دكان ود البصير .. جمال الفات

.

في القِرّة أم هبوب عمنا شال خريجو وقام على دكانتو ، الرزق سبح واتلمو النسوان
سلام يا ود البصير
حبابكن
هيا حليمة ما شفتي شيلة فاطنة بت مُحُمَد جابلو ليها شيلة الهنا
ها ؟ جابو ليها شنو
أجي! جابو ليها ديييك يا السحارة والكابديلو ، وعنقريبييين فرطه واللحافات
وعنقريبين هبابي وبرش
أجي شيلة الهنا
أصبري يختي لسة ، لي التبروكه ما خلوها، المشلعيب، المترار
اللداية، الدحلوب، الدوداية، الدُلُك، الكنتوش،الدوكه والقرعة
شيلة البنيات لي حدهن




أدونا معاني الكلمات البي الأحمر دي وزودونا بي الما عارفنو ...

التحية لصاحبة البوست ولات الفكرة جديدة فانا ساكون متكل في البوست ده ومصنقر لحدي ما نشوف الصريف ...
وماجاء من كلمات نجاوب علي ثلاثة منها ..
القرة وهي البرد الشديد ..
الخريج وهي تصغير خرج وهي ما يحمل عليه المتاع ..
العنقريب الهبابي وهو سرير مصنوع من القد ...

والله يا البت الحديقة

تاريك ماكي هوينة


بجيك راجع

وبتربع ليك وسط عنقريبك دا ..


ومعاي الكتير


تسلمي

عبير سلام
يا ني الجاي متحكر هنا
لكن ما زي ود حنين " ام درماني و ود حبوبات "
اهاااااا بعد العوض

السحارة :-
صندوق خشبي محدب الغطاء مزين بقطع معدنية في أركانه (غالباً نحاسية)
لتزيد من متانته تحفظ به الأغراض الخاصة جداً أو الملابس.

الكابدلو :-
مصنوع من السعف شكله يشبة "ثمرة الكمثره" بطول في حدود 75 سم له غطاء من السعف
لا ينفصل عنه نثبت بواسطة اليد من السعف أيضاً مطرزة عليه رسومات من السعف الملون.
كثيراً ما يحفظ به الطعام الجاف مثال (الأبري الأبيض والأحمر)

العنقريب الهبابي :-
عقريب صغير الحجم قصير الأرجل منسوج من القـِد (جلد مقطع في شكل شريط)
نسجه به فتحات كبيرة مما يزيد من عامل التهوية خفيف الوزن يسهل تحريكه
" ما أمتعه تحت شجرة نيم في هبايب الخريف "

البرش :-
فرش أرضي من السعف بعرض متر ونص تقريباً وطول ما يقارب 5 أمتار
يستخدم لصلاة الجماعة والجلوس في الافراح والأتراح
هناك أنواع أخري من البروش منسوجة من السعف الملون تفرش فوق المرتبة
للعريس يوم الحنة
وأيضاً نفس البرش الملون يفرش على عنقريب الجنازة.

لسه وجايك للباقي

فتك بي عافية
إسماعل حميم


.

أهاااا وقفنا وين ؟

التبروقة – كما تنطق :-
تبروقة الصلاة
مصلاية دائرية الشكل من السعف لها يد من صوف الماعز تعلق منها
على مسمار في الحائط للحفظ
وأيضاً يطلق أسم تبروقة على مصلاية من جلد البقر أو الجاموس .

المشلعيب :-
مصنوع السعف عبارة عن قاعدة دائرية ترتفع منها ثلاثة حبال تلتقي في الأعلى في شكل مخروطي
تعلق وسط القطية أو الغرفة توضع عليه مواعين الطعام للحفظ . . . . . " يعني الثلاجة "

المترار :-
أداة يدوية غزل القطن وتحويله لخيط مصنوع من الخشب
عبارة عن دائرة خشبية في مركزها عود يشبة قلم الرصاص ثلثيهاأسفل الدائرة

اللداية :-
ما أعتقد إنها جات مع الشيلة !!!
اللدايات حجارة تسمح بوضع الحطب أو الفحم تحت مواعين للطبخ
ويمكن أن تبنى من الطين ويوضع عليها صاح العواسة

لسه جايك . . . . سمح
أنوم شوية وأجيك


فتك بي عافية
إسماعيل حميم

.
التعديل بعض الحروف الخطأ

.

إسماعيل حاء نقطة ميم

بالله إنت معانا في المنبر ده

لو عارفاك ما كان كتبت البوست


لكن بقدر عليك قدرة

أها وريني القصة دي شني يا ودالعم

ود الجمد مجمود
بت التصوت بالعود
ود التكيتو مليتو
بت التقد البيتو

.

أهلا يا حنين حبابك

البوست ده أمانة ما بيمرق أمبور من تكلتها

أكييييييد سمعت بي النالة بتاع التياب

بيمش ليهو النسوان في المناسبات

اها النالة شنو

والكرباب والصريف

.

وتحية ليك يا العوض

الدانقة اتملت ما شاء الله

عقبال لي الديناب

....

Quote: عمنا شال خريجو وقام على دكانتو

الخريج تصغير خُرُج وهو مما لا يوضع على ظهور الدواب فى غالب حينه،
و إنما يُحمل على الكتف و هو من القماش الدمور أو التيتل القوى أو ما تبقى من كواكىِّ العسكر
بعكس الخُرُج و الذى يَحتمِل أن يصنع من الخيش و البرش و سعف النخيل أو خلافه،
الخريج أداة لاغنى عنها فى الخلاء و السرحة ففيها يخبئ الرعاة شايهم
و سكرهم و ترتوسهم ، و يدفسون فيها التمر و الزوادة و السقيا، و للخريج
صلة قربى أو ربما سًرارة بالمُخلاية و التى تشبهه فى الفائدة و تختلف عنه فى الشكل
فغالبا ما تكون المخلاية عينا واحدة بينما الخُرُج والخريج عينين إثنتين ،
و أذكر أننا لطالما عبثنا و نحن صغار بخريج جدى - عليه الرحمة- بحثاً عن التمر و حلوى الدربس
وأقراص النعناع الأبيض .






لقيتينى كيف و أنا مركب مكنة ود أبو عاقلة ؟


عبير ياختى الشوق شوالات و العليم الله .






.....

لسه معاكم

الكنتوش :-
حلة طبخ من الطين المحروق " الفخار " مقعرة القاعدة عريض القُطر في وسطها عن أعلها
والله فيها حلاة ملاح أو طبيخ . . " لامبالغة " . شامبيون بس
بالمناسة الكنتوش صحي للإستعمال أكثر عن المواعين المعدنية . . والله اعلم

برضو جاي

فتك بي عافية
إسماعيل حميم

.

القرعة :-
ثمرة نبات خلوي من القرعيات لا تؤكل لها أحجام مختلفة
ما بين البرتقالة والبطيخة الصغيرة مجوفة من الداخل بها بذور
وأيضاً أشكالها مختلفة أغلبها كروية وأحياناً لها زراع .
تستخدم لشرب الماء والسوائل بعد قطع الكروي منها لنصفين وحرق حافته
بقطعة معدنية مسخنة على اللهب لإبعاد طعم المرار الذي فيها.
وتستخدم في العواسة كـ "غرافة " للعجين.
كما تستخدم للزينة بالرسم عليها خاصة الاشكال النادرة منها
وأيضاً ذات الزراع منها تستخدم كآلة إقاعية


فتك بي عافية
إسماعيل حميم


.

اسماعيل حميم تُُر يا غادي ..
انتو قايلين براكم نرباية حبوبات !!
بجي اكونجن ليكم بوستيكم ده زي الترتيب ..

.

أناعارفة البوست ده حيمرق الناس الفوق لي الـ60 سنة ونص

حميم بالله ما تشاغل

.

طيب

سموهو كنتوش لييه

.

الوليد عمر إزيك

وحبابك وأخبارك شنو

صاح كلامك

سمح اها وريني

التقل والتيبار

والمنّون

العزيزة عميدة بورداب الخرطوم حباب النفاج ده ..
وقبل ما نقول كلامنا نكوت الفقرة دي قبل اي احتمال للسحب ..


----------------------------------------------------------------


ود الجمد مجمود
بت التصوت بالعود
ود التكيتو مليتو
بت التقد البيتو


-------------------------------------------------------------

وكان سلم العود القلم بجود ...

Quote: اسماعيل حميم تُُر يا غادي .. انتو قايلين براكم نرباية حبوبات !! بجي اكونجن ليكم بوستيكم ده زي الترتيب ..

العوض آاااا أخوي
بترلك لا عن غادي

بس قول لي كوجينك دا وبلا برمة وكُنش !!

باقي الكوجين بدورلو صاجاً كبير !


عبير

أهااا ختينا الخمسة في الإتنين

وأدي قعدة



كل الود

إسماعيل حميم


.

.....

Quote: التقل والتيبار والمنّون

إنتى هسع ما سعلتينى من الترتوس مالك ؟

Quote: ترتوسهم

يعنى خلاص عرفتيهو لامن بتسعلى من التيبار؟

أها التيبار ياتو ، أبقحفة وللا الخمَّار ؟




....

العزيزة عمدة بورداب الخرطوم - لأسبق

إسماعيل حميم عضو مجلس العمدة – الاسبق



كدا كيف يا عمدة

صادق الود
إسماعيل حميم


.

من الأمس!





من الأمس شنو ياخ!
من السنة الفاتت عديل!

Quote: في القِرّة أم هبوب عمنا شال خريجو وقام على دكانتو ، الرزق سبح واتلمو النسوان سلام يا ود البصير حبابكن هيا حليمة ما شفتي شيلة فاطنة بت مُحُمَد جابلو ليها شيلة الهنا ها ؟ جابو ليها شنو أجي! جابو ليها ديييك يا السحارة والكابديلو ، وعنقريبييين فرطه واللحافات وعنقريبين هبابي وبرش أجي شيلة الهنا أصبري يختي لسة ، لي التبروكه ما خلوها، المشلعيب، المترار اللداية، الدحلوب، الدوداية، الدُلُك، الكنتوش،الدوكه والقرعة شيلة البنيات لي حدهن

النجيضة .. من الكلمات دي عرفت:
الخريج، عنقريب الهبابي، البرش، التبروكة، المشلعيب، الدوكة، والقرعة!!

اولا البوست ده زي ماقالت عبير خيري حايجيب كبار السن وما فوق الستين , والكلام ده واضح المقصود به الجلكون احمد حنين والجلكون الا شوية
اسماعيل حميم .. وقد ياتي الي هنا الكثيرين وياتي الينا الرائح ليهم الدرب في الشوك زي ودالصايم ده ..

شوق يا حميم الحكاية دي وتعال رد ..
عمتنا امنة بنت التوم الدلالية لافة النطع وختت جوة الجراب الشملة والرويحلة ورفعتهم فوق تندة البرينسة ,, واتقلقلت في البرنسة من قدام ,
واول ما وصلت البيت مشت التكل ودخلت علي القطيع وملت التيبار بالموية من عد ناس حاج احمد ,,وما نست تجقم ليها موية من السعن ..

وكدي خلينا نشوف المكاتل احمد حنين يورينا معاني الكلمات دي ..

قام عمك حسن ود حاج طه من دغشا بدري وكلم الاولاد يحفروا المطمورة وبعد داك يشيلوا الملودة يعملوا الكديب للقمح ,,
وقال ليهم اختكم دار الخلود زحوها من الشمس لانه شمس السنة الفاتت خلت شعرها كدمور ..وكمان القفة املوها معاكم من الخضار ..
وذكرهم بانه لازم تبنوا السوريقة علشان الخريف قرررب ..وما تنسوا تشيلوا قرقاب حبوبتكم معاكم .. وكمان لازم تشوفوا الجبون اتخيط ولا لسع ..
وكان رجعتوا البيت افتحوا الطاقة علشان الحشرات ما تاكل المحصول ...

وكان غلب احمد حنين نتمني ترد لينا ست البوست عبير ...ويمكن للجميع الرد لانه المذكورين ما حايقدروا يفيدونا بشي

استاذه عبير تحياتي وودي

.

Quote: النجيضة .. من الكلمات دي عرفت: الخريج، عنقريب الهبابي، البرش، التبروكة، المشلعيب، الدوكة، والقرعة!!

ود الصايم.. إزيك

نحنا برضو المن الأمس

باقي ليك تعرف المهدي كان بياكل شنو!

.


وليد إزيك

الترتوس النارو قايدة ز نار البلد دي؟

قلت لي مواليد كم الأخ؟

الترتوس جذور الشجر العريض بولعو بيهو نيران الدوكة وما بينطفي

أها:

الشّم خوخن بردن ليالى الحره

والبراق برق من منا جاب القره

شوف عينى الصقير بجناحو كفت الفره

تلقاها ام خدود الليله مرقت بره


بعد ماتغنيهاورينا الحاصل شنو

Quote: عمتنا امنة بنت التوم الدلالية لافة النطع وختت جوة الجراب الشملة والرويحلة ورفعتهم فوق تندة البرينسة ,, واتقلقلت في البرنسة من قدام , واول ما وصلت البيت مشت التكل ودخلت علي القطيع وملت التيبار بالموية من عد ناس حاج احمد ,,وما نست تجقم ليها موية من السعن .. العوض آاا خوي

ملك الحاجات البادي بيها كلها كُتر كدي

النطُع : يشبه مصلاية السعف به فتحة دائرية في وسطه بزيادة قليل عن "حفرة الساونا"
تجلس عليه المرأة.
الجراب : إن كان جراب النطع فهو كيس من قماش الدمورية يحفظ فيه.
الشملة : غطاء من صوف الماعز يشبة البطانية تستخدمه النساء عند الجلوس على النطع
على حفرة الساونا
الرويحلة : من الطين تشبه التيبار " الزير " وهي بديل متحرك لحفرة الساونا
تندة البرينسه : سّبت أعلى بوكس مصمم لحمل الركاب من ماركة برنس.

اتقلقلت : جلست (والخوف بعينيها تتأمل فنجان مقلوب) بي مهلة
دحين التقلقل دا ما بكون الواطة اريح.

التكل : ممكن تقول مطبخ ومخزن الإثنين (انا حا أوصف ليك تكل بيتنا في أمدرمان)
غرفة من الجالوص (الطين) بمساحة 5*5 بها مدخل شمالي وغربي بدون أبواب
وسبعة طاقات بالحائط الشرقي وستة بالجنوبي وخمسة بالشمالي وفي وسطها شعبة
تسند مرق الضخم يحمل المروق الصغير لعرش الغرفة.
في الركن الجنوبي الغربي يوجد صاج العواسة لدايته مبنية بالطين شرقه الخمارة
وبالقرب منه الريكةوجنوبه صاج الكوجان.
وفي شرق التكل تجد سرير العدة (أب سلك نملي داك) تحته الطشت والجردل جنبهم
كورة الصابون وليفة السلك
ووفي الجنوب الشرقي تلقى المناقد الكباروالصغار والصفايح الدبل أمات رزة
وطبلة بتاعات السكر والعيش.

القطع : مخزن داخلي

التيبار : الزير دا مش عرفنا بيه الرويحلة فوق.

العد : البئر (عد حسين وعد بابكر وعد الفرسان)

تجقم : الجقيم دا خليه لي ناس ود الصائم وعبدالوهاب يسوهو في الشامبيون
بالمناسبة اسم جاقوما دا كان عندنا في ابوروف بدأ تسمية لي شاب دفعتنا ثم صار
اسم متعارف عليه لكل الأسرة.

السعن : من جلد الماعز الكامل تُحمل تحفظ فيه الماء
وأيضاً يخج فيه الروب (ما بطاقات) لإستخراج الفرصه لعمل السمن البلدي.

أهاا يا العوض لسه قاعدين


كل الود
إسماعيل حميم


.

وين احمد حنين زائغ من الرد علي الاسئلة دي ..

اخوي الزلمي العوض

انت الأيام دي البقدر عليك منو؟؟؟


لهجتك بقت لبناني

وفطورك تبولة وبابا غنوج...


بجيك راجع ...

أحمد حنين .. خليني أستفسر منك
التبولة دي شنو ؟

السيد.. سلامات

يا اخوي انا زاتي ما عارف

اسال منها اخونا العوض..

لأنو الايام دي اصبح لبناني الهوي

مش اتكلم مع مذيعة لبنانية علي الهوا

وقبض يد السفير علي الهوا...


يلا خليهو يجي ورينا التبولة دي شني؟؟؟؟