Post: #1
Title: رانفى شاعرالبطانا راغب الركوب مع الرباعه
Author: munswor almophtah
Date: 03-21-2007, 05:43 PM
رانفى شاعرالبطانا راغب الركوب مع الرباعه
العزيز جداً اخى / منصور المفتاح
تحياتى واشواقى
تجدنى من المتابعيييييين لمساديركم وعبرة التحية لكل الاخوة وللاخ ود عقيد
لم التقيكم ولكنى التقيتكم
(الاسم :- ابراهيم على احمد رانفى ( رانفى
السكن البطانة صاحبة الاسم
وشاعر دوبيت
وكاتب قصصى
مقيم بدولة الكويت
شركة المجموعة العربية المتحدة
رئيس قسم حسابات العملاء
تلفون 00965643960
حاولت ان انضم اليكم فى هذا المنبر ولكنى لم اوفق
كان فى طريقة شوفنا طريقة كى نتشرف بصحبتكم
وانى لفخور بذلك
وهذه مساهمة
مدخل
الحاردلو الكبير
الزول السمح يوم الخميس واعدنـــا
فى ديم كسلا ان سافرنا منو ابعدنــا
يا عبد اللمين ما شفتو كيف واددنا
تراى هادا المنسينا العقاب وبلدنا
محمد الحاردلو رفيق الصبا موظف ببنك السودان
يا الرهو المسافر فى سمانـــا مشرق
ازجى تحية للدوحة الخميلـــة مورق
على سخط الزمان اللى قلوبنا محرق
نخشى يكون قدر دايماًحياتنــا تفرق
رانفى شخصى الضعيف
عليك مبروك دخولك فى عوالم الفرحــة
على جور الليالى والكبد منجرحـــة
عليك البهجة طلعت والنفس منشرحـة
على بقيت شبر ضاقت الوطا المنطرحـة
رانفى
مجادعة :-
( عوض الكريم (عشرة سنين
ظبى التاكا عينيهو الدغس شاقنى
انا فارقتو مجبور الظروف ساقنى
الفى بعدو بالحيل الفؤاد جننى
صادق حبو ما خيب شعورى وظـنى
رانفى
الجابرنى دايمــــاً فى عيونو اغنى
رفيع زوقاً مادب بالغرام ساكنى
انا يا المنك الاقدار غصب ساقنى
لا برضينى غيرك لا ســـواك مستنى
رانفى
ابو الحاردلو قربك فى البلد دايرنو
دمع الشوق عليكم يا نديم زارفنــو
ستات الجمال العرضهن حفظنـــــــو
ما بنصادو ما ظنيت علينا يحنــــو
عوض الكريم
البلد البحبو وقلبى عاشق منـــــو
انا فارقتو يا ابراهيم وفاقد حنو
نيران فقدو تلهب فى البدن شاوينــو
كيف الرجعة يا خلى الخلاص كيفنـــو
رانفى
ابو الحاردلو زمناً ولى كيف بنعيــدو
كيف شوفت المنزه والدهب فى جيــــدو
جمــالاً فيهو بصعـب للمحب تمجيــــدو
ناجع صيدو يا ابو الحار غلبنى اصيدو
عوض الكريم
لو كان الزمن عهد الساعده بعيـدو
كان افرحنا بزولاً صحيح بنريــــدو
القمحان منو دايماً وكفى ما بتصيدو
جمالو تمانية فى عشرين حروفو يزيـدو
مع خالص شكرى اخى منصور
احجزوا لينا معاكم عنقريب هبابى
--------------------------------------------------------------------------------
|
Post: #2
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-21-2007, 05:59 PM
Parent: #1
المتلك متل رمش البصر بدوهو
ما بدور وسيط قولك عظيم سمعوهو
يا ود البطانا الفى الفزع بلقوهو
زول الرقبه ذاتو من القصاص تحجوهو
منصور
|
Post: #3
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-21-2007, 06:12 PM
Parent: #2
قالوا العربى راكب جملو الأصهب ومصوبن توبو وعراقى الساكوبيس وقدم الحمام وكنتلتو حريريه والعمه مظهره ومعادل فوق الحويه السيف والبندق ومخلاية الشعر مع الرقلى تسمع صفق القنديله مع التمودا ومن بعيد عينو وقعت فوق جماعه فى الجبانه وقال كدى جاهم مخوى جدع الفاتحه وسعل المتوفى منو العرب قالوا له زولا زين كان ضو دحين صل على شيخنا الليله فى السوق فوقف العربى ومن خلفه المصلين وقال يا الله الزول دى كان ضو قبيله والليله مطلبك وعلى الطلاق أكان جانى أنى بضبحلو جملى دا ثم سلم وركب فيا بكرى أنا أكان جانى رانفى فى رقبه بعفاهو دحين إنت أنعدلو
منصور
|
Post: #4
Title: Re: رانفى شاعرالبطانا راغب الركوب مع الرباعه
Author: عبده عبدا لحميد جاد الله
Date: 03-21-2007, 06:25 PM
Parent: #2
العزيز منصور
تحية طيبة
اثنى الأقتراح ونلتمس من الأخ بكري ان يتكرم بمنح الأخ رانفي شرف الإنضام الى المنبر اكيد شاعرنا إضافة حقيقة يمكن ان تثرى الساحة بالكثير من الجوانب الأدبية.
سربا:
انشاء الله نلاقي ربيعنا في المُشرع الضِمِي الجاي
|
Post: #5
Title: Re: رانفى شاعرالبطانا راغب الركوب مع الرباعه
Author: سمية الحسن طلحة
Date: 03-21-2007, 07:57 PM
Parent: #4
المتلك متل رمش البصر بدوهو
ما بدور وسيط قولك عظيم سمعوهو
يا ود البطانا الفى الفزع بلقوهو
زول الرقبه ذاتو من القصاص تحجوهو
منصور
ـــــــــــــــــــــــــــــــــ
رانفى ود مكوكا الضعيف راشوهو
والمادحين جميع قصروا ما وصفوهو
القاصدالكرام يابكرى مابصدوهو
فوق هاماتنا شوفولوامكان ختوهو
سمية الحسن طلحة
|
Post: #6
Title: Re: رانفى شاعرالبطانا راغب الركوب مع الرباعه
Author: خالد علي محجوب المنسي
Date: 03-21-2007, 08:32 PM
Parent: #5
الفاضل الحبيب سلام
الخبر الأكيد قالوا البطانة إترشّت
والخبر الجميل جيبتو يا الحبيب
نثني ونتلت ونمليّن ونرجو الحبيب بكري قبوله عضو ... والله يوم سعد يوم موافقة بكري بجنى البطانة
|
Post: #9
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-22-2007, 05:42 PM
Parent: #5
رانفى ود مكوكا الضعيف راشوهو
والمادحين جميع قصروا ما وصفوهو
القاصدالكرام يابكرى مابصدوهو
فوق هاماتنا شوفولوامكان ختوهو
سمية الحسن طلحة
المتلو كان فى الحاره ما بفوتوهو
لو لبن الطيور من العدم بدوهو
أهل الراى جميع شوفوهو ما تنسوهو
وقوام الكعو وبندور نضوقو حلوهو
منصور
|
Post: #7
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-22-2007, 07:44 AM
Parent: #4
الأخ عبده عبدا لحميد جاد الله
السلام والرحمه
ومشكور على تعضيدك لشاعر البطانت رانفى
منصور
|
Post: #8
Title: Re: رانفى شاعرالبطانا راغب الركوب مع الرباعه
Author: Mohamed Abdelgaleel
Date: 03-22-2007, 02:27 PM
Parent: #7
Quote: ظبى التاكا عينيهو الدغس شاقنى
انا فارقتو مجبور الظروف ساقنى
الفى بعدو بالحيل الفؤاد جننى
صادق حبو ما خيب شعورى وظـنى |
المنصور .. شاعر البطانة لن يخلف
وعده .. تضامن حتى يركب مع الرباعه
|
Post: #17
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-23-2007, 10:16 PM
Parent: #8
الأخ محمد كيف حالك يازول
وأحوالك
والشكر لك للوقوف مع رانفى
منصور
|
Post: #10
Title: Re: رانفى شاعرالبطانا راغب الركوب مع الرباعه
Author: سلمى الشيخ سلامة
Date: 03-22-2007, 06:05 PM
Parent: #1
ايمان قسم نفتحلو قلب الباب
وكت يدخل مجولب نبقى نحنا صحاب
يا منصور ضيفك فى العيون مختوت
ويا بكرى العديل المتل رنف ما بفوت
يازول انحنا البيتنا مافوقو مفتاح تب
الا مفتاحك عجيب وعجب
افتح قلبك السمح وما كضب
(وحرم )الضبيحة انتبخت تب
حباب الزول
تعرف يا مفتاح اول مرة اكتب حاجة زى كده لكين شدتنى الكلمات احييك
|
Post: #11
Title: Re: رانفى شاعرالبطانا راغب الركوب مع الرباعه
Author: خالد علي محجوب المنسي
Date: 03-22-2007, 06:41 PM
Parent: #10
الحبيب الفاضل المرهف منصور مفتاح
سلام عليك يا الطيب الغالي
النضم السمح بعالج ويداوي
متابع معاكم ألا الجراب خاوي
كلامكم درر يداعب أشوقنا طوالّي
ماني شاعر من نشيت تبيت... لكن متذوق قديم للكلام الزين... بعجبني السمح في النضمي والعجب إن كان زي اللِيل أهلنا قديم... عميق وجذورو ضاربه آلاف ميل
كلام الفاضلة سلمى الشيخ سلامة اداني دفعة .. بدوركم يا ركازة الرباعي لا تشنِفوهو لي .. دا حديثاً من زولاً هاج بيهو نضمكم السويتهو زمان والحين .. دحين ادوني الاذن علي مسامعكم أقول منو لو بيتين
حرام يا بكري تحرمنّا من وزلاً حديثو جميل
نستأنس بو في غربتنّا ود البطانة عديل
بِندورو هو ومفتاح يهبكّو وسمية تخلف ونحن نشيل
عليك الله تديهو الآذن مشطوطين خلاص بالحيل
ولكم السلام والأحترام أهل المجاعة
خالد محجوب
|
Post: #12
Title: Re: رانفى شاعرالبطانا راغب الركوب مع الرباعه
Author: Ahmed Yousif Abu Harira
Date: 03-22-2007, 08:39 PM
Parent: #11
عندما اضيف هذه المداخلة بيكون الأخ رانفي أصبح عضوا كامل الأهلية في هذه المساحة الجميلة...لا شك لدي في ذلك...
وسنرحب به كما ينبغي ويستحق عندما يظهر اسمه على هذه الاعمدة البنية ...
نشكر الأخ منصور الذي ظل يزكي الجمال ويرفدنا به فعلا وقولا...
ومرحبا بالأخ رانفي مقدما..
والشكر آلاف لصاحب الدار الذي لن يخيب "الراجينو"
|
Post: #13
Title: Re: رانفى شاعرالبطانا راغب الركوب مع الرباعه
Author: تولوس
Date: 03-22-2007, 08:57 PM
Parent: #12
Quote: ابراهيم على احمد رانفى ( رانفى
السكن البطانة صاحبة الاسم
وشاعر دوبيت
وكاتب قصصى
مقيم بدولة الكويت
شركة المجموعة العربية المتحدة
رئيس قسم حسابات العملاء
تلفون 00965643960 |
منصور والحضور الكريم تحياتي
وباسكم اقول هلا ومرحبا بالاخ العزيز رانفي فانا اعرف الرجل جيدا فهو اضافة حقيقية للمنبر
|
Post: #14
Title: Re: رانفى شاعرالبطانا راغب الركوب مع الرباعه
Author: عبد المنعم ابراهيم الحاج
Date: 03-22-2007, 09:25 PM
Parent: #13
رانفي ياهو زولنا ياتولوس
والله واحد تاني ؟
غايتو البورد حايكون اكتسب فنان
مرحب بيك حباب رانفي
ويا بكرى
انا مع الناس الفوق ديل
بزكيه..
|
Post: #15
Title: Re: رانفى شاعرالبطانا راغب الركوب مع الرباعه
Author: ابوعسل السيد احمد
Date: 03-22-2007, 09:31 PM
Parent: #14
رجل شاعر مجيد مثل هذا يزكيه المنصور بن عبد الله آل المفتاح و
يثنيه الأكرمون أمثال منعم إبراهيم، و الماجدات تمثلهم الشاعرة
سمية بنت الحسن آل طلحة؛ جدير جدا بأن نقول نعم له. نأمل ، ريس
بكري أن تمن عليه بالعضوية. و هل هناك من هو أهل لها اكثر منه؟
|
Post: #19
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-24-2007, 05:50 PM
Parent: #12
يا
Ahmed Yousif Abu Harira
ذلك الرانفى نفذ إلى طالبا ما بوسعى أن أقدمه لينال عضوية المنبر والمنبر فى أشد الحاجه ليكون من زبانيته رانفى
فسلامى لك والشكر (يالواعى ما بوصوك)
منصور
|
Post: #16
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-23-2007, 07:24 PM
Parent: #11
الأخ خالد علي محجوب المنسي السلام والرحمه
معك نطالب برانفى كاتبا مجيدا وشاعرا متمكن
والشكر لك
منصور
|
Post: #18
Title: Re: رانفى شاعرالبطانا راغب الركوب مع الرباعه
Author: munswor almophtah
Date: 03-23-2007, 10:21 PM
Parent: #10
ايمان قسم نفتحلو قلب الباب
وكت يدخل مجولب نبقى نحنا صحاب
سلمى ياسلمى
ما بتقصرى أبدا فذلك دأبك وديدنك الواضح
السلام والشكر لك
منصور
|
Post: #20
Title: Re: رانفى شاعرالبطانا راغب الركوب مع الرباعه
Author: عبد المنعم ابراهيم الحاج
Date: 03-24-2007, 10:03 PM
Parent: #18
Quote: استجابـــــــــــة ... لنداء اخى هاشم محمد السيد ...
وددت ان اقدم فى هذا البوست سرداً ادبياً لما يعرف بالدوبيت ... وهو فن من فنون الشعر الشعبيى ... وللكلمة معانٍ عدة .. لا اود التطرق لها ...
يتكون الدوبيت من رباعيـــة 4 ابيات ) ... وهو ما يسمى بالرباعيــــــــــة ... وغالباً ما يكون للبيئـــة اثرها فى المفردات المستخدمة ...
وهنا اود ان ابدا ... بما قالة الشاعر الصادق حمد الحلال ( اب امنـــــــــة ) ... وذلك فى حوار ... بين الراعى ( الغنامى ) ... والمزارع ... فيرمز بالول للمعارضين لقيام مشروع حلفا ج وبالثانى للمؤيدين لقيام المشروع .. فكان الصادق من المؤيدين لقيام المشروع فى بداياته ولكن تزحزحت قناعته ... بعد انتشار البلهارسيا والملاريا ....
حلفا الجابت القز والجفار مكن بيلا
حلفت حلفا خير الناس تلحقو شيلا ..
القز : - الباعوض
الجفار :- نوع من الذباب الذى سبب مرض ( الجفار للإبل )
شيلا : - راتبطت فى ذهنية اهل المنطقة .. بضياع المال والجاه ... اى قمة الفقر والبؤس ...
وهاكم هذا الحوار بين الغنامى والمزارع ...
المزارع :
وطاتك صيفت و اتلولون كرعيك
وربطوك بالسلب والآخرة من فوق ليك
تقطف في الدلو و خام الحروت بيديك
مرقوك العصر متل القدود عينيك
الغنامي:
الحواشة جابتلك نجيلتن حارة
من أكل الدقيق كرشت و بطنك جارة
ضباك الفلس زهجان وروحك كارة
من صقط الترع تقطر دمعتك خارة
المزارع:
صرفولي القطن قبل القمح و الفول
يا صاحب الدبيب لا يمني شن بتقول ؟
جربانك كرتب و بالصرار مشغول
قايل خلاص رزق الشمش ما بزول ؟
الغنامي:
رجع فوق النعاج ، أم الفرود و التوم
عزل بهمي ، دفر غنمي، و شبع لي نوم
إت تابع الصرف ما حددولك يوم
عمال القطن تابعاك نبيشة و لوم
المزارع:
صايم طول نهارك تطوي في الحنتوت
فوق كيله و ربع لامن خريفك يفوت "
جربانك كرتب و في الصرار بتصوت
يوم يا صاحبي ، بتنقدك دبيبة تموت
الغنامي:
بالكوريق تسدد ، منبلي و حرقان
واقف طول نهارك و القمح غرقان
لميت الطلب ، جيت لام سراب شرقان
إت ساعة الخلاص من العجم عرقان
المزارع:
مكاوش في القشوش القفرة و المتلية
من حر الصقط كرعيك شقوقهن مية
عرفناك في الجلب بتجمع المالية
يا جاني الغنم ، وين الزكاة الفرضية
الغنامي:
الليل و النهار راكب الحمار متدين
تخمج فى السراب متل الجمل متطين
آلآم الفلس ، فوقك مؤثر بين
من حش النجيل، ضهرك عضامو تزين
المزارع:
لبس عالي و مرق من بيتي زولا شاهر
فوق العسنة و البكارة ، ماني مساهر
الليل كلو تطرد في الحمير و تناهر
عيب دقني إن لبسك توب وهدمًا طاهر
الغنامي:
إتناشر شهر فوق أم سراب مسجون
موية الترعة سوتلك تلاتة بطون
ضباك الفلس ، تسأل تقول مجنون
أنا خايفك تموت من القطن مديون
الغنامي (مخاطبا محصول القطن ):
يا قطن أم سراب أنا منك أعمل كيف ؟
بيني و بينك الخصمة و حرابة السيف
خميت ناسي تب خليتني قاعد ضيف
كمان عدمتني البسقي النعاج بالصيف
القطن (يرد على الغنامي ):
قسم بالله كان تجري و تجيني كتير
أضربك ضربة واحدة تغطسك للجير
ماك عارفني عندي مفتشين و مدير؟
وماك عارفني سويت لزريبة غفير ؟
الغنامي:
زريبتك هادي ختيتلها ختة عامر
الغبشة أم غفيرًا للمعيزة بسامر
شهيت الركوب فوق المحنة وضامر
لميت النجيل عاد داير تخرب العامر ؟
القطن :
ماك عارفني وافر و النقاص تميتو
مطرود الحبش من الصبح لميتو
المسكين كسيتو هدوم و كبر بيتو
صارعت الفقر من ناس عطية رميتو
الغنامي:
سنتك واحدة بس لا اتالتت لا اتنت
من حر الفلس زهجت جماعتك و جنت
حارسين المكاتب للمحال تتصنت
منا و جاي حكايتك يا رفيقي اتشنت
المزارع :
القش إتلأ و اتواقفلو شروفهن
راعيهم متقز منهن ما بشوفهن
لاوي رقبتو في لوحة يمينو خروفهن
أماتو الكبار يجابدن في صوفهن
الغنامي:
يا رب العباد تجي السنة البدرية
يتوالن سواري و تردف الضحوية
قيزان الجميلي يجيبن أب شوشية
بت أم سبحة تلعب فوقهن الصقرية
المزارع:
نفسك ديمة من جيهة الكرم مسدودة
ماك ظالم زكاة الله العليك مفروضة
ضانك تصدفو السارية إن برد في فودة
تتعوض صفير زمبارتك المقدودة . .!
الغنامي:
نفسك ديمة من حر الفلس موهومة
فوق ضهرك ديون العالمين مردومة
إت مالك مدنقر . . صفقتلك بومة ؟
و لا هموم ديون حواشتك المقسومة
--------------------
|
الرابط هنــــــــا
يا بكري الجمر ناتح قليبنا نتاح
راجين دوكري الكلمة التخج الساح
بابك دون كشر مابدقو زول مرتاح
شوفلو من احتياطيك اديهو ودمفتاح
|
|