قصة عمنا عبد القادر مع شراب ( المريسة والسجائر )

قصة عمنا عبد القادر مع شراب ( المريسة والسجائر )

يوسف عبد القادر بن عمنا عبد القادر توقف تحصيله العلمي عند المرحلة الابتدائية او مرحلة الأساس كما يسمونها حاليا ، ترك المدرسة رغبة في الزواج المبكر ، والعمل المافيهُ تعب قراية ، مكث في القرية فترة من حيطة ل حيطة ومن ضل ل ضل ، ومن عربية ل عربية ( مساعدي ) وما في نتيجة .
يا أبوي أنا عاوز اغترب أنا عاوز دخل ، والأب صامت ، توسطنا ليوسف عند أبيه ، يا حاج عبد القادر ولدك مقلق وزهجان وعاوز يهاجر وقال ما لق شغل هنا في السودان ، بيع ليه بقرة بقرتين عشان اغترب ( عمرة وزوغة ) ، ول أديه العربية البوكس (83) المقرشة دي ، فأجاب عمنا عبد القادر بغضب أديه حقي عشان امشي اشرب المريسة وابخبخ السجاير ، فقلنا له المريسة خلاها وتاب منها، ونحن صدقناه ، اما السجاير الفقهاء مختلفين فيهو ناس قالوا حرام وناس قالوا مكروه ، وبين الحرمة والكراهية في فرصة ، فرد بغضب انا ما في حرمته ومكروهيته ، أنا في الزول الماعندو دخل وعاوز اتفنكه ، وواصل قائلا السجاير للزول العندو دخل ما فيه مشكلة ( وكل شاة معلقة من عصباته ) ، لكن للزول الماعندو دخل ( إسراف وسفاهة فنكهة فارغة ) .
فعدنا ليوسف وأخبرناه بفشل مهمتنا مع والده ، وقلنا ليهُ شوف ليك اى شغلانة لحد ما ربنا يسهل وتنفرج .
ومنذ ذلك الوقت وأنا اتامل في عبارات عمنا عبد القادر في المريسة والسجاير .

علي محمد علي
الخرطوم
[email protected]