Post: #1
Title: تهنئة .... بابا بقى يجي البيت بدري
Author: HADEEL KARARR
Date: 03-17-2007, 12:37 PM
برنامج ال MBA جامعة الخرطوم
امنيات واحلام تراودني ... سامر يخطو خطواته الاولى تجاه امل جديد
جامعة الخرطوم والذكريات العزيزة
رافقته نسأل عن شروط التسجيل
اراه وهو يبحث بعينيه في ارجاء بيزنس عن اميرته الراحلة ...تتزاحم الذكريات
اشفقت عليه ... دعوت الله في سري ان يعينه ويقويه
هل تراه يلملم احزانه ويواصل المسير ؟؟!!
ياالله ... يالروعة هذا الانسان
يوما بعد يوم اراه يناضل ... يحارب الاحباط والاسقاط
سلاحة ايمانه بالله اولا ... وبقدراته وامكاناته العقلية ( عيني باردة)
عامان يمران ...مابين المكتب وقاعات المحاضرات والامتحانات
8:00 المكتب .. 4:00م نهاية الدوام ...5:00 م بداية المحاضرات ... 8:00م نهاية المحاضرات ...9:00م البيت ..
ترقب ... قلق ...تعب ... ارهاق
اسيل تسال يوميا ...
- ماما انتي الليلة بابا ماجايي ؟
- بيجي بعد شوية حبيبتي
- لكن هو اتاخر شديد
- عشان عندو امتحان بكرة بيذاكر في الجامعة
- هو الامتحان بينتهي متين ؟
- (اسرح بعيني بعيدا) والله يا بتي الله ينهي الامتحانات علي خير ... انشاءالله بتنتهي قريب
انتهت الامتحانات ..
انتهي التوتر والمعاناة القاسية
آن لك الان ان تحتفل
ان لك ان تستريح وتلتقط انفاسك لتواصل المسير بخطى واثقة وامل جديد
آن لي ان افخر بهذا الرجل
آن لبناتك ان يزهون ويحتفلن
وي وي ...... بابا بقى يجي البيت بدري
مبروك النجاح ... ممزوج بطعم الكفاح
مبروك لامك وابوك
مبروك لي ... ومبروك علي ... هذا المقاتل العنيد
زوجي الحبيب
اهديك في يوم نجاحك الف تحية والف الف امنية حلوة
ربنا يعينك وينور ليك طريقك ويجعل ليك في كل خطوة نجاح وسلامة
ربنا يديك الصحة والعافية
ربنا يخليك لي ولبناتك
ربنا يجازي كل الساعدوك ووقفو جنبك كل خير
الي زوجي العزيز سامر محمد عثمان .... مع التحية
ام البنات
|
Post: #2
Title: Re: تهنئة .... بابا بقى يجي البيت بدري
Author: Adil Osman
Date: 03-17-2007, 12:54 PM
Parent: #1
كتابة جميلة ومؤثرة.
مبروك لسامر عثمان هذا الانجاز الاكاديمى الكبير. ولروح اميرة كرار التى تحوطكم بالرعاية الف رحمة.
تهانينا لك يا هديل كرار وللاسرة.
|
Post: #3
Title: Re: تهنئة .... بابا بقى يجي البيت بدري
Author: Samer Osman
Date: 03-17-2007, 01:05 PM
Parent: #1
هديل!!
لقد أبكاني ذاك
أهديك نجاحي لأنك من صنعتيه
|
Post: #4
Title: Re: تهنئة .... بابا بقى يجي البيت بدري
Author: بابكر عثمان مكي
Date: 03-17-2007, 03:25 PM
Parent: #3
سامر ،
مبروك هذا الانجاز
استطيع ان التمس صعوبته لانه فى نفس (الضل ) ونفس حتحات الصفق
ولكن فى غياب الكثيرين/ت رفقاء الطين والهواء والمطر .
هديل ، ام البنيات (مبروك لسامر )
من هذا البوست يتضح جليا" مدى الدعم الذى تقدمه الزوجة المخلصة
ان الازواج الانبياء يمشون فى الاسواق برغم الجراح
وياكلون الطعام برغم حنظل الفجيعة ،
فقط اذا ماانشق ثغر الزوجة يرفل بابتسامة مشجعة داعمة.
.................
ياسامر
اها برضو هنا زوغ وماترد
|
Post: #12
Title: Re: تهنئة .... بابا بقى يجي البيت بدري
Author: Samer Osman
Date: 03-18-2007, 08:31 AM
Parent: #4
زيكو الحنين محنة الجروف والساقية والواسوق والطورية والبنطون ...
احتراماتي لا لشئ سوى لأنك تعلوني مقاما في كل شئ .. إلا حبي لك
دائما ما تكتب عني ما أعجز عنه كتابة وتماسك فأراني يسلك الدمع مجراه سريعا واسرج خيالاتي صوب ما تقتادني تصاويرك الدقيقة وريشتك الأنيقة
الوطن يشتاقك أكثر منا والنيل يغسل أحزاننا كل صباح وكذا البنات (بناتي ما بنات الجامعة)
أحكي دوما لهديل عن ليالي بوحنا في سكن الطيار بالمروج وسكنك البعيد بصناعية الرياض حينما كنا نمشط الوقت بحكاوي الجامعة وذكريات الوطن الجميل
.
.
.
كم أنت جميل
|
Post: #5
Title: Re: تهنئة .... بابا بقى يجي البيت بدري
Author: د.محمد حسن
Date: 03-17-2007, 03:35 PM
Parent: #1
ولك الحق ان تفرحي
وان تفخري
وزجي لك التهاني
من هنا لي هنوووووووووووووووووووووووووووك
الف مليار مبروك عجبنا وسر بالنا
|
Post: #6
Title: Re: تهنئة .... بابا بقى يجي البيت بدري
Author: وصال عالم
Date: 03-17-2007, 04:00 PM
Parent: #5
بسم الله الرحمن الرحيم
هديل كرار
التهنئة على هذا الإنجاز ... والتحية لكل الأمهات الأحياء منهم والأموات ...
ذكرني هذا الإنجاز موسم الفرح القصير والذي لم يكتمل ... ذهبت للجامعة وكنت أمني نفسي
بتأخير مناقشتي لرسالة الماجستير ولم أخبر أحد بموعد مناقشتي ولم أخبر ساعتها إلا
صديقتي الوفية جدا عواطف خضر ولم أأكد عليها ... بل قلت لها لربما تكون مناقشتي في
الساعة الثامنة صباحاَ ... المهم لم أناقش في الساعة الثامنة وأجلت حتى الثانية عشرة
وذهبت البيت عند الرابعة وأخبرتهم وكان فرح والدتي عظيما ... وسجلت قبل مدة
للدكتوراة ولم أفرح ولم أحس بطعم هذا الإنجاز والذي لم يكتمل ... ذلك أن والدتي توفت
قبل هذا وحتى الآن لم أخبر أحدا ليس عجزاَ مني ولكني حزينة على والدتي جدا ...
مبرووووووك النجاح والإنجاز ... ربنا يرحم كل الأمهات والآباء ...
مودتي
وصال عالم
|
Post: #7
Title: Re: تهنئة .... بابا بقى يجي البيت بدري
Author: HADEEL KARARR
Date: 03-17-2007, 04:58 PM
Parent: #6
عزيزتي وصال
ربنا يتقبل الوالدة ويجعل مثواها الجنة
فقد الاعزاء يؤثر عميقا في دواخلنا
لكن العزاء ان الانجاز يشعرنا بالوفاء
خاصة وان والدتك رحمها الله كانت لتفخر بك وتدعو لك بالتوفيق
امنياتي لك بمواصلة المسير
وربنا انشاءالله يصبرك علي الفقد
حبوبتي حد الريد تدعو في مثل هذا
(الشالها من عينك يشيلها من قلبك يارب )
لك الود
|
Post: #8
Title: Re: تهنئة .... بابا بقى يجي البيت بدري
Author: nile1
Date: 03-17-2007, 06:48 PM
Parent: #7
بت أخوي هديل
لك ولسامر أجمل التهاني بالنجاح المستحق ..لكم حبي ودعواتي بالتوفيق الدائم
ومرحبا بك إضافة ثرة للمنبر..تحياتي لخالد وفريال والأسرة
عمك الزاكي
|
Post: #9
Title: Re: تهنئة .... بابا بقى يجي البيت بدري
Author: HADEEL KARARR
Date: 03-17-2007, 10:04 PM
Parent: #8
العم العزيز الزاكي
لك الشكر علي التهنئة الرقيقة
وسلامك وصل للوالد والوالدة وهم يقرئوك السلام
لك التحية
|
Post: #10
Title: Re: تهنئة .... بابا بقى يجي البيت بدري
Author: عاطف عمر
Date: 03-17-2007, 10:40 PM
Parent: #1
ما أحلى طعم النجاح
وما أجمل معاني الوفاء
لكم نتمنى دوام الأفراح
كل الأماني سامر بمزيد من التميز
وحفظكم الله لبعضكم هديل وبناتها
داخل الإطار
توقفت عند إسمى هديل وأسيل
فهما إسمى كريماتى مواليد 1991 ، 1993
|
Post: #15
Title: Re: تهنئة .... بابا بقى يجي البيت بدري
Author: Samer Osman
Date: 04-01-2007, 08:15 AM
Parent: #10
عاطف الملاطف
شكرا يا أنيق
وربنا يسعدك بهديلك وأسيلك والباقين
مودتي
|
Post: #11
Title: Re: تهنئة .... بابا بقى يجي البيت بدري
Author: Raja
Date: 03-17-2007, 10:50 PM
Parent: #1
العزيزة هديل..
مبروك لسامر وربنا يعليه كمان وكمان..
تحياتي لأسيل والرحمة لأميرة
|
Post: #13
Title: Re: تهنئة .... بابا بقى يجي البيت بدري
Author: Ahmed El Gasim
Date: 03-20-2007, 06:51 AM
Parent: #11
الف مبروك
سامر مزيد من النجاح
وحفظكم الله
إسم هديل ايضا تتزين به بنتي الصغري
لكم الورد
|
Post: #14
Title: Re: تهنئة .... بابا بقى يجي البيت بدري
Author: Samer Osman
Date: 03-20-2007, 07:58 AM
Parent: #13
العزيز أحمد
شكرا يمتد بحجم حبنا لمن هم حولنا
وربنا يحفظ الصغيرة ويجعلا زي حقتنا ... "عملت الماجستير زمان وكانت بتقريني بس بدون ما تدقني "
ربنا يحفظم كلهم
مودتي
|
|