( موبيتل )... دعها ولا تكثر عليها التأسفا

كثرت الشكاوي فى الأيام الأخيرة من شركة موبيتل
لسة الشركة عندها رسوم علي إستقبال الخدمة لمشتركي الدفع المقدم
حوالي 24 الف كل تلاتة شهور
رغم إنو سوداني وأريباما كدا
وأعتقد للسبب دا ناس كتر جداً حولوا تلفوناتهم من موبيتل
ولا زالت إدارة موبيتل متمسكة بالرسوم دي
مفروض الشركة تحافظ علي زبائنها القدام
وتكافئهم علي ولائهم loyality
فى نظرية تسويقية بتقول ( تكاليف إستعادة زبون تساوي 6 مرات تكاليف
جذب زبون جديد )
بعض الناس متمسكين برقم موبيتل القديم لاسباب كتيرة
يمكن بحبوا موبيتل لكن يبدو إنو حب من طرف واحد
أنا كنت متمسك برقم موبيتل رغم كل شئ
وكان فى العادة بستلم رسالة تنبيه قبل يومين من إنتهاء فترة الصلاحية
وتتكرر الرسالة قبل يوم
صباح اليوم لقيت التلفون منتهي الصلاحية( من غير رسائل تنبيه )
الرصيد 65 دينار وتاريخ إنتهاء الصلاحية 11/3
جبت كرت شحن 2500 دينار وشحنت
بدون فائدة لسه الخدمة مقطوعة
حاولت إتصل علي خدمات المشتركين من تلفوني المقطوع زي ما بيحصل فى كثير
من بلاد الدنيا ( مفروض يكون رقم مجاني ) ما في طريقة
لسه الرقم مقطوع
حاولت إتصل من اي تلفون تاني
خدمات المشتركين طوالي مشغولة أو الشبكة مشغولة
ساعتين من الزهج والعكننة
أخيراً وبعد سلة روح ترد خدمات المشتركين
وريتهم الحاصل
قالت الموظفة : أستاذ فضل رصيدك 2565 دينار لكن فى زيادة 5% ضريبة
وبقت الرسوم 2580 دينار
تخيلوا
تخيلوا
من غير أي تنويه ومن غير أدني إهتمام بالمشتركين
الغريبة الشركة كل يوم منزلا إعلان فى الجرائد
يعني لو أعلنوا بكل شجاعة عن تكلفة الخدمة فى وسائل الإعلان مش كان أفضل
ويعكسوا مدي إحترامهم وإهتمامهم بالزباين اللسه صابرين عليهم؟؟؟؟


علي العموم يا موبيتل
فاضل لينا معاك تلاتة شهور
يا حالك إنعدل
يا....
وهي كلها 100 - 200 رسالة بالرقم الجديد
ويادار ما دخلك شر
ففي الشركات ابدال وفي الترك راحة وفي القلب صبر للحبيب ولو جفا

الحبيب بس لكن ما أي زول تاني

Quote: وهي كلها 100 - 200 رسالة بالرقم الجديد ويادار ما دخلك شر

ناس موبيتل ما دايرين يفهمو كدة يا فضل ..

طيب واحد يفتي لينا في موضوع محطات التقوية العملتها موبيتيل في الاحياء السكنية بموجب اغراءات
لا تقاوم واثر ذلك علي صحة الناس والبيئة من حولهم؟ وما هو واجب منظمات المجتمع المدني في مقاومة
مثل هذه الحالات ان كان بها ثمة ضرر؟

ولأنو ثبتوا لينا جهاز تقوية قبل راس بيتنا يعني عند جيراننا الما ساكنين...فاذا المسألة حسب سمعكم فيها خطورة بركب باكر دي واقلعوا علي عينك يا تاجر...

عليكم الله افتونا لو في زول عندو فكرة

عزيزي فضـل ..
تحياتي وحبي ..

Quote: علي العموم يا موبيتل فاضل لينا معاك تلاتة شهور يا حالك إنعدل يا....

تااااااني تلاتة شـهور ؟؟؟
تسـتاهـل إذا ..
سـبب واحـد والله يخليك معاهم مافي .
وزي ما قلت يعني قائمة الأسماء فيها كم رقم ؟
200 ، 300 ، رشـهم رسائل بالرقم الجديد
وعلى موبيتل السلام ..
لأنو يا صاحبي سبب واحد يخليك تدفع 100 ألف
في السنة رسوم استقبال مافي ..

إنت عارف موبيتل ما ح تخلي المسألة دي إلا بالضغط
لأنها وببساطة تامة بتلهط من وراها 270 مليار في السنة
أحسبها :

25000 كل 3 شهور ( خت في بالك ناس الخط ، لأنهم أكتر)
في السنة بتجدد 4 مرات = 100 ألف
100 ألف أضربها في 2 مليون وسبعمائة مشترك .

فقي رايك في شركة بتتنازل عن سرقة زي دي بأخوي وأخوك

دعـوهـا اليوم قبل الغد .

مـع الشـكر ..

عزيزي حسين يوسف
الحساب ولد
التلاتة شهور دي
عشان يا دوب الليلة نشطت حسابي معاهم
وبتخلص بعد 3 شهور
صدقني يومها التخلص
موبيتل باي باي

وممكن أخد قريب من رقمي بتاع موبيتل عند شركة تانية
ويا خسارة 5 سنين من الولف

عزيزي فاضل ..
أحر التعازي لهذه الفترة وربنا يصبرك ..

Quote: وممكن أخد قريب من رقمي بتاع موبيتل عند شركة تانية ويا خسارة 5 سنين من الولف

وعن تجربة أقول ليك :
ولا تهتم والله ..
لأنو كان عندي رقم يجنن ، بنت مدير موبيتل ما عندها .
رقم مميز للغاية ..
لدرجة إنو ما في أي زول بكتبو .
ومع دا كله هسع راميه في جيب المحفظة ..

مع الحب ..

عزيزي ناذر

يا ريت لو الحكاية علي الفهم وبس
تعرف موبيتل لو ما عدلت من طريقة التسعير
وحسنت من خدماتها
ح تفقد نسبة كبيرة جداً من ال market share بتاعا
قبل اريبا وسوداني
كانت نسبة موبيتل 100 % من خدمة الهاتف السيار
الليلة كم؟؟؟؟؟؟؟؟؟؟؟
لو الإدارة بتحسبا صاح
الإدارة نفسها ح تكون مافي بعد شوية بفقدان الوظيفة وتخفيض تكاليف العمالة وكدا
الشركة كويتية والخبرات الفيها ما ساهلة
لكن يبدو إنهم لحدي اليوم ما فاهمين سلوك المستهلك
الله يكون فى العون

الاخ فاضل ...
تحياتى ..
قبل فترة كانت نزلت موبيتل اعلان فى الجرايد يقول
اشترى كرت ب 30 ألف وليك رصيد 20 ألف ... قمت بشراء
الكرت ... شغلت التلفون وسألت عن الرصيد لم اجد المبلغ
المهم اتصلت عليهم(بعدالساعة 2 صباحا) قالوا لى بنزل
الرصيد بعد أول مكالمة ... عملت أول مكالمة ونزل لى
رصيد 10 ألف فقط اتصلت مره ثانية (يومين بحاول فى
خدمة المشتركين) قال لى مابينزل الرصيد كامل هسه 10 ألف
وبعد شهر 10ألف تانية .. شوف الكذب وعدم الوضوح مع
المستهلك أو الزبون ...

تعرف أسوأ حاجة فى السودان والكلام ده مش لشركات
الاتصالات فقط لكن فى كل المجالات لا توجد أى خدمات مشتركين
بالمعنى الاصلى ليها ودى اكتر شئ بضر فى الاعمال بصورة
عامة ...

شوف مثلا أريبا .. هى شركة وان كانت حديثة ليس فى السودان
فقط ولكن فى كل الدول التى تقدم خدماتها بها فهى ناجحة
لانها تهتم بخدمة المشتركين .... والافضل ان خدماتها مقارنة
بموبيتل اصبحت افضل .. يكفى انو تشحن موبايلك بخمسين ألف
ليصبح صالحا للاستقبال لمدة عام وكامل المبلغ موجود رصيد
مكالمات ...

لابد للشركة الكويتية المالكة لموبيتل أن تبدأ بتصفية
وتشريد كل العاملين فى التسويق وخدمة المشتركين لكى
تكسب ود المشتركين مرة أخرى وزى ماقلت

Quote: ( تكاليف إستعادة زبون تساوي 6 مرات تكاليف جذب زبون جديد )

بس مين يفهم ... !!!!

ســــــــــــــوداني وخليـــــك ســـــــوداني





سيليكون وينك

منعـم يا حبيبي ..
تحياتي ..

Quote: ســــــــــــــوداني وخليـــــك ســـــــوداني

مـا عايزين نعمـل دعاية للشركات ..
لكن الحق يقـال :

سـوداني وخليك سوداني ..

يكفي إنو هسع أنا شغال نت بسوداني .
والكرت أبو عشرة لمان ننساه حتى يكمل .
أضف جودة الشبكة ، يعني مسألة السبكة مشغولة
دي زمااااااااان نسيناها .

بس عيوبهم :

عدم توفر المنتج إلا سوق أسود ( أجهزة وشرايح)
ولو شدوا حيلهم ووفروا المنتج موبيتل تاكل نيم

مع الود ...

تعرف يا منعم سودانى كويس بس مشكلته واحدة ..









ماهى ؟؟؟؟؟

celecon
تحياتي ..

Quote: تعرف يا منعم سودانى كويس بس مشكلته واحدة .. ماهى ؟؟؟؟؟

1/ دخـل السوق الأسود ..
2/ عدم توفر المنتج ..
3/ الرسائل العالمية .
4 / .............. خليتها ليك .

مع الحب .

أخى حسن ...

تحياتى ..

فعلا الحاجات الفصلتها هى المشكلة الاساسية
وبالذات السوق السوداء والرسائل العالمية
لانو هو طبعا فى الاساس ليس جى اس أم .....
بس للاستخدام الداخلى مافى ارخص ولا أحسن
منو ...

يلا سودانى وخليك ســـــــــــــودانى ...

عبدالمنعم :
تبيع الرقم ؟؟؟

طيب واحد يفتي لينا في موضوع محطات التقوية العملتها موبيتيل في الاحياء السكنية بموجب اغراءات
لا تقاوم واثر ذلك علي صحة الناس والبيئة من حولهم؟ وما هو واجب منظمات المجتمع المدني في مقاومة
مثل هذه الحالات ان كان بها ثمة ضرر؟

ولأنو ثبتوا لينا جهاز تقوية قبل راس بيتنا يعني عند جيراننا الما ساكنين...فاذا المسألة حسب سمعكم فيها خطورة بركب باكر دي واقلعوا علي عينك يا تاجر...

عليكم الله افتونا لو في زول عندو فكرة


قلنا نخرم ليكم بي هنا...اذا فوق ما شفتو السؤال

أخي نزار حسين
والله أنا ما عارف من ناحية علمية
مدي تأثير أبراج التقوية علي الإنسان
لكن لو كان فى موبايل جمب تلفزيون ولا رادي ولا كمبيوتر
وكان في مكالمة أو رسالة ( واردة أو صادرة )
شوف بيحصل شنو ؟؟؟؟
وطالما يا عزيزي إنو دماغ البني آدم فيهو كهرباء وذبذبات
وكدا
فأكيد أكيد بيحصل ليهو تأثير من أبراج التقوية المعلقة فوق العمارات
والبتخدم آلاف الأجهزة



والله أعلم
مودتي
فضل كرار

الحبيب فضل
ياخي أنا مشكلتك دي بالكربون عندي

موبيتل بتلعب على وتر إنو العميل ماحيقدر يستغني عن رقمه ويستبدله لأنها بتعتقد إنو عملية الإستبدال صعبه وزي ماقلت ميه وللا ميتين رساله وينتهي الموضوع ...
الغريبه إنو موبيتل دي مفروض تكون شبعت خلاص بعد الفتره الطويله دي مع العلم إنها مارست الإحتكار فتره طويله جداً ومصت من العملاء أموال مهوله وزمان أذكر إنو لو في زول ضارب ليك برضو بخصموا منك .

عموماً أنا حأصبر معاك تلاته شهور تاني وبعدها طره وكتابه ياسوداني ياأريبا البتقع بمشي عليها ..

أخي محمد فرح

أبجديات الإدارة
إنو أي شركة عندها أربعة أهداف
الأرباح ، النمو ، الإستمرارية والتبادل مع المجتمع
profits, growth, survival and exchange
والإدارة الناجحة هي البتوازن بين أهدافها

ودا ( قد ) يتطلب التضحية ببعض الأرباح علي المدي القصير
أو المتوسط
لكن علي المدي الإستراتيجي
فالهدف الحقيقي هو الإستمرارية
عشان تستمر فى السوق عليك أن تحافظ علي العملاء


لكن بالطريقة الشغالة بيها كوبيتل حالياً
الله أعلم يكون فى عملاء بعد شوية

لك مودتي
فضل كرار