Post: #1
Title: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترنت
Author: الطيب بشير
Date: 03-13-2007, 03:30 PM
Parent: #0
.
.
سكنت في خمس مدن بأمريكا حتى الان
دائمآ كانت مجموعة التلاوة غير مجموعة الكوتشينة
هنا في منطقة ميامي الكبرى وجدت مجموعة لطيفة جدآ
بيتلاقوا يوم السبت في صلاة المغرب
بعد الصلة تبدأ التلاوة لجزء واحد من القرآن الكريم
و درس قصير لا يزيد عن العشر دقائق و نصلي العشاء جماعة
بعد داك كوتشينة في مجموعتين
حريق و ويست
المغلوب من الحريق بيدور انترنت
تصادف مرة أن كان هناك خمسة لاب توبس في يوم واحد
مولانا بشير الشيخ الكبير
كان هو الامام الذي صلى العيد امامآ لكل المسلمين في منطقتنا
صلى وراءه هنود و عرب و باكستان و أفارقة و أمريكان
صلت خلفه تسع مساجد و كان ذلك هو الخبر الرئيسي في التلفزيون يوم عيد الأضحى not Saddam
هذا الشيخ يصغرنا كثيرآ في السن
بيلعب معانا كوتشينة
و بيضحك من نكاتنا عن العزابة ناس فيصل التجاني و أبو القاسم حارس الموردة السابق و هو نفسو
لم أره يرتدي تكشيرة رجال الدين يومآ
و في أثناء الونسة و الكوتشينة بيجاوب على أسئلتنا عن الحرام و الحلال
و مولانا عثمان
أظرف زول
ما بيلعب كوتشينة النعمنو ترباية سعودية
لكن و الله في الغنا سماعآ
أي تسجيل نادر لمصطفى سيد أحمد بتلقاهو عندو
و بيظبط شاي لبن مقنن ما حصل
و تلقاهو بيردد مع الفنان بتطريب عال
المهندس عدنان الفزاري بتاع كوستي لا مع العزابة و لا مع المتزوجين
يعني عاقد لكن ماااااا دخل
أها لمن يغلب عارف التجاني في الكوتشينة بيقوم عارف يهزأ من وضعو دة
أمشي ياخ انت لا معروف عزابي و لا معرس
و عدنان كاواااااي لمن يكون عارف (عارف) في الزووون و عاوز ينزل
تلقى عدنان يشيل التريس من بين الدو و الأربعة و يرميهو ليهو
تقول ليهو يا خرابة ديل ما حالات؟
يقول ليك (دكتور محمد قال ان لم تنفع فضر)
دكتور محمد ابراهيم بتاع الاحصاء برضو زول (لزيز)
بيجي دايمآ بعد نهاية التلاوة و يلعب الكوتشينة
الجماعة قالوا ما ممكن صدفة سنتين
دة لازم بيكون منتظر في الباركينج لحدي ما يسمع الدعاء حتى يجي داخل
قاموا مقلبوهو مرة و بدأوا بالكوتشينة و أجلوا التلاوة لحدي ما جاء داخل
أما الصيادلة عاصم شمة و احمد طه طلعت فكلاهما رائع
لكن
واحد حريف في اللعبة و التاني كيشة لكن غالاطآ يحير ناس بربر
و عندنا قوانين الحريق اسمها قوانين سبتمبر
توزع غلط يكتبوا ليك تلاتة
تنزل غلط يكتبوا ليك تلاتة
ترمي غطا يكتبوا ليك تلاتة
تفتح غلط يكتبوا ليك تلاتة
و دي أكتر حاجة بتجيب المشاكل و الزعل يامحمد بكري
و الفتوى التي أصدرها عبد المنعم بعد أن أخد نفس طويييييل من الشيشة و ما أجازها حيدر المحسي
هي أن الذي تكتب له تلاتة و يحدث أن الكوتشينة تندك في ذاك القيم تشطب منه فورآ
و هي فتوى مثيرة للجدل مثل فتوى كمال قوي انو البيقطع الجوكر و يشيلو يحتفظ به لو اندكت بسبب خطا في التوزيع
و كلتا الفتويين بانتظار الحبر الاعظم (ود عبود) الصيدلاني بجانزفيل لمراجعهتما في زيارته المقبلة
سبعة ساعات كوتشينة و ساعة تلاوة و صلاتين و درس
ما كتيرة علي الله
و الونسة نفسها فيها فوائد
لكل المختلفين بالولايات و المدن و الدول الاخرى
جربوا برنامجنا تكسبوا
.
|
Post: #2
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-13-2007, 04:04 PM
Parent: #1
.
التعليقات البتجينا عادة من الناس
(ما ممكن كدة يا جماعة)
(يا تلاوة يا كوتشينة)
و السؤال؟
ليييييه؟؟
منو القال انو التلاوة و الكوتشينة ما بيجتمعوا في قلب رجل مؤمن؟؟
يا ناس لو خلينا الدين للمتفرغين راح يخربوهو علينا طب
لأن فراغهم أوصلنا للفتاوى العجيبة التي نسمع عنها
من تحريم اهداء الزهور للمرضى لأن في ذلك تشبه باليهود و النصارى
و تحريم كتب الطيب صالح
و تكفير من يصوت للجبهة الديمقراطية
دعوة لانتزاع الدين من حراسه
و زيادة شوية (حياة) للمارسة الدينية
بدل ما تكون التلاوة في الجامع و بس
ممكن تكون في بيت العزابة محل الكوتشينة دة
بل هم أحق بها من ناس الجامع!!
ما هو الزول الفي الجامع دة ماش صاح و خلاص
ناس الكوتشينة ديل احق برعايتك يا مولانا
أرمي البايظ ياخ سهرتونا بكرة أنا شغال أووفرتايم
.
|
Post: #3
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: bushra suleiman
Date: 03-13-2007, 04:10 PM
Parent: #1
الحبيب الطيب بشير
مشتاقين كتير يا جنابو..والله لاكين برنامجكم عينة ...قلت لى قوانين سبتمبر فى امريكا؟؟!! 
ماتشوفو ليكم واسطة لى نميرى يجى يطبّقا 
|
Post: #4
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-13-2007, 04:22 PM
Parent: #3
.
الحبيب الأديب بشرى سليمان
كيفنك يا غالي
مشتاقين
مشتاقين
مشتاقين
| Quote: قلت لى قوانين سبتمبر فى امريكا؟؟!! |
أكيد لاحظت السخرية من قوانين سبتمبر في اطار تسمية القوانين الظالمة بها
أظن أهلها بيسموها قوانين الشريعة
لكن بالله النميري بقى عاوز واسطة لأمريكا؟؟
أقول ليك فكرة أحسن يا حبوب
سيبك من البرد بتاع بلدكم دة و تعال ليناspring break
و ياما تتلو و يا تلعب كشاتين بمزاااااج
تسلم
.
|
Post: #5
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: سمية الحسن طلحة
Date: 03-13-2007, 04:38 PM
Parent: #4
الطيب نعلك طيب
برنامجكم دا ذكرنى ببرنامج ( دنيا ودين )
الذى كان يقدمه رجل دين يعمل بالتدريس
بجامعة العين بالإمارات وكان العالم العربى
كلو بتابعو.. من متشاكسين ومتصالحين
لك التحية ودام عليكم هذا الوئام بين الدنيا والدبن.
|
Post: #6
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-13-2007, 06:21 PM
Parent: #5
.
أهلآ حباب بت القبايل سمية الحسن طلحة
كيف حالك؟ و بركة الشفناك بي هنا
نحن يا سمية مسلمين
لكن ما بالضرورة ملتزمين
لو بقينا مع ناس الكوتشينة و بس ... ممكن يجرونا بعييييييد
و لو بقينا مع ناس الدين و بس .. بتبقى لينا مسيييييخة
أها برنامجنا دة اسمو
الدنيا تحلى
صعابا ساهلة
و أهم شيء ...
بس رووووق
بس روق و أحلى
تسلمي يا سمية
.
|
Post: #7
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-13-2007, 07:47 PM
Parent: #1
.
.
.
|
Post: #8
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-14-2007, 02:47 PM
Parent: #1
.
كان جدنا الشيخ هاشم الشيخ عبدالمحمود يجلس في القهوة بطابت1960s
عاب عليه الناس ذلك و قالوا:
أنت ابن الأستاذ الشيخ عبدالمحمود و حافظ القرآن و مدرس الدين مكانك الجامع لا المقهى حيث السوقة و المتبطلة و .....و.....
كان عليه الرحمة حكيمآ و بسيطآ..
قال لهم:
هم أحوج للدرس من رواد المسجد
و المعلوم بطابت أن كثيرآ من جلسائه بالمقهى أصبحوا روادآ للمسجد
لذلك تجدني شديد التأثر بطريقته
عظيم الاعجاب بحكمته
.
|
Post: #9
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-15-2007, 05:33 AM
Parent: #1
.
الدنيا حلوة
و بسيطة
انت مسلم؟..طيب و ايه يعني ما أنا برضو مسلم
فايتني بي ايه؟
صرة وش
و جلابية قصيرة
و ضيق أخلاق
و شريط كاسيت من السعودية
و كتيب أصفر
أنا فايتك بي
مصطفى سيدأحمد
و معارض تخريج كلية الفنون
و كورال الأحفاد....
لووووول..كورال الأحفاد دة ما ديني خالص
بالجد يا جماعة (بني الاسلام على خمسة) بتاعة زمااااان ديك ..اتغيرت؟؟
لو لا
أنا بغني لمن العلما يتفقوا
.
|
Post: #10
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: osly2
Date: 03-15-2007, 06:14 AM
Parent: #9
ابو الطيب
نحن فى مينابلس لنا سبت اجمل من جميل
يبدا كوتشينة وكانها هلال مريخ
وينتهى بعشاء لا ادرى لما تتفتح النفس له اكثر من وجبة اخرى
مجموعه تتراوح بين العشره والعشرين
حسب الظروف العمليه
وانتم احسن حالا منا بالطربيزتين
فنحن واحده اذا هزمت
فجلوسك فى المدرجات قد يطول امده
يقودنا الكوتش السر كاونده ويتقاصر ليلنا بقفشاته
اكيد بتعرف 90% من شلتنا
|
Post: #12
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-15-2007, 04:01 PM
Parent: #10
.
كمال أوسلي يا حبوب كيف حالك؟
؟؟؟؟؟؟؟؟؟!!!!!!!!!!!!
انت في بلدنا دي من بتين؟
و ساكن وين؟
أنا كنت في ايقان سنة و نص ....سينت كلاود سنة ونص .....روشستر نص سنة!
لكن السر كاوندا دة منو؟ السر البطل؟؟ يعني سرالختم بتاع شمبات ساكن بلومينقتون؟
تحياتي لجميع الشلة
في مينيابلس كنا بنلعب كوتشينة في المطار أيام تاكسي المطار و قروشو الكتار
تحياتي للجميع
.
|
Post: #11
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: Mahathir
Date: 03-15-2007, 07:43 AM
Parent: #1
يا جنابو الاسلام اختطفوهو من زمان...بقو يقولو زى بوش بعد 9/11..يا معانا يا مع العدو...
يعنى لازم تصر وشك وتبشتن دقنك وتبهدل هدومك عشان تبقي منهم...واى واحد ما بكون منهم بلصقو فى جبهتو قذائع الكفر والضلال والزندقه...
يا شيخ طابت صلى صلاتك واوعك من الاسنا
|
Post: #13
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-15-2007, 05:02 PM
Parent: #11
.
| Quote: يا جنابو الاسلام اختطفوهو من زمان...بقو يقولو زى بوش بعد 9/11..يا معانا يا مع العدو... |
مرحبتين يا مهاتير يا هندسة
يا مولود في الدمازين ..أجمل طبيعة و يفترض تكون هي العاصمة بدل الكتاتيح بتاعة بري دي
بالنسبة للجماعة العاوزين يفرضوا قوانينهم ديل ..أهم شيء اننا ما نلعب بشروطهم..و لا نتفاوض ب(القاعدة) البيفرضوها علينا ..نحن نعيش حياتنا بما يرضي الله .. و ليس بما يرضي المتأسلمين ..نعمل قوانين اللعبة أنحن لأننا الأغلبية و هم (منظمين) لكن أقلية..
و أختم بفتوى
يجوز لعب الورق بدون قروش درء لأضرار الترفيه الأخرى في بلد زي ميامي..و بعض ديار العربان أخطر على الشباب من ميامي..و لعب الورق مفسدة صغرى تدرأ ألف مفسدة كبرى تنجم عن الحاجة للترفيه في هذا العصر.
الحبر الأعظم الطيب بن بشير الطابتاوي العرأفريبجانوبي
.
|
Post: #14
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-15-2007, 11:47 PM
Parent: #1
.
| Quote: يا شيخ طابت صلى صلاتك واوعك من الاسنا |
أها نسيت أقول ليك حاجة يا مهاتير
لمن يكون شيخ الحلقة ما موجود بقوم أنا بتصحيح الناس في القراءة و التجويد..
لكنهم رفضوا تلقيبي بالشيخ و قالوا لي (دي شدة مذيعين ساي لا علاقة لها بالالتزام)
شفت الظلم دة كيف؟
حالة أخير منها السيك
.
|
Post: #15
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-16-2007, 02:52 PM
Parent: #1
.
| Quote: وينتهى بعشاء لا ادرى لما تتفتح النفس له اكثر من وجبة اخرى |
(العشاء الأخير)..كان كوارع
جايبها عارف من البيت
و الله حكاية ما تخلص
أنا جبت باسطة .. ع شان أسمع تعليق العجايز عن ضرورة حرمان الشباب منها 
و العشاء في الغالب (فول علب) يقوم بإعادة طبخه فيصل التجاني صاحب الدار الكريم
أو قاسم في لحظات صفائه
لكن مرة واحدة عمل الفول عدنان و اتفق الناس أن الموية كتيرة شوية
فأشبعوه سخرية..و تندر
تاني ما عملو
العشاء الجماعي جميل
و هو جزء أساسي من الونيسة نفسها
.
|
Post: #16
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-17-2007, 04:32 PM
Parent: #1
.
حبيبنا عارف مرة جاب السمك من البيت و نساهو في ضهرية العربية زي سبعة ساعات
و لمن أكلناهو كان لذيذ جدآ
أها تاني يوم .. الجماعة المغلوبين عملوا اشاعة انو السمك عمل ليهم تسمم
..الليلة قالوا حاج عبدالمنعم جا من دبي و جاب معاهو عشرة كشاتين بلاستيكية جديدة كرت
و أظنو بعد كدة مافي مشكلة كوتشينة سمحة نهاااااائي...
..مجموعة ناس الشيخ عبدالرحمن (الناس البيأجزوا يوم الأحد) و ناس أب شيبا و مجاهد ..قالوا بيظهروا علينا يوم ختمة القرآن بس..يعني طريقة تلاوة منتظمة و كوتشينة معانا ما عندهم..جاري التشاور لاعطائهم آية واحدة يوم الختمة و توفير الباقي للحضور المنتظم.
..أحمد و د عارف التجاني كان امام صلاة العشاء يوم السبت قبل الماضي..قرأ آيات من سورة البقرة..و ما شاء الله تلاوة صاح..و حفظ جميل .. ربنا يحفظو و يخليهو..أحمد سيبلغ العاشرة من عمره قريبآ ان شاء الله...أصحوا يا بريشات!!
.
|
Post: #17
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: عاطف عمر
Date: 03-17-2007, 05:00 PM
Parent: #1
كان مولانا ( ..... ) إماماً لأحد مساجد مدينة رفاعة
كان فقيهاً عالماً ، عذب الصوت ، قوي الحجة ، يملك موهبة تطويع الكلمات لتوصيل فكرته بسلاسة ويسر . يشد ألباب مستمعيه بحركات جسمه المتناسقة ، رفع وخفض الصوت وفق ما يقتضيه الموقف .
ومع ذلك
كان رجلاً ( محمولاً ) يعوس على رزق عياله ، والأيام في تصريفاتها تأبى إلا أن تمتحنه بالشظف الشديد . كان يستلف كثيراً ، ويوفي الدين قليلاً . جاء ذات مرة يطلب سلفاً من أحد معارفنا ، فأجابه الرجل ( بصدق ) " والله يا مولانا لو قلت ليك المبلغ دا ما عندي أكون بطرت نعمة الله وكذبت عليك ، لكنني محتاجه بعد إسبوع فهو مصاريف إبني الذي يدرس بمصر . " أكد مولانا أن المبلغ سوف يرجع بعد ثلاثة أيام لا أكثر . مرت الأيام الثلاثة والأسابيع الثلاثة والشهور الثلاثة والمبلغ لم يرجع . واحتار الرجل كيف يرجع إليه ماله وأين ما ذهب يسأل عن مولانا يقولون له " هسع كان هنا لكين مشى وين والله ما عارفين " وكان الرجل يأتي يصلي معه صلاة الجمعة وبعد الصلاة يتجمع المصلون حول مولانا ويستحي الرجل أن يطلب قروشه وسط هذا الجو الروحاني .
وذات جمعة
خطب مولانا كما لم يخطب من قبل فأهاج أشواق المصلين وأبكاهم وبشرهم بالنعيم وبعد الصلاة ( كالعادة ) تجمع حوله المصلون يستزيدون ، فجاء صاحبنا مخترقاً الصفوف يكفكف ما تبقى من دموعه وهو يقول
" والله يامولانا تسليفك يبكي وخطبتك تبكي "
العزيز الطيب
التحايا والأشواق
|
Post: #18
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-17-2007, 08:43 PM
Parent: #17
.
| Quote: " والله يامولانا تسليفك يبكي وخطبتك تبكي " |
مرحبتين يا عاطف
شكرآ للطرفة ....الامام قلت لي يلم في الزول عيلا دمعتو تجري؟
ناس ام درمان عندهم امام زي دة لكن قالوا كان بيبكيهم في القمار
هنا نبكيكم و هناك نبكيكم
نخن الليلة السبت..بكا ما عندنا
البيبكو ..شيخ بشير و شيخ عثمان أرباب..لكن نحن عين في المصحف و عين في ورقة الحجز..
تسلم يا غالي
تسلم طوالي
.
|
Post: #19
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: sumah
Date: 03-18-2007, 02:44 AM
Parent: #1
****
بسم الله الرحمن الرحيم
السلام عليكم ورحمة الله وبركاته
الطيب بشير ..
الزول الجميل..
جنابو ..
انتو سبتكم دة اخضر ..???..
***
|
Post: #20
Title: Re: برنامجنا في الويك اند هدية للمتشاكسين كوتشينة/ تلاوة/ موسيقى/ دروس دينية/ شيشة/ و نسة انترن
Author: الطيب بشير
Date: 03-20-2007, 03:44 AM
.
سمعة يا (لزيز) يا رايق
كيف حالك؟
و الله سبتنا دة بالألوان...اخضر .. و أحمر .. و أصفر
بس لمن تجينا
نوريك (النجوم) عز الضهر
تحياتي للعيال و امهم
تسلم
.
|
|