Post: #1 Title: أخبار الطقس في السودان Author: sudania2000 Date: 03-31-2007, 01:31 PM
درجة الحرارة القصوي 45 درجة
درجة الحرارة الدنيا 13 درجة
الشمس ساطعة جدا بلا غيوم
والكتاحة شديدة جدا بلا توقف
ترتفع تقطيبة الجبين حتي تصبح خارطة الطريق
ترتفع الحناجر بالزعيق
تقطع االمياه والكهرباء
ولا عزاء لمحمد احمد وان ملك البترول والماس واليورانيوم
تختلف الاجواء بين الولايات
ولا تغيير يذكر في درجات الحرارة
السياسة مسخنة وسجمانة
والاجواء برضو مضلهمة و تعبانة
نحن من هنا ننادي بوجوب الهجرة الجماعي
وتتختلي بلاد السود لبعض من يملك الدنانير من اهل الصين و الواق واق
عمال من كل الجنسيات
وتتكدس العطالة
بماجستير سائق رقشة
وبدكتوراة فاتحة محل مبيدات ومضروبة كمان
ولازالت القصة مستمرة
خلونا من السياسة
وخلونا من الساسة
السخانة الجاتنا دي يحلوها كيف؟؟
تغيير كوني كبير
لم ينزل علينا بالجليد وانما زمهرير
اللهم ارضنا واكفنا
Post: #2 Title: Re: أخبار الطقس في السودان Author: مجدي عبدالرحيم فضل Date: 03-31-2007, 02:16 PM Parent: #1
الجو مالو ماجميل وبنشوفوا في النشرة الجوية والكهرباء كمان بقة فيرنس وديزل وموية ما بتقطع! والتعريفه رخيصه في متناول كل يد والأسرة الدخله محدود كمان لا عود ولا شهاب بوقدوا ديل بقوا البوتجاز أب غار بيأخدوا وكتير خير الوزير أول أمبارح معنا علي الفضائية بجلابيتوا المكوية وهاااك ياتنظير في المحطات البينفزوا فيها والله ربنا يحيينا عشان نشوف ولكن نااااس الداخل ديل أتعودوا خلاص علي الجو ده همبريب يجيكي من النيل وكمااااان منو تعبي الفتيل والجمااااعات البتهجر دي بتدلع ساكت ما في ساخنة جو ولا جيوووووووووب الناس سماااااااان ونضاااااااف وبالموبايلات يشوف الطقس،،، وبلادنا دي أحسن نخليها لناااااااس ديل أن شاءالله يملؤها صيينين وبنقلاديش وحتي كماااان ناس الساحل والقطبين روسيا والبلطيق ونااااااس بوش بيجوا لدارفور عشان يمنعوا القتل والتقتيل ومعاهم سحاباااااااااااات تضلل المشردين؟!!!!
Post: #3 Title: Re: أخبار الطقس في السودان Author: هاشم أحمد خلف الله Date: 03-31-2007, 02:27 PM Parent: #2
Quote: السخانة الجاتنا دي يحلوها كيف؟؟
سؤال وجيه جداً , أنا غايتو غيرت فكرة أجي إجازة للسودان في الفترات
القادمات , شكراً كثيراً علي المعلومة دي والوالدة بعرف أشوفها كيف .
Post: #4 Title: Re: أخبار الطقس في السودان Author: sudania2000 Date: 03-31-2007, 10:47 PM Parent: #3
مجدي سلامات
الصيف تشكو الهيئة من ضعف مياه النيل
والخريف تشكو من قوة ضغط المياه علي الخزانات فتفتح البوابات
الحلول الباقية هي : للفقراء فقط:
1. شجرة نيم وليمون لكل بيت لزوم الضل والعصير المجاني والسكر ماضروري
2. برميل موية لزوم الطوارئ وسهر الليالي حتي يمتلئ البرميل من سرسرة المياه بالليل .. وممكن حبة تسالي
مجبور أنا التايه واقف في سكتك كل الدروب جربتها بدايات
طيف الأمل الباقي في أوتار الغناوي إلا تاهت خطاي معاك ،،،
بانت في خطواتك دمعات وحروفها تحكيها العبرات ،،،
تحرق فينا وتبكينا دروب في الريده شايكه باشواق النظرات،،،
ماتت معاي الكلمات وكل الغناوي الباقيات،،،
تاهت في دجي الحكاوي الشابكة ليل الأمل وراحت سراب،،،
في بحار الآسي سابحه وغارقه مجبور أنـــــــــــــــــــــا!!
أبوقـ مجدي عبدالرحيم ــصى
Post: #5 Title: Re: أخبار الطقس في السودان Author: bashir adam abdalla Date: 03-31-2007, 11:29 PM Parent: #1
الاخت سودانية غيتو دا اسخن طقس تحت الحزام اشوفو
يديك العافـــــــــــية
Post: #6 Title: Re: أخبار الطقس في السودان Author: عبدالمنعم خيرالله Date: 03-31-2007, 11:54 PM Parent: #5
السودان ده بلد الصورة فيهو مقلوبة وزى ما سماهو اخونا واحد كدة سودان الافراح اصبح الاستثناء هو الوضع الطبيعيى والوضع الطبيعي هو الاستثناء وهاكم مثال على ذلك : 1-تركب المواصلات وتجد كرسى فاضى تفرح وتتبسم لماذا لان الوقوف شماعة اصبح هو الوضع الطبيعي ووجود كرسى هو الاستثناء 2-وكذلك الكهرباء 2-الماء ,,,,,,,,وهلمجرا عزائى الوحيد لاهلى واحبابى بالوطن ان تتبدل الاحوال باحسن حال
Post: #8 Title: Re: أخبار الطقس في السودان Author: sudania2000 Date: 04-01-2007, 07:08 AM Parent: #6
تحياتي للجميع
ونصيحة لاصحاب العمل في السودان بتغيير مواعيد العمل كالاتي
من الساعة 5ص وحتي 11 ص فترة اولي ومن 5م الي 10 م فترة مسائية
لنقي البشر هجير الايام ونوقع علي استمارة عمل وانتاج يومية
اللهم اقني شر شمس السودان
Post: #9 Title: Re: أخبار الطقس في السودان Author: sudania2000 Date: 04-03-2007, 12:02 PM Parent: #1
قليل من الماء يكفي
اضافة جديدة الي قاموس البيري بيد في السودان
والماء في زمهرير الصيف بيري بيد
20 لتر للفرد في اليوم
2-3 شرب
1-2 حمام
3-4 غسيل
5-6 للسعية
2-3 أعمال اخري غير مرئية
تكون زي شنو يا ربي
اللهم انزل علينا رحمة من عندك
Post: #10 Title: Re: أخبار الطقس في السودان Author: Adil Al Badawi Date: 04-03-2007, 12:50 PM Parent: #9
Quote: 2-3 أعمال اخري غير مرئية
تكون زي شنو يا ربي
بعد كلامِك الفي أوّل البوست، تكون تبخُّر مافي اتنين تلاتة.
أقعوا البطيخ وبالعدم باقي آبري رمضان الفات (خصوصاً الأبيض) وبالعدم خالص بِلّوا الكسرة في موية زرقاء وبالعدم خالص خالص أقعوا البحر (ودي نصيحة ضد السخانة ما مساخة).
