّام، بروفسر النعمة، بروفسر أبوبكر عبد الوهّاب، د. جمال مرتضي وبقيّة العقد الفريد

د. عبد الله إبراهيم درّسنا مادة تصميم المنشآت الخرصانيّة. يعني أهم مادة لو عاوز تدخل السوق وتشتغل في السودان. وأعمال السنة كانت عبارة عن تصميم مبني من عدّة طوابق. مساعدوا التدريس - الله يسامحهم - فرضو علينا إننا نعمل تحليل كامل للمبني قبل التصميم، وده شغل عبارة عن حسابات مملّة وكتيرة وبتاخد وقت. حاليّاً في برامج كمبيوتر بتقوم بيها في دقايق

المهم

كان مفروض علينا إننا نعمل الحسابات دي كلها. وطبعاً كشلّة ضُبّبة معروفة، قررنا إننا نجتمع مع بعض كذا مرّة ونعملها. حاتم ص إستعمل EXCEL وعمل كل الحسابات، لكن كان مفروض ننقل الأرقام كلها بخط اليد عشان نسلمها. فبقي الموضوع مجرد نقل أرقام

ألذّ حاجة إننا مرّة بيّتنا عند شرف وكنّا الليل كلّو بننقل في الأرقام، وبعدين الصباح مشينا الجامعة. شرف خلال واحدة من المحاضرات دقس شويّة كده وصحي، لقي نفسو بيكتب في أرقام

يعني بقي شغّال فل أوتوماتك

برضو خلال واحدة من إجتماعات الشلّة عشان مادة د. عبد الله دي خلينا الشغل علي جنب وألّفنا أغنية كاملة علي وزن أغنية إيهاب توفيق المعروفة "الأيام الحلوة"، وسميناها "الأبيام الحلوة"

قلنا:

الأبيام الحلوة (from BEAMS)

الأبيام الحلوة

بتتصمم في ثواني

الأبيام الحلوة

ما بتوأعش تاني

شكل الشير إتغيّر (from SHEAR)

والموضوع إتطوّر

أكبر قطر لسيخة وكانة بيطلع لينا صُغيّر

الحلو بيتمرّر

وأبيامنا بتتكسّر

نجرح نئلم نقسي ونظلم وترسنا بيتبرر (from TERRACING)


إلي أن نصل لحتّة:

حبل الود إتسيّب

وشكل كراكنا يشيّب (from CRACK)


وأيضاً:

ماشية الدفعة ودايرة

فيها مراكب سايرة

ناس في مراكب ضايعة وناس في مراكب تايهة وحايرة

ناس أحزانها شديدة

وناس باصاتها بعيدة (from PASS)

ناس كل ما بتسلّم، مرّة تسلّم مرّة جديدة

في عز ألمنا وفي جرحنا

بنتخلي عن بعضنا

وأدي قصتنا، وأدي حكايتنا

وأدي دفعتنا إنت وأنا



معليش ما متذكّر كامل الأغنيّة عشان الزمن طال، وباقي الشلّة للأسف ما معاي هنا :(

خسارة ما أديناها لناس تشجيع هندسة في الكورة

كانت بقت حاجة كده زي "نحن الكبار .. قاعدين كنب ... أي إمتحان بنقول صعب"

تراث يعني

ذكريات حلوة يا خالد.
بس موضوع د. عبد الله إبراهيم دا أنا مختلف معاك فيه شوية. و أبدأ بتحيته و تحية كل العلماء الأجلاء الذين درسونا. لكن د. عبد الله كان بصراحة بستمتع ببهدلة ضحاياه و بصراحة تاني الناس كلهم بكونوا مستمعين ما عدا الضحية بالطبع. و مشكلته التانية كان بفتكر كل الأجيال الجديدة دي ما مؤهلة أصلا لدراسة الهندسة و فهمها و كان بتعامل معانا على الأساس دا في المحاضرات و بحاول يثبت نظريته دي في الامتحانات و الاختبارات. للأمانة أتيح لي لقاء د. عبد الله بعد التخرج في مناسبة اجتماعية لأفاجأ بأنني أمام شخصية في غاية اللطف و الظرافة. لنا مع د. عبد الله ذكريات طريفة جدا لكن أكتر حاجة بتذكرها أنه عنده مكان معين تحت شجرة بوقف فيه عربيته... لو جا لقى زول مبركنق فيه طوالي بقيف وراهو و يقفله لغاية نهاية اليوم.

علي سيرة الأغاني، طوالي إتذكّرت رامي

رامي كان مراسلنا في سوق أمدرمان، بحكم ممارسة أسرته للتجارة

كان أكتر واحد زول سوق فينا. وكنّا بنعرف آخر الأغاني العربية الظهرت منّو

رامي كان ممثل مشرّف لأخواننا الأقباط. دخل الجامعة وهو ال١٥ علي مستوي السودان، وحافظ علي تفوّقه خلالها. ده بجانب مشاركته في نشاطات الإخوة المسيحيين بفعالية.

موقف أخير قبل ما أمشي أنوم

بحكم إني كنت متهم بإني ضب (مظلوم يا بيه )، كان كتيرين من الدفعة بيصوّروا دفاتر المحاضرات بتاعتي، خصوصاً لمّا الإمتحانات تقرّب

ألذّ موقف كان في واحد من أصحابنا متعوّد يصوّر منّي. مرّة الكهرباء قاطعة في حيّنا جاني البيت قال عاوز يصوّر الدفاتر

لغاية هنا ماشي الحال

المفاجأة كانت إنّو شايل معاهو ماكينة تصوير بحالها في ضهريّة البوكس الكان سايقو!!

غايتو قلت ليهو دي ما سبقك عليها زول!


علي سيرة تصوير الدفاتر، الشباب مرّة نبهوني لحاجة

في البداية لمّا كنت بالجد ضب مجنون، كنت بستعمل أقلام حبر ملوّنة في الكتابة وفي الرسومات! حتّي أحمد الريح لمّا سافر أميريكا أول مرّة ورجع كانت هديتو لي طقم أقلام حبر ملوّنة

المهم، الشباب طبعاً كانوا بيصوّروا الدفاتر أبيض وأسود، بعدين لمّا يجوا يقروا يلقوا خلال الكلام المكتوب حاجات تجهجهم زي: انظر اللون الأخضر في الشكل!!

سلام يا العوض

ممكن فعلاً من أسلوب د. عبد الله إبراهيم تفتكر كده

لكن برضو الهدف الأساسي كان إننا نفهم

لكن بيني وبينك السناير مش كانوا بيزيدوا الموضوع شويّة توم وشمار

أخ خالد عثمان

معليش على المقاطعة .. بس عايز أسأل عن ( يس حامد ) ود عطبرة
أين موقعه من تلك التداعيات والذكريات ........ شاهق التحايا

Quote: الأبيام الحلوة (from BEAMS) الأبيام الحلوة بتتصمم في ثواني الأبيام الحلوة ما بتوأعش تاني شكل الشير إتغيّر (from SHEAR) والموضوع إتطوّر أكبر قطر لسيخة وكانة بيطلع لينا صُغيّر الحلو بيتمرّر وأبيامنا بتتكسّر نجرح نئلم نقسي ونظلم وترسنا بيتبرر (from TERRACING) إلي أن نصل لحتّة: حبل الود إتسيّب وشكل كراكنا يشيّب (from CRACK) وأيضاً: ماشية الدفعة ودايرة فيها مراكب سايرة ناس في مراكب ضايعة وناس في مراكب تايهة وحايرة ناس أحزانها شديدة وناس باصاتها بعيدة (from PASS) ناس كل ما بتسلّم، مرّة تسلّم مرّة جديدة في عز ألمنا وفي جرحنا بنتخلي عن بعضنا وأدي قصتنا، وأدي حكايتنا وأدي دفعتنا إنت وأنا

القرايه كانت قايمه بيكم بالجد ههههههههه

متابعين معاك السرد الجميل :)

سلام يا منتصر

للأسف ما عندي أخبار عن ياسين. علي ما أذكر آخر مرّة إتقابلنا فيها كان شغّال مع دانفوديو في المدينة السكنية لسد مروي قبل ٦ سنين! :)

قايمة بينا وبس يا أماني

لسّة متذكّر منظرنا ونحن راجعين من الجامعة بعربيّة حاتم ص بعد تيوتوريال كهرباء كااارب ونحن في سنة تانية

حالتنا صعبة

أنا وحاتم ص وحاتم ن وأشرف ورامي

وشعورنا شعور الزول اللي - زي ما المصريين بيقولوا - لبس في حيطة

دمار ألف يعني

وكاظم الساهر بيغني "علمني حبك"، ورامي بيغنّي معاهو بعلو صوتو

ونحن حاسين إنّو بيتكلم عن حالتنا!

شفت ليك الfirst class دي بعييييييييدة خلاص



ولا ليلة كنا بايتين عند حاتم ص، والساعة ٢ صباحاً المنظر كان كالآتي:

أشرف وحاتم ص بيحاولوا في حاجة

وأنا تقريباً فقدت الأمل ولقيت لي سلّم صغيّر كده طلعت وقعدت في راسو

ورامي قاعد علي الأرض وبيقرأ لينا من كتاب "البؤساء"

وحاتم ن بيرد علي حاتم ص وبيقول ليهو: حأخليك مع الطحلب الزغبي وأشمخ بأنفي في علياوات السماوات!



ياخ القراية دي مرات بتكون صعبة عديييييييل

طبعاً حاتم ن كان فيلسوف الشلّة وشاعرها

هو وطارق قبل ما ينفصل عننا بسبب إختلاف تخصصه

الإتنين كانوا بيشتركوا في حبهم للشعر وأغاني مصطفي سيد أحمد

والإتنين كانوا الوحيدين من الشلّة العرفتهم قبل الجامعة. حاتم ن بحكم إنّو والدته ووالدتي درسوا ودرّسوا مع بعض، وطارق بحكم إننا كنا في نفس المدرسة المتوسطة والمدرسة الثانويّة

بالمناسبة، حب حاتم ن الأوّل كان الفيزياء والفلك بالإضافة للكمبيوتر

عشان كده كان خبير الكمبيوتر في الشلّة ومرجعنا الأوّل فيهو (ما عارف ليه فجأة حسيت إنّي بتكلم عن فريق نور في سلسلة ملف المستقبل )


وعشان كده لمّا إضطرينا نطبع مشروع التخرج برانا، إختطفناه وكان معانا لغاية النهاية، مع إنّو ما كان مشترك معانا في المشروع :)

لكن بحكي ليكم عن مشروع التخرج والعوارض العجيبة الحصلت فيهو لي قدام ;)

متخيله تماما المنظر,

تصدق أنا لحدي الان بحلم او في الحقيقه بهضرب بامتحانات سنه خامسه وبالنتيجه؟

وبصحي من النوم مصدقه انه النتيجه لسه ما ظهرت فعلا,

غايتو دعكة سنه خامسه ومشروع التخرج وامتحاناتها بتهضرب بالزول العمر كلو ههههههه
وللا الاكزام هول

تحياتي وواصل :)


------
من الحكاوي الحأحكيها يوم النتيجه ولما عرفت اني جبت فيرست كلاس عملت شنو

يا خالد ذكرياتك جميلة ومشوقة وبما اننا جلينا وراحت علينا حتى ذكريات الجامعة الا وان خالا لى كان دائما يكرر عبارة ضب

وعندما ياتى سيرة زول هو ما بريده كان بيقول ليك ...ياخى ده ضب حفر

هل كنت انت ايضا ضب حفر؟ ( وجه ضاحك)

كن بخير

وفى انتظار الاخت امانى الامين وذكرياتها عن الضب

سلام يا حامد

ياخ أخوك كان مظلوم ساي

علي الأقل بعد أوّل سنتين .. قبل ما أعقل

طبعاً الضب دي بيقولوها علي الزول البيحب القراية. قالوا عشان دايماً بيكون قاعد تحت اللمبة بالليل عشان المذاكرة

زي الضب يعني .. طوّالي لابد تحت اللمبة

ولمّا خلاص الضب يتطوّر ويبقي ضب كبيييييييير بيسمّوهو ديناصور، أو زي ما شلتنا كانت بتقول:

ضب مجنون

مباااالغة يا أماني

لأ كده فعلاً تبقي ضب مع مرتبة الشرف!

أحكي ياخ أحكي :)



سنة خامسة دي كانت عجيبة بالنسبة لي

أول سمستر ما جبت first class رغم إنّو كان في رقم قياسي من الناس جابوها!

طبعاً نتيجة زي دي كانت حتضيّع تعب السنين الفاتت كلها، لأن المعدل النهائي تلتو بيتاخد من نتيجة سنة خامسة

بالإضافة لإنو أشرف كان منافسني بشدّة علي المركز الأوّل وكان ممكن جدّاً يعوّض أي فرق بنتيجة سنة خامسة؛ خصوصاً إنّو السمستر داك تحديداً كان الأوّل علي الدفعة

لكن الله ستر :)



وقتها كنت بحب، وطبعاً الناس طوووووالي ربطت ده بي داك وبت الناس جاتها عقدة ذنب

مع إنّو السبب كان مختلف

:)

شرف كان من أولاد مدني؛ أو بالأصح عاش في مدني فترة من حياتو

من أطيب الناس الممكن تقابلهم. وكان أكتر واحد ملتزم دينيّاً فينا :)

طبعاً ده ما معناهو إنو الباقين كانوا ماشين علي حل شعرهم!!



آخر واحد من الأعضاء المؤسسين للشلّة كان أحمد الريح

طبعاً أحمد لمّا إنفصل عن الشلّة سعي لنفي صفة الضبضبة عنّو، لكن علي مين

بالمناسبة، أحمد - ما شاء الله عليه - كان تاسع الشهادة السودانية

لمّا وصلنا سنة رابعة، أحمد عمل ليهو جريدة سمّاها "مدنيّة هذا الصباح"، كان بيكتبها علي السبورة قبل المحاضرات وفيها بعص شمارات الدفعة

يعني من يومو بحب الجرايد والكورة
:)

أكتر فترة كنّا فيها فعلاً ضُبّبة مجانين كانت سنة أولي وتانية

طبعاً سنة تانية هندسة كانت مشهورة بصعوبة مادة الرسم الهندسي، خاصة في السمستر الأول

قمنا عملنا معسكر تحضيري قبل السنة ما تبتدي

زي لعيبة الكورة يعني

جبنا صاحبنا مازن من ميكانيكا لأنهم بيدرسوا الرسم الهندسي بتاعنا في تاني سمستر من سنة أولي

ومازن بصراحة ما قصّر .. شرح لينا الموضوع كلّو

ووصلنا درجة إننا حلينا شوية مسائل مرت علينا فعلاً لاحقاً لما بدينا الدراسة الرسمية

مش قلت ليكم كنّا ضُبّبة مجانين

لكن بصراحة الموضوع جاب فايدة كبيرة

يعني الرهبة البيدخّلوها فيك السناير من الرسم الهندسي ما كانت عندنا لأننا دخلنا الفيلم قبل كده وعارفين الخاين حيعمل شنو

وتيوتوريلات الرسم الهندسي كانت أغلبها بالنسبة لي عبارة عن ونسة مع رامي الكان بيقعد وراي في المرسم بحسب ترتيب أرقام الجلوس

رامي نفسه كان بيعديها غناء أثناء ما بيرسم :)

النتيجة؟

أحسن معدل جبتو خلال الخمسة سنوات كان في السمستر الأول من سنة تانية

ولسّة متذكّر فرحة أحمد الريح لي ..

وكأنو هو الجاب النتيجة دي

فعلاً أيام ما بتتنسي

طبعاً الدفعة كلها كانت مقتنعة إننا ضُببة، حتي بعد ما عقلنا

لكن الموضوع كان ببساطة إننا إتعوّدنا نتلاقي للمراجعة قبل الإمتحانات الكنا بنشوفها صعبة

لمّاتنا بتكون في بيت واحد مننا - زي ما كل الناس متعوّدة تعمل - لكن الفرق كان في إنو وقت القراية كان للقراية

يعني حكاية دي يطلع وده يدخل وديل يتشمشروا ما كانت موجودة إلا في حدود :)

ده ما معناه إننا ما كنّا بنهظّر ونضحك ونستمتع بوقتنا!

كنا برضو بنحل الإمتحانات القديمة في قعداتنا دي، ولو في حتّة صعبة وفينا واحد فاهمها بيشرحها للباقين

يعني أجمل حاجة كانت إنو مع إننا متنافسين مع بعضنا، لكن صحوبيتنا كانت أقوي



طبعاً المصيبة كانت إنّك لو ما جاهز موية ونور للقعدة، بيجيك إحساس إنّك ما فاهم أي حاجة لأنّو بيكون في ناس ما شاء الله

عشان كده عمري ما إشتركت في واحدة من جلساتنا ديك ما لم يكون في يوم كامل بينها وبين الإمتحان عشان أنقذ ما يمكن إنقاذه

بالمناسبة يا جماعة، أنا رسلت رابط الموضوع ده لكل أفراد الشلّة :)

يعني لو ما كمّلت أفقدوني، يمكن يكونوا سكّتوني ولا حاجة

طيّب خلوني أحكي ليكم عن مشروع التخرج :)

من البداية كان طرحنا واضح

يا شباب نحن عايزين نكسب جايزة أحسن مشروع تخرّج، وإختيارنا للمشروع مفروض يكون بناء علي كده

ولمّا قائمة المشاريع أُعلنت، كان فيها مشروعين مميزين وكان واضح إنّو البيشتغلوا كويس في واحد منهم حيكسبوا الجايزة

شخصيّاً كنت عاوز مشروع عن هندسة المطارات، لكن أخيراً إقتنعت إنو أحسن أشتغل مع أصحابي الأنا عارف جديتهم وطموحهم :)

وفعلاً إخترنا واحد من المشروعين وإشتركنا فيهو أنا وحاتم ص وأشرف ورامي

طبعاً دايماً بيقولوا ليك عشان تحافظ علي أصحابك أحسن ما تدخل معاهم في شغل، وما تسكن معاهم منعاً لأي خلافات ممكن تعكر علاقتك بيهم

وفعلاً حصلت خلافات ونقاشات خلال المشروع، لكن الحمد لله صمدنا وحافظنا علي صداقتنا :)



المهم

عدّي المشروع بخيره وشرّه وسهره

ووصلنا مرحلة طباعة البحث علي الكمبيوتر. كعادة الطلاب وقتها، أدّينا البحث لصاحب مكتبة عشان يطبعوا

وقبل أسبوع تقريباً من ميعاد تسليم المشروع، عرفنا إنّو صاحب المكتبة ضرب كومبيوترو فايرس، وشاشة الكومبيوتر ذاتها حرقت!!!!

صقّعنا ودنقرنا، وقلنا خلاص ... ما البحث ده، بنطبعوا برانا! (نظام برانا برانا بنغلب غانا .. وكده )

قررنا نعمل معسكر مقفول في بيت رامي. رامي جاب كومبيوتر وسكانر وبرينتر من واحد قريبو عندو مطبعة. أنا إستلفت كومبيوتر ود خالي. حاتم ص جاب كومبيوترو . ولمّا الموضوع إتطوّر أكتر، جبنا حاتم ن ومعاهو الكومبيوتر بتاعو وإستلفنا سكانر تاني من واحد صاحبنا من كهرباء إسمه الشيخ

يعني لاب كومبيوتر عديييييل كده!

وبدينا الكتابة ..

وبدت العوارض!!!!

مرّة الكهرباء تقطع في حي ناس رامي الساعة ٢ صباحاً!!!

والكومبيوتر بتاع صاحب المطبعة يطلع فيهو فايرس متخصص في الويرد بس ... ويقعد يكتب لينا Happy Birthday to مين كده ما عارف

وما نقدر نعمل تعريف للسكانر الجابو رامي مع أي كومبيوتر تاني

والسكانر التاني الإستلفناه يطلع في فايرس في السي دي المفروض نعرّفو بيهو (طبعاً كانت أوّل مرّة أعرف فيها إنّو ممكن يكون في فايرس علي سي دي أصلاً!!)

نمشي محل إنترنت عشان نجيب رسمة معينة مرسلة لينا في إيميل، ونشيل معانا دسكيت نتأكّد قبل ما نشيلو إنّو شغّال وما فيهو مشكلة، نصل المحل الدسكيت يرفض يشتغل!!!

ونحن في طريقنا لمحل الإنترنت، رامي يقيف عشان يكب بنزين، نلقي الطلمبة ذااااتها قاطعة بنزين!!

يعني مباااااااااااالغة ...



ألذّ حاجة مرّة ساهرت أنا ورامي عشان نحل مشاكل السكانر، وما نمنا إلا قريب وش الصباح بعد ما حليناها فعلاً

نصحي الصباح نلقي نص الكومبيوترات ما موجودة!!!

الحاصل شنو؟ أشرف وحاتم صحوا الصباح، وعلي حس إنّو مشكلة أمس ما إتحلّت، شالوا الكومبيوترات والورق ومشوا السوق العربي

بعدها نقلنا المعسكر لبحري عند حاتم ص

الطابق الفوق في بيتهم كان تقريباً فاضي، فأخدنا راحتنا ورصّينا الأجهزة علي ترابيزة تنس طاولة كبيرة وبقي شكل المكان فعلاً لاب كومبيوتر :)



الحمد لله بعد كده قدرنا نطبع المشروع، ونقنع د. خدام - رئيس القسم وقتها - إنّو يمد لينا فترة التسليم

والحمد لله كسبنا الجايزة ..
:))

و الله يا خالد ضحكتنى....
يديك العافية...
عارف فى واحد من شلتكم دى عارفنى كوييييس. لكن انا عارفه انو ح يحفظ السر و ما ح يفتنى...و ما ح اقول ليك هو منو منكم!!
انا بصراحة ما كنت ضبه و لكن عندى علاقات قويه بالضببه....و ديل يا سيدى الضببه اسياد الاسم....ديل الناس اللى كانوا بيقروا ال math من الكتب الروسية القديمة فى المكتبة.
وااصل عليك الله ....و سلامى لكل شلة الضببة

أين ذهب (الضب) المنكر لضبوبيته خالد عثمان ؟











___________________

سمارت إنتي :
:)

سمارت أنا!!!

جابت ليهاmath من كتب روسية كمان!!!!!

الكلام ده مش ضرب تحت الحزام ياخ

تقريباً عرفتك قاصدة منّو ;)

وأول سؤال حاسألوا ليهو حيكون عنّك p:

حاتم تلقاك إنت كنت من النوع البيقعد في بنشات هندسة عشان يوهم الناس إنّو ما ضب، وبعد ما يرجع البيت ديك يا اللصقة تحت اللمبة للصباح

ذكّرتني بالصورة دي مقلب لذيذ عملتوا في أشرف :)

مرّة لقيت علي غلاف لبان صورة لديناصور صغيروني كده

قمت صوّرتها مكبّرة ورسمت كأنو البيبي ديناصور ده بيحلم بكتب

وكتبت عليها: "الطفولة السعيدة ل ..."، وكتبت رقم جلوس أشرف!!، وعلّقتها علي باب القاعة قبل وقت المحاضرة

وتعال شوف التعليقات!!

حتّي سنايرنا علّقوا

كان مقلب دولي :)


سمارت أنا طبعاً إنتي كنت من العلّقوا، مش كده؟ p:

الصورة مهداة الى : سمارتي أنا 2001

:d

Quote: حاتم تلقاك إنت كنت من النوع البيقعد في بنشات هندسة عشان يوهم الناس إنّو ما ضب، وبعد ما يرجع البيت ديك يا اللصقة تحت اللمبة للصباح

أيها الضب المنكر لضبوبيته خالد عثمان اعترف !!!

و إلا بنزل ليك باقي الصور

أحسن ليييييييك





___________________

موش كدا يا اسمارت إنتي ؟

Oooooops
جبتها من وين صورة الطرمبة دى???

لكن انا عرفت انك متخيل اكون انا منو....لكن ما مشيت بعيد. هى صحبتى جدا جدا. و دى طرمبتها الحبيبة.
_____________________________
لكن عليك الله خالد ده ما توريه انا منو....please

حاتم على....حقيقى انا ما اتزكرتك (عامل السن و كده) لو فى طريقة زكرنى.

سمارت إنتي


معقولة الكلام دا يا سينيرنا .... و الحالة بعد جبتا ليك الطرمية ؟

فى دفعتكم كان فى ضببة كتار جدا ناكرين الضبوبية منهم شهاب وقيع الله و هاشم على....ضبوب و برضوا قاااعدين فى البنشات.
______________________
قلت ليكم....كى بوردينى بياكلنى
احسن اتخارج من هنا سريع

كتب الضب المنكر لضبوبيته د. خالد عثمان

Quote: وقتها كنت بحب، وطبعاً الناس طوووووالي ربطت ده بي داك وبت الناس جاتها عقدة ذنب مع إنّو السبب كان مختلف

اهدي ليك القصيدة دي :

Quote: فى دفعتكم كان فى ضببة كتار جدا ناكرين الضبوبية منهم شهاب وقيع الله و هاشم على....ضبوب و برضوا قاااعدين فى البنشات.

قصدك دفعة خالد







___________________

اخير بعد كدا ما تواصلي لانو خالد حايعرفك

الاخ د. خالد سلامات
و الله زكريات هندسة مليانة بالافراح و الاتراح بالذات ... و تأكيد لكلامك بخصوص المشروع وما يحدث فيه من مشاكل ومعاناة مع اعز الاصحاب بتذكر احنا في مساحة قاموا نزلوا لينا المشاريع في بداية سنة خامسة في يوم ما كان عندنا فيهو محاضرات , و اخوك بحكم انو كان شامي الجامعة و كدة فكنت شغال معاها زي ما بيقولوا بي حق الحكومة يعني حدي مع ناس هندسة المحاضرات و بعدها طوالي يتم الزحف المنظم على نواحي اداب, اقتصاد و علوم و لازم يتم تغطيتهم التلاته بعد الجولة ناخد لينا ريست و نشرب حاجة في كافتريا جيولوجيا, و بعد داك نمشي لمقرنا الدائم (الدوام لله) في بينشات اداب المقبلة على مكتبة المين (شارع النشاط).

ارجع لي موضوع المشروع .... المهم شلتنا كنا 4 انفار , العبد لله و سليمان و عثمان و ابوبكر, لكن ابوبكر فرز عيشتو بدري في موضوع المشروع لانو اختارو من البداية مع زميل اخر و كان مشروعهم برعاية الهيئه القومية للمياه (الرعاية ما كان فيها شرتيت ... معلومات + بيانات و بس). المهم جينا تاني يوم انا و سليمان و لقينا نفسنا صايعييييييييين و كل المشاريع اتحجزت و الناس شغالة بتحجز مواعيد مع مشرفيهم و بتخطط و امال عريضة و احلام يقظة و ناس ملاوزة و ناس فاكنها في روحهم المهم انو بين كل المشاعر المتناقضة انا و اخوي (الكاشف) سليمان محصلتنا صفر كبيييييييير لاعارفين نبكي ولا نتصرَّف كيف, المشاريع الفضلت كلها بيض و غير مرضية لطموحاتنا, المهم قمنا مشينا لرئيس القسم كان في مشروع مركون بالجمبة كده المهم قعدنا معاهو و قلَّبنا المشروع بيجاي بيجاي (و الله بس التقول خروف ضحية) في النهاية ما نفع معانا قمنا قلنا للدكتور سجلنا فيهو احتياطي

بعد داك قلت لسليمان كدي ارح البورد بتاع القسم نشوف عناوين البحوث المقترحة دي يمكن يكون في حاجة جديدة , و بسزاجة شديدة مشينا للبورد, في السكة لاقينا عثمان لما سالناهو عملت شنو في البحث قال لينا انا كنت قايلكم متفقين على مشروع سوا عشان كدا انا و جلال مشينا سجلنا المشروع الفلاني مع د. محمد عثمان ( استاذي الفاضل) طبعا المشروع بتاعم كان شديد و انا و سليمان من البورد بكينا فيهو و عليهو انو راح مننا, طوالي قلت لعثمان احنا دايرين نجي معاكم في المشروع دا قام قال لي ما عندنا مشكلة بس نمشي للدكتور. لما وصلنا و فتحنا الموضوع الدكتور (دقا جرس عديل كدة) و قال لينا 4 انفار كتيرة على المشروع , قمت اقترحت عليهو يزيد لينا الشغل و نعمل مقارنه كذا و Analysis و بتاع لحدي ما اقنعتو في النهاية و قبل بينا انا و سليمان
لكن الكلام دا كلو في النهاية جا فوق راسنا انا و سليمان لانو المشروع كلو اشتغلناهو احنا الاتنين لحدي الطباعة و نفس العوارض يا خالد الكهرباء تقطع في بري سليمان يجيني جاري اها لما تقطع في الصحافة اقوم جاري ليهو و نفس رصة اللكمبيوترات (زي عربات تعليم القيادة العندها دركسونين ديك) و استلفنا اسكانر من خالي و طابعة من خالي التاني (خيلاني ما قصروا) و قريبتي ساعدتنا برضو في الكتابة يعني تم كتابة البحث و طباعته بالعون الذاتي و تضافر الجهد الشعبي

طبعا اس الخلاف كان بسبب اقتراح انو نعمل Software يقوم بكل الحسابات و بعد داك يبقى (Open Source) لاي حاجة مشابهة المهم المشكلة كانت في البرمجه و انها حتاخد زمن و كدة و بصراحه يا جماعة احنا الوقت داك علاقتنا بالبرمجة كانت زي علاقتي حاليا بي جينفر لوبيز

لكن انا كنت حابي اعمل حاجة كويسة, اها لما الجامعة قفلت بسبب مشكله الاتحاد سنه 2002 بقيت اشمشم من بعيد في لغات البرمجة , لحدي ما واحد قريبي كان بيقرا في التقانة وراني كم برنامج معمول بالـ Visual Basic, طوالي اخوكم الفكرة خمرت ليهو في راسو و بعد داك قررت اني اعمل السوفتوير بالـ Visual Basic , المهم شلت كتاب من قريبي دا و صورتو في مجمع الاوقاف (الله يطراهو بالخير) و بعد داك مصطفى محمود صحبي كان بيقرا في معهد ابتيك برضو اداني اسطوانة بتاعت Visual Basic و كم مشروع جاهز كدة (قلت ليكم جهد شعبي) دا غير الكتب المشيت صورتها من كلية البيان و كتر خيرهم و بالذات امين المكتبة لما سمحو لي باستخدام المكتبة لما وريتم ظروف الجامعة و اشتركت في منتدى امريكي بتاع مبرمجين Visual Basic و بالجد كان مفيد جدا جدا لانو ما كل حاجة بتتلقي في الكتب خصوصاً الـ Tricks , بالرغم من الانقليزي الدراب بتاعم و بتاعي انا زااااتي

المهم المشروع انتهى بخيره و شره وكان اجمل ما فيه انو اخدنا جائزة احسن مشروع و دا كان كفيل بتجاوز كل الخلافات و المشاكل الحصلت و الجائزة شخصياً تم منحها للعبد لله و الشهادة الان منجعصة مع شهاداتي التانية و متربعة في الـ CV برضو

يا جماعة عليكم الله ما تفهموني غلط من الكلام المكتوب فوق دا .... انا ما ضب و للا شي

حاتم وسمارت، ما تتشاكلوا يا جماعة

ذكرتوني حكاية إذا اختلف اللصان وكده

حاتم إتعرف .. فضلتي إنتي بس يا سمارت

لكن أصبري بس :)



قلتي لي بتعرفي شهاب وهاشم، والموضوع فيه نحلة؟

قلبت هوبة يا حاتم في القصيدة النكتّها دي

لكن ياخ ما قلنا الموضوع ما كان كده

سلام يا غباشي،

إبداااااع ...

Quote: حدي مع ناس هندسة المحاضرات و بعدها طوالي يتم الزحف المنظم على نواحي اداب, اقتصاد و علوم و لازم يتم تغطيتهم التلاته بعد الجولة ناخد لينا ريست و نشرب حاجة في كافتريا جيولوجيا, و بعد داك نمشي لمقرنا الدائم (الدوام لله) في بينشات اداب المقبلة على مكتبة المين (شارع النشاط).

قلت لي إنت من الناس الكانوا بيعملوا جولة حول الدولة ..

Quote: انا و اخوي (الكاشف) سليمان محصلتنا صفر كبيييييييير لاعارفين نبكي ولا نتصرَّف كيف, المشاريع الفضلت كلها بيض و غير مرضية لطموحاتنا

يعني كنتو حتصيعوا في موضوع المشروع ذاااتو

نحن حظنا كان أحسن لأنّو كان مسموح لحد ٤ أشخاص في كل مشروع - ناس مدنيّة كتااااار زي ما إنت عارف .. يجيبوا ليهم مشاريع قدر ده من وين!

Quote: نفس العوارض يا خالد الكهرباء تقطع في بري سليمان يجيني جاري اها لما تقطع في الصحافة اقوم جاري ليهو و نفس رصة اللكمبيوترات (زي عربات تعليم القيادة العندها دركسونين ديك) و استلفنا اسكانر من خالي و طابعة من خالي التاني (خيلاني ما قصروا) و قريبتي ساعدتنا برضو في الكتابة يعني تم كتابة البحث و طباعته بالعون الذاتي و تضافر الجهد الشعبي

شكلو مشاريع التخرج كلها مصايب وبلاوي

لكن قلبت هوبة في الجهد الشعبي دي

Quote: لما الجامعة قفلت بسبب مشكله الاتحاد سنه 2002 بقيت اشمشم من بعيد في لغات البرمجة , لحدي ما واحد قريبي كان بيقرا في التقانة وراني كم برنامج معمول بالـ Visual Basic, طوالي اخوكم الفكرة خمرت ليهو في راسو و بعد داك قررت اني اعمل السوفتوير بالـ Visual Basic , المهم شلت كتاب من قريبي دا و صورتو في مجمع الاوقاف (الله يطراهو بالخير) و بعد داك مصطفى محمود صحبي كان بيقرا في معهد ابتيك برضو اداني اسطوانة بتاعت Visual Basic و كم مشروع جاهز كدة (قلت ليكم جهد شعبي) دا غير الكتب المشيت صورتها من كلية البيان و كتر خيرهم و بالذات امين المكتبة لما سمحو لي باستخدام المكتبة لما وريتم ظروف الجامعة و اشتركت في منتدى امريكي بتاع مبرمجين Visual Basic و بالجد كان مفيد جدا جدا لانو ما كل حاجة بتتلقي في الكتب خصوصاً الـ Tricks

ده كلللللللللو وما ضب؟!!!

طلّعتنا مساكين ساكت ياخ

Quote: المهم المشروع انتهى بخيره و شره وكان اجمل ما فيه انو اخدنا جائزة احسن مشروع و دا كان كفيل بتجاوز كل الخلافات و المشاكل الحصلت و الجائزة شخصياً تم منحها للعبد لله و الشهادة الان منجعصة مع شهاداتي التانية و متربعة في الـ CV برضو

ما شاء الله، وبرافو عليك

مشكور علي المشاركة الجميلة وعلي الضحك الضحّكتنا ليه :)

Handsa Tower

Quote: حدي مع ناس هندسة المحاضرات و بعدها طوالي يتم الزحف المنظم على نواحي اداب, اقتصاد و علوم و لازم يتم تغطيتهم التلاته بعد الجولة ناخد لينا ريست و نشرب حاجة في كافتريا جيولوجيا, و بعد داك نمشي لمقرنا الدائم (الدوام لله) في بينشات اداب المقبلة على مكتبة المين (شارع النشاط).

غباشي دي جملة الموسم هههههههههه

غايتو نحن زحف ناس هندسه من الصحراء الغربيه للعمران ده كان بيضحكنا ضحك,
لما يصلوا بيكونوا مغبّرين عديل لووووول



مبروك الجايزه بأثر رجعي :)

الضب السابق خالد :)
الليله ما شغّاله وفاضيه بالنهار,
لما تجي بالليل حتلقاني بديت في سرد شوية ذكريات ضببيه وضبابيه ذاتو ههههه

علي عكسك سنه أولي وتانيه كنت أبعد ما يكون عن الضبضبه,
كنت زي غباشي, أصحابي بتاعين المدرسه اتقبلوا في كليات تانيه,
وكليتي ما واقعه لي خصوصا اني كنت فيها براي,
سنه أولي كانت أحلي سنه كنا قروب كبير وأصحاب كميه,كانت فوضي خلّاقه, مع ذلك النتيجه كانت كويسه,
سنه تانيه كنت شبه انتساب ههههه
الأتندنس بتاعي كان زيرو, ومريت بظروف معقده خلّتني بعيده عن الجامعه,
أيام الامتحانات قريت بطريقة الاسبوتنق, بصّور وبختار ورق ووالله يا خالد بقراهو قبل الامتحان بيوم واحد,
وببيع أغلب المقرر,
بدخل الامتحان بحسب عديل أنا محتاجه أحل كم سؤال عشان أنجح, وضربت معاي أغلب الاسبوتنقس بتاعتي,
دي رحمه من ربنا ساكت غايتو, وربنا ستر وباسيت أوول ثرو ..

سنه تالته ياسيدي بديت أحب الكليه والدراسه وبقي عندي هدف ورغبه في قسم معين عايزه ألتحق بيهو,
وقتها كانت كليتنا ال honor فيها مقاعد محدوده وعليهو منافسه شديده,

بديت في سنه تالته موضوع الدفاتر البأخضر والأحمر والأسهم والحركات القلت عليها,
يمكن دي السنه اللي عرفت فيها دروب مكتية المين, وقروبات الشرح, والمراجع التقيله ..
كنت أحسن زول يظبّط سمنار أو بريزينتايشن, الحاجه اللي مافارقتني لي هسي,
ونهاية السنه شلت ال honor في القسم اللي كنت حاباهو,
وبعد كده بدت رحلة الضبضبه ههههههه

نظام كليّتنا انو مافيها سمسترات, وأعمال السنه مهمّه ,
بتبدأ بأربعه أقسام رئيسيه في أولي, بتختار تلاته منهم في تانيه, وبعدين قسمين في تالته,
لو اتخرجت جنرال بتتخرج بيهم, ولو كنت ضب وشلت honor بتتخرج بقسم واحد,
طبعا كل قسم فيهو عدد مواد لا أول لها ولاخر :)
ونتيجة التخرج بتتحسب حسب ما أتذكر 50% من سنه خامسه, 30% من سنه رابعه,
و20 % من سنه أولي وتانيه وتالته مجتمعات ,
وده سببه انو بنبدأ التخصص اللي هو الhonor في سنه رابعه زي ما قلت ليك,
فنتيجة القسم البتتخرج بيهو بيركزوا علي انجازك معاهم في رابعه وخامسه, ودي أكتر حاجه نفعتني,
لأني سنه تانيه يادوب كنت جايبه الباص, زي ما قلت ليك برضو,

رابعه وخامسه فيهم حكاوي عن الضبضبه لاحصر لها ومشروع التخرج فلم هندي,
جاياك ليهم في مداخلات منفصله,

شكرا علي البوست اللذيذ :)


----
حاتم ماتطّفش لينا سمارت,
خلينا نعتبرها زميله (س) قرت في هندسه,
وخليها تشاركنا ذكرياتها علي هذا الأساس :)

سمارت لقيتيني كيف

خالد و اماني و حاتم و اسمارت
كل سنة و انتو طيبين
هنا فاضل لينا اقل من عشرة دقايق ونستقبل السنة الجديدة 2010 كاول بلد في العالم السنة الجديدة بتبدأ فيهو .....
كده اشوف طريقة ترويسة و بجيكم....
نتلاقى السنة الجاية ان شاء الله

يا سلاااااام يا حاتم

ذكرتنا بالذي مضي!

Quote: غايتو نحن زحف ناس هندسه من الصحراء الغربيه للعمران ده كان بيضحكنا ضحك, لما يصلوا بيكونوا مغبّرين عديل لووووول

الحمد لله يا أماني الزحف العجيب ده ما كان عندي

وااااااثق من ناسنا! ;)

أيوه كده يا أماني

طلّعي المستخبّي

Quote: ونتيجة التخرج بتتحسب حسب ما أتذكر 50% من سنه خامسه, 30% من سنه رابعه, و20 % من سنه أولي وتانيه وتالته مجتمعات

لكن ناس كليتكم عملوها ظااااااااهرة

ليك حق ما تشتغلي بأولي وتانية كتير!!

Quote: بديت في سنه تالته موضوع الدفاتر البأخضر والأحمر والأسهم والحركات القلت عليها, يمكن دي السنه اللي عرفت فيها دروب مكتية المين, وقروبات الشرح, والمراجع التقيله ..

ياخ الحركات دي كنت بديت أخليها لمّا وصلت تالتة!

لكن ده بيدل علي إنّو بعض الضبّبة بيكونوا late bloomers

never too late to join the club! :p

عارفة، في أبريل الفات رجعت السودان زيارة. أول زيارة لي بعد ما بقيت دكتور. وكالعادة، مشيت الكليّة عشان أسلّم علي الأساتذة. د. عبد الله خوجلي - العميد الحالي للكليّة - كان زي أبو الدفعة بتاعتنا. قام طلب منّي إنّي أجي في محاضرة ليهو مع ناس رابعة علي ما أذكر وأكلّمهم عن فرص التحضير في الجامعة الدرست فيها.
وقلت ليهم نفس الكلام .. إنّو حتّي لو نتائج السنين الفاتت ما كانت ممتازة، لسّة ممكن يجتهدوا في السنتين الفضلوا ويطلعوا بنتيجة كويّسة
أنا ما مقتنع بحكاية "دي كليّة أولها مهندس وطيشها مهندس"؛ أو أولها طبيب وطيشها طبيب، لناس طب مثلاً. لأنّو ما كل مهندس مهندس، ولا كل طبيب طبيب
لكن حأرجع للكلام ده قدّام إن شاء الله لأنّو سبب أساسي في كتابتي للذكريات دي

Quote: ونهاية السنه شلت ال honor في القسم اللي كنت حاباهو

يللا تعالي أحكي بلاوي رابعة وخامسة، ومصايب مشروع التخرّج

كل سنة وإنت طيّب يا غباشي :)

لكن تعال هنا، إنت عاوز تاكلنا حنك ولا شنو؟ من متين السويد بقت أوّل بلد في العالم السنة الجديدة بتبدأ فيهو؟

يس حامد يعمل بالمملكة العربية السعودية حاليا .. تفاصيل أوفي لا حقا ...

شكرا يا صحبتى امانى....لكن حاتم ح يطفشنى بالجد من البوست....
المره دى ضربت فى العارضه...المره الجايه بجى القى صورتى هنا....
_________________________________________
طلعتى ضب اساسى يا امانى..ما شاء الله

Quote: من متين السويد بقت أوّل بلد في العالم السنة الجديدة بتبدأ فيهو؟

Ooops
انا ما عملت update للبروفايل بتاعي ...
انا انتقلت لي نيوزلندا للـ PhD لكن لسة مكتوب بي قلم الرصاص و كدة ..... ربك يسهل يا مان ...
راس السنة هنا ضارب عديييييل الـ Kiwis ديل طلعوا وهم و جارِّين هوا من ناحية الاحتفالات و البهرجة من fireworks وخلافه,
اتخيل راجين الساعة 12 تجي عشان يفكوا خمسة وللا ستة مفرقعات (و الله تقول عقد بس)
اخوك لحدي ما صلى العشاء بعد ما كتب الرد بتاعو الفوق دا و طلع الشارع
عليك امان الله مافي اي مظهر من مظاهرالفرح ناهيك انو تكون في سنة جديدة زاتو
ومافي اي صوت بتاع العاب نارية و السماء كهربتها قاطعة عديييل...
غايتو دا اول راس سنة لي هنا, و لو بقا لينا قعاد في البلد دي تاني الا نمشي نروِّس في كوالا لمبور, بالمرة نلاقي د. بيان
يا حليل الترويسة استوكهولم ..... الالعاب النارية من العصر و في اي مكان بس الزول يختار

[

Quote: المره دى ضربت فى العارضه

اسمارت ....
حقو تنداحي بعد دا لانو حاتم شكلو ما حيعتقك بطريقتك دي ....

يا حاتم ...
المنظر الفي الصورة بتاعت الـ Tower دي بيذكرني ايام اللكاشر الغليدة ديك .. زي الـ Maths و الكهرباء و الاقتصاد الهندسي ( الله لاعادو) ...
و للاقتصاد الهندسي مآسي ... بجيكم ليها

repetition

مشكور يا منتصر علي المعلومة

تحياتنا ليه، وربنا يوفّقو إن شاء الله :)

Quote: شكرا يا صحبتى امانى....لكن حاتم ح يطفشنى بالجد من البوست.... المره دى ضربت فى العارضه...المره الجايه بجى القى صورتى هنا....

عشان كده أحسن تعترفي براك يا سمارت ;)

ما شاء الله يا غباشي

ربنا يوفّقك إن شاء الله

قلت لي الجماعة ديك ما بيعرفوا يروّسوا!!

Quote: المنظر الفي الصورة بتاعت الـ Tower دي بيذكرني ايام اللكاشر الغليدة ديك .. زي الـ Maths و الكهرباء و الاقتصاد الهندسي ( الله لاعادو) ... و للاقتصاد الهندسي مآسي ... بجيكم ليها

مستنين رجعتك يا غباشي!

طالما راس السنة بتاعك طلع ضارب، تعال كمّل إعترافاتك

Quote: وقلت ليهم نفس الكلام .. إنّو حتّي لو نتائج السنين الفاتت ما كانت ممتازة، لسّة ممكن يجتهدوا في السنتين الفضلوا ويطلعوا بنتيجة كويّسة أنا ما مقتنع بحكاية "دي كليّة أولها مهندس وطيشها مهندس"؛ أو أولها طبيب وطيشها طبيب، لناس طب مثلاً. لأنّو ما كل مهندس مهندس، ولا كل طبيب طبيب لكن حأرجع للكلام ده قدّام إن شاء الله لأنّو سبب أساسي في كتابتي للذكريات دي

ما عندى حق اتكلم عن الدكاتره...لكن ممكن اتكلم عن المهندسين.
الكلام القلتو ده جميل جدا يا خالد. و ياريت كل الناس تجتهد فى الجامعة و يتخرجوا ناقشين حاجه. و كويس جدا انك شجعت العيال اللى فى الكلية الان. لكن....خلينا واقعييين . ما ممكن الدفعة كلها تتخرج ب فرست كلاس. و الا ما ح يبقى فرست كلاس. و بالمناسبة ما لازم برضوا الدفعة كلها تعمل دراسات عليا. فى ناس بيقدروا عليها و فى ناس لا. فى ناس دخلوا الكلية دى (بالذات مدنية) عشان يبقوا مقاولين. و فعلا بقوا مقاولين ناجحين جدا. و بالمناسبة برضوا ما فى شئ عيب فى كده. بالعكس انا شايفه انها حاجه كويسه جدا جدا .الزول يكون عارف روحو عاوز شنو و فى النهاية يعمل الحاجه العاوزها. ناس عاوزين يعملوا قروش....و فعلا عملو قروش كويسه جدا. ناس عاوزه تتخرج بفرست و تعمل دراسات عليا ....برضو كويس.
و الكلية فعلا اولها مهندس و طيشها مهندس.... طيشها مهندس باعتراف جامعة الخرطوم اللى ادتوا شهادة مهندس يمكن توثيقها من الشؤن العلمية و كل الحجات الكتيره ديك.
______________________________
ما تفهم انى ضد كلامك الفوق ده بان الناس لازم تجتهد. لكن كمان كل زول عندو امكانيات مختلفه ( ما بقول كويسه او اقل) بقول "مختلفة".

سلام يا سمارت

معاك تماماً إنّو ما ممكن كل الدفعة تتخرج بfirst class أو تعمل دراسات عليا. وأبداً ما عيب إنّو الواحد يبقي مقاول. أنا برضو بديت حياتي العمليّة مع شركة مقاولات، وحاليّاً في شركة إستشاريّة - يعني ما أكاديمي

القصدتو بكلامي هو زي ما قلتي ... إنّو الناس تطلع فاهمة. وحتّي المقاول لو ما فاهم ممكن يعمل مصيبة!

وإنتي عارفة إنّو البيحصل من ناس كتيرة في الجامعة هو عدم إهتمام ليس إلا

د. عبد الله خوجلي دايماً كان بيقول لينا ما في طالب شاطر وطالب بليد، لكن في طالب بيهتم وطالب مهمل

كلام د. عبد الله صحيح تماماً، خصوصاً في كليّة من كليات القمّة زي هندسة، وفي جامعة زي جامعة الخرطوم؛ وبينطبق حتّي علي الكليات والجامعات التانية. لكن لو مسكنا هندسة الخرطوم كمثال؛ الطلاب البيدخلوها كلهم من أحسن الطلاب علي مستوي السودان. شنو الممكن يخلي طالب بالمستوي دي فجأة يبقي أقصي طموحه ينجح وبس؟ البيجيبوا first class ديل أحسن منّو في شنو؟

بالعكس، في ناس كتار لو إهتمّوا شويّة ما في زول بيلحقهم

طبعاً الإستثناء الوحيد من كلامي ده هو طلاب الداخليات والناس الظروفهم فعلاً صعبة

صدّقيني أنا باحترم كل ناس دفعتنا الكانوا ساكنين داخليّة، وواصلوا بنجاح لغايّة التخرج إحترام شديد. نحن الحمد لله كل الظروف كانت مهيّئة لينا، وأسرنا ما قصّرت بالبتقدر عليه. لكن في ناس كتير ظروفهم زيّنا وأحسن وما عندهم إهتمام كبير بإنهم يفهموا

كلامي ده ما معناه إنّو الناس تبقي ضُبّبة، ومن مكتبة لمكتبة

لكن مفروض الناس توازن بين الهدف الأساسي الدخلوا من أجله الجامعة وبين الجوانب التانية للحياة الجامعيّة

عشان كده قصدت إنّي أوضّح الجانب التاني للصورة بالذكريات دي، عشان الناس تعرف إنّو حتّي البيقولوا عليهم ضُبّبة بيعيشوا حياتهم في الجامعة وبيطلعوا وينزلوا، ويخلطوا ويحبّوا ، ويدكّوا محاضرات كمان - لكن مع ده كلّو يكونوا مهتمين بدراستهم وعارفين هم دخلوا الجامعة ليه

Quote: ما في طالب شاطر وطالب بليد، لكن في طالب بيهتم وطالب مهمل

كل سنة وانتوا طيبين يا الناس الروَّستو بعدينا
بس ان شاء الله راس السنة عندكم ما يكون جالِّي زي بتاعنا دا

يا خالد
ما تنسى انو الكلية زاتا بتقتل طموح الطالب من ناحية التحصيل
يعني بعض الدكاترة كانوا بيكلفتونا و بعد داك دايريننا نجتهد,
ياخ كان في دكاترة مهملين اكتر مننا زاتو و ساكين السوق بره الجامعة والسيمستر كلو ما شغالين بينا
بس يجوا يطرشوا المادة في اخر اسبوعين و زمن المحاضرة يتمطى و يبقى 4 و 5 ساعات

دا غير النوع البيشيلا تقيلة مع الطلبة و الله قال بي قولك لو صححت ليهو حاجة اثناء المحاضرة طوالي بيبقى معاك في level واحد
و على العكس تماما هنالك من درسونا بتفاني و ضمير والله , الله يديهم العافية و جزاهم الله عنا كل خير
لكن القاعدة العامة في التعليم في السودان هي انو لو ما الاستاذ بقى شرس الطلبة ما حتعمل ليو حساب
و بالتالي الطلبة ديل عبارة عن ناس تخاف ... ما تختشيش

الكلية كانت محبطة في اكتر الوقت و برضو كان في تحيُّز واضح ومجاملات كريهة من بعض* الدكاترة لبعض الطلبة (الطوابير= كسارين التلج) و بالمناسبة ديل ما ضبوب
و التحيز و المجاملة بتكون في شكل Materials يا خالد يعني لما تجي تكتشف فلان كان بيقرا للامتحان من شيت اداهو ليهو دكتور فلان سيد المادة زاتو
طيب ما كان ينزل لينا الشيت في المكتبة و الموضوع انتهى

في حاجة تانية احنا ما معفيين منها ياخالد و اللي هيَّا اولاد هندسة بيعيشوا الوهمة و الواحد بيركِّب مكنة مهندس من اول سنة
غير كدة ود هندسة لازم يكون شِفِت و شرامي مقارنة بباقي طلاب الجامعة و الدليل على كدة التشجيع بتاع هندسة
بالرغم من انو ظريف و لذيذ لكن بكل اسف افرازاتو كانت سلبية على بعض الطلبة لانهم بقوا يتمادوا فيهو
واي كورة لهندسة بقى لازم يكون فيها مشاكل والفاظ غير لائقة بالمرة




*التعديل لاضافة كلمة بعض باللون الاخضر
[B/]

وإنت طيّب يا غباشي

في بلدك الإنت قاعد فيها دي، العالم كلّو روّس بعدك!

Quote: يا خالد ما تنسى انو الكلية زاتا بتقتل طموح الطالب من ناحية التحصيل

عارف يا غباشي، النقطة دي سمعتها كتير قبل كده؛ وما مقتنع بيها أبداً

يعني الدراسة الجامعيّة ما هي هدف في حد ذاتها

هي وسيّلة

وحتّي لو فرضنا إنّو الوسيلة دي ما كانت قدر طموح البعض، ليه ما يفكّروا في الغاية العشانها دخلوا الجامعة؟

أمّا بقي لو كانت الدراسة في الجامعة هي الهدف، فدي تبقي مصيبة!

Quote: الكلية كانت محبطة في اكتر الوقت و برضو كان في تحيُّز واضح ومجاملات كريهة من بعض* الدكاترة لبعض الطلبة (الطوابير= كسارين التلج) و بالمناسبة ديل ما ضبوب و التحيز و المجاملة بتكون في شكل Materials يا خالد يعني لما تجي تكتشف فلان كان بيقرا للامتحان من شيت اداهو ليهو دكتور فلان سيد المادة زاتو طيب ما كان ينزل لينا الشيت في المكتبة و الموضوع انتهى

الحمد لله زي ده ما شفناهو!!!

Quote: في حاجة تانية احنا ما معفيين منها ياخالد و اللي هيَّا اولاد هندسة بيعيشوا الوهمة و الواحد بيركِّب مكنة مهندس من اول سنة غير كدة ود هندسة لازم يكون شِفِت و شرامي مقارنة بباقي طلاب الجامعة

ده يمكن يكون مربط الفرس! لكن الظاهرة دي عامّة .. يعني في كل الكليّات بتلاقيها

يا ريت لو الناس كلها عرفت مصلحتها وزي ما إجتهدت في الشهادة السودانيّة وجابت درجات دخّلتها الجامعة، تكمّل إجتهادها عشان تفيد نفسها وبلدها ..

إنتو الناس القالوا بيجوا يحكوا ذكرياتهم ديل مشوا وين؟!!

ولا لسّة مروّسين؟

خالد حاتم غباشي وسمارت:
ازيكم وكل سنه وانتو طيبين ..

2010 سنة خير عليكم يارب ..

Quote: إنتو الناس القالوا بيجوا يحكوا ذكرياتهم ديل مشوا وين؟!! ولا لسّة مروّسين؟

هههههه أبدا والله, بس عندي مشكله في الكونكشن من جهازي,
بحاول أعالج فيها :)

قبل ما نحكي قصص الضبضبه عايزه أدلي بدلوي في موضوع النقاش الدائر ..

موضوع الدفعه الأولها دكتور واخرها دكتور أو أولّها مهندس واخرها مهندس ..
حاسه الموضوع بالضبط زي السواقه ..
ساهل جدا انك تتحصل علي رخصه ,
وده بعد اجتيازك لامتحان القياده بنجاح وثقة أهل المرور في كفائتك
ومع ذلك الغالب في الشارع ممارسه للسواقه عجيبه !!!

بالنسبه لي فالوضع في مجالي مختلف,
واضح يمكن من الحكاوي اني درست Science واخترت ال Genetics كمجال للعمل والدراسه ..
بحضّر أو بتخصص في ال Molecular Biology of Cancer
في كليتنا التفوق والتميز شرط أساسي للاستمرار والنجاح ..
يعني الأداء الأكاديمي العادي بينتهي بالطالب غالبا الي ترك المجال ..
وده لأنه السودان الاهتمام فيهو بمجالنا ضعيف .. والفرص محدوده ..
أما لو عايز تحضّر وتلقي فرصه خارج السودان,
أغلب الجامعات العالميه بتطلب شهاده فيرست أو أبر عشان يتم قبولك ..
وعليه اذا الطالب ما وضع هدف أمامه وهو التميز في الكليه واحراز مركز متقدم,
غالبا ما حيلقي فرصه للمواصله في المجال بعد التخرج ..
ودي كانت الوصيه الوصوها لينا سنايرنا المتفوقين ..
شدّوا حيلكم شديد وجيبوا فيرست عشان تقدروا تبدوا بأول خطوه واثقه في طريق الاستمرار ..
عشان كده المنافسه علي الفيرست بتكون شرسه جدا خصوصا في السنين الأخيره ..

عن حكاويي, أحل مشكلة الكونكشن وأجيكم بمزاج,
بس حاولوا تطلعو بالبوست من طريق منبر اليوم الحار "هندسه وكدا"

---
علي فكره ماعارفه ترتيب الدفع كيف بيناتكم,
لكن من كلام غباشي يبدو انو الأقرب لي دفعة ..

Quote: الاقتصاد الهندسي ( الله لاعادو)

سلام يا خالد و اماني و سلام للشباب المسجلين غياب
نرجع للاقتصاد الهندسي ... كان كورس الم و ندم هاهاهاها
في سنة رابعة و هي برضو تُعتبر حفرة (زي سنة تانية) بالنسبة لناس مساحة لانو فيها كمية من الكورسات العضُم.
يا جماعة كتاب الاقتصاد الهندسي دا ان شاء الله 800 صفحة و بالانجليزي يا مرسي
و كلو مقرر الا جابتر واحد ما عارف لييه لغوهو لينا (جابتر صغير كدة)
و الاصعب من كدة الـ اتندنس اجباري و فيهو تيستات بتدخل بي نسب معينة كاعمال سنة .....
و الله جرسنا عدييييل لكن الحمد لله ربنا ستر (و الله مرقك بس الله مرقك)
تحية و احترام لاستاذ المادة دكتور ابو الجوخ (واحد من الدكاترة البيشتغلو بضمير) الله يديهو العافية

Quote: غايتو نحن زحف ناس هندسه من الصحراء الغربيه للعمران ده كان بيضحكنا ضحك, لما يصلوا بيكونوا مغبّرين عديل لووووول

بتضحكوا ?? انتو لو عارفين حجم المعاناة و المشقة البنتكبدها لحدي ما نصلكم ما كان حتضحكو فينا
يمكن تكوني عرفتي السبب البيخلينا نطفش من الكلية و نتدافع الى نواحيكم من كل فج عميق

Quote: مبروك الجايزه بأثر رجعي :)

الله يبارك فيك ... (بأثر رجعي برضو)

ازيكم تاني:
مشكلة الكونكشن لسه ما اتحلت,
لكن متفسحه في لاب توب زول نايم
قبل ما يصحي حأحكي ليكم كلمتين هههههه

وقفنا في سنه رابعه صاح؟
كانت من أصعب السنين علي الاطلاق,
كورسات تقيله جدا .. ومكثفه خالص,
وكمان عملي ساعات طويله ..
كنت في السنه دي قدرت أحدد الماده الحابه أستمر فيها لقدام ..
بمعني أحضّر فيها وهي ال Genetics
بندرس الماده دي من أولي لخامسه,
وكانت بدرسها لينا د. سميه أبو كشوه, وهي علم علي رأسه نار,
من أشهر Genetists في السودان ..
حبيت الماده من د. سميه وحسيت بيها عالم سحري,
حبيت كل ما يتعلق بالDNA وقوانين الوراثه الصعبه ومعقده,
كانت الماده دي بمثابة "فرّاق الحبايب" في الكليه ..
لأنها ماده عايزه متابعه من الانترنت ومن المراجع وتوسع والمام بكل ما هو جديد ..
كان المرجع البندرس منه هو

مرجع ضخم وكان تقريبا واحد في مكتبة الكليه واستلافه مستحيل ..
وبما اننا كنّا للأسف بندرس ونمتحن بالعربي رغم انو المراجع والمصطلحات العلميه كلّها انجليزي,
فكان أكثر ما اشتهرت به لاحقا وسط الكليه اني كنت بقعد في المكتبه بالساعت مقابله الكتاب ده,
واني قمت بترجمته كاملا
لاننا بناخده تقريبا كامل علي سنتين رابعه وخامسه,
كان عندي دفتر تم توارثه عبر الأجيال وفيهو ترجمة الكتاب ورسومات وأسهم وهوامش ياخالد بالألوان ههههههه

وكانت كل البريزينتاشنس بتاعتي واللي هي أعمال سنه مهمه جدا,
كانت عشره علي عشره, بروجكترز وبور بوينت وشغل مؤسس واتقان لانجاز أي موضوع أختاره ..

كانت تاني سنه ضبضبه حقيقيه كاملة الدسم,
كان دفعتنا فيها أوائل معروفين في كل السنين الفاتت,
وكنا في الأونر متقاربين في المستويات والمنافسه نار, وكان الكل متوقع نفس الوجوه القديمه في التوب فايف :)
ولاني دخلت في المنافسه جديد, كان احتلال مركز وسطهم بجداره ملفت للجميع..
لأنهم كانوا ضببه مجانين قدام ياقول خالد وصعب تخطيهم ..

انتهت سنه رابعه بضمان ال30% حقت السنه اللي بتتاخد في التقدير النهائي,
وكنا داخلين علي سنه هي أصعب سنين الدراسه علي الاطلاق,

في الاجازه تم اغلاق الجامعه لعدة أشهر بسبب مشاكل الاتحاد علي ما أذكر ..

وأثناء الاجازه قمت بأكثر حركة ضببيه في حياتي, حأحكي ليكم عنها المره الجايه ..

Quote: بروجكترز وبور بوينت

اماني يا دفعة (اذا كنتي في سنة خامسة مع تقفيلة الجامعة بتاعت 2002-2003)
طبعا احنا كنا ضد استخدام التكنلوجيا المترفة دي لاننا كنا بنعتبرها من وسائل الابهار (ثلاجات ليبهر وكدة) اللي بتشتت انتباه الـ audience و تداري العيوب في المادة المعدة
طبعا الفهم دا كنا ماسكنو حجه على واحد من قروبات دفعتنا ايام مشاريع التخريج لما قرروا يعملوا الـ presentation بتاعهم بي pwerpoint و يجيبو projector و كدة
كنا بنقول ليهم الطباشيرة دي مالا ? عيبوها لينا? وللا السبورة دي فيها شوك? شفتي الحسادة

غباشي يا دفعه :
كل أنواع البوجكترات تم استخدامها
Multimedia, Overhead , كلو كلو هههههههههه

انت عارف, بجديه نحن لأنه مجالنا بعد التخرج هو البحوث,
وبنشارك في ورش ومؤتمرات وحركات زي دي لتقديم Papers,
فجزء أساسي من الوهمه انك تكون ظابط التعامل مع التكنلوجيا دي ميه الميه,
طبعا انت عارف انو لما كنا في الجامعه النت والPower point والحاجات دي كانت قمة التكنلوجيا ههههه

بعدين الطباشير ده بيوسخ اليدين


-----
الضب السابق خالد يادوب مشي يرّوس وللا شنو؟

سمارت خلاص اظهر وبان :)

Quote: الضب السابق خالد يادوب مشي يرّوس وللا شنو؟

ازيك يا اماني

ترويسة شنو ليهو الضب دا ؟!!!

بكون لقا ليهو مرجع (غليد)

بكون (بتصفح) فيهو خلال فترة الإجازة


_____________________

متابع معاك (بشدة)

و ذكرتينا بالعلوم و الاندرلاب و تربيزة البنج

الكانت في الاندرلاب

إإإإإإإإإيه أيام يا دنيا

إلى الضب الهارب خالد عثمان

وصلتني هذه الرسالة بالبريد في منبر آخر و طلب مني

إيرادها لك هنا كاملة :

Quote: خالد عثمان سلام الله يغشاك وتهانينا بالدكتوراة والمقام الجميل البتستحقوا....وامنياتنا بى سنة جديدة يكون كل شى كما تشتهى متابع ومستمتع بى مزكرات الضب وشركاؤه وآخرون لا نعلمهم الله يعلمهم ثم قيل وأخريات (أنثى الضب شنو اتا )... يا خالد تستهوينى حكايات هندسة وتلك الأيام وان كنا فيها من غمار الموالى وعامة الناس يفرحنا الpass الساااى ومرات كتيرة تفرحنا الملاحق والبديل فهى منجاة عظيمة لمن كان مثلنا حين شدة وخوف الrpeat ...مع انو الدروينغ فى تانية قال لينا هوووى ما عايز معاكم...شنو ليكم؟...لبد لينا فى آخر الزقاق وأدانا مقص...وشفنا البورد يوم النتيجة نجوم نجوم...وبدرى صحيت من نومى السنة البعديها وماسك التى اسكوير تااااااااانى الله فى ....خسرنا رفقتكم وكسبنا دفعة جديدة ومهندسين آخرين...ما أنا دفعتك يا نيوتن او قبل ان يسبق الكتاب ... خالد الدعانى اكتب ليك انى عندى تعليق بسيط على حتة الاول مهندس والطيش مهندس الانت قلت ما مقتنع بيها... يمكن كلامك يحتمل الصح اويحتمل الخطأ كلنا عندنا زوايا شوف وزوووم بقرب ويكبر الصورة او العكس... يا خالد لو اقنعتنى انو مستوى استيعابك هو بنفس القدر من دكتور لى التانى تكون ماشى صح فى نظريتك... يا خالد لو اقنعتنى انو الطالبة البيتها فى الاسكان الشعبى الكلاكلة وبتضطر تمرق مع اذان الفجر عشان تلحق مقعد فى حافلة عشان تلحق باب دكتور عمر سويل البتقفل الساعة 8 وفى طريقها لى محطة الحافلات ممكن يتعرض ليها افراد مليشيات مسلحة يسلبوها حياتها ...منو البقنع دكتور عمر سويل انو حتى لو امتلكنا سيارات فنحن لا نمتلك الطريق والأمن.. لو اقنعتنى يا خالد انو البت دى البتبدا يومها بالخوف وتختمه بالخوف ممكن تستوعب دروسها بنفس كيفية البتمرق من بيتها فى الرياض ولا المنشية ولا حتى الصحافة زاتو لو اقنعتنى بتبقى ماشى صح فى نظريتك... يا خالد امتحانات الكلية يوم ما كانت معيار حقيقى للقدرات وقدامك كتير من الامثلة لى ناس كانوا فى العشرة الاوائل فى الشهادة السودانية ولمن دخلوا الكلية فشلوا فشل زريع وبعض منهم رسب بالسنوات الطوال....وبعض منهم اكتفى بال pass وهو بفتش فى حلمه القديم .. يا خالد فتش عن كلمة اسمها احباط دى كلمة سحرية جدا حتكون مفتاح لى اشاء كتيرة ممكن تكون غايبة عنك...دة البخلى فى طلاب فشلوا وطلاب نجحوا...ولمن يطلعوا للحياة برة بستردوا ثقتهم فى نفسهم وبحاولوا يحققوا الحلم القديم وبينجحوا... يا خالد الكلية فيها الاول مهندس والطيش مهندس... بس كل الحكاية... انو فى ناس بتجى بى آمال عرييييييييييييضة وينتهى بها الحال لخيبات كبيييييييييييييييييييييييييرة يااااخ نحمد الله كتير فى سوق الله أكبر اللمانا برة دة النجاح فيهو بيعتمد على انك بس تحمر عيونك للعمال وتعلى صوتك.......وصدقنى بتطير زى الصاروخ فى المناصب لو عملت الحاجتين ديل....قيل ثم تتدهنس شوية للمدير المهم يلا وااصل وسلامى الكتير لى كل شلتك وسلام خاص جدا للجميل هاشم على ومتابعين يا دوك ومتمتعين وشكرا لى مداخلات غباشى وامانى الامين وحاتم على وسمارت...وياا اسمارت أمانة كونى صوت المهمشين الزينا فى نادى الضبوب دة...هههه أمنتك التوقيع واحد من الناس

Quote: ما عندى حق اتكلم عن الدكاتره...لكن ممكن اتكلم عن المهندسين. الكلام القلتو ده جميل جدا يا خالد. و ياريت كل الناس تجتهد فى الجامعة و يتخرجوا ناقشين حاجه. و كويس جدا انك شجعت العيال اللى فى الكلية الان. لكن....خلينا واقعييين . ما ممكن الدفعة كلها تتخرج ب فرست كلاس. و الا ما ح يبقى فرست كلاس. و بالمناسبة ما لازم برضوا الدفعة كلها تعمل دراسات عليا. فى ناس بيقدروا عليها و فى ناس لا. فى ناس دخلوا الكلية دى (بالذات مدنية) عشان يبقوا مقاولين. و فعلا بقوا مقاولين ناجحين جدا. و بالمناسبة برضوا ما فى شئ عيب فى كده. بالعكس انا شايفه انها حاجه كويسه جدا جدا .الزول يكون عارف روحو عاوز شنو و فى النهاية يعمل الحاجه العاوزها. ناس عاوزين يعملوا قروش....و فعلا عملو قروش كويسه جدا. ناس عاوزه تتخرج بفرست و تعمل دراسات عليا ....برضو كويس. و الكلية فعلا اولها مهندس و طيشها مهندس.... طيشها مهندس باعتراف جامعة الخرطوم اللى ادتوا شهادة مهندس يمكن توثيقها من الشؤن العلمية و كل الحجات الكتيره ديك. ______________________________ ما تفهم انى ضد كلامك الفوق ده بان الناس لازم تجتهد. لكن كمان كل زول عندو امكانيات مختلفه ( ما بقول كويسه او اقل) بقول "مختلفة".

سمارت انا يا سلام عليك عارفة بي دفاعك دا عن (المهمشين) من سكان (البنشات) في كافتريا هندسة و كافتريا (السوق الشعبي) ناس الدكوك

و الامتحان بنقول صعب

وما فتحنا ولا كتاب

و كل المواد شلناها قاب

و لما القراية اتحسنت

قدينا بالحظ الكعب


عشان كلامك المكوت (اعلاه) عفيتك لله و الرسول

أمرقي من (جحرك) :P

و الله يجيب (سيد الضببة) خالد عثمان بي هنا تاني :D

Quote: المنظر الفي الصورة بتاعت الـ Tower دي بيذكرني ايام اللكاشر الغليدة ديك .. زي الـ Maths و الكهرباء و الاقتصاد الهندسي ( الله لاعادو) ... و للاقتصاد الهندسي مآسي

غباشي ازيك يا ود مساحة

كيفنك ياخي

تصدق و تآمن بالله

اللكاشر الغليدة و الMath الماسخ حق (الدومة) داك

لي يوم الليلة الواحد بهضرب بيهو

حكاويك طاعمة واصل ياخ

Quote: فى نادى الضبوب دة

وييين حاتم? ما شفناك من السنة الفاتت
تحياتي للاخ واحد من الناس .... و ارجو ان انوه الي انني لست ضباً كخالد و اماني
يا جماعة ما تاخدوا عني فكرة سيئة, اخوكم منكم و بكم
اخوكم كان شامي الجامعة و الكلية عشان كدة كنا بنضرب في بقاع السنتر للترويح عن النفس و في دي برضو ما تفهموني غلط
بجيكم و احكي ليكم برواقة لكن بس اختونا من صفة الضبضبة فهي شرف لا ادعيه و الضبوب الاساسيين قدامكم
مما سبق الا توافقوني في انو دي ما نفسيات زول ضب?
يللا ختو الكورة واطة و انا معاكو يا رجااااااله
معا لفضح اي ضب متواري و لنبدأ بخالد و اماني.....

هلا ياحاتم
فاقدنك في البوست
وخيرا فعلت انك عفوت عن سمارت لله والرسول,

Quote: متابع معاك (بشدة) و ذكرتينا بالعلوم و الاندرلاب و تربيزة البنج الكانت في الاندرلاب إإإإإإإإإيه أيام يا دنيا

شكلك برضو كنت من ناس الزحف الصحراوي زي غباشي,
وبتجوا علوم عشان الأندرلاب البارد ده, وطربيزة البنق, وكده

Quote: Multimedia, Overhead

Quote: فجزء أساسي من الوهمه انك تكون ظابط التعامل مع التكنلوجيا دي ميه الميه

ايواااااا ....
شكلك من النوع البخلي الـ سلايد تجي منبثقة من مكانٍ ما في الشاشة و تاخد ليها كم شقلبة على شخشخة و بعد شوية تَضَلِّم حبة كدة حتين الكلام يظهر ..........
الحقنا يا حاتم علي , اغيثينا يا اسمارت
عشان كدة قلنا طباشيرة و السبورة وبس

الحمد لله العلى الكريم اللى انعم علينا بعفو حاتم على و تعهده بعدم فضحنا فى الاسافير.
انا بصراحة ما خايفه من الفضيحة ..انا خايفه من الجلاجل....

و الله يا امانى ما شاء الله عليك....ربنا يوفقك كمان و كمان.

خالد عثمان ....انا (بصراحة) شايفه انو هندسة مدنية دى كلها عبارة عن Common sense .....يعنى ما ضرورى تتخرج حافظ كل معادلات ال fluid عشان تكون مهندس مويه ناجح.


ذى ما قلت لو قلت سطر واحد بس ..خالد ح يعرفنى....غايتو ح احاول...
الحاجه اللى انا اضبضبت فيها ضبضبه شديده كانت الرسم الهندسى. و ذى خالد و شلتو بتاعة الضبضبة...انا برضوا فى اجازة اولى لتانيه خلصت الرسم الهندسى...و اشتغلت اغلب التمارين.
الضبضبة الاساسية التانية كانت فى انى بديت من سنة رابعة احضر لامتحانات ال TOEFL و ال GRE عشان الدراسات العليا.

غباشى ...
رغم انك رافع شعار انك ما ضب......لكن باااااين عليك انك من ذوات الدم البارد (الزواحف....بصراحة,,,,,,انت ضب ولو نكرت)

___________________________________________________________
حاتم على .....مفروض انا و انت نرفع صوت كل المهمشين ناس البنشات.

Quote: خالد عثمان ....انا (بصراحة) شايفه انو هندسة مدنية دى كلها عبارة عن Common sense .....يعنى ما ضرورى تتخرج حافظ كل معادلات ال fluid عشان تكون مهندس مويه ناجح.

ازيك يا اسمارت

تعرفي القريناهو في الجامعة في جيهة و الشاغليين بيهو حسة في جيهة تانية

زمان انا كنتا شايف (الضغط و العصر) البعملوهوا فينا في هندسة دا لا إنساني

لكن إتضح لي إنو دا كلوا تهيئة نفسية (للحياة العملية) كمهندس

لانه في كثير من الاحيان بتكون مضغوط في الشغل أسوأ

من ضغطة الامتحانات و اللكاشر بتاعت المساء حقت الMetrology



________________

انا كان عارفك راجية تعهد من العبد الفقير لإعادة الظهور كان زمان اتعهدتا ههههههههه

أين ذهب (الضب) خالد عثمان خالينا (نبرطع) في بوسته ؟

بوست ممتع نتمني أن يتواصل .......................
فهمت من خلال البوست المعني المقصود من كلمة (ضب) بالنسبة لطلاب الجامعات ....... وهو الزول البحب القراية شديد وملازم المكتبة طوالي ....... واضح ان اغلب هولاء (الضببة) كانوا من المتفوقين واحرزوا المرتبة الأولي على دفعهم ....................... لدي تجربة مختلفة برغم اني كنت الأول العام على دفعتي واول العلوم القانونية (كلية الشرطة يناير 1987م - فبراير 1989م(
ما كنت بقرا كتير و اول زول بقول ياجماعة اطفوا النور عاوزين ننوم ......... برغم أنو عندنا ناس شايلين مراجع القانون الكبيرة ديك من اول يوم في الكلية وبساهروا في المكتبة .........ومابنوموا في المحاضرات ................ الامتحان الأول جيت فيهو الرابع والامتحان الثاني جيت التاني والامتحان الاخير الأول ............................ طبعا في فارق مهم بين امتحانات الشرطة والامتحانات في الجامعات ........... في الشرطة هناك حيز كبير جداً للامتحانات العملية الميدانية يعني ما كفاية تكون شاطر في القانون لازم تكون برضو شاطر في الرياضة والبيادة (الطوابير العسكرية) والسلاح ........... الخ
بالنسبة للقراية في رأي السر في انك تقرا شنو وتقراه كيف واحساسك العالي بمواطن الاسئلة المتوقعة والاحساس دي ما بجي من فراغ قطع شك عاوز متابعة للمحاضر وطريقة تفكيره وبحب شنو وبكره شنو بركز على شنو بحب الكلام الكتير والا ما قل ودل ........... الخ اذكر في امتحان مادة القانون الجنائي وكان بدرسنا ليها الفريق دكتور عادل العاجب نائب مدير عام الشرطة حالياً ........ كان دائماً يتحدث عن الفرق بين الرجحان والاحتمال كمصطلحات قانونية وكتبه لينا بالعربي والانجليزي رغم انو كنا بندرس بالعربي ................. دخلت امتحان الجنائي وكنت بفتش تفتيش زول متاكد عن سؤال الرجحان والاحتمال ........ طبعا لقيت السؤال وجاوبت عليه عربي وانجيلزي ..............حتى مشيت شفت باقي الامتحان فيهو شنو ..............

Quote: السر في انك تقرا شنو وتقراه كيف واحساسك العالي بمواطن الاسئلة المتوقعة

جنابو عمر شخصياً ...... welome و الله
اها يا حاتم و اسمارت جاكم ضب برتبة

طبعا يا كمندان بالنسبة للاسبوتنغ و التوقعات دي , محسوبك برة الشبكة يعني عكسكم تماماً انت و أماني الأمين (قبل الضبضبة)
بالنسبة لي اي حاجة ببيعها في القراية بلقاها وشش في الأمتحان و بتكون درجتها كبيرة كمان (شفتو الكُج دا كيف?)
عشان كده الموضوع بالنسبة لي كان يا ابيض يا اسود ... ودا برجعنا للمربع الاول بتاع اكون او لا اكون
و بالتالي كان لابد من وضع استراتيجية لتفادي نزيف الدرجات نتيجة لعمليات البيع دي

الاستراتيجية كالاتي (بس عليكم الله ما تقولوا عليّ ضب)
السيمستر بيكون فيهو من سبعة لي تمانية مواد (كتيييرة ياخ) في مواد بتاعت حفظ ودي كانت بتجرس اخوكم عديييل
(الكنته) كانت استغلال الزمن الكدة كدة رايح زي (المشوار من البيت للجامعة و العكس) و (الزمن البنقضيهو في الجامعة لحدي اخر اليوم)
يعني من السوق العربي للصحافة شرق اخر محطة دي براها زمن كتير بينفع لي مواد الحفظ
يعني لما كل مرة تتصفح الدفتر و تمر على الكلام المكتوب
بعدين لما تجي تقعد ليها في القراية بتبقى اسهل من لما تجيها للمرة الاولى

التكتيك كالاتي من ناحية الـ لوكيشن في الحافلة (لازم تكون روزا)
بعد تحديد اتجاه الشمس طبعاً, مافي احسن المقعد الورا السواق طوالي (لكن لو حصل حادث ... الله يرحمك)
ودا مفيد جداً لما تحب تعمل نايم من العوارض الممكن يمسكوا بيك زمن في اوقات الزروة (الامتحانات و كدة)
لا بأس ان تركب في حافلة فيها مسجل واوعك من الحافلةالبيكون فيها شله راكبين سوا او كمساري شليق و للا سواق مجنتر لانهم بيكونوا ثرثاريين جداً

Quote: بالمناسبة يا جماعة، أنا رسلت رابط الموضوع ده لكل أفراد الشلّة :) يعني لو ما كمّلت أفقدوني، يمكن يكونوا سكّتوني ولا حاجة

يا شلة ثماني السطوح:

Quote: أشرف (أينشتاين)، حاتم ص، حاتم ن، رامي، شرف، طارق، وأحمد الريّح

أطلقوا سراح خالد (نيوتن) فورا ..

والا معانا جنابو عمر عثمان في البوست ده ..
والباقي انتو عارفينو براكم


---
أنا حلّيت مشكلة الكونكشن وجيت للبوست ده بمزاج ..
عندكم مهله لغاية اخر الليل ..
لو كمّلت حكاويي وسيد البوست ما جاء,
البلاغ .. البلاغ ..

عارفه يا امانى...اشرف انشتاين (الضب الطويل) ده بيعملها.
______________________________________________________
ح توحشنا يا خالد

سمارت صاحبتي:

Quote: عارفه يا امانى...اشرف انشتاين (الضب الطويل) ده بيعملها. ح توحشنا يا خالد

كويس انك عميل خفي لصالحنا ..
حنحتاج لمعلومات استخباراتيه عن جميع أفراد الشله,
وخصوصا المذكور أعلاه,
عشان نمد بيها جنابو في رحلة البحث عن الضب السابق خالد (فك الله أسره)


-------
ياتري انت فين يا خالد

سلام يا شباب،

كل سنة وإنتو طيبين!

شايف النقاش سخّن

لكن كده كويّس، عشان الناس كلها تستفيد :)

وما تخافي يا أماني .. الموضوع ما هندسة وبس ;)


أوّل حاجة عاوز أوضّح نقطة يمكن تكون إتفهمت بصورة غير الكنت قاصدها..

لمّا قلت إنّي ما مقتنع بحكاية "دي كليّة أوّلها مهندس وطيشها مهندس" كان قصدي الحجّة البيقولها البعض عشان يبرروا عدم إهتمامهم

يعني قطعاً ما كنت قاصد كل الناس الما جابت first class؛ وطبعاً معروف إنّو كون الواحد ناجح ومتفوّق في دراسته، ما معناه إنّو حيكون مهندس ناجح، أو طبيب ناجح أو عالم ناجح ..

ولو الناس فهمت كده من كلامي، فأنا آسف إنّو كلامي ما كان واضح كفاية

الناس القصدتها بكلامي هم الناس الإتوفّرت ليهم ظروف عاديّة - وما بقول كل الظروف، لأنّو في بلد زي السودان فئة قليلة هي البتتوفّر ليها كل الظروف - لكن مع ذلك فضّلوا إنهم يركنوا لحجّة "دي كليّة أوّلها مهندس وطيشها مهندس" دي ويعدّوها ونسة وكافيتريات

ومن البداية قلت إنّي بستثني طلاب الداخليّات والناس الظروفها فعلاً صعبة

وبرضو مقتنع تماماً إنّو إمتحانات الكليّة - بشكلها الحالي - ما مقياس حقيقي لقدرات الطلاب


نجي لحكاية الإحباط ..

متفق جداً مع الناس البيقولوا إنّو الواقع ومناخ الجامعة بيكنو محبط لبعض الناس أكتر من التانيين

لكن - في رأيي - ده ما سبب يخلي الواحد يهمل في دراسته

يعني لمّا الواحد يهمل ده حيقلل إحباطه، ولا حيغيّر من الواقع؟ طبعاً لأ

وزي ما قلت؛ الدراسة الجامعيّة مفروض إنّها وسيلة لهدف معيّن - زي ما كانت إمتحانات الشهادة السودانيّة وسيلة - والواحد لو عندو هدف معيّن؛ سواء كان الهدف ده إنّو يعمل دراسات عليا، أو يدخل السوق ويبقي مقاول ناجح، ما مفروض يسمح للإحباط إنّو يتمكّن منّو

يا جماعة كلامي ده كلّه الغرض منّو تنبيه الناس اللسّه في الجامعة وبيقروا، لأنو لسّه في يدينهم يغّيروا مستقبلهم. والكلام عام، رغم إنّي أخدت هندسة كمثال ..



ويا حاتم بالله عليك بلّغ تحيّاتي لواحد من الناس، وقول ليه كمان جابت ليها مهمّشين! داير تقلبها لينا سياسة كمان!!

الضببّة ديل مختفين وين؟
:)

غباشي:

Quote: (الكنته) كانت استغلال الزمن الكدة كدة رايح زي (المشوار من البيت للجامعة و العكس) و (الزمن البنقضيهو في الجامعة لحدي اخر اليوم) يعني من السوق العربي للصحافة شرق اخر محطة دي براها زمن كتير بينفع لي مواد الحفظ يعني لما كل مرة تتصفح الدفتر و تمر على الكلام المكتوب بعدين لما تجي تقعد ليها في القراية بتبقى اسهل من لما تجيها للمرة الاولى التكتيك كالاتي من ناحية الـ لوكيشن في الحافلة (لازم تكون روزا) بعد تحديد اتجاه الشمس طبعاً, مافي احسن المقعد الورا السواق طوالي (لكن لو حصل حادث ... الله يرحمك) ودا مفيد جداً لما تحب تعمل نايم من العوارض الممكن يمسكوا بيك زمن في اوقات الزروة (الامتحانات و كدة) لا بأس ان تركب في حافلة فيها مسجل واوعك من الحافلةالبيكون فيها شله راكبين سوا او كمساري شليق و للا سواق مجنتر لانهم بيكونوا ثرثاريين جداً

طبعا كتلتني بالضحك ههههه

زي ما قالت سمارت صحبتي:

Quote: غباشى ... رغم انك رافع شعار انك ما ضب......لكن باااااين عليك انك من ذوات الدم البارد (الزواحف....بصراحة,,,,,,انت ضب ولو نكرت)

متابعين والله بي مزاج عالي وتقمص داخل التفاصيل
لامن الواحد بقى ينتابو شك انو هو البيحكي مش مجرد قارئ ..... واصلو يديكم العافية

الي حين عودة الضب السابق خالد نواصل ..

وقفنا في تقفيل الجامعه صاح؟
وقتها كنا علي مشارف خامسه ..
كنا بنعمل ك Tutors في معامل سنه اولي,
نوع من التدريب لينا ومراجعه لل Slides اللي حنمتحن عنّها لاحقا في حاجه اسمها ال General Lab
وهو امتحان بيشمل كل العملي الأخدناهو في الخمسه سنين الفاتت ..
وتم تقسمينا علي الدكاتره والبروفّات عشان نعمل مشاريع التخرّج اللي كنا بنسميها Dissertations
كانت دفعتنا فيها تقريبا 20 في سنه خامسه حأحكي ليكم عنّها وعن قروباتها لاحقا ..
اخترت طبعا مشروع تخرّج في مادتي المفضّله ال Genetics مع د. سميه أبو كشوه,
طبعا الاختيار ما كان بالسهوله دي, كنا بكتب رغبتنا في ورقه ونقدمها لناس القسم وهم البيقرروا,
ومرّات أكتر من طالب بيختار نفس ال Supervisor لكن غالبا كل دكتور بياخد Student واحد بس,
بمعني حتي في دي المنافسه كانت شديده,

المهم في المرحله دي قفّلت الجامعه ومنع دخول الطلبه منعا باتّا,

ولأنه سنه خامسه كانت سنه موت أو حياه بالنسبه لينا ..
ولأنه المشاريع عادة بتاخد كل وقت الطالب لأنه لازم يصل لنتيجه حقيقيه وشغل حقيقي,
قررت ومعاي صاحبتي الدخول للجامعه ومواصلة المشاريع تحت كل الظروف,
كنا بندخل علي أساس اننا Part timer teaching assistant في معامل سنه أولي
ونقضي النهار كله في المعمل مع طلبة الدراسات العليا,
خلال الفتره دي اتعلمت ال Technique الكان مفروض استعمله في بحثي,
وبديت جمع ال Samples,
وبعد عدة شهور ماوصلت لنتيجه واكتشفت انه موضوع البحث الأدتني ليهو الدكتوره ماممكن تنفيذه,
لأنه ببساطه الانزيم الكان مفروض أعمل ليهو Detection , ال Species الأنا شغاله فيهو أصلا ما بتفرزو,
ودي معلومه حتي في المراجع ما مذكوره !!!!
وبديت من الأول في بروتين مختلف,
ولولا اني بديت في الاجازه كان ممكن السنه تضيع بسبب المشكله دي,

المهم لما الجامعه فتحت كنت ظبطت ال Technique تماما,
ولاحقا خلّصت البحث في زمن وجيز, وأوّل زول سلّم وصححوا ليهو

وفضّل وضع خطه محكمه في الطريق نحو الفيرست كلاس,

قبليها حأحكي عن دفعتنا اللذيذه :)

دفعتنا كانت منقسمه قسمين بوضوح,
وكانت أغلبها بنات ..
القروب الأول كان بنات الداخليه وعددهم حوالي 5 بنات,
وزعيمة الشلّه (ت) كانت أشهر ضب في الدفعه,
كانوا تحركاتهم كلّها سرّيه وانجازاتهم في الخفاء عننا,
كانوا بيقروا مع بعض وبيفضلوا سوا لغاية بالليل بحكم سكنهم في الداخليه,
وكانوا بيمارسوا علينا ضغط نفسي فظيع بتحركاتهم المحاطه بالكتمان التام ..

القروب التاني كان قروب كبير عام بيشمل البقيه,
وفي داخلوا بعض التقسيمات الصغيره, يعني مثلا أنا وصديقتي (س) كنا معا شركاء في كل البريزينتايشنس,
وفي جلسات قرايه ثنائيه بالاضافه للقرايه العامه مع القروب الكبير والشرح,
وكان في القروب ده ضببه مجانين جد,
كنا بنتنافس ومع ذلك كانت روح الصداقه والمؤازره هي السائده بيننا,

في سنه خامسه كان الطالب بيعتبر القسم حقه,
كنا بندرّس في لابات سنه أولي, وعندنا مفاتيح أغلب معامل البحوث في الكليه,
وعايشين حياتنا بصفه مستمره في القسم,
كان عندنا لاب كبير بيجمعنا كلّنا اسمو معمل أبحاث السنه الخامسه,
بندرس ونصلي ونرتاح وناكل ونقرأ في شكل قروب فيهو باختصار كنا متضبضبين اخر ضبضبه في اللاب ده,
مرات كنا بنغني مع بعض لما القرايه تقوم بينا زي ناس خالد هههههه
ومرات لما واحده تحصل ليها مشكله في المشروع بتاعها وتبكي وتنهار نبكي معاها كلّنا
في المرحله دي كانت الكافتيريا حلم جميل لا نجرؤ علي التفكير فيهو ههههه

مع انو فردتي (س) كانت محبه للحياه أو بتحب (تو انجوي هار تايم) علي قول قيقراوي ههههه
مرات كتيره نكون عندنا بريزينتايشن مهم تاني يوم, وأنا بصور في المراجع وبجهّز وهي مختفيه
غالبا بعد رحلة بحث مضنيه عنّها بقبضها بالثابته في الكافتيريا
ودي كانت جريمه لو تعلمون عظيمه,

كنا يوميا بعد انتهاء اللكاشر بنقعد مع بعض القروب الكبير للشرح,
وبعدين بنقعد أنا و (س) للمذاكره, وكنت برجع البيت مرّات 8 مساءا تاني اخد دش وأصحصح وأقعد أذاكر براي لغاية قريب الصباح,

وتفشت الاشاعه انو أماني فيرست الدفعه للسنه دي من طلاب المستوي الورانا,
الغريبه اني كنت شايفه نفسي بعيده تمام البعد عن الفيرست,

كان لسه باقي وضع خطّه للفيرست, وماكان عندي حتي تلك اللحظه خطه ..

لغاية ما اتكلمت مع صديقتي لاحقا, سنيري ومساعد تدريس معينه في القسم,
عن الطريق الي الفيرست,
وكان الطريق اللي اتبعته وظبط معاي ميه الميه ,,,

حأواصل ,,

Quote: الضب السابق خالد يادوب مشي يرّوس وللا شنو؟

موجووووود يا أماني، ومستمتع جدّاً بحكاويكم وبالضبّبة البدت تطلع من جحورها . لكن بس إنشغلت شويّة .. :)

Quote: ترويسة شنو ليهو الضب دا ؟!!! بكون لقا ليهو مرجع (غليد) بكون (بتصفح) فيهو خلال فترة الإجازة

حاتم ياخ شكلك ما ناوي تجيبها البر!!

ياخ ضبّبة المراجع ديك معروفييييييين :)

Quote: يا شلة ثماني السطوح: Quote: أشرف (أينشتاين)، حاتم ص، حاتم ن، رامي، شرف، طارق، وأحمد الريّح أطلقوا سراح خالد (نيوتن) فورا .. والا معانا جنابو عمر عثمان في البوست ده .. والباقي انتو عارفينو براكم --- أنا حلّيت مشكلة الكونكشن وجيت للبوست ده بمزاج .. عندكم مهله لغاية اخر الليل .. لو كمّلت حكاويي وسيد البوست ما جاء, البلاغ .. البلاغ ..

فيك الخير يا أماني؛ لكن الشلّة براءة المرّة دي :)

يا إمّا لسّة ما قروا الموضوع، أو لسّة بيستوعبوا في الصدمة!

Quote: عارفه يا امانى...اشرف انشتاين (الضب الطويل) ده بيعملها. ______________________________________________________ ح توحشنا يا خالد

لاقيتوا علي المسينجر أمس يا سمارت، وكان فعلاً لسّة ما قرأ الموضوع

غايتوا خلّيتو بيحاول يشوف الحاصل شنو

Quote: سمارت صاحبتي: Quote: عارفه يا امانى...اشرف انشتاين (الضب الطويل) ده بيعملها. ح توحشنا يا خالد كويس انك عميل خفي لصالحنا .. حنحتاج لمعلومات استخباراتيه عن جميع أفراد الشله, وخصوصا المذكور أعلاه, عشان نمد بيها جنابو في رحلة البحث عن الضب السابق خالد (فك الله أسره) ------- ياتري انت فين يا خالد

١٠٠ ١٠٠ يا أماني

يعني الواحد بقي متطمّن إنّو لو في ناس حاولوا "يتاووه" في البيفقدوه

Quote: نرجع للاقتصاد الهندسي ... كان كورس الم و ندم هاهاهاها في سنة رابعة و هي برضو تُعتبر حفرة (زي سنة تانية) بالنسبة لناس مساحة لانو فيها كمية من الكورسات العضُم. يا جماعة كتاب الاقتصاد الهندسي دا ان شاء الله 800 صفحة و بالانجليزي يا مرسي و كلو مقرر الا جابتر واحد ما عارف لييه لغوهو لينا (جابتر صغير كدة) و الاصعب من كدة الـ اتندنس اجباري و فيهو تيستات بتدخل بي نسب معينة كاعمال سنة ..... و الله جرسنا عدييييل لكن الحمد لله ربنا ستر (و الله مرقك بس الله مرقك) تحية و احترام لاستاذ المادة دكتور ابو الجوخ (واحد من الدكاترة البيشتغلو بضمير) الله يديهو العافية

طبعاً يا غباشي نحن في مدنيّة أكتر قسم كانت عندنا مواد ومحاضرات معاه كان كيميائيّة؛ وإفتقدناهم فعلاً لمّا أخيراً ما بقت في مواد مشتركة معاهم - لأسباب معروفة

لكن لمّا سمعنا بالإقتصاد الهندسي البيقروهو، وإنتو معاهم، حمدنا ربنا!

الإقتصاد الهندسي الدرسناه كان ممتع جدّاً؛ وزاده متعة أسلوب أستاذ المادة، د. مدّثر سليمان الله يديه العافية :)

Quote: فيك الخير يا أماني؛ لكن الشلّة براءة المرّة دي :)

حمد الله علي السلامه ..

حنكلم جنابو يقفل المحضر المره دي هههههههه

غباشي ياضب يا متخفّي :

Quote: شكلك من النوع البخلي الـ سلايد تجي منبثقة من مكانٍ ما في الشاشة و تاخد ليها كم شقلبة على شخشخة و بعد شوية تَضَلِّم حبة كدة حتين الكلام يظهر ..........

هههههههههههه
قلنا وهمه وتكنلوجيا لكن ماقلنا بري ههههههه

Quote: مرجع ضخم وكان تقريبا واحد في مكتبة الكليه واستلافه مستحيل .. وبما اننا كنّا للأسف بندرس ونمتحن بالعربي رغم انو المراجع والمصطلحات العلميه كلّها انجليزي, فكان أكثر ما اشتهرت به لاحقا وسط الكليه اني كنت بقعد في المكتبه بالساعت مقابله الكتاب ده, واني قمت بترجمته كاملا لاننا بناخده تقريبا كامل علي سنتين رابعه وخامسه, كان عندي دفتر تم توارثه عبر الأجيال وفيهو ترجمة الكتاب ورسومات وأسهم وهوامش ياخالد بالألوان ههههههه

والله ما شاء الله يا أماني!!

يا حاتم، أهم ضبّبة المراجع ظهروا وبانوا!

قلتي لي ترجمتيهو، وبالألوان كمان!

Quote: كان عندي دفتر تم توارثه عبر الأجيال

Quote: طبعا احنا كنا ضد استخدام التكنلوجيا المترفة دي لاننا كنا بنعتبرها من وسائل الابهار (ثلاجات ليبهر وكدة) اللي بتشتت انتباه الـ audience و تداري العيوب في المادة المعدة طبعا الفهم دا كنا ماسكنو حجه على واحد من قروبات دفعتنا ايام مشاريع التخريج لما قرروا يعملوا الـ presentation بتاعهم بي pwerpoint و يجيبو projector و كدة كنا بنقول ليهم الطباشيرة دي مالا ? عيبوها لينا? وللا السبورة دي فيها شوك? شفتي الحسادة

دي الحسادة ذااااتها يا غباشي! يعني زي ما قالت خالتنا أحلام: واللي ما يطول العنب، حامضٍ عنّه يقول، وكده ..

لكن عارف؛ الحاجة المؤسفة إنّو الكليّة مفروض توفّر الوسائل دي لكل الطلاب، لأنّو ما كل الناس عندها كومبيوترات

لكن العين بصيرة، واليد قصيرة

لمّا جيت الجامعة الحضّرت فيها، لقيت طلاب البكالوريوس بيسلّموا أعمال السنة مطبوعة علي الكومبيوتر!

Quote: عشان كلامك المكوت (اعلاه) عفيتك لله و الرسول أمرقي من (جحرك) :P و الله يجيب (سيد الضببة) خالد عثمان بي هنا تاني :D

كده برضو يا حاتم؟ سمارت أنا تغشّك بكلمتين تخليك تطلّعها من زمرة الضبّبة!! شوفها قالت شنو:

Quote: الحاجه اللى انا اضبضبت فيها ضبضبه شديده كانت الرسم الهندسى. و ذى خالد و شلتو بتاعة الضبضبة...انا برضوا فى اجازة اولى لتانيه خلصت الرسم الهندسى...و اشتغلت اغلب التمارين. الضبضبة الاساسية التانية كانت فى انى بديت من سنة رابعة احضر لامتحانات ال TOEFL و ال GRE عشان الدراسات العليا

يا جماعة أنا "بهدّي النفوس" بس، زي ما أخواننا المصريين بيقولوا!

Quote: اللكاشر الغليدة و الMath الماسخ حق (الدومة) داك لي يوم الليلة الواحد بهضرب بيهو

أقول ليك سر يا حاتم؟ إمتحان الmath بتاع الدومة كان ٣ ساعات. أخوك بعد الساعتين الأوائل خلاص .. كل الممكن أحلّه حلّيتو، والباقي ما عارف أعمل فيه شنو!!

علي فكرة الباقي ده كان جزء مقدّر من الإمتحان! وما كان هاين عليّ أسلّم الورق! بقيت أتفرّج علي الناس وأحاول أطمّن نفسي إنّو الحالة عااااامّة


كان إمتحان تعيس ياخ

غباشي:

Quote: ارجو ان انوه الي انني لست ضباً كخالد و اماني يا جماعة ما تاخدوا عني فكرة سيئة, اخوكم منكم و بكم اخوكم كان شامي الجامعة و الكلية عشان كدة كنا بنضرب في بقاع السنتر للترويح عن النفس و في دي برضو ما تفهموني غلط بجيكم و احكي ليكم برواقة لكن بس اختونا من صفة الضبضبة فهي شرف لا ادعيه و الضبوب الاساسيين قدامكم مما سبق الا توافقوني في انو دي ما نفسيات زول ضب? يللا ختو الكورة واطة و انا معاكو يا رجااااااله معا لفضح اي ضب متواري و لنبدأ بخالد و اماني.....

Quote: (الكنته) كانت استغلال الزمن الكدة كدة رايح زي (المشوار من البيت للجامعة و العكس) و (الزمن البنقضيهو في الجامعة لحدي اخر اليوم) يعني من السوق العربي للصحافة شرق اخر محطة دي براها زمن كتير بينفع لي مواد الحفظ يعني لما كل مرة تتصفح الدفتر و تمر على الكلام المكتوب بعدين لما تجي تقعد ليها في القراية بتبقى اسهل من لما تجيها للمرة الاولى

وسمارت أنا:

Quote: حاتم على .....مفروض انا و انت نرفع صوت كل المهمشين ناس البنشات.

Quote: الحاجه اللى انا اضبضبت فيها ضبضبه شديده كانت الرسم الهندسى. و ذى خالد و شلتو بتاعة الضبضبة...انا برضوا فى اجازة اولى لتانيه خلصت الرسم الهندسى...و اشتغلت اغلب التمارين. الضبضبة الاساسية التانية كانت فى انى بديت من سنة رابعة احضر لامتحانات ال TOEFL و ال GRE عشان الدراسات العليا

إنتو يا جماعة الضب ده إلا يقوم ليهو ضنب يعني!!!

Quote: ايواااااا .... شكلك من النوع البخلي الـ سلايد تجي منبثقة من مكانٍ ما في الشاشة و تاخد ليها كم شقلبة على شخشخة و بعد شوية تَضَلِّم حبة كدة حتين الكلام

غباشي إنت ما نصيح!

Quote: انا بصراحة ما خايفه من الفضيحة ..انا خايفه من الجلاجل....

Quote: ذى ما قلت لو قلت سطر واحد بس ..خالد ح يعرفنى....غايتو ح احاول...

أكتبي كتابتك ... الموضوع ده شبه إتحسم! ;)

Quote: خالد عثمان ....انا (بصراحة) شايفه انو هندسة مدنية دى كلها عبارة عن Common sense .....يعنى ما ضرورى تتخرج حافظ كل معادلات ال fluid عشان تكون مهندس مويه ناجح.

معاك في نقطة الحفظ دي .. لكن الفهم ما في غني عنّو

في حكاية المعادلات دي؛ أنا ما شايف ليها معني! المفروض - زي ما هو حاصل في الدول المتقدمة - تكون كل المعادلات موفّرة للطلاب في الإمتحان، لأن المحك في الحياة العمليّة هو إستخدامك للمعادلات دي .. مش كونك حافظاها ولا لأ! :)

سلام يا جنابو عمر، وشرّفتنا :)

Quote: فهمت من خلال البوست المعني المقصود من كلمة (ضب) بالنسبة لطلاب الجامعات ....... وهو الزول البحب القراية شديد وملازم المكتبة طوالي ....... واضح ان اغلب هولاء (الضببة) كانوا من المتفوقين واحرزوا المرتبة الأولي على دفعهم ....................... لدي تجربة مختلفة برغم اني كنت الأول العام على دفعتي واول العلوم القانونية (كلية الشرطة يناير 1987م - فبراير 1989م(

كلامك صحيح. وما شاء الله عليك ..

Quote: طبعا في فارق مهم بين امتحانات الشرطة والامتحانات في الجامعات ........... في الشرطة هناك حيز كبير جداً للامتحانات العملية الميدانية يعني ما كفاية تكون شاطر في القانون لازم تكون برضو شاطر في الرياضة والبيادة (الطوابير العسكرية) والسلاح ........... الخ

Quote: بالنسبة للقراية في رأي السر في انك تقرا شنو وتقراه كيف واحساسك العالي بمواطن الاسئلة المتوقعة والاحساس دي ما بجي من فراغ قطع شك عاوز متابعة للمحاضر وطريقة تفكيره وبحب شنو وبكره شنو بركز على شنو بحب الكلام الكتير والا ما قل ودل ........... الخ

دي نقطة مهمّة شديد، لأن أغلب الناس البيعتمدوا إعتماد شبه كامل علي الspotting بيكونوا ما بيحضروا المحاضرات، أو ما بينتبهوا فيها

واصل يا جنابو، وأكيد عندك ذكريات ممتعة :)

Quote: متابعين والله بي مزاج عالي وتقمص داخل التفاصيل لامن الواحد بقى ينتابو شك انو هو البيحكي مش مجرد قارئ ..... واصلو يديكم العافية

مرحب بيك يا منتصر :)

Quote: المهم في المرحله دي قفّلت الجامعه ومنع دخول الطلبه منعا باتّا, ولأنه سنه خامسه كانت سنه موت أو حياه بالنسبه لينا .. ولأنه المشاريع عادة بتاخد كل وقت الطالب لأنه لازم يصل لنتيجه حقيقيه وشغل حقيقي, قررت ومعاي صاحبتي الدخول للجامعه ومواصلة المشاريع تحت كل الظروف, كنا بندخل علي أساس اننا Part timer teaching assistant في معامل سنه أولي ونقضي النهار كله في المعمل مع طلبة الدراسات العليا, خلال الفتره دي اتعلمت ال Technique الكان مفروض استعمله في بحثي, وبديت جمع ال Samples, وبعد عدة شهور ماوصلت لنتيجه واكتشفت انه موضوع البحث الأدتني ليهو الدكتوره ماممكن تنفيذه, لأنه ببساطه الانزيم الكان مفروض أعمل ليهو Detection , ال Species الأنا شغاله فيهو أصلا ما بتفرزو, ودي معلومه حتي في المراجع ما مذكوره !!!! وبديت من الأول في بروتين مختلف, ولولا اني بديت في الاجازه كان ممكن السنه تضيع بسبب المشكله دي, المهم لما الجامعه فتحت كنت ظبطت ال Technique تماما, ولاحقا خلّصت البحث في زمن وجيز, وأوّل زول سلّم وصححوا ليهو

أماني!!!!!!!

والله ما شاء الله عليك! لاااااا ... إنتي كده فتّي مرحلة الضب بمراحل

يعني بقيتي ديناصور!

Quote: كنا بندرّس في لابات سنه أولي, وعندنا مفاتيح أغلب معامل البحوث في الكليه, وعايشين حياتنا بصفه مستمره في القسم, كان عندنا لاب كبير بيجمعنا كلّنا اسمو معمل أبحاث السنه الخامسه, بندرس ونصلي ونرتاح وناكل ونقرأ في شكل قروب فيهو باختصار كنا متضبضبين اخر ضبضبه في اللاب ده,

Quote: كنا يوميا بعد انتهاء اللكاشر بنقعد مع بعض القروب الكبير للشرح, وبعدين بنقعد أنا و (س) للمذاكره, وكنت برجع البيت مرّات 8 مساءا تاني اخد دش وأصحصح وأقعد أذاكر براي لغاية قريب الصباح

ما قلت ليكي!

Quote: وكان في القروب ده ضببه مجانين جد

ما أهو باين .. p:p:p:

Quote: في المرحله دي كانت الكافتيريا حلم جميل لا نجرؤ علي التفكير فيهو ههههه مع انو فردتي (س) كانت محبه للحياه أو بتحب (تو انجوي هار تايم) علي قول قيقراوي ههههه مرات كتيره نكون عندنا بريزينتايشن مهم تاني يوم, وأنا بصور في المراجع وبجهّز وهي مختفيه غالبا بعد رحلة بحث مضنيه عنّها بقبضها بالثابته في الكافتيريا ودي كانت جريمه لو تعلمون عظيمه

بالجد ذكرياتك ممتعة. كمّلي بالله :)

Quote: حمد الله علي السلامه .. حنكلم جنابو يقفل المحضر المره دي هههههههه

الله يسلّمك .. جات سليمة المرّة دي

غباشي،

وينك ياخ، تعال كمّل إعترافاتك

ويا سمارت أنا، زي ما قلت ليك ... give up وتعالي أحكي :)

Quote: ولأنه سنه خامسه كانت سنه موت أو حياه بالنسبه لينا .. ولأنه المشاريع عادة بتاخد كل وقت الطالب لأنه لازم يصل لنتيجه حقيقيه وشغل حقيقي, قررت ومعاي صاحبتي الدخول للجامعه ومواصلة المشاريع تحت كل الظروف, كنا بندخل علي أساس اننا Part timer teaching assistant في معامل سنه أولي ونقضي النهار كله في المعمل مع طلبة الدراسات العليا, خلال الفتره دي اتعلمت ال Technique الكان مفروض استعمله في بحثي, وبديت جمع ال Samples, وبعد عدة شهور ماوصلت لنتيجه واكتشفت انه موضوع البحث الأدتني ليهو الدكتوره ماممكن تنفيذه, لأنه ببساطه الانزيم الكان مفروض أعمل ليهو Detection , ال Species الأنا شغاله فيهو أصلا ما بتفرزو, ودي معلومه حتي في المراجع ما مذكوره !!!! وبديت من الأول في بروتين مختلف, ولولا اني بديت في الاجازه كان ممكن السنه تضيع بسبب المشكله دي, المهم لما الجامعه فتحت كنت ظبطت ال Technique تماما, ولاحقا خلّصت البحث في زمن وجيز, وأوّل زول سلّم وصححوا ليهو

لا لا لا.....دي ضبضبة قويه شديد.....امانى شكلى كده ح اختك مع ناس كتب الماث الروسية....ضببه من العيار القيل.
ماشاء الله....الجامعة دى لسه فيها ناس كويسين و شاطرين.

طيّب .. نرجع للذكريات

الموضوع ده نزّلتو في مقال منفصل قبل زي شهرين كده، لكن قلت أحسن المذكّرات تكون كلها في مكان واحد وكده

Quote: الجمعة ٦ فبراير: أصبحنا وأصبح الملك لله! الليلة يوم الرجال - زي ما بيقولوا في الأغنية p: عاينت برّة البيت لقيت الجليد نازل!! غايتو الليلة يحلنا الله. أشيل وأدعي ... يا رب الممتحن الخارجي يقدر يجي من النمسا وما تتأجّل المناقشة! ******** فبراير شهر ليهو تأثير في حياتي ... والدي رحمة الله عليه توفي في فبراير، وأنا لسّه في تانية جامعة. وأختي الوحيدة وضعت مولودها في فبراير برضو. محمد اللي خلّاني خال، بدل خالد! ومناقشتي برضو في فبراير ... ******** كعادتي كل جمعة، إتصلت بالوالدة اسأل عن أحوالها. كل ما يكون في حاجة مهمّة في حياتي، لازم اسألها الدعاء؛ ولقيت بركة دعائها كتييييير جدّاً لكن المرّة دي مختلفة المرّة دي كنت عاوز أفرحها وأعمل ليها مفاجأة كانت عارفة إنّو مناقشتي حتكون في فبراير. لكن ما قلت ليها اليوم. عشان كده قصدت إنّي أتصل بيها بدري اليوم ده عشان ما تشك في شئ. وبرضو كالعادة طلبت منها الدعاء ******** جيت ألبس عشان أمشي الجامعة ... أهااااا ألبس بدلة زي ما الغالبيّة العظمي من الناس بيعملوا؟ ياخ الموضوع ما ناقص زنقة، أقوم أكتّف نفسي زيادة بكرفتّة كمان! أخترت قميص جديد أهداه لي واحد من أعز أصدقائي لمّا زرتو في الإمارات: أشرف :) ******** في الجامعة بديت أراجع في الحاجات الما متأكّد منها. شغلي أنا عارفو، لكن المشكلة إنهم ممكن يسألوا عن أي شئ ليهو علاقة بمجال تخصصي المهم جاء وقت صلاة الجمعة ومشيت المسجد .. ******** لمّا كلموني إنّو المناقشة حتكون يوم جمعة، قلت يا رب ما يمنعني وقتها من صلاة الجمعة. والحمد لله، لاحقاً قالوا لي إنها حتكون في وقت بعد الصلاة دعيت في الصلاة إنو المناقشة ما تتأجّل، وإنّو الممتحن الخارجي يقدر يجي. كنت عاوز أخلص بعد سنين من التعب والإرهاق. كم مرّة ومرّة بيّت فيها في الكليّة أو في مركز الأبحاث الموجود في آخر البلد! لوحدي في مبني طويل عريض! بعد الصلاة لقيت مكالمتين من تلفون ثابت، واضح إنّو تبع الجامعة!! الله يستر ما يكونوا عاوزين يقولوا لي إنّو المناقشة إتأجّلت!!! ******** إتصلت بالرقم، وفعلاً ردت علي سكرتيرة الممتحن الداخلي مالكم، الحاصل شنو؟ قالت لي إنّو الممتحن الخارجي وصل أبدر من مواعيدو (الحمد لله)، وإنهم عاوزين يعرفوا لو عندي مانع يقدّموا وقت المناقشة. قلت ليها إنّي برّة الجامعة الآن وما في طريقة؛ لكن حأكلمها لمّا أصل الجامعة المهم. رجعت وواصلت مراجعتي، لكن بتركيز أقل الموضوع بقي جد الجد! بعد شويّة كده قلت يا زول هوي، كتلوك، ولا جوك .. جوك! لملمت حاجاتي ومشيت عليهم الله يستر ... ******** دخلت، وبدينا الجلسة نظام المناقشة في جامعتنا هو النظام البريطاني. بيقفلوك إنت والممتحن الداخلي والممتحن الخارجي في غرفة ما معاكم فيها أي زول تاني الوقت البتاخدو المناقشة بيعتمد علي الرسالة نفسها وعلي الممتحنين. في ناس مناقشتهم بتاخد ساعتين، وفي ناس مناقشتهم أخدت ٨ ساعات، أخدوا خلالها وقت مستقطع للأكل ورجعوا! كنت متفائل بخصوص وقت المناقشة لأنهم حدّدوا ليها يوم جمعة، يعني قبل عطلة نهاية الأسبوع، والساعة ٣ عصراً كمان قلت طالما الممتحن الخارجي حيجي من برّة البلد، أكيد حيكون عاوز يخلّص الموضوع ويرجع يقضّي الإجازة في بلدو ******** أوّل ما بدينا، الممتحن الخارجي قال عندو أسئلة عامّة. قلت ما مشكلة! من حقّو برضو المهم؛ سؤال هنا وسؤال هناك ... حاجات جاوبت عليها صح، وحاجات كان إنتقادهم لي فيها في محلّو ... وكل ما نمشي أكتر في الرسالة، أقول هانت ... قربنا نصل لنهايتها ووصلنا النهاية!! وصلنا النهاية؟ الممتحن الخارجي قال عندو أسئلة عامّة تانية!!! كلاااااام ... هوّه احنا مش هنروّح ولا إيه؟ ******** وأخييييراً... إنتهيت الحكاية!!! وأخيراً سمعتها منهم: مبروك ... :) كلمة خلت تعب السنين الفاتت كلها ما يروح هدر! الحمد لله! وطلعت منهم والفرحة ما سايعاني. خلاص ... خلصت الحكاية! ساعتين ونص شكلت فاصل بين الفات من عمري وبين الجاي يا ربنا لك الحمد والشكر كما ينبغي لجلال وجهك وعظيم سلطانك ما بحب عادة إنّي أسرف في التفاؤل، عشان لو لا قدّر الله ما حصل العايزو ما تكون الصدمة كبيرة لكن المرّة دي كنت واثق إنّو ربنا سبحانه وتعالي ما حيضيّع تعبي هدر الحمد لله ... :) ******** وكان أول شئ عملتوا إنّي كلمت الوالدة. كانت مع بقيّة خالاتي في بيت حبّوبتي الله يرحمها. وجاني صوتها قلقاً ومستغرباً إنّي كلمتها مرّة تانية قلت ليها عاوز منّك زغرودة كبييييرة وقلت ليها إنّي الحمد لله ناقشت ونجحت! وما سمعت أي كلام بعدها ولمّا إتصلت مرّة تانية ردوا عليّ خالاتي والكل فرحان. وطمنوني علي الوالدة وكلمتها مرة تانية لاحقاً لمّا جات تحضر التخريج خليتها تحكي لي الحصل شنو وشعورها كان كيف. قالت لي إنّو كل العملتوا إنها رمت الموبايل من يدها، وجرت علي باقي خالاتي تقول ليهم خالد نجح ... وبدأت تبكي طبعاً ما كان قصدي إنّي أصدمها. حبيت أعمل ليها مفاجأة مفرحة، وما كنت عايزها تعيش اليوم كلّو في قلق وهي مستنّية تسمع النتيجة لكن الحمد لله الذي بنعمته تتم الصالحات :)

Quote: غباشي، وينك ياخ، تعال كمّل إعترافاتك

جاييك يا خالد
و بطِّل الدردقة و الاستدراج البتعمل فيهو دا شنو خلاص طوالي قلبتها اعترافات
يا جماعة الحقو اخوكم يُغرر به الآن بواسطة الضب خالد (الكلام دا لحاتم و اسمارت)
و بيني وبينك يا خالد اسمارت دي زاتها بعد ما جابت ليها ضبضبة في الـ TOEFL و الـ GRE عضويتها مع ناس الهامش بقت في مهب الريح
عشان كدة لازم حاتم يفك لينا الملفات القديمة لانو دايرين نعمل جمعية عمومية و نفرز الكيمان
جاييييكم يا شباب

Quote: لاحقاً عرفت إنّو لقبي في الدفعة كان نيوتن

بمناسبة نيوتن ابت نفسنا الا ان تشارككم الاحتفال بيومكم السعيد هذا
يا جماعة بالله كلنا كدة (مهمشين+ ضبوب) نهنئ الضب خالد نيوتن
بمناسبة عيد ميلاد نيوتن سيد الاسم الاصلي Isaac Newton اليوم الموافق الرابع من يناير
و على الضبوب في باقي دول العالم مراعاة الـ Time Zone difference
كما نتمنى لجميع انواع الضبوب ما ظهر منها و ما بطن بضبضةٍ مركَّزة لا ينسون بعدها ابداً.



Newton Tree

Quote: جاييك يا خالد و بطِّل الدردقة و الاستدراج البتعمل فيهو دا شنو خلاص طوالي قلبتها اعترافات يا جماعة الحقو اخوكم يُغرر به الآن بواسطة الضب خالد (الكلام دا لحاتم و اسمارت) و بيني وبينك يا خالد اسمارت دي زاتها بعد ما جابت ليها ضبضبة في الـ TOEFL و الـ GRE عضويتها مع ناس الهامش بقت في مهب الريح عشان كدة لازم حاتم يفك لينا الملفات القديمة لانو دايرين نعمل جمعية عمومية و نفرز الكيمان جاييييكم يا شباب

براك جبتو لنفسك يا غباشي

لكن ما عليك

تعال كمّل بس :)

قال يغرر بيه قال!

Quote: و بيني وبينك يا خالد اسمارت دي زاتها بعد ما جابت ليها ضبضبة في الـ TOEFL و الـ GRE عضويتها مع ناس الهامش بقت في مهب الريح

مش قلت ليك! كده سمارت أنا إنكشفت - وإنت no comment! - يبقي فاضل نطلّع حاتم من جحره

Quote: بمناسبة نيوتن ابت نفسنا الا ان تشارككم الاحتفال بيومكم السعيد هذا يا جماعة بالله كلنا كدة (مهمشين+ ضبوب) نهنئ الضب خالد نيوتن بمناسبة عيد ميلاد نيوتن سيد الاسم الاصلي Isaac Newton اليوم الموافق الرابع من يناير و على الضبوب في باقي دول العالم مراعاة الـ Time Zone difference كما نتمنى لجميع انواع الضبوب ما ظهر منها و ما بطن بضبضةٍ مركَّزة لا ينسون بعدها ابداً.

لا ما قصّرت يا غباشي

طبعاً أخوك إتصوّر قريب من الشجرة دي، لكن ما في أي تفّاح جاء واقع

Quote: وأخيراً سمعتها منهم: مبروك ... :) كلمة خلت تعب السنين الفاتت كلها ما يروح هدر! الحمد لله!

مبروك بأثر رجعي :)

سرد جميل, وكأننا كنّّا معاك يوم الامتحان:)




---
عقبالي يارب لما أخلّص وأفرح زيك كده :)

خالد و امانى....بغرتونى....
انا من بكره ماشه اشوف لى درب قراية و PhD

Quote: خالد و امانى....بغرتونى.... انا من بكره ماشه اشوف لى درب قراية و PhD

سمارت GRE ... اظهري على حقيقتك و بلاش الملاوعة ....

قال بغَّرتوني قال !


ــــــــــــــــــــــــــــــ
نعتذر عن الانقطاع ...
اخوكم الايام دي عامل الرحيل و كدة ...
لحدي ما استقر في البيت الجديد بجييكم
شايف الضبضبة ذادت عن حدها و لابد من حسمها
اخوك بقى محاصر من قِبَل الضبوب و السحالي

تحية للضبوب المتواجدون هنا


انقطاع مؤقت و سنعود اليكم يا ضببة


تحياتي لاماني و سمارت و غباشي و خالد

و نتمنى ظهور اخر للضب خالد

الضببّة ديل إختفوا وين؟
:)

Quote: مبروك بأثر رجعي :) سرد جميل, وكأننا كنّّا معاك يوم الامتحان:) --- عقبالي يارب لما أخلّص وأفرح زيك كده :)

الله يبارك فيك يا أماني، وعقبالك إن شاء الله :)

Quote: خالد و امانى....بغرتونى.... انا من بكره ماشه اشوف لى درب قراية و PhD

سمارت إنتي،

أخيراً قررتي تظهري علي حقيقتك!
p:

Quote: نعتذر عن الانقطاع ... اخوكم الايام دي عامل الرحيل و كدة ... لحدي ما استقر في البيت الجديد بجييكم شايف الضبضبة ذادت عن حدها و لابد من حسمها اخوك بقى محاصر من قِبَل الضبوب و السحالي

غباشي!

ده كلّو لسّه ما استقرّيت في البيت الجديد!!!

تعال كمّل إعترافاتك D:

Quote: تحية للضبوب المتواجدون هنا انقطاع مؤقت و سنعود اليكم يا ضببة تحياتي لاماني و سمارت و غباشي و خالد و نتمنى ظهور اخر للضب خالد

يا حاتم، ناسك كلهم بانوا علي حقيقتهم

فضلت إنت بس
D:

ونواصل ..

في أول سنة كنت ماخد حكاية متطلبات الجامعة من عربي وإنجليزي وثقافة إسلامية جد شديد، قبل ما أعقل وأعاملها بما يناسب الوضع العملتو ليها الجامعة

يعني مواد لو قفّلتها أو جبت 40 من 100 فيها، في الحالتين بتلقي جنب إسمك حرف P بس - يعني نجاح! طيّب أتعّب نفسي علي شنو!!

المهم، في أول سنة فرض علينا أستاذ الثقافة الإسلامية تقيم بحثين: واحد عن سورة يس والتاني عن الجنائز والقبور والشهداء

وتعالوا شوفوا الكبكبة والضبضبة!!!D:

لفيت المكتبات أفتّش في مراجع أكتب منها! مكتبة المين ... مكتبة قانون .. مكتبة الدراسات العليا (!) .. وحتّي مكتبة القبّة الخضراء!!!! p:

لمّا الواحد عقل، بقيت بشوف المكتوب في محاضرات المواد دي قبل الإمتحان بيوم (gap day)؛ وأحياناً بدّيها جزء من يوم بس

الحكاية ما عدم إحترام للمواد دي

لكن بصراحة ما شايف أي لازمة إنّو طالب هندسة يدرس عربي في الجامعة!!! حتّي الثقافة الإسلامية، كنت مقتنع إنّو الدرسناه في ال12 سنة قبل الجامعة كفاية

يمكن الإنجليزي يكون شويّة مفيد لأنه علمي scientific english. لكن برضو ما كانت فائدة تستحق!

لمّا دخلت الجامعة كانت رغبتي إنّي أدرس هندسة معمار

ولقيت معارضة للموضوع ده من أهلي وبخاصة من والدي وأحد أعمامي - رحمة الله عليهما - ومن خالي. عمي وخالي الإتنين مهندسين مدنيين. وكلهم كانوا مقتنعين إنّو مستقبل هندسة المعمار في السودان ما مضمون

حتّي بنت عمّي الكانت بتدرس معمار وقتها حاولت تقنعني إنّو معمار ما زي ما كنت فاكر

المهم .. بعد شد وجذب وتفكير، قررت أدخل مدنيّة

أوّل أيام كانت صعبة عليّ شويّة

يعني تخيّلوا نحن في مدنيّة محاضراتنا كانت مشتركة مع ناس كيميائيّة وكهرباء. يعني كل محاضرة فيها ما لا يقل عن 200 طالب!!

والمحاضرات ذاتها كيف كيف!

ولمّا أمشي علي ناس معمار ألقاهم في مرسمهم مشغلين المكيّفات وسامي المغربي يقول يا ليل!

يعني فرق يجيب نفسيّات

عشان كده معظم أصحابي في بداية السنة كانوا من معمار، وكنت بقضي معظم الوقت بين محاضراتي في مرسمهم

بعدين وصلت لقناعة إنّي أحوّل معمار!

وفعلاً، كلّمت رئيس القسم ووافق بشرط موافقة رئيس قسم مدنيّة، د. خدّام. وفعلاً د. خدّام ما أبدي إعتراض

ووصل الموضوع لدرجة إنّي مشيت مكتب القبول عشان أحوّل ورقي! وبرضو ما كانت في مشكلة لأنو نسبتي في الشهادة السودانيّة كانت بتدخّلني معمار والحمد لله

المشكلة الوحيدة كانت إعتراض والدي رحمة الله عليه

زعل منّي شديد في الموضوع ده، وتوتّرت علاقتي بيه كم يوم

بعدين قعدت بالورقة والقلم وحسبت الحكاية من كل النواحي

ووصلت لإقتناع تام إنّو أحسن أكمّل في مدنيّة. وفعلاً ده الحصل

واحتفظت بالورقة الكتبت فيها إيجابيّات وسلبيّات كل خيار من الإتنين عشان أرجع ليها لو شعرت بالندم علي قراري

ولسّه الورقة موجودة عندي، لكن الحمد لله ما اضطرّيت أرجع ليها تاني

وكل ما أتذكّر إنّي زعّلت والدي في يوم أقول الحمد لله إنّي قررت أكمّل في مدنيّة