Post: #1
Title: ما بين أمي وبعثة الهلال في المطار
Author: Samer Osman
Date: 03-15-2007, 09:46 AM
الســ7:30ــاعة صباحا
أمي مسافرة السعودية زيارة والتأشيرة العفش الزائد رسوم المغادرة ..
الشنطة في اليد مليااااانة بخور وحنة وطلح هدية للنسوان .. أضرب لأخوك .. أبوك ضرب .. موظفة الكاونتر شافت النضارة والقشرة قايلة القبة تحتا فكي وهاك يا ابتسامات وهاك يا رشاقات والديباجة اتلصقت في الشنطة بلا وزن في واطتا وأنا أشيل واضاير في دبلة أم البنات وأقول باكر الظروف بتجيبني وبتوريني وش الككو
أها قالوا لي امشي الجوازات والساعة القبلت وراي القى ليك ناس الهلال ماشين القاهرة ... ابيض أزرق جمييييل .. أنا بحب الهلال شديد .. حب بشبه حبي لبركات وعزيزة حبوبتي وجامعة الخرطوم وناس الشيخ الجعلي ورفقاء النضال وحبوبتي عشة عواض ومصطفى سيد أحمد ..
وقفت أتفرج مش زي أهل العوض .. العوض زاااتو ومشيت جنبهم عساني اهبش واحد منهم واحلف أقول لناس المكتب القميص ده طقش كلتشي ولا معتذ كبير.. المهم تعالت أصوات وتصفيق وصفير في المطار ودعوات حلوة ربنا معاكم يا أولاد .. أرفعوا راسنا .. وتحول المطار في ثانية لاستاد الهلال ووداع جميل وحنين وأن كان الحاقدين رموا كلمتين تلاتة ..أنا شخصيا لا زلت مقهي في نضافة الناس ديل ونويت أول ما أصل البيت أنضف شاشة التلفزيون عشان بتجيبم غبش ومغبرين والأولاد يشبهو الجلاكسي الساقط وأنا ماشي بي وراهم والحاجة واقفة هناك منتظراني انا العوقة ..وقفوا في طاولة يستلموا الجوازات وانالازلت مقهي ..
ضرب لي أبوي :"أها يا زول؟" وأبوي هو من علمنا حب الهلال .. شبكتو ليك يا حاج ..أنا واقف هسه جنب معتذ كبير ولو شفت مهند الطاهر مبالغة .. العجيب انو ابوي قلب معاي الموجة طوالي وما خذلني :"يا زول ؟.. هم في المطار .. منو ومنو ؟ هيثم معاهم ؟؟ والحاجة وااااقفة نادتني ضابطة الجوازات ... أشرت جواز الحاجة .. حضنت أمي وسلمت عليها في راسا .. وقلت ليها:الله معاكم يا أولاد " بسسسسسسم الله .. جنس عوارة
أمي الحبيبة .. أحبك جدا يا صلاية وقراية .. يا ست بيتك وست الناس وشدرة الضل وريحة الفل .. لك قبلاتي وانتي تقتادك محبة النبي (ص) لزيارة قبره .. تقبل الله صالح أعمالك وردك الله لنا سالمة غانمة
|
Post: #2
Title: Re: ما بين أمي وبعثة الهلال في المطار
Author: keiga2000
Date: 03-15-2007, 10:18 AM
Parent: #1
الله يكون في عونهم بس ماقلت لي احلى الاحمر ولا الازرق كدي عاين للعلم البرفرف دا وجمالو
يازول ارجو ان يكون سفر والدتك فآل خير عليهم خاصة وانهم لايسرونا دائما خارجياً ودائم بجيبوا لينا الفضائح المحموله جوا ارجو المره دي يجيبوا لينا فوز وتكون فعلا فال خير
|
Post: #3
Title: Re: ما بين أمي وبعثة الهلال في المطار
Author: Samer Osman
Date: 03-15-2007, 11:51 AM
Parent: #1
شوف جنس فهم الناس ديل ... الناس في شنو والمريخاب في شنو ...
زي ما قال صاحبنا الهلالابي في المطار انتو أرجونا بي قطنكم ..
يا جماعة انا ما بحب الهلال بس .. المشكلة إني بكره المريخ والكيزان والزول البقدم برنامج قطوف ومامون حميده وجيلاني الواثق وعابده الشيخ وناس الحركة وناس الهدف الفي المرور السريع وريحة البحر قدام الرفيرا وناس النفايات وطعنة الحقنة وصوت الدربكين وصوت جرة السرير وحصص التسميع ...
جنس عوارة
|
Post: #4
Title: Re: ما بين أمي وبعثة الهلال في المطار
Author: Dr.Saeed Zakarya Saeed
Date: 03-15-2007, 07:51 PM
Parent: #3
عسي ان تكون لقياك لبعثة الهلال في المطار هي وش الخير
|
Post: #5
Title: Re: ما بين أمي وبعثة الهلال في المطار
Author: Ahmed Alrayah
Date: 03-15-2007, 08:10 PM
Parent: #1
سرد لطيف وعفوي.
عارف يا سامر
مقالك ده "مفعم" بالمفردات والعبارات السودانية جدا...
مسافرة السعودية
التأشيرة
العفش الزائد
رسوم المغادرة
بخور وحنة وطلح
حبوبتي
أضرب لأخوك
أبوك ضرب
طقش
غبش ومغبرين
أها يا زول
جنس عوارة
محبة النبي (ص)
جامعة الخرطوم
حصص التسميع
الهلال
المريخ
______________________________
ربنا يكتب سلامة الوالدة والهلال ويجيبهم الاتنين سالمين غانمين.
|
Post: #6
Title: Re: ما بين أمي وبعثة الهلال في المطار
Author: Rakoba
Date: 03-15-2007, 09:18 PM
Parent: #5
الغريبة الزول ده من زمان كده!
|
Post: #7
Title: Re: ما بين أمي وبعثة الهلال في المطار
Author: Muna Khugali
Date: 03-16-2007, 00:06 AM
Parent: #6
ربنا يرجعهم سالمين غانمين ويكتب سلامةالحاجة..
|
Post: #8
Title: Re: ما بين أمي وبعثة الهلال في المطار
Author: Abd Alla Elhabib
Date: 03-16-2007, 00:34 AM
Parent: #7
loooolz..lazeeza ya Muna
|
Post: #9
Title: Re: ما بين أمي وبعثة الهلال في المطار
Author: Samer Osman
Date: 03-17-2007, 11:40 AM
Parent: #1
يا جماعة بالجد الليلة أنا سوداني
بالجد بتمنى النصر للفريقين وفوق فوق سودانا فوق
|
Post: #10
Title: Re: ما بين أمي وبعثة الهلال في المطار
Author: Samer Osman
Date: 03-18-2007, 08:47 AM
Parent: #1
غايتو السترة والفضيحة بالجد متباريات
بركة يا سامر البدرت بالكلام العديل وبقت سترة وصلحة ...
هو النصيييييحة يا اخوانا نحن شعب بنحب المكاواة والمشاغلة لكن ساعة الحارة بنقيف مع بعض والنصيحة يا جماعة أمس أنا بكيت بكيت وكأني لم أعرف البكاء من قبل فرحت وأنا بلف في شوارع امدرمان وبقيف في كل لمة ما بتسأل ديل مريخ ولا هلال الناس بتحضن بعض وبترقص بهستريا ونسوان وبنات بزغردن وشفع برقصوا في الزلط ... الخرطوم أمس وقعت اتفاقية السلام .. السلام حقنا ما حقهم .. حق الشارع والناس البتدفع حق دخول الاستاد وبتقعد في مساطب الاستاد
|
|